Yeremiya

27 Kefetikilo liuviali wa Yehoyakimi omõla a Yosiya, soma yo Yuda, ondaka ya Yehova yeya ku Yeremiya yiti: 2 “Yehova wa ndi sapuila hati: ‘Li pangela ovikolo kuenda okanga, noke vi kapa kosingo yove. 3 Kuenje vi tuma ku soma yo Edome,+ ku soma yo Moavi,+ ku soma ya va Amoni,+ ku soma yo Turo+ kuenda ku soma yo Sidono,+ peka liolomunga vieya ko Yerusalãi, oco va li sange la Soma Sedekiya wo ko Yuda. 4 Eca kokuavo ocihandeleko eci kolombiali viavo cokuti:

“‘“Eci oco Yehova ukualohoka Suku ya Isareli a popia; eci oco vu sukila oku popia kolombiali viene hati: 5 ‘Ame una nda panga ilu lieve, omanu kuenda ovinyama vi kasi kilu lieve lunene wange walua, lokuokuo kuange kuolõha; kuenje ndi vi eca ku una ndi sanjukila.*+ 6 Cilo, ngeca olofeka evi peka liukuenje wange Soma Nevukandesa+ wo ko Bavulono; ndaño muẽle ovinyama viovusenge ndi vi eca kokuaye oco viu vumbe. 7 Olofeka viosi vi ko vumba kuenda vi ka vumbavo omõlaye kumue lonekulu yaye, toke eci otembo yusoma wavo yi pitĩla kesulilo,+ eci olofeka vialua kuenda olosoma vi kuete unene viu ko lingisa upika wavo.’+

8 “‘“‘Nda ofeka yimue ale usoma umue u likala oku vumba Soma Nevukandesa wo ko Bavulono kuenda oku likala oku kapa osingo vemi liokanga ya soma yo Bavulono, ndi ka yambula ofeka yaco losipata,+ lonjala kuenda lefengi,* oco Yehova a popia, ‘toke eci ndi va nyõla peka liaye.’

9 “‘“‘Omo liaco, ko ka yeveleli ovaprofeto vene, ndaño vakuakutãha, vakuakulota olonjoi, vakuakusingila, lovimbanda viene, vana va kasi oku vu sapuili vati: “Ene ka vu ka vumba soma yo ko Bavulono.” 10 Momo ovo va kasi oku vu imbili owanji wuhembi, omo liaco, ene vu ka ambatiwa ocipãla lofeka yene kuenje ndi ka vu sandoli loku vu nyõli.

11 “‘“‘Pole, ofeka yina yi kapa osingo vemẽhi liokanga ya soma yo Bavulono kuenda oku u vumba, ame ndi ka ecelela okuti, yamamako* vofeka yalio,’ oco Yehova a popia, ‘oco va yi lime kuenda oku tungamo.’”’”

12 Handi vali, Soma Sedekiya+ wo ko Yuda ndo sapuila lonjila yimuamue poku popia hati: “Kapi olosingo viene vemẽhi liokanga ya soma yo Bavulono loku u vumba kumue lomanu vaye kuenda vu kamamako oku kala lomuenyo.+ 13 Momo lie ove kumue lomanu vove vu fila losipata,+ lonjala+ lefengi+ ndomo Yehova a sapuila ofeka yina ka yi ka vumba soma yo Bavulono? 14 Ko ka yeveleli kolondaka viovaprofeto vana va kasi oku popia vati: ‘Ene ka vu ka vumba soma yo Bavulono,’+ momo va kasi oku imba owanji wuhembi kokuene.+

15 “‘Momo ame sia va tumile,’ oco Yehova a popia, ‘pole, ovo va kasi oku imba owanji wuhembi vonduko yange, eli olio esunga lieci ndi ka vu sanduili kuenje ene vu ka nyõliwa kumue lovaprofeto vana va kasi oku vu imbili owanji.”’+

16 Kuenje kovitunda kuenda komanu vosi, nda va sapuila siti: “Ca popia Yehova ceci hati: ‘Ko ka yeveleli kolondaka viovaprofeto vene vana va kasi oku vu imbili owanji vati: “Tali! Ovikuata vionjo ya Yehova ndopo vi ka tualiwa vali ko Bavulono!”+ momo va kasi oku imba owanji wuhembi kokuene.+ 17 Ko ka va yeveleli. Vumbi soma yo Bavulono kuenje vu kamamako oku kala lomuenyo.+ Momo lie olupale olu lu lingila ovingululu? 18 Pole, nda ovo ovaprofeto kuenda nda Yehova wa siata muẽle oku vangula lavo, va linge ohenda, va pinge ku Yehova ukualohoka okuti, ovikuata viosi via supa vonjo ya Yehova, vonjo ya soma yo Yuda kuenda vo Yerusalãi ka vi kambatiwe ko Bavulono.’

19 “Momo Yehova ukualohoka wa popia eci catiamẽla kolongunji,+ Kokalunga+ kosipi, kotuakãlu+ kuenda kovikuata via supapo via siwa volupale olu, 20 vina Soma Nevukandesa wo ko Bavulono kambatele eci eye ambata kumandekua Yekoniya omõla a Yehoyakimi, soma yo Yuda, oku upisa ko Yerusalãi toke ko Bavulono, kumue lolombuale viosi vio Yuda kuenda vio Yerusalãi;+ 21 ocili, ca popia Yehova ukualohoka Suku ya Isareli catiamẽla kovikuata via siwa vonjo ya Yehova, vonjo ya soma yo Yuda kuenda vo Yerusalãi ceci hati: 22 “‘Ovio vi kambatiwa ko Bavulono+ kuenda oko vi ka kala toke eci ndi tiamisila vali utima wange kokuavio,” oco Yehova a popia. “Noke ndi ka vi tiuwiya loku vi nena vocitumãlo eci.”’”+