10-دەرس
يەھۋا گۇۋاھچىلىرىنىڭ يىغىلىشلىرىغا قاتنىشىشنىڭ قانداق پايدىسى بار؟
سىز يەھۋا گۇۋاھچىلىرىنىڭ يىغىلىشىغا قاتنىشىپ باققانمۇ؟ تېخى قاتناشمىغان بولسىڭىز، بىرىنچى قېتىم قاتناشقاندا، ئۆزىڭىزنى ئەركىن ھېس قىلماسلىقىڭىز مۇمكىن. سىز بەلكىم: «بۇ يىغىلىشلاردا نېمە ئىش قىلىدۇ؟ يىغىلىشلارغا قاتنىشىش نېمە ئۈچۈن مۇھىم ۋە ئۇنىڭغا چوقۇم قاتنىشىشىم كېرەكمۇ؟»،— دەپ ئويلىشىڭىز مۇمكىن. بۇ دەرستە، باشقىلار بىلەن يىغىلىشلارغا قاتنىشىش، سىزنى ياراتقۇچى يەھۋاغا تېخىمۇ يېقىنلاشتۇرىدىغانلىقى ۋە شەخسەن سىزگە قانداق ياردەم بېرىدىغانلىقى ھەققىدە بىلىسىز.
1. بىرلىكتە يىغىلىپ، جەم بولۇشنىڭ مۇھىم سەۋەبى نېمە؟
زەبۇر يازغۇچىسى باشقىلار بىلەن يىغىلىپ، جەم بولۇشنىڭ مۇھىملىقىنى قانداق كۆرسەتكەنلىكىگە قاراپ باقايلى: «بۈيۈك جامائەت ئىچىدە يەھۋاغا مەدھىيە ئېيتىمەن» (زەبۇر 22:22). خۇددى شۇنىڭغا ئوخشاش، يەھۋا گۇۋاھچىلىرىمۇ بىرلىكتە جەم بولۇپ، شاد-خۇراملىققا چۆمىدۇ. دۇنيانىڭ ھەممە جايلىرىدا، ئۇلار ھەر ھەپتە خۇدانى مەدھىيىلەپ ناخشا ئېيتىش ۋە دۇئا قىلىش ئۈچۈن يىغىلىدۇ. يەنە ئۇلار ئىبادەت قىلىش ئۈچۈن، يىلدا نەچچە قېتىم چوڭ يىغىلىشلارغا قاتنىشىدۇ.
2. يىغىلىشلاردا نېمىنى ئۆگىنىسىز؟
يىغىلىشلىرىمىزدا خۇدانىڭ سۆزى چۈشەندۈرۈلىدۇ (نەھەمىيا 8:8-نى ئوقۇڭ). يىغىلىشلارغا قاتنىشىپ، ياراتقۇچى يەھۋا ۋە ئۇنىڭ ئېسىل پەزىلەتلىرى ھەققىدە ئۆگىنەلەيسىز. ئۇنىڭ سىزگە بولغان مېھىر-مۇھەببىتى توغرىسىدا كۆپرەك بىلىم ئالغانسېرى، ئۇنىڭغا تېخىمۇ يېقىنلىشىسىز. يەنە تىنچ-خاتىرجەم ياشىشىڭىزغا، ئۇنىڭ قانداق ياردەم بېرەلەيدىغانلىقىنى بىلەلەيسىز.—يەشايا 48:17، 18.
3. يىغىلىشلىرىمىزدا باشقىلار بىلەن ئۇچرىشىپ پاراڭلىشىشنىڭ سىز ئۈچۈن قانداق پايدىسى بار؟
مۇقەددەس كىتابتا، مۇنداق نەسىھەت بېرىلگەن: «مېھىر-مۇھەببەت ۋە ياخشى ئىشلارنى قىلىشقا ئۈندەش ئۈچۈن، بىر-بىرىمىز ھەققىدە ئويلىنايلى. بەزىلەر ئادەتلەنگەندەك يىغىلىشلىرىمىزنى قالدۇرمايلى» (ئىبرانىيلار 10:24، 25). يىغىلىشلىرىمىزدا، سىزگە ھەقىقىي كۆڭۈل بۆلىدىغان كىشىلەرنى، يەنە ئۆزىڭىزگە ئوخشاش خۇدا سۆزىنى ئۆگىنىشكە قىزىقىدىغانلارنى ئۇچرىتىسىز. سىز مۇقەددەس كىتابتىن ئىلھام بېرىدىغان ئوي-پىكىرلەرنى ئاڭلايسىز (رىملىقلار 1:11، 12-نى ئوقۇڭ). قىيىنچىلىقلارغا بەرداشلىق بەرگەن كىشىلەر بىلەن تونۇشالايسىز. مانا بۇلار داۋاملىق يىغىلىپ، جەم بولۇشىمىزنىڭ بەزى سەۋەبلىرىدۇر. يەھۋا بۇنى بەك خالايدۇ.
چوڭقۇرراق قېزىڭ
يەھۋا گۇۋاھچىلىرى يىغىلىشلاردا نېمە ئىش قىلىدۇ ۋە نېمە ئۈچۈن شۇ يىغىلىشلارغا قاتنىشىشقا ئەرزىيدىغانلىقى ھەققىدە بىلىۋېلىڭ.
4. يەھۋا گۇۋاھچىلىرىنىڭ يىغىلىشلىرى
بىرىنچى ئەسىردە، ئەيسانىڭ ئەگەشكۈچىلىرى دائىم جەم بولۇپ، يەھۋاغا ئىبادەت قىلغان (رىملىقلار 16:3–5). كولوسىلىقلار 3:16-نى ئوقۇڭ، كېيىن تۆۋەندىكى سوئالغا جاۋاب بېرىڭ:
ئەيسانىڭ دەسلەپكى ئەگەشكۈچىلىرى يەھۋاغا قانداق ئىبادەت قىلغان؟
بۈگۈنكى كۈندىمۇ، يەھۋا گۇۋاھچىلىرى داۋاملىق يىغىلىپ ئىبادەت قىلىدۇ. ئۇلارنىڭ يىغىلىشتا نېمە ئىش قىلىدىغانلىقىنى بىلىش ئۈچۈن، بۇ فىلىمنى كۆرۈڭ. كېيىن جامائەت يىغىلىشىنىڭ سۈرەتلىرىگە قاراپ، تۆۋەندىكى سوئاللار ئۈستىدە ئويلىنىپ كۆرۈڭ.
يىغىلىشلاردا نېمە ئىش بولىدىغانلىقى بىلەن كولوسىلىقلار 3:16-ئايەتنى ئوقۇغانلىرىڭىز ئارىسىدا، قانداق ئوخشاشلىق بارلىقىغا دىققەت قىلدىڭىزمۇ؟
بۇ فىلىمدا ۋە سۈرەتتە، يىغىلىش توغرىسىدا دىققەت قىلغانلىرىڭىزدىن نېمىنى ياقتۇردىڭىز؟
2-كورىنتلىقلار 9:7-نى ئوقۇڭ، كېيىن تۆۋەندىكى سوئالغا جاۋاب بېرىڭ:
نېمە ئۈچۈن يەھۋا گۇۋاھچىلىرى ئىبادەت يىغىلىشلىرىغا كەلگەنلەردىن پۇل يىغمايدۇ؟
مۇقەددەس كىتاب ئۆگىتىۋاتقان گۇۋاھچى بىلەن بۇ ھەپتىدىكى يىغىلىشلاردا نېمىلەر مۇھاكىمە قىلىدىغانلىقىغا قاراپ بېقىڭ.
سىزنىڭچە، يىغىلىشنىڭ قايسى بۆلىكى سىز ئۈچۈن قىزىقارلىق ۋە پايدىلىق بولىدۇ؟
سىز بىلەمسىز؟
jw.org تور بېكىتىدىن دۇنيانىڭ ھەممىلا جايلىرىدا ئۆتكۈزۈلىدىغان يىغىلىشلارنىڭ ئورنى ۋە ۋاقتىنى تاپالايسىز.
(1) يىغىلىشلىرىمىزدا نۇتۇقلار، ئۈلگە كۆرسىتىش ۋە فىلىملەر بولىدۇ. يىغىلىشلار ناخشا ۋە دۇئا بىلەن باشلىنىدۇ ۋە ئاخىرلىشىدۇ
(2) يىغىلىشلارنىڭ بەزى بۆلەكلىرىدە قاتناشقۇچىلار ئۆز ئوي-پىكىرىنى بايان قىلىدۇ
(3) يىغىلىشلارغا ئەر-ئايال، چوڭ-كىچىك ھەممىسى قاتنىشىدۇ
(4) يەھۋا گۇۋاھچىلىرى ئىئانە بېرىشنى تەلەپ قىلىپ، ئالدىڭىزغا كەلمەيدۇ
5. يىغىلىشلارغا قاتنىشىش ئۈچۈن كۈچ چىقىرىشقا توغرا كېلىدۇ
ئەيسا پەيغەمبەرنىڭ ئائىلىسىدىكىلەر ھەققىدە ئويلاپ كۆرەيلى. ئۇلار ھەر يىلى ناسىرەدىن يېرۇسالىمدىكى ئىبادەتخانىغا بېرىش ئۈچۈن، تاغ يوللىرىنى بېسىپ، ئۈچ كۈن سەپەر قىلىشى كېرەك ئىدى. لۇقا 2:39–42-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
سىزنىڭچە، بۇ يېرۇسالىمغا بېرىش سەپىرى ئاسان بولغانمۇ؟
نېمە ئۈچۈن يىغىلىشلارغا قاتنىشىش ئۈچۈن كۈچ چىقىرىشىڭىزغا توغرا كېلىدۇ؟
سىزنىڭچە، شۇنداق قىلىشقا ئەرزىمدۇ؟ نېمە ئۈچۈن؟
مۇقەددەس كىتابقا ئاساسلانغاندا، يىغىلىپ يەھۋاغا ئىبادەت قىلىش بەك مۇھىم. ئىبرانىيلار 10:24، 25-نى ئوقۇڭ، كېيىن تۆۋەندىكى سوئالغا جاۋاب بېرىڭ:
نېمە ئۈچۈن يىغىلىشلارغا دائىم قاتنىشىشىمىز كېرەك؟
بەزىلەر مۇنداق دەيدۇ: «ئىبادەت قىلىش ئۈچۈن باشقىلار بىلەن يىغىلىشنىڭ ھاجىتى يوق. ئۆزىڭىز ئۆيدە ئولتۇرۇپ ئىبادەت قىلالايسىز».
قايسى ئايەت ياكى مۇقەددەس كىتابتىكى مىساللار، يەھۋانىڭ بىزدىن نېمىنى تەلەپ قىلىدىغانلىقىنى كۆرسىتىدۇ؟
خۇلاسە
يىغىلىشلارغا قاتنىشىش ياراتقۇچى يەھۋا ھەققىدە كۆپرەك بىلىم ئېلىشىڭىزغا، ئۇنىڭ بىلەن بولغان دوستلىقىڭىزنى كۈچەيتىشكە ۋە باشقىلار بىلەن بىرلىكتە ئىبادەت قىلىشقا ياردەم بېرىدۇ.
تەكرارلاش
نېمە ئۈچۈن يەھۋا بىزنى باشقىلار بىلەن بىرلىكتە يىغىلىشقا دەۋەت قىلىدۇ؟
يەھۋا گۇۋاھچىلىرىنىڭ يىغىلىشلىرىدا نېمىنى ئۆگىنىسىز؟
سىزنىڭچە، يىغىلىشلارغا قاتنىشىشنىڭ قانداق پايدىسى بار؟
ئىزدىنىپ كۆرۈڭ
يىغىلىشلارغا بېرىشتىن ئەنسىرىگەن بولسىڭىز، شۇنداق ئەنسىرىگەن بىر كىشىنىڭ يىغىلىشلارنى ياقتۇرۇپ قالغانلىقىنى كۆرۈڭ.
«بىزنى قانداق قارشى ئالغانلىقىنى ھېچقاچان ئۇنتۇمايمىز!» (16:4)
بىر ياش يىگىتنىڭ يىغىلىشقا قاتنىشىپ، قانداق خۇشال بولغانلىقى ۋە دائىم قاتنىشىش ئۈچۈن نېمە ئىش قىلغانلىقىنى كۆرۈڭ.
باشقىلارنىڭ يىغىلىشقا قاتنىشىش ھەققىدە نېمە دەيدىغانلىقىنى بىلىپ بېقىڭ.
«نېمە ئۈچۈن جامائەت يىغىلىشلىرىغا قاتنىشىش كېرەك؟» (تور بېكەتتىكى ماقالە)
قارا جەمئىيەتنىڭ ئەزاسى بولغان زوراۋان بىر كىشىنىڭ يەھۋا گۇۋاھچىلىرىنىڭ بىر يىغىلىشىغا قاتناشقاندىن كېيىن، ھاياتىدا قانداق ئۆزگىرىشلەرنى قىلغانلىقىنى كۆرۈپ بېقىڭ.
«مەن يېنىمغا قورال سالماي، ھېچ يەرگە بارمايتتىم» («كۈزىتىش مۇنارى»، 2014-يىل، 1-ئىيۇل)