ئاددىي سوئالنىڭ كۈچى
مارىي ۋە ئۇنىڭ يولدىشى جونa ياشايدىغان جايدا فىلىپپىندىن كەلگەن ئىشچىلار كۆپ ئىدى. بۇ بىر جۈپ ئەر-ئايال دائىم شۇ ئىشچىلارغا خۇش خەۋەر يەتكۈزگەن. 19-COVID يۇقۇملۇق ۋىرۇسى مەزگىلىدە، مارىي پەقەت ئۆزى ياشايدىغان جايدا ئەمەس، باشقا دۆلەتلەردىكى كىشىلەر بىلەنمۇ مۇقەددەس كىتاب تەتقىق ئۆگىنىشى دەرسىنى باشلىغان. مارىي بۇنى قانداق قىلغان؟
مارىي شۇ تەتقىق ئۆگىنشى قىلىۋاتقانلاردىن: «مۇقەددەس كىتابنى ئۆگىنىشنى خالايدىغان يەنە باشقا بىرلىرى بارمۇ؟»— دەپ سورىغان. ئەگەر ئۇلار «ھەئە» دەپ جاۋاب بەرسە، مارىي ئۇلارنى ئۆزى بىلەن تونۇشتۇرۇپ قويۇشنى سورىغان. مۇنداق ئاددىي سوئالنى سوراش ھەمىشە ياخشى نەتىجە ئېلىپ كېلىدۇ. چۈنكى، خۇدانىڭ سۆزىدىكى ھەقىقەتنى قەدىرلەيدىغان ئادەملەر ئۆگەنگەنلىرىنى ئۆز ئائىلىسىدىكىلەرگە ۋە دوستلىرىغا ئېيتىپ بېرىشنى ئويلايدۇ. ئۇنداقتا، مارىي سورىغان شۇ ئاددىي سوئالنىڭ نەتىجىسى قانداق بولغان؟
مارىي بىلەن ئۆگىنىۋاتقان ياسمىن ئۇنىڭغا تۆت كىشىنى تونۇشتۇرغان. ئۇلارنىڭ ئارىسىدىكى كرىستىن ئىسىملىك بىرى تەتقىق ئۆگىنىشىنى ناھايىتى ياقتۇرۇپ قالغان ۋە ھەپتىسىگە ئىككى قېتىم ئۆگىنىش ئۆتكۈزۈشنى سورىغان. مارىي ئۇنىڭدىن: «مۇقەددەس كىتابنى ئۆگىنىشنى خالايدىغان تونۇشلىرىڭىز بارمۇ؟»— دەپ سورىغاندا، ئۇ: «ھەئە، بار. مەن سىزنى دوستلىرىم بىلەن تونۇشتۇرۇپ قوياي» دەپ، بىرنەچچە ھەپتە ئىچىدە كرىستىن مارىيغا تۆت دوستىنى تونۇشتۇرغان. ئۇلارنىڭ بەزىلىرى ھەم مارىيغا يەنە باشقىلارنى تونۇشتۇرغان.
كرىستىن فىلىپپىندا ياشايدىغان ئائىلە ئەزالىرىمۇ مۇقەددەس كىتابنى ئۆگىنىشىنى خالىغان. شۇڭا، ئۇ قىزى ئاندرېيانى ئۆگىنىش باشلاشقا دەۋەت قىلغان. ئاندرېيا دەسلەپتە يەھۋا گۇۋاھچىلىرى ئەيساغا ئىشەنمەيدىغان، پەقەت «كونا ئەھدە» قىسىمىنى ئوقۇيدىغان غەلىتە ئېتىقادتىكى كىشىلەر دەپ ئويلىغان. ئەمما، بىرىنچى قېتىملىق ئۆگىنىشتىن كېيىن، ئۇ ئاشۇ ئوي-پىكىرىنى تامامەن ئۆزگەرتكەن. ئاندرېيا ئۆگىنىشنى داۋاملاشتۇرغان ۋە ھەردائىم شۇنداق دېگەن: «مۇقەددەس كىتابتا شۇنداق يېزىلغان بولسا، دېمەك بۇ ھەقىقەت!».
بىر مەزگىل ئۆتۈپ، ئاندرېيا ئىككى دوستىنى ۋە بىر خىزمەتچىسىنى مارىي بىلەن تونۇشتۇرغان. ئۇلارمۇ ئۆگىنىشنى باشلىغان. ئاندرېيانىڭ يەنە كۆزى كۆرمەيدىغان ئانجېلا ئىسىملىك كىچىك ئاپىسى بار ئىدى. مارىي بىلەن ئاندرېيا مۇقەددەس كىتاب تەتقىق ئۆگىنىشى ئۆتكۈزگەندە، ئانجېلا بىر چەتتە ئولتۇرۇپ تىڭشاپ ئولتۇرغان. ئەمما، بۇنىڭدىن مارىي خەۋەرسىز ئىدى. كېيىن، ئانجېلا بىر كۈنى ئاندرېيادىن ئۆزىنى مارىي بىلەن تونۇشتۇرۇشنى سورىغان ۋە ئۆزىنىڭ مۇقەددەس كىتابنى ئۆگىنىشنى خالايدىغانلىقىنى ئېيتقان. ئانجېلا مۇقەددەس كىتابتىن ئۆگەنگەن ھەقىقەتلەرنى ئىنتايىن ياخشى كۆرگەن ۋە بىر ئاي ئۆتمەي، ئۇ نۇرغۇن ئايەتلەرنى يادقا ئېلىۋالغان. ئۇ ھەتتا ھەپتىسىگە تۆت قېتىم ئۆگىنىشنى خالايدىغانلىقىنى ئېيتقان. كېيىن، ئانجېلا ئاندرېيانىڭ ياردىمى بىلەن يىغىلىشلارغا تور ئالاقە ۋاستىسى ئارقىلىق قاتنىشىشقا باشلىغان.
كرىستىن مارىي بىلەن تەتقىق ئۆگىنىشى ئۆتكۈزۈۋاتقاندا، ئۇنىڭ يولدىشى يەشۇئا دائىم ئارقىدا ئۇيان-بۇيان مېڭىپ يۈرگەن. بۇنى بايقىغان مارىي ئۇنىڭدىن: «سىزمۇ ئۆگىنىشنى خالامسىز؟»— دەپ سورىغان. شۇ چاغدا، يەشۇئا: «مەن پەقەت ئاڭلاپ ئولتۇرىمەن، مەندىن باشقا سوئاللارنى سورىماڭ. بولمىسا، چىقىپ كېتىمەن»،— دېگەن. بىراق، بەش مىنۇت ئۆتمەيلا، ئۇ ئۆزى مارىيغا سوئاللارنى ياغدۇرۇۋەتكەن. شۇنداق قىلىپ، يەشۇئامۇ مۇقەددەس كىتابنى تەتقىق ئۆگىنىش ئۆتكۈزۈشكە ماقۇل بولغان.
مارىي ئاددىي بىر سوئالنى سوراپ، نۇرغۇن ئۆگىنىشلەرنى باشلىغان. ئۇ بەزى ئۆگەنگۈچىلەرنى باشقا گۇۋاھچىلارغا تاپشۇرغان. ئۇلار پەرقلىق تۆت دۆلەتتە ياشايدىغان كىشىلەر بولۇپ، جەمئىي 28 كىشى ئۆگىنىش باشلىغان.
مۇشۇ ماقالىنىڭ بېشىدا تىلغا ئېلىنغان ياسمىن 2021-يىلى، ئاپرېل ئېيىدا چۆمۈلدۈرۈلۈشتىن ئۆتكەن. كرىستىن 2022-يىلى، ماي ئېيىدا چۆمۈلدۈرۈلۈشتىن ئۆتۈپ، ئائىلىسى بىلەن ياشاش بولۇش ئۈچۈن ئۆز فىلىپپىنغا قايتقان. كرىستىن تونۇشتۇرغان يەنە ئىككى كىشىمۇ يەھۋا گۇۋاھچىسى بولغان. كرىستىن چۆمۈلدۈرۈلۈپ بىرنەچچە ئايدىن كېيىن، ئانجېلا ھەم چۆمۈلدۈرۈلۈشنى قوبۇل قىلغان ۋە ھازىر پىدائىي ۋەز ئېيتقۇچى بولۇپ خىزمەت قىلىۋاتىدۇ. كرىستىننىڭ يولدىشى يەشۇئا، قىزى ئاندرېيا ۋە بىرنەچچە ئۆگەنگۈچىلەر داۋاملىق ئۆگىنىش قىلىپ روھىي جەھەتتىن ئۆسۈۋاتىدۇ.
بىرىنچى ئەسىردە، نۇرغۇن ئادەملەر ئەيسا مەسىھ توغرۇلۇق ئۆگەنلىرىنى ئۆز ئائىلىسىدىكىلەرگە ۋە دوستلىرىغا ئېيتىپ بەرگەن ئىدى (يۇھاننا 1:41، 42ا؛ ئەلچى. 10:24، 27، 48؛ 16:25–33). شۇڭا، سىزمۇ ئۆگىنىش قىلىۋاتقان ياكى قىزىقىش كۆرسەتكەنلەردىن: «مۇقەددەس كىتابنى ئۆگىنىشنى خالايدىغان تونۇشلىرىڭىز بارمۇ؟»،— دەپ سوراپ كۆرۈڭ. بەلكىم، بۇ ئاددىي سوئال ئارقىلىق سىزمۇ نۇرغۇن كىشىلەر بىلەن مۇقەددەس كىتاب تەتقىق ئۆگىنىشلىرىنى ئۆتكۈزۈشنى باشلايسىز!
a بەزى ئىسىملار ئۆزگەرتىلگەن.