4-تەتقىق ماقالىسى
149-ناخشا تۆلەم ئۈچۈن مىننەتدارمىز
تۆلەمدىن نېمىلەرنى ئۆگىنەلەيمىز؟
«خۇدا بىزگە بولغان مۇھەببىتىنى شۇنداق ئاشكارا قىلدىكى، بىزنى ھاياتلىققا ئېرىشتۈرۈش ئۈچۈن بىردىن-بىر يالغۇز ئوغلىنى بۇ دۇنياغا ئەۋەتتى». —1-يۇھاننا 4:9.
مەركىزى ئىدىيە
تۆلەم قۇربانلىقى يەھۋا خۇدا ۋە ئەيسا مەسىھنىڭ ئېسىل پەزىلەتلىرى ھەققىدە نېمىلەرنى ئاشكارا قىلىدۇ؟
1. نېمە ئۈچۈن ھەر يىلى خاتىرىلەش يىغىلىشىغا قاتنىشىش بەك مۇھىم؟
تۆلەم — خۇدا بەرگەن بىباھا سوۋغا! (2-كورىنت. 9:15) ئەيسا مەسىھ ھاياتىنى بىز ئۈچۈن پىدا قىلغاچقا، سىز خۇدانىڭ يېقىن دوستى بولالايسىز. ئۇنىڭدىن باشقا، سىز ئۈچۈن مەڭگۈ ياشاش ئۈمىدى تۇغۇلدى. يەھۋانىڭ سۆيگۈ-مۇھەببەتكە تولغان بۇ ئورۇنلاشتۇرۇشى ئۈچۈن، چوقۇم ئۇنىڭغا مىننەتدارلىق بىلدۈرۈشىمىز لازىم (رىملىقلار 5:8). تۆلەم سوۋغىتىغا ھەردائىم مىننەتدارلىق بىلدۈرۈشىمىز ۋە ئۇنى قەدىرلىشىمىزگە ياردەم بېرىش ئۈچۈن، ئەيسا مەسىھ بىزگە ھەر يىلى ئۇنىڭ ئۆلۈمىنى خاتىرىلەش يىغىلىشىغا قاتنىشىشنى بۇيرىغان.—لۇقا 22:19، 20.
2. بۇ ماقالىدە نېمىلەرنى مۇھاكىمە قىلىمىز؟
2 2025-يىلى، مەسىھنىڭ تۆلەم قۇربانلىقىنى خاتىرىلەش يىغىلىشى 12-ئاپرېل، شەنبە كۈنى ئۆتكۈزۈلىدۇ. شەك-شۇبھىسىزكى، ھەممىمىز بۇ ئالاھىدە يىغىلىشقا قاتنىشىشنى پىلانلاۋاتىمىز. خاتىرىلەش يىغىلىشنىڭ ئالدىدىكى ۋە كەينىدىكى ھەپتىلەردە ياراتقۇچى يەھۋا ۋە ئۇنىڭ ئوغلى بىز ئۈچۈن نېمىلەرنى قىلغانلىقى ھەققىدە چوڭقۇر ئويلىنايلى. بۇنداق قىلساق، كۆپ پايدىسىنى كۆرىمىز. بۇ ماقالىدە تۆلەمدىن يەھۋا خۇدا ۋە ئەيسا مەسىھ توغرۇلۇق نېمىلەرنى ئۆگىنىدىغانلىقىمىزنى مۇھاكىمە قىلىمىز. كېيىنكى ماقالىدە تۆلەم بىزگە قانداق بەرىكەتلەرنى ئەكېلىدىغانلىقى ۋە تۆلەم ئۈچۈن مىننەتدارلىقىمىزنى قانداق كۆرسىتەلەيدىغانلىقىمىزنى مۇھاكىمە قىلىمىز.
تۆلەم بىزگە يەھۋا توغرۇلۇق نېمىلەرنى ئۆگىتىدۇ؟
3. قانداقلارچە بىر ئادەمنىڭ ئۆلۈمى مىليونلىغان ئىنسانلارنى قۇتقۇزۇپ قالالايدۇ؟ (رەسىمگە ھەم قاراڭ).
3 تۆلەمدىن بىز يەھۋانىڭ ئادالەتلىك خۇدا ئىكەنلىكىنى كۆرۈۋالالايمىز (تەكرار. قا 32:4). ئادەم-ئاتا خۇداغا ئىتائەتسىزلىك قىلغاندىن كېيىن، گۇناھكار بولۇپ، ئۆلۈپ كەتتى. بىز ئۇنىڭ ئەۋلادلىرى بولغاچقا، بىزمۇ گۇناھكار ۋە ئۆلۈپ كېتىمىز (رىملىقلار 5:12). يەھۋا بىزنى گۇناھ ۋە ئۆلۈمدىن قۇتقۇزۇش ئۈچۈن، ئۆز ئوغلىنى بىز ئۈچۈن تۆلەم بېرىشكە ئەۋەتكەن. ئەمما، پەقەت بىر مۇكەممەل ئىنساننىڭ قۇربانلىقى قانداقمۇ مىليونلىغان ئادەملەرنى قۇتقۇزالايدۇ؟ ئەلچى پاۋلۇس بۇنى مۇنداق چۈشەندۈرگەن: «بىر ئادەمنىڭ [ئادەم-ئاتىنىڭ] ئىتائەتسىزلىكى بىلەن نۇرغۇن ئادەملەر گۇناھكار بولغاندەك، ئوخشاشلا بىر ئادەمنىڭ [ئەيسا مەسىھنىڭ] ئىتائەتچانلىقى بىلەن نۇرغۇن ئادەملەر ھەققانىي بولىدۇ» (رىملىقلار 5:19؛ 1-تىموت. 2:6). باشقىچە ئېيتقاندا، بىر مۇكەممەل ئىنسان خۇداغا ئىتائەتسىزلىك قىلغىنى ئۈچۈن پۈتكۈل ئىنسانلار گۇناھ ۋە ئۆلۈمنىڭ قۇلىغا ئايلانغان. ئۇنداقتا، بىزنى بۇ قۇللۇقتىن قۇتقۇزۇپ، ئەركىنلىككە ئېرىشتۈرۈش ئۈچۈن بىر مۇكەممەل ئادەم خۇداغا ئىتائەت قىلىشى ئىدى.
بىر ئادەم سەۋەبلىك، بىز گۇناھ ۋە ئۆلۈمنىڭ قۇللىرىغا ئايلاندۇق. شۇنىڭغا ئوخشاش، بىر ئادەم بىزنى بۇ گۇناھ ۋە ئۆلۈمنىڭ قۇللۇقتىن ئەركىن بولالايمىز (3-ئابزاسقا قاراڭ)
4. نېمە ئۈچۈن يەھۋا ئادەم-ئاتىنىڭ ئىتائەتچان ئەۋلادلىرىنىڭ مەڭگۈ ياشىشىغا مۇنداقلا رۇخسەت قىلمىغان؟
4 بىزنى قۇتۇلدۇرۇش ئۈچۈن ئەيسانىڭ ئۆلۈشى راستىنلا شەرت ئىدىمۇ؟ يەھۋا ئادەم-ئاتىنىڭ ئىتائەتچان ئەۋلادلىرىنىڭ مەڭگۈ ياشىشىغا مۇنداقلا رۇخسەت قىلسا بولماسمىدى؟ بۇ بىز نامۇكەممەل ئىنسانلار ئۈچۈن، مەسىلىنى ھەل قىلىشنىڭ ئەڭ ياخشى چارىسى بولۇپ كۆرۈنۈشى مۇمكىن. لېكىن، يەھۋا ئۈچۈن، مۇكەممەل ئادىللىق پرىنسىپىغا زىت كەلگەن. چۈنكى، يەھۋا ئۇ ئادىل خۇدا! ئۇ ئادەم-ئاتىنىڭ ئۆتكۈزگەن ئېغىر گۇناھىغا ۋە ئۇنىڭ ئەۋلادلىرىنىڭ گۇناھكار بولۇپ قالغىنىغا كۆز يۇمالمايدۇ.
5. نېمە ئۈچۈن يەھۋانىڭ ھەرقاچان توغرا ئىش قىلىدىغانلىقىغا ئىشەنچىمىز كامىل؟
5 ئەگەر يەھۋا ئۆزىنىڭ ئادىللىق ئۆلچىمىدىن ۋاز كېچىپ، ئادەم-ئاتىنىڭ نامۇكەممەل ئەۋلادلىرىنىڭ مەڭگۈ ياشىشىغا رۇخسەت قىلسا، نېمە بولاتتى؟ ئادەملەر بەلكىم خۇدا باشقا ئىشلاردا ھەم ئادىللىق ئۆلچەملىرىگە پەرۋا قىلمايدۇ دەپ گۇمان قىلاتتى. مەسىلەن، بىز خۇدانىڭ ھەممە ۋەدىلىرىنى ئورۇنلايدىغانلىقىغا تولۇق ئىشىنەلمەيتتۇق. لېكىن، خۇدادىن گۇمان قىلىشقا ھېچ سەۋەبىمىز يوق. چۈنكى، يەھۋا ئۆزىنىڭ ئادىل خۇدا ئىكەنلىكىنى ئىسپاتلاش ئۈچۈن ناھايىتى زور بەدەل تۆلىگەن. يەنى، ئۇ ئۆزىنىڭ سۆيۈملۈك يالغۇز ئوغلىنى قۇربانلىققا بەرگەن. شۇڭا، ئۇنىڭ ھەرقاچان توغرا ئىش قىلىدىغانلىقىغا ئىشەنچىمىز كامىل.
6. تۆلەمدىن يەھۋانىڭ بىزگە بولغان چوڭقۇر سۆيگۈ-مۇھەببىتىنى قانداق كۆرۈپ يېتەلەيمىز؟ (1-يۇھاننا 4:9، 10)
6 تۆلەم يەھۋانىڭ ئادىللىقىنى چۈشىنىشىمىزگە ياردەم بېرىپلا قالماي، ئۇنىڭ بىزگە بولغان چوڭقۇر سۆيگۈ-مۇھەببىتىنى كۆرۈپ يېتىشىمىزگە ئالاھىدە ياردەم بېرىدۇ (يۇھاننا 3:16؛ 1-يۇھاننا 4:9، 10-نى ئوقۇڭ). دەرۋەقە، يەھۋا بەرگەن تۆلەم شۇنى ئاشكارا قىلدىكى، ئۇ بىزنىڭ مەڭگۈ ياشىشىمىزنى خالاپ قالماستىن، بەلكى يەنە بىزنى ئۆز ئائىلىسىنىڭ بىر ئەزاسى بولۇشىمىزنى ئۈمىد قىلىدۇ. ئويلاپ كۆرۈڭ: ئادەم-ئاتا گۇناھ قىلغاندىن كېيىن، ئۇ يەھۋانىڭ ئائىلىسىدىن قوغلاپ چىقىرىلغان. نەتىجىدە، ئۇنىڭ بارچە ئەۋلادلىرى يەھۋانىڭ ئائىلىسىنىڭ ئەزاسى بولالماي قالغان. بىراق، تۆلەم ئاساسىدا يەھۋا گۇناھلىرىمىزنى كەچۈرىدۇ ۋە ئاخىرى بىر كۈنى ئۇنىڭغا ئىشىنىدىغان ۋە بويسۇنىدىغان ئادەملەر ئۇنىڭ ئائىلىسىگە قايتىپ كېلىدۇ. ھەتتا ھازىرنىڭ ئۆزىدىمۇ تۆلەم سەۋەبلىك، بىز يەھۋا ۋە ئۇنىڭغا ئىبادەت قىلىدىغان ئېتىقادچى قېرىنداشلىرىمىز بىلەن يېقىن دوست بولالايمىز. ھەقىقەتەن، يەھۋا بىزنى چىن دىلىدىن سۆيىدۇ!—رىملىقلار 5:10، 11.
7. ئەيسانىڭ چەككەن ئازاب-ئوقۇبەتلىرى يەھۋانىڭ بىزگە بولغان چوڭقۇر سۆيگۈ-مۇھەببىتىنى كۆرۈپ يېتىشىمىزگە قانداق ياردەم بېرەلەيدۇ؟
7 يەھۋا تۆلەم بېرىش ئۈچۈن قانچىلىك زور بەدەل بەرگەنلىكىنى ئويلاپ كۆرسەك، بىزگە بولغان سۆيگۈ-مۇھەببىتىنى تېخىمۇ ياخشىراق چۈشىنەلەيمىز. شەيتان ھېچقانداق بىر ئىنسان قىيىنچىلىقلارغا دۇچ كەلگەندە، يەھۋاغا سادىق قالالمايدىغانلىقىنى ئېيتقان ئىدى. لېكىن، شەيتاننىڭ يالغانچى ئىكەنلىكىنى ئىسپاتلاش ئۈچۈن، يەھۋا ئۆز ئوغلىنىڭ ئۆلۈمىدىن ئاۋۋال قاتتىق ئازاب-ئوقۇبەتلەرنى چېكىشىگە يول قويغان (ئايۇپ 2:1–5؛ 1-پېتر. 2:21). يەھۋا دىنىي رەھبەرلەرنىڭ ئەيسانى مەسخىرە قىلغانلىقىنى، ئەسكەرلەرنىڭ ئۇنى قامچىلاپ، كېيىن تۈۋرۈك ياغاچقا مىخلىغانلىقىنى كۆرۈپ تۇرغان. ئاندىن سۆيۈملۈك ئوغلىنىڭ قاتتىق ئازابلىنىپ، ئۆلگەنلىكىنى كۆرگەن (مەتتا 27:28–31، 39). يەھۋا شۇلارنى ھەرقانداق ۋاقىتتا توختىتىشقا قادىر ئىدى. مەسىلەن، دۈشمەنلەر «ئەگەر خۇدا ئۇنىڭدىن خۇرسەن بولسا، ئەمدى ئۇنى قۇتقۇزسۇنچۇ!» دېگەندە، يەھۋا دەل شۇنداق قىلالايتتى (مەتتا 27:42، 43). ئەمما، خۇدا مۇشۇ ۋەزىيەتكە ئارىلاشقان بولسا، تۆلەم بېرىلمەيتتى ۋە بىز ئۈچۈن ھەم ھېچقانداق ئۈمىد تۇغۇلمايتتى. شۇڭا، يەھۋا ئوغلى ئاخىرقى نەپىسى چىققۇچە، ئازاب-ئوقۇبەتلەرنى چېكىشىگە يول قويغان.
8. ئوغلىنىڭ ئازاب-ئوقۇبەتلەرنى چەككەنلىكىنى كۆرگەندە يەھۋانىڭ كۆڭلى ئازابلانغانمۇ؟ (رەسىمگە ھەم قاراڭ).
8 يەھۋانىڭ ھەممىگە قادىر، كۈچ-قۇدرەتلىك خۇدا بولۇشى، ئۇنىڭ ھېس-تۇيغۇلىرى يوقلىقىنى بىلدۈرمەيدۇ. ئۇ بىزنى ئۆزىگە ئوخشاش ھېس-تۇيغۇلارنى ئىپادىلەش قابىلىيىتى بىلەن ياراتقان. دېمەك، يەھۋا خۇدانىڭمۇ ھېس-تۇيغۇلىرى بار. مۇقەددەس كىتابتا ئادەملەرنىڭ خۇدانى رەنجىتكەنلىكى ۋە كۆڭلىگە ئازار بەرگەنلىكى يېزىلغان (زەبۇر 78:40، 41). ئىبراھىم ۋە ئىسھاقنىڭ مىسالىنى كۆرۈپ چىقايلى. خۇدا ئىبراھىم پەيغەمبەرگە يالغۇز ئوغلى ئىسھاقنى قۇربانلىققا بېرىشنى بۇيرىغان (يارىت. 22:9–12؛ ئىبرانىي. 11:17–19). ئىبراھىم بىر پىچاق ئۇرۇپ، ئىسھاقنى ئۆلتۈرۈشكە تەييار بولغاندا، ئۇنىڭ كۆڭلى قانداق ئازابلىق ھېس-تۇيغۇلارغا تولغانلىقىنى تەسەۋۋۇر قىلىپ كۆرۈڭ. ئۇنداقتا، يەھۋا ئۆز ئوغلىنىڭ رەھىمسىزلەرچە خورلىنىپ، قىينىلىپ، تۈۋرۈككە مىخلىنىپ ئۆلتۈرۈلگەنلىكىنى كۆرگەندە، ئۇنىڭ قانچىلىك ئازابلانغانلىقىنى كۆز ئالدىڭغا كەلتۈرۈپ كۆرۈڭ («ئۇلارنىڭ ئىمان-ئېتىقادىنى ئۈلگە قىلىڭلار — ئىبراھىم، 2-قىسىم» (باشقا تىلدا) ناملىق فىلىمنى كۆرۈڭ).
ئوغلىنىڭ ئازاب چەككەنلىكىنى كۆرۈش يەھۋا خۇدانىڭ كۆڭلىنى بەك ئاغرىتقان (8-ئابزاسقا قاراڭ)
9. رىملىقلار 8:32، 38، 39-ئايەتلەر، يەھۋانىڭ بىزگە بولغان چوڭقۇر سۆيگۈ-مۇھەببىتى توغرۇلۇق نېمە دەيدۇ؟
9 تۆلەم يەنە بىر ھەقىقەتنى ئاشكارا قىلىدۇكى، ھېچكىم ھەتتاكى ئەڭ يېقىن دوستىمىز ياكى ئۇرۇق-تۇغقىنىمىز بىزنى يەھۋا سۆيگەندەك سۆيمەيدۇ (رىملىقلار 8:32، 38، 39-نى ئوقۇڭ). شۇنىڭغا قەتئىي ئىشىنىمىزكى، ئۇ بىزنى ھەتتا ئۆز-ئۆزىمىزنى سۆيگەندىنمۇ ئارتۇقراق سۆيىدۇ. مەڭگۈ ياشاشنى خالامسىز؟ يەھۋا بۇنى سىزدىن بەكرەك خالايدۇ. گۇناھلىرىڭىزنىڭ كەچۈرۈلۈشىنى ئۈمىد قىلامسىز؟ يەھۋا بۇنى تېخىمۇ بەك ئارزۇ قىلىدۇ. ئۇ بىزدىن ئۇنىڭغا ئىشىنىش ۋە بويسۇنۇش ئارقىلىق تۆلەم سوۋغىسىنى قۇبۇل قىلىشمىزنى كۈتىدۇ. دەرۋەقە، تۆلەم قۇربانلىقى — يەھۋانىڭ بىزگە بولغان تەڭداشسىز سۆيگۈ-مۇھەببىتىنىڭ كۈچلۈك ئىسپاتى. يېڭى دۇنيادا بولسا، ئۇنىڭ سۆيگۈ-مۇھەببىتى ھەققىدە تېخىمۇ كۆپ نەرسىلەرنى ئۆگىنىمىز.—ۋەز 3:11.
تۆلەمدىن مەسىھ توغرۇلۇق نېمىلەرنى ئۆگىنىمىز؟
10. (1) ئەيسا ئۆلۈشتىن ئاۋۋال نېمە ئىش ئۈچۈن قاتتىق ئازابلانغان؟ (2) ئەيسا خۇدانىڭ ئىسىمىنى قانداق ئۇلۇغلىغان؟ («ئەيسا ساداقەتمەنلىكى خۇدانىڭ ئىسىمىنى ئۇلۇغلىغان» ناملىق رامكىغىمۇ قاراڭ).
10 ئەيسا ئاتىسىنىڭ ئىسىمىغا ئالاھىدە كۆڭۈل بۆلگەن (يۇھاننا 14:31). ئەيسا ئۆزىنىڭ خۇداغا كۇپۇرلۇق قىلغان دېگەن جىنايەت بىلەن ئەيىبلىنىپ ئۆلتۈرۈلگەندە، ئاتىسىنىڭ ئىسىمىغا داغ كەلتۈرۈلۈپ قالىدىغانلىقىنى بىلگەن ۋە بۇنىڭدىن قاتتىق ئازابلانغان ئىدى. شۇنىڭ ئۈچۈن، ئۇ مۇنداق دۇئا قىلغان: «ئەي، ئاتا، مۇمكىن بولسا، بۇ قەدەھنى مېنىڭدىن نېرى قىلغايسەن» (مەتتا 26:39). لېكىن، ئەيسا ئۆلگۈچە ساداقەتمەنلىكىنى قېلىپ، ئۇ شەيتاننىڭ ياراتقۇچىمىز يەھۋا توغرۇلۇق ئېيتقانلىرىنىڭ يالغانلىقىنى ئىسپاتلىغان.
11. ئەيسا ئىنسانلارغا چوڭقۇر سۆيگۈ-مۇھەببىتىنى قانداق نامايان قىلغان؟ (يۇھاننا 13:1)
11 تۆلەم بىزگە ئەيسا ئىنسانلارغا ناھايىتى كۆڭۈل بۆلىدىغانلىقىنى ئاشكارا قىلىدۇ. ئۇ بولۇپمۇ ئۆز ئەگەشكۈچىلىرىگە غەمخورلۇق قىلىدۇ (پەند ن. 8:31؛ يۇھاننا 13:1-نى ئوقۇڭ). مەسىلەن، ئەيسا يەر يۈزىدىكى ۋەزىپىلىرىدىن بەزىلىرىنى ئورۇنداشنىڭ ناھايىتى قىيىنلىقىنى، بولۇپمۇ ۋەزىپىنى تاماملاش ئۈچۈن ھەتتا ئازاب-ئوقۇبەت چېكىپ ئۆلۈمنى باشتىن كەچۈرىدىغانلىقىنى بىلگەن. شۇنداقتىمۇ، ئۇ پەقەت يەھۋا تاپشۇرغان ۋەزىپىنى بۇرچ سۈپىتىدە ئادا قىلىش ئۈچۈنلا ئەمەس، ئىنسانلارغا بولغان چوڭقۇر سۆيگۈ-مۇھەببىتى سەۋەبلىك، ھەممىگە بەرداشلىق بېرىشكە تەييار بولغان. ئەيسا قىزغىنلىق بىلەن ۋەز قىلغان، تەلىم بەرگەن ۋە باشقىلارغا ياردەم بەرگەن. ھەتتا ئۆز جېنىنى پىدا قىلىدىغان كۈنى ئۇ ۋاقتىنى چىقىرىپ، ئەلچىلەرنىڭ پۇتلىرىنى يۇيۇپ، ئۇلارغا يوليورۇق ئىلھام-مەدەت ۋە تەسەللى بەرگەن (يۇھاننا 13:12–15). ئۇ تۈۋرۈك ياغاچقا مىخلىنىپ ئازابلىنىۋاتقان پەيتتىمۇ، يېنىدىكى جىنايەتچىگە ئۈمىد بېرىدىغان سۆزلەرنى ئېيتقان. ئانىسىدىن خەۋەر ئېلىشنى يۇھانناغا تاپشۇرغان (لۇقا 23:42، 43؛ يۇھاننا 19:26، 27). شۇڭلاشقا، ئەيسا ئىنسانلارغا بولغان چىن سۆيگۈ-مۇھەببىتىنى پەقەت جېنىنى پىدا قىلىش ئارقىلىقلا ئەمەس، يەر يۈزدە ياشىغاندا ھەربىر ئېغىز گەپ-سۆزى ۋە ئىش-ھەرىكەتلىرىدە ھەم تولۇق نامايان قىلغان.
12. ئەيسا مەسىھ مۇشۇ كۈنگىچە بىزگە قانداق ياردەم قىلىپ كېلىۋاتىدۇ؟
12 ئەيسا بىز ئۈچۈن ھاياتىنى «بىر قېتىم» قۇربانلىققا بەرگەن بولسىمۇ، ئۇ مۇشۇ كەمگىچە بىز ئۈچۈن نۇرغۇن ئىشلارنى قىلىپ كېلىۋاتىدۇ (رىملىقلار 6:10). تۆلەم قۇربانلىقىنىڭ تولۇق پايدىسىنى كۆرۈشىمىز ئۈچۈن، ئۇ كۆپ كۈچ ۋە ۋاقىت چىقىرىۋاتىدۇ. مەسىلەن، ھازىر ئۇ پادىشاھ، باش روھانىي ۋە جامائەتنىڭ بېشى بولۇپ خىزمەت قىلماقتا (1-كورىنت. 15:25؛ ئەفەس. 5:23؛ ئىبرانىي. 2:17). بۇنىڭدىن باشقا، ئۇنىڭغا مەسىھ قىلىنغان ئېتىقادچىلارنى ۋە باشقا قويلارنى يىغىش ۋەزىپىسى تاپشۇرۇلغان. بۇ ۋەزىپە دەھشەتلىك چوڭ بالايىئاپەت ئاخىرلىشىشتىن بۇرۇن تاماملىنىدۇa (مەتتا 25:32؛ ماركۇس 13:27). ئۇنىڭدىن باشقا، ئۇ سادىق قۇل ئارقىلىق يەھۋاغا سادىق خىزمەت قىلىشىمىزغا ياردەم بېرىۋاتىدۇ (مەتتا 24:45). كەلگۈسىدە مىڭ يىللىق ھۆكۈمرانلىقى مەزگىلىدە، ئەيسا داۋاملىق بىزگە غەمخورلۇق قىلىدۇ. ئەيسانىڭ تۆلەم قۇربانلىقى — يەھۋا بىزگە بەرگەن ئاجايىپ سوۋغاتتۇر!
ئۆگىنىشنى ھەرگىز توختاتماڭ
13. يەھۋا خۇدا ۋە ئەيسا مەسىھ بىزگە بولغان چوڭقۇر سۆيگۈ-مۇھەببىتى توغرۇلۇق چوڭقۇر ئويلىنىش بىزگە قانداق ياردەم بېرىدۇ؟
13 بىز ياراتقۇچى يەھۋا ۋە مەسىھ ئەيسانىڭ بىز ئۈچۈن قىلىپ كېلىۋاتقان ئىشلىرى توغرىسىدا داۋاملىق چوڭقۇر ئويلانساق، ئۇلارنىڭ بىزگە بولغان سۆيگۈ-مۇھەببىتى ھەققىدە تېخىمۇ يېڭى نەرسىلەرنى ئۆگىنەلەيمىز. مەسىلەن، بۇ يىلقى مەسىھنىڭ ئۆلۈمىنى خاتىرىلەش يىغىلىشىنىڭ ئالدى-كەينىدىكى ھەپتىلەردە بىر-ئىككى خۇش خەۋەر كىتابىنى كۆڭۈل قويۇپ ئوقۇپ چىقىڭ. بىر ئولتۇرۇپلا، نۇرغۇن بابلارنى ئوقۇپ چىقىشىڭىز ھاجەت ئەمەس. ئۇنىڭ ئورنىغا، ئالدىرىماي يەھۋا ۋە مەسىھ ئەيساغا بولغان سۆيگىڭىزنى كۈچەيتىشنىڭ يەنە باشقا سەۋەبلىرىنى تېپىشقا تىرىشىڭ. كېيىن بولسا، ئۆگەنگەنلىرىڭىزنى باشقىلارغا ئېيتىپ بېرىڭ.
14. داۋاملىق تۆلەم ۋە باشقا ھەقىقەتلەر توغرۇلۇق كۆپرەك تەتقىق قىلىپ ئۆگىنىش بىزگە قانداق ياردەم بېرىدۇ؟ (زەبۇر 119:97) (رەسىمگە ھەم قاراڭ).
14 ئۇزۇن يىللاردىن بۇيان ھەقىقەتتە بولسىڭىز، بەلكىم سىزگە خۇدانىڭ ئادالىتى، سۆيگۈ-مۇھەببىتى ۋە تۆلەم كەبى ماۋزۇلاردا يېڭى نەرسىلەرنى بايقاش مۇمكىن ئەمەستەك بىلىنىدىغاندۇ. ئەمەلىيەتتە، مۇقەددەس كىتابتىكى بۇ ۋە باشقا ماۋزۇلارغا مۇناسىۋەتلىك ھەقىقەتلەرنى ھەرگىزمۇ ئۆگىنىپ تۈگىتەلمەيمىز. ئۇنداقتا نېمە قىلالايمىز؟ شۇڭا، نەشرى ماتېرىياللىرىمىزنى ئوقۇپ، چوڭقۇر قېزىڭ. بەزى ئايەتلەرنى چۈشىنەلمىسىڭىز، كۆپرەك ئىزدىنىپ تەتقىق قىلىڭ. كېيىن، كۈن بويى ئۆگەنگەنلىرىڭىز ھەققىدە تەپسىلىي مۇلاھىزە قىلىڭ ۋە شۇلارنىڭ يەھۋا خۇدا، ئەيسا مەسىھ ۋە ئۇلارنىڭ سىزگە كۆرسەتكەن سۆيگۈ-مۇھەببىتى توغرۇلۇق نېمە دەيدىغانلىقى توغرۇلۇق چوڭقۇر ئويلىنىڭ.—زەبۇر 119:97-نى ئوقۇڭ.
نۇرغۇن يىللار بۇيان ھەقىقەتتە بولساقمۇ، تۆلەمگە بولغان مىننەتدارلىقىمىزنى داۋاملىق ئاشۇرالايمىز (14-ئابزاسقا قاراڭ)
15. نېمە ئۈچۈن داۋاملىق مۇقەددەس كىتابتىن يېڭى گۆھەرلەرنى قېزىشىمىز كېرەك؟
15 ھەر قېتىم مۇقەددەس كىتابنى ئوقۇپ تەتقىق قىلغاندا، يېڭى ياكى قىزىقارلىق بىر ئوي-پىكىر تاپالمىسىڭىز، روھىڭىز چۈشۈپ كەتمىسۇن. مەسىلەن، ئالتۇن قازغۇچىلارنى ئالساق، ئۇلار ھەمىشە سەۋرچانلىق بىلەن سائەت-سائەتلەپ، ھەتتا كۈن-كۈنلەپ ئىزدەپ، ئاران كىچىككىنە بىر ئالتۇن پارچىسىنى تاپىدۇ. ئۇلارنىڭ بەل قويۇۋەتمەي شۇنداق جاپالىق ئىزدىشىنىڭ سەۋەبى، شۇ كىچىككىنە ئالتۇن پارچىسى ئۇلار ئۈچۈن قىممەتلىك. مۇقەددەس كىتابتىكى ھەقىقەتلەر ئالتۇندىن كۆپ قىممەتلىك ئەمەسمۇ؟ (زەبۇر 119:127؛ پەند ن. 8:10) شۇنداق ئىكەن، ھەر كۈنى سەۋر-تاقەت بىلەن مۇقەددەس كىتابنى ئوقۇپ تەتقىق قىلىڭ، يېڭى نەرسىلەرنى تاپقۇچە بەل قۇيۇۋەتمەڭ.—زەبۇر 1:2.
16. ياراتقۇچى يەھۋا ۋە مەسىھ ئەيسانى قانداق ئۈلگە قىلالايمىز؟
16 تەتقىق قىلىپ ئىزدىنىپ ئۆگەنگەندىن كېيىن، ئۆگەنگەنلىرىڭىزنى ئەمەلىيەتتە قانداق قوللىنىش توغرۇلۇق ئويلىنىڭ. مەسىلەن، ھەممىسىگە ئوخشاش مۇئامىلە قىلىش ئارقىلىق، يەھۋانىڭ ئادىللىقىنى ئۈلگە قىلىڭ. يەھۋانىڭ ئىسىمى ئۈچۈن ئازاب-ئوقۇبەت چېكىشكە ۋە ئېتىقادچى قېرىنداشلىرىڭىزغا پىداكارلىق بىلەن ياردەم بېرىشكە تەييار بولۇش ئارقىلىق، ئەيسانىڭ ئاسماندىكى ئاتىسىغا ۋە باشقىلارغا بولغان مېھىر-مۇھەببىتىنى ئۈلگە قىلىڭ. بۇنىڭدىن باشقا، ئادەملەرگە قىزغىن ۋەز قىلىپ، ئۇلارنىڭمۇ ياراتقۇچى يەھۋانىڭ ئىنسانلارغا بەرگەن بىباھا سوۋغىتىنى قوبۇل قىلىش پۇرسىتىگە ئېرىشىشىگە ياردەم بېرىش ئارقىلىق ئەيسانى ئۈلگە قىلىڭ.
17. كېيىنكى ماقالىدە نېمىلەرنى مۇھاكىمە قىلىمىز؟
17 تۆلەمنىڭ مەنىسىنى ياخشىراق چۈشىنىپ، ئۇنى تېخىمۇ قەدىرلىگەنسېرى، يەھۋا خۇدا ۋە ئەيسا مەسىھكە بولغان سۆيگۈ-مۇھەببىتىمىز تېخىمۇ كۈچىيىدۇ. شۇنىڭدەك، ئۇلارنىڭمۇ بىزگە بولغان سۆيگۈ-مۇھەببىتى ئاشىدۇ (يۇھاننا 14:21؛ ياقۇپ 4:8). شۇڭا، مۇقەددەس كىتاب ۋە نەشرى ماتېرىياللىرىمىزدىن داۋاملىق تۆلەم توغرىسىدا كۆپرەك ئۆگىنەيلى. كېيىنكى ماقالىدە، تۆلەمدىن قانداق پايدا-مەنپەئەتكە ئېرىشىدىغانلىقىمىز ۋە يەھۋانىڭ سۆيگۈ-مۇھەببىتىگە مىننەتدارلىقىمىزنى قانداق بىلدۈرەلەيدىغانلىقىمىزنى مۇھاكىمە قىلىمىز.
50-ناخشا خۇدانىڭ سۆيگۈ-مۇھەببەت ئۈلگىسى
a پاۋلۇس ئەفەسلىكلەر 1:10-ئايەتتە تىلغان ئالغان ئاسماندىكى نەرسىنى يىغىش بىلەن، ئەيسانىڭ مەتتا 24:31 ۋە ماركۇس 13:27-ئايەتلەردىكى «تاللانغانلارنى» يىغىپ جەم قىلىش بىر-بىرىدىن پەرقلىنىدۇ. ئەلچى پاۋلۇسنىڭ سۆزلىرى، يەھۋا كەلگۈسىدە ئەيسا بىلەن بىرگە ھۆكۈمرانلىق قىلىدىغانلارنى تاللاپ، مۇقەددەس روھى ئارقىلىق ئۇلارنى مەسىھ قىلىدىغان ۋاقىتنى كۆرسىتىدۇ. ئەيسانىڭ سۆزلىرى بولسا، دەھشەتلىك چوڭ بالايىئاپەت مەزگىلىدە، ئۇ پەرىشتىلەرنى ئەۋەتىپ، مۇقەددەس روھ بىلەن مەسىھ قىلىنغانلارنىڭ يەر يۈزىدە ياشاۋاتقان قالدۇق ئەزالىرىنى يىغىپ جەم قىلىپ ئاسمانغا ئېلىپ چىقىپ كېتىدىغان ۋاقىتنى كۆرسىتىدۇ.