1 Va Korindo
2 A vamanji, eci ndeya kokuene sieyile lolondunge ale lupopi u komõhisa oku wu sapuili elumbu li kola lia Suku. 2 Momo eci nda kala lene nda sokiya okuti si sakalala lovina vikuavo, te lika la Yesu Kristu una wa pondiwila kuti. 3 Kuenje eci ndeya kokuene nda honguele kuenda nda kala lusumba loku luluma kualua; 4 upopi wange leci nda kunda, ka via kaile olondaka violondunge vioku wu kisiki oku tava, pole, te lespiritu kuenda unene wa Suku, 5 okuti olondunge viene ka vi tiamisiwila komanu, te kunene wa Suku.
6 Cilo tu vangula olondunge pokati kava va loñoloha, halolondungeko violuali lulo,* ale violombiali violuali lulo, vina vi laika oku imuha. 7 Pole, etu tu popia elumbu li kola okuti, olondunge via Suku via sitikiwa. Suku wa sokiya oku ci linga osimbu oluali lulo ka lua lulikiwile, oco a tu muise ulamba. 8 Olombiali violuali lulo* ka via kũlĩhĩle olondunge viaco, momo nda va vi kũlĩhĩle nda ka via pondiwile* Ñala yinene kuti. 9 Ndeci ca sonehiwa citi: “Iso ka li moli, etũi ka li yevi, ndaño utima womunu ka u kuata elomboloko liovina Suku angiliyila vana vo sole.” 10 Ovina viaco Suku wa tu vi situluila omo liespiritu liaye, momo espiritu li kũlĩhĩsa ovina viosi, ndaño muẽle ovina via longa via Suku.
11 Pokati komanu helie wa kũlĩha ovisimĩlo viomunu ukuavo, siti omunu wa kũlĩha lika eci ci kasi vutima waye? Kuenje lomue wa kũlĩhavo ovina via Suku, te lika espiritu lia Suku. 12 Etu puãi ka tua tambuile espiritu lioluali, te espiritu li tunda ku Suku, okuti tu kũlĩha ovina Suku a tu ĩha ocali. 13 Ovina evi ka tu vi popi lolondaka via longisiwa lolondunge viomanu, te vina via longisiwa lespiritu, osimbu tu lombolola* ovina viatiamẽla ku Suku lolondaka viespiritu.
14 Una o songuiwa lolonjongole viaye muẽle ka tava* kovina viespiritu lia Suku, momo ovio uveke kokuaye; pole, ka vi kũlĩha, momo omunu o sukila oku kuata espiritu lia Suku oco a vi limbuke. 15 Omunu ukuespiritu o kũlĩhĩsa ovina viosi, pole, eye muẽle ka kũlĩhĩsiwa lomunu umue. 16 “Helie wa kũlĩha ovisimĩlo via Yehova, okuti o tẽla oku u longisa?” Etu puãi tu kuete ovisimĩlo via Kristu.