Yeremiya
28 Kunyamo waco, kefetikilo liuviali wa soma Sedekiya+ wo ko Yuda, kunyamo wakuãla, kosãi yatãlo, uprofeto Hananiya omõla a Asure wo ko Giveone+ wa sapela lame konjo ya Yehova kovaso yovitunda kuenda komanu vosi hati: 2 “Ca popia Yehova ukualohoka, Suku ya Isareli ceci hati: ‘Ndi ka teya okanga ya soma yo Bavulono.+ 3 Vokuenda kuanyamo avali,* ndi ka nena vali kocitumãlo eci ovikuata viosi vionjo ya Yehova, vina Soma Nevukandesa wo ko Bavulono opa vocitumãlo cilo loku vi nena ko Bavulono.’”+ 4 Kuenje ndi ka nena vali kocitumãlo eci Yekoniya+ omõla a Yehoyakimi,+ soma yo Yuda kuenda olomandekua viosi vio Yuda okuti, vi ambatiwa ko Bavulono,’+ oco Yehova a popia, ‘momo ndi ka teya okanga ya soma yo Bavulono.’”
5 Noke uprofeto Yeremiya wa vangula luprofeto Hananiya kovaso yovitunda kuenda kovaso yomanu vosi vana va talama vonjo ya Yehova. 6 Uprofeto Yeremiya wa popia hati: “Amene!* Yehova a ci linge! Yehova a tẽlise olondaka vina ove wa imbila owanji, poku tiula ko Bavulono kocitumãlo eci, ovikuata vionjo ya Yehova kuenda omanu vosi vambatiwile kumandekua! 7 Omo liaco, linga ohenda, yevelela esapulo ñasi oku vanguila vovatũi ove kuenda vovatũi omanu vosi. 8 Ovaprofeto vana va ndi liangela kuenda va ku liangela, vokuenda kuotembo yalua va imba owanji watiamẽla kolofeka vialua kuenda kovosoma vakuonene, kuyaki, kohali kuenda kefengi.* 9 Nda uprofeto umue imba owanji wombembua kuenje ondaka yuprofeto waco yi tẽlisiwa, ci ka kũlĩhĩwa okuti, Yehova eye wa tuma muẽle uprofeto waco.”
10 Omo liaco, uprofeto Hananiya wopa okanga posingo yuprofeto Yeremiya kuenje wa yi teya.+ 11 Hananiya wa vanguila kovaso yomanu vosi va kalapo hati: “Eci oco Yehova a popia okuti, ‘Ndi ka teyavo lonjila ndeyi okanga soma Nevukandesa wo ko Bavulono a kapa kosingo yolofeka viosi vokuenda kuanyamo avali.’”+ Kuenje uprofeto Yeremiya wa enda lonjila yaye.
12 Noke yuprofeto Hananiya oku upa okanga kosingo yuprofeto Yeremiya loku yi teya, Yeremiya wa tambula esapulo lia tunda ku Yehova liokuti: 13 “Kuende, sapuila Hananiya okuti: ‘Ca popia Yehova ceci hati: “Ove wa teya okanga yuti,+ pole, pocitumãlo cayo, o ka pangelapo okanga yutale.” 14 Ca popia Yehova ukualohoka, Suku ya Isareli ceci hati: “Ndi ka kapa okanga yutale kosingo yolofeka evi viosi, oco vi vumbe Soma Nevukandesa wo ko Bavulono kuenda ovo va sukila oku u vumba.+ Ndaño muẽle ovinyama viovusenge, ndi ka vi eca kokuaye.”’”+
15 Noke uprofeto Yeremiya wa sapuila uprofeto Hananiya+ hati: “Linga ohenda yevelela, A Hananiya! Yehova ka ku tumile, pole, ove wa lingisa okuti, omanu ava va kolela kuhembi.+ 16 Omo liaco, ca popia Yehova ceci hati: ‘Tala! Ame ndu kupa kilu lieve. Unyamo ulo ove o ka fa, momo ove wa vetiya vakuavo oku siñila Yehova.’”+
17 Kuenje uprofeto Hananiya wa fa kunyamo waco, kosãi yepanduvali.