14-تەتقىق ماقالىسى
«بۇنىڭدىن ھەممىسى سىلەرنىڭ مېنىڭ شاگىرتلىرىم ئىكەنلىكىڭلارنى بىلىدۇ»
«ئەگەر ئاراڭلاردا سۆيگۈ-مۇھەببەت بولسا، بۇنىڭدىن ھەممىسى سىلەرنىڭ مېنىڭ شاگىرتلىرىم ئىكەنلىكىڭلارنى بىلىدۇ».—يۇھاننا 13:35.
3-ناخشا «خۇدا ئۆزى مېھىر-مۇھەببەتتۇر»
بۇ ماقالىدەa
گۇۋاھچى ئەمەس نۇرغۇن كىشىلەر يەھۋانىڭ خەلقى ئارىسىدىكى سۆيگۈ-مۇھەببەتنى كۆرگىنىدە، بۇ ئۇلارغا قانداق تەسىر قىلغان؟ (1-ئابزاسقا قاراڭ)
1. قىزىقىش كۆرسىتىدىغان كىشىلەر يىغىلىشلىرىمىزغا قاتناشقاندا، ئۇلارغا نېمە چوڭقۇر تەسىر قىلىدۇ؟ (رەسىمگە ھەم قاراڭ)
بىرىنچى قېتىم يەھۋا گۇۋاھچىلىرىنىڭ ئىبادەت يىغىلىشىغا قاتناشقان بىر جۈپ ئەر-ئايالنى تەسەۋۋۇر قىلىپ كۆرۈڭ. ئۇلار قېرىنداشلارنىڭ دوستانە مۇئامىلىدە بولۇپ، بىر-بىرىگە سۆيگۈ-مۇھەببەت كۆرسەتكەنلىكىدىن ئىنتايىن تەسىرلەندى. يىغىلىشتىن كېيىن ئۆيگە قايتىش يولىدا، ئايالى ئېرىگە مۇنداق دەيدۇ: «بۇ كىشىلەر مەن ئۇچراتقان باشقا كىشىلەردىن پەرقلىق. ئۇلارنىڭ ئارىسىدا ئۆزۈمنى خۇشال ھېس قىلدىم».
2. نېمە ئۈچۈن بەزىلەر يەھۋاغا خىزمەت قىلىشنى توختىتىدۇ؟
2 يەھۋا گۇۋاھچىلىرىنىڭ جامائىتىدىكىلەر ئارىسىدا بولغان سۆيگۈ-مۇھەببەت ھەقىقەتەن كىشىلەرنى ئۆزىگە جەلپ قىلىدۇ. يەھۋا گۇۋاھچىلىرى نامۇكەممەل كىشىلەر (1-يۇھاننا 1:8). شۇڭا، بىز جامائەتتىكى كىشىلەر بىلەن تونۇشقانسېرى، ئۇلارنىڭ بەزى كەمچىلىك تەرەپلىرىنى كۆرۈشىمىز مۇمكىن (رىملىقلار 3:23). ئەپسۇسلىنارلىقى شۇكى، باشقىلارنىڭ كەمچىلىكى سەۋەبلىك بەزىلەر يەھۋاغا خىزمەت قىلىشنى توختىتىدۇ.
3. ھەقىقىي مەسىھ ئەگەشكۈچىلىرىنى قانداق بىلەلەيسىلەر؟ (يۇھاننا 13:34، 35)
3 بۇ ماقالىنىڭ ئاساسىي تېما ئايىتىگە قاراڭ (يۇھاننا 13:34، 35-نى ئوقۇڭ). مەسىھنىڭ ھەقىقىي ئەگەشكۈچىلىرىنىڭ كۆزگە كۆرۈنەرلىك ئالاھىدىلىكى نېمە؟ ئۇ مۇكەممەللىك ئەمەس، سۆيگۈ-مۇھەببەت. دىققەت قىلسىڭىز، ئەيسا: «بۇنىڭدىن سىلەر مېنىڭ شاگىرتىم ئىكەنلىكىڭلارنى بىلىسىلەر»،— دېمىگەن. ئەكسىنچە، ئۇ: «بۇنىڭدىن ھەممىسى سىلەرنىڭ مېنىڭ شاگىرتلىرىم ئىكەنلىكىڭلارنى بىلىدۇ»،— دېگەن. ئەيسانىڭ مۇشۇ سۆزلىرى پەقەت ئۇنىڭ ئەگەشكۈچىلىرى ئەمەس، بەلكى جامائەتنىڭ سىرتىدىكى كىشىلەرمۇ ئۇلار ئارىسىدا شەخسىيەتچىلىكتىن خالى سۆيگۈ-مۇھەببەت بولغىنىدىن، ئۇلارنىڭ ھەقىقىي مەسىھ ئەگەشكۈچىلىرى ئىكەنلىكىنى تونۇپ يېتىدىغانلىقىنى كۆرسەتكەن.
4. بەزىلەر ھەقىقىي مەسىھ ئەگەشكۈچىلىرى ھەققىدە نېمىلەرنى بىلىشنى خالايدۇ؟
4 يەھۋا گۇۋاھچىلىرى بولمىغان بەزى كىشىلەر مۇنداق ئويلىشى مۇمكىن: «سۆيگۈ-مۇھەببەت ئەيسانىڭ ھەقىقىي ئەگەشكۈچىلىرىنى تونۇشىمىزغا قانداق ياردەم بېرىدۇ؟ ئەيسا ئەلچىلىرىگە سۆيگۈ-مۇھەببىتىنى قانداق كۆرسەتكەن؟ بۈگۈنكى كۈندە ئەيسانى قانداق ئۈلگە قىلىشقا بولىدۇ؟» گۇۋاھچىلار بۇ سوئاللارنىڭ جاۋابى ئۈستىدە چوڭقۇر ئويلىنىدۇ. بۇ بولۇپمۇ، باشقىلارنىڭ كەمچىلىكىنى كۆرگەندە، ئۇلارغا سۆيگۈ-مۇھەببەت بىلەن مۇئامىلە قىلىشىمىزغا ياردەم بېرىدۇ.—ئەفەس. 5:2.
ھەقىقىي مۇھەببەت ئەيسانىڭ ھەقىقىي ئەگەشكۈچىلىرىنىڭ بىردىن-بىر بەلگىسى
5. يۇھاننا 15:12، 13-ئايەتلەردىكى ئەيسانىڭ سۆزلىرىنى چۈشەندۈرۈڭ.
5 ئەيسا ئالاھىدە مۇھەببەتنىڭ ئۆز ئەگەشكۈچىلىرىنى تونۇتىدىغان بەلگە ئىكەنلىكىنى ئېنىق كۆرسەتكەن (يۇھاننا 15:12، 13-نى ئوقۇڭ). ئەيسانىڭ ئۇلارغا نېمە قىلىشنى بۇيرۇغانلىقىغا قاراپ باقايلى: «خۇددى مەن سىلەرنى سۆيگەندەك، سىلەرمۇ بىر-بىرىڭلارنى سۆيۈڭلار». ئۇ نېمە دېمەكچى بولغان؟ ئەيسا چۈشەندۈرگەندەك، بۇ مەسىھ ئەگەشكۈچىسى ئۆزىنى پىدا قىلىدىغان سۆيگۈ، يەنى كېرەك بولسا، ھەتتا قېرىندىشى ئۈچۈن ئۆز جېنىنى پىدا قىلىشقا ئۈندەيدىغان سۆيگۈ-مۇھەببەتتۇرb.
6. خۇدانىڭ سۆزى سۆيگۈ-مۇھەببەتنىڭ مۇھىملىقىنى قانداق تەكىتلەيدۇ؟
6 خۇدا سۆزىدە سۆيگۈ-مۇھەببەتنىڭ ئىنتايىن مۇھىملىقى تەكىتلەنگەن. نۇرغۇن كىشىلەر تۆۋەندىكى ئايەتلەرنى ياخشى كۆرىدۇ: «خۇدا ئۆزى مۇھەببەتتۇر» (1-يۇھاننا 4:8). «قوشناڭنى ئۆزۈڭنى سۆيگەندەك سۆي» (مەتتا 22:39). «سۆيگۈ كۆپلىگەن گۇناھلارنى ياپىدۇ» (1-پېتر. 4:8). «مۇھەببەت ئەسلا تۈگەپ كەتمەيدۇ» (1-كورىنت. 13:8). مۇشۇ ۋە باشقا ئايەتلەر باشقىلارغا گۈزەل پەزىلەتلەرنى يېتىلدۈرۈش ۋە ئۇنى نامايان قىلىشنىڭ نەقەدەر مۇھىملىقىنى ئېنىق كۆرسىتىپ بېرىدۇ.
7. نېمە ئۈچۈن شەيتان ئىنسانلارنى بىر-بىرىگە سۆيگۈ-مۇھەببەت كۆرسىتىشكە ۋە ئۆزئارا ئىناق ئۆتۈشكە ئۆگىتەلمەيدۇ؟
7 نۇرغۇن كىشىلەر مۇنداق سورايدۇ: «ھەقىقىي دىننى قانداق ئېنىقلاشقا بولىدۇ؟ بارچە دىنلار ئۆزلىرىنىڭ ھەقىقەتنى ئۆگىتىدىغانلىقىنى ئېيتىدۇ، بىراق ھەر بىرى خۇدا ھەققىدە ئوخشىمايدىغان تەلىملەرنى ئۆگىتىدۇ». شەيتان نۇرغۇنلىغان ساختا دىنىي تەشكىلاتلارنى بارلىققا كەلتۈرۈپ، كىشىلەرنى قايمۇقتۇرىۋەتكەن. ئەمما، ئۇ ھەرگىزمۇ بىر-بىرىگە سۆيگۈ-مۇھەببەت كۆرسىتىدىغان مەسىھ ئەگەشكۈچىلىرىنىڭ خەلقئارالىق قېرىنداشلىق رىشتىنى ئورنىتالمايدۇ. پەقەت يەھۋا شۇنداق قىلالايدۇ. بىز بىلىمىزكى، سۆيگۈ-مۇھەببەتنىڭ مەنبەسى — يەھۋادۇر. پەقەت يەھۋانىڭ روھىغا ۋە ئۇنىڭ بەرىكىتىگە ئېرىشكەنلەر بىر-بىرىگە ھەقىقىي سۆيگۈ-مۇھەببەت كۆرسىتەلەيدۇ (1-يۇھاننا 4:7). شۇڭا، ئەيسانىڭ پەقەت ئۆز ئەگەشكۈچىلىرى بىر-بىرىـگە ھەقىـقىي سـۆيگۈ-مۇھـەببەت كۆرسىتىدىغانلىقىنى ئېيتقانلىقى ئەجەبلىنەرلىك ئەمەس.
8، 9. يەھۋا گۇۋاھچىلىرىنىڭ ئارىسىدىكى سۆيگۈ-مۇھەببەت نۇرغۇن كىشىلەرگە قانداق تەسىر قىلغان؟
8 ئەيسا ئالدىن ئېيتقاندەك، نۇرغۇن كىشىلەر ئۇنىڭ ھەقىقىي ئەگەشكۈچىلىرىنى بىر-بىرىگە كۆرسەتكەن ھەقىقىي سۆيگۈ-مۇھەببەتتىن تونۇپ كېلىۋاتىدۇ. مەسىلەن، ئىئان ئىسىملىك بىر بۇرادەر ئۆزىنىڭ ئۆيىگە يېقىن بىر تەنتەربىيە مەيدانىدا ئۆتكۈزۈلگەن چوڭ يىغىلىشقا قاتناشقان ۋاقتىنى ئەسلىگەن. ئۇ بىرنەچچە ئاي بۇرۇن تەنتەربىيە مەيدانىدا مۇسابىقە ئۆتكۈزۈلگەندە شۇ يەرگە كەلگەن ئىدى. ئۇ مۇنداق دەيدۇ: «بۇ قېتىم شۇ يەرگە كەلگىنىمدە، ھەممە نەرسە پەرقلىق ئىدى. گۇۋاھچىلار ئەدەپلىك ۋە چىرايلىق كىيىنگەن. بالىلىرىمۇ ئەدەپ-ئەخلاقلىق ئىدى. ھەممىدىن مۇھىمى، بۇ كىشىلەردە مەمنۇنلۇق ۋە تىنچ-خاتىرجەملىك تۇيغۇسى بار ئىدى. مەن بۇ مۇھىتنى ئىنتايىن ياقتۇردۇم. چۈنكى ھاياتىمدا شۇنداق ھېس تۇيغۇ كەلمىدى. شۇ كۈنى قانداق نۇتۇقلار بولغانلىقى ئېسىمدە يوق. ئەمما گۇۋاھچىلارنىڭ يۈرۈش-تۇرۇشى ماڭا ئۇنتۇلغۇسىز تەسىرات قالدۇرغانc». مۇنداق يۈرۈش-تۇرۇش ئەلۋەتتە بىر-بىرىمىزگە بولغان ھەقىقىي مۇھەببەتنىڭ نەتىجىسىدۇر. بىز قېرىنداشلىرىمىزنى ياخشى كۆرگەچ، ئۇلارغا مېھرىبانلىق ۋە ھۆرمەت بىلەن مۇئامىلە قىلىمىز.
9 جون ئىسىملىك بىر بۇرادەر جامائەت يىغىلىشلىرىغا قاتنىشىشقا باشلىغاندا، شۇنىڭغا ئوخشاش ھېس-تۇيغۇنى باشتىن كەچۈرگەن. ئۇ مۇنداق دەيدۇ: «دوستانە مۇئامىلە ماڭا قاتتىق تەسىر قىلدى. ئۇ يەردىكى كىشىلەرنىڭ ھەممىسى مۇكەممەلدەك كۆرۈنگەن. ئۇلارنىڭ ھەقىقىي مۇھەببىتى مېنى ھەق دىننى تاپقىنىمغا قايىل قىلدىd». بۇلار ۋە باشقا نۇرغۇن كەچۈرمىشلەر يەھۋانىڭ خەلقىنىڭ ھەقىقىي مەسىھ ئەگەشكۈچىلىرى ئىكەنلىكىنى كۆرسىتىدۇ.
10. بولۇپمۇ قانداق ۋاقىتلاردا مەسىھ ئەگەشكۈچىلىرىگە خاس سۆيگۈ-مۇھەببەتنى نامايان قىلىش پۇرسىتىمىز بولىدۇ؟ (ئىزاھاتكە ھەم قاراڭ)
10 ماقالىنىڭ بېشىدا كۆرۈپ ئۆتكىنىمىزدەك، ئېتىقادچى قېرىنداشلارنىڭ ھېچقايسىسى مۇكەممەل ئەمەس. بەزى ۋاقىتلاردا، ئۇلار بىزنى رەنجىتىپ قويىدىغان سۆزلەرنى ياكى ئىشلارنى قىلىدۇe (ياقۇپ 3:2). بۇنداق ۋەزىيەتلەردە، مەسىھ ئەگەشكۈچىلىرىگە خاس سۆيگۈ-مۇھەببىتىمىزنى نامايان قىلىشقا پۇرسىتىمىز بولىدۇ. شۇنداق ۋاقىتلاردا، ئەيسانىڭ كۆرسەتكەن ئۈلگىسىدىن نېمىلەرنى ئۆگىنەلەيمىز؟—يۇھاننا 13:15.
ئەيسا ئۆز ئەلچىلىرىگە سۆيگۈ-مۇھەببىتىنى قانداق كۆرسەتكەن؟
گەرچە ئەلچىلىرى نۇرغۇن خاتالىقلارنى ئۆتكۈزگەن بولسىمۇ، ئەيسا ئۇلارغا سۆيگۈ-مۇھەببىتىنى كۆرسەتكەن (11–13-ئابزاسلارغا قاراڭ)
11. ياقۇپ بىلەن يۇھاننا قانداق يامان مىجەز-خۇلۇقنى كۆرسەتكەن؟ (رەسىمگە ھەم قاراڭ)
11 ئەيسا ئۆز ئەگەشكۈچىلىرىدىن مۇكەممەل بولۇشنى تەلەپ قىلمىغان. ئەكسىچە، ئۇلارنىڭ يېقىمسىز مىجەز-خۇلقلىرىنى تۈزىتىشىگە مېھرىبانلىق بىلەن ياردەم بەرگەن. شۇنداق قىلىپ ئۇلار يەھۋانىڭ كۆڭلىنى خۇرسەن قىلالىغان. بىر قېتىم ئۇنىڭ ئىككى ئەلچىسى ياقۇپ بىلەن يۇھاننا ئۆز ئانىسىنى ئەۋەتىپ، ئەيسادىن پادىشاھلىقتا مۇھىم ئورۇنلارنى بېرىشىنى ئۆتۈنگەن (مەتتا 20:20، 21). بۇ ھەرىكىتى بىلەن ياقۇپ ۋە يۇھاننا ئۆزلىرىنىڭ تەكەببۇر ۋە ئۆزلىرىنى باشقىلاردىن يۇقىرى قويۇشنى خالايدىغانلىقىنى كۆرسەتكەن.—پەند. نە 16:18.
12. پەقەت ياقۇپ بىلەن يۇھاننا ناچار مىجەز-خۇلۇقنى كۆرسەتكەنمۇ؟ چۈشەندۈرۈڭ.
12 ئاشۇ پەيتتە ناچار مىجەز-خۇلقنى نامايان قىلغانلار پەقەت ياقۇپ بىلەن يۇھاننا ئەمەس ئىدى. باشقا ئەلچىلەر ئۇلارنىڭ ھەرىكەتلىرىگە قانداق ئىنكاس قايتۇرغانلىقىغا دىققەت قىلىپ باقايلى: «باشقا ئون شاگىرت بۇنى ئاڭلاپ، ئۇ ئاكا-ئۇكا ئىككىسىگە قاتتىق خاپا بولۇشتى» (مەتتا 20:24). ياقۇپ، يۇھاننا ۋە باشقا ئەلچىلەرنىڭ غەزەپلىنىپ، تاللاش-تارتىش قىلغانلىقىنى تەسەۋۋۇر قىلساق بولىدۇ. باشقىلار مۇنداق دېگەن بولۇشى مۇمكىن: «ئۆزۈڭلارنى كىم چاغلاپ قالدىڭلار؟ سىلەر ئۆزۈڭلارنى بىزدىن ياخشىراق دېمەكچىمۇسىلەر؟ شۇڭا، ئۆزۈڭلارچە بىزدىن يۇقىرى مەرتىۋە ئورنىنى سورىدىڭلار. پەقەت سىلەر ئەيسا بىلەن جاپالىق خىزمەت قىلمىدىڭلار. بىزمۇ ئالاھىدە ئىمتىيازغا ئېرىشىشكە لايىق». مەيلى ئۇلار نېمە ئويلىغان ياكى سۆزلىگەن بولسۇن، ئاشۇ ۋەزىيەتتە ئۇلار بىر-بىرىگە ھەمىشە سۆيگۈ-مۇھەببەت ۋە مېھرىبانلىق كۆرسىتىشى كېرەكلىكىنى ئۇنتۇغان.
13. ئەيسا ئۆز ئەلچىلىرىنىڭ كەمچىلىكىگە قانداق ئىنكاس قايتۇرغان؟ (مەتتا 20:25–28)
13 مۇشۇ ئەھۋالدا ئەيسا نېمە قىلغان؟ ئۇ ئاچچىقلانمىغان. ئۇ ھەمىشە بىر-بىرىگە سۆيگۈ-مۇھەببەت بىلەن مۇئامىلە قىلىدىغان، ئۇلاردىن تېخىمۇ كەمتەر كىشىلەر ئارىسىدىن ياخشىراق ئەلچىلەرنى ئىزدەيدىغانلىقىنى ئېيتمىغان. ئەكسىنچە، سەۋرچان بولۇپ، ئاشۇ سەمىمىي شاگىرتلىرى بىلەن سۆھبەتلەشكەن (مەتتا 20:25–28-نى ئوقۇڭ). گەرچە ئەلچىلەرنىڭ ئىچىدە كىم ئەڭ ئۇلۇغ ئىكەنلىكى توغرىسىدىكى تاللاش-تارتىش داۋاملىشىپ تۇرغان بولسىمۇ، ئەيسا ھەمىشە ئەلچىلىرىگە مېھرىبانلىق بىلەن مۇئامىلە قىلغان.—ماركۇس 9:34؛ لۇقا 22:24.
14. ئەيسانىڭ ئەلچىلىرى قانداق مۇھىتتا چوڭ بولغان؟
14 ئېنىقكى، ئەيسا ئەلچىلەر چوڭ بولغان مەدەنىيەتنىڭ يامان تەسىرىگە ئۇچرىغانلىقىنى ئەستىن چىقارمىغان (يۇھاننا 2:24، 25). ئۇلار دىنىي رەھبەرلەر نام-ئابروي ۋە مەرتىۋە ئورنىغا ئالاھىدە ئەھمىيەت بېرىدىغان بىر مۇھىتتا چوڭ بولغان ئىدى (مەتتا 23:6). شۇ زاماندا يەھۇدىي دىنىي رەھبەرلەر ئۆزلىرىنى باشقىلاردىن ياخشىراق دەپ ئويلايتتىf (لۇقا 18:9–12). ئەيسا ئۇنداق مۇھىت ئەلچىلەرنىڭ ۋە باشقىلارنىڭ كۆز قارىشىغا تەسىر كۆرسىتىدىغانلىقىنى چۈشەنگەن (پەند. نە 19:11). ئۇ ئۆز شاگىرتلىرىدىن ھەرگىزمۇ خاتالىق ئۆتكۈزمەسلىكنى تەلەپ قىلمىغان. ئەكسىچە، ئۇلار خاتالىق ئۆتكۈزگەندە، ئۇلارغا سەۋرچانلىق بىلەن مۇئامىلە قىلغان. ئەيسا ئۇلارنىڭ كۆڭلى ياخشى كىشىلەر ئىكەنلىكىنى بىلەتتى. شۇڭا، ئۇ سەۋرچانلىق بىلەن، ئۇلارنى مەغرۇرلۇق ۋە ئۆزىنى چوڭ تۇتۇشتەك يامان ئىللەتلەرنى تاشلاپ، تېخىمۇ كەمتەر بولۇشقا ۋە باشقىلارغا سۆيگۈ-مۇھەببەت كۆرسىتىشكە ئۆگەتكەن.
بىز ئەيسانى قانداق ئۈلگە قىلالايمىز؟
15. ياقۇپ ۋە يۇھاننا مۇناسىۋەتلىك ۋەقەدىن نېمىلەرنى ئۆگىنەلەيمىز؟
15 بىز ياقۇپ بىلەن يوھاننا مۇناسىۋەتلىك ئاشۇ ۋەقەدىن نۇرغۇن نەرسىلەرنى ئۆگىنەلەيمىز. ئۇلارنىڭ پادىشاھلىقتا يۇقىرى مەرتىۋە ئورنىنى سورىشى خاتا ئىدى. ئەمما، باشقا ئەلچىلەرمۇ خاتالىق ئۆتكۈزگەن. ئۇلار ئىناق-ئىتتىپاقلىقنى ساقلاشقا ھەرىكەت قىلمىغان. بىراق، ئەيسا 12 ئەلچىسىگە مېھرىبانلىق ۋە مېھىر-مۇھەببەت بىلەن مۇئامىلە قىلغان. بۇنىڭدىن نېمىنى ئۆگىنەلەيمىز؟ پەقەت باشقىلارنىڭ نېمە قىلىشىلا ئەمەس، بەلكى ئۇلارنىڭ خاتالىقى ياكى كەمچىلىكىگە قانداق ئىنكاس قايتۇرۇشىمىزمۇ ئىنتايىن مۇھىم. شۇنداق قىلىشىمىزغا نېمە ياردەم بېرىدۇ؟ بىر قېرىندىشىمىزغا خاپا بولغاندا، ئۆز-ئۆزىمىزدىن مۇنۇلارنى سوراپ كۆرسەك بولىدۇ: «ئۇنىڭ قىلغانلىرى نېمىشقا مېنى شۇنچە خاپا قىلىدۇ؟ بۇ مېنىڭ ئۆزگەرتىشكە تېگىشلىك ناچار مىجەز-خۇلقۇم بارلىقىنى كۆرسىتەمدۇ؟ كۆڭلۈمنى ئاغرىتقان كىشى مەلۇم بىر قىيىنچىلىققا دۇچ كەلگەنمىدۇ؟ گەرچە ئاچچىقلىنىشقا ھەقلىق بولساممۇ، مەن مېھىر-مۇھەببەت كۆرسىتىپ، ئۇنى كەچۈرۈۋېتىشكە تەييارمۇ؟» باشقىلارغا سۆيگۈ-مۇھەببەت بىلەن مۇئامىلە قىلغانسېرى، ئەيسانىڭ ھەقىقىي ئەگەشكۈچىلىرى ئىكەنلىكىمىزنى تېخىمۇ كۆپرەك ئىسپاتلايمىز.
16. ئەيسانىڭ ئۈلگىسىدىن يەنە نېمىلەرنى ئۆگىنەلەيمىز؟
16 ئەيسانىڭ ئۈلگىسى يەنە بىزگە قېرىنداشلىرىمىزنى چۈشىنىشكە تىرىشىشنى ئۆگىتىدۇ (پەند. نە 20:5). ئۇ باشقىلارنىڭ يۈرىكىدە نېمە بارلىقىنى بىلەلەيدۇ. بىز بىلەلمەيمىز. ئەمما، قېرىنداشلىرىمىز بىزنى رەنجىتكەندە، ئۇلارغا سەۋرچانلىق كۆرسىتەلەيمىز (ئەفەس. 4:1، 2؛ 1-پېتر. 3:8). ئەگەر ئۇلارنىڭ مەدەنىيەت ئارقا كۆرۈنۈشىنى بىلسەك، شۇنداق قىلىش تېخىمۇ ئاسانراق بولىدۇ. بىر مىسالنى كۆرۈپ باقايلى.
17. رايونغا مەسئۇل ئاقساقال باشقا بىر قېرىنداشنى ياخشىراق تونۇشنىڭ قانداق پايدىسىنى كۆرگەن؟
17 شەرقىي ئافرىقىدا جامائەتلەرنى زىيارەت قىلىدىغان بىر ئاقساقال بىر بۇرادەرنى مىجەزى قوپال كىشى دەپ قارىغانلىقىنى ئەسلەيدۇ. ئاشۇ رايونغا مەسئۇل ئاقساقال نېمە ئىش قىلغان؟ ئۇ مۇنداق دەيدۇ: «بۇ بۇرادەردىن ئۆزۈمنى قاچۇرۇشنىڭ ئورنىغا، ئۇنى تېخىمۇ ياخشىراق تونۇشنى قارار قىلدىم». شۇنداق قىلىش ئارقىلىق ئۇ ئاقساقال ئاشۇ بۇرادەرنىڭ مىجەز-خۇلقىغا تەسىر قىلغان بەزى نەرسىلەرنى بىلگەن. ئۇ سۆزىنى داۋاملاشتۇرۇپ مۇنداق دەيدۇ: «مەن شۇ بۇرادەرنىڭ باشقىلار بىلەن چىقىشىپ ئۆتۈشنى خالايدىغانلىقى ۋە ئاللىقاچان نۇرغۇن ئۆزگەرتىشلەرنى قىلغانلىقى، ئەمما شۇنداق قىلىش ئۇنىڭ ئۈچۈن قانچىلىك قىيىن بولغانلىقىنى بىلگەندە، ئۇنىڭغا بولغان ھۆرمىتىم ئاشتى. بىز يېقىن دوست بولۇپ كەتتۇق». ئېتىقادچى قېرىنداشلىرىمىزنى چۈشىنىشكە تىرىشساق، ئۇلارغا ھەمىشە سۆيگۈ-مۇھەببىتىمىزنى كۆرسىتىش ئاسانراق بولىدۇ.
18. ئەگەر بىر قېرىندىشىمىزغا رەنجىگەن بولساق، ئۆزىمىزدىن قانداق سوئاللارنى سوراپ كۆرسەك بولىدۇ؟ (پەندى-نەسىھەت 26:20)
18 بەزىدە بىزنى رەنجىتىپ قويغان قېرىنداش بىلەن سۆزلىشىشىمىز كېرەك دەپ قارىشىمىز مۇمكىن. ئەمما، ئاۋۋال ئۆز-ئۆزىمىزدىن مۇنداق سوئاللارنى سوراپ كۆرسەك ياخشى: «مەن يۈز بەرگەن ئىشنى تولۇق چۈشىنىمەنمۇ؟» (پەند. نە 18:13) «ئۇ قەستەن شۇنداق قىلمىغان بولسىچۇ؟» (ۋەز 7:20) «مەنمۇ ئىلگىرى شۇنداق خاتالىقنى سادىر قىلغانمۇ؟» (ۋەز 7:21، 22) «ئۇنىڭ بىلەن مۇشۇ توغرىسىدا پاراڭلاشسام، تۈگمىدەك ئىش تۆگىدەك يوغان بولۇپ كېتەمدۇ»؟ (پەندى-نەسىھەت 26:20-نى ئوقۇڭ) مۇشۇ سوئاللار ئۈستىدە ئويلانساق، سۆيگۈ-مۇھەببەت بىزنى يۈز بەرگەن ئىشلارنى داۋاملىق خىيال قىلىشنى توختىتىشقا ئۈندىشى مۇمكىن.
19. نېمە قىلىشقا قەتئىي بەل باغلىدىڭىز؟
19 يەھۋا گۇۋاھچىلىرى بىر-بىرىگە سۆيگۈ-مۇھەببەت كۆرسىتىش ئارقىلىق ئەيسانىڭ ھەقىقىي شاگىرتلىرى ئىكەنلىكىنى ئىسپاتلىماقتا. قېرىنداشلىرىمىزنىڭ كەمچىلىكلىرىگە قارىماي، ئۇلارغا شەخسىيەتچىلىكتىن خالى سۆيگۈ-مۇھەببىتىمىزنى كۆرسەتكىنىمىزدە، ئەيسانىڭ ھەقىقىي ئەگەشكۈچىسى ئىكەنلىكىمىزنى ئىسپاتلايمىز. شۇنداق قىلىپ، باشقىلارنىڭ ھەقىقىي دىننى تونۇشىغا ۋە سۆيگۈ-مۇھەببەتنىڭ مەنبەسى يەھۋا خۇداغا بىز بىلەن بىرلىكتە ئىبادەت قىلىشىغا ياردەم بېرەلەيمىز. ھەقىقىي مەسىھ ئەگەشكۈچىسى ئىكەنلىكىمىزنى تونۇتىدىغان سۆيگۈ-مۇھەببەتنى داۋاملىق كۆرسىتىشكە بەل باغلايلى.
25-ناخشا ھەقىقىي شاگىرت بولۇشنىڭ بەلگىسى
a نۇرغۇن كىشىلەر ئارىمىزدىكى سۆيگۈ-مۇھەببەتنى كۆرۈپ، يەھۋا ۋە ئۇنىڭ سۆزى ھەققىدە ئۆگىنىشكە قىزىققان. ئەمما، بىز نامۇكەممەل، بەزىدە ئېتىقادچى قېرىنداشلىرىمىزغا سۆيگۈ-مۇھەببەت كۆرسىتىش ئانچە ئاسانغا توختىمايدۇ. ھازىر نېمە ئۈچۈن سۆيگۈ-مۇھەببەت شۇنچە مۇھىم ۋە باشقىلار خاتالىق ئۆتكۈزگەندە، ئەيسانى ئۈلگە قىلىپ نېمە قىلالايدىغانلىقىمىزنى كۆرۈپ چىقىمىز.
c «كۈزىتىش مۇنارى»، 2012-يىل، 1-نويابىر سانى، 13، 14-بەتلەردىكى « ئاخىرى مەنىلىك ھايات كەچۈرۈدۈم!» (باشقا تىلدا) ناملىق ماقالىگە قاراڭ.
d «كۈزىتىش مۇنارى»، 2012-يىل، 1-ماي سانى، 18، 19-بەتلەردىكى «ئۇتۇق قازاندىم دەپ ئويلىغان ئىدىم» (باشقا تىلدا) ناملىق ماقالىگە قاراڭ.
e بۇ ماقالىدە، 1-كورىنتلىقلار 6:9، 10-ئايەتلەردە تىلغا ئېلىنغان ئاقساقاللار بىر تەرەپ قىلىشى كېرەك بولغان ئېغىر گۇناھلار ھەققىدە مۇھاكىمە قىلىنمايدۇ.
f قەدىمقى يەھۇدىيلارنىڭ بىر يازمىلىرىدا بىر رەبباي (يەھۇدىي دىن رەھبىرى) شۇنداق سۆزلەرنى قىلغان: «دۇنيادا ئىبراھىمغا ئوخشاش ھەققانىي ئادەمدىن ئاز دېگەندە ئوتتۇزى بار. ئەگەر ئوتتۇزى بولسا، ئىككىسى ئوغلۇم بىلەن مەن. ئونى بولسا، ئىككىسى ئوغلۇم بىلەن مەن. ئەگەر بەشى بولسا، ئىككىسى ئوغلۇم بىلەن مەن. ئەگەر ئىككىسى بولسا، ئۇلار ئوغلۇم بىلەن مەن. ئەگەر پەقەت بىرىلا بولسا، ئۇ مەن».