ATENDELO

1 Yehova wa vangula la Mose vekalasoko lio Sinai+ vombalaka yohongele+ keteke liatete, kosãi yavali, kunyamo wavali, eci va tunda kofeka Yegito.+ Eye wa popia hati: 2 “Tenda omanu vosi+ va Isareli,* omunu lomunu ndomo ci likuata lapata avo, lolonjo via va isiavo, loku sonehisa alume vosi okuti, ulume lulume londuko yaye. 3 Ove kumue la Arone vu sukila oku sonehisa vovimunga* olonduko viomanu vosi va kuete oku upisa 20 kanyamo lava va pitahãlamo okuti,+ va pondola oku tiamẽla kolohoka via va Isareli.

4 “Ambati ulume umue pokati kocikoti locikoti; omunu lomunu o linga usongui wonjo ya isiaye.+ 5 Olonduko vialume va ka ku kuatisi vievi: ku Ruvene, Elicuru,+ omõla a Sedeyuru; 6 ku Simeone, Sielumiele+ omõla a Curisiadai; 7 ku Yuda, Nahisione+ omõla a Aminadava; 8 ku Isakare, Netanele+ omõla a Cuare; 9 ku Sevulono, Eliyava+ omõla a Helone; 10 komãla va Yosefe okuti, ku Efarimi,+ Elisiama omõla a Amihudu; ku Manase, Gamaliyele omõla a Pedacuru; 11 ku Benjamini, Avidana+ omõla a Gideoni; 12 ku Dani, Ahiesere+ omõla a Amisiadai; 13 ku Asiyere, Pagiyele+ omõla a Okirana; 14 ku Gadi, Eliyasafe+ omõla a Dewele; 15 ku Nafitali, Ahira+ omõla a Enane. 16 Ava ovo va nõliwa pokati kowiñi. Ovo asongui vapata+ a va isiavo, haivo asongui volohulukãi via va Isareli.”+

17 Kuenje Mose la Arone vambata alume vaco va nõliwile kolonduko. 18 Keteke liatete, kosãi yavali, vongolola omanu vosi oco omunu lomunu a sonehiwe volonduko, kepata lepata kuenda volonjo via va isiavo, o kuete 20 kanyamo ale ci pitahãla anyamo aco,+ 19 ndomo Yehova a handelekele Mose. Eye wa va sonehisa vekalasoko lio Sinai.+

20 Omãla va Ruvene okuti, ovitumbulukila vionuñulu ya Isareli,+ va sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 21 kuenje etendelo liomanu va tendiwa kepata lia Ruvene lia tẽla 46.500.

22 Ovitumbulukila via Simeone+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka va tendiwa omunu lomunu, 23 kuenje etendelo liomanu va tendiwa kepata lia Simeone lia tẽla 59.300.

24 Ovitumbulukila via Gadi+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 25 kuenje etendelo liomanu va tendiwa kepata lia Gadi lia tẽla 45.650.

26 Ovitumbulukila via Yuda+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 27 kuenje etendelo liomanu va tendiwa kepata lia Yuda lia tẽla 74.600.

28 Ovitumbulukila via Isakare+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 29 kuenje etendelo liomanu va tendiwa kepata lia Isakare lia tẽla 54.400.

30 Ovitumbulukila via Sevulono+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 31 kuenje etendelo liomanu va tendiwa kepata lia Sevulono lia tẽla 57.400.

32 Ovitumbulukila via Yosefe okuti, va Efarimi+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka va tendiwa omunu lomunu, 33 kuenje etendelo liomanu va tendiwa kepata lia Efarimi lia tẽla 40.500.

34 Ovitumbulukila via Manase+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 35 kuenje etendelo liomanu va tendiwa kepata lia Manase lia tẽla 32.200.

36 Ovitumbulukila via Benjamini+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 37 kuenje etendelo liomanu va tendiwa kepata lia Benjamini lia tẽla 35.400.

38 Ovitumbulukila via Dani+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 39 kuenje etendelo liomanu va tendiwa kepata lia Dani lia tẽla 62.700.

40 Ovitumbulukila via Asiyere+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka va tendiwa omunu lomunu, 41 kuenje etendelo liomanu va tendiwa kepata lia Asiyere lia tẽla 41.500.

42 Ovitumbulukila via Nafitali+ via sonehiwa volonduko, epata lepata kuenda volonjo via va isiavo. Alume vosi va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va tendiwa omunu lomunu, 43 kuenje etendelo liomanu va tendiwa kepata lia Nafitali lia tẽla 53.400.

44 Ava ovo va sonehiwa la Mose kumue la Arone kuenje va kuatisiwa leci ci soka 12 kasongui va va Isareli okuti, omunu lomunu wa kala onumiwa yonjo ya isiaye. 45 Alume vosi va Isareli va kuete oku upisa 20 kanyamo lava va pitahãlamo okuti, va pondola oku tiamẽla kolohoka, va sonehiwa volonjo via va isiavo, 46 kuenje etendelo liomanu vosi va sonehiwa lia tẽla 603.550.+

47 Pole, va Lewi+ ka va sonehiwile pokati kovikoti via va isiavo.+ 48 Kuenje Yehova wa sapuila Mose hati: 49 “Va Lewi ovo lika ku sonehisa ndaño oku va tenda pokati ka va Isareli vakuavo.+ 50 O sukila oku eca ku va Lewi ocikele coku tata otavernakulu Yuvangi+ kuenda ovikuata viosi kumue lovina viosi vi kasimo.+ Ovo va kambata otavernakulu lovikuata vialio viosi+ loku vumbilamo+ kuenda ovilombo viavo vi ñuale otavernakulu.+ 51 Olonjanja viosi eci otavernakulu yi sondoluiwa, va Lewi va sukila oku yi tungulula;+ kuenje eci yi tunguluiwa, va Lewi va yi tunga vali; kuenda omunu* wosi ka nõliwile, nda okuti amela ocipepi lotavernakulu, wa sukilile oku pondiwa.+

52 “Omunu lomunu pokati ka va Isareli, o sukila oku tunga ombalaka yaye pocilombo a yilikiwila okuti, omunu lomunu locimunga* caye covikoti vitatu,+ ndomo ci likuata lovimunga* viavo. 53 Ocilombo ca va Lewi ci ñuale otavernakulu Yuvangi oco onyeño yange ka yi ka wengukile omanu va Isareli+ kuenda va Lewi va kuate ocikele coku tata* otavernakulu Yuvangi.”+

54 Va Isareli va linga cosi Yehova a handelekele Mose. Va linga muẽle cosi.

2 Yehova wa sapuila Mose la Arone hati: 2 “Va Isareli va sukila oku tungila ocilombo cavo povitumãlo va yilikiwila okuti, kocimunga cavo covikoti vitatu+ kuenda omunu lomunu o kala ocipepi lepandela* lionjo ya isiaye. Ovo va sukila oku tunga ocilombo cavo okuti, cimba ovaso kombalaka yohongele okuti, ci ñuala ombalaka yosi.

3 “Vana va ka tunga ocilombo konele yutundilo wekumbi, va ka kala vakuacimunga covikoti vitatu cocilombo ca Yuda, ndomo ci likuata lovimunga viavo;* usongui womãla va Yuda, Nahisione+ omõla a Aminadava. 4 Vana va sonehiwa kolohoka viaye va tẽla 74.600.+ 5 Ava va ka tunga ocipepi laye, ocikoti ca Isakare; usongui womãla va Isakare, Netanele+ omõla a Cuare. 6 Vana va sonehiwa kolohoka viaye va tẽla 54.400.+ 7 Noke ocikoti ca Sevulono; usongui womãla va Sevulono, Eliyava+ omõla a Helone. 8 Vana va sonehiwa kolohoka viaye va tẽla 57.400.+

9 “Vosi va sonehiwa kolohoka viocilombo ca Yuda va tẽla 186.400. Ovo va sukila oku tungulula tete ocilombo.+

10 “Ocimunga covikoti vitatu viocilombo ca Ruvene+ ndomo ci likuata lovimunga* viavo, ci ka kala konele yo kombuelo; usongui womãla va Ruvene, Elicuru+ omõla a Sedeyuru. 11 Vana va sonehiwa kolohoka viaye va tẽla 46.500.+ 12 Ava va ka tunga ocipepi laye, ocikoti ca Simeone; usongui womãla va Simeone, Sielumiele+ omõla a Curisiadai. 13 Vana va sonehiwa kolohoka viaye va tẽla 59.300.+ 14 Konele yikuavo ku kala ocikoti ca Gadi; usongui womãla va Gadi, Eliyasafe+ omõla a Ruele. 15 Vana va sonehiwa kolohoka viaye va tẽla 45.650.+

16 “Vosi va sonehiwa kocimunga colohoka viocilombo ca Ruvene va tẽla 151.450 kuenda ovo ocimunga cavali ci sukila oku tungulula ocilombo.+

17 “Eci ombalaka yohongele yi sondoluiwa,+ ocilombo ca va Lewi ci kala pokati kovilombo vikuavo.

“Ovo va linge ungende ndomo ovilombo viavo via sokiyiwa+ okuti, omunu lomunu pocitumãlo caye ndomo ci likuata lovimunga viavo viovikoti vitatu.

18 “Ocimunga covikoti vitatu cocilombo ca Efarimi ndomo ci likuata lovimunga* viavo, ci ka kala konele yo kutakelo; usongui womãla va Efarimi, Elisiama+ omõla a Amihudu. 19 Vana va sonehiwa kolohoka viaye va tẽla 40.500.+ 20 Ava va tunga ocipepi laye, ocikoti ca Manase;+ usongui womãla va Manase, Gamaliyele+ omõla a Pedacuru. 21 Vana va sonehiwa kolohoka viaye va tẽla 32.200.+ 22 Noke ocikoti ca Benjamini; usongui womãla va Benjamini, Avidana+ omõla a Gideoni. 23 Vana va sonehiwa kolohoka viaye va tẽla 35.400.+

24 “Vosi va sonehiwa kolohoka viocilombo ca Efarimi va tẽla 108.100 kuenda ovo ocimunga catatu ci sukila oku tungulula ocilombo.+

25 “Ocimunga cocikoti catatu, ocilombo ca Dani ndomo ci likuata lovimunga* viavo kuenda vi ka kala konele yo konano; usongui womãla va Dani, Ahiesere+ omõla a Amisiadai. 26 Vana va sonehiwa kolohoka viaye va tẽla 62.700.+ 27 Ava va ka tunga ocipepi laye, ocikoti ca Asiyere; usongui womãla va Asiyere, Pagiyele+ omõla a Okirana. 28 Vana va sonehiwa kolohoka viaye va tẽla 41.500.+ 29 Noke ocikoti ca Nafitali; usongui womãla va Nafitali, Ahira+ omõla a Enane. 30 Vana va sonehiwa kolohoka viaye va tẽla 53.400.+

31 “Vosi va sonehiwa kocilombo ca Dani va tẽla 157.600. Ovo va sulako koku tungulula ocilombo+ ndomo ci likuata locimunga covikoti viavo vitatu.”

32 Ava ovo va Isareli va sonehiwa ndomo ci likuata lolonjo via va isiavo; etendelo liosi liava va sonehiwa vovilombo oco va tiamẽle kolohoka, va tẽla 603.550.+ 33 Pole, va Lewi ka va sonehiwile+ pokati ka va Isareli vakuavo,+ ndomo Yehova a handelekele Mose. 34 Va Isareli va linga cosi Yehova a handelekele Mose. Eci oco ovo va enda oku linga poku tunga ovilombo ndomo ci likuata lovimunga viovikoti viavo vitatu,+ haico va enda oku tungulula ocilombo + okuti, epata lepata ndomo ci likuata la vakuanjo ya va isiavo.

3 Evi ovio via kala ovitumbulukila* via Arone la Mose keteke Yehova a sapela la Mose Komunda Sinai.+ 2 Olonduko viomãla va Arone vievi: uveli waco Nadava, noke Avihu,+ Eleasa+ kuenda Itamare.+ 3 Ovio olonduko viomãla valume va Arone okuti, ovitunda via wavekiwa, haivo va ĩhiwa ocikundi* coku kala ovitunda.+ 4 Nadava la Avihu va fila kovaso a Yehova eci va lumba ondalu yaño, yina Yehova+ ka va handelekele vekalasoko lio Sinai kuenda ovo ka va kuatele omãla. Pole, Eleasa+ la Itamare+ vamamako oku vumba ndovitunda kumue la isiavo Arone.

5 Noke Yehova wa sapuila Mose hati: 6 “Amisa ocipepi ocikoti ca Lewi+ kuenda va talamisa kovaso yocitunda Arone okuti, vo kuatisa.+ 7 Ovo va ka tẽlisa ovikele viavo viatiamẽla kokuaye kuenda kohongele yosi kovaso yombalaka yohongele, poku linga upange watiamẽla kotavernakulu. 8 Va tate ovikuata viosi+ viombalaka yohongele kuenda oku tẽlisa ovikele viavo ku va Isareli poku linga ovopange atiamẽla kotavernakulu.+ 9 Ove o sukila oku eca va Lewi ku Arone kuenda komãla vaye valume. Pokati ka va Isareli+ ovo muẽle va eciwa olumue kokuaye. 10 O nõla Arone kumue lomãla vaye valume, oco va linge upange wutunda+ kuenda omunu wosi ka nõliwile* okuti, amela ocipepi, wa sukilile oku pondiwa.”+

11 Yehova wamisako oku sapuila Mose hati: 12 “Ame nda nõla va Lewi pokati ka va Isareli oco va piñainye olonuñulu* viosi via va Isareli+ kuenje va Lewi va linga omanu vange. 13 Momo olonuñulu viosi viange.+ Keteke nda ponda olonuñulu viosi kofeka Yegito,+ nda nõla olonuñulu viosi via va Isareli oco vi linge viange okuti, vi kola, oku upisa komunu toke kocinyama.+ Ovio, vi linga viange. Ame ndi Yehova.”

14 Yehova wa sapuila vali Mose vekalasoko lio Sinai+ hati: 15 “Sonehisa omãla va Lewi, onjo lonjo kuenda epata lepata. O sukila oku sonehisa omãla vosi valume va kuete oku upisa osãi lava va pitahãlamo.”+ 16 Kuenje Mose wa va sonehisa ndomo Yehova o handeleka, wa linga muẽle ndomo eye a handelekiwa. 17 Olonduko viomãla va Lewi vievi: Gerisiono, Kohata kuenda Merari.+

18 Olonduko viomãla va Gerisiono lapata avo vievi: Livini kuenda Simei.+

19 Omãla va Kohata lapata avo va kala Amirama, Yicihare, Hevirone kuenda Usiyele.+

20 Omãla va Merari lapata avo va kala Mahili+ kuenda Musi.+

A-a o-o apata a va Lewi, ndomo ci likuata lolonjo via va isiavo.

21 Ku Gerisiono kua tunda epata lia va Livini+ kuenda epata lia va Simei. A-a o-o apata a va Gerisiono. 22 Etendelo liomãla valume vosi va sonehiwa okuti, va kuata oku upisa osãi lava va pitahãlamo, lia tẽla 7.500.+ 23 Apata a va Gerisiono, va tungila ocilombo cavo konyima yotavernakulu+ konele yutakelo. 24 Usongui wa va Gerisiono okuti, epata lepata, Eliyasafe omõla a Laele. 25 Ocikele comãla va Gerisiono+ vombalaka yohongele, ca kala coku tata otavernakulu kuenda ombalaka,+ olonanga vialio,+ ongumbo+ yaco yo puvelo wombalaka yohongele, 26 va tatavo olonanga+ viocitali, ongumbo+ yuvelo wocitali ya ñuala otavernakulu kuenda utala, ovikolo viombalaka kuenda upange wosi wa kongeliwilemo.

27 Ku Kohata kua tunda epata lia va Amirama, epata lia va Yicihare, epata lia va Hevirone kuenda lia va Usiyele. A-a o-o apata a va Kohata.+ 28 Etendelo liomãla vosi valume va kuata oku upisa osãi lava va pitahãlamo okuti, va sonehiwa, lia tẽla 8.600, ovo va kuata ocikele coku tata ocitumãlo ci kola.+ 29 Apata vomãla valume va Kohata, va tungila ocilombo cavo kombuelo yotavernakulu.+ 30 Usongui wapata a va Kohata, Elicafana omõla a Usiyele.+ 31 Ocikele cavo ca kala coku tata Ocikasia,+ omesa,+ ociyekelo colondiyelo,+ ovotala,+ ovikuata+ vioku linga upange vocitumãlo ci kola, ongumbo+ kuenda ovopange osi a kongeliwilemo.+

32 Usongui wa velapo wa va Lewi, wa kala Eleasa+ omõla a Arone ocitunda, haeye usongui wa vana va kuatele ocikele coku tata ocitumãlo ci kola.

33 Ku Merari kua tunda epata lia va Mahili kuenda epata lia va Musi. A-a o-o apata a va Merari.+ 34 Etendelo liomãla vosi valume va kuata oku upisa osãi lava va pitahãlamo, okuti va sonehiwa, lia tẽla 6.200.+ 35 Usongui wapata a va Merari, Curiyele omõla a Avihayili. Ovo va tungila ocilombo cavo konano yotavernakulu.+ 36 Omãla va Merari, va kuatele ocikele coku tata olomanji+ viotavernakulu, olombueti viaco,+ olongunji viaco,+ ovikuata viaco vi kuete apangu+ kuenda ovopange osi a kongeliwamo,+ 37 va kuatelevo ocikele coku tata olongunji viosi via ñuala kocitali kuenda ovikuata viaco vi kuete apangu,+ olopeleko viaco viombalaka kuenda ovikolo viombalaka.

38 Mose la Arone kuenda omãla valume va Arone, va tungila ocilombo cavo kovaso yotavernakulu kutundilo, kovaso yombalaka yohongele kutundilo wekumbi. Ovo va kuatele ocikele coku tata ocitumãlo ci kola ndocikundi ci lingiwila vonduko ya va Isareli. Omunu wosi ka nõliwile* okuti, amela ocipepi, wa sukilile oku pondiwa.+

39 Etendelo liomãla vosi valume va va Lewi okuti, va kuata oku upisa osãi lava va pitahãlamo okuti, ovo Mose la Arone va soneha epata lepata ndomo Yehova a handelekele, lia tẽla 22.000.

40 Noke Yehova wa sapuila Mose hati: “Sonehisa omãla vosi valume olonuñulu via va Isareli va kuete oku upisa osãi lava va pitahãlamo,+ o va tenda loku soneha olonduko viavo vulala. 41 Ove o sukila oku nena va Lewi kokuange oco va piñainye olonuñulu viosi via va Isareli+ kuenda nenavo ovinyama viovimbo via va Lewi oco vi piñainye olonuñulu viovinyama viovimbo via va Isareli.+ Ame ndi Yehova.” 42 Kuenje Mose wa sonehisa olonuñulu viosi via va Isareli ndomo Yehova o handelekele. 43 Etendelo liolonuñulu viosi vialume via sonehiwa kolonduko okuti, va kuete oku upisa osãi lava va pitahãlamo, lia tẽla 22.273.

44 Yehova wa sapuila Mose hati: 45 “Nena va Lewi oco va piñainye olonuñulu viosi via va Isareli kuenda nena ovinyama viovimbo via va Lewi, oco vi piñainye olonuñulu viovinyama viavo viovimbo noke va Lewi va linga vange. Ame ndi Yehova. 46 Ndondando yocisembi+ colonuñulu vi soka 273 viomãla va va Isareli okuti, etendelo liavo lialuile calua okuti, va Lewi+ va sule, linga ndoco, 47 o tambula olosiekele* vitãlo viomunu lomunu,+ ndomo ci likuata losiekele yocitumãlo ci kola.* Osiekele yimosi yi soka 20 kologera.*+ 48 Eca olombongo ku Arone kuenda komãla vaye ndondando yocisembi ca vana valuilepo vali.” 49 Mose wa tambula olombongo viondando yocisembi omo lia vana okuti etendelo liavo lialuile calua okuti, ondando yocisembi ca va Lewi yi sule. 50 Eye wa tambula olombongo kolonuñulu via va Isareli okuti, 1.365 kolosiekele ndomo ci likuata losiekele yocitumãlo ci kola. 51 Noke Mose wa eca olombongo viondando yocisembi ku Arone kuenda komãla vaye valume ndomo ci likuata londaka* ya Yehova, ndeci Yehova a handelekele Mose.

4 Yehova wa sapuila Mose la Arone hati: 2 “Tenda omãla va Kohata+ pokati komãla va Lewi okuti, epata lepata kuenda onjo lonjo, 3 vosi va kuete oku upisa 30+ kanyamo toke 50+ okuti, va tiamẽla kocimunga ca nõliwila oku linga upange vombalaka yohongele.+

4 “Owu, owo upange womãla va Kohata vombalaka yohongele.+ Oco, ocina cimue ci kola koku kola: 5 Arone kumue lomãla vaye, va ka iñila eci ocilombo ci votoka kuenda va tikula onanga yongumbo+ loku yi sikĩlĩla kocikasia Cuvangi.+ 6 Ovo va kapeko ocipa conjundo kuenda va sikĩlĩleko onanga yonoloti loku kapako olombueti+ vioku cambata.

7 “Ovo va sikĩlĩlavo onanga yovalatanya komesa yolombolo via taliwa+ kuenje va kapako alonga, olokopo, atiyela kuenda asanga oku kapa ovilumba vioku nyua;+ ovilumba violombolo vi kapiwe komesa olonjanja viosi.+ 8 Va sikĩlĩleko onanga yi kusuka loku sitikako ocipa conjundu kuenda oku kapako olombueti+ vioku cambata. 9 Noke va tikule onanga yovalatanya loku yi sikĩlĩla kociyekelo colondiyelo+ vioku mĩhila kuenda olondiyelo viaco,+ kumue lovikuata vioku ima ondalu, loviyukilo viondalu+ kuenda ovikuata viosi viulela okuti, oko vi kala. 10 Ociyekelo lovikuata viaco viosi va vi sikĩlĩle locipa conjundu kuenda va vi kape kilu liombueti yoku viambata. 11 Va sikĩlĩle onanga yonoloti kilu liutala wulu,+ loku sikĩlĩlako ocipa conjundu kuenda va kapeko olombueti vioku cambata.+ 12 Kuenje ovo va tikule ovikuata viosi+ va lingainga lavio upange vocitumãlo ci kola, loku kapako onanga yonoloti kuenda oku sikĩlĩlako ocipa conjundu kuenda oku vi kapa kilu liombueti yoku viambata.

13 “Vope etiko li kasi kutala+ kuenje kilu liaco va sikĩlĩleko onanga yohusu. 14 Va kapeko ovikuata viosi va lingainga lavio upange kutala ndeci: oviyukilo viondalu, olongalufu, olopa, atiyela kuenda ovikuata viosi viutala;+ kuenje kilu liaco va sikĩlĩleko ocipa conjundu loku kapako ombueti yoku ambata.+

15 “Arone kumue lomãla vaye va sukila oku malusula oku sikĩlĩla ocitumãlo ci kola+ kuenda ovikuata viosi vio vocitumãlo ci kola, eci ocilombo ci votoka. Kuenje omãla va Kohata veya kuenda va cambata,+ pole, ka citava okuti va lamba kocitumãlo ci kola, sanga va fa.+ Omãla va Kohata ovo lika va kuete ocikele* coku linga upange waco, oku kongelamo ombalaka yohongele.

16 “Eleasa+ omõla a Arone ocitunda, o kuete ocikele coku angiliya ulela woku mĩhila,+ insensu vielemba liwa,+ ocilumba colomema ceciwa olonjanja viosi kuenda ulela woku waveka.+ Eye o kuete ocikele coku songuila otavernakulu lovina viosi vi kasimo, oku kongelamo ocitumãlo ci kola kuenda ovikuata viaco.”

17 Yehova wamisako oku sapuila Mose la Arone hati: 18 “Ko ka eceleli okuti ocikoti cepata lia va Kohata+ ci tepiwa pokati ka va Lewi. 19 Pole, oco vamameko oku kala lomuenyo okuti ka va fi, omo lioku amela ocipepi lovina vi kola koku kola,+ va lingili ndoco: Arone kumue lomãla vaye, iñila kuenje va eca komunu lomunu upange a sukila oku linga kuenda ovina a sukila oku ambata. 20 Ovo ka citava okuti va iñila kuenje va tala ovina vi kola ndaño muẽle vokatembo kamue, sanga va fa.”+

21 Yehova wa sapuila Mose hati: 22 “Omãla va Gerisiono+ va tendiwe okuti, onjo lonjo kuenda epata lepata. 23 Ove o soneha vosi va kuete oku upisa 30 kanyamo toke 50, vana va kasi vocimunga okuti va nõliwila oku vumba vombalaka yohongele. 24 Ovina apata a va Gerisiono va sukila oku tata loku ambata+ vievi: 25 Olonanga viombalaka,+ ombalaka yohongele, onuviko yalio, ocipa conjundu coku sikĩlĩla kilu liaco,+ ongumbo yopuvelo yombalaka yohongele,+ 26 vambatevo olonanga vioku ñualisa kocitali,+ ongumbo yopuvelo wocitali+ yi ñuala otavernakulu kuenda kutala, ovikolo viombalaka yaco, ovikuata viosi kuenda ovina viosi vioku linga upange. Eci oco ca kala ocikele cavo. 27 Upange wosi wa va Gerisiono+ kuenda cosi ovo va kambata, u songuiwe la Arone kumue lomãla vaye; ene vu ka eca upange kokuavo lovina viosi ovo va sukila oku ambata. 28 Owu owo upange apata a va Gerisiono va sukila oku linga vombalaka yohongele+ kuenda upange wavo u songuiwa la Itamare,+ omõla a Arone ocitunda.

29 “Sonehisa omãla va Merari,+ epata lepata kuenda onjo lonjo. 30 O sonehisa vana va kuete oku upisa 30 kanyamo toke 50 okuti, vana va tiamẽla kocimunga ca nõliwila oku linga upange vombalaka yohongele. 31 Ovo va kuete ocikele coku ambata+ ovina viatiamẽla kupange wombalaka yohongele ndeci: olomanji+ viotavernakulu, olombueti viaco,+ olongunji viaco,+ ovikuata viaco vi kuete apangu;+ 32 olongunji+ vioku ñualisa kocitali, ovikuata vi kuete apangu,+ olopeleko,+ ovikolo viaco, lovikuata viosi kuenda oku linga upange wosi wa kongeliwamo. Ene u va tukuila onduko yovikuata ovo va sukila oku ambata. 33 Eci oco apata vomãla va Merari+ va sukila oku linga poku vumba vombalaka yohongele kuenda va songuiwa la Itamare, omõla a Arone, ocitunda.”+

34 Mose la Arone kumue lasongui+ va va Isareli, va sonehisa omãla va va Kohata,+ ndomo ci likuata lapata avo kuenda olonjo via va isiavo, 35 vosi va kuatele oku upisa 30 kanyamo toke 50 okuti, va tiamẽlele kocimunga ca nõliwila oku linga upange vombalaka yohongele.+ 36 Etendelo lia vosi va sonehisiwa vapata avo, lia tẽla 2.750 komanu.+ 37 Ava ovo va sonehiwa va tunda kapata a va Kohata, vosi vana va kala oku linga upange vombalaka yohongele. Mose la Arone va va sonehisa ndomo Yehova a handelekele Mose.+

38 Omãla va Gerisiono+ va sonehisiwa okuti epata lepata kuenda onjo lonjo, 39 vosi va kuete oku upisa 30 kanyamo toke 50 okuti, va tiamẽla kocimunga ca nõliwila oku linga upange vombalaka yohongele. 40 Etendelo lia vosi va sonehisiwa epata lepata kuenda onjo lonjo, lia tẽla 2.630 komanu.+ 41 Ava ovo va sonehiwa va tunda kapata a va Gerisiono, vosi vana va kala oku linga upange vombalaka yohongele. Mose la Arone va va sonehisa ndomo Yehova a va handelekele.+

42 Omãla va Merari va sonehisiwa okuti epata lepata kuenda onjo lonjo, 43 vosi va kuatele oku upisa 30 kanyamo toke 50 okuti, va tiamẽlele kocimunga ca nõliwila oku linga upange vombalaka yohongele.+ 44 Etendelo lia vosi va sonehisiwa epata lepata kuenda onjo lonjo, lia tẽla 3.200 komanu.+ 45 Ava ovo va sonehiwa vapata omãla va Merari, vana Mose la Arone va va sonehisa ndomo Yehova a handelekele Mose.+

46 Mose la Arone kumue lasongui va va Isareli, va sonehisa va Lewi vosi vapata avo kuenda kolonjo via va isiavo; 47 Vosi yavo va kuatele oku upisa 30 kanyamo toke 50 kuenda va nõliwila oku vumba loku ambata ovikuata viombalaka yohongele.+ 48 Etendelo lia vosi va sonehisiwa, lia tẽla 8.580 komanu.+ 49 Ovo va sonehisiwa ndomo Yehova a handelekele Mose, omunu lomunu ndomo ci likuata locikele caye, lovikuata a sukilile oku ambata; ovo va sonehisiwa ndomo Yehova a handelekele Mose.

5 Yehova wa sapuila vali Mose hati: 2 “Handeleka va Isareli oco va tundise vocilombo omunu wosi o kuete uvei wovilundu,+ lomunu o kuete uvei wocikata+ kuenda wosi wa li vĩhisa omo lioku lamba komunu wa fa.+ 3 Ci kaile ulume ale ukãi, va tundisi. Vu va tumisa kosamua yocilombo oco ka va ka vĩhise+ ovilombo via vana okuti nda tunga* pokati kavo.”+ 4 Va Isareli oco va linga kuenda va tundisila omanu vaco posamua yocilombo. Ndomo Yehova a sapuilile Mose, haico va Isareli va linga.

5 Yehova wamisako oku vangula la Mose hati: 6 “Sapuila va Isareli hoti: ‘Nda ulume umue ale ukãi wa lingila ukuavo ekandu limue lia siata pokati komanu kuenda ka lekisile okuti ukuacili ku Yehova, omunu waco o kuata eko.+ 7 Eye o sukila oku litavela+ ekandu a linga loku eca ofeto omo lieko liaye kuenda o vokiyako onepa yatãlo yofeto yaco;+ kuenje o yeca komunu eye a lueyela. 8 Pole, nda omunu va lueyela ka kuete ngandiaye oco a tambule ofeto yaco, ofeto yaco yi tiukile ku Yehova kuenda yi ka linga yocitunda okuti, onepa yocitupi comeme yoku tuvika ekandu yina eye a ka tuvika layo ekandu liaye.+

9 “‘Olombanjaile viosi vi kola+ via va Isareli okuti, vi eciwa kocitunda, vi linga viaye.+ 10 Ovina vi kola omunu lomunu a eca, vi linga viaye. Ovina viosi omunu a eca kocitunda, vi linga viaye.’”

11 Yehova wa vangula vali la Mose hati: 12 “Sapuila va Isareli hoti: ‘Nda ukãi wulume umue o yapuisiwa kuenda ka lingi ukuacili kokuaye, 13 kuenje ulume ukuavo o lipekela laye+ okuti, ulume waye ka ci kũlĩhĩle kuenda amamako oku kala vonumbi kuenje eye o li vĩhisa, pole, ka kuli omunu u wimbila uvangi kuenda ka vo kuatele, lingi ndoco: 14 Nda ulume waye o linga ukuesepa kuenda ka kolela vali ukãi waye, eci ukãi waye a li vĩhisa eye muẽle, ale ulume waye o linga ukuesepa kuenda ka kolela vali ukãi waye, pole, ukãi ka li vĩhisile, 15 ulume o sukila oku tuala ukãi waye kocitunda loku ambatavo ocilumba cukãi waye, lonepa yekũi yo efa* yosema yosevata. Ka ka tengeko ulela ale onguendu, momo oco, ocilumba colomema cesepa kuenda o pisiwa omo lieko liaye.

16 “‘Ocitunda ci nena ukãi loku u talamisa kovaso a Yehova.+ 17 Ocitunda cupa ovava a kola vocikuata cotuma kuenda ci tikula onepa yimue yoneketela yo votavernakulu loku yi kapa vovava. 18 Kuenje ocitunda ci talamisa ukãi kovaso a Yehova loku sõlũla esinga liukãi waco kuenje ci kapa povaka wukãi ocilumba colomema ndonjivaluko okuti, ocilumba colomema catiamẽla kesepa+ kuenda ocitunda ci kapa ovava a lula esiñalo peka liaye.+

19 “‘Ocitunda ci tuma ukãi oco a linge ohuminyo poku u sapuila hati: “Nda ka kuli ulume umue wa lipekela love osimbu o kuete ale ulume wove+ kuenda ove kua yapuisiwile loku li vĩhisa, citava okuti o yovuiwa kovava a-a a lula a nena esiñalo. 20 Pole, nda ove wa yapuisiwa poku li vĩhisa osimbu o kuete ale ulume wove kuenda wa lipekela lulume ukuavo+ okuti, hulumewoveko,” 21 ocitunda ci tuma ukãi waco oco a linge ohuminyo mua kongela esiñalo kuenje ocitunda ci ka sapuila ukãi hati: “Yehova a ku lingise okuti o kala ocikuata cimue cesiñalo kuenda cohuminyo pokati komanu vove okuti, Yehova ecelela okuti ocikalo* cove ci soyokako* kuenda imo liove li lenda. 22 Ovava a-a a nena esiñalo, a iñila vovãla vove oco imo liove li lende kuenda ocikalo* cove ci soyokako.”* Kuenje ukãi o sukila oku popia hati: “Amene! Amene!”*

23 “‘Ocitunda ci sukila oku soneha asiñalo aco velivulu kuenda oku a yelisa vovava a lula. 24 Noke ci tuma ukãi oku nyua ovava aco a lula a nena esiñalo kuenje ovava a nena esiñalo, a iñila vukãi kuenda cu nenela ohali. 25 Ocitunda ci tikula ocilumba colomema cesepa+ ci kasi peka liukãi kuenda o ci senga senga konyima lo kovaso a Yehova kuenje eye o ka ci nena ocipepi lutala. 26 Ocitunda ci tikula epupu limue liocilumba colomema ndocilumba conjivaluko, o ci yoka kuenje owisi waco u tuimĩla kutala+ noke ci tuma ukãi oku nyua ovava aco. 27 Noke yoku u tuma oku nyua ovava aco, nda ukãi wa li vĩhisa poku lueyela ulume waye, ovava a nena esiñalo a iñila vukãi waco kuenda a linga ocina cimue cilula, noke imo liaye li lenda kuenda ocikalo* caye ci soyokako* kuenje ukãi o linga ocikuata cimue cesiñalo pokati komanu vaye. 28 Pole, nda ukãi ka li vĩhisile kuenda wa yela, eye o yovuiwa kekangiso liaye, noke o mina kuenje o cita omãla.

29 “‘Eci oco ocihandeleko catiamẽla kesepa,+ eci ukãi umue a lueya poku li vĩhisa osimbu a kuete ale ulume waye, 30 ale ceci ulume umue a linga ukuesepa poku tatãla okuti ka kolela vali ukãi waye; eye o sukila oku ambata ukãi waye kovaso a Yehova kuenje ocitunda ci sukila oku tẽlisa ocihandeleko caco cosi kukãi waco. 31 Ulume o yovuiwa omo ka kuete eko, pole, ukãi waye o pisiwa omo lieko liaye.’”

6 Yehova wa vangula vali la Mose hati: 2 “Sapuila va Isareli hoti: ‘Nda ulume umue ale ukãi wa linga ohuminyo yimue yilikasi yoku kala u Nasiri*+ ku Yehova, 3 eye a yuvule oku nyua ovinyu kuenda ovina vi koluisa. Ka citava okuti o nyua indangele viovinyu, ale indangele viovina vikuavo vi koluisa.+ Ka citava okuti o nyua ovinyua via pangiwa layuva ale oku lia ayuva, ci kale a-a a talala ale ana a kukuta. 4 Oloneke viosi a kasi ku Nasiri, ka citava okuti o lia cimue ca pangiwa layuva, ca tunda kayuva ka a pile toke kocipeta caco.

5 “‘Oloneke viosi viohuminyo yaye yu Nasiri ka citava oku teta esinga liutue waye.+ Eye amameko oku kola poku ecelela okuti, esinga liutue waye li kula toke ku tẽlisiwa oloneke viohuminyo yaye ku Yehova. 6 Ka citava okuti amela komunu wa fa vokuenda kuoloneke viosi eye amamako lohuminyo yaye ku Yehova. 7 Ndaño okuti isiaye, ale inaye, pamue manjaye ulume, ale manjaye ukãi o fa, ka citava okuti o li vĩhisa+ momo ondimbukiso Yunasiri waye ku Suku yaye, yi kasi kutue waye.

8 “‘Eye o kola ku Yehova vokuenda kuoloneke viosi viu Nasiri waye. 9 Pole, nda omunu umue wa fila ocipikipiki ponele yaye+ kuenje o vĩhisa utue Wunasiri waye, eye o teta esinga liaye+ keteke a yelisiwa. Eye o sukila oku teta esinga liaye keteke liepanduvali. 10 Keteke liecelãla, o nena olonende vivali ale ivuvu vivali violopomba kocitunda puvelo wombalaka yohongele. 11 Ocitunda ci pongiya onende yimosi, ale ocivuvu cimosi ndocilumba cekandu kuenda cikuavo ndocilumba coku pia elisi, loku tuvika ekandu liomunu waco omo liekandu lioku kala ocipepi+ lomunu wa fa. Noke eye o kolisa utue waye keteke liaco. 12 Eye o litepa oco a vumbe vali Yehova ndu Nasiri kuenda o nena okameme ka kuete unyamo umosi ndocilumba ceko. Pole, oloneke viatete ka vi tendiwa, momo eye wa vĩhisa Unasiri waye.

13 “‘Ocihandeleko catiamẽla ku Nasiri ceci: Eci eye a tẽlisa oloneke viu Nasiri waye,+ o tualiwa puvelo wombalaka yohongele. 14 Oko eye a ecela ocilumba caye ku Yehova okuti: okameme ka ka kuete etondelo okuti ka kuete unyamo umosi ndocilumba coku pia elisi,+ omeme yomange ka yi kuete etondelo yi kuete unyamo umosi ndocilumba cekandu+ kuenda omeme ka yi kuete etondelo ndocilumba combembua,+ 15 lekualu liolombolo vi kuete epangu ka vi kuete etumbisa viosema ya fina ya tengiwa lulela, olombolo via livanda ka vi kuete etumbisa okuti, via lañiwa lulela kuenda ocilumba cavo colomema,+ lovilumba viavo vioku nyua.+ 16 Ocitunda ci vi ecela kovaso a Yehova kuenda ci lumba ocilumba cekandu comunu waco kumue locilumba caye coku pia elisi. 17 Oco ceca omeme ndocilumba combembua ku Yehova, lekualu liolombolo ka vi kuete etumbisa kuenda ocitunda ceca ocilumba colomema+ locilumba coku nyua.

18 “‘U Nasiri o sukila oku teta esinga liutue waye+ puvelo wombalaka yohongele kuenda oku tikula esinga liutue waye lia kula osimbu a kala u Nasiri kuenje o li kapa vondalu yi kasi vemẽhi liocilumba combembua. 19 Kuenje ocitunda cupa okuokuo+ kuomeme, lombolo yimue yi kuete epangu okuti, ka yi kuete etumbisa yopiwa vekualu, lombolo ya livanda ka yi kuete etumbisa, ci vi kapa povaka liu Nasiri noke yoku liupa ondimbukiso yaye yu Nasiri. 20 Ocitunda ci sukila oku ci senga senga konyima lo kovaso ndocilumba coku senga senga kovaso a Yehova.+ Oco, ocina cimue ci kola kocitunda, kumue lonete yocilumba coku senga senga, lokulu kua eciwa ndombanjaile.+ Noke u Nasiri citava oku nyua ovinyu.

21 “‘Ocihandeleko catiamẽla ku Nasiri+ o linga ohuminyo yimue ceci: Nda eye o linga ohuminyo yimue kuenda o pondola oku eca ocilumba ku Yehova okuti, ci pitahãla eci ci kisikiwa koku kala u Nasiri, eye o sukila oku tẽlisa ohuminyo yaye yatiamẽla kocihandeleko coku kala u Nasiri.’”

22 Yehova wa vangula la Mose hati: 23 “Sapuila Arone kumue lomãla vaye valume hoti: ‘Eyi oyo onjila vu sukila oku kuama poku sumũlũisa+ va Isareli. Va sapuila hati:

24 “Yehova a ku sumũlũise+ kuenda a ku teyuile.

25 Yehova a ecelele okuti ocipala caye ci ninila kokuove+ kuenda a lekise ohenda kokuove.

26 Yehova a votuile ocipala caye kokuove kuenda a ku ĩhe ombembua.”’+

27 Ovo va sukila oku kapa onduko yange ku va Isareli,+ oco ndi va sumũlũise.”+

7 Keteke Mose a mala oku tunga otavernakulu,+ eye wa yi kolisa+ loku yi yelisa, kumue lovikuata viaco, lutala kuenda ovina viosi vikuavo.+ Eci a kolisa loku yelisa ovina viaco,+ 2 asongui va va Isareli+ okuti, asongui volonjo via va isiavo va eca ocilumba. Asongui vaco vovikoti va kuata ocikele coku sonehisa omanu, 3 va nena ovilumba viavo ku Yehova okuti, olokalosa epandu kuenda 12 kolongombe, okalosa kamosi ka eciwa kasongui vavali kuenda usongui lusongui wa tambula ongombe yimosi; kuenje ovo va vi eca votavernakulu. 4 Yehova wa sapuila Mose hati: 5 “Tambula ovina viaco viosi vi tunda kokuavo, momo vi kuatisa kupange u lingiwa vombalaka yohongele kuenje vi eca ku va Lewi okuti, omunu lomunu o tambula eci ci sukiliwa oco a tẽlise upange waye.”

6 Noke Mose wa tambula olokalosa lolongombe kuenje wa vi eca ku va Lewi. 7 Eye wa eca olokalosa vivali kuenda olongombe vikuãla komãla va Gerisiono okuti, omunu lomunu wa tambula eci ci sukiliwa oco a tẽlise upange waye;+ 8 kuenda wa eca olokalosa vikuãla lolongombe ecelãla komãla va Merari okuti, omunu lomunu wa tambula eci ci sukiliwa oco a tẽlise upange waye kuenje va songuiwa la Itamare omõla a Arone, ocitunda.+ 9 Pole, eye ka ecele lacimue komãla va Kohata, momo vocikele cavo mua kongelele oku linga upange vocitumãlo ci kola+ kuenda va enda oku ambata ovina vi kola kapepe avo.+

10 Noke asongui va eca ovilumba viavo eci utala wa tumbikiwa+ keteke owo wa kolisiwa. Eci asongui va eca ovilumba viavo kutala, 11 Yehova wa sapuila Mose hati: “Eteke leteke umue pokati kasongui eca ocilumba caye coku tumbika utala.”

12 Usongui wa eca ocilumba keteke liatete, Nahisione+ omõla a Aminadava ukuepata lia Yuda. 13 Eye wa eca ndocilumba elonga limosi liopalata, ocilemo calio ca soka 130 kolosiekele* kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,*+ viosi via yukisiwa losema ya fina ya tengiwa lulela okuti, yocilumba colomema;+ 14 okopo yimue yulu okuti, ocilemo caco ca soka 10 kolosiekele ya yukisiwa linsensu; 15 okangombe kamosi, ocitupi comeme, lomeme yimosi yomange yi kuete unyamo umosi oco yi linge ocilumba coku pia elisi;+ 16 okahombo kamosi kocilumba cekandu;+ 17 kuenje kocilumba combembua+ ku eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Nahisione omõla wa Aminadava.+

18 Keteke liavali Netanele+ omõla ulume wa Cuare, usongui wa Isakare wa eca ocilumba caye. 19 Eye wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 20 okopo yimue yulu okuti, ocilemo caco ca soka 10 kolosiekele ya yukisiwa linsensu; 21 okangombe kamosi, ocitupi comeme, lomeme yimosi yi kuete unyamo umosi oco vi linge ocilumba coku pia elisi;+ 22 okahombo kamosi kocilumba cekandu;+ 23 kuenda kocilumba combembua,+ ku eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Netanele omõla a Cuare.

24 Keteke liatatu usongui womãla valume va Sevulono okuti, Eliyava+ omõla a Helone, 25 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 26 okopo yimue yulu okuti, ocilemo caco ca soka 10 kolosiekele ya yukisiwa linsensu; 27 okangombe kamosi, ocitupi comeme, lomeme yimosi yomange yi kuete unyamo umosi oco yi linge ocilumba coku pia elisi;+ 28 ohombo yimosi yocilumba cekandu;+ 29 kuenda kocilumba combembua+ ku eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Eliyava+ omõla a Helone.

30 Keteke liakuãla usongui womãla valume va Ruvene okuti, Elicuru+ omõla a Sedeyuru, 31 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 32 okopo yimue yulu okuti, ocilemo caco ca soka 10 kolosiekele ya yukisiwa linsensu; 33 okangombe kamosi, ocitupi comeme, omeme yimosi yi kuete unyamo umosi oco vi linge ocilumba coku pia elisi;+ 34 ohombo yimosi yocilumba cekandu;+ 35 kuenda kocilumba combembua,+ ku eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Elicuru+ omõla a Sedeyuru.

36 Keteke liatãlo usongui womãla va Simeone okuti, Sielumiele+ omõla ulume wa Curisiadai, 37 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 38 okopo yimue yulu okuti, ocilemo caco ca soka 10 kolosiekele ya yukisiwa linsensu; 39 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 40 ohombo yimosi yocilumba cekandu;+ 41 kuenda kocilumba combembua,+ ku eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Sielumiele+ omõla a Curisiadai.

42 Keteke liepandu usongui womãla va Gadi okuti, Eliyasafe+ omõla a Dewele, 43 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 44 okopo yimue yulu okuti, ocilemo caco ca soka 10 kolosiekele ya yukisiwa linsensu; 45 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 46 okahombo kamosi kocilumba cekandu;+ 47 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Eliyasafe+ omõla a Dewele.

48 Keteke liepanduvali usongui womãla va Efarimi okuti, Elisiama+ omõla a Amihudu, 49 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 50 okopo yimue yulu okuti, ocilemo caco ca soka 10 kolosiekele ya yukisiwa linsensu; 51 okangombe kamosi, ocitupi comeme, lokameme kamosi ka kuete unyamo umosi oco ka linge ocilumba coku pia elisi;+ 52 okahombo kamosi kocilumba cekandu;+ 53 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Elisiama+ omõla a Amihudu.

54 Keteke liecelãla usongui womãla va Manase okuti, Gamalieli+ omõla a Pedacuru, 55 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 56 okopo yimue yulu okuti, ocilemo caco ca soka 10 kolosiekele ya yukisiwa linsensu; 57 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 58 okahombo kamosi kocilumba cekandu;+ 59 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Gamalieli+ omõla a Pedacuru.

60 Keteke liecea usongui+ womãla va Benjamini okuti, Avidana+ omõla a Gideoni, 61 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 62 okopo yimue yulu okuti, ocilemo caco ca soka 10 kolosiekele ya yukisiwa linsensu; 63 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 64 okahombo kamosi kocilumba cekandu;+ 65 kuenda kocilumba combembua,+ kua eciwa olongombe vivali, lovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Avidana+ omõla a Gideoni.

66 Keteke liekũi usongui womãla va Dani okuti, Ahiesere+ omõla a Amisiadai, 67 wa eca ndocilumba elonga limosi liopalata, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 68 okopo yimue yulu okuti, ocilemo caco ca soka 10 kolosiekele ya yukisiwa linsensu; 69 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 70 okahombo kamosi kocilumba cekandu;+ 71 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Ahiesere+ omõla a Amisiadai.

72 Keteke liekũi lamosi usongui womãla va Asiyere okuti, Pagiyele+ omõla a Okirana, 73 wa eca ndocilumba elonga limosi liopalata okuti, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 74 okopo yimue yulu okuti, ocilemo caco ca soka 10 kolosiekele ya yukisiwa linsensu; 75 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 76 okahombo kamosi kocilumba cekandu;+ 77 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Pagiyele+ omõla a Okirana.

78 Keteke liekũi lavali usongui womãla va Nafitali okuti, Ahira+ omõla ulume a Enane, 79 wa eca ndocilumba elonga limosi liopalata okuti, ocilemo calio ca soka 130 kolosiekele kuenda etiyela limosi liopalata okuti, ocilemo calio ca soka 70 kolosiekele ndomo ci likuata locilemo cosiekele yocitumãlo ci kola,+ viosi via yukisiwa losema ya fina ya tengiwa lulela okuti, yocilumba colomema;+ 80 okopo yimue yulu okuti, ocilemo caco ca soka 10 kolosiekele ya yukisiwa linsensu; 81 okangombe kamosi, ocitupi comeme, lomeme yimosi yi kuete unyamo umosi oco yi linge ocilumba coku pia elisi;+ 82 okahombo kamosi kocilumba cekandu;+ 83 kuenda kocilumba combembua,+ kua eciwa olongombe vivali, ovitupi vitãlo violomeme, ovitupi vitãlo violohombo kuenda olomeme vitãlo vi kuete unyamo umosi. Eci oco ca kala ocilumba ca Ahira+ omõla a Enane.

84 Ovilumba vioku tumbika+ utala via eciwa lasongui a va Isareli eci wa kolisiwa vievi: alonga 12 opalata, atiyela 12 opalata lolokopo 12 viulu;+ 85 elonga lelonga liopalata, lia kuata ocilemo ci soka 130 kolosiekele kuenda etiyela letiyela lia kuata ocilemo ci soka 70 kolosiekele, opalata yosi ya kala vovikuata ya tẽla 2.400 kolosiekele ndomo ci likuata locilemo cosiekele yocitumãlo ci kola;+ 86 kolokopo 12 viulu via yukisiwa linsensu, okopo lokopo ya kuata ocilemo ci soka 10 kolosiekele ndomo ci likuata locilemo cosiekele yocitumãlo ci kola, ulu wosi wolokopo wa tẽla 120 kolosiekele. 87 Olongombe viosi viocilumba coku pia elisi via kala 12, ovitupi violomeme 12, olomeme 12 vi kuete unyamo umosi okuti, viovilumba viavo violomema kuenda otulohombo 12 viocilumba cekandu; 88 kuenda olongombe viosi viocilumba combembua via soka 24, ovitupi violomeme 60, ovitupi violohombo 60, lolomeme 60 vi kuete unyamo umosi. Evi ovio via kala ovilumba vioku tumbikiwa+ kutala noke yoku u kolisa.+

89 Olonjanja viosi eci Mose a enda oku iñila vombalaka yohongele oco a sapele la Suku,+ eye wa ponduile oku yevelela ondaka ya kala oku sapela laye oku upisa kilu lionuviko+ yocikasia Cuvangi, pokati ka va keruvi vavali;+ kuenje Suku wa ponduile oku sapela laye.

8 Yehova wa vangula la Mose hati: 2 “Sapuila Arone hoti: ‘Eci o mĩha olondiyelo, olondiyelo epanduvali vi sukila oku mĩhila ocitumãlo ci kasi kovaso yociyekelo colondiyelo.’”+ 3 Kuenje Arone wa linga ndoco: Wa mĩha olondiyelo kolonele viociyekelo colondiyelo,+ ndomo Yehova a handelekele Mose. 4 Oviyekelo violondiyelo via pangiwa ndoco: via pangiwa lulu wa teliwa lomatelo; ovianja viaco lolonelẽho viaco via pangiwa lulu wa teliwa lomatelo.+ Ociyekelo colondiyelo ca pangiwa ndomo Yehova a ci lekisile ku Mose vocinjonde.+

5 Yehova wa sapuila vali Mose hati: 6 “Nõla va Lewi pokati ka va Isareli noke va yelisa.+ 7 O va yelisa ndoco: Tikula ovava oku yelisa ekandu loku a nyĩla kokuavo kuenje ovo va sukila oku pemũla etimba liavo liosi lomoko yimue, oku sukula uwalo wavo kuenda oku liyelisa.+ 8 Ovo va ka tikula okangombe+ kuenda ocilumba caco colomema+ cosema ya fina ya tengiwa lulela kuenje ove o ka tikula okangombe kakuavo oco ka kale kocilumba cekandu.+ 9 Va Lewi o va kapa kovaso yombalaka yohongele kuenda ongolola va Isareli vosi.+ 10 Eci o nena va Lewi kovaso a Yehova, va Isareli va kape ovaka avo ku va Lewi.+ 11 Kuenje Arone o sukila oku lumba va Lewi kovaso a Yehova ndocilumba ca va Isareli coku senga senga+ kuenda ovo va ka tẽlisa upange wa Yehova.+

12 “Noke va Lewi va kapa ovaka avo kovitue violongombe.+ Kuenje va vi lumba okuti, yimue ocilumba cekandu, yikuavo ocilumba coku pia elisi ku Yehova oco va tuvike akandu+ a va Lewi. 13 Va Lewi o va talamisa kovaso ya Arone kumue lomãla vaye valume noke o va eca ndocilumba coku senga senga ku Yehova. 14 O tepa va Lewi pokati ka va Isareli kuenda va Lewi va linga vange.+ 15 Noke va Lewi va ka iñila oco va vumbe vombalaka yohongele. Eci oco o linga poku va yelisa kuenda oku va lumba ndocilumba coku senga senga. 16 Momo ovo va eciwa kokuange ndombanjaile pokati komãla va Isareli. Olonuñulu viosi via va Isareli,+ ndi vi nõla oco vi linge viange. 17 Momo olonuñulu viosi via va Isareli viange, ci kaile viomanu ale viovinyama.+ Nda vi kolisa oco vi linge viange keteke nda ponda olonuñulu viosi kofeka Yegito.+ 18 Va Lewi ndi va piñainya pomangu yolonuñulu viosi via va Isareli. 19 Ngeca va Lewi ndava va nõliwa ku Arone kuenda komãla vaye valume pokati ka va Isareli, oco va linge upange woku kuatisa va Isareli vombalaka yohongele+ loku tuvika akandu a va Isareli okuti, va Isareli+ ka va vetiwa lefengi limue, momo va Isareli va amela ocipepi locitumãlo ci kola.”

20 Mose kuenda Arone la va Isareli vosi, oco va linga la va Lewi. Ndomo Yehova a handelekele Mose catiamẽla ku va Lewi, oco va Isareli va linga lavo. 21 Kuenje va Lewi va liyelisa loku sukula ovowalo avo+ noke Arone wa va lumba ndocilumba coku senga senga kovaso a Yehova.+ Kuenje Arone wa tuvika akandu avo oco va yelisiwe.+ 22 Kuenje va Lewi va iñila oco va tẽlise upange wavo vombalaka yohongele kovaso a Arone kuenda kovaso yomãla vaye. Ndomo Yehova a handelekele Mose catiamẽla ku va Lewi, oco ovo va linga lavo.

23 Yehova wa sapuila Mose hati: 24 “Eci oco o linga la va Lewi: Ulume wosi o kuete oku upisa 25 kanyamo, ale ci pitahãla anyamo aco, o likongela komanu vana va linga upange vombalaka yohongele. 25 Pole, noke yoku tẽlisa 50 kanyamo, upiwa kupange waco kuenda ka talavaya vali. 26 Eye citava okuti, o kuatisa vamanjaye va kuete ovikele vombalaka yohongele, pole, ka lingi upange waco vombalaka. Eci oco o sukila oku linga la va Lewi kuenda lovikele viavo.”+

9 Yehova wa sapuila Mose vekalasoko lio Sinai kosãi yatete,+ kunyamo wavali eci va tunda kofeka Yegito hati: 2 “Va Isareli va pongiye ocilumba co Paskoa+ votembo ya sokiyiwa.+ 3 Keteke 14 kosãi yaco koñolosi,* vu pongiya ocilumba caco votembo ya sokiyiwa. Vu ci pongiya ndomo ci likuata loviholo viaco viosi kuenda olonumbi via tumbikiwa.”+

4 Kuenje Mose wa sapuila va Isareli oco va pongiye ocilumba co Paskoa. 5 Ovo va pongiya ocilumba co Paskoa kosãi yatete, keteke 14 yosãi koñolosi* okuti, vekalasoko lio Sinai. Va Isareli va linga cosi ndomo Yehova a handelekele Mose.

6 Kuenje kua kala alume vamue va li vĩhisa omo lioku lamba kocivimbi+ okuti, ka va ponduile oku pongiya ocilumba co Paskoa keteke liaco. Alume vaco va limolẽhisa ku Mose kuenda ku Arone keteke liaco,+ 7 noke vo sapuila vati: “Etu tua vĩhisiwa omo tua lamba kocivimbi. Momo lie tu tatekiwila oku lumba ocilumba ku Yehova votembo ya sokiyiwa pokati ka va Isareli?”+ 8 Mose wa tambulula hati: “Keveleli kuenda ndi yevelela eci Yehova a popia catiamẽla kokuene.”+

9 Yehova wa vangula la Mose hati: 10 “Sapuila va Isareli hoti: ‘Omunu wosi pokati kene ale pokati kovitumbulukila viene vi laika oku iya okuti, wa vĩhisiwa omo lioku lamba kocivimbi+ ale o kasi oku linga ungende ocipãla citava okuti, eye o pongiyila Yehova ocilumba co Paskoa. 11 Ovo va pongiya ocilumba caco kosãi yavali,+ keteke 14 koñolosi.* Va lia ocilumba caco lombolo ka yi kuete etumbisa kuenda amẽla a lula.+ 12 Ka citava okuti ocilumba caco ci supapo toke komẽle+ kuenda ka citava okuti va teya ekepa limue liocinyama caco.+ Va pongiya ocilumba caco ndomo ci likuata loviholo vio Paskoa. 13 Pole, nda omunu umue wa yela, ale ka kasi vungende kuenje wa likala oku pongiya ocilumba co Paskoa, omunu waco o tepiwa* pokati komanu vaye,+ momo eye ka ecele ocilumba ku Yehova votembo ya sokiyiwa. Omunu waco o ka pisiwa omo liekandu liaye.

14 “‘Nda ocingendeleyi cimue ca tunga pokati kene, ci pondolavo oku pongiyila Yehova ocilumba co Paskoa.+ Eye o sukila oku ci linga ndomo ci likuata loviholo vio Paskoa kuenda olonumbi viayo.+ Pokati kene pa kale ociholo cimuamue, ci kale kocingendeleyi kuenda konyitiwe yofeka.’”+

15 Keteke otavernakulu ya tungiwa,+ elende lia sikĩlĩla otavernakulu okuti, ombalaka Yuvangi, pole, koñolosi kua molẽha cimue ca soka ndondalu ya sitika otavernakulu toke komẽle.+ 16 Eci oco ca enda oku pita olonjanja viosi: Kutanya elende li sikĩlĩla otavernakulu kuenda koñolosi ku molẽha cimue ca soka ndondalu.+ 17 Olonjanja viosi eci elende li tunda kombalaka, va Isareli va enda oku votoka lonjanja oku linga ungende+ kuenda posi elende liaco li talama, opo va Isareli va tungila ocilombo.+ 18 Va Isareli va lingaile lika ungende nda Yehova o va handeleka oku enda, pole, va tungaile lika ocilombo nda Yehova o va handeleka oku tunga ocilombo.+ Osimbu elende li amamako oku sikĩlĩla otavernakulu, ovo vamamako oku kala vocilombo. 19 Nda elende li sikĩlĩla otavernakulu oloneke vialua, va Isareli va sukilile oku pokola ku Yehova kuenje ka va endi.+ 20 Olonjanja vimue elende li sikĩlila otavernakulu oloneke vimue ño. Ovo vamamako oku kala vocilombo ndomo Yehova a va handeleka kuenda va lingaile lika ungende nda Yehova o va handeleka oku enda. 21 Olonjanja vimue elende li sikĩlila otavernakulu oku upisa koñolosi toke komẽle kuenje eci elende li tundako komẽle, ovo va sukilile oku linga ungende. Ci kale kutanya ale koñolosi, eci elende li tundako, va linga ungende.+ 22 Osimbu elende li sitika otavernakulu, ci kale oloneke vivali, osãi yimosi, ale otembo yalua, va Isareli vamamako oku kala vocilombo, ka va lingi ungende. Pole, nda elende lia tundako, va linga ungende. 23 Ovo vamamako oku kala vocilombo nda Yehova o va handeleka kuenda va lingaile lika ungende nda Yehova o va handeleka oku linga ungende. Vamamako oku tẽlisa ovikele viavo ku Yehova ndomo Yehova a handelekele Mose.

10 Yehova wa sapuila Mose hati: 2 “Tunga alumbeta avali;+ a tunga lopalata ya teliwa lomatelo oco ongolole lao va Isareli vosi kuenda poku tungulula ovilombo. 3 Eci alumbeta aco avali a sikiwa, va Isareli vosi va sukila oku iya kokuove puvelo wombalaka yohongele.+ 4 Nda ku sikiwa olumbeta lumosi akulu vana okuti, asongui olohulukãi va va Isareli, ovo lika va ka liongoluila kokuove.+

5 “Eci o yevalisa ocileñi columbeta longusu ci lekisa okuti, ovilombo via vana va kasi konele yutundilo,+ vi sukila oku tunguluiwa oco vi ende. 6 Eci o yevalisa ocileñi columbeta longusu onjanja yavali, ci lekisa okuti ovilombo via vana va kasi konele yombuelo+ vi sukila oku tunguluiwa oco vi ende. Ovo va sukila oku yevalisa ocileñi columbeta olonjanja viosi eci vamue pokati kavo va linga ungende.

7 “Eci o kovonga va Isareli vosi, o sukila oku sika alumbeta,+ pole, ku ka sike longusu. 8 Omãla va Arone ovitunda, ovo va sika alumbeta+ kuenda oku sika kuaco ku linga ociholo cotembo ka yi pui kovitumbulukila viene viosi.

9 “Eci wendi oku ka liyaka lunyãli wene vofeka yene, vu sukila oku sika alumbeta oco ku yevalisiwe ocileñi cuyaki+ kuenje Yehova Suku yene, o ko wivaluki loku vu yovoli peka liovanyãli vene.

10 “Kapuluvi ene esanju+ okuti, kovipito viene+ kuenda kefetikilo liolosãi, vu sukila oku yevalisa ocileñi calumbeta poku eca ovilumba viene vioku pia elisi+ kuenda ovilumba viene viombembua;+ kuenje vi linga onjivaluko kovaso a Suku yene. Ame ndi Yehova Suku yene.”+

11 Kunyamo wavali, kosãi yavali, keteke 20 yosãi yaco,+ elende lia tunda kilu liotavernakulu+ Yuvangi. 12 Kuenje va Isareli va tunda vekalasoko lio Sinai ndomo ungende wavo wa sokiyiwile ale,+ kuenje elende lia talama vekalasoko lio Parane.+ 13 Eyi oyo onjanja yatete va votoka ndomo Yehova a handelekele Mose.+

14 Ocimunga covikoti vitatu viocilombo comãla va Yuda, oco ca enda tete ndomo ci likuata lovimunga* viavo kuenje Nahisione+ omõla a Aminadava, eye wa kala usongui wavo. 15 Usongui wocikoti comãla va Isakare, Netanele+ omõla a Cuare. 16 Usongui wocikoti comãla va Sevulono, Eliyava+ omõla a Helone.

17 Eci otavernakulu ya tunguluiwa,+ omãla va Gerisiono,+ lomãla va Merari+ okuti ovo vambatele otavernakulu, va linga ungende.

18 Ocimunga covikoti vitatu viocilombo comãla va Ruvene va enda ndomo ci likuata lovimunga* viavo kuenje Elicuru+ omõla a Sedeyuru, eye wa kala usongui wavo. 19 Usongui wocikoti comãla va Simeone, Sielumiele+ omõla a Curisiadai. 20 Usongui wocikoti comãla va Gadi, Eliyasafe+ omõla a Dewele.

21 Va Kohata, vana vambatele ovikuata viocitumãlo ci kola,+ va votoka. Otavernakulu ya sukilile oku tungiwa votembo ovo va pitĩla.

22 Noke ocimunga covikoti vitatu viocilombo comãla va Efarimi ca enda ndomo ci likuata lovimunga* viavo kuenje Elisiama+ omõla a Amihudu, eye wa kala usongui wavo. 23 Usongui wocikoti comãla va Manase, Gamalieli+ omõla a Pedacuru. 24 Usongui wocikoti comãla va Benjamini, Avidana+ omõla a Gideoni.

25 Kuenje ocimunga covikoti vitatu viocilombo comãla va Dani, va enda ndomo ci likuata lovimunga* viavo kuenda va kala konyima yovilombo viosi kuenje Ahiesere+ omõla a Amisiadai eye wa kala usongui wavo. 26 Usongui wocikoti comãla va Asiyere, Pagiyele+ omõla a Okirana. 27 Usongui wocikoti comãla va Nafitali, Ahira+ omõla a Enane. 28 Eli olio lia kala esokiyo liungende wa va Isareli kuenda ndomo ci likuata lovimunga* viavo via va kuama eci va tunda.+

29 Noke Mose wa sapuila Hovava omõla a Ruele,*+ u Midiane, ndatembo ya Mose hati: “Tu kasi oku enda kocitumãlo cina Yehova a popele hati: ‘Ndi ceca kokuene.’+ Enju letu,+ tu ka ku tata ciwa, momo Yehova wa likuminyile oku eca ovina viwa ku va Isareli.”+ 30 Pole, eye wa tambulula hati: “Si endi. Ndi tiukila kofeka yange kuenda ku vangandiange.” 31 Eye wa popia hati: “Mange ohenda ku ka tu sie, momo ove wa kũlĩha apa tu pondola oku tungila ocilombo vekalasoko kuenda o ka kala usongui wetu. 32 Nda wa enda letu,+ ocili okuti, ohenda yosi Yehova a lekisa kokuetu, tu ka yi lekisavo kokuove.”

33 Noke ovo va fetika oku enda oku tunda komunda ya Yehova,+ loku linga ungende woloneke vitatu kuenda ocikasia+ covisila via Yehova ca pita kovaso yavo loku lingavo ungende woloneke vitatu oku sandiliya ocitumãlo oco va puyukepo.+ 34 Kuenje elende lia Yehova+ lia va sikĩlĩla kutanya eci va tunda kocitumãlo va tungilile ocilombo.

35 Olonjanja viosi eci ocikasia ci sondoluiwa, Mose wa enda oku popia hati: “A Yehova, votoka,+ ovanyãli vove va sanduiwe kuenda vana va ku suvuka, va tile kovaso ove.” 36 Eci va tula ocikasia posi, eye o popia hati: “A Yehova, tiuka kolohuluwa* ka vi tendiwa via Isareli.”+

11 Kuenje omanu va fetika oku lisiõsuĩla calua Yehova. Eci Yehova a ci yeva, onyeño yaye ya wenguka kuenda ondalu ya tunda ku Yehova, ya va wila kuenje ya lia vamue va kala kolonele viocilombo. 2 Eci omanu va fetika oku kalukila Mose, eye wa likutilila ku Yehova+ kuenje ondalu ya ima. 3 Ocitumãlo caco ceya oku tukuiwa hati, Tavera,* momo ondalu ya tunda ku Yehova ya va wila.+

4 Ovingendeleyi*+ via kala pokati kavo, via kuata ohatu yalua+ kuenje va Isareli va fetika oku lila loku popia vati: “Helie o tu ĩha ositu oco tu lie?+ 5 Tua ivaluka ombisi tua lia lia ocali Kegito kuenda atila, omelãsia, osapola lovayu!+ 6 Pole cilo, atimba etu a hongua. Ka tu lete vali lacimue, te lika omana eyi.”+

7 Omana+ ya setahãlele ombuto yocelo+ kuenda ya kuatele evala liombendeliu. 8 Omanu va enda oku ñuala ñuala loku nyomõla omana kuenda oku yi sula pombambo ale vocine. Noke va yi teleka volombia ale oku linga layo akende a kasi ndombunje+ kuenda oku pepa kuayo, kua kala ndekende li sõsa lia pangiwa lulela. 9 Eci olume lu lokila kocilombo kuteke, omana yi lokilavo vocilombo.+

10 Mose wa yeva oku lila kuomanu okuti, epata lepata kuenda omunu lomunu puvelo wombalaka yaye. Kuenje onyeño ya Yehova ya va wengukila+ kuenda Mose wa ci suvuka. 11 Noke Mose wa pula Yehova hati: “Momo lie o talisila ohali ukuenje wove? Momo lie sia sangelele ohenda kovaso ove poku kapa ocilemo comanu ava kokuange?+ 12 Anga hẽ ame isia yomanu vosi ava? Anga hẽ ame nda va cita okuti o ndi sapuila hoti: ‘Vambatela ponete yove, ndeci ukuakulela omõla o nyama,’ toke kofeka wa likuminya oku eca ku vakukululu yavo?+ 13 Ositu yoku eca komanu ava vosi ndi ka yupa pi? Momo va kasi oku ndi lilila vati, ‘Tu ĩhe ositu oco tu lie!’ 14 Ame si tẽla oku ambata omanu vosi ava; ca nema enene.+ 15 Nda o linga ndoco lame, hĩse oku ndi ponda cilo.+ Nda nda sanga ohenda kovaso ove, si yongola vali oku tala ohali.”

16 Yehova wa tambulula Mose hati: “Njongoluile 70 kakulu va va Isareli, alume vana o tenda* okuti, akulu haivo asongui vomanu+ kuenda va nena vombalaka yohongele kuenje omo va kala kumue love. 17 Ndi lokilako+ oco ndi sapele love+ kuenda njupa onepa yimue yespiritu+ liange li kasi kokuove, ndi li kapa kokuavo kuenje va ku kuatisa oku ambata ocilemo comanu okuti, ku tẽlisa ocikele caco lika liove.+ 18 O sapuila omanu hati: ‘Hẽla liyelisi ene muẽle,+ omo vu lia ositu, momo wa lilili vovatũi a Yehova+ hoti: “Helie o tu ĩha ositu oco tu lie? Tua kala ciwa Kegito.”+ Kaliye Yehova u wĩhi ositu kuenje vu lia.+ 19 Ka vu li lika eteke limosi, pamue oloneke 2, ale oloneke 5, pamue oloneke 10, ale oloneke 20, 20 pole, vu lia oloneke viosi viosãi, toke eci yi tundila vanyulu ene kuenje yu kumi,+ momo wa likali Yehova una o kasi pokati kene kuenda wa lilili kokuaye loku popia hoti: “Momo lie tua tundila Kegito?”’”+

21 Kuenje Mose wa popia hati: “Ñasi pokati komanu va soka 600.000+ va endela posi, lopo o popia hati: ‘Ndi va ĩha ositu kuenje va lia oloneke viosi viosãi’! 22 Nda kua pondiwile oviunda violomeme loviunda viosi violongombe, anga hẽ ositu yaco nda ya tẽla kokuavo? Ale nda kua kuatiwile olõsi viosi vio vokalunga, nda via tẽla kokuavo?”

23 Yehova wa sapuila Mose hati: “Anga hẽ eka lia Yehova lia linga limbumbulu?+ Cilo o mola nda eci nda popia ci tẽlisiwa muẽle ale sio.”

24 Mose wa enda, yu wa sapuila omanu olondaka via Yehova. Noke wongolola alume va soka 70 kakulu vomanu kuenje wa va ñualisa vombalaka.+ 25 Yehova wa loka velende+ kuenda wa sapela la Mose+ kuenje wopa onepa yimue yespiritu+ liaye lia kala kokuaye, yu wa yi kapa komunu lomunu pokati kakulu va soka 70. Eci espiritu lia va wila, ovo va fetika oku imba owanji,+ pole, noke va liwekapo.

26 Vocilombo mua sialele alume vavali. Umue onduko yaye Elidada, ukuavo Madade. Kuenje espiritu lia va wilavo osimbu va kala pokati ka vana okuti, olonduko viavo via sonehiwa, pole, ka va endele vombalaka. Noke va fetika oku imba owanji vocilombo. 27 Ukuenje umue wa lupukila ku Mose loku popia hati: “ Elidada la Madade va kasi oku imba owanji vocilombo!” 28 Kuenje Yehosua+ omõla a Nune, oñuatisi ya Mose tunde vumalẽhe, wa tambulula hati: “A ñala yange a Mose, va lemẽla!”+ 29 Pole, Mose wo sapuila hati: “O ndi kuetele esepa? Njongola okuti omanu vosi va Yehova va imba owanji kuenda Yehova o kapa espiritu liaye kokuavo!” 30 Kuenje Mose wa tiukila kocilombo kumue lakulu va va Isareli.

31 Noke ofela ya tunda ku Yehova ya nena akalanga a tunda vokalunga kuenda a ñuala ocilombo+ loku lisanduila kolonele viosi okuti, omunu wa sukilile oku enda eteke limosi konele yimue loku enda eteke limosi konele yikuavo oco a pitĩle apa pa kala akalanga kuenje a lilundaka posi okuti, utunga waco u soka ovikeya* vivali. 32 Eteke liaco liosi kuenda kuteke wosi, lo koloneke via kuamamo, omanu ka va pekelele omo lioku ongolola akangala. Vosi yavo vongolola eci ci pitahãla ekũi kolo homeri* kuenda va a nyalẽha kolonele viosi viocilombo. 33 Pole, osimbu ositu ya kala pokati kovayo avo okuti handi ka va yi takĩlile, onyeño ya Yehova ya wengukila omanu kuenje Yehova wa yambula omanu lefengi lia piãla.+

34 Ovo va tukula ocitumãlo caco okuti, Kiviroti-Hataawa,*+ momo oko ovo va kendela omanu vakuahatu.+ 35 Oku tunda ko Kiviroti-Hataawa, omanu va enda ko Haceroti kuenda vamamako oku kala ko Haceroti.+

12 Miriama la Arone va sokola Mose, omo a kuela ukãi u Kusi, ocili, wa kuela muẽle ukãi u Kusi.+ 2 Ovo vati: “Anga Yehova o vangola lika pocakati ca Mose? Ka vangolavo pocakati cetu?”+ Pole, Yehova wa kala oku va yevelela.+ 3 Mose wa kala ulume umue womboka calua+ kilu lieve okuti, omanu vosi va sule.

4 Vocipikipiki Yehova wa vangula la Mose, la Arone kuenda Miriama hati: “Katatu kene kuendi vombalaka yohongele.” Omo liaco, katatu kavo va enda. 5 Kuenje Yehova wa lokela vongunji yelende,+ wa talama puvelo wombalaka kuenje wa kovonga Arone la Miriama. Kavali kavo vamela kovaso. 6 Eye wa popia hati: “Mangi ohenda, yeveleli olondaka viange. Nda pokati kene pa kaile uprofeto wa Yehova, nda nda li situluila kokuaye vocinjonde+ cimue kuenda nda nda vangula laye vonjoi.+ 7 Pole, hacoko ci pita lukuenje wange Mose! Eye wa kundikiwa komanu* vange vosi.+ 8 Ndi vangula laye polo la polo,*+ lelianjo kuenda lolondaka via leluka; kuenje eye wa mola muẽle Yehova. Momo lie ka wa kuateleli usumba woku sokola ukuenje wange Mose?”

9 Kuenje onyeño ya Yehova ya va wengukila kuenda eye wa tunda pokati kavo. 10 Eci elende lia tunda kilu liombalaka, Miriama wa kuatiwa lovilundu vi yela ndocikokoto.+ Eci Arone a vandekela Miriama, wa limbuka okuti, eye wa kuatiwa lovilundu.+ 11 Vepuluvi liaco Arone wa sapuila Mose hati: “A nãla yange, hu pinga! Mange ohenda, ku ka tu yambule omo liekandu eli! Ekandu tua linga ndeti, uveke. 12 Ku ka ecelele okuti eye amamako ndoto, ndomunu wa fa okuti, etimba liaye lia vola ale!” 13 Kuenje Mose wa likutilila ku Yehova loku popia hati: “A Suku, hu pinga okuti, u sakula! Mange ohenda!”+

14 Yehova wa tambulula Mose hati: “Nda isiaye wo siyilile kocipala, siti nda wa sepuiwa oloneke epanduvali? Eye a likalile oloneke epanduvali kosamua yocilombo,+ noke a neniwe vali vocilombo.” 15 Miriama wa likalila kosamua yocilombo oloneke epanduvali+ kuenje omanu ka va tunguluile ocilombo toke eci Miriama a neniwa vali vocilombo. 16 Noke omanu va tunda ko Haceroti+ kuenje va tunga ocilombo vekalasoko lio Parane.+

13 Yehova wa sapuila Mose hati: 2 “Tuma alume oco va kũlĩhĩse ofeka yo Kanana, yina ngeca ku va Isareli. Kepata lepata, ku nõliwe ulume umosi o kala usongui+ pokati kavo.”+

3 Kuenje Mose wa tuma alume vaco oku tunda vekalasoko lio Parane+ ndomo Yehova a handeleka. Vosi yavo va kala akulu va va Isareli. 4 Olonduko viavo vievi: kepata lia Ruvene kua tunda Siamuwa omõla a Sakuru; 5 kepata lia Simeone kua tunda Siafata omõla a Hori; 6 kepata lia Yuda kua tunda Kalembe+ omõla a Yefune; 7 kepata lia Isakare kua tunda Yigala omõla a Yosefe; 8 kepata lia Efarimi kua tunda Hosea+ omõla a Nune; 9 kepata lia Benjamini kua tunda Paliti omõla a Rafu; 10 kepata lia Sevulono kua tunda Gadiyele omõla a Sodi; 11 kepata lia Yosefe+ okuti hailio epata lia Manase,+ kua tunda Gadi omõla a Suse; 12 kepata lia Dani kua tunda Amiyele omõla a Gemali; 13 kepata lia Asiyere kua tunda Seturu omõla a Mingeli; 14 kepata lia Nafitali kua tunda Nahavi omõla a Wofisi; 15 kepata lia Gadi kua tunda Geuele omõla a Maki. 16 Evi ovio olonduko vialume Mose a tuma oku ka kũlĩhĩsa ofeka. Kuenje Hosea omõla a Nune, Mose wo luka hati, Yehosua.*+

17 Mose eci a va tuma oku kũlĩhĩsa ofeka yo Kanana, wa va sapuila hati: “Kuendi ko Negeve, noke lamaneli kovaimbo a kasi kolomunda.+ 18 Kũlĩhĩsi ofeka ndomo yi kasi+ kuenda kũlĩhĩsivo nda omanu va tungamo va pama ale va hongua, nda vatito ale valua, 19 nda ofeka yaco yiwa ale yĩvi, nda valupale va kasi ovilombo ale oviteyuilo. 20 Kũlĩhĩsi nda osi yaco yima ciwa* ale sio+ kuenda nda muli oviti ale sio. Kuati utõi+ kuenda neni apako amue ofeka.” Oloneke viaco via kala otembo yoku ungula ayuva atete.+

21 Noke ovo va enda oku ka kũlĩhĩsa ofeka tunde vekalasoko lio Sini+ toke vekalasoko lio Rehove+ kuenda vekalasoko lio Lebo-Hamati.*+ 22 Eci va tunda ko Negeve va enda ko Hevirone,+ kuna kua kala Ahimana, Sesai, la Talimai,+ va Anaki.+ Imbo lio Hevirone tunde eci lia tungiwa pa pitile ale epanduvali kanyamo okuti, imbo lio Coana Kegito handi ka lia tungiwile. 23 Eci va pitĩla Kocimbota* co Esikole+ va teta ocisiakata cimosi cayuva, va ci kapa kombueti okuti, cambatiwa lalume vavali, oku kongelamo olo romã* kuenda akuyu.+ 24 Va tukula ocitumãlo caco okuti, Ocimbota* co Esikole,*+ omo liocisiakata va Isareli va tetelemo.

25 Kesulilo lioloneke 40,+ ovo va tiuka koku kũlĩhĩsa ofeka. 26 Kuenje veya ku Mose la Arone kuenda ku va Isareli vosi vekalasoko lio Parane ko Kadesi.+ Va lomboluila omanu vosi ulandu waco loku va lekisa apako ofeka. 27 Noke va lomboluila Mose vati: “Tua iñila vofeka ove wa tu tumile kuenda ofeka yaco yi tumõha asenjele lowiki+ kuenje a-a o-o apako alio.+ 28 Pole, omanu va tunga vofeka yaco va pama kuenda va tunga alupale a kuete oviteyuilo vinene. Handi vali, tua muilakovo va Anaki.+ 29 Va Amaleke+ va tunga vofeka yo Negeve,+ va Hiti, la va Yevusi,+ la va Amori+ va tunga kovaimbo a kasi kolomunda kuenda va Kanana+ va tunga konele yokalunga+ ocipepi lo Yordão.”

30 Kuenje Kalembe wa seteka oku tulumũla omanu va kala kovaso a Mose poku popia hati: “Tu lamaneliko, momo tua kolela okuti, tu yi piñala muẽle, tu tẽla oku yi yula.”+ 31 Pole, alume va endele laye va popia vati: “Ka tu tẽla oku liyaka lomanu vaco, momo ovo va pama calua okuti, etu tu sule.”+ 32 Ovo vamamako oku lomboluila va Isareli ulandu ũvi+ watiamẽla kofeka va ka kũlĩhĩsile, loku popia vati: “Ofeka tua ka kũlĩhĩsile, ofeka yimue yi nyõla olonungi vialio kuenda omanu vosi tua muilako va lepa calua.+ 33 Tua muilakovo Ovindululu haivo omãla va Anaki+ okuti, ombuto* Yovindululu, oku li sokisa lavo tua kala ndapange, haico tua molẽhavo kokuavo.”

14 Va Isareli vosi va kaluka kuenda omanu vamamako oku liyula loku lila uteke waco wosi.+ 2 Va Isareli vosi va fetika oku lisiõsuĩla Mose la Arone+ kuenje omanu vosi va vangula lavo vati: “Nda tua filile ño kofeka Yegito, ale nda tua filile vekalasoko lilo, nda hĩse! 3 Momo lie Yehova a tu nenela vofeka yilo oco tu pondiwe losipata?+ Akãi vetu lomãla vetu va ka kuatiwa.+ Siti hĩse nda tua tiukilile Kegito?”+ 4 Va fetika oku vangula omunu lukuavo vati: “Tu nõli usongui umue kuenje tu tiukila Kegito!”+

5 Mose la Arone va petamisa ovipala viavo posi kovaso yowiñi wosi wa va Isareli. 6 Yehosua+ omõla a Nune la Kalembe+ omõla a Yefune okuti, va kala pokati ka vana va endele oku ka kũlĩhĩsa ofeka, va tola uwalo wavo, 7 kuenje va sapuila omanu vosi va Isareli vati: “Ofeka tua endele oku ka kũlĩhĩsa, ofeka yimue yiwa, yiwa calua.+ 8 Nda Yehova wa tu sanjukila, o ka tu tuala muẽle vofeka yaco okuti, ofeka yimue yi tumõha asenjele lowiki.+ 9 Pole, ko ka sinĩli Yehova kuenda ko ka kuateli usumba omanu vo vofeka yaco,+ momo tu ka va nyõla.* Ombindikiyo yavo ya va tunda kuenda Yehova o kasi letu.+ Ko ka va kuateli usumba.”

10 Kuenje va Isareli vosi va sokiya oku va sõsõla lovawe.+ Pole, ulamba wa Yehova wa molẽhela komanu vosi va Isareli vombalaka yohongele.+

11 Yehova wa sapuila Mose hati: “Eteke lipi omanu ava va ka liwekapo oku membula+ okuti, ndaño lolondimbukiso viosi nda linga pokati kavo, haimo lumue ka va kolela kokuange?+ 12 Ndi va veta lefengi loku va tundisa kuenda ndu ku lingisa ofeka yinene haiyo ya pama okuti ovo va sule.”+

13 Pole, Mose wa sapuila Yehova hati: “Nda wa ci linga, va Egito va ka ci yeva,+ momo wopa omanu ava pokati kavo lunene wove, 14 kuenje va ka ci sapula kolonungi viofeka yilo. Ovo va yevavo okuti, ove wu Yehova, o kasi pokati komanu ava+ kuenda wa molẽha kokuavo polo la polo.+ Ove u Yehova wa ecelela okuti, elende liove li sikĩlila ocilombo cavo kuenje kutanya enda lavo vongunji yelende kuenda kuteke vongunji yondalu.+ 15 Nda wa ponda omanu ava vonjanja yimosi,* olofeka vina via yeva oluhimo luove vi ka popia viti: 16 ‘Omo Yehova ka tẽlele oku tuala omanu ava vofeka a likuminyile oku va ĩha, oco a va pondela vekalasoko.’+ 17 A Yehova unene wove u lue ndeci wa likuminyile poku popia hati: 18 ‘Yehova o livala konyeño kuenda ukuacisola ka ci pongoloka,*+ ecela olohole kuenda akulueya, pole, o kangisa u o kuete eko, loku nena eyambulo komãla, kolonekulu, kocitumbulukila catatu toke kocitumbulukila cakuãla, omo liakulueya kuolonjali.’+ 19 Mange ohenda, ecela akulueya omanu ava omo liocisola cove ca piãla haico ka ci pongoloka, ndeci wa ecela akandu omanu ava Kegito toke cilo.”+

20 Kuenje Yehova wa popia hati: “Ndi va ecela ndomo wa popia.+ 21 Pole, ndeci ame ñasi lomuenyo, ilu lieve liosi liyuka lulamba wa Yehova.+ 22 Omo liaco, lomue pokati komanu va mola ulamba wange, olondimbukiso+ nda linga Kegito kuenda vekalasoko, vamamako oku ndi nyika+ olonjanja evi ekũi kuenje ka va pokola kondaka yange,+ 23 ka va moli ofeka nda likuminya ku vakukululu yavo. Ava va likala oku ndi sumbila, ka va yi moli.+ 24 Pole, omo okuti ukuenje wange Kalembe+ wa kuata ovituwa via litepa kuenda wa pokola kokuange lutima wosi, ndu tuala vofeka yina a endele kuenje ocitumbulukila caye ci piñala ofeka yaco.+ 25 Omo okuti, va Amaleke la va Kanana+ va tungila vocimbota,* hẽla vu tiukilamo, vu kala vekalasoko vonjila yi loña Kokalunga Kakusuka.”+

26 Noke Yehova wa sapuila Mose la Arone hati: 27 “Toke otembo yi pi omanu ava olondingãivi vamamako oku lisiõsuĩla kokuange?+ Nda yeva ndomo va Isareli va lisiõsuĩla kokuange.+ 28 Popia lavo hoti: ‘“Ndeci ame ñasi lomuenyo,” oco Yehova a popia, “Eci nda yeva kokuene okuti eci wa popi wa popi lame, nda ci yeva, oco ndu lingi!+ 29 Omanu vosi vana va lisiõsuĩla kokuange+ okuti, va kuete 20 kanyamo ale ci pitahãla anyamo aco, haivo va sonehiwa, ovivimbi viavo vi ka siala vekalasoko lilo.+ 30 Lomue pokati kene o ka iñila vofeka nda likuminya* okuti omo vu tunga,+ te lika Kalembe omõla a Yefune kuenda Yehosua omõla a Nune.+

31 “‘“Kuenje ndi tikula omãla vene vatito vana wa popi hoti, va ka kuatiwa,+ ndi va iñisa vofeka yina ene wa pembuli.+ 32 Pole, ovivimbi viene vi ka siala vekalasoko lilo. 33 Omãla vene va ka linga angombo vekalasoko vokuenda kueci ci soka 40 kanyamo+ kuenda va ka kangisiwa omo liovilinga viene vĩvi* toke eci vosi yene vu fa kuenje ovivimbi viene vi ka siala vekalasoko.+ 34 Ndomo ci likuata letendelo lioloneke wa ka kũlĩhĩsili ofeka okuti 40,+ eteke limosi li ka lomboloka unyamo umosi. Kuenje vu ka kangisiwa omo liakulueya ene vokuenda kueci ci soka 40 kanyamo+ kuenda vu kũlĩha eci ci lomboloka oku ndi katukila.*

35 “‘“Ame ndi Yehova, ame nda ci popia. Eci oco ndingila omanu ava vosi vakuevĩho haivo va ñatukila: Vekalasoko lilo, omo va taka haimo va fila.+ 36 Alume vana Mose a tumile oku ka kũlĩhĩsa ofeka okuti, va kokela omanu vosi oku lisiõsuĩla kokuange eci va tiuka lulandu ũvi watiamẽla kofeka,+ 37 alume vaco va nena ulandu ũvi wofeka, va ka lemẽhiwa kuenje va ka fila kovaso a Yehova.+ 38 Pole, Yehosua omõla a Nune la Kalembe omõla a Yefune okuti, va kala pokati kava va endele oku ka kũlĩhĩsa ofeka, ovo lika va kamamako lomuenyo.”’”+

39 Mose wa sapuila olondaka evi ku va Isareli vosi kuenje omanu va fetika oku lila calua. 40 Handi vali, va pasuka selo komẽle kuenda va lamanela kilu liomunda loku popia vati: “Tua lipongiya ale oco tu lamanele kocitumãlo Yehova a popele, momo tua lueya.”+ 41 Pole, Mose wa popia hati: “Momo lie vu yonguila oku enda okuti, ka vu pokola kondaka ya Yehova? Ka vu ka kuata onima yiwa. 42 Ko ka lamani, sanga vu ka yuliwa lovanyãli vene;+ omo Yehova ka kasi lene. 43 Momo va Amaleke la va Kanana haiko va kasi oco va liyake lene+ kuenda vu kupuiwa losipata. Omo okuti wa liwekipo oku pokola ku Yehova, Yehova ka ka kala lene.”+

44 Ndaño okuti ocikasia covisila via Yehova ka ca tundile vocilombo+ kuenda Mose layevo ka tundile, lopo va lamana lesino kilu liomunda.+ 45 Va Amaleke la va Kanana vana va tungile komunda yaco, va loka kuenje va va yula, loku va sandola toke ko Horima.+

15 Yehova wa vangula la Mose hati: 2 “Sapuila va Isareli hoti: ‘Eci vu iñili vofeka ndi laika oku wĩhi oco vu tungilimo,+ 3 kuenje vu lumbila Yehova ocilumba condalu copiwa vocunda colongombe ale vocunda colomeme, ci kale ocilumba coku pia elisi+ ale ocilumba cohuminyo yilikasi, pamue ocilumba ceciwa lutima wosi,+ ale ocilumba cikuavo ceciwa vokuenda kuovipito viene,+ oco vi ece elemba liwa ku Yehova,+ 4 omunu una eca ocilumba caye, o sukilavo oku lumba ku Yehova ocilumba colomema cosema ya fina,+ lonepa yekũi yo efa* ya tengiwa lonepa yakuãla yo hine* yulela. 5 Eye ecavo ovinyu ndocilumba coku nyua, lonepa yakuãla yo hine kuenda ocilumba coku pia elisi,+ ale ocilumba cocitupi comeme lomeme. 6 Nda o nena omeme yimue, a nenevo ocilumba colomema okuti, olonepa vivali viekũi vio efa viosema ya fina kuenje o yi tenga lonepa yatatu yo hine yulela. 7 Eci o nena ovinyu ndocilumba coku nyua, o nenavo onepa yatatu yo hine, oco yi linge ocilumba ceca elemba liwa ku Yehova.

8 “‘Pole, nda wa eca okangombe kopiwa vocunda oco ka linge ocilumba coku pia elisi,+ ale ocilumba cohuminyo yilikasi,+ pamue ocilumba combembua ku Yehova,+ 9 o sukilavo oku lumba kumue lokangombe kaco ocilumba colomema+ colonepa vitatu viekũi vio efa viosema ya fina ya tengiwa lomeyu yo hine yulela. 10 O lumbavo onepa yomeyu yo hine yovinyu ndocilumba coku nyua,+ ndocilumba cimue ci yokiwa vondalu ceca elemba liwa ku Yehova. 11 Eci oco ci lingiwa kongombe longombe, ocitupi locitupi comeme, omeme lomeme, ale ocitupi locitupi cohombo. 12 Oco o linga lovinyama viosi o lumba okuti, ocilumba locilumba, ndomo ci likuata letendelo liavio. 13 Eci oco olonyitiwe viosi via va Isareli vi sukila oku linga poku eca ocilumba cimue ci yokiwa vondalu ceca elemba liwa ku Yehova.

14 “‘Nda ocingendeleyi ci kasi pokati kene, ale umue o kasi pokati kene otembo yalua, o yongolavo oku eca ocilumba ci lingiwa vondalu ceca elemba liwa ku Yehova, a ci linge ndomo ove o linga.+ 15 Vosi yene kumue locingendeleyi ci kasi pokati kene vu kuata ociholo cimuamue. Ci linga ociholo cotembo ka yi pui kovitumbulukila viene viosi. Ndeci ene vu kasi, haico ci kala ocingendeleyi kovaso a Yehova.+ 16 Pokati kene locingendeleyi ca tunga lene, pa kaile ocihandeleko locisila cimuamue.’”

17 Yehova wa vangula la Mose hati: 18 “Sapuila va Isareli hoti: ‘Eci vu iñili vofeka ñasi oku vu tuali, 19 leci vu lia okulia kuofeka yaco,+ vu sukila oku eca ombanjaile ku Yehova. 20 Vu sukila oku eca olombolo vi kuete epangu yapako atete+ violomema viene ndombanjaile. Ndeci vu linga lombanjaile yosema ya suliwa pocimbandi, haico vu linga lombanjaile yaco. 21 Onepa yimue yapako ene atete violomema, vu sukila oku yeca ndombanjaile ku Yehova toke kovitumbulukila viene viosi.

22 “‘Pole, nda wa lueyi kuenda wa liwekipo oku pokola kovihandeleko viosi evi Yehova a sapuila Mose, 23 cosi Yehova a handelekele pocakati ca Mose tunde keteke Yehova a handelekele toke kovitumbulukila viene vio kovaso, 24 nda poku eca ovilumba viaco ku lueyiwa cimue okuti, omanu ka va ci kũlĩhĩle, omanu vosi va sukila oku eca okangombe ndocilumba coku pia elisi ceca elemba liwa ku Yehova kumue lovilumba violomema, lovilumba vioku nyua ndomo ca kisikiwa vocihandeleko+ kuenda okahombo ndocilumba coku pia elisi.+ 25 Ocitunda ci tuvika akandu omanu vosi va va Isareli kuenje va ecelua,+ momo ka va lueyele ocipango kuenda va nena ocilumba cavo ndocilumba cimue ci yokiwa vondalu ci lingiwila Yehova kuenda ocilumba cavo cekandu kovaso a Yehova omo lioku lueya kuavo. 26 Akandu a va Isareli vosi lovingendeleyi via tunga pokati kavo a ecelua, momo omanu vosi va lueyele onumbi.

27 “‘Nda omunu ka lueyele ocipango, o sukila oku eca ohombo yomange yi kuete unyamo umosi ndocilumba cekandu.+ 28 Omunu waco ka lueyele ocipango, ocitunda ci tuvika ekandu liaye kovaso a Yehova kuenje ecelua.+ 29 Vu kuata ocihandeleko cimuamue comunu ka lueyele ocipango, ci kaile onyitiwe yi kasi pokati ka va Isareli, ci kaile ocingendeleyi ca tunga pokati kavo.+

30 “‘Pole, omunu wosi o linga ekandu ocipango,+ ci kaile onyitiwe ci kaile ocingendeleyi okuti wa tomba Yehova, omunu waco o tepiwa* pokati komanu vaye. 31 Omo okuti eye wa pembula ondaka ya Yehova kuenda wa lueya ocihandeleko caye, omunu waco o pondiwa muẽle.+ Ekandu liaye liu wila.’”+

32 Eci va Isareli va kala vekalasoko, va sanga ulume umue wa kala oku tiaña olohũi keteke Liesambata.+ 33 Vana vo sanga oku tiaña olohũi, vo tuala ku Mose la Arone kuenda komanu vosi. 34 Vo kapa vokayike+ momo ka kua kaile onumbi layimue yeci va sukilile oku linga lomunu waco.

35 Kuenje Yehova wa sapuila Mose hati: “Omunu waco a pondiwe+ kuenda owiñi wosi u sõsõle lovawe posamua yocilombo.”+ 36 Owiñi wosi wo nena posamua yocilombo kuenje vo sõsõla lovawe toke eci a fa, ndomo Yehova a handelekele Mose.

37 Yehova wa popia la Mose hati: 38 “Sapuila va Isareli okuti, va litongele olonjenje kongenge yovikutu viavo kuenda kilu liolonjenje kongenge yovikutu+ va tongeleko utele u tekãvelua kovitumbulukila viavo viosi. 39 ‘Ovo va sukila oku kapa olonjenje viaco kongenge yovikutu okuti, eci va vi mola va ivaluka ovihandeleko viosi via Yehova loku vi pokola.+ Ko ka kuami ovitima viene kuenda ovaso ene, vina viu kokeli oku linga ukahonga.*+ 40 Eci cu ko kuatisi oku ivaluka loku pokola kovihandeleko viange viosi kuenje vu kola kovaso a Suku yene.+ 41 Ame ndi Yehova Suku yene, una wo upi vofeka Yegito, oco ndi li lekise okuti ame ndi Suku yene.+ Ame ndi Yehova Suku yene.’”+

16 Noke Kora+ omõla a Yicihare+ okuti omõla a Kohata,+ omõla a Lewi,+ wa likongela kumue la Datana, la Avirama omãla va Eliyava+ kuenda Oni omõla a Pelete okuti, omãla va Ruvene.+ 2 Ovo kumue leci ci soka 250 kalume va Isareli, lasongui vomanu vana va nõliwa la va Isareli okuti, alume va kemãla, va katukila Mose. 3 Kuenje va liongoluila kumosi oku katukila+ Mose la Arone loku va sapuila vati: “Tua kava omo liene! Ekongelo liosi li kola,+ vosi yavo muẽle kuenda Yehova o kasi pokati kavo.+ Momo lie vu yonguila oku livelisilapo pokati komanu va Yehova?”

4 Mose eci a ci yeva, wa petamisa ocipala caye posi. 5 Kuenje wa sapuila Kora kumue lomanu vosi va kala laye hati: “Komẽle Yehova o ka lekisa omunu wa tiamẽla kokuaye,+ lu o kola kuenda omunu o sesamẽla oku amela kokuaye+ kuenje wosi eye a ka nõla,+ amela kokuaye. 6 Lingi ndoco: Kora lomanu vosi va kasi laye,+ va nene oviyukilo viondalu,+ 7 hẽla va kapemo ondalu linsensu kovaso a Yehova kuenje omunu wosi Yehova a ka nõla,+ eye o kola. Ene amãla va Lewi,+ ci tẽla yapa!”

8 Mose wa sapuila Kora hati: “Njeveleli ene amãla va Lewi. 9 Anga eci vu kasi oku linga ka ci kuete esilivilo okuti, Suku ya va Isareli wo nõli pokati ka va Isareli+ loku weceleli oku amela kokuaye oco vu lingi upange votavernakulu ya Yehova kuenda vu talama kovaso ya va Isareli oku va vumba,+ 10 kuenje wa ku nena ocipepi laye kumue la vamanjove vosi okuti omãla va Lewi? Anga hẽ vu yongolavo oku tambula ocikele cutunda?+ 11 Eli olio esunga lieci okuti, ove lomanu va kasi love, wa likongeli koku katukila Yehova. Arone hẽ elie okuti, eye vu lisiõsuĩla?”+

12 Noke Mose wa tuma oku vilikiya Datana la Avirama+ omãla va Eliyava, pole, ovo va popia vati: “Ka tu endi! 13 Anga hẽ ca sunguluka kokuove oku tu upa vofeka yimue yi tumõha asenjele lowiki loku tu nena vekalasoko+ oco tu fe? Kaliye ove o yongolavo oku tu viala?* 14 Handi vali, ove kua tu nenele vofeka yi tumõha asenjele lowiki,+ ndaño oku tu ĩha epia ndocipiñalo, pamue ocumbo cayuva. Anga hẽ o yongola okuti alume ava va ku kuama ndolomeke?* Ka tu endi!”

15 Kuenje Mose wa tema calua kuenda wa sapuila Yehova hati: “Ku ka tave ocilumba cavo colomema. Sia va tambuile ndaño ocimbulu cimosi, ale oku lemẽha umue pokati kavo.”+

16 Noke Mose wa sapuila Kora hati: “Hẽla ove lomanu vosi va kasi love kuenda Arone enjui kovaso a Yehova. 17 Omunu lomunu a nene ociyukilo caye condalu loku kapamo insensu kuenda omunu lomunu o ka lekisa ociyukilo caye condalu ku Yehova, ci soka 250 koviyukilo viondalu, ove kumue la Arone, omunu lomunu lociyukilo caye condalu.” 18 Omunu lomunu pokati kavo wa tikula ociyukilo caye condalu, wa kapamo ondalu linsensu kuenda va talama puvelo wombalaka yohongele kumue la Mose kuenda Arone. 19 Kora wongolola omanu va kala laye+ oku u katukila puvelo wombalaka yohongele kuenje ulamba wa Yehova wa molẽhela kohongole yosi.+

20 Yehova wa sapuila Mose la Arone hati: 21 “Litepi locimunga eci, oco ndi ci kundule vocipikipiki.”+ 22 Ovo va petamisa ovipala viavo posi kuenda va popia vati: “A Suku, Suku wa eca omuenyo komanu vosi,+ anga hẽ ekandu liomunu umosi li ku kokela oku temẽla ohongele yosi?”+

23 Yehova wa vangula la Mose hati: 24 “Sapuila omanu vosi hati: ‘Kali ocipãla lombalaka ya Kora, ya Datana kuenda ya Avirama!’”+

25 Kuenje Mose wa votoka, yu wa enda ku Datana la Avirama kuenje akulu+ va va Isareli va enda kumue laye. 26 Eye wa sapuila va Isareli vosi hati: “Kali ocipãla lolombalaka vialume ava olondingaĩvi kuenda ko ka lambi kocina cimue ca tiamẽla kokuavo, sanga vu nyõliwa vosi omo liakandu avo.” 27 Ovo vamẽla kupãla lolombalaka via Kora, ya Datana, ya Avirama kuenje Datana la Avirama va tundila posamua, va talama puvelo wolombalaka viavo, kumue lakãi vavo kuenda omãla vavo loloñaña viavo.

28 Mose wa popia hati: “Kaliye vu limbuka okuti, Yehova wa numa oku linga ovina evi viosi kuenje si ci lingi lonjongole yange muẽle:* 29 Nda omanu ava va fa ndeci omanu vakuavo va siata oku fa kuenda nda eyambulo liavo limuamue ndeli liomanu vosi, oco Yehova haeyeko wa numa.+ 30 Pole, nda okuti Yehova wa va lingila cimue ci komõhisa kuenda osi ya yikula omẽla loku va ina, lovina viosi via tiamẽla kokuavo kuenje va kupukila Vonjembo* lomuenyo, vu limbuka okuti omanu ava va tomba Yehova.”

31 Eci a mala oku vangula olondaka evi viosi, osi va liata, ya toka.+ 32 Osi yasama* kuenje ya va ina kumue lapata avo, lomanu vosi va tiamẽlele ku Kora+ kuenda ovokuasi avo. 33 Ovo lomanu vosi va tiamẽlele kokuavo, va lokila Vonjembo* lomuenyo kuenje osi ya va sitika, va kunduiwa pokati ka va Isareli.+ 34 Va Isareli vosi va kala ocipepi lavo, va tila loku saluka kuenje va popia vati: “Tu kuete usumba wokuti osi yi tu inavo!” 35 Kuenje ondalu ya tunda ku Yehova+ ya lia eci ci soka 250 kalume va kala oku timĩha insensu.+

36 Yehova wa vangula la Mose hati: 37 “Sapuila Eleasa omõla a Arone ocitunda oco a tikule oviyukilo viondalu+ vi kasi vondalu, momo ovio vi kola. U sapuilavo oco a sanduile ondalu ocipãla. 38 Oviyukilo viondalu vialume va fa omo lioku lueya, vi lingiwe ulame woku finisa utala,+ momo ovio via eciwa ku Yehova kuenda ovio vi kola. Kuenje ci linga ondimbukiso ku va Isareli.”+ 39 Eleasa ocitunda wa tikula oviyukilo viondalu viosipi, vina vana va timĩhiwa va lumba lavio kuenje via teliwa oco vi finise utala, 40 ndomo Yehova o sapuilile pocakati ca Mose. Ca kala ndonjivaluko ku va Isareli okuti, omunu wosi ka nõliwile* haeye ka tiamẽlele kocitumbulukila ca Arone, ka citava okuti o timĩha insensu kovaso a Yehova+ kuenda lomue ka ka linge nda Kora lomanu va kala laye.+

41 Keteke lia kuamamo, omanu vosi va va Isareli va fetika oku lisiõsuĩla Mose la Arone+ vati: “Kavali kene wa pondi omanu va Yehova.” 42 Va Isareli vosi va katukila Mose la Arone kuenje poku vandekela kombalaka yohongele va mola okuti, elende lia sikĩlĩla ombalaka kuenje ulamba wa Yehova wa molẽha.+

43 Mose la Arone va enda toke kovaso yombalaka yohongele,+ 44 kuenje Yehova wa sapuila Mose hati: 45 “Tundi pokati komanu ava, oco ndi va kundule vocipikipiki.”+ Kuenje ovo va petamisa ovipala viavo posi.+ 46 Mose wa sapuila Arone hati: “Tikula ociyukilo condalu, kapamo ondalu yi kasi kutala+ kuenda insensu, kuende lonjanga komanu loku tuvika ekandu liavo,+ momo onyeño ya Yehova ya wenguka. Efengi lia fetika ale!” 47 Arone wa tikula ociyukilo ndomo Mose o sapuilile kuenda wa lupukila ku va Isareli, pole, efengi lia fetikile ale pokati komanu. Eye wa kapa insensu vociyukilo condalu kuenda wa fetika oku tuvika ekandu liomanu. 48 Noke wa talama pokati komanu va fa lava va kala lomuenyo kuenje efengi lia imũha. 49 Vosi va fa lefengi va tẽla eci ci soka 14.700 komanu okuti, vana va fa omo lia Kora, ka va tendiwile. 50 Eci Arone a tiukila ku Mose puvelo wombalaka yohongele, efengi lia imũha.

17 Yehova wa sapuila Mose hati: 2 “Vangula la va Isareli okuti, pokati kavo pa tunde ombueti yimue, ndomo ci likuata lusongui wonjo ya va isiavo+ okuti, vocosi 12 kolombueti. Soneha onduko yomunu lomunu kombueti yaye. 3 Soneha onduko ya Arone kombueti ya Lewi, momo usongui lusongui wonjo ya va isiavo o kala lombueti. 4 Olombueti viaco o vi kapa vombalaka yohongele kovaso Yuvangi,+ kuna nda siata oku li molẽhisa kokuove.+ 5 Kuenje ombueti yomunu ndi nõla,+ yi yova kuenda ndi lingisa okuti, va Isareli ka va lisiõsuĩla vali kokuange,+ ndeci va lisiõsuĩla kokuove.”+

6 Mose wa vangula la va Isareli kuenje asongui vo wĩha olombueti okuti, usongui lusongui wonjo wa eca ombueti yimue, vocosi ca soka 12 kolombueti kuenda ombueti ya Arone ya kala pokati kolombueti viavo. 7 Noke Mose wa kapa olombueti viaco kovaso a Yehova vombalaka Yuvangi.

8 Keteke lia kuamamo, eci Mose a iñila vombalaka Yuvangi, ombueti ya Arone okuti, yonjo ya Lewi ya yova kuenda ya tunda olonelẽho kuenje ya ima amendua. 9 Mose wa tikula olombueti viosi kovaso a Yehova kuenje wa vi nena ku va Isareli vosi. Ovo va vi tala kuenda omunu lomunu wa nyañula ombueti yaye.

10 Yehova wa sapuila Mose hati: “Kapa vali ombueti+ ya Arone konyima Yuvangi ndocina cimue ci kala ndondimbukiso+ komãla vakuesino+ oco ka va ka lisiõsuĩle vali kokuange kuenje ka va fi.” 11 Mose wa ci linga lonjanga ndomo Yehova o handelekele. Eye wa linga muẽle cosi.

12 Va Isareli va sapuila Mose vati: “Kaliye tu fa, vosi yetu tu kunduiwa, tu kunduiwa muẽle! 13 Omunu wosi okuti, amela ño ocipepi lotavernakulu ya Yehova o fa!+ Anga hẽ vosi yetu tu fa?”+

18 Yehova wa sapuila Arone hati: “Ove lomãla vove kuenda asongui volonjo ya va isiene, vu pisiwa omo liekandu liosi li lingiwila ocitumãlo ci kola+ kuenda ove lomãla vove vu pisiwa omo liekandu liosi li lingiwila ocikele cene cutunda.+ 2 Vilikiyivo vamanjene vakuacikoti ca Lewi okuti, ocikoti ca isiove oco va likongele lene kuenje vo vumbi ene+ kumue lomãla vene vombalaka Yuvangi.+ 3 Ovo va tẽlise ovikele viavo kokuove lovopange osi o vombalaka.+ Pole, ka citava okuti va amela ocipepi lovikuata viocitumãlo ci kola kuenda kutala, sanga ovo kumue love, vu fi.+ 4 Ovo va likongela kokuove loku tẽlisa ovikele viavo vombalaka yohongele loku linga ovopange osi o vombalaka kuenda ka citava okuti omunu ka nõliwile* amela ocipepi lene.+ 5 Ene vu tẽlisa ocikele cene catiamẽla kocitumãlo ci kola+ kuenda kutala+ oco okuti, onyeño+ yange ka yi wengukila omanu va va Isareli. 6 Nda nõla vamanjene va Lewi pokati ka va Isareli ndongavelo kokuene.+ Ovo va eciwa ku Yehova oco va linge upange vombalaka yohongele.+ 7 Ove lomãla vove vu tẽlisa ovikele viene viutunda loku tata utala kuenda ovina vi kasi konyima yongumbo+ kuenje vu linga upange waco.+ Nda eca upange wutunda ndongavelo kokuene kuenje omunu wosi amela kocitumãlo ci kola okuti ka nõliwile,* o pondiwa.”+

8 Yehova wa sapuila vali Arone hati: “Nda ku ĩha ocikele coku tambula olombanjaile vieciwa kokuange.+ Nda eca kokuove kuenda komãla vove onepa yovina viosi vi kola via eciwa la va Isareli ndonepa yene otembo ka yi pui.+ 9 Ovilumba viene vi kola koku kola vi lingiwa londalu vievi: ovilumba viosi ovo va eca oku kongelamo ovilumba viavo violomema,+ lovilumba viavo viekandu+ kuenda ovilumba viavo vieko+ va nena kokuange. Eci ocina cimue ci kola koku kola ci kaile kokuove kuenda komãla vove. 10 Ove o sukila oku lila ovilumba viaco vocitumãlo cimue ci kola koku kola.+ Alume vosi va pondola oku ci lia. Ci ka linga ocina cimue ci kola kokuove.+ 11 Ovina vikuavo okuti, vi linga viove vievi: olombanjaile ovo va eca,+ lovilumba vioku senga senga+ via va Isareli. Nda vi eca kokuove kuenda komãla vove valume, lomãla vove vakãi ndonepa yene otembo ka yi pui.+ Omunu wosi wa liyelisa vonjo yove citava oku liako.+

12 “Ovina viosi via velapo viulela kuenda ovina viosi via velapo viovinyu yokaliye, lolomema, lapako avo atete,+ vina ovo va eca ku Yehova, ndi vi eca kokuove.+ 13 Apako atete viovina viosi viofeka yavo, ana va ka eca ku Yehova, a linga ove.+ Omunu wosi wa liyelisa vonjo yove citava okuti o liako.

14 “Ocina cosi ci lumbiwa* ko Isareli, ci linga cove.+

15 “Olonuñulu viovina viosi vi kasi lomuenyo+ vina ovo va eca ku Yehova, ci kale viomanu ale viovinyama, vi linga viove. Pole, vu sukila oku yovola olonuñulu viomanu+ kuenda oku yovola olonuñulu viovinyama via vĩha.+ 16 Vu ci yovola londando yocisembi eci ocinyama caco ci tẽlisa osãi ale ci pitahãla otembo yaco londando yi li soka lolosiekele*+ vitãlo viopalata ndomo ci likuata lolosiekele viocitumãlo ci kola.* Oyo yi tẽla 20 kologera.* 17 Ka citava lika oku yovola onuñulu yongombe, ale onuñulu yomeme pamue onuñulu yocitupi cohombo.+ Ovio, ovina vi kola. O nyĩla osonde yavio kutala+ kuenje ulela wavio o u yoka oco owisi waco u tuime ndocilumba cimue ci yokiwa vondalu ceca elemba liwa ku Yehova.+ 18 Kuenje ositu yavio yi linga yove. Ndeci onete yocilumba coku senga senga, lokulu kuondio, viosi vi linga viove.+ 19 Olombanjaile viosi vi kola va Isareli va eca ku Yehova,+ ndi vi eca kokuove kuenda komãla vove valume, lo komãla vove vakãi ndonepa yene otembo ka yi pui.+ Oco, ocisila comongua* cotembo ka yi pui pokati kove la Yehova kuenda kocitumbulukila cove.”

20 Yehova wa sapuila Arone hati: “Vofeka yavo ove ku ka kuata ocipiñalo ndaño onepa yofeka pokati kavo ka yi ka kala yove.+ Ame ndinepa yove kuenda ndicipiñalo cove pokati ka va Isareli.+

21 “Nda eca komãla va Lewi onepa yekũi+ vo Isareli ndocipiñalo omo liupange ovo va lingila vombalaka yohongele. 22 Omanu va va Isareli ka citava okuti va amela vali kombalaka yohongele, sanga va linga ekandu kuenje va fa. 23 Va Lewi va linge upange vombalaka yohongele kuenje ovo va ka pisiwa omo liekandu liavo.+ Eci ociholo cotembo ka yi pui kovitumbulukila viavo viosi okuti, ka va kuata ocipiñalo lacimue pokati ka va Isareli.+ 24 Ngeca ndocipiñalo ku va Lewi onepa yekũi yolombanjaile va Isareli va ka eca ku Yehova. Eli olio esunga lieci nda va sapuilila hati: ‘Ovo ka va ka tambule ocipiñalo lacimue pokati ka va Isareli.’”+

25 Yehova wa vangula la Mose hati: 26 “Sapuila va Lewi hati, ‘Ene vu tambula ku va Isareli onepa yekũi ngeca kokuene ndocipiñalo+ kuenda kolonepa viaco viekũi wupiko onepa yekũi ndombanjaile ku Yehova.+ 27 Oyo yi kala ombanjaile yene, ndolomema via suliwa pocimbandi,+ ale ovinyu ya pangiwa pocikoselo cayuva pamue pocikoselo culela. 28 Vu ecavo ombanjaile ku Yehova konepa yosi yekũi vu tambula ku va Isareli kuenje kolonepa viaco viekũi vupako ombanjaile yeciwa ku Yehova peka lia Arone ocitunda. 29 Vu ka eca olombanjaile ku Yehova viopiwa kolombanjaile viosi via velapo vi eciwa kokuene+ ndocina cimue ci kola.’

30 “Kuenje o va sapuila hati: ‘Eci weci ombanjaile ya velapo, ci tendiwe ku va Lewi ndocina cimue ca suliwa pocimbandi, ale ovinyu ya pangiwa pocikoselo cayuva pamue pocikoselo culela. 31 Ene kumue la vakuanjo yene vosi, citava okuti, vu ci lila kocitumãlo kuosi vu sangiwa, momo onima yupange wa lingi vombalaka yohongele.+ 32 Osimbu wecaeci ombanjaile yovina via velapo, ka vu kupukila vekandu kuenda ko ka sepuli ovina vi kola via va Isareli, sanga vu fa.’”+

19 Yehova wa vangula vali la Mose kuenda Arone hati: 2 “Ociholo cocihandeleko Yehova a handeleka ceci: ‘Sapuila va Isareli oco va nene ongombe yimue yi kusuka, yina ka yi kuete etondelo, ka yi kuete etime+ haeyo ka ya la kapiwa okanga. 3 Vu yeca ku Eleasa ocitunda kuenje vu yi songuila posamua yocilombo kuenda yi pondiwile kovaso aye. 4 Eleasa ocitunda o miña omuine waye vosonde kuenje o yi nyĩla olonjanja epanduvali kovaso yombalaka yohongele.+ 5 Kuenje ongombe yi timĩhiwa kovaso aye. Ocipa caco, lositu, losonde kuenda aniña aco vi timĩhiwavo.+ 6 Ocitunda ci tikula uti wosedro, lohisopu+ kuenda onanga yi kusuka kuenje o vimba vondalu muna ongombe yi timĩhiwa. 7 Ocitunda ci sukula uwalo waye loku yua vovava, noke citava oku iñila vocilombo; pole, ocitunda ci vĩhisua toke koñolosi.

8 “‘Omunu wa timĩha ongombe yaco, o sukula uwalo waye vovava loku yua vovava kuenda eye amamako oku vĩhisua toke koñolosi.

9 “‘Omunu wa liyelisa, ongolola etiko liongombe+ kuenda o li ambata kosamua yocilombo pocitumãlo cimue ca yela kuenje etiko liaco oko li ka kala oco va Isareli va pongiye lalio ovava oku liyelisa.+ Oco, ocilumba cekandu. 10 Omunu wa liyelisa, ongolola etiko liongombe, o sukila oku sukula uwalo waye kuenda o vĩhisua toke koñolosi.

“‘Oco, ci linga ociholo cotembo ka yi pui ku va Isareli kuenda kovingendeleyi vi kasi pokati kavo.+ 11 Omunu wosi o lamba kocivimbi cimue o vĩhisua oloneke epanduvali.+ 12 Omunu waco o sukila oku liyelisa lovava keteke liatatu kuenje keteke liepanduvali o yelisiwa. Pole, nda eye ka liyelisile keteke liatatu, keteke liepanduvali eye ka yelisiwa. 13 Wosi o lamba kocivimbi comunu wa fa kuenje ka liyelisile, o vĩhisa otavernakulu+ ya Yehova kuenda omunu waco a tepiwe* pokati ka va Isareli.+ Omo ka nyĩliwile lovava oku liyelisa,+ eye amamako oku vĩhisua. Eye amamako levĩho liaye.

14 “‘Nda omunu umue o fila vombalaka, ocihandeleko ci kuamiwa ceci: Wosi iñila vombalaka yaco kuenda wosi o kasi ale vombalaka yaco, o vĩhisua oloneke epanduvali. 15 Ocikuata cosi ka ci kuete onuviko, ci vĩha.+ 16 Wosi o kasi vusenge okuti wa lamba komunu wa pondiwa losipata, ale kocivimbi comunu wa fa ño, pamue kakepa aco, ale keyambo, o vĩhisua oloneke epanduvali.+ 17 Va tikule onepa yimue yetiko yocilumba cekandu ca timĩhiwa kuenda va li kape vovava opiwa pono yimue loku li kapa vocikuata cimue, oco ceciwe komunu waco wa vĩhisua. 18 Kuenje omunu wa yelisiwa+ o tikula ohisopu+ o yi kapa vovava aco kuenda o a nyanya vombalaka yaco, lo kovikuata viosi, lo komanu va kalamo kuenda komunu wa lamba kakepa, ale komunu wa pondiwa, pamue kocivimbi, ale keyambo. 19 Omunu wa yelisiwa o nyanya ovava aco keteke liatatu kuenda keteke liepanduvali komunu wa vĩhisua kuenje eye o yelisiwa kekandu keteke liepanduvali;+ noke citava okuti eye o sukula uwalo waye vovava kuenda o yelisiwa koñolosi.

20 “‘Pole, omunu wa vĩhisua okuti ka liyelisile, a tepiwe* pokati ka va Isareli,+ momo wa vĩhisa ocitumãlo ci kola ca Yehova. Omo okuti, ka vo nyĩlile ovava oku liyelisa, oco eye wa vĩha.

21 “‘Ociholo cotembo ka yi pui kokuavo ceci: Omunu una o nyĩla ovava oku liyelisa,+ o sukila oku sukula uwalo waye kuenda omunu o lamba kovava aco oku liyelisa, o vĩhisua toke koñolosi. 22 Cosi ca lambiwa lomunu wa vĩhisua, ci vĩha kuenda omunu wosi wa lambako o vĩhisuavo toke koñolosi.’”+

20 Kosãi yatete, owiñi wosi wa va Isareli wa pitĩla vekalasoko lio Sini kuenje omanu va fetika oku tunga vo Kadesi.+ Omo Miriama+ a fila haiko a kendiwila.

2 Ka kua kalele ovava oco omanu va nyue+ kuenje ovo va liongoluila pamosi oku lisiõsuĩla Mose la Arone. 3 Omanu va hoyela Mose+ vati: “Hĩse nda tua file eci vamanjetu va fila kovaso a Yehova! 4 Momo lie wa neneli omanu va Yehova vekalasoko lilo okuti, tu fila mulo kumue loviunda vietu?+ 5 Momo lie wa tu upili Kegito loku tu nena vocitumãlo eci cĩvi?+ Ka muli ocitumãlo coku kũla ombuto, ka muli akuyu, ayuva, olo romã* ndaño ovava oku nyua.”+ 6 Mose la Arone va tunda kovaso yowiñi, va enda puvelo wombalaka yohongele kuenda va petamisa ovipala viavo posi kuenje ulamba wa Yehova wa molẽha kokuavo.+

7 Yehova wa sapuila Mose hati: 8 “Tikula ombueti, vilikiya omanu vosi ove kumue la Arone huvove kuenda sapuili esenje oco li tunde ovava kovaso avo kuenje ove o vopila ovava vesenje, eca komanu lo kovinyama viavo oco va nyue.”+

9 Noke Mose wa tikula ombueti ya kala kovaso a Yehova+ ndeci Eye o handeleka. 10 Kuenje Mose la Arone va kovonga omanu vosi kovaso esenje loku va sapuila vati: “A vakuesino cilo yeveleli! Anga hẽ vu yongola okuti tu upa ovava vesenje eli oco vu nyue?”+ 11 Kuenje Mose wa tulika okuokuo kuaye, yu wa veta vesenje lombueti yaye olonjanja vivali, noke mua fetika oku tunda ovava alua kuenda omanu lovinyama viavo va fetika oku nyua.+

12 Noke Yehova wa sapuila Mose la Arone hati: “Omo okuti ka wa ñoleleli ndaño oku ndi sivaya kovaso omanu va Isareli, ka vu ambata omanu ava vofeka nda likuminya oku va ĩha.”+ 13 Ovava a-a, ovava o ko Meriva,*+ kuna va Isareli va hoyela Yehova kuenje eye wa sivayiwa pokati kavo.

14 Mose wa tuma olomunga via tunda ko Kadesi oku enda ku soma yo ko Edome+ hati: “Manjove Isareli+ wa popia hati: ‘Ove wa kũlĩha ciwa ohali yosi tua tala. 15 Vakukululu yetu va endele Kegito+ kuenda tua kala Kegito vokuenda kuanyamo alua*+ kuenje va Egito va tu talisa ohali yalua kumue la vakukululu yetu.+ 16 Noke tua likutilila ku Yehova+ kuenje eye wa tu yeva, yu wa tuma ungelo umue+ wa tu upa Kegito, kaliye tu kasi kulo ko Kadesi, olupale lu lisungue locikanjo cove. 17 Panga ohenda loku ecelela okuti, tu pita vofeka yene. Ka tu piti vepia limue ale vocumbo cayuva kuenda ka tu nyui ovava ovisimo viene. Tu pita Vonjila ya Soma okuti, ka tu ñualela kondio ndaño kepĩli toke eci tu pita vocikanjo cove.’”+

18 Edome wo sapuila hati: “Ka citava oku pita vocikanjo cetu. Nda wa ci linga, njiya losipata oku ku landula.” 19 Va Isareli vo tambulula vati: “Tu pita ño vonjila, pole, nda etu kumue lovinyama vietu tua nyua ovava ove, tu a feta.+ Etu tu yongola ño oku pita onjila.”+ 20 Eye lopo wa popia hati: “Ku piti.”+ Kuenje Edome wambata olohoka vialua* haivio via pama oku ka lisanga laye. 21 Omo liaco, Edome wa likala oku pitisa Isareli vimbo liavo; kuenje Isareli wa enda lonjila yiñi.+

22 Omanu vosi va Isareli va tunda ko Kadesi kuenje va pitĩla Komunda Horo.+ 23 Kuenje Yehova wa vangula la Mose kuenda Arone Komunda Horo ya kala ongave yofeka ya Edome hati: 24 “Arone o ka kongeliwa komanu vaye.*+ Eye ka ka iñila vofeka ngeca ku va Isareli, momo kavali kene ka wa pokuili konumbi yange yatiamẽla kovava o ko Meriva.+ 25 Ambata Arone lomõlaye Eleasa, lamaneli Komunda Horo. 26 Lulisa Arone uwalo waye,+ u walisa komõlaye Eleasa+ kuenje oko Arone a ka fila.”*

27 Mose wa linga ndomo Yehova o handeleka kuenje owiñi wosi wa va Isareli wa va mola eci va lamanela Komunda Horo. 28 Noke Mose wa lulisa Arone uwalo waye kuenda wa u walisa komõlaye Eleasa. Kuenje oko Arone a fila kosungu yomunda.+ Mose la Eleasa va loka komunda. 29 Eci omanu vosi va limbuka okuti Arone wa fa, onjo yosi ya Isareli ya lila Arone vokuenda kueci ci soka 30 koloneke.+

21 Soma yo Arade+ u Kanana, una wa tungile ko Negeve eci a yeva okuti, Isareli o kasi oku iya oku pita vonjila yo Atarimi, eye wa katukila Isareli kuenda wambata vamue pokati kavo kumandekua. 2 Noke Isareli wa linga ohuminyo eyi ku Yehova hati: “Nda wa eca omanu ava peka liange, ndi nyõla muẽle pe alupale avo.” 3 Yehova wa yeva ondaka ya Isareli kuenje wa eca va Kanana peka liavo kuenda va va kundula kumue lalupale avo. Kuenje va luka ocitumãlo caco hati, Horima.*+

4 Osimbu va kala oku linga ungende oku tunda Komunda Horo+ poku pita vonjila Yokalunga Kakusuka oco va ñuale imbo lio Edome,+ omanu va kavele omo liungende waco. 5 Kuenje omanu va fetika oku lisiõsuĩla Suku kuenda Mose+ vati: “Momo lie wa tu upili Kegito loku tu nena vekalasoko oco tu fe? Mulo ka muli okulia ndaño ovava+ kuenda ka tu sole* okulia kuaco kũvi.”+ 6 Noke Yehova wa tuma olonyõha vi kuete owule* pokati komanu kuenda via va lumana kuenje va Isareli valua va fa.+

7 Noke omanu veya ku Mose vati: “Tua linga ekandu omo lioku lisiõsuĩla Yehova kuenda ove.+ Likutilila ku Yehova oco ope olonyõha vi kasi pokati ketu.” Kuenje Mose wa likutililako omanu.+ 8 Yehova wa sapuila Mose hati: “Tunga onyõha yimue yocindekaise yi kuete owule* kuenda yi tulika kuti. Eci umue a lumaniwa, o sukila oku yi vanja oco a kale lomuenyo.” 9 Mose wa tunga onyõha yimue yosipi,+ wa yi tulika kuti+ kuenda olonjanja viosi eci onyõha yimue yi lumana omunu umue, omunu waco o vanja konyõha yaco yosipi kuenda o popeliwa.+

10 Va Isareli va tundako kuenje va tunga ovilombo ko Ovote.+ 11 Noke va tunda ko Ovote kuenda va tunga ovilombo ko Iye-Havarime,+ vekalasoko li kasi kovaso yo Moavi kutundilo wekumbi. 12 Eci va tundako, va tunga ovilombo Kocimbota* co Cereda.+ 13 Noke va tundako kuenje va tunga ovilombo vofeka yo Arinone+ ya kala vekalasoko lia enda toke kongave ya va Amori, momo o Arinone oyo ya kala ongave yo Moavi pokati ka Moavi la va Amori. 14 Eli olio esunga lieci okuti, elivulu Liovita via Yehova lia lombolola okuti: “Vaheve, ko Sufa kuenda kovimbota* vio ko Arinone, 15 kuenda ociloka* covimbota* ca enda toke vimbo lio Are kuenda ci kasi konele yongave yo Moavi.”

16 Noke ovo va enda ko Bere. Oco, ca kala ocisimo cina Yehova a sapuilile Mose hati: “Ongolola omanu oco ndi va ĩhe ovava.”

17 Kotembo yaco Isareli wa imba ocisungo citi:

“Acisimo, tumũha! U tambululi!*

Noke va tunda vekalasoko oku enda ko Matana, 19 oku tunda ko Matana va enda ko Nahaliyele, oku tunda ko Nahaliyele va enda ko Bamote.+ 20 Oku tunda ko Bamote va enda kocimbota ci kasi vocikanjo* co Moavi+ okuti, kilu lio Pisiga,+ lina li kasi kovaso yo Yesimone.*+

21 Isareli wa tuma olomunga ku Sihoni soma ya va Amori hati:+ 22 “Tu ecelele okuti tu pita vofeka yove. Ka tu piti vepia limue ale vocumbo cimue cayuva. Ka tu nyui ovava ovisimo. Tu pita Vonjila ya Soma toke eci tu pitahãla ocikanjo cove.”+ 23 Pole, Sihoni ka tavele okuti, Isareli o pita vocikanjo caye. Omo liaco, Sihoni wongolola omanu vaye vosi kuenje va enda oku ka liyaka la Isareli vekalasoko, noke wa pitĩla ko Yahasa, yu wa fetika oku liyaka la Isareli.+ 24 Kuenje Isareli wo yula losipata+ kuenda wa tambula ofeka yaye+ tunde ko Arinone+ toke ko Yavoke,+ ocipepi la va Amoni, momo o Yasere+ ya kala ongave yimbo ya va Amoni.+

25 Noke Isareli wa tambula alupale aco osi kuenje wa fetika oku tunga valupale osi a va Amori,+ ko Hesibone kuenda vovaimbo osi a sungueko. 26 Momo o Hesibone lua kala olupale lua Sihoni soma ya va Amori, una wa liyaka losoma yo ko Moavi loku tambula alupale aye osi toke ko Arinone. 27 Eli olio esunga lieci kua tukuiwila olusapo luesepu luokuti:

“Enjui ko Hesibone.

Olupale luo Sihoni lu tungiwe kuenda lu kolisiwe.

28 Momo ondalu ya tunda ko Hesibone, ulienge wa tunda kimbo lio Sihoni.

Oyo ya timĩha imbo lio Are ko Moavi okuti, oloñala via kemãla vio kovitumãlo via lepa vio ko Arinone.

29 A Moavi, ngongo yove! Amanu vo ko Kemosi,+ vu ka nyõliwa!

Eye o kokela omãla vaye valume oku linga vakuakutungayala kuenda omãla vaye vakãi vambatiwa kumandekua ku Sihoni soma ya va Amori.

31 Kuenje Isareli wa fetika oku tunga vofeka ya va Amori. 32 Mose wa tuma alume vamue oco va ka kũlĩhĩse ofeka yo Yasere.+ Ovo va tambula ovaimbo a sungueko kuenda va tundisa va Amori va kalamo. 33 Noke va tiuka kuenda va pita vonjila yenda ko Basiane. Kuenje Oge+ soma yo ko Basiane weya kumue lomanu vaye vosi oco va liyake lavo ko Edirei.+ 34 Yehova wa sapuila Mose hati: “Ku ko kuatele usumba,+ momo ndu weca peka liove kumue lomanu vaye kuenda ofeka yaye+ kuenje ove o linga laye ndeci wa linga la Sihoni soma ya va Amori, una wa tungile ko Hesibone.”+ 35 Ovo vo ponda kumue lomãla vaye kuenda omanu vaye vosi toke eci lomue pokati komanu vaye wa supapo+ kuenje va tambula ofeka yaye.+

22 Noke va Isareli va tundako kuenda va tungila ovilombo vekalasoko lio Moavi konele yo Yordão, kovaso yo Yeriko.+ 2 Balaka+ omõla a Sipore wa mola ovina viosi va Isareli va linga ku va Amori, 3 kuenda Moavi wa kuatela usumba omanu vaco, momo va luile calua; Moavi wa yokoka omo liusumba a kuatela va Isareli.+ 4 Moavi wa sapuila akulu vo ko Midiane+ hati: “Kaliye owiñi owu, u ka nyõla ovaimbo osi a lisungue letu, ndeci ongombe yi kelula owangu wovusenge.”

Kotembo yaco, Balaka omõla a Sipore eye wa kala osoma yo ko Moavi. 5 Eye wa tuma olomunga ku Baliame omõla a Beore ko Petore,+ imbo li kasi ocipepi Lolui* luofeka yaye. Eye wo sapuila hati: “Tala! Omanu va tunda Kegito veya kulo. Va yukisa ofeka yosi+ kuenda va tungila muẽle kovaso ange. 6 Mange ohenda, enju, ndi siñaleleko omanu ava,+ momo va pama calua okuti, ame ndi sule. Citava okuti, ndi va yula kuenda ndi va tundisa vofeka, omo nda kũlĩha okuti, wosi ove o sumũlũisa o sumũlũha kuenda wosi ove o siñala o siñaliwa.”

7 Kuenje akulu vo ko Moavi, lakulu vo ko Midiane va linga ungende loku ambata ofeto yoku tãha kuenda va enda ku Baliame+ oku u lomboluila esapulo lia Balaka. 8 Eye wa va sapuila hati: “Lali kulo uteke ulo oco ndu lomboluili cosi Yehova a ka ndi sapuila.” Kuenje olombuale vio ko Moavi via siala la Baliame.

9 Noke Suku wa molẽha ku Baliame loku u pula hati:+ “Alume ava va sikĩla konjo yove velie?” 10 Baliame wa tambulula Suku yocili hati: “Balaka omõla a Sipore soma yo ko Moavi wa tuma esapulo kokuange liokuti: 11 ‘Tala! Omanu va tunda Kegito va yukisa ofeka yosi. Enju, ndi siñaleleko omanu ava.+ Pamue citava okuti, ndi tẽla oku yaka lavo loku va tundisa vofeka.’” 12 Pole, Suku wa tambulula Baliame hati: “Ku ka ende lavo. Ku ka siñale omanu vaco, momo vakuesumũlũho.”+

13 Baliame wa pasuka selo kuenda wa sapuila olombuale via Balaka hati: “Tiukili kofeka yene, momo Yehova ka tava okuti ngenda lene.” 14 Noke olombuale via Moavi via enda kuenda via tiukila ku Balaka kuenje via popia viti: “Baliame ka tavele oku iya letu.”

15 Omo liaco, Balaka wa tumisa vali olombuale vialua haivio via kemãla okuti, ocimunga catete ci sule. 16 Ovio via pitĩla ku Baliame loku popia viti: “Ca popia Balaka omõla a Sipore ceci hati: ‘Ku ka ecelele okuti cimue ci ku tateka oku iya kokuange, 17 momo hu muisa esumbilo lialua kuenda ndi linga cosi o ndi sapuila. Mange ohenda, enju, ndi siñaleleko omanu ava.’” 18 Pole, Baliame wa tambulula apika va Balaka hati: “Ndaño Balaka o nyĩha onjo yaye yeyuka opalata lulu, si lingi lacimue ci lueya ocihandeleko ca Yehova Suku yange, ci kaile okuti cinene ale citito.+ 19 Ndu pingi okuti, lali kulo uteke ulo, oco ndi kũlĩhe eci Yehova a ka ndi sapuila vali.”+

20 Suku wa molẽha ku Baliame kuteke loku u sapuila hati: “Nda alume ava veya oku ku kovonga, kuende lavo. Pole, o vangula lika olondaka ndu ku tuma oku vangula.”+ 21 Kuenje Baliame wa pasuka selo, wa pongiya ocimbulu caye* kuenda wa enda kumue lolombuale vio ko Moavi.+

22 Pole, onyeño ya Suku ya wenguka, momo eye wa kala oku enda kuenje ungelo wa Yehova wo lavekela vonjila oco o tateke. Baliame wa kala oku endela kocimbulu caye kuenda apika vaye vavali va kala laye. 23 Eci ocimbulu ca mola ungelo wa Yehova okuti wa talama vonjila losipata peka liaye okuti, yopiwa vocilalo oco, ca seteka oku tunda vonjila loku ñualela vusenge. Pole, Baliame wa fetika oku veta ocimbulu oco a ci tiule vali vonjila. 24 Noke ungelo wa Yehova wa talama vonjila ya sukatela pokati kocumbo cayuva okuti, konele ocimbaka covawe, konele yikuavo ocimbaka covawe. 25 Eci ocimbulu ca mola ungelo wa Yehova, ca fetika oku lisindila vocimano loku sipata omãhi ya Baliame vocimano kuenje Baliame wa fetika vali oku ci veta.

26 Ungelo wa Yehova wa pita vali kovaso kuenda wa talama vonjila ya sukatela okuti, ka mua kaile evelo lioku yapukila kondio ale kepĩli. 27 Eci ocimbulu ca mola ungelo wa Yehova, ca wila posi osimbu Baliame a kala kilu liaco kuenda Baliame wa tema calua kuenje wa veta vali ocimbulu lombueti yaye. 28 Yehova wa lingisa okuti ocimbulu ci vangula*+ kuenje ca pula Baliame citi: “Nye nda ku linga okuti, o mbeta olonjanja evi vitatu?”+ 29 Baliame wa tambulula ocimbulu hati: “Momo wa ndi lingisa eveke. Nda nda kuatele osipata yimue peka, nda nda ku ponda!” 30 Ocimbulu ca tambulula Baliame citi: “Siti ndicimbulu cove kuna endaila omuenyo wove wosi toke etaili? Anga hẽ eteke limue nda ku ci lingile ale?” Eye wa tambulula hati: “Sio!” 31 Yehova wa patulula ovaso a Baliame+ kuenje eye wa mola ungelo wa Yehova wa talama vonjila losipata yopiwa vocilalo okuti ya kala peka liaye. Noke wa petamisa ocipala caye posi loku kekamẽla kovaso aye.

32 Kuenje ungelo wa Yehova wo sapuila hati: “Momo lie wa vetela ocimbulu cove olonjanja vitatu? Tala! Ndeya oku ku tateka, momo onjila yove ka yi likuata locipango cange.+ 33 Ocimbulu ca ndi mola kuenda ca seteka oku ndi tila olonjanja vitatu.+ Nye nda ca pita love nda ka ca ndi tilile? Cilo nda nda ku ponda kuenda ocimbulu nda ca kala lomuenyo.” 34 Baliame wa sapuila ungelo wa Yehova hati: “Nda linga ekandu, momo sia limbukile okuti, ove wa talama vonjila oco o lisange lame. Kaliye nda ka ca sungulukile kokuove, ndi tiukila.” 35 Pole, ungelo wa Yehova wa sapuila Baliame hati: “Kuende lalume vaco, pole, vangula lika olondaka ndu ku sapuila.” Kuenje Baliame wa enda lolombuale via Balaka.

36 Eci Balaka a yeva okuti Baliame weya, wa tunda lonjanga oku ka lisanga laye volupale luo Moavi, lu kasi kohulo yo Arinone kongave yocikanjo. 37 Balaka wa pula Baliame hati: “Sia tumĩle hẽ oku ku kovonga? Momo lie kueyilile kokuange? Wa sima hẽ okuti nda sia ku sumbilile calua?”+ 38 Baliame wa tambulula Balaka hati: “Oco, ndeya kokuove cilo. Citava hẽ okuti ndi vangula cimue? Ndi vangula lika olondaka Suku a kapa vomẽla wange.”+

39 Baliame wa enda la Balaka kuenje va pitĩla ko Kiriate-hisote. 40 Balaka wa lumba ocilumba colongombe lolomeme kuenje wa tuma olonepa vimue ku Baliame kuenda kolombuale via kala laye. 41 Komẽle Balaka wa pitula Baliame konumbuko yo Bete-baale; oku upisa oko wa ponduile oku mola omanu vosi.+

23 Baliame wa sapuila Balaka hati: “Tungila pocitumãlo cilo ovotala epanduvali+ kuenda ndi pongiyile olongombe epanduvali, lovitupi violomeme epanduvali.” 2 Balaka wa linga lonjanga ndomo Baliame o sapuila. Kuenje Balaka la Baliame kutala lutala va lumbilako ongombe yimosi locitupi comeme.+ 3 Baliame wa sapuila Balaka hati: “Kala palo ocipepi locilumba cove coku pia elisi osimbu ngenda. Pamue Yehova o ka molẽha kokuange. Kuenje cosi eye a ka ndi sapuila, ndu ku ci sapuilavo.” Noke wa enda konumbuko yomunda.

4 Suku wa li molẽhisa ku Baliame+ kuenje Baliame wa sapuila Suku hati: “Nda tunga ovotala epanduvali kuenda kutala lutala nda lumbilako ongombe yimosi locitupi cimosi comeme.” 5 Yehova wa kapa ondaka yaye vomẽla wa Baliame+ hati: “Tiukila ku Balaka kuenje eci oco o popia.” 6 Eye wa tiukila kuenda wa mola okuti, Balaka lolombuale viosi via Moavi va talama ocipepi locilumba caye coku pia elisi. 7 Kuenje eye wa ta olusapo olu hati:+

‘Enju oco o ndi siñalele Yakoba.

Enju, oco o pise Isareli.’+

 8 Ndi siñala ndati omanu vana okuti Suku ka va siñalele?

Ndi pisa ndati omanu vana okuti Yehova ka va pisile?+

10 Helie o tẽla oku tenda owiñi wa Yakoba+ wa soka ndoneketela?

Pamue oku tenda onepa yakuãla ya Isareli?

11 Kuenje Balaka wa sapuila Baliame hati: “Eci wa ndingila ndeti nye? Ame nda ku nena oco o siñale ovanyãli vange, kua ci lingile, pole, wa va sumũlũisa.”+ 12 Eye wa tambulula hati: “Anga hẽ si pondola oku popia ovina viosi Yehova a ndi sapuila?”+

13 Balaka wo sapuila hati: “Mange ohenda, enju lame pocitumãlo cikuavo oco o va mole ciwa. O ka mola lika vamue pokati kavo; ku va moli vosi. Va ndi siñalele oku upisa oko.”+ 14 Kuenje wa enda laye toke kusenge wo Sofimi kilu lio Pisiga,+ yu wa tunga ovotala epanduvali kuenda kutala lutala wa lumbilako ongombe yimosi locitupi comeme.+ 15 Baliame wa sapuila Balaka hati: “Kala palo ocipepi locilumba cove coku pia elisi osimbu ngenda oku ka sapela Laye.” 16 Kuenje Yehova wa vangula la Baliame, yu wa kapa ondaka yaye vomẽla waye hati:+ “Tiukila ku Balaka kuenje eci oco o ka popia.” 17 Eye wa enda kokuaye kuenda wa mola okuti eye wa kala oku kevelela ocipepi locilumba caye coku pia elisi kuenda olombuale via Moavi via kala laye. Balaka wo pula hati: “Yehova nye a popia?” 18 Eye wa ta olusapo olu hati:+

“A Balaka, votoka kuenda yevelela.

Njevelele, Amõla a Sipore.

Eci a vangula ocina cimue, ka ci lingi hẽ?

Eci a popia, anga hẽ ka ci tẽlisa?+

22 Suku wa vopa Kegito.+

Eye wa soka ndolombinga viongombe yovusenge kokuavo.+

Kaliye ci popiwa catiamẽla ku Yakoba kuenda ku va Isareli ceci:

‘Tali eci Suku a linga!’

25 Balaka wa sapuila Baliame hati: “Nda ku pondola oku va siñala, ku pondolavo oku va sumũlũisa.” 26 Baliame wa tambulula Balaka hati: “Siti nda ku sapuilile okuti, ‘ndi linga cosi Yehova a popia’?”+

27 Balaka wa sapuila Baliame hati: “Enju, mange ohenda, tuende handi kocitumãlo cikuavo. Pamue ci sunguluka kovaso a Suku yocili okuti, oko o va siñalela.”+ 28 Kuenje Balaka wambata Baliame toke kilu lio Peore, imbo lia imba ovaso ko Yesimone.*+ 29 Baliame wa sapuila Balaka hati: “Tunga ovotala epanduvali kuenda ndi pongiyile olongombe epanduvali lovitupi violomeme epanduvali.”+ 30 Kuenje Balaka wa linga ndomo Baliame o sapuila kuenda kutala lutala wa lumbilako ongombe yimosi locitupi cimosi comeme.

24 Eci Baliame a limbuka okuti Yehova wa sanjukila* oku sumũlũisa Isareli, ka endele vali oku ka sandiliya owanji wovina vĩvi,+ pole, wa imba ovaso vekalasoko. 2 Eci Baliame a petula ovaso aye loku mola okuti Isareli wa tunga ndomo ci likuata lovikoti viaye,+ espiritu lia Suku lio wila.+ 3 Eye wa ta olusapo olu hati:+

10 Noke onyeño ya Balaka ya wengukila Baliame. Kuenje Balaka wa pandula loku sepula Baliame poku popia hati: “Nda ku vilikiya oco o sinãle ovanyãli vange, kua ci lingile,+ pole, wa va sumũlũisa olonjanja evi vitatu. 11 Kaliye tiukila konjo lonjanga. Ame nda yonguile oku ku sumbila calua,+ pole, tala! Yehova wa ku tateka oku tambula esumbilo liaco.”

12 Baliame wa tambulula Balaka hati: “Siti nda sapuila ale kolomunga viove okuti, 13 ‘Ndaño Balaka wa nyĩhile onjo yaye yeyuka opalata lulu, nda sia lingile lacimue* ci lueya ocihandeleko ca Yehova, ci kaile eci ciwa ale ceci cĩvi. Siti ndi vangula lika olondaka Yehova a ndi sapuila’?+ 14 Kaliye ndi tiukila komanu vange. Enju oco hu sapuile eci omanu ava va ka linga komanu vove kovaso yoloneke.”* 15 Eye wa ta olusapo olu hati:+

Osimbu Isareli a lekisa utõi waye.

20 Eci a mola Amaleke, eye wamamako oku ta olusapo luaye hati:

21 Eci a mola va Keni,+ wamisako lolusapo luaye hati:

“Ocitungilo cove ca koka kuenda onjo yove ya sevetiwa kesenje.

22 Pole, umue o ka timĩha Keni.*

Otembo yi pi Asuria a ka ku ambati kumandekua?”

23 Eye wamisako lolusapo luaye hati:

“Avoyo we! Helie o ka puluka eci Suku a ka linga ovina viaco?

Pole, eye o ka nyõliwavo pe.”

25 Noke Baliame+ wa votoka, yu wa enda wa tiukila kocitumãlo caye. Balaka wa endavo lonjila yaye.

25 Eci va Isareli va tunga vo Sitimi,+ omanu va fetika oku linga evĩho liukahonga lomãla vakãi va va Moavi.+ 2 Akãi vaco va laleka omanu oco va ece ovilumba kolosuku+ viavo kuenje omanu va fetika oku lia loku kekamẽla olosuku viavo.+ 3 Kuenje va Isareli va likongela koku fendela* Baale yo ko Peore kuenje onyeño ya Yehova ya wengukila va Isareli.+ 4 Yehova wa sapuila Mose hati: “Kuata asongui vosi vomanu ava kuenje va ponda loku va nyoñamisa kuti kovaso a Yehova vokuenda kutanya, oco onyeño ya Yehova ka yi ka wengukile vali va Isareli.” 5 Mose wa sapuila olonganji via va Isareli hati:+ “Omunu lomunu pokati kene a ponde omunu wosi wa likongela koku fendela* Baale wo ko Peore.”+

6 Pole, vepuluvi lina va kala oku lilila puvelo wombalaka yohongele, umue u Isareli wa nena pokati ka vamanjaye ukãi umue u Midiane+ kovaso a Mose kuenda kovaso yowiñi wosi wa va Isareli. 7 Finehase+ omõla a Eleasa ocitunda eci a ci mola, wa votoka lonjanga pokati kowiñi kuenda wa tikula unga umue. 8 Noke wa kuama ulume u Isareli vombalaka yaye kuenje wa va toma kavali kavo, ci kaile ulume u Isareli ci kaile ukãi waco, wa va tomela kovimatamata viaye viuyali. Kuenje efengi lia imũha ku va Isareli.+ 9 Vana va fa lefengi liaco, va tẽla 24.000 komanu.+

10 Yehova wa sapuila Mose hati: 11 “Finehase+ omõla a Eleasa, omõla a Arone ocitunda wa tulumũla onyeño yange ku va Isareli, momo eye ka ecelelele lalimue ekambo liesunga kokuange pokati kavo.+ Omo liaco, sia nyõlele va Isareli, momo ndi yongola okuti, omanu va ndi fendela lika ame.+ 12 Noke u sapuila hati: ‘Ndi lisila laye ocisila cange combembua. 13 Kuenje ci linga ocisila cotembo ka yi pui cutunda waye kuenda kocitumbulukila ci kuamamo,+ momo ka ecelelele lalimue ekambo liesunga ku Suku+ yaye kuenda wa tuvika ekandu liomanu va Isareli.’”

14 Onduko yulume u Isareli wa pondiwa kumue lukãi u Midiane, Simiri omõla a Salu haeye usongui wonjo ya va Simeone. 15 Onduko yukãi waco u Midiane wa pondiwa, Kocivi omõla ukãi a Curu;+ eye wa kala usongui wepata lia va Midiane.+

16 Noke Yehova wa sapuila Mose hati: 17 “Kangisa va Midiane loku va kundula,+ 18 momo va ku kangisi lovilinga viavo viatutu kondaka yatiamẽla ko Peore+ kuenda kondaka ya Kocivi omõla ukãi wusongui wa va Midiane, la manjaye ukãi wa pondiwa+ keteke liefengi lia pita ko Peore.”+

26 Noke yefengi+ Yehova wa sapuila Mose la Eleasa omõla a Arone ocitunda hati: 2 “Tendi owiñi wosi wa va Isareli va kuete oku upisa 20 kanyamo lava va pitahãla anyamo aco okuti, olonjo via va isiavo, loku tenda vana va pondola oku tiamẽla kolohoka vio ko Isareli.”+ 3 Mose la Eleasa+ ocitunda va sapuila omanu vaco vekalasoko lio Moavi+ konele yo Yordão ocipepi lo Yeriko+ vati: 4 “Tendi vana va kuete oku upisa 20 kanyamo lava va pitahãla anyamo aco, ndomo Yehova a handelekele Mose.”+

Omãla va Isareli va tunda kofeka Yegito vava: 5 Ruvene+ omõla uveli wa Isareli; omãla va Ruvene vava:+ Hanoke ukuepata lia va Hanoke; Falu ukuepata lia va Falu; 6 Hecirone ukuepata lia va Hecirone; Karimi ukuepata lia va Karimi. 7 Ava ovo va kala apata a va Ruvene kuenda etendelo liavo lia tẽla 43.730 komanu.+

8 Omõla a Falu wa kala Eliyava. 9 Omãla va Eliyava va kala Nemuele, Datana kuenda Avirama. Datana la Avirama ovo vana va nõliwile lowiñi una wa katukila Mose+ la Arone kuenda va likongela kocimunga ca Kora+ eci va katukila Yehova.+

10 Noke osi yasama* kuenje ya va ina. Catiamẽla ku Kora, wa fa kumue lowiñi waye eci ondalu ya lia ci soka 250 komanu.+ Ovo va linga ongangu yelungulo.+ 11 Pole, omãla va Kora ka va file.+

12 Omãla va Simeone+ okuti, epata lepata vava: Nemuele ukuepata lia va Nemuele; Yamini ukuepata lia va Yamini; Yakini ukuepata lia va Yakini; 13 Sera ukuepata lia va Sera; Saulu ukuepata lia va Saulu. 14 Ava ovo va kala apata a va Simeone kuenda etendelo liavo lia tẽla 22.200 komanu.+

15 Omãla va Gadi+ okuti, epata lepata vava: Cefono ukuepata lia va Cefono; Hagi ukuepata lia va Hagi; Siuni ukuepata lia va Siuni; 16 Osini ukuepata lia va Osini; Eri ukuepata lia va Eri; 17 Arode ukuepata lia va Arode; Areli ukuepata lia va Areli. 18 Ava ovo va kala apata vomãla va Gadi kuenda etendelo liavo lia tẽla 40.500 komanu.+

19 Omãla va Yuda+ va kala Ere la Onane.+ Pole, Ere la Onane va fila kofeka yo Kanana.+ 20 Omãla va Yuda okuti epata lepata vava: Sela+ ukuepata lia va Sela; Peresi ukuepata lia va Peresi;+ Sera+ ukuepata lia va Sera. 21 Omãla va Peresi vava: Hecirone+ ukuepata lia va Hecirone;+ Hamuli ukuepata lia va Hamuli. 22 Ava ovo va kala apata a Yuda kuenda etendelo liavo lia tẽla 76.500 komanu.+

23 Omãla va Isakare+ okuti, epata lepata vava: Tola ukuepata lia va Tola;+ Puva ukuepata lia va Puva; 24 Yasiuvu ukuepata lia va Yasiuvu; Simironi ukuepata lia va Simironi. 25 Ava ovo va kala apata a Isakare kuenda etendelo liavo lia tẽla 64.300 komanu.+

26 Omãla va Sevulono+ okuti epata lepata vava: Serede ukuepata lia va Serede; Eloni ukuepata lia va Eloni; Yahilele ukuepata lia va Yahilele. 27 Ava ovo va kala apata a Sevulono kuenda etendelo liavo lia tẽla 60.500 komanu.+

28 Omãla va Yosefe+ okuti epata lepata vava: Manase la Efarimi.+ 29 Omãla va Manase+ vava: Makiri+ ukuepata lia va Makiri; kuenda Makiri wa linga isia ya Gileada; Gileada+ ukuepata lia va Gileada. 30 Omãla va Gileada vava: Iyesere ukuepata lia va Iyesere; Heleke ukuepata lia va Heleke; 31 Asiriyele ukuepata lia va Asiriyele; Sekeme ukuepata lia va Sekeme; 32 Semida ukuepata lia va Semida; Hefere ukuepata lia va Hefere. 33 Celofehada omõla a Hefere ka kuatele omãla valume, pole, wa kuata lika omãla vakãi+ kuenda olonduko viomãla vakãi va Celofehada+ vievi, Mahala, Noha, Hogila, Milika la Tirisa. 34 Ava ovo apata va Manase kuenda etendelo liavo lia tẽla 52.700 komanu.+

35 Omãla va Efarimi+ okuti, epata lepata vava: Siutela+ ukuepata lia va Siutela; Bekere ukuepata lia va Bekere; Tahana ukuepata lia va Tahana. 36 Kuenje omãla va Siutela vava: Erana ukuepata lia va Erana. 37 Ava ovo apata vomãla va Efarimi la vana va tendiwa okuti, va tẽla 32.500 komanu.+ Ava ovo va kala omãla va Yosefe okuti, epata lepata.

38 Omãla va Benjamini+ okuti, epata lepata vava: Bela+ ukuepata lia va Bela; Asibele ukuepata lia va Asibele; Ahirama ukuepata lia va Ahirama; 39 Sefufama ukuepata lia va Sefufama; Hufama ukuepata lia va Hufama. 40 Omãla va Bela va kala Aride la Namana:+ Aride ukuepata lia va Aride; Namana ukuepata lia va Namana. 41 Ava ovo va kala omãla va Benjamini vapata avo kuenda etendelo liavo lia tẽla 45.600 komanu.+

42 Omãla va Dani+ okuti epata lepata vava: Siuhama ukuepata lia va Siuhama. A-a o-o a kala apata a Dani okuti, epata lepata. 43 Etendelo liapata osi a va Siuhama lia tẽla 64.400 komanu.+

44 Omãla va Asiyere+ okuti, epata lepata vava: Imina ukuepata lia va Imina; Yisivi ukuepata lia va Yisivi; Beriya ukuepata lia va Beriya; 45 omãla va Beriya vava: Heveri ukuepata lia va Heveri; Malikiyele ukuepata lia va Malikiyele. 46 Onduko yomõla ukãi a Asiyere ya kala Sera. 47 A-a o-o a kala apata a va Asiyere kuenda etendelo liavo lia tẽla 53.400 komanu.+

48 Omãla va Nafitali+ okuti, epata lepata vava: Yaciyele ukuepata lia va Yaciyele; Guni ukuepata lia va Guni; 49 Yesere ukuepata lia va Yesere; Silemi ukuepata lia va Silemi. 50 A-a o-o a kala apata a Nafitali okuti, epata lepata kuenda etendelo liavo lia tẽla 45.400 komanu.+

51 Entedelo lia va Isareli va sonehiwa lia tẽla 601.730 komanu.+

52 Noke Yehova wa sapuila Mose hati: 53 “Pokati komanu ava ofeka yi tepiwe ndocipiñalo ndomo kua sonehiwa onduko yomunu lomunu.*+ 54 Vovimunga vinene ku vokiyiwe ocipiñalo kuenda kovimunga vitito o tepululako ocipiñalo.+ Ocipiñalo cocimunga locimunga ceciwe ndomo va sonehiwa. 55 Omo liaco, ofeka yi tepiwe poku imba ocela.+ Va tambule ovipiñalo viavo ndomo ci likuata lolonduko viovikoti via isiavo. 56 Ocipiñalo locipiñalo ci nõliwe poku imba ocela kuenda ceciwe pokati kocimunga cinene locimunga citito.”

57 Omanu va sonehiwa ku va Lewi+ okuti, epata lepata vava: Gerisiono ukuepata lia va Gerisiono; Kohata+ ukuepata lia va Kohata; Merari ukuepata lia va Merari. 58 A-a o-o apata a va Lewi: epata lia va Livini,+ epata lia va Hevirone,+ epata lia va Mahili,+ epata lia va Musi,+ epata lia va Kora.+

Kohata wa linga isia ya Amirama.+ 59 Onduko yukãi wa Amirama, Yokevede+ omõla ufeko una Lewi lukãi waye va citila Kegito. Omãla Yokevede a citila Amirama vava, Arone, Mose la Miriama mukãi wavo.+ 60 Arone wa cita Nadava, Avihu, Eleasa kuenda Itamare.+ 61 Pole, Nadava la Avihu va fa omo va lumba ondalu yaño yina Yehova ka handelekele.+

62 Etendelo liava va sonehiwa lia tẽla 23.000 komanu okuti, alume vosi va kuatele oku upisa osãi lava va pitahãlamo.+ Momo ka va sonehiwile pokati ka va Isareli,+ omo ka kua kaile ocipiñalo lacimue ceciwa kokuavo pokati ka va Isareli.+

63 Ava ovo va sonehiwa la Mose kuenda Eleasa ocitunda eci va sonehisa va Isareli vekalasoko vanyãla o ko Moavi konele yo Yordão ocipepi lo Yeriko. 64 Pole, pokati kavo ka pa kaile laumue wa sonehisiwa la Mose kuenda Arone ocitunda eci va Isareli va tendiwa vekalasoko lio Sinai.+ 65 Momo Yehova wa popele eci catiamẽla kokuavo hati: “Ovo va fila muẽle vekalasoko.”+ Ka pa supile laumue pokati kavo, te lika Kalembe omõla a Yefune kuenda Yehosua omõla a Nune.+

27 Kuenje kueya omãla vakãi va Celofehada,+ omõla a Hefere, omõla a Gileada, omõla a Makiri, omõla a Manase ukuepata lia Manase, omõla a Yosefe. Olonduko viomãla vaye vakãi, Mahala la Noha la Hogila, la Milika kuenda Tirisa. 2 Ovo va talama kovaso a Mose la Eleasa ocitunda lo kovaso asongui+ kuenda kowiñi wosi wa kala puvelo wombalaka yohongele vati: 3 “Isietu wa fila vekalasoko, pole, eye ka kaile pokati komanu vana va katukila Yehova okuti, vana va kala la Kora,+ eye wa fila ekandu liaye muẽle kuenda ka kuatele omãla valume. 4 Momo lie onduko ya isietu yi takela vepata liaye omo ka kuatele omõla wulume? Tu ĩhi ocipiñalo cimue pokati ka vamanji a isietu.” 5 Kuenje Mose wa lomboluila ocitangi caco ku Yehova.+

6 Yehova wa sapuila Mose hati: 7 “Omãla vakãi va Celofehada va kuete esunga. O sukila oku va ĩha onepa yimue yocipiñalo pokati ka vamanji a isiavo kuenda ocipiñalo ca isiavo ceca kokuavo.+ 8 Sapuila va Isareli hoti: ‘Nda ulume umue o fa okuti, ka kuatele omõla wulume, ocipiñalo caye ceciwe komõlaye ukãi. 9 Nda eye ka kuete omõla ukãi, ocipiñalo caye ceciwe ku vamanjaye. 10 Nda eye ka kuete vamanjaye, ocipiñalo caye ceciwe ku vamanji a isiaye. 11 Nda isiaye ka kuete vamanjaye, ocipiñalo caye ceciwe ku umue ngandiaye wosonde kuenda eye o tambula ocipiñalo caco. Oco, ci linga ociholo ku va Isareli omo liocisila ndomo Yehova a handelekele Mose.’”

12 Kuenje Yehova wa sapuila Mose hati: “Lamanela komunda yo Avarime+ kuenda vanja ofeka ndi ka eca ku va Isareli.+ 13 Noke yoku yi vanja, o ka kongeliwavo komanu vove,*+ ndeci ca pita la huvove Arone,+ 14 momo eci owiñi wa hoya lame vekalasoko lio Sini, ene wa sinĩli onumbi yange yoku ndi kemãnyisa kovaso avo omo liovava.+ Ovava aco, ovava o ko Meriva+ ko Kadesi+ vekalasoko lio Sini.”+

15 Noke Mose wa sapuila Yehova hati: 16 “Yehova Suku una wa eca omuenyo komanu vosi, a nõle omunu umue pokati kowiñi, 17 o ka va songuila kovopange avo osi, oco omanu va Yehova ka va ka kale ndolomeme ka vi kuete ungombo.” 18 Yehova wa sapuila Mose hati: “Kovonga Yehosua omõla a Nune, ulume umue o kuete ovituwa viwa kuenda kapa ovaka ove kokuaye.+ 19 Noke u talamisa kovaso a Eleasa ocitunda kuenda kovaso yowiñi wosi kuenje u wĩha ocikele coku songola.+ 20 Eca kokuaye onepa yimue yocikele* cove+ okuti, va Isareli vosi va pokola kokuaye.+ 21 Eye a talame kovaso a Eleasa ocitunda okuti, u likutililako ku Yehova oco a kũlĩhe ocisimĩlo caye lekuatiso lio Urimi.+ Ovo va ka pokola konumbi yaye yoku tunda lo konumbi yaye yoku iñila, eye kumue la va Isareli vosi kuenda owiñi wosi.”

22 Kuenje Mose wa linga ndomo Yehova o handelekele. Eye wa kovonga Yehosua kuenda wo talamisa kovaso a Eleasa ocitunda kuenda kovaso yowiñi wosi, 23 eye wo kapa ovaka kuenje wo wĩha ocikele coku songola,+ ndomo Yehova a vangula pocakati ca Mose.+

28 Yehova wa sapuila Mose hati: 2 “Handeleka va Isareli loku popia lavo hati: ‘Vu sukila oku eca kokuange ocilumba cange okuti, okulia kuange. Ovilumba viange viondalu vi eca elemba liwa kokuange, vu vi linga votembo ya sokiyiwa.’+

3 “Noke va sapuila hoti: ‘Ocilumba cimue ci yokiwa vondalu vu sukila oku eca ku Yehova ceci: eteke leteke, vu lumba olomeme vivali vi kuete unyamo umosi haivio ka vi kuete etondelo, oco ocilumba coku pia elisi ceciwa olonjanja viosi.+ 4 Komẽle vu lumba omeme yimue, koñolosi* vu lumba omeme yikuavo,+ 5 vu lumbavo onepa yekũi yo efa* yosema ya fina ya tengiwa lonepa yakuãla yo hine* yulela uwa woliveira ndocilumba colomema.+ 6 Eci oco ocilumba coku pia elisi+ ceciwa olonjanja viosi okuti, ca tumbikiwa Komunda Sinai ndocilumba cimue ci yokiwa vondalu ceca elemba liwa ku Yehova, 7 kumue locilumba coku nyua, lonepa yakuãla yo hine yomeme lomeme.+ Pesili ovinyua vi koluisa vocitumãlo ci kola, ndocilumba coku nyua ceciwa ku Yehova. 8 Omeme yikuavo vu yi lumba koñolosi.* O yi lumbila kumue locilumba colomema ndocilumba ca eciwa komẽle kuenda ocilumba cimuamue coku nyua okuti, o vi eca ndocilumba cimue ci yokiwa vondalu ceca elemba liwa ku Yehova.+

9 “‘Pole, keteke Liesambata+ o lumba olomeme vivali vi kuete unyamo umosi haivio ka vi kuete etondelo kuenda olonjongo vivali vionepa yekũi yo efa yosema ya fina ya tengiwa lulela ndocilumba colomema kumue locilumba caco coku nyua. 10 Eci oco ocilumba coku pia elisi Cesambata, kumue locilumba coku pia elisi ceciwa olonjanja viosi locilumba caco coku nyua.+

11 “‘Kefetikilo liosãi losãi, vu lumbila Yehova ocilumba coku pia elisi okuti, olonãle vivali, locitupi comeme kuenda olomeme epanduvali vi kuete unyamo umosi haivio ka vi kuete etondelo,+ 12 vu lumbavo olonjongo vitatu vionepa yekũi yo efa yosema ya fina ya tengiwa lulela ndocilumba colomema+ okuti, ongombe longombe kuenda ocitupi cimosi comeme vu ci lumbila kumosi lolonjongo vivali vionepa yekũi yo efa yosema ya fina ya tengiwa lulela ndocilumba colomema,+ 13 omeme lomeme vu yi lumbila kumosi lonjongo yimosi yonepa yekũi yo efa yosema ya fina ya tengiwa lulela, ndocilumba colomema kuenda ocilumba coku pia elisi ceca elemba liwa okuti,+ ocilumba cimue ci yokiwa vondalu ci lingiwila Yehova. 14 Ovilumba viavo vioku nyua, vi lumbiwe ndoco: Ongombe+ yi lumbiwa kumosi lomeyu yo hine yovinyu kuenda ocitupi comeme+ ci lumbiwa kumosi lonepa yakuãla yo hine, omeme yi lumbiwa kumosi lonepa yatatu yo hine.+ Eci oco ocilumba ceciwa osãi losãi vokuenda kunyamo ndocilumba coku pia elisi. 15 Vu lumbavo ohombo ndocilumba cekandu ku Yehova loku vokiyako ocilumba coku pia elisi kuenda ocilumba coku nyua ceciwa olonjanja viosi.

16 “‘Kosãi yatete, keteke 14 yosãi, ku ka kala o Paskoa ya Yehova.+ 17 Kuenje keteke 15 yosãi yaco, ku ka lingiwa ocipito cimue. Voloneke epanduvali, vu lia lia olombolo ka vi kuete etumbisa.+ 18 Keteke liatete, ku ka kala ohongele yimue yi kola. Keteke liaco, ka citava oku linga upange laumue. 19 Weci ocilumba coku pia elisi ndocilumba cimue ci yokiwa vondalu ci lingiwila Yehova okuti, olonãle vivali, ocitupi cimosi comeme kuenda olomeme epanduvali vi kuete unyamo umosi. Vu lumba ovinyama ka vi kuete etondelo.+ 20 Vu lumbilavo ovilumba viavo violomema viosema ya fina ya tengiwa lulela okuti,+ ongombe yi lumbiwa kumosi lolonjongo vitatu vionepa yekũi kuenda ocitupi comeme ci lumbiwa lolonjongo vivali vionepa yekũi. 21 Omeme lomeme pokati kolomeme epanduvali, vu vi lumba lonjongo yonepa yekũi, 22 vu lumbavo ocitupi cohombo ndocilumba coku tuvika akandu ene. 23 Kocilumba coku pia elisi vu lumba olonjanja viosi komẽle, vu vokiyako ovilumba via tukuiwa ndeti. 24 Ovilumba viaco vi eciwe lonjila yimuamue eteke leteke vokuenda kuoloneke epanduvali ndokulia* okuti, ocilumba cimue ci yokiwa vondalu ceca elemba liwa ku Yehova. Oco, ceciwe kumue locilumba coku pia elisi ceciwa olonjanja viosi kuenda ocilumba caco coku nyua. 25 Keteke liepanduvali, ku ka kala ohongele yimue yi kola.+ Keteke liaco ka citava oku linga upange laumue.+

26 “‘Keteke lioku ungula apako atete,+ poku eca ovilumba violomema ku Yehova,+ vu sukila oku linga ohongele yimue yi kola kocipito cene colosemana.+ Keteke liaco ka citava oku linga upange laumue.+ 27 Weci ocilumba coku pia elisi ceca elemba liwa ku Yehova okuti, olonãle vivali, ocitupi comeme kuenda olomeme epanduvali vi kuete unyamo umosi,+ 28 kumue lovilumba viavo violomema viosema ya fina ya tengiwa lulela okuti, ongombe longombe yi lumbiwa kumosi lolonjongo vitatu vionepa yekũi kuenda ocitupi comeme ci lumbiwe kumosi lolonjongo vivali vionepa yekũi, 29 omeme lomeme pokati kolomeme epanduvali, vu vi lumba kumue lonjongo yonepa yekũi, 30 vu lumbavo ocitupi cohombo ndocilumba coku tuvika akandu ene.+ 31 Ovilumba viaco, vu vi lumbila kumosi lovilumba vioku pia elisi kuenda ovilumba violomema vi eciwa olonjanja viosi. Vu sukila oku lumba ovinyama ka vi kuete etondelo+ kumue lovilumba viaco vioku nyua.

29 “‘Kosãi yepanduvali, keteke liatete liosãi yaco, vu sukila oku linga ohongele yimue yi kola. Ka citava oku linga upange laumue keteke liaco.+ Keteke liaco, vu yevalisa ocileñi columbeta.+ 2 Vu lumba ongombe yimosi ndocilumba coku pia elisi ceca elemba liwa ku Yehova, ocitupi cimosi comeme kuenda olomeme epanduvali okuti, viosi vi kuete unyamo umosi haivio ka vi kuete etondelo, 3 kuenda ocilumba colomema cosema ya fina ya tengiwa lulela, olonjongo vitatu vionepa yekũi yo efa kongombe kuenda olonjongo vivali vionepa yekũi kocitupi locitupi comeme, 4 lonjongo yimosi yonepa yekũi komeme lomeme, pokati kolomeme epanduvali, 5 kuenda vu lumbavo ohombo yimosi ndocilumba cekandu coku tuvika akandu ene. 6 Eci oco ci vokiyiwa kocilumba coku pia elisi vu ka linga osãi losãi, kocilumba colomema+ kuenda kocilumba coku pia elisi, locilumba colomema+ kumue locilumba coku nyua,+ ndomo ca kisikiwa kokuavo vocihandeleko, ndocilumba cimue ci yokiwa vondalu ceca elemba liwa ku Yehova.

7 “‘Eteke liekũi liosãi yaco yepanduvali, li linga eteke li kola lioku liongolola+ kuenda vu likandangiya oku lia.* Ka citava oku linga upange laumue keteke liaco.+ 8 Vu lumba ocilumba coku pia elisi ku Yehova, ceca elemba liwa okuti, ongombe yimosi, ocitupi cimosi comeme kuenda olomeme epanduvali vi kuete unyamo umosi okuti, ka vi kuete etondelo.+ 9 Ocilumba colomema cosema ya fina ya tengiwa lulela, olonjongo vitatu vionepa yekũi kongombe kuenda olonjongo vivali vionepa yekũi kocitupi comeme, 10 lonjongo yimosi yonepa yekũi kocitupi locitupi cokameme pokati kovitupi epanduvali viotulomeme, 11 vu lumbavo ohombo yimosi ndocilumba cekandu, weci ovilumba viaco okuti, ka weci lika ocilumba cekandu oco ci tuvike akandu+ kuenda ocilumba coku pia elisi ceciwe olonjanja viosi kumue locilumba colomema kuenda ovilumba viavo vioku nyua.

12 “‘Eteke 15 liosãi yaco yepanduvali, li linge eteke liohongele yi kola. Ka citava oku linga upange laumue keteke liaco kuenda vu sukila oku sambiliya ocipito ca Yehova vokuenda kuoloneke epanduvali.+ 13 Weci ocilumba coku pia elisi,+ locilumba cimue ci yokiwa vondalu ceca elemba liwa ku Yehova okuti, 13 kolonãle, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 14 Ocilumba colomema cosema ya fina ya tengiwa lulela, kolongombe 13, olonjongo vitatu vionepa yekũi kongombe longombe kuenda olonjongo vivali vionepa yekũi kovitupi 2 violomeme, kocitupi locitupi, 15 lonjongo yimosi yonepa yekũi kocitupi locitupi cokameme pokati 14 kovitupi viotulomeme, 16 vu lumbavo ohombo yimosi yocilumba cekandu okuti, ceciwa olonjanja viosi kumue locilumba coku pia elisi, locilumba colomema kuenda ocilumba coku nyua.+

17 “‘Keteke liavali, ku eciwe olonãle 12, ovitupi 2 violomeme kuenda 14 kovitupi viotulomeme tu kuete unyamo umosi, haivio ka vi kuete etondelo.+ 18 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 19 vu lumbavo ohombo yimosi yocilumba cekandu, ceciwa olonjanja viosi kumue locilumba coku pia elisi, locilumba colomema kuenda ocilumba cavo coku nyua.+

20 “‘Keteke liatatu, ku lumbiwe 11 kolongombe, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 21 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 22 vu lumbavo ohombo yimosi ndocilumba cekandu, ceciwa olonjanja viosi kumue locilumba coku pia elisi, locilumba colomema kuenda ocilumba coku nyua.+

23 “‘Keteke liakuãla, ku lumbiwe 10 kolongombe, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 24 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 25 vu lumbavo ohombo yimosi yocilumba cekandu, ceciwa olonjanja viosi kumue locilumba coku pia elisi, locilumba colomema kuenda ocilumba coku nyua.+

26 “‘Keteke liatãlo, ku lumbiwe 9 kolongombe, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 27 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 28 vu lumbavo ohombo yimosi ndocilumba cekandu, ceciwa olonjanja viosi kumue locilumba coku pia elisi, locilumba colomema kuenda ocilumba coku nyua.+

29 “‘Keteke liatãlo, ku lumbiwe 8 kolongombe, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 30 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 31 vu lumbavo ohombo yimosi yocilumba cekandu, ceciwa olonjanja viosi kumue locilumba coku pia elisi, locilumba colomema kuenda ovilumba vioku nyua.+

32 “‘Keteke liatãlo, ku lumbiwe 7 kolongombe, ovitupi 2 violomeme kuenda 14 kovitupi viotulomeme vi kuete unyamo umosi, haivio ka vi kuete etondelo.+ 33 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 34 vu lumbavo ohombo yimosi yocilumba cekandu, ceciwa olonjanja viosi kumue locilumba coku pia elisi, locilumba colomema kuenda ocilumba coku nyua.+

35 “‘Keteke liecelãla, vu sukila oku linga ohongele yilikasi. Ka citava oku linga upange laumue.+ 36 Vu lumba ocilumba coku pia elisi okuti, ocilumba cimue ci yokiwa vondalu ceca elemba liwa ku Yehova okuti, ongombe yimosi, ocitupi cimosi comeme kuenda epanduvali kovitupi viotulomeme okuti, vi kuete unyamo umosi, haivio ka vi kuete etondelo.+ 37 Ene vu lumba ocilumba colomema, ovilumba vioku nyua kumosi lolongombe, ovitupi violomeme kuenda ovitupi viotulomeme ndomo ci likuata letendelo liavo lia kisikiwa vocihandeleko, 38 vu lumbavo ocitupi cimosi cohombo ndocilumba cekandu, ceciwa olonjanja viosi kumue locilumba coku pia elisi, locilumba colomema kuenda ovilumba viavo vioku nyua.+

39 “‘Evi ovio ovilumba vu sukila oku eca ku Yehova poku linga ovipito viene,+ ovilumba viene viohuminyo+ lovilumba vi eciwa lutima wosi,+ ovilumba vioku pia elisi+ kuenda ovilumba viene violomema+ kumue lovilumba viene vioku nyua+ kuenda ovilumba viombembua.’”+ 40 Mose wa sapuila va Isareli ovina viosi Yehova o handelekele.

30 Noke Mose wa sapuila asongui+ vovikoti via va Isareli hati: “Ca handeleka Yehova ceci: 2 Nda ulume umue o linga ohuminyo yimue+ ku Yehova, ale o lisinga+ oku likandangiya oku linga ocina cimue, ka ka tokoke kondaka yaye.+ A tẽlise ovina viosi a likuminya oku linga.+

3 “Nda ufeko o linga ohuminyo yimue ku Yehova, ale o lisinga oku likandangiya oku linga ocina cimue osimbu a kasi umalẽhe kuenda o kasi konjo ya isiaye, 4 kuenje isiaye wa yeva ohuminyo yaye, ale oku lisinga kuaye poku likandangiya oku linga ocina cimue kuenje isiaye ko tateka, olohuminyo viaye viosi o vi tẽlisa kuenda oku lisinga kuaye koku likandangiya oku linga ocina cimue, ku tẽlisiwavo. 5 Pole, nda isiaye u patãla noke yoku yeva okuti, eye wa linga olohuminyo kuenda wa lisinga oku likandangiya oku linga ocina cimue, olohuminyo viaco ka vi tẽlisiwa. Yehova u wecela, momo isiaye wo patãla.+

6 “Nda ufeko waco o kuela osimbu ka tẽlisile ohuminyo yaye, ale o linga ohuminyo yimue vutima waye lonjanga, 7 kuenje ulume waye o ci yeva, pole, ko tateka keteke a ci yeva, olohuminyo ale oku lisinga kuaye poku likandangiya oku linga ocina cimue, vi ka tẽlisiwa. 8 Pole, nda ulume waye u patãla keteke a ci yeva, ukãi ka sukila oku tẽlisa ohuminyo yaye, ale olohuminyo a linga vutima waye lonjanga+ kuenje Yehova u wecela.

9 “Puãi nda ocimbumba cimue, ale ukãi wa nyãliwa o linga ohuminyo yimue vutima waye, ovina viosi eye a likuminya, a vi tẽlise.

10 “Nda eye o linga ohuminyo, ale o lisinga oku likandangiya oku linga ocina cimue osimbu a kasi vonjo yulume waye, 11 kuenje ulume waye o ci yeva, pole, ko tateka, olohuminyo viosi a linga, ale oku lisinga kuaye oku likandangiya oku linga ocina cimue, vi tẽlisiwa. 12 Pole, eteke ulume waye a yeva ohuminyo yaye, ale ohuminyo a linga yoku likandangiya oku linga ocina cimue, nda eye wa vi imũla, ukãi ka sukila oku vi tẽlisa.+ Ulume waye wa vi imũla kuenje Yehova u wecela. 13 Ulume waye o pondola oku tava, ale oku imũla ohuminyo yaco, ale oku lisinga kuosi mua kongela ohuminyo yimue yoku likandangiya oku linga ocina cimue. 14 Pole, nda ulume waye eteke leteke ko patãla, ci lekisa okuti, eye wa tava olohuminyo viaye viosi kuenda oku likandangiya kuaye koku linga ocina cimue. Eye wa vi tava, momo ka vi patãlele eteke a vi yeva. 15 Pole, noke yoku pita otembo yimue tunde eci a vi yeva, nda eye wa vi imũla, o pisiwa omo lieko liukãi waye.+

16 “Evi ovio olonumbi Yehova a handelekele Mose viatiamẽla kulume lukãi waye kuenda ku isia lomõlaye ufeko o kasi konjo yaye.”

31 Yehova wa sapuila Mose hati: 2 “Fetuluinya+ va Midiane, va fetuluinyila omo liovina va lingila va Isareli.+ Noke liovina viaco, o ka kongeliwa komanu vove.”*+

3 Omo liaco, Mose wa sapuila omanu hati: “Malẽhi alume pokati kene oco va ka liyake* la va Midiane okuti, vu tẽlisi efetuluinyo lia Yehova ku va Midiane. 4 Kocikoti locikoti okuti, kovikoti viosi via va Isareli ku tunde 1.000 komanu va enda kuyaki.” 5 Kolohulukãi via va Isareli+ okuti, kocikoti locikoti kua pongiyiwa 1.000 komanu, olohoka via vana va limalẽhela oku yaka* okuti, vo cosi va tẽla 12.000.

6 Kuenje Mose wa tuma kuyaki ci soka 1.000 komanu va nõliwa kocikoti locikoti, kumue la Finehase+ omõla a Eleasa ocitunda, una wa kala usongui wolohoka, haeye wa kuata peka liaye ovikuata vi kola kuenda alumbeta+ oku eca ondimbukiso. 7 Ovo va liyaka la va Midiane ndomo Yehova a handelekele Mose kuenje va ponda alume vosi. 8 Pokati kalume va pondiwa mua kongelele olosoma vio ko Midiane okuti, soma Ewi, Rekeme, Curu, Huru kuenda Reva okuti, olosoma vitãlo vio ko Midiane. Va pondavo losipata Baliame+ omõla a Beore. 9 Pole, va Isareli vambata akãi lomãla va va Midiane ndolomandekua. Va pundavo ovinyama viavo viosi viovimbo, loviunda viavo viosi kuenda ovokuasi avo. 10 Va timĩha londalu ovaimbo avo osi lovilombo viavo muna va tungile. 11 Vambata ovina viosi va punda, ci kale omanu ale ovinyama. 12 Noke ovo va nena olomandekua kumue lovina via pundiwa, va vi eca ku Mose locitunda Eleasa kuenda kowiñi wosi wa va Isareli wa kala vocilombo vanyãla o vekalasoko lio Moavi,+ ocipepi lo Yordão ko Yeriko.

13 Noke Mose kuenda ocitunda Eleasa kumue lasongui vosi vowiñi, va enda oku ka lisanga lavo kosamua yocilombo. 14 Pole, Mose wa temẽla vakesongo kolohoka, lasongui volohulukãi kuenda asongui vocita, vana va endele kuyaki. 15 Mose wa va pula hati: “Ene ka wa pondeli akãi vosi? 16 Akãi ava, ovo vana va tava kongombo ya Baliame yoku yapuisa va Isareli oco va lueyele+ Yehova ko Peore+ kuenje efengi lia wila owiñi wosi wa Yehova.+ 17 Kaliye pondi omãla vosi valume kuenda akãi vosi okuti, va lipekelele ale lulume. 18 Pole, ko ka pondi omãla vosi vafeko vana okuti, ka va la lipekela lulume.+ 19 Vu sukila oku kala kosamua yocilombo oloneke epanduvali. Wosi wa ponda omunu umue kuenda wosi wa lamba kocivimbi comunu umue,+ o sukila oku liyelisa+ keteke liatatu lo keteke liepanduvali okuti, ene kumue lolomandekua viene. 20 Vu sukila oku yelisa uwalo wosi, lovikuata viosi viocipa, lovina viosi via pangiwa lovonya olohombo kuenda ovikuata viosi vioviti.”

21 Noke ocitunda Eleasa wa sapuila asualali va endele kuyaki hati: “Ociholo cocihandeleko Yehova a sapuila Mose ceci: 22 ‘Ulu, opalata, osipi, utale, o estanyu* kuenda osumbu, 23 lovina viosi okuti eci vi pita vondalu ka vi nyõleha, vu sukila oku vi yelisa poku vi pitisa vondalu. Vu sukilavo oku vi yelisa lovava oku yelisa evĩho.+ Ovina viosi okuti ka vi piti vondalu, vu vi yelisa lovava. 24 Keteke liepanduvali, vu sukila oku sukula uwalo wene loku yela noke citava oku iñila vocilombo.’”+

25 Kuenje Yehova wa sapuila Mose hati: 26 “Tenda ovina wa pundi kuenda olomandekua, ci kale omanu ale ovinyama; ci linga locitunda Eleasa kuenda asongui vonjo lonjo yowiñi. 27 Tepisa ovina via pundiwa volonepa vivali okuti, onepa yimue yeciwe kasualali vana va endele kuyaki, onepa yikuavo kowiñi wosi.+ 28 Pokati kasualali va endele kuyaki, apa pali 500 komanu, upapo umosi oco ece ndelisimu ku Yehova ci kale omanu, olongombe, ovimbulu ale olomeme. 29 Vu tambula kokuavo onepa yimue kuenje vu yeca kocitunda Eleasa oco yi linge ombanjaile ya Yehova.+ 30 Konepa ya eciwa ku va Isareli apa pali 50, upiko yimosi, ci kaile omanu, olongombe, ovimbulu, olomeme, ovinyama viosi viovimbo kuenje vu vi eca ku va Lewi,+ vana va linga ovopange a tiamẽla kotavernakulu ya Yehova.”+

31 Kuenje Mose kumue locitunda Eleasa, va linga ndomo Yehova a handelekele Mose. 32 Ovina via supapo via pundiwa lomanu va endele kuyaki, via tẽla 675.000 kolomeme, 33 kuenda 72.000 kolongombe, 34 ovimbulu 61.000. 35 Akãi vana okuti, ka va lipekelele lulume,+ va tẽla 32.000. 36 Onepa ya eciwa ku vana va endele kuyaki, ya tẽla 337.500 kolomeme. 37 Elisimu lia eciwa ku Yehova lia tẽla 675 kolomeme. 38 Kua kala 36.000 kolongombe kuenda elisimu lia eciwa ku Yehova lia tẽla 72. 39 Kua kala 30.500 kovimbulu kuenda elisimu lia eciwa ku Yehova lia tẽla 61. 40 Kua kala 16.000 komanu kuenda elisimu lia eciwa ku Yehova lia tẽla 32 komanu. 41 Noke Mose wa eca kocitunda Eleasa elisimu ndombanjaile ya Yehova,+ ndomo Yehova a handelekele Mose.

42 Onepa yimue ya tiamẽlele ku va Isareli okuti, oyo onepa Mose a tepelako vana va endele kuyaki, 43 ya tẽla 337.500 kolomeme, 44 olongombe via tẽla 36.000, 45 ovimbulu via tẽla 30.500, 46 omanu va tẽla 16.000. 47 Konepa ya eciwa ku va Isareli, apa pali 50 Mose wopako yimosi, ci kaile omanu, olongombe, ovimbulu, olomeme, ovinyama viosi viovimbo kuenje wa vi eca ku va Lewi,+ vana va enda oku linga upange wotavernakulu+ ya Yehova ndomo Yehova a handelekele Mose.

48 Kuenje vakesongo kolohoka okuti, ohulukãi yolohoka,+ asongui vohulukãi kuenda asongui vocita, veya toke ku Mose, 49 loku sapuila Mose vati: “Akuenje vove va tenda asualali va kasi oku songuiwa letu kuenda va tu sapuila okuti, lomue wa kambapo.+ 50 Omo liaco, omunu lomunu pokati ketu a ece ku Yehova ndombanjaile ovina a kuete ndeci ovikuata viulu, alienge o kovolu, ovinunga, olonẽla viondimbukiso, ovimbilingu, lovingẽlengẽle kuenda ovina vikuavo viulu oco tu tuvike akandu etu kovaso a Yehova.”

51 Kuenje Mose kumue locitunda Eleasa va tava oku tambula ulu wavo kuenda ovina vikuavo viulu. 52 Ulu wosi asongui volohulukãi lasongui vocita va eca ndombanjaile ku Yehova, wa tẽla 16.750 kolosiekele.* 53 Alume vosi va endele kuyaki va tambula onepa yimue yovina via pundiwa. 54 Mose kumue locitunda Eleasa, va tava oku tambula ulu wasongui volohulukãi kuenda wasongui vocita kuenje va u nena vombalaka yohongele oco u kaile ndonjivaluko ku va Isareli kovaso a Yehova.

32 Omãla va Ruvene+ lomãla va Gadi+ va kuata oviunda vialua kuenje va limbuka okuti, ofeka yo Yasere+ lofeka yo Gileada via kala ovitumãlo viwa vioku lisila oviunda. 2 Noke omãla va Gadi lomãla va Ruvene va enda ku Mose lo kocitunda Eleasa kuenda kasongui vosi vowiñi loku popia vati: 3 “O Ataroti, o Divone, o Yasere, o Nimira, o Hesibone,+ o Eleale, o Sevima, o Nevo+ kuenda o Beone,+ 4 okuti ofeka Yehova a yula kovaso yowiñi wa va Isareli,+ ofeka yimue yiwa yoku fukila ovinyama kuenda akuenje vove va kuete ovinyama vialua.”+ 5 Ovo vamisako vati: “Nda tua sanga ohenda kovaso ove, ecelela okuti, ofeka yaco, yi linga ocipiñalo, cakuenje vove. Ku ka ecelele okuti, tu yoka o Yordão.”

6 Noke Mose wa pula omãla va Gadi kuenda omãla va Ruvene hati: “Anga hẽ vamanjene va enda kuyaki osimbu ene vu kali kulo? 7 Momo lie vu konyuisila va Isareli oco ka va ka yokele vofeka Yehova a ka eca kokuavo? 8 Eci oco va isiene va linga eci nda va tuma ko Kadesi-Barnea oku ka kũlĩhĩsa ofeka.+ 9 Eci ovo va endele Kocimbota* co Esikole+ kuenje va mola ofeka, va konyuisa va Isareli oku iñila vofeka Yehova a laikele oku va ĩha.+ 10 Keteke liaco, onyeño ya Yehova ya wenguka kuenje wa lisinga hati:+ 11 ‘Alume vosi va tunda Kegito okuti va kuete 20 kanyamo lava va pitahãlamo, ka va ka mola ofeka+ nda likuminya ku Avirahama, ku Isake kuenda ku Yakoba,+ momo ka va pokuile kolonumbi viange lutima wosi, 12 te lika Kalembe+ omõla a Yefune u Kenisi kuenda Yehosua+ omõla a Nune ovo lika va ka iñila, momo va pokola kolonumbi via Yehova lutima wosi.’+ 13 Omo liaco, onyeño ya Yehova ya wengukila va Isareli kuenje eye wa ecelela okuti, va tungayala vekalasoko vokuenda kueci ci soka 40 kanyamo,+ toke eci ocitumbulukila cosi ca kala oku linga evĩho kovaso a Yehova ca sulila.+ 14 Kaliye ene wa lingi ekandu poku linga ovina vimuamue ndeci va isiene va linga, oco vu vokiyi onyeño ya Yehova ku va Isareli. 15 Nda vu konyõha koku u kuama, eye o yanduluka vali omanu ava vekalasoko kuenje vu neni enyõleho kokuavo.”

16 Noke ovo va amela kokuaye loku popia vati: “Linga tu tungile kulo ovimanga viovawe* vioviunda vietu kuenda alupale vomãla vetu. 17 Pole, tu amamako oku lipongiyila uyaki+ loku enda kovaso ya va Isareli, toke eci tu va tuala valupale avo, osimbu omãla vetu va ka kala valupale a kuete oviteyuilo, loku kolapo pokati kolonungi viofeka. 18 Ka tu tiukila kolonjo vietu, toke eci omunu lomunu pokati ka va Isareli a ka tambula osi yaye ndocipiñalo.+ 19 Ka tu ka tambula ocipiñalo kumue lavo konele yikuavo yo Yordão, momo tua tambula lika ocipiñalo konele yutundilo yo Yordão.”+

20 Mose wa va tambulula hati: “Nda vu linga ndoco okuti, vu limalẽha kovaso a Yehova;+ 21 kuenda nda omunu lomunu pokati kene o limalẽha loku yoka o Yordão kovaso a Yehova osimbu a tundisa ovanyãli vaye kovaso aye,+ 22 toke eci ofeka yi yuliwa kovaso a Yehova,+ noke citava oku tiukila+ kuenda ka vu kuata eko kosavo a Yehova lo kovaso a va Isareli. Kuenje ofeka eyi yi linga ocipiñalo cene kovaso a Yehova.+ 23 Pole, nda ka vu ci lingi, vu ka lueyela Yehova. Kuenje limbuki okuti, ekandu liene liu wili. 24 Omo liaco, tungili omãla vene alupale kuenda ovimanga vioviunda viene,+ pole lingi ovina wa likuminyi.”

25 Omãla va Gadi lomãla va Ruvene va sapuila Mose vati: “Etu tuakuenje vove, tu ka linga ndomo ñala yetu a kasi oku handeleka. 26 Omãla vetu, akãi vetu loviunda vietu kumue lovinyama vietu viosi viovimbo vi ka kala valupale o Gileada,+ 27 pole, etu tuakuenje vove tu yoka o Yordão, lalume vosi va limalẽhela uyaki kovaso a Yehova+ ndomo ñala yetu a kasi oku popia.”

28 Mose wa eca ocihandeleko catiamẽla kokuavo kocitunda Eleasa kuenda ku Yehosua omõla a Nune kuenje wa ci lomboluilavo kasongui vapata a va Isareli. 29 Mose wa va sapuila hati: “Nda omãla va Gadi lomãla va Ruvene va yoka o Yordão kumue lene, alume vosi va limalẽhela uyaki kovaso a Yehova kuenda nda wa yuli ofeka, vu ka eca kokuavo ofeka yo Gileada ndocipiñalo.+ 30 Pole, nda ka va limalẽhele kuenda va yokela kumue lene o Yordão, ovo va ka kala lene vofeka yo Kanana.”

31 Omãla va Gadi lomãla va Ruvene va tambulula vati: “Cosi Yehova a sapuila akuenje vove oco tu linga. 32 Tu limalẽha loku yoka o Yordão kovaso a Yehova oco tu iñile vofeka yo Kanana,+ pole, onepa yocipiñalo cetu yi kala konele yilo yo Yordão.” 33 Mose wa eca komãla va Gadi, lomãla va Ruvene+ kuenda konepa yimue yepata lia Manase,+ omõla a Yosefe uviali wa Sihoni+ soma ya va Amori kuenda uviali wa Oge+ soma ya va Basiane okuti, ofeka ya tiamẽla kalupale ovaimbo aco kuenda kalupale osi a ñualako.

34 Kuenje omãla va Gadi va tunga* o Divone,+ o Ataroti,+ o Aroere+ 35 o Ataroti-Siofane, o Yasere,+ o Yogibeha,+ 36 o Bete-Nimira,+ lo Bete-Harana+ okuti, alupale a kuete oviteyuilo kuenda va tungavo ovimanga vioviunda viavo. 37 Kuenje omãla va Ruvene va tunga o Hesibone,+ o Eleale,+ o Kiriyatayi,+ 38 o Nevo,+ lo Baale-Meone+ okuti olonduko viaco via pongoluiwa, va tungavo o Sivima; kuenje va luka olonduko vikuavo alupale va tumbulula.

39 Omãla va Makiri,+ omõla a Manase, va enda toke ko Gileada kuenda va yi tambula loku tundisa va Amori va kalamo. 40 Noke Mose wa eca o Gileada ku Makiri omõla a Manase kuenje eye wa tungamo.+ 41 Yairi omõla a Manase wa enda kovaimbo ovilombo avo loku a tambula kuenje wa tukula ovaimbo aco hati, Hawote-Yairi.*+ 42 Kuenje Nova wa enda, yu wa tambula Kenata lovaimbo aco a sungueko kuenje wa a tukula hati: Nova okuti, onduko yaye muẽle.

33 A-a o-o atulo ovongende va Isareli va linga eci va tunda kofeka Yegito+ lolohoka*+ viavo okuti, va songuiwa la Mose kuenda Arone.+ 2 Mose wa soneha oku votoka kuavo kovitumãlo poku linga ungende wavo ndomo Yehova a handelekele kuenje va tunda kocitumãlo cimue oku enda kocitumãlo cikuavo ndeci:+ 3 Ovo va tunda ko Ramesese+ kosãi yatete keteke 15 liosãi yaco.+ Keteke lia kuamamo noke lio Paskoa,+ va Isareli va tunda lutõi* kovaso a va Egito. 4 Va Egito va kala oku kenda olonuñulu viosi vina Yehova a ponda pokati kavo,+ momo Yehova wa nena esombiso kolosuku viavo.+

5 Va Isareli va tunda ko Ramesese kuenda va tungila ovilombo vo Sukote.+ 6 Oku tunda ko Sukote va tungila ovilombo vo Etami okuti,+ yi kasi konele yekalasoko. 7 Noke va tunda ko Etami, yu va tiukila ko Pihahirote ya imba ovaso ko Baale-Cifone+ kuenje va tungila ovilombo vo Migidolo.+ 8 Eci va tunda ko Pihahirote va pita vokati kokalunga,+ yu va pitĩla vekalasoko,+ noke va linga ungende woloneke vitatu vekalasoko lio Etami+ kuenje va tungila ovilombo vo Mara.+

9 Noke va tunda ko Mara va pitĩla vo Elimi. Ko Elimi kua kala 12 kolono viovava kuenda 70 koviti vieva kuenje omo va tungila ovilombo.+ 10 Va tunda ko Elimi kuenje va tunga ovilombo ocipepi Lokalunga Kakusuka. 11 Noke va tunda Kokalunga Kakusuka kuenje va tungila ovilombo vekalasoko lio Sine.+ 12 Oku tunda vekalasoko lio Sine, va tungila ovilombo vo Dofika. 13 Noke va tunda ko Dofika kuenje va tungila ovilombo vo Alusi. 14 Va tunda ko Alusi kuenje va tungila ovilombo vo Refidimi+ okuti, ka mua kaile ovava oco omanu va nyue. 15 Noke va tunda ko Refidimi kuenje va tungila ovilombo vekalasoko lio Sinai.+

16 Eci va tunda vekalasoko lio Sinai kuenje va tungila ovilombo vo Kiviroti-Hataawa.+ 17 Noke va tunda ko Kiviroti-Hataawa kuenje va tungila ovilombo vo Haceroti.+ 18 Oku tunda ko Haceroti, va tungila ovilombo vo Ritima. 19 Va tunda ko Ritima kuenje va tungila ovilombo vo Rimone-Parese. 20 Oku tunda ko Rimone-Parese, va tungila ovilombo vo Livina. 21 Va tunda ko Livina, va tungila ovilombo vo Risa. 22 Noke va tunda ko Risa kuenje va tungila ovilombo vo Kehelata. 23 Va tunda ko Kehelata, va tungila ovilombo Komunda Sefere.

24 Oku tunda Komunda Sefere, va tungila ovilombo vo Harada. 25 Noke va tunda ko Harada kuenje va tungila ovilombo vo Makihelote. 26 Eci va tunda+ ko Makihelote, va tungila ovilombo vo Tahate. 27 Oku tunda ko Tahate, va tungila ovilombo vo Terahi. 28 Noke va tunda ko Terahi kuenje va tungila ovilombo vo Mitika. 29 Va tunda ko Mitika kuenje va tungila ovilombo vo Hasimona. 30 Noke va tunda ko Hasimona kuenje va tungila ovilombo vo Moserote. 31 Oku tunda ko Moserote, va tungila ovilombo vo Bene-Yakana.+ 32 Eci va tunda ko Bene-Yakana kuenje va tungila ovilombo vo Horo-Hagidigadi. 33 Oku tunda ko Horo-Hagidigadi, va tungila ovilombo vo Yotivata.+ 34 Noke va tunda ko Yotivata kuenje va tungila ovilombo vo Avirona. 35 Oku tunda ko Avirona, va tungila ovilombo vo Eciongevere.+ 36 Noke va tunda ko Eciongevere kuenje va tungila ovilombo vekalasoko lio Sini+ okuti, vo Kadesi.

37 Eci va tunda ko Kadesi, va tungila ovilombo Komunda Horo,+ kongave yofeka yo Edome. 38 Noke yoku pita 40 kanyamo tunde eci va Isareli va tunda kofeka Yegito, kosãi yatãlo, keteke liatete liosãi yaco, Yehova wa handeleka ocitunda Arone oku lamanela Komunda Horo kuna a fila.+ 39 Arone wa kuata 123 kanyamo eci a fa Komunda Horo.

40 Kotembo yaco soma yo Arade,+ u Kanana, una wa tungile vo Negeve kofeka yo Kanana, wa yeva okuti, va Isareli va kala oku iya.

41 Eci va tunda Komunda Horo,+ va tungila ovilombo vo Salimona. 42 Oku tunda ko Salimona, va tungila ovilombo vo Punono. 43 Noke va tunda ko Punono kuenje va tungila ovilombo vo Ovote.+ 44 Va tunda ko Ovote kuenje va tungila ovilombo vo Iye-Havarime, kongave yo Moavi.+ 45 Oku tunda ko Iyimi,* va tungila ovilombo vo Divone-Gadi.+ 46 Noke va tunda ko Divone-Gadi kuenje va tungila ovilombo vo Alimone-Divilatayima. 47 Oku tunda ko Alimone-Divilatayima, va tungila ovilombo kolomunda vio ko Avarime+ vina via imba ovaso ko Nevo.+ 48 Oku sulako va tunda kolomunda vio ko Avarime kuenje va tungila ovilombo vanyãla o vekalasoko lio Moavi konele yo Yordão ocipepi lo Yeriko.+ 49 Vamamako oku kala ko Yordão, oku upisa ko Bete-Yesimoti toke ko Abele-Sitimi+ vanyãla o vekalasoko lio Moavi.

50 Yehova wa vangula la Mose vanyãla o vekalasoko lio Moavi ko Yordão ocipepi lo Yeriko hati: 51 “Sapuila va Isareli okuti: ‘Vu yoka o Yordão loku iñila vofeka yo Kanana.+ 52 Tundisi olonungi viosi viofeka yaco loku nyõla oviñumañuma viavo viovawe,+ levi viutale+ kuenje vu nyõla ovitumãlo viavo vi kola.+ 53 Kuenje vu ka piñala ofeka loku tungamo, momo ndu wĩhi ofeka yaco ndocipiñalo.+ 54 Wimba ocela oco vu tepisi ofeka+ ndocipiñalo pokati kapata ene. Kocimunga cinene vu vokiyako ocipiñalo cavo kuenda kocimunga citito vu tepululako ocipiñalo cavo.+ Ocipiñalo comunu lomunu ci kala apa pa kupukila ocela. Vu ka tambula onepa yene ndocipiñalo ndomo ci likuata lovikoti via va isiene.+

55 “‘Pole, nda ka wa tundisili olonungi viofeka yaco,+ vana va supapo va ka kala ndovinene vovaso ene kuenda ndolosongo katimba ene kuenje ovo va ko kangisi vofeka vu ka tungi.+ 56 Kuenje eci nda sokiya oku linga kokuavo ndu ci lingi ene.’”+

34 Yehova wa sapuila vali Mose hati: 2 “Eca olonumbi evi ku va Isareli viokuti: ‘Eci wiñili vofeka yo Kanana,+ oyo yi linga ocipiñalo cene okuti, ofeka yo Kanana ndomo ci likuata lolongave vialio.+

3 “‘Ongave yo kombuelo yupisila vekalasoko lio Sini konele yo Edome kuenda kombuelo ongave yene yutundilo yi fetikila konele Yokalunga Komongua.*+ 4 Ongave yene yi pongoloka oco yi pite kombuelo yowulu wo Akirabi+ kuenda yamako toke vo Sini kuenje yi sulila kombuelo yo Kadesi-Barnea.+ Noke yenda ko Hacara-Adare+ kuenda yamako toke ko Asimone. 5 Ongave yaco yi pongolokela ko Asimone toke Kekango* lio Kegito kuenje yi sulila Vokalunga.*+

6 “‘Ongave yene yo kutakelo yenda toke Vokalunga Kanene* kuenda kohulo yaco. Eyi oyo ongave yene yutakelo.+

7 “‘Ongave yene yo konano yi kala ndomo: Oku upisa Kokalunga Kanene vupa oloseteko kongave yene toke Komunda Horo. 8 Oku upisa Komunda Horo vupa oloseteko kongave yene toke ko Lebo-Hamati*+ kuenda ongave yaco yi sulila ko Sedada.+ 9 Ongave yene yi tunda ko Sifirono kuenje yi sulila ko Hacare-Enana.+ Eyi oyo ongave yene yo konano.

10 “‘Vupa oloseteko kongave yene kutundilo oku upisila ko Hacare-Enana toke ko Sefama. 11 Ongave yaco yi tunda ko Sefama toke ko Rivila kutundilo wo Ayini kuenda ongave yaco yi pita kowulu Yokalunga ko Kinerote.*+ 12 Ongave yaco yi tunda vo Yordão kuenda yi sulila Vokalunga Komongua.+ Eyi oyo yi linga ofeka yene+ kuenda olongave via ñualako.’”

13 Kuenje Mose wa sapuila va Isareli hati: “Eyi oyo ofeka vu ka tambula locela ndocipiñalo cene,+ ndomo Yehova a handelekele oku eca kovikoti ecea lomeyu. 14 Ocikoti ca va Ruvene okuti onjo lonjo, locikoti ca va Gadi onjo lonjo kuenda onepa yimue yocikoti ya va Manase lia tambula ale ocipiñalo cavo.+ 15 Ovikoti vivali lomeyu via tambuile ale ocipiñalo cavio kutundilo wofeka yo Yordão ocipepi lo Yeriko konele ya imba ovaso kutundilo wekumbi.”+

16 Yehova wa sapuila vali Mose hati: 17 “Olonduko vialume va ka tepisa ofeka yi ka piñaliwa vievi: Ocitunda Eleasa+ kuenda Yehosua+ omõla a Nune. 18 Kuenje vu nõla usongui umue kocikoti locikoti oco a tepise ofeka ndocipiñalo cene.+ 19 Olonduko vialume vaco vievi: Kocikoti ca Yuda,+ Kalembe+ omõla a Yefune; 20 kocikoti comãla va Simeone,+ Semuele omõla a Amihudu; 21 kocikoti ca Benjamini,+ Elidada omõla a Kisilono; 22 kocikoti comãla va Dani,+ usongui waco Buki omõla a Yogili; 23 komãla va Yosefe+ okuti va tunda kocikoti ca Manase,+ usongui waco Haniyele omõla a Efode; 24 kocikoti comãla va Efarimi,+ usongui waco Kemuele omõla a Sifitana; 25 kocikoti comãla va Sevulono,+ usongui waco Elicafana omõla a Parinake; 26 kocikoti comãla va Isakare,+ usongui waco Palitiyele omõla a Asana; 27 kocikoti comãla va Asiyere,+ usongui waco Ahihude omõla a Selomi; 28 kocikoti comãla va Nafitali,+ usongui waco Pedahele omõla a Amihudu.” 29 Ava ovo Yehova a handeleka oco va tepise ofeka loku eca ku va Isareli ofeka yo Kanana.+

35 Yehova wa sapuila Mose vanyãla o vekalasoko lio Moavi ko Yordão+ ocipepi lo Yeriko hati: 2 “Handeleka va Isareli oco kovipiñalo viavo va tepeleko va Lewi alupale okuti, va tungamo+ kuenda va ecevo ku va Lewi ovisenge via ñuala alupale oco va lisileko oviunda.+ 3 Ovo va ka tunga valupale aco kuenda vovisenge viaco omo va lisila ovinyama viavo viovimbo, lovinyama viavo viovusenge kuenda ovinyama vikuavo viosi. 4 Ovisenge vioku lisila oviunda valupale vu ka eca ku va Lewi vupa oseteko okuti vi kuata 1.000 kovikeya* oku upisa kocimbaka cosi ci ñuala olupale. 5 Kosamua yolupale konele yutakelo vupako oseteko yi soka 2.000 kovikeya, kombuelo 2.000 kovikeya, kutundilo 2.000 kovikeya, konano 2.000 kovikeya okuti, olupale lu kala vokati. Ovio vi kala ovisenge vioku lisila oviunda valupale avo.

6 “Alupale va soka 6 vu ka eca ku va Lewi, a ka linga alupale ocitililo,+ oco okuti, omunu umue o ponda ukuavo omo a tilila,+ oku kongelamo 42 kalupale akuavo. 7 Weci ku va Lewi 48 kalupale, kumue lovisenge viavo vioku lisila oviunda.+ 8 Alupale vu ka eca kokuavo, a ka tunda kocipiñalo ca va Isareli.+ Kocimunga cinene vu ka tambulako alupale alua kuenda kocimunga citito vu ka tambulako alupale atito.+ Ocimunga locimunga ci ka eca alupale ku va Lewi ndomo ci likuata locipiñalo va tambula.”

9 Yehova wamisako oku vangula la Mose hati: 10 “Sapuila va Isareli hati: ‘Vu kasi oku yoka o Yordão loku iñila vofeka yo Kanana.+ 11 Vu sukila oku nõla alupale a ku sungulukili oco a linge alupale ocitililo okuti, omunu wosi o ponda ukuavo okuti, ka ci lingile ocipango, omo a sukila oku tilila.+ 12 Alupale aco, a linga ndocitililo cimue kokuene omo liukuakufetuluinya osonde+ okuti, omunu una wa ponda ukuavo, ka pondiwa toke eci a talama kovaso yowiñi oco a sombisiwe.+ 13 Alupale epandu ocitililo vu ka sokiyi, a ka kuata ocimãho caco. 14 Vu ka eca alupale atatu konele yilo yo Yordão+ kuenda alupale atatu kofeka yo Kanana+ oco a linge alupale ocitililo. 15 Alupale aco epandu, a ka linga ocitililo ku va Isareli, kocingendeleyi,+ konungi yofeka pokati kavo kuenda komunu wosi o ponda ukuavo okuti, ka ci lingile ocipango, oco a tililemo.+

16 “‘Pole, nda eye wo veta locikuata cutale kuenje wa fa, omunu waco omondi. Omondi yi pondiwe muẽle.+ 17 Nda wo veta lewe okuti, ewe liaco li tẽla oku ponda omunu kuenje omunu waco wa fa, u wa imba ewe liaco, omondi. Omondi yi pondiwe muẽle. 18 Nda eye wo veta locikuata cuti okuti ocikuata caco ci tẽla oku ponda omunu kuenje omunu waco wa fa, u wa veta locikuata, omondi. Omondi yi pondiwe muẽle.

19 “‘Ukuakufetuluinya osonde eye muẽle o ponda omondi yaco. Eci a yi sanga, o yi ponda. 20 Nda omunu waco wa fa omo okuti eye wo leñula lonya, ale wo wimba ocina cimue locisimĩlo civĩ,*+ 21 ale wo veta leka liaye omo lionya kuenje wa fa, omunu wa veta ukuavo, o pondiwa muẽle. Eye omondi. Ukuakufetuluinya osonde eci o sanga, u ponda.

22 “‘Pole, nda ka ci lingile ocipango kuenda ko leñuile lonya, ale ko wimbile ocina cimue locisimĩlo civĩ,*+ 23 ale nda ko muĩle kuenje wo veta lewe, pamue ka kaile unyãli waye ale ka yonguile oku u linga cimue cĩvi kuenje omunu waco wa fa, 24 omanu vosi va sukila oku sombisa omunu wa veta ukuavo kuenda ukuakufetuluinya osonde, ndomo ci likuata lolonumbi via tukuiwa.+ 25 Omanu va popela omondi peka liukuakufetuluinya osonde kuenda vo tiuwiya volupale luaye luocitililo kuna eye a tililile kuenje o kalamo toke eci ocitunda cinene ca wavekiwa lulela u kola, ci fa.+

26 “‘Pole, nda omondi yi pitahãla ongave yolupale luocitililo muna ya tilila, 27 ukuakufetuluinya osonde nda wa yi sanga kosamua yongave yolupale luocitililo kuenje ukuakufetuluinya o ponda omondi yaco, eye ka kuata eko liosonde. 28 Momo omondi yi sukila oku kala volupale luocitililo toke eci ocitunda cinene ci fa. Pole, noke yoku fa kuocitunda cinene, omondi citava okuti, yi tiukila kofeka yalio.+ 29 Ovina evi vi kala ociholo cesombiso kovitumbulukila viene viosi, kuosi vu tungila.

30 “‘Wosi o ponda omunu umue, a pondiwevo ndomondi+ luvangi* wolombangi;+ pole, lomue o pondiwa luvangi wombangi yimosi lika. 31 Ka citava oku tambula ocisembi coku yovola omuenyo womondi yi sesamẽla oku fa, oyo te ya pondiwa muẽle.+ 32 Ka citava oku tambula ocisembi coku yovola omunu umue wa tilila volupale luocitililo, loku ecelela okuti, eye o tiukila vofeka yaye osimbu ocitunda cinene ka ca file.

33 “‘Ka citava oku vĩhisa ofeka wa tungi, momo osonde yi vĩhisa ofeka+ kuenda ka citava oku tuvika ekandu liosonde ya pesiwa vofeka, te lika osonde ya una wa yi pesela.+ 34 Ka citava oku vĩhisa ofeka wa tungi, muna ame nda tunga; momo ame ndi Yehova, nda tunga pokati komanu va Isareli.’”+

36 Asongui vapata vovitumbulukila via Gileada omõla a Makiri,+ omõla a Manase okuti, vakuepata liomãla va Yosefe veya kuenda va vangula la Mose kumue lasongui vapata a va Isareli. 2 Kuenje va popia vati: “Yehova wa handeleka ñala yange oku imba ocela+ loku eca ofeka ndocipiñalo ku va Isareli; kuenje ñala yange wa handelekiwa la Yehova oco a ece ocipiñalo ca manjetu Celofehada komãla vaye vakãi.+ 3 Nda ovo va kuela alume vepata likuavo lia va Isareli, ocipiñalo cakãi vaco, cupiwa kocipiñalo ca va isietu kuenda ci vokiyiwa kocipiñalo cepata ovo va ka tiamẽla okuti, cupiwa konepa yetu yocipiñalo. 4 Eci Unyamo Weyovo+ u pitĩla ku va Isareli, ocipiñalo cakãi vaco, ci vokiyiwa kocipiñalo cepata ovo va ka tiamẽla oco okuti, ocipiñalo cavo cupiwa kocipiñalo cocikoti ca va isietu.”

5 Noke Mose wa sapuila va Isareli ndomo Yehova o handeleka hati: “Ovina ocikoti comãla va Yosefe va popia, via sunguluka. 6 Ondaka Yehova a handeleka yatiamẽla komãla vakãi va Celofehada yeyi hati: ‘Ovo citava okuti va likuela lomunu va yongola. Pole, ovo va pondola oku likuela lika lomunu umue okuti, ukuacikoti ca isiavo. 7 Lacimue ocipiñalo ca va Isareli ceciwa kocikoti cikuavo, momo va Isareli ovo lika va sukila oku kakatela kocipiñalo ca vakukululu yavo. 8 Omõla wosi ukãi o kuete onepa yocipiñalo cimue pokati kocikoti ca va Isareli, o sukila oku likuela lika lulume ukuacikoti ca isiaye+ oco va Isareli vamameko oku kala locipiñalo ca vakukululu yavo. 9 Lacimue ocipiñalo ca va Isareli ceciwa kocikoti cikuavo, momo ovikoti via va Isareli ovio lika via sukilile oku kakatela kocipiñalo cavo.’”

10 Omãla vakãi va Celofehada va linga ndomo Yehova a handelekele Mose.+ 11 Omo liaco, Mahala, la Tirisa, la Hogila, la Milika kuenda Noha okuti, omãla va Celofehada,+ va likuela lomãla va vamanji ya isiavo. 12 Ovo va likuela lalume vakuepata lia Manase omõla a Yosefe oco okuti, ocipiñalo cavo camamako vocikoti ca va isiavo.

13 Evi ovio ovihandeleko kuenda olonumbi Yehova a ecele ku va Isareli pocakati ca Mose vanyãla o vekalasoko lio Moavi ko Yordão ocipepi lo Yeriko.+