Yeremiya

26 Kefetikilo liuviali wa soma Yehoyakimi+ omõla a Yosiya soma yo Yuda, ondaka ya tunda ku Yehova yeyi yokuti: 2 “Ca popia Yehova ceci hati: ‘Talama vocitali conjo ya Yehova kuenda popia eci catiamẽla komanu vosi va kasi valupale o Yuda, vana va kasi oku iya oco va fendele* vonjo ya Yehova. Va sapuila ovina viosi nda ku handeleka; ku ka kambisepo ondaka layimue. 3 Pamue ovo va ka yeva kuenda omunu lomunu o ka tinduka konjila yaye yĩvi kuenje ame ndi ka pongolola ovisimĩlo viange viatiamẽla* keyambulo nda yonguile oku nena kokuavo omo liovilinga viavo vĩvi.+ 4 Va sapuila okuti: “Ca popia Yehova ceci hati: ‘Nda ene ka vu njevelela poku kuama ovihandeleko viange vina nda eca kokuene, 5 poku yevelela kolondaka viakuenje vange ovaprofeto, vana nda enda oku tuma kokuene olonjanja vialua,* vana ene ka wa yeveleli,+ 6 ndi ka lingisa onjo eyi ndo Silo+ kuenda ndi ka lingisa olupale olu ocikuata cimue cesiñalo kolofeka viosi vio kilu lieve.’”’”+

7 Kuenje ovitunda kuenda ovaprofeto kumue lomanu vosi, va yeva olondaka viaco Yeremiya a vanguila vonjo ya Yehova.+ 8 Eci Yeremiya a mala oku vangula cosi Yehova o handelekele oku sapuila omanu vosi, ovitunda kuenda ovaprofeto kumue lomanu vosi, vo kuata kuenje vati: “Ove o sesamẽla muẽle oku fa. 9 Momo lie wa imbila owanji vonduko ya Yehova poku popia hati: ‘Onjo eyi yi ka kala ndo Silo kuenda olupale olu lu ka nyõliwa okuti ka mu ka kala vali olonungi’?” Noke omanu vosi va ñuala Yeremiya vonjo ya Yehova.

10 Eci olombuale vio Yuda via yeva olondaka viaco, via lamanela oku upisa konjo* ya soma toke konjo ya Yehova kuenje via tumãla puvelo wombundi yokaliye yonjo ya Yehova.+ 11 Ovitunda kuenda ovaprofeto va sapuila olombuale kumue lomanu vosi vati: “Ulume u-u, o sesamẽla oku fa,+ momo eye wa imba owanji wohali yimue yatiamẽla kolupale olu, ndomo wa ci yevi lovatũi ene muẽle.”+

12 Noke Yeremiya wa sapuila olombuale viosi kuenda omanu vosi hati: “Yehova eye wa ndi tuma oku imba owanji watiamẽla koku katukila onjo eyi kuenda kolupale olu, olondaka viosi wa yevi.+ 13 Omo liaco, cilo tinduki kolonjila viene lo kovilinga viene kuenje pokoli ku Yehova Suku yene kuenda Yehova o ka pongolola ovisimĩlo viaye viatiamẽla* kohali eye a popia kokuene.+ 14 Pole, catiamẽla kokuange, ñasi peka liene. Lingi kokuange ndomo ca sunguluka kovaso ene. 15 Pole, limbuki okuti, nda wa ndi pondi, osonde yomunu ka kuete eko, yi wila kokuene muẽle kuenda kolupale olu kumue lolonungi vialio, momo ocili okuti, Yehova eye muẽle wa ndi tuma kokuene oco ndi vangule olondaka viosi evi vovatũi ene.”

16 Noke olombuale kuenda omanu vosi va sapuila ovitunda lovaprofeto vati: “Ulume u-u, ka sesamẽla oku fa, momo eye wa tu sapuila vonduko ya Yehova Suku yetu.”

17 Handi vali, akulu vamue vo vofeka va katuka kuenda va fetika oku sapuila omanu vosi va liongolola vati: 18 “Mika+ wo ko Morasiti, una wa enda oku imba owanji koloneke via Soma Hesekiya+ wo ko Yuda, wa sapuila omanu vosi vo ko Yuda hati: ‘Ca popia Yehova ukualohoka ceci hati:

19 “Anga hẽ Hesekiya Soma yo Yuda kumue lo Yuda yosi vo ponda? Eye hẽ ka sumbilile Yehova kuenda ka pingile ohenda* ya Yehova, oco Yehova a pongolole ocisimĩlo caye catiamẽla* kohali eye a va sapuilile?+ Omo liaco, etu muẽle tu kasi oku li nenela ohali yalua.

20 “Kuenje kua kala ulume ukuavo wa imba owanji vonduko ya Yehova okuti, Uriya omõla a Semaya wo ko Kiriyata-Yeari,+ una wa imba owanji watiamẽla koku katukila olupale olu kuenda ofeka eyi lolondaka ndevi via Yeremiya. 21 Soma Yehoyakimi+ kuenda asualali vaye vosi va pama kumue lolombuale viosi, va yeva olondaka viaco kuenje soma wa sanda oku u ponda.+ Eci Uriya a ci yeva, wa kuata usumba kuenda wa tilila Kegito. 22 Noke Soma Yehoyakimi wa tuma Elinatana+ omõla a Akibore kuenda omanu vakuavo Kegito. 23 Ovo va nena Uriya oku upisa Kegito kuenda vo weca ku soma Yehoyakimi, una wo ponda losipata+ kuenje etimba liaye wa li kenda kocitumãlo va siata oku kendela omanu vosi.”

24 Pole, Ahikama+ omõla a Siafane+ wa kuatisa Yeremiya okuti, ka eciwa peka liomanu oco vo ponde.+