10-تەتقىق ماقالىسى
يەھۋاغا بولغان مېھىر-مۇھەببىتىڭىز سىزنى چۆمۈلدۈرۈلۈشكە دەۋەت قىلسۇن
«مېنىڭ سۇغا چۆمۈلدۈرۈلۈشۈمگە نېمە توسقۇنلۇق قىلالايدۇ؟»—ئەلچى. 8:36
10-ناخشا «مانا مەن، ئەۋەت مېنى!»
بۇ ماقالىدەa
1، 2. ئەلچىلەر 8:27—31، 35—38-ئايەتلەردىن كۆرگىنىمىزدەك، ئېفىئوپىيىلىك ئەمەلدارنى چۆمۈلدۈرۈلۈشكە نېمە دەۋەت قىلغان؟
سىز مەسىھنىڭ ئەگەشكۈچىسى سۈپىتىدە چۆمۈلدۈرۈلۈشتىن ئۆتۈشنى خالامسىز؟ مېھىر-مۇھەببەت ۋە مىننەتدارلىق نۇرغۇن ئادەملەرنى شۇنداق قارارنى قىلىشقا دەۋەت قىلغان. ئېفىئوپىيىلىك ئايال پادىشاھنىڭ سارىيىدا خىزمەت قىلغان ئەمەلدارنىڭ مىسالىنى كۆرۈپ چىقايلى.
2 ئېفىئوپىيىلىك ئەمەلدار يازمىلاردىن چۆمۈلدۈرۈلۈشى كېرەكلىكىنى چۈشەنگەندە، دەرھال ھەرىكەت قىلغان (ئەلچىلەر 8:27—31، 35—38-نى ئوقۇڭ). نېمە ئۇنى دەۋەت قىلغان؟ ئۇ خۇدا سۆزىنى قەدىرلىگەن. بۇ ئۇنىڭ ئات ھارۋۇدا كېلىۋاتقاندا يەشايا كىتابىنى ئوقۇغانلىقىدىن كۆرۈنىدۇ. فىلىپ بىلەن سۆزلەشكەندىن كېيىن، ئۇ ئەيسانىڭ ئۇنىڭ ئۈچۈن قىلغانلىرىغا مىننەتدار بولغان. لېكىن، ئەمەلدار نېمە ئۈچۈن يېرۇسالىمغا سەپەر قىلغان؟ چۈنكى، ئۇ يەھۋا خۇدانى ياخشى كۆرگەن. بۇنى نەدىن بىلىمىز؟ ئۇ يېرۇسالىمدىن يەھۋاغا ئىبادەت قىلىپ كېلىۋاتقان ئىدى. بۇ كىشى ئاتا-بوۋىلىرىنىڭ دىنىنى تاشلاپ، ھەقىقىي خۇداغا ئىبادەت قىلغان بىردىن-بىر خەلققە قوشۇلغان. ئەمەلدار يەھۋانى سۆيگەچ، يەنە بىر مۇھىم ئىشنى قىلىشنى قارار قىلغان — ئۇ چۆمۈلدۈرۈلۈپ، مەسىھنىڭ شاگىرتى بولغان.—مەتتا 28:19.
3. چۆمۈلدۈرۈلۈشتىن ئۆتۈشكە نېمە توسالغۇلۇق قىلىشى مۇمكىن؟ («يۈرىكىڭىز قانداق يەرگە ئوخشايدۇ؟» ناملىق رامكىغا قاراڭ)
3 يەھۋاغا بولغان مېھىر-مۇھەببەت بىزنى چۆمۈلدۈرۈلۈش مۇراسىمىدىن ئۆتۈشكە دەۋەت قىلىشى مۇمكىن. بىراق، بۇ قەدەمنى بېسىشىمىزغا مېھىر-مۇھەببەت ھەم توسالغۇ بولۇشىمۇ مۇمكىن. قانداقلارچە؟ بىرنەچچە مىسالنى كۆرۈپ چىقايلى. مەسىلەن، سىز يەھۋاغا خىزمەت قىلمايدىغان دوستلىرىڭىز ۋە ئۇرۇق-تۇغقانلىرىڭىزنى ياخشى كۆرگەچكە، چۆمۈلدۈرۈلۈشتىن ئۆتسەم ئۇلار مېنى ئۆچ كۆرىدۇ دەپ قورقىدىغانسىز (مەتتا 10:37). ياكى بولمىسا، سىز ئۈچۈن خۇدا نەپرەتلىنىدىغان ئادەتنى ئۆچ كۆرۈش ۋە ئۇنى تاشلاش ئىنتايىن تەسكە توختىشى مۇمكىن (زەبۇر 97:10). بەلكىم، سىز ساختا دىن بىلەن باغلىنىشلىق بايراملارنى ئۆتكۈزۈپ چوڭ بولغانسىز. شۇ بايراملارنى سېغىنىپ، يەھۋانىڭ كۆڭلىنى رەنجىتىدىغان ئۆرپ-ئادەتلەرگە ئەمەل قىلىشنى توختىتىش سىز ئۈچۈن قىيىن بولۇشى مۇمكىن (1-كورىنت. 10:20، 21). شۇڭا، سىز كىمنى ياكى نېمىنى بەكرەك ياخشى كۆرىدىغانلىقىڭىزنى قارار قىلىشىڭىز كېرەك.
كىمنى بەكرەك سۆيىشىمىز كېرەك؟
4. چۆمۈلدۈرۈلۈشتىن ئۆتۈشكە نېمە دەۋەت قىلىشى كېرەك؟
4 سىز ياخشى كۆرىدىغان ۋە قەدىرلەيدىغان ياخشى نەرسىلەر كۆپ بولۇشى مۇمكىن. مەسىلەن، يەھۋا گۇۋاھچىلىرى بىلەن تېخى تونۇشماي تۇرۇپ، سىز خۇدانى سۆيۈپ، ئۇنىڭ يۈرىكىنى خۇشال قىلىشنى خالىغانسىز. كېيىن، سىز ئەيسا مەسىھنىمۇ سۆيۈشكە باشلىغانسىز. ھازىر سىز يەھۋا گۇۋاھچىلىرى بىلەن ئارىلىشىشنى ياخشى كۆرىدىغانسىز. ئەمما، بۇلارنى ياخشى كۆرۈش ئۆزىڭىزنى يەھۋاغا بېغىشلاپ، چۆمۈلدۈرۈلۈشتىن ئۆتۈشكە دەۋەت قىلماسلىقى مۇمكىن. ئەڭ مۇھىمى، بىزنى چۆمۈلدۈرۈلۈشكە يەھۋاغا بولغان مۇھەببەت دەۋەت قىلىشى كېرەك. يەھۋانى ھەممىدىن بەكرەك سۆيسىڭىز، ھېچنېمە ياكى ھېچكىمنىڭ سىزنى ئۇنىڭغا خىزمەت قىلىشتىن توسۇشىغا يول بەرمەيسىز. يەھۋاغا بولغان سۆيگۈ-مۇھەببەت سىزنى چۆمۈلدۈرۈلۈشكە دەۋەت قىلىدۇ ۋە چۆمۈلدۈرۈلۈشتىن كېيىنمۇ ئۇنىڭغا سادىق بولۇپ قېلىشىڭىزغا ياردەم بېرىدۇ.
5. بۇ ماقالىدىن نېمىنى بىلىۋالىمىز؟
5 ئەيسا بىزنى پۈتۈن يۈرىكىمىز، جېنىمىز، ئەقلىمىز ۋە كۈچىمىز بىلەن يەھۋانى سۆيۈشكە ئۈندىگەن (ماركۇس 12:30). يەھۋاغا بولغان چوڭقۇر سۆيگۈ-مۇھەببەت ۋە مىننەتدارلىقنى قانداق يېتىلدۈرەلەيسىز؟ يەھۋانىڭ سۆيگۈسى توغرۇلۇق چوڭقۇر ئويلانساق، بىزمۇ ئۇنى سۆيىمىز (1-يۇھاننا 4:19). بۇ ماقالىدىن، سىز يەھۋانى سۆيۈپ، چۆمۈلدۈرۈلۈشتىن ئۆتۈش ئۈچۈن نېمە قىلالايدىغانلىقىڭىزنى بىلىۋالىسىز.
6. رىملىقلار 1:20-ئايەتلەرگە ئاساسەن، يەھۋا توغرۇلۇق ئۆگىنىشنىڭ بىر ئۇسۇلى نېمە؟
6 يەھۋا توغرۇلۇق مەۋجۇداتلارغا قاراپ ئۆگىنىڭ (رىملىقلار 1:20-نى ئوقۇڭ؛ ۋەھىي. 4:11). يەھۋانىڭ ھايۋاناتلار ۋە ئۆسۈملۈكلەرنى ياراتقان ئۇسۇلىدىن كۆرۈنىدىغان دانالىقى توغرۇلۇق مۇلاھىزە قىلىڭ. ئادەمنىڭ تېنى قانداق ئاجايىپ يارىتىلغانلىقى ھەققىدىمۇ ئويلاپ كۆرۈڭ (زەبۇر 139:14). مىلياردلىغان يۇلتۇزلارنىڭ بىرى، قۇياشنىڭ قانچىلىك قۇۋۋەتلىك قىلىپ يارىتىلغانلىقى توغرۇلۇق ئويلاپ بېقىڭە!b (يەشايا 40:26). ئاجايىپ ياراتمىلار توغرۇلۇق چوڭقۇر ئويلانغاندا، يەھۋانى تېخىمۇ كۆپرەك ھۆرمەتلەيدىغان بولىسىز. لېكىن، يەھۋانىڭ دانا ۋە كۈچ-قۇدرەتلىك ئىكەنلىكىنى بىلىشلا يېتەرلىك ئەمەس. يەھۋا خۇدا بىلەن بولغان يېقىن مۇناسىۋەت ۋە ئۇنىڭغا بولغان مۇھەببىتىڭىزنى كۈچەيتىش ئۈچۈن، سىز ئۇنىڭ توغرۇلۇق بۇنىڭدىنمۇ كۆپرەك بىلىشىڭىز كېرەك.
7. يەھۋانى چىن يۈرەكتىن سۆيۈش ئۈچۈن، نېمىگە ئىشىنىشىڭىز كېرەك؟
7 يەھۋا خۇدا سىزنى ياخشى كۆرىدىغانلىقىغا ئىشەنچىڭىز كامىل بولسۇن. يەر بىلەن ئاسماننى ياراتقان قۇدرەتلىك خۇدا سىزگە نەزەر سېلىپ، سىزگە غەمخورلۇق قىلىدىغانلىقىغا ئىشىنىش سىز ئۈچۈن قىيىنمۇ؟ شۇنداق بولسا، ياراتقۇچىمىزنىڭ ھەرقايسىمىزدىن يىراق ئەمەسلىكىنى ئەستە تۇتۇڭ (ئەلچى. 17:26—28). «ئۇ ھەر بىر ئوي-پىكىر ۋە نىيەتنى بىلىدۇ» ۋە سىزگىمۇ خۇددى داۋۇت ئوغلى سۇلايمانغا ئېيتقاندەك، «سەن ئۇنى ئىزدىسەڭ، ئۇنى چوقۇم تاپالايسەن»، دەپ ۋەدە قىلىدۇ (1-تارىخ. 28:9). ئەمەلىيەتتە، سىزنىڭ مۇقەددەس كىتابنى ئۆگىنىۋاتقانلىقىڭىزنىڭ سەۋەبى — يەھۋانىڭ سىزنى ئۆزىگە جەلپ قىلغانلىقى (يەرەم. 31:3). يەھۋا سىز ئۈچۈن قىلغان ھەممە ياخشىلىقلارنى قانچە قەدىرلىسىڭىز، ئۇنىڭغا بولغان سۆيگۈ-مۇھەببىتىڭىز شۇنچە كۈچىيىدۇ.
8. يەھۋانىڭ مېھىر-مۇھەببىتىنى قەدىرلەيدىغانلىقىمىزنى قانداق كۆرسىتەلەيمىز؟
8 يەھۋانىڭ مېھىر-مۇھەببتىنى قەدىرلەيدىغانلىقىمىزنى كۆرسىتىشنىڭ بىر يولى — ئۇنىڭغا دۇئا قىلىش. يەھۋاغا غەم-ئەندىشىلىرىڭىزنى ئېيتىپ، ھەممە ياخشىلىقلىرى ئۈچۈن مىننەتدارلىقىڭىزنى بىلدۈرسىڭىز، ئۇنى تېخىمۇ ياخشى كۆرىسىز. خۇدانىڭ دۇئالىرىڭىزغا قانداق جاۋاب بەرگەنلىكىنى كۆرگەندە، ئۇنىڭغا تېخىمۇ يېقىنلىشىسىز (زەبۇر 116:1). شۇنداقلا، يەھۋا سىزنى چۈشۈنىدىغانلىقىغا كۆز يەتكۈزىسىز. لېكىن، يەھۋا بىلەن زىچ مۇناسىۋەتتە بولۇش ئۈچۈن، ئۇنىڭ ئوي-پىكىر قىلىش ئۇسۇلىنى ۋە سىزدىن نېمىنى تەلەپ قىلىدىغانلىقىنى چۈشىنىشىڭىز كېرەك. بۇنى چۈشىنىشنىڭ بىردىن-بىر يولى — ئۇنىڭ سۆزى مۇقەددەس كىتابنى ئۆگىنىش.
يەھۋا بىزدىن نېمە تەلەپ قىلىدىغانلىقىنى بىلىش ۋە ئۇنىڭغا يېقىنلىشىشنىڭ ئەڭ ياخشى يولى — مۇقەددەس كىتابنى ئۆگىنىش (9-ئابزاسقا قاراڭ)c
9. مۇقەددەس كىتابنى قەدىرلەيدىغانلىقىڭىزنى قانداق كۆرسىتەلەيسىز؟
9 خۇدا سۆزىنى قەدىرلەڭ. خۇدا ۋە ئۇنىڭ ئىرادىسى توغرۇلۇق ھەقىقەتنى پەقەت مۇقەددەس كىتابتىن تاپالايسىز. مۇقەددەس كىتابنى قەدىرلەيدىغانلىقىڭىزنى ئۇنى ھەر كۈنى ئوقۇش، تەتقىق ئۆگىنىشىگە تەييارلىق قىلىش ۋە ئۆگەنگەنلىرىڭىزنى ئەمەلىيەتتە قوللىنىش ئارقىلىق كۆرسىتەلەيسىز (زەبۇر 119:97، 99؛ يۇھاننا 17:17). مۇقەددەس كىتابنى ئوقۇش جەدۋىلىڭىز بارمۇ؟ بۇ جەدۋەل بويىچە مۇقەددەس كىتابنى ھەر كۈنى ئوقامسىز؟
10. مۇقەددەس كىتابنىڭ قانداق ئالاھىدىلىكى بار؟
10 مۇقەددەس كىتابنىڭ بىر ئالاھىدىلىكى — ئەيسانى ئۆز كۆزى بىلەن كۆرگەن ئادەملەرنىڭ ئۇ توغرۇلۇق يازغان بايانلىرى. ئەيسا سىز ئۈچۈن نېمە قىلغانلىقى پەقەت مۇقەددەس كىتابتا ئېنىق چۈشەندۈرۈلگەن. ئەيسانىڭ سۆزلىرى ۋە ئىش-ھەرىكەتلىرى توغرۇلۇق بىلگەندە، ئۇنىڭ بىلەن دوست بولۇشنى خالىشىڭىز مۇمكىن.
11. يەھۋاغا بولغان مېھىر-مۇھەببىتىڭىزنى قانداق ئاشۇرالايسىز؟
11 ئەيسانى ياخشى كۆرۈشنى ئۆگىنىڭ. ئەگەر ئەيسانى ياخشى كۆرسىڭىز، يەھۋاغا بولغان مېھىر-مۇھەببىتىڭىز ئاشىدۇ. نېمە ئۈچۈن؟ چۈنكى، ئەيسا ئاتىسىنىڭ ئېسىل پەزىلەتلىرىنى مۇكەممەل تۈردە ئەكس ئەتتۈرگەن (يۇھاننا 14:9). شۇڭا، ئەيسا توغرۇلۇق كۆپرەك بىلگەنسېرى، يەھۋا خۇدانىمۇ ياخشىراق تونۇپ، ئۇنى تېخىمۇ ياخشى كۆرىسىز. ئادەملەر كەمبەغەل، كېسەل ياكى ئاجىز بولغانلارنى كەمسىتسىمۇ، ئەيسانىڭ ئۇلارغا ئىچ ئاغرىتقانلىقى توغرۇلۇق ئويلاپ بېقىڭ. شۇنداقلا ئەيسانىڭ سىزگە بەرگەن ئەمەلىي مەسلىھەتلىرى ۋە ئۇلارنى قوللىنىش ھاياتىڭىزنى قانداق ياخشىلايدىغانلىقى توغرۇلۇق ئويلىنىڭ.—مەتتا 5:1—11؛ 7:24—27.
12. ئەيسا توغرۇلۇق كۆپرەك ئۆگىنىش سىزنى نېمىگە دەۋەت قىلىشى مۇمكىن؟
12 ئەيسانىڭ گۇناھلىرىمىزنىڭ كەچۈرۈلۈشى ئۈچۈن بەرگەن قۇربانلىقى توغرۇلۇق چوڭقۇر ئويلانسىڭىز، ئۇنىڭغا بولغان مېھىر-مۇھەببىتىڭىز كۈچىيىدۇ (مەتتا 20:28). ئەيسا سىز ئۈچۈن ئۆلۈشكە تەييار بولغانلىقىنى چۈشىنىش سىزنى توۋا قىلىشقا ۋە يەھۋادىن گۇناھلىرىڭىز ئۈچۈن كەچۈرۈم سوراشقا دەۋەت قىلىشى مۇمكىن (ئەلچى. 3:19، 20؛ 1-يۇھاننا 1:9). يەھۋاغا ۋە ئەيساغا بولغان مۇھەببىتىڭىز چوڭقۇرلاشقانسېرى، ئۇلارنى سۆيىدىغان بولىسىز ۋە ئۇلارنى سۆيىدىغان باشقا ئادەملەر بىلەنمۇ ئارىلىشىشنى تەبىئىيلا خالايسىز.
13. يەھۋا خۇدا سىزگە قانداق ياردەم بېرەلەيدۇ؟
13 يەھۋانىڭ ئائىلىسىنى ياخشى كۆرۈڭ. خۇداغا ئىشەنمەيدىغان ئۇرۇق-تۇغقانلىرىڭىز ۋە بۇرۇنقى دوست-بۇرادەرلىرىڭىز نېمە ئۈچۈن يەھۋا خۇداغا ئۆزىڭىزنى بېغىشلىماقچى بولغانلىقىڭىزنى چۈشەنمەسلىكى مۇمكىن. ھەتتا ئۇلار سىزگە قارشى چىقىدۇ. لېكىن، خۇدا جامائەتتىكى قېرىنداشلار بىلەن بىر ئائىلە كىشىلىرىدەك بولۇشىڭىزغا ياردەم بېرەلەيدۇ. قېرىنداشلارغا يېقىن بولسىڭىز، ئۇلار سىزنى چوقۇم ياخشى كۆرىدۇ ۋە قوللاپ-قۇۋۋەتلەيدۇ (ماركۇس 10:29، 30؛ ئىبرانىي. 10:24، 25). ۋاقىت-سائىتى كەلگەندە، ئۆز ئائىلە ئەزالىرىڭىزمۇ يەھۋانىڭ ئۆلچەملىرى بويىچە ياشاپ، ئۇنىڭغا خىزمەت قىلىشى مۇمكىن.—1-پېتر. 2:12.
14. 1-يۇھاننا 5:3-ئايەتتىن، يەھۋانىڭ ئۆلچەملىرى توغرۇلۇق نېمىنى بىلىۋالدىڭىز؟
14 يەھۋانىڭ ئۆلچەملىرىنى ياخشى كۆرۈڭ ۋە ئەمەلىيەتتە قوللىنىشنى ئۆگىنىڭ. يەھۋانى تونۇشتىن ئاۋۋال، سىز نېمىنىڭ ياخشى ۋە نېمىنىڭ يامان ئىكەنلىكىنى ئۆز ئالدىڭىزغا قارار قىلاتتىڭىز. بىراق، ھازىر يەھۋانىڭ ئۆلچەملىرى ئەڭ ياخشى ئىكەنلىكىنى چۈشىنىپ يەتتىڭىز (زەبۇر 1:1—3؛ 1-يۇھاننا 5:3-نى ئوقۇڭ). مۇقەددەس كىتابتا ئەرلەر، ئاياللار، ئاتا-ئانىلار ۋە بالىلارغا بېرىلگەن نەسىھەتلەرنى ئالايلى (ئەفەس. 5:22—6:4). سىز بۇ نەسىھەتلەرگە قۇلاق سالغاچقا، ئائىلىڭىز بەختلىكرەك تۇرمۇش كەچۈرۈۋاتامدۇ؟ دوستلارنى دانالىق بىلەن تاللاش توغرۇلۇق خۇدانىڭ كۆرسەتمىلىرىگە ئەمەل قىلغاچقا، سىزنىڭ شەخسىي ئادەتلىرىڭىزدە ياخشىلىنىش بولدىمۇ؟ سىز ئۆزىڭىزنى بەختلىكرەك ھېس قىلامسىز؟—پەند. نە 13:20؛ 1-كورىنت. 15:33.
15. مۇقەددەس كىتاب قائىدە-پرىنسىپلىرىنى ئەمەلىيەتتە قوللىنىشىڭىزغا نېمە ياردەم بېرىشى مۇمكىن؟
15 بەزىدە مۇقەددەس كىتابتىن ئۆگەنگەن قائىدە-پرىنسىپلارنى ھاياتىڭىزدا قانداق قوللىنىشنى بىلمەسلىكىڭىز مۇمكىن. شۇڭا، يەھۋا ئۆز تەشكىلاتى ئارقىلىق ياخشى-ياماننى پەرق قىلىشىڭىزغا ياردەم بېرىدىغان مۇقەددەس كىتابقا ئاساسلانغان ماتېرىياللار بىلەن تەمىنلەيدۇ (ئىبرانىي. 5:13، 14). سىز بۇ ماتېرىياللارنى ئوقۇپ-ئۆگەنگەندە، ئۇنىڭ پايدىلىق ئىكەنلىكىنى كۆرۈپ، بەلكىم يەھۋانىڭ تەشكىلاتىغا قوشۇلۇشنى خالىشىڭىز مۇمكىن.
16. يەھۋا خۇدا ئۆز خەلقىنى قانداق تەشكىللىگەن؟
16 يەھۋانىڭ تەشكىلاتىنى ياخشى كۆرۈڭ ۋە قوللاڭ. يەھۋا خۇدا ئۆز خەلقى ئۈچۈن جامائەتلەرنى تەشكىللىگەن. ئۇنىڭ ئوغلى ئەيسا بارلىق جامائەتلەرنىڭ بېشى (ئەفەس. 1:22؛ 5:23). ئەيسا كىچىك بىر گۇرۇپپا مەسىھ قىلىنغان ئەگەشكۈچىلىرىنى بۈگۈنكى كۈندە يەھۋانىڭ ئىرادىسىنى ئورۇنلاش خىزمىتىنى تەشكىللەشكە يېتەكچىلىك قىلىشقا تەيىنلىگەن. ئۇ بۇ بىر توپ كىشىلەرنى «سادىق ۋە ئەقىل-پاراسەتلىك قۇل» دەپ ئاتىغان ۋە ئۇلار ئۆزىگە تاپشۇرۇلغان ۋەزىپىنى ئەستايىدىل ئورۇنلاپ، سىزنىڭ يەھۋاغا يېقىنلىشىشىڭىز ۋە ئۇنىڭ بىلەن بولغان مۇناسىۋىتىڭىزنى ساقلىشىڭىزغا ياردەم بېرىدۇ (مەتتا 24:45—47). سادىق قۇل سىزگە غەمخورلۇق قىلىپ، سىزگە يېتەكچىلىك قىلىدىغان ئاقساقاللارنى تەيىنلىگەن (يەشايا 32:1، 2؛ ئىبرانىي. 13:17؛ 1-پېتر. 5:2، 3). ئاقساقاللار سىزنى ئىلھاملاندۇرۇش ۋە يەھۋاغا يېقىنلىشىشىڭىزغا ياردەم بېرىش ئۈچۈن بار كۈچىنى چىقىرىشقا تەييار. ئەمما، ئۇلارنىڭ سىزگە ياردەم بېرەلەيدىغان ئەڭ مۇھىم ئۇسۇللىرىدىن بىرى — سىزنىڭ باشقىلارغا يەھۋا توغرۇلۇق ئۆگىتىشىڭىزگە ياردەم بېرىش.—ئەفەس. 4:11—13.
17. رىملىقلار 10:10، 13، 14-ئايەتلەرگە ئاساسەن، بىز باشقىلارغا نېمە ئۈچۈن يەھۋا توغرۇلۇق ئېيتىشىمىز مۇھىم؟
17 باشقىلارنىڭ يەھۋانى ياخشى كۆرۈشىگە ياردەم بېرىڭ. ئەيسا شاگىرتلىرىغا باشقىلارغا يەھۋا توغرۇلۇق تەلىم بېرىشنى بۇيرىغان (مەتتا 28:19، 20). بىز بۇ بۇيرۇقنى پەقەت مەجبۇرىيەتنى ئادا قىلىش ئۈچۈن ئورۇنلىساق بولاتتى. لېكىن، يەھۋاغا بولغان مېھىر-مۇھەببىتىمىز كۈچەيگەنسېرى، سىز پېترۇس ۋە يوھاننادەك: «بىز كۆرگەن ۋە ئاڭلىغانلىرىمىزنى ئېيتماي تۇرالمايمىز»،— دەپ ئېيتىشىڭىز مۇمكىن (ئەلچى. 4:20). باشقىلارغا يەھۋانى ياخشى كۆرۈشكە ياردەم بېرىش بىزنى بەك خۇشال قىلىدۇ. فىلىپ ئېفىئوپىيىلىك ئەمەلدارغا يازمىلاردىكى ھەقىقەتنى كۆرۈپ يېتىشى ۋە چۆمۈلدۈرۈلۈشتىن ئۆتۈشىگە ياردەم بەرگەندە، ئۆزىنى قانچىلىك خۇشال ھېس قىلغانلىقىنى تەسەۋۋۇر قىلىپ كۆرۈڭە! فىلىپتىن ئۈلگە ئېلىپ، ئەيسانىڭ بۇيرۇقىغا قۇلاق سالسىڭىز، سىزمۇ يەھۋا گۇۋاھچىلىرىنىڭ بىرى بولۇشنى خالايدىغانلىقىڭىزنى كۆرسىتىسىز (رىملىقلار 10:10، 13، 14-نى ئوقۇڭ). شۇ چاغدا سىزمۇ ئاشۇ ئەمەلدارغا ئوخشاش: «مېنىڭ سۇغا چۆمۈلدۈرۈلۈشۈمگە نېمە توسقۇنلۇق قىلالايدۇ؟»— دەپ سورىشىڭىز مۇمكىن.—ئەلچى. 8:36.
18. كېيىنكى ماقالىدە، نېمىلەرنى كۆرۈپ چىقىمىز؟
18 چۆمۈلدۈرۈلۈشتىن ئۆتۈش — ھاياتتىكى ئەڭ مۇھىم قارارلارنىڭ بىرى بولغاچ، بۇ قارارغا نېمىنى ئۆز ئىچىگە ئالىدىغانلىقى توغرۇلۇق چوڭقۇر ئويلىنىشىڭىز لازىم. چۆمۈلدۈرۈلۈش مۇراسىمى توغرۇلۇق نېمىنى بىلىشىڭىز كېرەك؟ چۆمۈلدۈرۈلۈشتىن ئۆتۈشتىن بۇرۇن ۋە ئۇنىڭدىن كېيىن نېمە قىلىشىڭىز لازىم؟ بۇ سوئاللارنىڭ جاۋابىنى كېيىنكى ماقالىدىن تاپىمىز.
138-ناخشا يەھۋا — سېنىڭ ئىسمىڭ
a بەزىلەر يەھۋانى ياخشى كۆرسىمۇ، چۆمۈلدۈرۈلۈشتىن ئۆتۈشكە ۋە يەھۋا گۇۋاھچىسى بولۇشقا تەييار ئەمەسمەن، دەپ ئويلايدۇ. سىزمۇ شۇنداق ئوي-خىيالدا بولسىڭىز، چۆمۈلدۈرۈلۈشتىن ئۆتۈش ئۈچۈن نېمە قىلالايدىغانلىقىڭىز توغرۇلۇق يەنە بىر قېتىم ئويلىنىپ كۆرۈڭ.
b jw.org تور بېكىتىدىكى «ئاجايىپ ياراتمىلار»، دېگەن بىر قاتار ماقالىلەرگە قاراڭ (مۇقەددەس كىتاب تەلىملىرى > ئىلىم-پەن ۋە مۇقەددەس كىتاب)
c سۈرەتتە: قېرىنداش بازاردا ئۇچراتقان ياش ئايالغا ۋاراقچىنى بېرىۋاتىدۇ.