1921. يۈز يىل بۇرۇن
كۈزىتىش مۇنارى ژۇرنىلى، 1921-يىلى، 1-يانۋار سانىدا، مۇقەددەس كىتابنى قىزغىن تەتقىق قىلغۇچىلار مۇنداق بىر سوئالنى ئوتتۇرىغا قويغان. «بۇ يىل بىزنى قانداق ئىشلار كۈتۈۋاتىدۇ؟» بۇ سوئالنىڭ جاۋابى، يەشايا 61:1، 2-ئايەتلەردە تىلغا ئېلىنغاندەك، خۇش خەۋەرنى جاكارلاش ئىدى. «يەھۋا مېنى ياۋاشلارغا خۇش خەۋەرنى يەتكۈزۈشكە مەسىھ قىلدى. . . پەرۋەردىگارنىڭ شاپائەت كۆرسىتىدىغان يىلىنى، خۇدايىمىزنىڭ قىساس ئالدىغان كۈنىنى ئېلان قىلىش، . . . ئۈچۈن ئەۋەتتى»
جەسۇر ۋەز ئېيتقۇچىلار
مۆمىنلەرگە خۇش خەۋەرنى يەتكۈزۈپ، رەزىللىك قىلغۇچىلارغا بولسا، خۇدانىڭ قىساس كۈنى ھەققىدە جاكارلىشى ئۈچۈن، مۇقەددەس كىتابنى تەتقىق قىلغۇچىلار جەسۇر بولۇشى كېرەك ئىدى.
كانادادا ياشىغان بۇرادەر خوسكىن قارشىلىقلارغا قارىماي، جەسۇرلۇق بىلەن گۇۋاھلىق بەرگەن. 1921-يىلى باھاردا، ئۇ بىر چىركاۋنىڭ روھانىيسى بىلەن ئۇچرىشىپ قالغان. بۇرادەر خوسكىن سۆھبەت باشلاپ: «بىز مۇقەددەس كىتاب ھەققىدە خۇشال-خۇرام سۆھبەت ئۆتكۈزۈشىمىز كېرەك. ھەتتا بەزى نەرسىلەردە ئوي-پىكىرىمىز بىر يەردىن چىقمىسىمۇ، بىز يەنىلا سۆھبىتىمىزنى تىنچ دوستانە ئاخىرلاشتۇرالايمىز»،— دېگەن. بىراق، ئىشلار ئۇنداق بولمىغانىدى. خوسكىن ئەسلەپ شۇنداق دەيدۇ: «بىز پاراڭلىشىپ بىر قانچە مىنۇت ئۆتۈپ، شۇ روھانىي ئىشىكنى قاتتىق يېپىۋەتتى. مەن ئىشىكنىڭ ئەينەكلىرى پارچە-پارچە بولۇپ كېتىدىغان بولدى دەپ ئويلىدىم».
چىركاۋنىڭ روھانىيسى: «سەن بېرىپ، خۇدانى تونۇمايدىغانلار بىلەن پاراڭلاش!»— دەپ ۋاقىرىغان. بۇرادەر خوسكىن ئارتۇق گەپ-سۆز قىلماي كېتىپ قالغان. ئۇ ئۆز-ئۆزىگە: «مەن دەل خۇدانى تونۇمايدىغان بىرى بىلەن پاراڭلىشىپ قاپتىمەن»،— دېگەن.
ئەتىسى چىركاۋدا، روھانىي كىشىلەرگە ئۇ ھەققىدە يالغان سۆزلەرنى ئېيتىپ، شۇنداق دېگەن ئىكەن: «بۇ كىشى كىچىك شەھىرىمىزدىكى ئۇچىغا چىققان يالغانچى، ئۇ ئۆلتۈرۈلىشى كېرەك». بىراق، بۇ بۇرادىرىمىزنى توختىتىپ قويمىغان. ئۇ داۋاملىق ۋەز قىلىپ، نۇرغۇن ئادەملەر بىلەن سۆھبەتلەشكەن. ئۇ يەنە: «مەن ئۇ يەردە ۋەز قىلىپ، كۆپ خۇشاللىق تاپتىم. ھەتتا بەزى ئادەملەر: «مەن بىلىمەن، خۇدا سېنى ئەۋەتكەن. ساڭا قانداق ياردەم بېرەلەيمىز؟»— دەپ ئېھتىياجلىق نەرسىلەرنى ماڭا بەرگەن»،— دەيدۇ
شەخسىي ۋە ئائىلىۋى تەتقىق
قىزىقىش كۆرسەتكەن كىشىلەرنىڭ روھىي جەھەتتىن ئۆسۈشىگە ياردەم بېرىش ئۈچۈن، مۇقەددەس كىتابنى تەتقىق قىلغۇچىلار «ئالتۇن دەۋىر»a ژۇرنىلىدا، مۇقەددەس كىتاب تەتقىق دەرسلىرىنى نەشىر قىلغان. شۇ يەردە ياشلار ئۈچۈن مۇقەددەس كىتابقا مۇناسىۋەتلىك سوئاللار بولغان. ئاتا-ئانىلار بالىلاردىن ئاشۇ سوئاللارنى سورىغان ۋە ئۇلارنىڭ مۇقەددەس كىتابتىن جاۋابلارنى تېپىشىغا ياردەم بەرگەن. بەزى سوئاللار، مەسىلەن مۇقەددەس كىتاب قانچە كىتابنى ئۆز ئىچىگە ئالىدۇ؟ دېگەندەك ئاددىي نەرسىلەرنى ئۆگەتسە، يەنە ئەيسانىڭ ھەقىقىي ئەگەشكۈچىسى سۈپىتىدە قانداق زىيانكەشلىكلەرگە دۇچ كېلىشىمىز مۇمكىن؟ دېگەندەك سوئاللار بىلەن، ياشلارنى جەسۇر ۋەز ئېيتقۇچىلار بولۇشقا تەييارلىغان.
ئۇنىڭدىن باشقا، ئاشۇ «ئالتۇن دەۋىر» ژۇرنىلىدا، مۇقەددەس كىتاب ھەققىدە كۆپرەك بىلىم ئېلىشنى خالايدىغانلار ئۈچۈن، مۇقەددەس كىتاب ھەققىدىكى بەزى سوئاللار ۋە جاۋابلار بېرىلگەن ئىدى. سوئاللارنىڭ جاۋابلىرىنى «مۇقەددەس يازمىلارنى تەتقىق قىلىش» ناملىق كىتابنىڭ بىرىنچى قىسمىدىن تېپىشقا بولاتتى. مىڭلارچە ئوقۇرمەنلەر شۇ سەھىپىلەرنىڭ پايدىسىنى كۆرگەن. بىراق، «ئالتۇن دەۋىر» ژۇرنىلىنىڭ 1921-يىلى، 21-دېكابىر سانىدا، ئەمدى بۇ ئىككى سەھىپىنىڭ نەشىر قىلىنمايدىغانلىقى ئېلان قىلغان. نېمە ئۈچۈن تۇيۇقسىز شۇنداق ئۆزگۈرۈش بولغان؟
يېڭى كىتاب!
خۇدانىڭ چىلتارى ناملىق كىتاب
ئوقۇشقا بەلگىلەنگەن مەزمۇنلار كۆرسىتىلگەن كارتا
سوئال-جاۋاب كارتىسى
يېتەكچىلىكنى ئۆز ئۈستىگە ئالغان قېرىنداشلار، مۇقەددەس كىتاب ھەققىدە بىلىم ئېلىش ئۈچۈن، ھەر قېتىم بىر ماۋزۇ ھەققىدە مۇھاكىمە قىلىش كېرەكلىكىنى چۈشىنىپ يەتكەن. شۇ سەۋەب، 1921-يىل، نويابىردا، «خۇدانىڭ چىلتارى» ناملىق كىتاب نەشىردىن چىققان. قىزىققۇچىلار مۇشۇ كىتابنى قوبۇل قىلغان ھەمدە «چىلتار مۇقەددەس كىتاب تەتقىق دەرسلىكى»گە قاتناشقان. خۇدانىڭ ئىنسانلارغا مەڭگۈ ھايات كەچۈرۈشنى ئىرادە قىلغانلىقىنى، ئادەملەرنىڭ چۈشىنىشىگە بۇ ئۆزلىكىدىن ئۆگىنىدىغان دەرسلىك ياردەم بەرگەن. بۇ دەرسلىكنىڭ ئۈنۈمى قانداق بولغان؟
ئاشۇ كىتابنى ئالغان كىشىگە، شۇ بابتىكى قايسى بەتنى ئوقۇشى كېرەكلىكى كۆرسىتىلگەن كىچىك بىر كارتا ھەم ئەۋەتىلگەن. كېيىنكى ھەپتىسى، شۇ ئوقۇغان مەزمۇنغا ئاساسلانغان بىرقانچە سوئاللار يېزىلغان باشقا بىر كارتا ئەۋەتىلگەن. كارتىنىڭ ئاخىرىدا كېيىنكى ھەپتىسى ئوقۇشقا بەلگىلەنگەن مەزمۇن كۆرسىتىلگەن.
يېقىن ئەتراپتىكى جامائەت 12 ھەپتە، ھەر ھەپتىسى يېڭى بىر كارتىنى مۇقەددەس كىتاب تەتقىقى ئۆتكۈزىدىغان كىشىگە پوچتا ئارقىلىق ئەۋەتكەن. شۇ كارتىلارنى جامائەتتىكى ياشانغانلار ياكى ئۆيمۇ-ئۆي ۋەز ئېيتىشقا كۈچى يەتمەيدىغانلار ئەۋەتكەنىدى. مەسىلەن، ئامېرىكا، پېنسىلۋانىيە شتاتى، مىلۋالې شەھىرىدىن ئاننا گاردنېر ئەسلەپ: ««خۇدانىڭ چىلتارى» ناملىق كىتاب نەشىردىن چىققاندا، پالەچ سىڭلىم سالنىڭ كۆپرەك ۋەز قىلالىشىغا پۇرسەت پەيدا بولدى»،— دېگەن. ئۇ ھەر ھەپتە سوئاللار يېزىلغان كارتىلارنى ئەۋەتەتتى. شۇ دەرسلىك تاماملانغاندا، ئۇنىڭ مۇقەددەس كىتاب ھەققىدە كۆپرەك بىلىم ئېلىشىغا ياردەم بېرىش ئۈچۈن، جامائەتتىن بىر كىشى ئۇنى يوقلاپ باراتتى.
سال گاردنېر چاقلىق ئورۇندۇقتا
بىزنى كۈتۈپ تۇرغان ئىشلار
بۇرادەر رۇتېرفورد جامائەتلەرگە شۇنداق خەت يېزىپ ئەۋەتكەن ئىدى: «بۇ يىل پادىشاھلىق ھەققىدە گۇۋاھلىق بېرىش ئىشى ھەرقانداق بىر يىلغا قارىغاندا شۇنچە كەڭ كۆلەملىك ۋە نەتىجىلىك بولدى. بىراق، ئالدىمىزدا بىزنى نۇرغۇن ئىشلار كۈتۈپ تۇرىدۇ. باشقىلارنىمۇ بۇ ئاجايىپ شان-شەرەپلىك خىزمەتكە قاتنىشىشقا ئۈندەيلى!» ناھايىتى ئېنىقكى، مۇقەددەس كىتابنى تەتقىق قىلغۇچىلار بۇ چاقىرىققا قۇلاق سالغان. 1922-يىلى، ئۇلار ئىلگىرىكىگە قارىغاندا كۆپرەك پادىشاھلىق خۇش-خەۋىرى ھەققىدە جاسارەت بىلەن ۋەز قىلغان.
a «ئالتۇن دەۋىر» ژۇرنىلىنىڭ ئىسمى، 1937-يىلى «تەسەللى» ۋە 1946-يىلى «ئويغىنىش!» دەپ ئۆزگەرتىلگەن.