18-دەرس
مۈشكۈل ئەھۋالدىكى قېرىنداشلىرىمىزغا قانداق ياردەم بېرىمىز؟
دومىنىكا جۇمھۇرىيىتى
ياپونىيە
ھايتى
ئاپەت يۈز بەرگەندە، يەھۋا گۇۋاھچىلىرى مۈشكۈل ئەھۋالدا قالغان قېرىنداشلىرىغا ياردەم بېرىش ئۈچۈن دەرھال تەشكىللىنىدۇ. شۇ ئارقىلىق بىر-بىرىمىزگە بولغان ھەقىقىي مېھىر-مۇھەببىتىمىزنى كۆرسىتىمىز (يۇھاننا 13:34، 35؛ 1-يۇھاننا 3:17، 18). بىز ياردەم قولىمىزنى قانداق سۇنىمىز؟
ئىئانە پۇلى بېرىمىز. بىرىنچى ئەسىردە ئانتاكيادىكى ئېتىقادچىلار يەھۇدىيەدىكى ئاچارچىلىققا ئۇچرىغان قېرىنداشلىرىغا ئىئانە پۇلى ئەۋەتكەن (ئەلچىلەر 11:27–30). شۇنىڭغا ئوخشاش، بىزمۇ دۇنيانىڭ بەزى جايلىرىدىكى قىيىنچىلىقلارغا ئۇچرىغان قېرىنداشلىرىمىزنىڭ جىددىي موھتاجلىقلىرىغا ماددىي ياردەم بېرىش ئۈچۈن جامائىتىمىز ئارقىلىق ئىئانىلەرنى ئەۋەتىمىز. — 2-كورىنتلىقلار 8:13–15.
ئەمەلىي ياردەم بېرىمىز. ئاپەت يۈز بەرگەن جايدىكى ئاقساقاللار ھەربىر جامائەت ئەزالىرىنىڭ خەۋىرىنى ئېلىپ، ئۇلارنىڭ ئەھۋالىدىن تولۇق خەۋەردار بولىدۇ. ياردەم ئورۇنلاشتۇرۇش كېڭىشى يېمەك-ئىچمەك، پاكىزە سۇ، كىيىم-كېچەك، پاناھ جاي ۋە تېببىي ياردەم بىلەن تەمىنلەشنى تەشكىللەيدۇ. كۆپلىگەن گۇۋاھچىلار بۇزۇلغان ئۆيلەر ۋە پادىشاھلىق يىغىلىش زاللىرىنى رېمونت قىلىش ياكى باشقا ياردەم بېرىش ئىشلىرىغا قاتنىشىش ئۈچۈن ئۆز ئىقتىسادىنى سەرپ قىلىپ ياردەمگە بارىدۇ. بىز يەھۋا گۇۋاھچىلىرى ئىناق-ئىتتىپاق بىر تەشكىلات بولۇپ ئۇيۇشقان ۋە دائىم بىرلىكتە خىزمەت قىلىپ كۆپلىگەن تەجرىبىلەرگە ئىگە بولغاچ، ئاپەتلەرگە ياردەم بېرىشكە تېزلىكتە ھەرىكەتكە كېلەلەيمىز. بىز ياردەم قولىمىزنى «ئېتىقادچى قېرىنداشلىرىمىزغا» سۇنۇپلا قالماستىن، قانداق دىنغا ئېتىقاد قىلىشىغا قارىماي، باشقىلارغىمۇ ئىمكانىيەتنىڭ بارچە ياردەم بېرىمىز. — گالاتىيالىقلار 6:10.
مۇقەددەس كىتابتىن روھىي تەسەللىي بېرىمىز ۋە كۆڭلىنى ياسايمىز. ئاپەتكە ئۇچۇرغانلار تەسەللىيگە ئەڭ موھتاج بولىدۇ. شۇنداق مۈشكۈل ئەھۋالدا، «بارلىق تەسەللىنىڭ مەنبەسى بولغان» يەھۋا بىزگە كۈچ بېرىدۇ (2-كورىنتلىقلار 1:3، 4). چۈشكۈنلەشكەن كىشىلەر بىلەن مۇقەددەس كىتابتىكى ۋەدىلەرنى ئورتاقلىشىپ، خۇدا پادىشاھلىقى پات-ئارىدا قايغۇ-ھەسرەت ۋە ئازاب-ئوقۇبەتنى پەيدا قىلىدىغان بارلىق پاجىئەلەرنى چوقۇم يوق قىلىدىغانلىقىنى ئېيتىپ، ئۇلارغا تەسەللىي بېرىمىز. — ۋەھىيلەر 21:4.
ئاپەتلەر يۈز بەرگەندە، يەھۋا گۇۋاھچىلىرى نېمە ئۈچۈن ياردەم بېرىشكە تېزلىكتە ھەرىكەتكە كېلەلەيدۇ؟
ئاپەتكە ئۇچۇرغانلار ئۈچۈن قانداق روھىي تەسەللىي بېرەلەيمىز؟