56-دەرس
جامائەتتە ئىناق-ئىتتىپاقلىقنى ساقلاڭ
بىز ئېتىقادداشلارنىڭ ئارىسىدا ئۆزىمىزنى خۇددى داۋۇت پادىشاھقا ئوخشاش ھېس قىلىمىز. ئۇ مۇنداق دېگەن: «قاراڭلار، نەقەدەر گۈزەل، نەقەدەر يېقىملىق، قېرىنداشلار ئارا بولسا ئىناقلىق» (زەبۇر 133:1). ئارىمىزدىكى ئىناقلىق تەبىئىيلا پەيدا بولۇپ قالمايدۇ. ھەربىرىمىز ئىناقلىقنى ساقلاش ئۈچۈن ئۆز ھەسسىمىزنى قوشۇشقا تىرىشىشىمىز كېرەك.
1. خۇدا خەلقىنىڭ كۆزگە كۆرۈنەرلىك قانداق ئالاھىدىلىكى بار؟
ئەگەر سىز باشقا بىر دۆلەتكە بېرىپ، جامائەت يىغىلىشىغا قاتناشسىڭىز، بەلكىم ئۇلارنىڭ تىلىنى چۈشەنمەسلىكىڭىز مۇمكىن. ئەمما، كۆپ تەرەپلەردىن ئۆزىڭىزنى خۇددى ئۆز ئۆيىڭىزدىكىدەك ئەركىن-ئازادە ھېس قىلىسىز. نېمە ئۈچۈن؟ چۈنكى، بىز ھەممىلا جايدا ئوخشاش نەشرى ماتېرىياللارنى ئىشلىتىپ، مۇقەددەس كىتابنى ئۆگىنىمىز. بىز بىر-بىرىمىزگە مېھىر-مۇھەببەت كۆرسىتىشكە تىرىشىمىز. مەيلى قەيەردە ياشىشىمىزدىن قەتئىينەزەر، ھەممىمىز يەھۋانىڭ ئىسىمىنى چاقىرىپ، بىرلىكتە ياراتقۇچىمىزغا ئىبادەت قىلىمىز.—سەفنىيا 3:9.
2. ئىناق-ئىتتىپاقلىقنى ساقلاشقا ئۆز ھەسسىڭىزنى قانداق قوشالايسىز؟
«بىر-بىرىڭلارنى چىن يۈرەكتىن قىزغىن سۆيۈڭلار» (1-پېترۇس 1:22). بۇ نەسىھەتكە قانداق قۇلاق سالالايسىز؟ دىققىتىڭىزنى باشقىلارنىڭ كەمچىلىكلىرىگە ئەمەس، ئارتۇقچىلىقلىرىغا، يەنى ياخشى تەرەپلىرىگە قارىتىڭ. ئۆزىڭىز بىلەن ئوخشاش قىزىقىشلىرى بار قېرىنداشلار بىلەنلا ئەمەس، كېلىپ چىقىشى پەرقلىق قېرىنداشلار بىلەنمۇ تونۇشۇپ، ۋاقىت ئۆتكۈزۈشكە تىرىشىڭ. بىز قەلبىمىزگە سىڭىپ كەتكەن كەمسىتىش ھېس-تۇيغۇلىرىنى يىلتىزىدىن قومۇرۇپ تاشلاشقا تىرىشىشىمىز كېرەك.—1-پېترۇس 2:17a.
3. ئېتىقاددىشىڭىز بىلەن كېلىشمەسلىك پەيدا بولسا، نېمە قىلىسىز؟
گەرچە ئىناق-ئىتتىپاق بولساقمۇ، بىز بەرىبىر نامۇكەممەل. بەزى چاغلاردا بىر-بىرىمىزنى ئۈمىدسىزلەندۈرىمىز، ھەتتا بىر-بىرىمىزنىڭ كۆڭلىنى ئاغرىتىپ قويىمىز. شۇڭا، مۇقەددەس كىتاب بىزگە مۇنداق دەيدۇ: «بىر-بىرىڭلارغا سەۋر-تاقەتلىك بولۇپ، بىر-بىرىڭلارنى ئەپۇ قىلىڭلار. ھەتتا بىرىنىڭ باشقا بىرىگە شىكايىتى بار بولسا، يەھۋا سىلەرنى چىن قەلبىدىن كەچۈرگەندەك، سىلەر ھەم شۇنداق كەچۈرۈڭلار» (كولوسىلىقلار 3:13-نى ئوقۇڭ). بىز يەھۋانىڭ كۆڭلىنى سان-ساناقسىز قېتىم ئاغرىتتۇق. شۇنداق بولسىمۇ، ئۇ بىزنى كەچۈرگەن. شۇڭا، ئۇ بىزدىن قېرىنداشلىرىمىزنى كەچۈرۈشىمىزنى كۈتىدۇ. ئەگەر بىرسىنىڭ كۆڭلىگە ئازار بەرگەنلىكىڭىزنى بايقىسىڭىز، ئاراڭلاردىكى كېلىشمەسلىكنى ھەل قىلىش ئۈچۈن تەشەببۇسكارلىق كۆرسىتىڭ.—مەتتا 5:23، 24-نى ئوقۇڭb.
چوڭقۇرراق قېزىڭ
جامائەتنىڭ ئىناق-ئىتتىپاقلىقى ۋە تىنچلىقىنى قوغداش ئۈچۈن ئۆز ھەسسىڭىزنى قوشۇشنىڭ يوللىرىنى ئىزدەڭ.
ئىناق-ئىتتىپاقلىقنى ئىلگىرى سۈرۈش ئۈچۈن نېمە قىلىسىز؟
4. كەمسىتىش ھېس-تۇيغۇلىرىنى يېڭىڭ
بىز بارلىق قېرىنداشلىرىمىزغا مېھىر-مۇھەببەت كۆرسىتىشنى خالايمىز. ئەمما، بىزدىن پەرقلىق بىرىنى قوبۇل قىلىش بىز ئۈچۈن قىيىن بولۇشى مۇمكىن. بۇ قىيىنچىلىقنى يېڭىشكە نېمە ياردەم بېرەلەيدۇ؟ ئەلچىلەر 10:34، 35-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
يەھۋا ھەرقانداق ئادەملەرنى ئۆزىنىڭ گۇۋاھچىسى سۈپىتىدە قوبۇل قىلىدۇ. بۇ سىزدىن پەرقلىنىدىغان كىشىلەرگە بولغان كۆزقارىشىڭىزغا قانداق تەسىر قىلىشى كېرەك؟
ياشاۋاتقان رايونىڭىزدا كەڭ تارقالغان قايسى تۈردىكى كەمسىتىشلەردىن ساقلىنىشنى خالايسىز؟
2-كورىنتلىقلار 6:11–13-نى ئوقۇڭ، كېيىن تۆۋەندىكى سوئالغا جاۋاب بېرىڭ:
كېلىپ چىقىشى ئوخشىمايدىغان قېرىنداشلارغا قانداق يېقىنلىشالايسىز؟
5. كەچۈرۈمچان بولۇڭ ۋە ئىناق-ئىتتىپاقلىقنى ساقلاڭ
گەرچە يەھۋا بىزنىڭ كەچۈرۈم قىلىشىمىزغا مۇھتاج بولمىسىمۇ، ئۇ بىزنى چىن كۆڭلىدىن كەچۈرىدۇ. زەبۇر 86:5-نى ئوقۇڭ، كېيىن تۆۋەندىكى سوئاللارغا جاۋاب بېرىڭ:
ياراتقۇچى يەھۋانىڭ كەچۈرۈمچانلىقى قانداق تەسۋىرلەنگەن؟
نېمە ئۈچۈن ئۇنىڭ كەچۈرۈمچانلىقىغا مىننەتدار بولىسىز؟
قانداق ۋەزىيەتلەر باشقىلار بىلەن ئىناق-ئىتتىپاق بولۇشىمىزغا قىيىنچىلىق تۇغدۇرىدۇ؟
قانداق قىلىپ يەھۋانى ئۈلگە قىلالايمىز ۋە قېرىنداشلىرىمىز بىلەن ئىناق-ئىتتىپاقلىقنى ساقلىيالايمىز؟ پەندى-نەسىھەت 19:11-نى ئوقۇڭ، كېيىن تۆۋەندىكى سوئالغا جاۋاب بېرىڭ:
باشقىلار سىزنى زېرىكتۈرسە ياكى رەنجىتسە، نېمە قىلسىڭىز بولىدۇ؟
بىز بەزىدە باشقىلارنى رەنجىتىمىز. شۇنداق ئىشلار يۈز بەرگەندە، نېمە قىلىشىمىز كېرەك؟ فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
بۇ فىلىمدا، قېرىنداش ئىناق-ئىتتىپاقلىقنى ئىلگىرى سۈرۈش ئۈچۈن نېمە قىلغان؟
6. قېرىنداشلارنىڭ ياخشى تەرەپلىرىنى كۆرۈشكە تىرىشىڭ
قېرىنداشلىرىمىز بىلەن يېقىن تونۇشقانسېرى، ئۇلارنىڭ ئارتۇقچىلىقلىرىنى ۋە كەمچىلىكلىرىنى كۆرىمىز. ئۇلارنىڭ ئارتۇقچىلىقلىرىغا قانداق دىققەت قىلالايمىز؟ فىلىمنى كۆرۈڭ، كېيىن تۆۋەندىكى سوئال ئۈستىدە ئويلىنىپ كۆرۈڭ.
قېرىنداشلىرىڭىزنىڭ ئارتۇقچىلىقلىرىنى كۆرۈشكە نېمە ياردەم بېرەلەيدۇ؟
يەھۋا بىزنىڭ ياخشى تەرەپلىرىمىزگە دىققەت ئاغدۇرىدۇ. 2-تارىخنامە 16:9-نى ئوقۇڭ، كېيىن تۆۋەندىكى سوئالغا جاۋاب بېرىڭ:
يەھۋانىڭ ياخشى پەزىلەتلىرىڭىزگە دىققەت ئاغدۇرىدىغانلىقىنى بىلىش سىزگە قانداق تەسىر قىلىدۇ؟
ھەتتا چىرايلىق ئالماسنىڭ بىر كەمتۈك يېرى بولسىمۇ، ئۇ يەنىلا قىممەت-باھالىق. خۇددى شۇنىڭدەك، بارلىق ئېتىقادداشلىرىمىز نامۇكەممەل بولسىمۇ، ئۇلار ياراتقۇچىمىز يەھۋا ئۈچۈن قەدىر-قىممەتلىك
بەزىلەر مۇنداق دەيدۇ: «مەن بىرسىنى كەچۈرۈشتىن ئاۋۋال، ئۇ مەندىن كەچۈرۈم سورىشى كېرەك».
نېمە ئۈچۈن بىز باشقىلارنى چىن يۈرەكتىن كەچۈرۈشكە تەييار بولۇشىمىز كېرەك؟
خۇلاسە
كەچۈرۈمچان بولۇش ۋە بارلىق قېرىنداشلىرىڭىزغا سۆيگۈ-مۇھەببەت كۆرسىتىش ئارقىلىق جامائەتنىڭ ئىناق-ئىتتىپاقلىقىغا ئۆز ھەسسىڭىزنى قوشالايسىز.
تەكرارلاش
باشقىلارنى كەمسىتىش ھېس-تۇيغۇسىنى قانداق يېڭەلەيسىز؟
ئەگەر بىر قېرىنداش بىلەن ئاراڭلاردا كېلىشمەسلىك يۈز بەرسە، نېمە قىلالايسىز؟
نېمە ئۈچۈن يەھۋانى ئۈلگە قىلىپ، باشقىلارنى كەچۈرۈشنى خالايسىز؟
ئىزدىنىپ كۆرۈڭ
باشقىلارنىڭ ئۈستىدىن ھۆكۈم قىلىشتىن ساقلىنىشىمىزغا ياردەم بېرەلەيدىغان ئەيسانىڭ بىر تەمسىلىنى كۆرۈپ بېقىڭ.
ئەگەر خاتا قىلمىغانلىقىمىزنى ھېس قىلساق، كەچۈرۈم سورىشىمىز كېرەكمۇ؟
«كەچۈرۈم سوراش — تىنچ-ئىناقلىقنىڭ ئاچقۇچى» («كۈزىتىش مۇنارى»، 2002-يىل، 1-نويابىر)
بەزىلەرنىڭ ھەممە كىشىلەرگە تەڭ باراۋەر مۇئامىلە قىلىشنى قانداق ئۆگەنگەنلىكىنى بىلىۋېلىڭ.
«باشقىلارنى تاشقى قىياپىتىگە قاراپ ھۆكۈم قىلماڭ» (06:5)
شەخسىي زىددىيەتلەر جامائەتنىڭ ئىناق-ئىتتىپاقلىقىغا تەسىر قىلىشتىن بۇرۇن، ئۇلارنى قانداق قىلىپ بىر تەرەپ قىلىشنىڭ يوللىرى توغرۇلۇق ئوقۇپ بېقىڭ.
«كېلىشمەسلىكلەرنى سۆيگۈ-مۇھەببەت بىلەن ھەل قىلىڭ» («كۈزىتىش مۇنارى»، 2016-يىل، ماي)
a سۆيگۈ-مۇھەببەت مەسىھ ئەگەشكۈچىلىرىنى يۇقۇملۇق كېسەللەرنى تارقىتىشتىن ساقلىنىشقا قانداق دەۋەت قىلىدىغانلىقىنى 6-ئىزاھاتتىن كۆرۈپ بېقىڭ.
b سودا-تىجارەت ۋە قانۇنىي ئىشلارنى بىر تەرەپ قىلىش ھەققىدە 7-ئىزاھاتتا مۇھاكىمە قىلىنىدۇ.