ESINUMUĨLO

1 Evi ovio olondaka Mose a sapuila o Isareli yosi kofeka yo Yordão vekalasoko, vanyãla o vekalasoko lia imba ovaso ko Sufi, pokati ko Parane, lo Tofele, lo Lavane, lo Haceroti kuenda lo Disahava. 2 Oku tunda ko Horeve toke ko Kadesi-Barnea+ poku pita vonjila Yomunda Seire, ungende waco wa lingiwa 11 koloneke. 3 Kunyamo 40,+ kosãi 11, keteke liatete liosãi, Mose wa sapuila va Isareli* ovina viosi Yehova o handelekele oku va sapuila. 4 Kotembo yaco, Mose wa yulile ale Sihoni+ soma ya va Amori, una wa tungile vo Hesibone kuenda Oge+ soma yo Basiane, una wa tungile vo Asitarote, vo Edirei.+ 5 Mose wa lombolola Ocihandeleko eci+ vimbo lio Yordão vofeka yo Moavi, poku popia hati:

6 “Yehova Suku yetu wa tu sapuila ko Horeve hati: ‘Wa kaili otembo yalua kovaimbo a-a a kasi kolomunda.+ 7 Tiukili, kuendi kovaimbo a kasi kolomunda via va Amori+ kuenda kovaimbo osi a lisungue lo Araba,+ kovaimbo a kasi kolomunda, vo Sefela, vo Negeve, kohulo yokalunga,+ vofeka ya va Kanana kuenda vo Levanone*+ oku lamanela kolui lunene okuti, olui Ferati.+ 8 Tala, nda kapa ofeka kovaso yene. Iñili, piñali ofeka yaco, yina Yehova a lisila oku eca ku va isiene okuti, Avirahama, la Isake+ kuenda Yakoba,+ lo kovitumbulukila* viavo vi kuamamo.’+

9 “Kuenje kotembo yaco, nda ku sapuili siti: ‘Si tẽla oku vu songuili lika wange.+ 10 Yehova Suku yene wo luisi kuenje etaili walui ndolombungululu vio kovailu.+ 11 Yehova Suku ya vakukululu yene, a vu luisi+ ohulukãi kolonjanja okuti ndeci vu kasi ale ci sule kuenje eye a vu sumũlũisi ndeci a likuminyile kokuene.+ 12 Ndi tẽla ndati oku ambata ovilemo viene loku tetulula ovitangi viene kuenda oku lisiõsiõla kuene?+ 13 Nõli alume va loñoloha, va kuete olondunge haivo va koleliwa pokati kovikoti viene kuenje ame ndi va ĩha ocikele coku kala asongui vene.’+ 14 Ene wa nambululi hati: ‘Ovina wa tu tuma oku linga via sunguluka.’ 15 Noke nda tikula asongui vovikoti viene okuti, alume va loñoloha haivo vakualondunge kuenje nda va nõla oco va linge asongui vene, ndeci asongui volohulukãi, asongui vocita, asongui vakũi atãlo, asongui vekũi kuenda asongui vakuavo va sulemo vovikoti viene.+

16 “Kotembo yaco, nda handeleka olonganji viene hati: ‘Eci vu yeva ocitangi cimue pokati ka vamanjene, ci tetululi lesunga+ pokati komunu umue la manjaye ale ocingendeleyi.+ 17 Ko ka lekisi ocame poku sombisa.+ Vu sukila oku yevelela omunu o sule ndeci vu yevelela omunu wa kemãla.+ Ko ka kuateli usumba omunu,+ momo esombiso lia tiamẽla ku Suku;+ nda ocitangi cimue ca tĩla kokuene, vu ci nena kokuange kuenje ame ndi ci yevelela.+ 18 Kotembo yaco, ndo handeleki ovina viosi vu sesamẽla oku linga.

19 “Noke tua tunda ko Horeve kuenje tua pita vekalasoko linene li koka usumba,+ lina wa moli vonjila yo kovaimbo a kasi kolomunda via va Amori,+ ndomo Yehova Suku yetu a tu handelekele kuenje tua pitĩla ko Kadesi-Barnea.+ 20 Ame ndo sapuili siti: ‘Ene wa pitĩli kovaimbo a kasi kolomunda via va Amori, ana Yehova Suku yetu a kasi oku eca kokuetu. 21 Tala, Yehova Suku yove wa eca kokuove ofeka. Kuende, piñala ofeka yaco ndomo Yehova Suku ya vakukululu yove a ku sapuila.+ Ku ka yokoke, ndaño oku kuata usumba.’

22 “Kuenje vosi yene wamẽli kokuange loku popia hati: ‘Tu tumi alume kovaso yetu oco va ka kũlĩhĩse ofeka okuti, va tu nenela esapulo lionjila tu sukila oku pita kuenda alupale tu ka sangako.’+ 23 Ocisimĩlo caco ca sungulukile kokuange kuenje nda nõla 12 kalume pokati kene okuti, kocikoti locikoti kua tunda ulume umosi.+ 24 Ovo va enda kovaimbo a kasi kolomunda+ kuenje va pitĩla Kocimbota* co Esikole, yu va kũlĩhĩsa ofeka. 25 Va yunga apako amue ofeka yaco loku tu a nenela kuenje va tu sapuila okuti, ‘Ofeka Yehova Suku yetu a tu ĩha, yiwa.’+ 26 Pole, ene ka wa taveli oku lamanẽlako, wa sinĩli ocihandeleko ca Yehova Suku yene.+ 27 Wa lisiõsuĩli volombalaka viene loku popia hati: ‘Momo Yehova wa tu suvuka oco a tu upila vofeka Yegito okuti, o tu eca povaka a va Amori oco va tu kundule. 28 Tu kasi oku enda kocitumãlo cipi? Vamanjetu va konyuisa ovitima vietu+ poku popia vati: ‘Omanu vaco vanene haivo va lepa calua okuti etu tu sule kuenda alupale avo anene, a kuete oviteyuilo via pitĩla kovailu*+ kuenje tua muilakovo omãla va Anaki.”’+

29 “Noke ame ndo sapuili siti: ‘Ko ka yokoki ale oku va kuatela usumba.+ 30 Yehova Suku yene u pitili kovaso, eye u yakeliko+ ndeci o lingili kovaso ene Kegito.+ 31 Vekalasoko, wa moli ndomo Yehova Suku yene o wambati ndeci ulume ambata omõlaye, kuosi wa endi toke eci wa pitĩli kocitumãlo cilo.’ 32 Pole, ndaño lovina evi viosi, ka wa koleleli Yehova Suku yene,+ 33 una wo pitili kovaso vonjila, oco a kũlĩhĩse ocitumãlo coku tungila ocilombo cene. Kuteke eye wa molẽhela vondalu kuenda kutanya wa molẽhela velende oco a lekise kokuene onjila vu sesamẽla oku endela.+

34 “Yehova wa yeva cosi wa popi kuenje wa tema loku lisinga+ hati: 35 ‘Lomue omunu pokati kocitumbulukila eci cĩvi o ka mola ofeka yiwa nda lisila la va isiene,+ 36 te lika Kalembe omõla a Yefune. Eye o ka yi mola kuenje ndi ka eca ofeka yaco kokuaye muna eye a endela kumue lomãla vaye, momo wa kuama olonumbi via Yehova lutima wosi.+ 37 (Onyeño ya Yehova ya ndi wengukilavo omo liene kuenje eye wa popia hati: “Lovevo ku iñila vofeka yaco.+ 38 Yehosua omõla a Nune, una o tãi kovaso yove,+ eye o ka iñila vofeka.+ U pamisa,*+ momo eye o ka songuila va Isareli oco va piñale ofeka.”) 39 Omãla vene vatito vana wa popeli hoti, va ka kuatiwa,+ lomãla vene okuti etaili ka va kũlĩhĩle eci ciwa leci cĩvi, ovo va ka iñilamo kuenje ngeca kokuavo ofeka oco yi linge ocipiñalo cavo.+ 40 Pole, ene tiukili, piti vekalasoko vonjila yenda Kokalunga Kakusuka.’+

41 “Kuenje ene wa ndi sapuili hati: ‘Tua lingila ekandu Yehova. Cilo, tu lamani loku yaka ndomo Yehova Suku yetu a tu handeleka!’ Kuenje omunu lomunu pokati kene wa tikula ovimalẽho viaye viuyaki kuenda wa simĩli okuti ci ka leluka oku lamanela komunda.+ 42 Pole, Yehova wa ndi sapuila hati: ‘Popia lavo hoti: “Ko ka lamani kuenda ko ka yaki, momo ame si ka kala lene.+ Nda wa ci lingi, vu ka yuliwa lovanyãli vene.”’ 43 Ame ndo ci sapuili, pole, ka wa pokuili. Wa sinĩli ocihandeleko ca Yehova poku lamanela lesino komunda. 44 Kuenje va Amori va tungila komunda yaco, veya oku li sanga lene kuenda vo landuli ndeci ci linga olonyihi kuenje vo sanduili tunde ko Seire toke ko Horima. 45 Noke wa tiukili kuenda wa fetiki oku lilila kovaso a Yehova, pole, Yehova ko yeveleli. 46 Eli olio esunga lieci wa kaleli otembo yalua vo Kadesi.

2 “Noke tua tiukila kuenda tua pita vekalasoko vonjila yenda Kokalunga Kakusuka, ndomo Yehova a ndi sapuilile+ kuenje tua linga ungende woloneke vialua oku ñuala ñuala Omunda Seire. 2 Yehova wa ndi sapuila hati: 3 ‘Vu kasi ale oku ñuala ñuala omunda eyi otembo yalua. Cilo kuendi konele yo konano. 4 Eca komanu ocihandeleko eci cokuti: “Ene vu laika oku pita kongave ya vamanjene okuti, ovitumbulukila via Esau,+ vina via tunga ko Seire+ kuenje ovo va ka ku kuateli usumba+ kuenda ene vu sukila oku kuata utate walua. 5 Ko ka va sanumuli, momo si ka eca kokuene onepa layimue yofeka yavo, ndaño ocitumãlo coku liatela, momo ame nda eca ku Esau Omunda Seire ndocipiñalo caye.+ 6 Vu sukila oku landa lolombongo okulia kokuavo loku landa ovava vu ka nyua.+ 7 Momo Yehova Suku yene wa ku sumũlũisi kovina viosi wa lingi. Eye wa kũlĩha okuti wa tungayali vekalasoko linene. Vokuenda kueci ci soka 40 kanyamo, Yehova Suku yene wa kala lene kuenda ka wa kambeli lacimue.”’+ 8 Kuenje tua pita ku vamanjetu okuti, ovitumbulukila via Esau,+ vina via tunga ko Seire, pole, ka tua pitile vonjila yo Araba, yo Elati kuenda yo Eciongevere.+

“Noke tua tiukila, tua linga ungende poku pita vonjila yekalasoko lio Moavi.+ 9 Yehova wa ndi sapuila hati: ‘Ku ka sanumule Moavi, ale oku liyaka lavo, momo si ka eca kokuove onepa layimue yofeka yaye ndocipiñalo, omo nda eca imbo lio Are ndocipiñalo kovitumbulukila via Lote.+ 10 (Kosimbu, va Emi+ va tungileko, va kala omanu vanene haivo va luile kuenda va lepele ndeci va Anaki. 11 Va Refayimi+ va sokisiwile la va Anaki+ kuenda va Moavi va enda oku va tukula okuti, va Emi. 12 Kosimbu, va Hori+ va tungile ko Seire, pole, ovitumbulukila via Esau via va tundisa loku va kundula kuenje va piñala ocitumãlo cavo,+ ndeci va Isareli va ka linga lofeka yi laika oku kala ocipiñalo cavo, cina Yehova a ka eca kokuavo.) 13 Kaliye kuendi, yoki Ocimbota* co Cereda. Kuenje tua yoka Ocimbota* co Cereda.+ 14 Otembo tua linga ungende waco oku tunda ko Kadesi-Barnea toke eci tua yoka Ocimbota* co Cereda ya tẽla 38 kanyamo, toke eci ocitumbulukila cosi comanu va endaile kuyaki ca kunduka vocilombo, ndomo Yehova a lisingile lavo.+ 15 Eka lia Yehova lia va veta locimãho coku va nyõla toke eci va kunduiwa vocilombo.+

16 “Eci alume vosi va linga uyaki va fa pokati komanu,+ 17 Yehova wa ndi sapuila vali hati: 18 ‘Etaili o pita vocikanjo co Moavi okuti, o Are. 19 Eci o pitĩla ocipepi la va Amoni, ku ka va sanumule, momo si ka eca kokuove onepa layimue yofeka ya va Amoni ndocipiñalo, omo nda eca imbo liaco, kovitumbulukila via Lote ndocipiñalo cavo.+ 20 Ofeka yaco ya tendiwilevo okuti ofeka ya va Refayimi.+ (Va Refayimi omo va tungile kuenda va Amoni va va tukola okuti, va Samisumi. 21 Va Samisumi va kala vanene haivo valuile kuenda va kala omanu va lepa ndeci va Anaki;+ pole, Yehova wa va kunduila kovaso ya va Amoni kuenje va va tundisa kuenda va tambula ofeka yavo. 22 Eci oco a linga lovitumbulukila via Esau vina via tunga ko Seire+ eci eye a kundula va Hori+ kovaso avo oco ovo va va tundise loku kala vofeka yaco toke etaili. 23 Va Awimi va tungile vo Gasa+ toke eci va kunduiwa la va Kafitore,+ vana va tundile ko Kafitore* kuenje va Kafitore va tunga vocitumãlo cavo.)

24 “‘Katuki, yoki Ocimbota*+ co Arinone. Kũlĩhi okuti nda eca peka liene Sihoni,+ u Amori, soma yo ko Hesibone. Kuenje yaki laye kuenda piñali ofeka yaye. 25 Keteke liaco, ndi lingisa okuti omanu vosi va kasi vemẽhi liovailu vana va yeva ovina viatiamẽla kokuove, va ka ku kuatela usumba walua. Ovo va ka yokoka loku luluma* mekonda liove.’+

26 “Noke nda tuma olomunga via tunda vekalasoko lio Kedemoti+ oco vi ende ku Sihoni Soma yo Hesibone lolondaka viombembua+ viokuti: 27 ‘Ecelela okuti ndi pita vofeka yove. Ngendela lika vonjila okuti, si yapukila kondio ndaño kepĩli.+ 28 Ndi lia lika okulia kuenda ovava o ndandisa. Ecelela ño okuti ngendela posi, 29 eci oco ovitumbulukila via Esau vina via tunga ko Seire la va Moavi vana va tunga ko Are va ndinga, toke eci nda yoka o Yordão, loku iñila vofeka Yehova Suku yetu a laika oku tu ĩha.’ 30 Pole, Sihoni Soma yo Hesibone, ka tu ecelele okuti tu pita, momo Yehova Suku yove wa kokela okuti eye o sina+ loku tĩlisa utima waye oco a eciwe peka liove, ndeci eye a kasi ale cilo.+

31 “Noke Yehova wa ndi sapuila hati: ‘Tala, nda fetika ale oku eca Sihoni lofeka yaye peka liove. Fetika oku piñala ofeka yaye.’+ 32 Eci Sihoni kumue lomanu vaye vosi veya oku liyaka letu ko Yahaca,+ 33 Yehova Suku yetu wo weca peka lietu kuenje tuo yula kumue lomãla vaye kuenda omanu vaye vosi. 34 Kotembo yaco, tua tambula alupale aye osi kuenda tua kundula alupale aco oku kongelamo alume, lakãi kuenda omãla. Lomue wa supapo.+ 35 Tua tambulavo ovinyama oco vi linge vietu kuenda tua punda ovina via kala valupale tua tambula. 36 Oku upisa ko Aroere+ okuti yi kasi kohulo Yocimbota co Arinone* (oku kongelamo olupale lu kasi kocimbota), toke ko Gileada, tua yula ovaimbo osi. Yehova Suku yetu wa eca kokuetu ovaimbo aco osi.+ 37 Pole, ka wa endeli kofeka ya va Amoni+ okuti kohulo yosi Kocimbota* co Yavoke,+ lalupale o kovaimbo a kasi kolomunda, ale kocitumãlo cikuavo Yehova Suku yetu ka tu tumile.

3 “Tua tiuka kuenda tua pita vonjila yi lamanela ko Basiane. Kuenje Oge soma yo Basiane weya kumue lomanu vaye vosi oco va liyake letu ko Edirei.+ 2 Noke Yehova wa ndi sapuila hati: ‘Ku ko kuatele usumba, momo ndu weca peka liove kumue lomanu vaye lofeka yaye kuenje ove o linga laye ndeci wa linga la Sihoni soma ya va Amori, una wa tungile vo Hesibone.’ 3 Omo liaco, Yehova Suku yetu wa eca peka lietu Oge soma yo Basiane kumue lomanu vaye vosi, tuamamako oku va ponda toke eci lomue pokati komanu vaye wa supapo. 4 Tua tambula alupale aye osi. Ka kua kaile imbo okuti ka tua li tambuile, vo cosi 60 kalupale okuti, ovaimbo osi o ko Aregove wuviali wa Oge ko Basiane.+ 5 Alupale aco osi a kuatele oviteyuilo, lovimbaka via lepa, lolombundi kuenda ovikundiko vialio, oku kongelamo ovaimbo alua ka a kuatele ovimbaka. 6 Tua kundula+ ovaimbo aco ndeci tua linga la Sihoni Soma yo Hesibone okuti, tua kundula alupale osi, oku kongelamo alume, lakãi kuenda omãla.+ 7 Tua punda ovinyama viosi kuenda ovina via kala valupale, oco vi linge vietu.

8 “Kotembo yaco, tua tambula ofeka yolosoma vivali via va Amori+ via tungile kovaimbo a lisunguile lo Yordão, oku upisa Kocimbota co Arinone* toke Komunda Herimone,+ 9 (omunda yaco va Sidono va enda oku yi tukula okuti, Siriyono kuenda va Amori va yi tukola vati, Senire), 10 tua tambula alupale osi a kala kocitumãlo ca tapika ci kasi kilu okuti, o Gileada yosi, lo Basiane yosi toke ko Saleka kuenda ko Edirei+ okuti, alupale wuviali wa tiamẽlele ku Oge ko Basiane. 11 Momo Oge Soma yo Basiane eye wa kala omunu wa sulako ku va Refayimi. Ocikalavekua caye, ca pangiwile lutale* kuenda haimo ci kasilili ko Raba ya va Amoni. Kusõvi ci kuete ovikeya* ecea kuenda vupati ovikeya vikuãla, ndomo ci likuata lolonumbi vioku seteka. 12 Kotembo yaco, tua tambula ofeka eyi okuti: oku upisa ko Aroere+ yi kasi Kocimbota co Arinone* kuenda onepa yimue yovaimbo a kasi kolomunda vio ko Gileada kuenje nda eca alupale aco ku va Ruvene kuenda ku va Gadi.+ 13 Onepa yikuavo yo Gileada kuenda ovaimbo osi o ko Basiane okuti yuviali wa Oge, nda yeca konepa yimue yocikoti ca Manase.+ Ovaimbo osi o ko Aregove okuti a tiamẽla ko Basiane a kũlĩhĩwile okuti ovaimbo a va Refayimi.

14 “Yairi+ omõla a Manase wa tambula ovaimbo osi o ko Aregove+ toke kongave ya va Gesiuri kuenda ya va Maakati+ kuenje eye wa luka ovaimbo o ko Basiane londuko yaye muẽle okuti, Hawote Yairi*+ toke koloneke vilo. 15 Noke nda eca o Gileada ku Makiri.+ 16 Nda eca ku va Ruvene la va Gadi+ oku upisa ko Gileada toke Kocimbota co Arinone* okuti omeyu yocimbota caco, oyo yi linga ongave kuenda yenda toke ko Yavoke okuti, ocimbota caco oco ongave ya va Amoni, 17 kuenda nda va ĩhavo o Araba lo Yordão kuenda ongave yi tunda ko Kinerote yenda toke Kokalunga ko Araba okuti, Okalunga Komongua* ka kasi kongenge yowulu wo Pisiga konele yutundilo.+

18 “Nda eca kokuene ocihandeleko eci: ‘Yehova Suku yene wa ku ĩhi ofeka yilo oco vu yi piñali. Alume vosi va kasi pokati kene okuti va limalẽhela uyaki, va ka pita kovaso ya vamanjene va Isareli.+ 19 Akãi vene, lomãla vene kuenda oviunda viene (nda kũlĩha okuti ene vu kuete ovinyama vialua) ovo lika vamamako oku kala valupale nda eca kokuene, 20 toke eci Yehova a eca epuyuko ku vamanjene, ndeci a linga love kuenje ovo va ka piñalavo ofeka Yehova Suku yene a ka eca kokuavo poku yoka o Yordão. Noke vu ka tiuka okuti, omunu lomunu kocipiñalo caye nda eca kokuene.’+

21 “Kotembo yaco, nda eca ocihandeleko ku Yehosua+ cokuti: ‘Ove wa mola lovaso ove muẽle ovina Yehova Suku yene a linga lolosoma evi vivali. Yehova o ka linga ocina cimuamue kovoviali osi vu ka pita.+ 22 Ko ka va kuateli usumba, momo Yehova Suku yene eye o ka vu yakeliko.’+

23 “Kotembo yaco, nda livondela ku Yehova siti: 24 ‘A Ñala Tõlo, a Yehova, wa fetika oku lekisa kukuenje wove unene wove kuenda eka liove lia pama,+ kuli hẽ osuku yimue kovailu ale posi yi linga ovilinga viaco viunene ndove?+ 25 Mange ohenda, ecelela okuti ndi yoka oco ndi tale ofeka yiwa yi kasi konele yikuavo yo Yordão okuti, ovaimbo a kasi kolomunda kuenda ko Levanone.’+ 26 Pole, Yehova handi wa temẽle lame mekonda liene+ kuenda eye ka njevele. Handi vali, Yehova wa ndi sapuila hati: ‘Ci tẽla yapa! Lalimue eteke ku ka vangule vali lame ondaka eyi. 27 Londa kilu lio Pisiga+ kuenda vanja kutakelo, lo konano, lo kombuelo kuenda kutundilo kuenje tala ofeka yaco lovaso ove, momo ku ka yoka o Yordão.+ 28 Eca ocikundi caco ku Yehosua+ loku u kolisa kuenda oku u pamisa, momo eye o ka songuila omanu ava loku va yokisa+ haeye o ka va piñalisa ofeka eyi o lete ndeti.’ 29 Ovina viaco, via pita eci tua kala vocimbota ca imba ovaso ko Bete-Peore.+

4 “Kaliye a Isareli, yevelela ovisila loviholo ndu longisi oco vu vi kapiko kuenje vu kala lomuenyo+ loku iñila vofeka Yehova Suku ya vakukululu yene a kasi oku eca kokuene. 2 Ko ka vokiyi kondaka ñasi oku vu handeleki ndaño oku tepululako okuti,+ vu lava ovihandeleko via Yehova Suku yene ñasi oku vu handeleki.

3 “Ovaso ene muẽle a mola eci Yehova a linga la Baale wo ko Peore; Yehova Suku yene wa ponda omanu vosi va kala pokati kene okuti, va enda oku fendela Baale wo ko Peore.+ 4 Pole, ene vu kasi oku kakatela ku Yehova Suku yene, vosi yene vu kasi lomuenyo etaili. 5 Tala, ame ndo longisi ovisila loviholo+ ndomo Yehova Suku yange a ndi handeleka okuti, vu vi pokola vofeka vu ka piñala. 6 Vi patekeli lutate,+ momo poku ci linga vu ka lekisa okuti vu kuete olondunge+ kuenda elomboloko+ komanu vana va ka yeva ovisila evi kuenje va ka popia vati: ‘Ofeka eyi yinene, ocili okuti yomanu vakualondunge haivo vakuelomboloko.’+ 7 Ofeka yipi yinene yi kuete olosuku ocipepi lavo, ndeci Yehova Suku yetu a kasi ocipepi letu olonjanja viosi eci tu u vilikiya?+ 8 Ofeka yipi yinene yi kuete ovisila viesunga loviholo Ndovihandeleko evi viosi nda eca kokuene etaili?+

9 “Kuata utate kuenda lavulula* okuti, ku ivalako ovina wa mola lovaso ove kuenda oco ka vi ka tunde vutima wove oloneke viosi viomuenyo wove. Vi sapuila komãla vove kuenda kolonekulu viove.+ 10 Keteke wa talama kovaso a Yehova Suku yove ko Horeve, Yehova wa ndi sapuila hati: ‘Ongoluila omanu vosi kokuange okuti va yeva olondaka viange+ oco va lilongise oku ndi sumbila+ oloneke viosi va kasi lomuenyo kilu lieve kuenda va vi longisa komãla vavo.’+

11 “Noke wameli ocipepi kuenda wa talami kepato liomunda kuenje omunda ya kala oku taima londalu toke kovailu, kua kala owelema, lalende kuenda alende a tekãva.+ 12 Yehova wa vangula lene vokati kondalu.+ Ene wa yevi ocileñi colondaka, pole, ka wa muĩli omunu laumue,+ wa yevi lika ondaka.+ 13 Eye wa ku lomboluili ocisila caye+ cina eye o handeleki oku lava okuti, Ovihandeleko Ekũi.*+ Noke eye wa vi soneha vavaya avali ovawe.+ 14 Kotembo yaco, Yehova wa ndi handeleka oku vu longisi ovisila loviholo okuti, vu vi pokola vofeka wiñili oco vu yi piñali.

15 “Lavululi,* momo ka wa muĩli omunu laumue keteke Yehova a vangula lene ko Horeve vokati kondalu, 16 sanga vu li vĩhisa poku lisongela ociñumañuma cesetahãlo cocina cimue ale ocindekaise culume pamue cukãi,+ 17 ocindekaise cocinyama cimue ci kasi posi, ale conjila yi palãla vilu,+ 18 pamue ocindekaise covinyama vi likoka posi ale combisi yo vovava vemẽhi lilu lieve.+ 19 Lunguki sanga eci vu petuila ovaso ene kovailu kuenje vu mola ekumbi kuenda osãi, lolombungululu, lolohoka viosi vio kovailu, vu yapuisiwa loku vi kekamẽla pamue oku vi fendela.+ Yehova Suku yene wa vi eca komanu vosi va kasi vemẽhi liovailu. 20 Pole, Yehova wo upi vofolono yoku yengulula utale okuti, Kegito, oco vu lingi omanu vocipiñalo caye muẽle,+ ndeci vu kasi etaili.

21 “Yehova wa ndi temẽla mekonda liene+ kuenje wa lisinga okuti ame si yoki o Yordão, pamue oku iñila vofeka yiwa Yehova Suku yene a kasi oku eca kokuene ndocipiñalo.+ 22 Momo ndi fila vofeka yilo; Si yoki o Yordão,+ pole, ene vu yoka oco vu piñali ofeka yaco yiwa. 23 Pole, kuati utate oco ka vu ka ivaliko ocisila Yehova Suku yene a linga lene+ kuenje vu lisongela ociñumañuma cesetahãlo cocina cimue Yehova Suku yene o lemẽli.+ 24 Momo Yehova Suku eye ondalu yi nyõla elisi,+ haeye Suku una o yongola okuti, omanu vo fendela lika eye.+

25 “Nda wa linga isia yomãla lolonekulu kuenda vu kala otembo yalua vofeka loku linga eci ka ca sungulukile kuenda oku li pangela ociñumañuma ca songiwa+ nda ce nda ce kuenje vu lingila cĩvi Yehova Suku yene okuti vu u sumuisa,+ 26 ovailu losi vi linga olombangi viange pokati kene etaili okuti, ene vu kunduiwa lonjanga vofeka vu laika oku piñala poku yoka o Yordão. Ka vu ka kalamo otembo yalua, pole, vu ka nyõliwa muẽle.+ 27 Ava va ka puluka pokati kene vañami ñami+ kuenje Yehova o ko sanduili pokati kolofeka+ vina Yehova a kasi oku vu tumi. 28 Kolofeka viaco, oko vu ka fendelela olosuku viavaya levi viovawe via songiwa lovaka omanu,+ olosuku vina okuti ka vi lete, ka vi yevi, ndaño oku lia, haivio ka vi lehũlũla.

29 “Nda wa sanda Yehova Suku yove oku wenda, nda wo sandiliya lutima wove wosi, lomuenyo wove wosi,+ o ko sanga muẽle.+ 30 Kotembo yaco, eci ove o talisiwa ohali kuenda ovina viosi evi vi pita love, o ka tiuka ku Yehova Suku yove kuenje o yeva ondaka yaye.+ 31 Momo Yehova Suku yove, eye Suku yohenda.+ Eye ka ka ku yanduluka, ale oku ku nyõla, pamue oku ivala ocisila a lisila la vakukululu yove.+

32 “Kaliye sokolola eci catiamẽla koloneke via pita, oku upisa keteke eci Suku a lulika omunu kilu lieve; sandiliya kesulilo limue liovailu toke kesulilo likuavo liovailu. Kua pita ale ocina cimue cinene, pamue ocina cimue ci sokisiwa lovina via yeviwa?+ 33 Kuli hẽ omanu va yevele ondaka ya Suku ya vanguiwa vondalu ndeci wa yevi kuenje amamako oku kala lomuenyo?+ 34 Ale Suku wa seteka hẽ oku linõlela ofeka yimue pokati kofeka yikuavo lasombiso,* lolondimbukiso, lovikomo,+ luyaki,+ leka lia pama,+ lokuokuo kuolõha, lovilinga vi komõhisa+ ndeci Yehova Suku yene o lingili Kegito kovaso ene? 35 Ovina evi via lekisiwa kokuene muẽle oco vu limbuki okuti Yehova eye Suku yocili;+ ka kuli ukuavo te lika eye.+ 36 Tunde kovailu wo yevalisi ondaka yaye oco a vu lunguli kuenda wo muisi ondalu yaye yinene kilu lieve loku u yevalisi olondaka viaye vokati kondalu.+

37 “Omo okuti eye wa solele vakukululu yene kuenda wa nõla ocitumbulukila* cavo noke liavo,+ eye muẽle wa kupi Kegito lunene waye walua. 38 Eye wa tundisa kovaso ene olofeka vinene haivio via pama okuti ene vu sule oco o wiñisi loku eca kokuene ofeka yavo ndocipiñalo, ndeci vu kasi etaili.+ 39 Kaliye etaili limbuki loku ci patekela vovitima viene okuti, Yehova eye Suku yocili kovailu kuenda kilu lieve.+ Ka kuli ukuavo.+ 40 Amamako oku pokola kovisila viaye kuenda kovihandeleko viaye vina ndu ku sapuila etaili, nda wa ci linga ove kumue lomãla vove vu ka kala ciwa kuenje o ka kala otembo yalua vofeka yina Yehova Suku yove a kasi oku eca kokuove.”+

41 Kotembo yaco, Mose wa tepa alupale atatu konele yutundilo wo Yordão.+ 42 Nda omunu umue o ponda ukuavo okuti ka ci lingile ocipango kuenda ko pondele omo lionya,+ eye o sukila oku tilila valupale aco kuenje o kala lomuenyo.+ 43 Alupale aco a-a: O Becere+ yi kasi vekalasoko vocitumãlo ca tapika ci kasi kilu, okuti ya va Ruvene, o Ramote+ yi kasi ko Gileada okuti ya va Gadi kuenda o Golane+ yi kasi ko Basiane okuti ya va Manase.+

44 Eci oco Ocihandeleko+ Mose a eca ku va Isareli. 45 Evi ovihandeleko lovisila kuenda oviholo Mose a eca ku va Isareli noke yoku tunda Kegito,+ 46 leci va kala kovaimbo a lisunguile lo Yordão, kocimbota ca imba ovaso ko Bete-Peore,+ kofeka ya Sihoni Soma ya va Amori wa tungile ko Hesibone,+ una Mose la va Isareli va yula noke yoku tunda Kegito.+ 47 Kuenje va tambula ofeka yaye lofeka ya Oge+ Soma yo Basiane okuti, olosoma vivali via va Amori via kala konele yutudilo wo Yordão, 48 okuti ofeka yavo yi fetikila ko Aroere+ yi kasi kohulo Yocimbota* co Arinone, yenda toke Komunda Sione yi kasi ko Herimone,+ 49 kuenda o Araba yosi konele yutundilo wo Yordão yenda toke Kokalunga ko Araba* ka kasi kepato liowulu wo Pisiga.+

5 Mose wa kovonga va Isareli vosi loku va sapuila hati: “A Isareli yeveleli ovisila loviholo ñasi oku vu sapuili etaili kuenje vu sukila oku vi lilongisa loku vi pokola. 2 Yehova Suku yetu wa linga ocisila letu ko Horeve.+ 3 Yehova ka lingile ocisila caco la vakukululu yetu, pole, wa ci linga la vosi yetu tu kasi kulo lomuenyo etaili. 4 Yehova wa vanguila lene vokati kondalu polo lapolo komunda.+ 5 Kepuluvi liaco, nda talama pokati ka Yehova lene+ oku vu sapuili ondaka ya Yehova, momo wa kuati usumba omo liondalu kuenda ka wa lamaneli komunda.+ Eye wa popia hati:

6 “‘Ame ndi Yehova Suku yove, una wa ku upa kofeka Yegito konjo yupika.+ 7 Lalimue eteke ku ka fendele olosuku vikuavo, te lika ame.+

8 “‘Ku ka lisongele ociñumañuma ale esetahãlo*+ liocina cimue ci kasi kovailu, pamue posi, ale vovava vemẽhi liongongo. 9 Ku ka vi kekamẽle ndaño muẽle oku vetiyiwa oku vi fendela,+ momo ame ndi Yehova Suku yove, ndi Suku una o yongola okuti omanu vo fendela lika eye,+ haeye o nena eyambulo komãla omo liokulueya kuolonjali, kocitumbulukila catatu kuenda kocitumbulukila cakuãla okuti, ca vana va ndi suvuka,+ 10 pole, o lekisa ocisola ka ci pongoloka* kolohulukãi viovitumbulukila via vana va ndi sole haivo va kapako ovihandeleko viange.

11 “‘Ku ka tukule onduko ya Yehova Suku yove lesanda,+ momo Yehova o yambula wosi o tukula onduko yaye lesanda.+

12 “‘Sambiliya eteke Liesambata loku litenda okuti li kola, ndeci Yehova Suku yove a ku handeleka.+ 13 O sukila oku linga upange wove wosi vokuenda kuoloneke epandu,+ 14 pole, eteke liepanduvali, esambata limue lia tumbikiwila Yehova Suku yove.+ Ka citava oku linga upange laumue,+ ci kale ove ale omõlove ulume, pamue omõlove ukãi, upika wove wulume, lupika wove wukãi, ale ongombe yove, pamue ocimbulu cove, ndaño ocinyama cove covimbo ale ocingendeleyi ca tunga valupale* ove,+ oco okuti apika vove valume, lapika vove vakãi va puyuka ndove.+ 15 Ivaluka okuti ove wa kala upika kofeka Yegito kuenje Yehova Suku yove wa ku upa leka lia pama kuenda lokuokuo kuolõha.+ Eli olio esunga lieci Yehova Suku yove a ku handelekela oku sambiliya eteke Liesambata.

16 “‘Sumbila isiove la ina yove+ ndeci Yehova Suku yove a ku handeleka, oco o kale lomuenyo otembo yalua kuenda oco ovina vi ende ciwa love vofeka Yehova Suku yove a kasi oku eca kokuove.+

17 “‘Ku ka ponde.+

18 “‘Ku ka linge ukahokolo.+

19 “‘Ku ka nyane.+

20 “‘Ku ka imbile ukuene uvangi wuhembi.+

21 “‘Ku ka livele ukãi wukuene.+ Ndaño oku livela onjo yukuene ale epia liaye, pamue upika waye wulume, ale upika waye wukãi, pamue ongombe yaye, ale ocimbulu caye, ndaño ocina cimue ca tiamẽla kokuaye.’+

22 “Yehova wa sapuila olonumbi* evi kekongelo liene liosi komunda okuti, ondaka yaye yolukandi ya tundila vokati kondalu, velende, lalende a tekãva+ kuenda eye ka vokiyileko vali cimue; yu wa vi soneha vavaya avali ovawe kuenje wa vi eca kokuange.+

23 “Pole, eci wa yevi ondaka ya tunda vokati kowelema osimbu omunda ya kala oku taima,+ asongui vosi vovikoti viene kuenda akulu, vamẽla kokuange. 24 Kuenje ene wa popi okuti: ‘Yehova Suku yetu wa tu lekisa ulamba waye lunene waye kuenje tua yeva ondaka yaye vokati kondalu.+ Etaili tua mola okuti Suku o pondola oku vangula lomunu kuenje omunu waco amamako oku kala lomuenyo.+ 25 Kaliye, momo lie tu fila? Momo ondalu eyi yinene, yi pondola oku tu lia. Nda tu amamako oku yevelela ondaka ya Yehova Suku yetu, tu cĩ okuti tu fa muẽle. 26 Helie pokati komanu wa yevele ale ondaka ya Suku ya tunda vokati kondalu ndeci etu tua yeva kuenje handi amamako oku kala lomuenyo? 27 Ove puãi o sukila oku amela ocipepi oco o yevelele cosi Yehova Suku yetu a popia kuenje o tu sapuilako cosi Yehova Suku yetu a ka ku sapuila, etu tu yevelela kuenda tu ci linga.’+

28 “Kuenje Yehova wa yeva olondaka ene wa vanguli lame kuenje Yehova wa ndi sapuila hati: ‘Nda yeva olondaka omanu ava va ku sapuila. Cosi ovo va popia ca sunguluka.+ 29 Nda olonjanja viosi ovo va kuatele utima woku ndi sumbila+ loku pokola kovihandeleko viange;+ ovo kumue lomãla vavo nda va kuata onima yiwa otembo ka yi pui!+ 30 Kuende kokuavo, va sapuila hati: “Tiukili kolombalaka viene.” 31 Pole, ove o siala kulo lame, ndu ku sapuila olonumbi viosi, loviholo kuenda ovisila o ka va longisa kuenje ovo va vi pokola vofeka ndi va ĩha oco va yi piñale.’ 32 Kaliye kuati utate woku pokola kolonumbi viosi Yehova Suku yene a ku handeleki.+ Ko ka yapukili kondio ndaño kepĩli.+ 33 Vu sukila oku endela vonjila yosi Yehova Suku yene a ku handeleki+ oco vu kali lomuenyo kuenda ovina vi enda ciwa kuenje vu kala oloneke vialua vofeka vu ka piñala.+

6 “Evi ovio ovihandeleko, lovisila kuenda oviholo Yehova Suku yene a ndi handeleka oku vu longisi kuenje vu vi pokola eci wiñili vofeka vu ka piñala, 2 oco o sumbile Yehova Suku yove loku amamako oku pokola kovisila viaye viosi, lovihandeleko ñasi oku ku handeleka okuti, ove, lomãla vove kuenda olonekulu viove+ vokuenda kuoloneke viosi viomuenyo wove, oco o kale lomuenyo otembo yalua.+ 3 Yevelela A Isareli kuenda pokola lutima wosi, oco o kale ciwa kuenje vu lua vofeka yi tumõha asenjele lowiki ndomo Yehova Suku ya vakukululu yove a likuminyile kokuove.

4 “Yevelela, A Isareli: Yehova Suku yetu, umosi lika Yehova.+ 5 Sola Yehova Suku yove lutima wove wosi, lomuenyo wove wosi+ kuenda longusu yove yosi.+ 6 Olondaka evi ñasi oku ku sapuila etaili, vi kale vutima wove, 7 kuenda vi soneha* vovitima viomãla vove+ loku vi vangula eci o tumãla vonjo yove, leci endela vonjila, lo poku pekela kuenda poku pasuka.+ 8 O vi kutila peka liove oco vi linge ndonjivaluko kokuove kuenda vi linge ndulame pupolo* wove.+ 9 O vi soneha kovikuli vionjo yove kuenda kolombundi viove.

10 “Eci Yehova Suku yove a ka ku iñisa vofeka a lisila ku vakukululu yove Avirahama, la Isake kuenda Yakoba oku ku ĩha+ alupale anene hao a fina ana kua tungile,+ 11 lolonjo kua tungile vieyuka ovina viosi viwa kua talavayele, lovisimo kua fẽlele kuenda oviumbo viayuva loviti violiveira kua kũlile kuenje o lia loku kuta,+ 12 kuata utate oco ku ka ivaleko Yehova+ una wa ku upa kofeka Yegito konjo yupika. 13 Sumbila Yehova Suku yove+ kuenda u vumba+ loku lisila vonduko yaye.+ 14 Ko ka kuami olosuku vikuavo, ndaño olosuku viomanu va lisungue lene,+ 15 momo Yehova Suku yove una o kasi pokati kove, o Suku yimue yi yongola okuti omanu vo fendela lika eye.+ Sanga onyeño ya Yehova Suku yove yi ku wengukila+ kuenje eye o ka ku kundula kilu lieve.+

16 “Ko ka seteki+ Yehova Suku yene ndeci wo seteki ko Masa.+ 17 Vu sukila oku pokola lutima wosi kovihandeleko via Yehova Suku yene, koviholo kuenda kovisila viaye vina eye o handeleki oku vi pokola. 18 Linga eci ciwa leci ca sunguluka kovaso a Yehova okuti, ovina vi enda ciwa love, iñila vofeka yiwa yina Yehova a lisila ku vakukululu yove+ kuenje o yi piñala, 19 poku tundisa ovanyãli vove vosi kovaso ove ndeci Yehova a likuminyile.+

20 “Kovaso yoloneke eci omõlove a ku pulisa hati: ‘Ovihandeleko lovisila kuenda oviholo Yehova Suku yetu a eca kokuene vi lomboloka nye?’ 21 ove o ka kumbulula omõlove hati: ‘Etu tua kala apika va Fareo Kegito, pole, Yehova wa tu upa Kegito leka liaye lia pama. 22 Yehova wa linga olondimbukiso kovaso etu lovikomo vinene vioku fukĩlisa va Egito,+ la Fareo kuenda vakuanjo yaye vosi.+ 23 Kuenje eye wa tu upako loku tu nena kulo oco a tu ĩhe ofeka yina eye a lisilile ku vakukululu yetu.+ 24 Noke Yehova wa tu handeleka oco tu pokole kovisila viaye viosi kuenda oku sumbila Yehova Suku yetu okuti tu kala ciwa,+ loku amamako oku kala lomuenyo+ ndeci tu kasi etaili. 25 Tu tendiwa ndavakuesunga nda tu kuata utate woku pokola kovihandeleko evi viosi via Yehova Suku yetu ndomo eye a tu handeleka.’+

7 “Eci Yehova Suku yove a ku ambata vofeka o laika oku iñila loku yi piñala,+ eye o ka tundisavo kovaso ove olofeka vi kuete olonungi vialua+ ndeci: va Hiti, va Girigasi, va Amori,+ va Kanana, va Perisi, va Hivi kuenda va Yevusi+ okuti, olofeka epanduvali vi kuete olonungi vialua haivio via pama okuti ove ci sule.+ 2 Yehova Suku yove o ka va eca peka liove kuenje ove o ka va yula.+ O sukila oku va kundula muẽle.+ Ku ka linge lavo ocisila cimue ale oku va kuatela ohenda.+ 3 Ku ka linge ocisila cimue coku likuela lavo. Ku ka ece omãla vove vakãi komãla vavo valume oco va likuele, ale omãla vavo vakãi va kueliwa lomãla vove valume.+ 4 Momo ovo va ka yapuisa omãla vove valume oku liwekapo oku vumba Suku, oco va vumbe olosuku vikuavo;+ kuenje onyeño ya Yehova yu wengukili kuenda eye u kunduli lonjanga.+

5 “Eci vu sukila oku linga ceci: Nyõli ovotala avo, loku teya olongunji viavo+ vi kola kuenda oku lundula olombueti viavo vi kola*+ loku timĩha oviñumañuma viavo via songiwa.+ 6 Momo ove wufeka yimue yi kola ku Yehova Suku yove kuenda Yehova Suku yove wa ku nõla oco o linge ofeka yaye okuti, ocipiñalo caye cilikasi pokati komanu vosi va kasi kilu lieve.+

7 “Yehova ka vu nõleli,+ ale oku vu lekisi ocisola omo okuti vumanu valua okuti, omanu vosi va sule, momo ene wa kali omanu vatito pokati komanu vosi.+ 8 Pole, Yehova wa ku upi leka liaye lia pama oco a ku yovoli konjo yupika+ peka lia Fareo soma Yegito, omo liocisola Yehova a ku kueteli kuenda eye wa kapako ocisila a lisila la vakukululu yene.+ 9 Ene wa kũlĩhi ciwa okuti Yehova Suku yene, eye Suku yocili haeye Suku wa koleliwa, una o tẽlisa ocisila caye kuenda o kuetele ocisola ka ci pongoloka ovitumbulukila viohulukãi, via vana vo sole haivo vamamako oku pokola kovihandeleko viaye.+ 10 Pole, eye o ka fetuluinya vana vo suvuka poku va kundula.+ Eye o ka va nyõla lonjanga; eye o ka va fetuluinya lonjanga. 11 Omo liaco, kuati utate poku kapako ovihandeleko lovisila kuenda oviholo ñasi oku vu sapuili etaili, oco vu vi pokoli.

12 “Nda wamamiko oku yevelela ovisila kuenda oviholo, oku vi kapako loku vi pokola, Yehova Suku yene o kamamako oku tẽlisa ocisila locisola caye ka ci pongoloka eye a lisila la vakukululu yene. 13 Eye o ka ku sola loku ku sumũlũisa kuenje o ka ku luisa. Ocili, eye o ka ku sumũlũisa lomãla* valua+ kuenda lapako ovepia liove okuti, olomema viove, ovinyu yove yokaliye, ulela wove,+ omãla vovinyama viove kuenda olomeme vioviunda viove, vofeka eye a likuminya ku vakukululu yove oku eca kokuove.+ 14 Ove o ka sumũlũisiwa calua pokati komanu;+ lomue ulume, ale ukãi pokati kove o ka kala okuti ka citi omõla, ndaño oviunda viove ka vi ka kala okuti ka vi citi.+ 15 Yehova o ka imũla pokati kove ovovei osi kuenda eye ka ka ecelela okuti o kuatiwa lovovei ãvi wa mola Kegito.+ Handi vali, eye o ka nena ovovei aco ku vana va ku suvuka. 16 Ove o sukila oku kundula* omanu vosi Yehova Suku yove a eca kokuove.+ Ku ka va kuatele ohenda+ ndaño oku vumba olosuku viavo,+ sanga va ku yapuisa.+

17 “Nda o popia vutima wove hoti: ‘Olofeka evi via velapo ketendelo okuti, etu tu sule. Ndi vi tundisa ndati?’+ 18 ku ka vi kuatele usumba.+ O sukila oku ivaluka eci Yehova Suku yove a linga ku Fareo kuenda ku va Egito vosi,+ 19 ohali* wa mola lovaso ove, olondimbukiso, lovikomo,+ leka lia pama, lokuokuo kuolõha kuna Yehova Suku yove a ku upa lakuo.+ Eci oco Yehova Suku yove a ka linga lomanu vosi o kuetele usumba.+ 20 Yehova Suku yove o ka va nenela esumuo* toke eci vana va supapo+ kuenda vana va lisalamisa kovaso ove va nyõleha. 21 Ku ka va kuatele usumba, momo Yehova Suku yove o kasi love,+ okuti eye Suku ukuonene haeye o komõhisa.+

22 “Yehova Suku yove o ka tundisa olofeka vi kasi kovaso ove kamue kamue.+ Eye ka ka ku ecelela okuti o va ponda lonjanga, sanga ovinyama via tema viovusenge vi livokiya loku kapa kohele omuenyo wove. 23 Yehova Suku yove o ka va eca kokuove kuenda o ka va yula toke eci va kunduiwa.+ 24 Eye o ka eca olosoma viavo peka liove+ kuenda o ka imũla olonduko viavo vemẽhi liovailu.+ Lomue o ka tamalãla kovaso ove+ toke eci o va kundula.+ 25 O sukila oku timĩha vondalu oviñumañuma violosuku viavo via songiwa.+ Ku ka livele opalata ale ulu woviñumañuma viavo, pamue oku vi ambata oco vi linge viove,+ oco ku ka yapuisiwe lavio, momo ocina cimue cumbondo ku Yehova Suku yove.+ 26 Ku kambate ocina cimue cumbondo konjo yove, sanga o kala ndocina caco okuti, ca sokiyiwila oku nyõleha. O ci tenda okuti ca vĩha haico cumbondo, momo ocina cimue ca pangiwila oku nyõleha.

8 “O sukila oku kapako ocihandeleko ñasi oku eca kokuove etaili, oco wamameko oku kala lomuenyo+ kuenda epata liove li livokiya kuenje wiñila vofeka yina Yehova Suku yove a lisila ku vakukululu yove.+ 2 Ivaluka ndomo Yehova Suku yove a ku endisa vonjila ci soka 40 kanyamo vekalasoko,+ oco a ku pindise okuti o liketisa, loku ku seteka+ oco a kũlĩhe eci ci kasi vutima wove,+ nda o pokola kovihandeleko viaye ale sio. 3 Eye wa ku pindisa oco o liketise loku ecelela okuti o kala onjala+ kuenda wa ku tekula lomana+ yina okuti, kua yi kũlĩhĩle ndaño vakukululu yove ka va yi kũlĩhĩle, oco o limbuke okuti, omunu ka muila lika omuenyo kombolo, te kolondaka viosi vi tunda vomẽla wa Yehova.+ 4 Uwalo wene ka wa puile ndaño olomãhi viene ka via lendele vokuenda 40 kanyamo.+ 5 Ove wa kũlĩha vutima wove okuti, ndeci omunu a pindisa omõlaye, haico Yehova Suku yove a enda oku ku pindisa.+

6 “Omo liaco, pokola kovihandeleko via Yehova Suku yove poku endela volonjila viaye loku u sumbila. 7 Momo Yehova Suku yove wa ku nena vofeka yimue yiwa,+ ofeka yimue yi kuete olondui, olono viovava kuenda olono vi kasi kocimbota co vetapi lo kovaimbo a kasi kolomunda, 8 ofeka yima otiliku losevata, oviti viakuyu, olo roma,+ ofeka yulela uwa woliveira lowiki,+ 9 ofeka yimue okuti ka mu kambela okulia kuenda ove ku kambela lacimue, haimo mu sangiwa ovawe wutale kuenda kolomunda viaco o kopako osipi.

10 “Eci o lia toke o kuta, o sukila oku sivaya Yehova Suku yove omo liofeka yiwa a eca kokuove.+ 11 Kuata utate oco ku ka ivaleko Yehova Suku yove poku yuvula oku pokola kovihandeleko viaye, lovisila viaye kuenda oviholo viaye ñasi oku ku handeleka etaili. 12 Eci o lia toke o kuta loku tunga olonjo oco o kalemo,+ 13 leci olongombe viove lolomeme viove vi livokiya kuenda opalata lulu wove vi livokiya kuenje o kuata ovina vialua, 14 ku ka lipande vutima wove+ sanga ci ku kokela oku ivalako Yehova Suku yove, una wa ku upa vofeka Yegito konjo yupika,+ 15 una wa ecelela okuti ove wendela vekalasoko linene hailio li koka usumba,+ muna muli olonyõha via tema, anyenya, losi ya kukuta okuti ka muli ovava. Eye wa tundisa ovava vewe+ 16 kuenda wa ku tekula lomana+ vekalasoko yina okuti vakukululu yove ka va yi kũlĩhĩle, oco a ku pindise okuti o liketisa,+ loku ku seteka oco o kuatisiwe kovaso yoloneke.+ 17 Nda o popia vutima wove hoti: ‘Unene wange kuenda ongusu yovaka ange ovio via ndi kuatisa oku kuata ekalo liwa,’+ 18 ivaluka okuti Yehova Suku yove eye wa ku ĩha unene woku kuata ekalo liwa,+ oco a tẽlise ocisila caye a lisila la vakukululu yove ndomo ci kasi etaili.+

19 “Nda wa ivala Yehova Suku yove, loku kuama olosuku vikuavo kuenda oku vi fendela loku vi kekamẽla, etaili ndimba uvangi watiamẽla kokuene wokuti vu ka nyõliwa muẽle.+ 20 Yehova o ka vu kunduli ndeci a linga lolofeka vikuavo a nyõlela kovaso yene, omo ka wa yeveleli kondaka ya Yehova Suku yene.+

9 “A Isareli yevelela, etaili o kasi oku yoka o Yordão+ oco wiñile loku ka tundisa olofeka vinene haivio via pama okuti ove o sule,+ alupale anene hao a kuete oviteyuilo vi pitĩla toke kovailu,*+ 2 omanu vaco vanene haivo va lepa okuti, omãla va Anaki,+ vana ove wa kũlĩha kuenda wa yeva okuti va popia vati: ‘Helie o tẽla oku katukila omãla va Anaki?’ 3 Ove o sukila oku kũlĩha okuti etaili, Yehova Suku yove o ka pita kovaso ove.+ Eye ondalu yi nyõla elisi+ kuenda o ka va kundula vosi. Eye, o ka va yula kovaso yove oco o va tundise lonjanga loku va kundula ndeci Yehova a ku likuminyile.+

4 “Eci Yehova Suku yove a va tundisa kovaso yove, ku ka popie vutima wove hoti: ‘Omo liesunga liange muẽle, Yehova wa ndi nena vofeka yilo oco ndi yi piñale.’+ Pole, Yehova wa tundisa olofeka viaco+ kovaso ove omo lievĩho liavo. 5 Kua iñilile vofeka yavo oco o yi piñale omo liesunga liove ale omo liutima wove uwa. Pole, omo lievĩho liolofeka viaco, Yehova Suku yove o kasi oku va tundisa kovaso yove,+ oco a tẽlise ondaka Yehova a lisila la vakukululu yove Avirahama,+ Isake+ kuenda Yakoba.+ 6 Kũlĩha okuti, Yehova Suku yove ka kasi oku ku ĩha ofeka eyi yiwa oco o yi piñale, omo liesunga liove, momo ove wumunu umue wa sina.*+

7 “Ku ka ivaleko ndomo wa wengula onyeño ya Yehova Suku yove vekalasoko.+ Tunde keteke wa sia ofeka Yegito toke eci weyi kocitumãlo cilo, wa sinĩli Yehova.+ 8 Ndaño muẽle ko Horeve ove wa wengulivo onyeño ya Yehova kuenda Yehova wa ku temẽli calua kuenje eye wa yonguile oku vu kunduli.+ 9 Eci nda lamanela komunda oku ka tambula avaya ovawe+ okuti, avaya ocisila Yehova a linga lene,+ nda kala komunda 40 kovotanya kuenda 40 kovoteke+ okuti, sia lile cimue ndaño oku nyua ovava. 10 Kuenje Yehova wa nyĩha avaya avali ovawe va sonehiwa lomuine wa Suku kuenda mua sangiwile olondaka viosi Yehova a ku sapuili vokati kondalu ya kala oku taima komunda keteke wa liongololi.*+ 11 Kesulilo 40 kovotanya kuenda 40 kovoteke, Yehova wa nyĩha avaya avali ovawe okuti, avaya ocisila, 12 kuenje Yehova wa ndi sapuila hati: ‘Votoka, loka lonjanga, momo omanu vove vana wopa Kegito, va li vĩhisa.+ Ovo va yapuka lonjanga vonjila nda va handeleka oku endela. Va litungila ociñumañuma cutale.’+ 13 Noke Yehova wa ndi sapuila hati: ‘Ndi lete okuti, omanu ava va sina muẽle.*+ 14 Ku ka nateke oku va yambula loku imũla onduko yavo vemẽhi liovailu kuenje ndu ku lingisa ofeka ya pama haiyo yinene okuti, ovo va sule.’+

15 “Noke nda ñualapo nda loka komunda osimbu omunda ya kala oku taima londalu,+ lavaya avali ocisila a kala peka liange.+ 16 Kuenje nda vanja kuenda nda mola okuti wa lingili ekandu Yehova Suku yene! Wa litungili onãle yutale.* Wa yapuki lonjanga vonjila Yehova a ku handeleki oku endela.+ 17 Omo liaco, nda tikula avaya aco avali, yu nda amba posi lovaka ange kuenda nda a nyanyũila kovaso ene.+ 18 Noke nda kekamẽla kovaso a Yehova ndeci nda lingile ale vokuenda 40 kovotanya kuenda 40 kovoteke. Sia lile cimue ndaño oku nyua ovava+ omo liakandu osi lovina vĩvi wa lingi kovaso a Yehova loku u temisa. 19 Nda kuata ocinjoko omo onyeño yalua ya Yehova yo wengukili+ kuenje eye wa yonguile oku vu pondi. Pole, vepuluvi liaco, Yehova wa yeva vali kondaka yange.+

20 “Yehova wa temẽlelevo Arone kuenda wa yonguilevo oku u ponda,+ pole, vepuluvi liaco, nda likutililako Arone. 21 Kuenje nda tikula ocina cĩvi cekandu liene wa tungi okuti, onãle+ kuenje nda yi timĩha vondalu; noke nda yi nyanyõla kuenda nda yi sula toke eci ya linga ndoneketela kuenje oneketela yaco nda yimba vovava a tunda komunda.+

22 “Handi vali, eci wa kaili ko Tavera,+ lo ko Masa+ kuenda ko Kiviroti-Hataawa,+ wa wengulivo onyeño ya Yehova. 23 Eci Yehova a ku tumi oku tunda ko Kadesi-Barnea+ loku popia hati: ‘Kuendi, ka piñali ofeka ndi ka eca kokuene!’ ene wa sinĩli vali ocihandeleko ca Yehova Suku yene+ kuenda ka wa lekisili ekolelo+ kokuaye ndaño oku pokola kokuaye. 24 Ene wa siati oku sinĩla Yehova tunde eci ndo kũlĩhi.

25 “Kuenje nda li tuvika posi kovaso a Yehova ci soka 40 kovotanya kuenda 40 kovoteke,+ nda lituvikapo momo Yehova wa popia okuti o vu pondi. 26 Nda fetika oku linga epingilo ku Yehova loku popia hati: ‘A Ñala Tõlo, a Yehova, ku ka nene eyambulo komanu vove. Ovo ocipiñalo cove,+ cina wa yovola lunene wove, loku vopa Kegito leka lia pama.+ 27 Ivaluka akuenje vove Avirahama, Isake kuenda Yakoba.+ Ku ka kapeko esino liomanu ava, levĩho liavo kuenda akandu avo.+ 28 Sanga omanu vo vofeka muna wa tu upa va ka popia vati: “Yehova ka tẽlele oku va tuala vofeka a va likuminyile kuenda omo okuti wa va suvuka, wa vopa mulo oco a va pondele vekalasoko.”+ 29 Momo ovo omanu vove haivo ocipiñalo cove,+ vana ove wa nena lunene wove walua, lokuokuo kuove kuolõha.’+

10 “Kotembo yaco, Yehova wa ndi sapuila hati: ‘Pasa avaya avali ovawe ndava vatete+ kuenda lamanela kokuange komunda; litungilavo ocikasia cavaya. 2 Ndi soneha vavaya aco olondaka via kala vavaya atete, ana wa nyanyõla kuenje o a kapa vocikasia.’ 3 Omo liaco, nda tunga ocikasia cavaya o akasia kuenda nda pasa avaya avali ovawe ndava atete kuenje nda lamanela komunda lavaya aco avali ovawe peka liange.+ 4 Noke eye wa soneha vavaya olondaka eye a sonehele ale+ okuti, Ovihandeleko Ekũi,*+ vina Yehova a ku sapuilili komunda vokati kondalu+ keteke wa liongoluili;+ kuenje Yehova wa vi eca kokuange. 5 Nda ñualapo, yu nda loka komunda+ noke nda kapa avaya aco vocikasia nda pangele okuti, omo a kasi ndeci Yehova a ndi handelekele.

6 “Kuenje va Isareli va tunda ko Berote Bene-Yakana oku enda ko Mosera. Oko Arone a fila kuenda haiko a kendiwila+ kuenje omõlaye Eleasa wa linga ocitunda pomangu yaye.+ 7 Eci va tundako, va enda ko Gudigoda, oku tunda ko Gudigoda va enda ko Yotivata,+ vofeka yimue okuti muli olono viovava.

8 “Kotembo yaco, Yehova wa nõla ocikoti ca Lewi+ oco cambate Ocikasia Covisila via Yehova+ loku ci kapa kovaso a Yehova okuti, vo vumba loku sumũlũisa omanu vonduko yaye+ ndeci va lingainga toke etaili. 9 Eli olio esunga lieci Lewi ka kuetele onepa ale ocipiñalo la vamanjaye. Yehova eye ocipiñalo caye, ndeci Yehova Suku yove a ku sapuilile.+ 10 Ame nda kala komunda ndeci nda lingile ale onjanja yatete okuti, 40 kovotanya kuenda 40 kovoteke+ kuenje kepuluvi liaco, Yehova wa njevelela vali.+ Yehova ka yonguile oku ku kundula. 11 Noke Yehova wa ndi sapuila hati: ‘Pita kovaso yomanu kuenda lipongiyila ungende, oco ovo va ende oku ka piñala ofeka nda lisila la vakukululu yavo oku va ĩha.’+

12 “Kaliye a Isareli, nye Yehova Suku yove a pinga kokuove?+ Ceci lika: sumba Yehova Suku yove+ loku endeila volonjila viaye,+ loku u sola kuenda oku vumba Yehova Suku yove lutima wove wosi, lomuenyo wove wosi,+ 13 loku amamako oku pokola kovihandeleko loviholo via Yehova ñasi oku eca kokuove etaili, oco o kale ciwa.+ 14 Limbuka okuti, ovailu a tiamẽla ku Yehova Suku yove ndaño muẽle ovailu liovailu kuenda ongongo lovina viosi vi kasimo.+ 15 Pole, Yehova wa kuata lika ukamba la vakukululu yove loku va lekisa ocisola caye kuenje eye wa ku nõla ove wucitumbulukila cavo+ pokati komanu vosi, ndeci o kasi etaili. 16 Kaliye yelisi ovitima viene+ kuenda liwekipo oku lekisa esino.+ 17 Momo Yehova Suku yene eye Suku yolosuku,+ haeye Ñala yoloñala, Suku wa velapo, wa pama kuenda Suku ukuonene haeye o komõhisa, una ka lekisa ocame+ kuenda ka tava ovitukiko. 18 Eye o tetuluila lesunga omõla ka kuete isia* locimbumba+ kuenda o lekisa ocisola kocingendeleyi+ loku eca kokuaye okulia luwalo. 19 Ene vu sukilavo oku sola ocingendeleyi, momo ene wa kalivo ovingendeleyi vofeka Yegito.+

20 “Sumbila Yehova Suku yove, eye lika o vumba,+ loku kakatela kokuaye kuenda lisila lika vonduko yaye. 21 O sukila oku eca esivayo kokuaye.+ Eye Suku yove una wa linga ovina viosi evi vinene haivio vi komõhisa, vina ove wa mola lovaso ove muẽle.+ 22 Vakukululu yove eci va lokila Kegito+ va kala 70 komanu, kaliye Yehova Suku yove wa lingisa okuti, epata liove lilua ndolombungululu vio kovailu.+

11 “Ove o sukila oku sola Yehova Suku yove+ loku amamako oku tẽlisa ovina a ku tuma, oviholo, lovisila kuenda ovihandeleko viaye. 2 Wa kũlĩhi okuti etaili ñasi kovaso yene, hakomãla veneko vana ka va kũlĩhĩle haivo ka va muĩle epindiso lia Yehova Suku yene,+ ndaño unene waye,+ leka liaye lia pama+ kuenda okuokuo kuaye kuolõha. 3 Ovo, ka va muĩle olondimbukiso lovikomo a linga Kegito ku Fareo soma Yegito kuenda kofeka yaye yosi;+ 4 ale ceci eye a linga lolohoka vio Kegito, lolokavalu via Fareo lakãlu aye uyaki okuti, a sitikiwa lovava Okalunga Kakusuka, eci ovo vo landuli kuenda Yehova wa va nyõla vosi vonjanja yimuamue.*+ 5 Ovo ka va muĩle ovina eye o lingili vekalasoko toke eci wa pitĩli kocitumãlo cilo, 6 pamue ceci a lingila Datana la Avirama omãla va Eliyava eci osi yasama kovaso ya va Isareli vosi kuenje ya va ina kumue la vakuanjo yavo vosi kuenda olombalaka viavo locina cosi ci kasi lomuenyo ca va kuama.+ 7 Ene muẽle wa moli lovaso ene ovikomo viosi Yehova a linga.

8 “Amamiko oku kapako ovihandeleko ñasi oku eca kokuene etaili, oco vu pami loku iñila vofeka kuenda oku yi piñala, 9 okuti vu kala otembo yalua+ vofeka Yehova a lisila ku vakukululu yene lo kocitumbulukila* cavo+ okuti ofeka yimue yi tumõha asenjele lowiki.+

10 “Ofeka vu ka piñala ka yi kasi ndofeka yo Egito kuna ene wa tundi, haiko wa endi oku kũla ombuto yene loku yi tapela lolomãhi* viene ndocumbo colonelẽho. 11 Pole, ofeka vu laika oku iñila loku piñala, ofeka yolomunda haiyo yi kuete ovimbota via tapika.+ Oyo ya siata oku tapeliwa lombela yo kovailu;+ 12 ofeka yaco yi kasi oku tatiwa la Yehova Suku yene. Ovaso a Yehova Suku yene otembo yosi a kasi kofeka yaco, tunde kefetikilo liunyamo toke kesulilo liunyamo.

13 “Nda wamamiko oku pokola kovihandeleko ñasi oku eca kokuene etaili, loku sola Yehova Suku yene kuenda oku u vumba lutima wene wosi, lomuenyo wene wosi,+ 14 ngecavo ombela kofeka yene votembo ya sokiyiwa okuti, ombela yomandavela* leyi ya sulako,* kuenje vungula olomema lovinyu yokaliye kuenda ulela walio.+ 15 Ndi kulisa okulia kuovinyama vovapia ene kuenje ene vu lia toke eci vu kuta.+ 16 Kuati utate oco utima wene ka u ka yapuisiwe loku fendela olosuku vikuavo kuenda oku vi kekamẽla.+ 17 Sanga onyeño ya Yehova yu wengukili kuenje eye ka ka ecelela okuti, kovailu ku tunda ombela+ kuenda osi ka yimi apako alio kuenje vu kunduiwa lonjanga vofeka yiwa Yehova a kasi oku eca kokuene.+

18 “Kapiko olondaka viange vutima wene kuenda komuenyo wene kuenje vu vi kutila peka liene oco vi linge ndonjivaluko kokuene kuenda vi linge ndulame pupolo wene.*+ 19 Vi longisi komãla vene loku vi va sapuila eci o tumãla vonjo yove, leci endela vonjila, lo poku pekela kuenda poku pasuka.+ 20 Vu vi soneha kovikuli violonjo viene kuenda kolombundi viene, 21 oco ene kumue lomãla vene vu kale otembo yalua+ vofeka Yehova a lisila oku eca ku vakukululu yene+ osimbu ovailu amamako oku sitika ilu lieve.

22 “Nda wa pokoli kovihandeleko ñasi oku eca kokuene loku vi kapako, loku sola Yehova Suku yene+ poku endela volonjila viaye viosi kuenda oku kakatela kokuaye,+ 23 Yehova o ka tundisa olofeka evi viosi kovaso yene+ kuenje vu ka piñala olofeka viosi vinene haivio vialua okuti ene vu sule.+ 24 Ovitumãlo viosi vu ka kala, vi ka linga viene.+ Oku upisa vekalasoko lio Levanone, loku upisa Kolui okuti, olui Ferati toke kokalunga* ko kutakelo, vi linga ongave yene.+ 25 Lomue o ka vu katukili.+ Yehova Suku yene o ka lingisa okuti, vofeka yosi vu pita vo kuateli ocinjoko kuenda usumba,+ ndomo a likuminya kokuene.

26 “Tali, etaili ñasi oku kapa kokuene esumũlũho lesiñalo:+ 27 vu sumũlũisiwa nda vu pokoli kovihandeleko via Yehova Suku yene, ñasi oku vu handeleki etaili,+ 28 kuenje vu siñaliwa nda ka vu pokoli kovihandeleko via Yehova Suku yene,+ nda vu tinduka vonjila ñasi oku vu handeleki etaili oco vu yi kuami kuenda vu kuami olosuku ka wa kũlĩhĩli.

29 “Eci Yehova Suku yene o tuali vofeka vu laika oku piñala, vu sukila oku tukula* esumũlũho Komunda Gerisimi kuenda esiñalo Komunda Evale.+ 30 Anga hẽ olomunda viaco ka vi kasi konele yikuavo yutakelo* wo Yordão vofeka ya va Kanana vana va tunga ko Araba kovaso yo Giligali ocipepi loviti vio ko Morehi?+ 31 Momo vu kasi oku yoka o Yordão, oco vu piñali ofeka Yehova Suku, a kasi oku eca kokuene.+ Eci vu ka yi piñala loku kalamo, 32 kuati utate okuti vu kapako olonumbi viosi lovisila ñasi oku eca kokuene etaili.+

12 “Evi ovio ovisila lovihandeleko vu sukila oku lava loku vi tẽlisa oloneke viosi vu kala vofeka Yehova Suku ya vakukululu yene a ka eca kokuene ndocipiñalo. 2 Vu sukila oku nyõla ovitumãlo viosi vina omanu vana vu ka tundisa va enda oku fendelela olosuku viavo,+ ci kaile kolomunda via lepa, ale koviwulu kuenda vemẽhi lioviti viosi via pulika. 3 Vu sukila oku nyõla ovotala avo, oku nyanyõla olongunji viavo vi kola,+ oku timĩha vondalu olombueti viavo vi kola* kuenda oku teya oviñumañuma viavo via songiwa,+ oco olonduko viavo viosi vi imũhe kocitumãlo caco.+

4 “Ko ka fendeli Yehova Suku yene lonjila yaco.+ 5 Pole, sandiliyi Yehova Suku yene kocitumãlo cina eye a ka nõla oco ku kale onduko yaye kuenda ocitumãlo caye pokati kovikoti viene viosi kuenje oko wendi.+ 6 Kocitumãlo caco oko vu ka tuala ocilumba cene coku pia elisi,+ ovilumba viene, onepa yene yekũi,+ ombanjaile yeka liene,+ lovilumba viohuminyo, lovilumba vi eciwa lutima wosi+ kuenda onuñulu yocunda cove colongombe leci colomeme.+ 7 Ene kumue la vakuanjo yene, vu lila kocitumãlo caco kovaso a Yehova Suku yene+ loku sanjukila ovopange ene,+ momo Yehova Suku yene wa ku sumũlũisi.

8 “Ko ka lingi ndeci tu kasi oku linga kulo etaili okuti, omunu lomunu o linga eci ca sunguluka kovaso aye,* 9 momo handi ka wa iñilili vocitumãlo cepuyuko+ haico ocipiñalo Yehova Suku yene a eca kokuene. 10 Eci vu yoka o Yordão+ loku tunga vofeka Yehova Suku yene a eca kokuene oco vu yi piñale, eye o ko wĩhi epuyuko liovanyãli vene vo ñuali kuenje vu tunga loku kolapo.+ 11 Kocitumãlo cina Yehova Suku yene a nõla oco ku kale onduko yaye,+ vu sukila oku nenako ovina viosi ñasi oku vu handeleki ndeci: ovilumba vioku pia elisi, ovilumba viene, lonepa yene yekũi,+ olombanjaile viene, locilumba cohuminyo ene wa likuminyi ku Yehova. 12 Vu ka sanjukila kovaso a Yehova Suku yene,+ ene kumue lomãla vene valume, lomãla vene vakãi, lapika vene valume, lapika vene vakãi kuenda u Lewi o kasi vokati kalupale* ene, momo eye ka kuete onepa layimue ale ocipiñalo lene.+ 13 Kuati utate oco ka vu ka eci ovilumba viene vioku pia elisi kocitumãlo cikuavo vu mola.+ 14 Vu sukila lika oku eca ovilumba viene vioku pia elisi kocitumãlo Yehova a nõla pokati kovikanjo viovikoti viene kuenda oko vu lingila ovina viosi ñasi oku vu handeleki.+

15 “Pole, olonjanja viosi eci vu yongola, vu pondola oku ponda ocinyama cimue loku lia ositu yaco+ ndomo ci likuata lesumũlũho Yehova Suku yene a eca kokuene valupale* ene osi. Omunu wosi wa vĩha lomunu ka vĩhile citava oku liako, ndeci ene wa endi oku lia ombambi ale osonge. 16 Pole, ka vu ka li osonde yaco;+ vu sukila oku yi pesila posi ndovava.+ 17 Ka vu ka taviwa okuti vu lila valupale* ene onepa yekũi yolomema, ovinyu yokaliye, ulela wene, olonuñulu viovinyama viene,+ lovilumba viohuminyo, lovilumba vi eciwa lutima wosi, ale ombanjaile yeka liene. 18 Vu ka lila ovilumba viaco kovaso a Yehova Suku yene kocitumãlo cina Yehova Suku yene a ka nõla,+ ene kumue lomãla vene valume, lomãla vene vakãi, lapika vene valume, lapika vene vakãi kuenda va Lewi va kasi vokati kalupale* ene kuenje vu ka sanjukila kovaso a Yehova Suku yene kovopange ene osi. 19 Osimbu vu kasi vofeka yene, kuati utate oco ka vu ka tati lãvi va Lewi.+

20 “Eci Yehova Suku yove a vokiya ocikanjo cove,+ ndomo eye a likuminya kokuove+ kuenje ove o popia hati: ‘Ndi yongola oku lia ositu,’ omo lionjongole yove yoku lia ositu, o pondola oku lia ositu olonjanja viosi o yongola.+ 21 Nda ocitumãlo Yehova Suku yove a ka nõla oco a kapeko onduko yaye+ ci kasi ocipãla love, o sukila oku ponda ovinyama vimue pokati kocunda cove colongombe ale colomeme Yehova a eca kokuove, ndomo nda ku handeleka, loku lia ositu yaco olonjanja viosi o yongola valupale* o kasi. 22 O sukila oku ci lia ndeci ove o lia ombambi kuenda osonge;+ ci kaile omunu wa vĩha ci kaile omunu ka vĩhile citava oku liako. 23 Ka citava oku lia osonde,+ momo osonde oyo omuenyo+ kuenda ka citava okuti, o lia omuenyo letimba liaco. 24 Ka citava oku yi lia. O sukila oku yi pesila posi ndeci o pesela ovava.+ 25 Ka citava oku yi lia oco ovina vi ende ciwa love kumue lomãla vove, momo o kasi oku linga eci ciwa kovaso a Yehova. 26 Eci wenda kocitumãlo Yehova a ka nõla, ambata lika ovina viove vi kola lovilumba viohuminyo. 27 Oko o ka lumbila ovilumba viove vioku pia elisi, ositu kuenda osonde+ kutala wa Yehova Suku yove kuenje osonde yovilumba viove o sukila oku yi pesila kutala+ wa Yehova Suku yove, pole, ositu yaco citava oku yi lia.

28 “Kuati utate oco vu pokoli kolondaka viosi ñasi oku vu handeleki okuti, ovina viosi vi enda ciwa lene kumue lomãla vene, momo vu kasi oku linga eci ciwa leci ca sunguluka kovaso a Yehova Suku yene.

29 “Eci Yehova Suku yove a nyõla olofeka vina o ka tundisa+ kuenje o tunga vofeka yavo, 30 kuata utate oco ku ka yapuisiwe eci ovio vi kunduiwa kovaso ove. Ku ka pulise catiamẽla kolosuku viavo hoti: ‘Olofeka evi via enda oku vumba ndati olosuku viavo? Ame ndi ci lingavo.’+ 31 Ku ka linge ovina viaco ku Yehova Suku yove, momo ovio via lingila ovina vialua viumbondo olosuku viavo vina okuti Yehova wa vi suvuka, handi vali va timĩha vondalu omãla vavo valume lomãla vavo vakãi loku va lumbila olosuku viavo.+ 32 Olondaka viosi ndi kasi oku vu sapuili etaili, vu sukila oku vi kapako lutate.+ Ko ka vokiyi kondaka yaco ndaño oku tepululako.+

13 “Nda pokati kene pa molẽha uprofeto umue ale ukuakulota olonjoi kuenje o likuminya kokuene ondimbukiso pamue ocina cimue ci komõhisa, 2 kuenda ondimbukiso ale ocina caco ci komõhisa eye a ku sapuili ca tẽlisiwa muẽle kuenje eye o popia hati: ‘Linga tu kuami olosuku vikuavo, olosuku vina ka wa kũlĩhĩli kuenda tu vi vumbi,’ 3 ko ka yeveleli kolondaka viuprofeto waco ale viukualonjoi,+ momo Yehova Suku yene, o kasi oku vu seteki+ oco a limbuke nda ene vu sole muẽle Yehova Suku yene lutima wene wosi, lomuenyo wene wosi.+ 4 Yehova Suku yene eye lika vu sukila oku kuama, haeye vu sumbila, loku amamako oku kuama ovihandeleko viaye kuenda oku yevelela kolondaka viaye; eye lika vu vumba haeye vu kakatela.+ 5 Pole, uprofeto ale ukualonjoi o sesamẽla oku pondiwa,+ momo eye wa ku vetiyi oku sinĩla Yehova Suku yene oco a ku yapuisi vonjila Yehova Suku yene una wa kupi kofeka Yegito haeye wa ku yovoli konjo yupika a ku handeleki oku endela. Kuenje tundisi pokati kene ocina cosi ca vĩha.+

6 “Nda manjove, omõla a ina yove, ale omõlove ulume, pamue omõlove ukãi, ale ukãi wove, pamue ekamba liove, o seteka oku ku kisika vuyombeki poku popia hati: ‘Tu ende oco tu ka vumbe olosuku vikuavo,+ olosuku vina okuti, ci kaile ove pamue vakukululu yove ka va vi kũlĩhĩle, 7 okuti olosuku viomanu va ku ñuali, ci kaile vina vi kasi ocipepi, ale vievi vi kasi ocipãla lene, oku upisa konele yimue yofeka toke konele yikuavo yofeka, 8 ku ka tave oku yapuisiwa laye ale oku u yevelela+ ndaño oku u kuatela ohenda pamue oku u teyuila; 9 pole, o sukila oku ponda muẽle omunu waco.+ Eka liove olio li lianga oku u olõhẽla oco a fe, noke ovaka vomanu vosi.+ 10 Kuenje o sukila oku u sosõla lovawe toke eci a fa,+ momo eye wa sanda oku ku yapuisa oco o liwekepo oku kuama Yehova Suku yove, una wa kupi kofeka Yegito konjo yupika. 11 Eci va Isareli vosi va ka ci yeva, va ka kuata usumba kuenje ovo lalimue eteke va ka linga vali eci cĩvi pokati kene.+

12 “Nda pokati kalupale Yehova Suku yove a eca kokuove oco o tungemo wa yeva okuti, 13 ‘Omanu vamue vãvi va tunda pokati kove oco va yapuise olonungi viofeka yavo loku popia vati: “Tu endi, tu ka fendeli olosuku viñi,” okuti olosuku vina ka wa kũlĩhĩli,’ 14 kũlĩhĩsa ondaka yaco loku yi konomuisa lutate;+ nda ondaka yaco yocili muẽle okuti ovina evi viumbondo via lingiwa pokati kove, 15 o sukila oku ponda olonungi violupale luaco losipata.+ Ovina viosi vi kasi volupale luaco, oku kongelamo oviunda, vi pondiwe+ losipata. 16 Ongoluila pocitanda ovina viavo viosi wa pundi, loku timĩha olupale londalu kuenje ovina wa pundi vi eciwe ndocilumba ku Yehova Suku yene. Oluo lu kala ovingululu otembo ka yi pui. Kuenje lalimue eteke mu ka tumbuluiwa vali. 17 Eka liove ka li ka kuate lacimue ca nõliwila oku nyõliwa,+ oco Yehova a liwekepo oku lekisa onyeño yaye kuenje o lekisa ohenda locisola, loku vokiya epata liove ndeci a lisilile la vakukululu yove.+ 18 Vu sukila oku pokola* ku Yehova Suku yene poku kapako ovihandeleko viaye ñasi oku vu handeleki etaili, loku linga eci ca sunguluka kovaso a Yehova Suku yene.+

14 “Ene vumãla va Yehova Suku yene. Ka citava okuti vu li tãla tãla+ pamue oku li pemula pupolo* omo liomunu wa fa.+ 2 Momo ove wufeka yimue yi kola+ ku Yehova Suku yove kuenda Yehova wa ku nõla oco o linge ofeka yaye okuti, ocipiñalo caye cilikasi* pokati komanu vosi va kasi kilu lieve.+

3 “Ko ka li ovina via vĩha.+ 4 Ovinyama citava okuti vu vi lia vievi:+ ongombe, omeme, ohombo, 5 osonge, ombambi, onusi, ohõha, omunya, omalanga kuenda okasenda. 6 Vu lia lika ovinyama vi kuete akonjo a toka levi vi lukola. 7 Ka citava okuti vu lia ovinyama vi kuete akonjo a toka haivio vi lukola ndeci: ongamelo, ondimba, ohuita, momo ovio vi lukola, pole, ka vi kuete akonjo a toka. Ovio, via vĩha kokuene.+ 8 Ka citava oku liavo ongulu, momo yi kuete akonjo a toka, pole ka yi lukola. Oyo, ya vĩha kokuene. Ka citava oku lia ositu yaco ndaño oku lamba kocivimbi caco.

9 “Ovinyama viosi vio vovava okuti ovio citava oku vi lia vievi: Cosi ci kuete ovilele kuenda akaka, citava oku ci lia.+ 10 Pole, ka citava oku lia ovinyama ka vi kuete ovilele kuenda akaka. Ovio, via vĩha kokuene.

11 “Citava oku lia olonjila viosi via yela. 12 Pole, olonjila ka citava okuti vu vi lia vievi: ongonga yulombo, ohokohoko lomungu,+ 13 okapamba, okaliama ka tekãva, lolombuto viosi viociselẽle, 14 lapata aiñi aiñi ovikuamanga, 15 lombo, locimbamba, lolimbondo lapata aiñi aiñi olongonga, 16 ocimbamba citito, locihungulu, 17 ohombe yo venyãla, lohumbihumbi, lombundambunda, 18 onyañe, lapata aiñi aiñi viapanda, lomuipui kuenda olundilili. 19 Apata osi ovipuka vi palãla via vĩha kokuene. Ka citava okuti vu vi lia. 20 Olonjila viosi via yela citava oku vi lia.

21 “Ko ka li ocinyama cimue okuti ca lifila.+ Ove o sukila oku ceca kocingendeleyi ci kasi pokati kalupale* ove kuenda eye o pondola oku ci lia, ale citava oku ci landisa kocingendeleyi. Momo ove wumunu umue o kola ku Yehova Suku yove.

“Ku ka teleke ositu yokahombo vasenjele a inaco.+

22 “Vu sukila oku eca onepa yekũi yombuto yosi yima vepia liene unyamo lunyamo.+ 23 Vu lia onepa yekũi yolomema viene, yovinyu yene yokaliye, lulela wene, lonuñulu yoviunda viene kuenda yomeme yene kovaso a Yehova Suku yene vocitumãlo cina eye a nõla oco mu kale onduko yaye+ kuenje vu lilongisa oku sumbila Yehova Suku yene olonjanja viosi.+

24 “Pole, nda ungende waco walua kokuene kuenda ka vu tẽla oku ambata ovina viaco kocitumãlo Yehova Suku yene a nõla ndocitumãlo mu kala onduko yaye+ omo okuti kocitumãlo caco kupãla kokuene (omo Yehova Suku yene u sumũlũisi), 25 ovina viaco vu vi landisa kuenje olombongo viaco vu vi ambata peka poku enda kocitumãlo Yehova Suku yene a ka nõla. 26 Olombongo viaco citava oku landa lavio ovina viosi vu yongola ndeci, ongombe, omeme, ohombo, ovinyu, lovina vikuavo vi koluisa kuenda ovina viosi vu yongola; kuenje oko vu ka vi lila kovaso a Yehova Suku yene loku sanjuka, ove la vakuanjo yove.+ 27 Ku ka tate lãvi u Lewi o kasi valupale ene,+ momo eye ka kuete onepa ale ocipiñalo cimue love.+

28 “Kesulilo lianyamo atatu, o sukila oku nena onepa yekũi yovaima ove yunyamo waco loku vi kapa valupale.+ 29 Noke u Lewi una ka kuete onepa ale ocipiñalo cimue love, locingendeleyi, lomõla ka kuete isia* kuenda ocimbumba ci kasi valupale ove, veya kuenda va lia onepa yove,+ oco Yehova Suku yove a ku sumũlũise kovina viosi o linga.+

15 “Kesulilo lianyamo epanduvali, vu sukila oku feta olofuka.+ 2 Oku feta kuaco ku kale ndoco: Wosi wa levalisa ka pingi vali ofuka yaye kukuavo. Eye ka ka kisike omunu ukuavo ale manjaye oku feta ofuka, momo ci tendiwa oku yovuiwa kofuka kovaso a Yehova.+ 3 Citava okuti, ove o pinga ofuka yove kocingendeleyi,+ pole, ku ka kisike manjove oku feta ofuka kokuove. 4 Pokati kene lomue ka ka linge ohukũi, momo Yehova o ko sumũlũisi+ vofeka yina Yehova Suku yene a kasi oku eca kokuene oco vu yi piñali, 5 pole, te lika nda vu pokola lutima wosi kondaka ya Yehova Suku yene loku kapako ovihandeleko ñasi oku eca kokuene etaili.+ 6 Momo Yehova Suku yene, o ka vu sumũlũisi ndeci a likuminya kokuene kuenda vu kondika olofeka vialua, pole, ene ka vu ka sukila oku levala;+ kuenje vu ka tumĩla olofeka vialua, pole, ovo ka va ka tẽla oku vu tumĩli.+

7 “Nda umue pokati ka vamanjove wa linga ohukũi pokati kalupale ove o vofeka yina Yehova Suku yove a kasi oku ku ĩha, ku ka tĩlise utima wove ale oku limĩla manjove ohukũi.+ 8 Momo o sukila oku lekisa ocali kokuaye poku u kuatisa+ kuenda oku undika ovina viosi eye a sukila ale vievi a kambela. 9 Kuata utate oco ku ka kuate ovisimĩlo evi vĩvi vutima wove viokuti: ‘Unyamo wepanduvali okuti, unyamo woku yovola u kasi ocipepi,’+ kuenje o liwekapo oku lekisa ohenda ku manjove ohukũi kuenda ku wĩha cimue. Nda eye wa likutilila ku Yehova oku u lomboluila eci wo linga, ove o ka kuata ekandu.+ 10 O sukila oku lekisa ohenda kokuaye+ kuenda ove* ku ka ci linge locikukũi, momo eli olio esunga lieci Yehova Suku yove a ka sumũlũisila ovopange ove osi kuenda ovina vikuavo o linga.+ 11 Momo vofeka yaco, olonjanja viosi mu ka kala olohukũi.+ Eli olio esunga lieci ñasilili oku ku handeleka okuti: ‘O sukila oku lekisa ohenda ku manjove o kasi oku tala ohali, haeye ohukũi o kasi vofeka yove.’+

12 “Nda umue pokati ka vamanjove u Heveru, ci kaile ulume ale ukãi wa landisiwa kokuove kuenda wa ku vumba vokuenda kuanyamo epandu, kunyamo wepanduvali ove o sukila oku u yovola.+ 13 Eci u yovola, ku ko tume ño ovoko. 14 O sukila oku lekisa ohenda poku u wĩha ocina cimue ci tunda vocunda cove, eci ca suliwa pocimbandi, leci ca tunda pocikoselo culela kuenda ovinyu. Ndeci Yehova Suku yove a ku sumũlũisa, ove ecavo ku manjove. 15 Ivaluka okuti ove wa kala upika kofeka Yegito kuenda Yehova Suku yove wa ku yovola. Eli olio esunga lieci ñasilili oku ku handeleka etaili okuti o lingavo ovina viaco.

16 “Pole, nda eye wa ku sapuila hati: ‘Si yongola oku enda! omo eye o ku sole kuenda o solevo vakuanjo yove vosi, omo eye o kuete esanju osimbu a kasi love,+ 17 ove o tikula ociketelo cimue, o tombola laco ketũi liaye kocikuli cepito kuenje eye o linga upika wove vokuenda kuomuenyo waye wosi. Cimuamue haico o linga lupika wove wukãi. 18 Ku ka sime okuti ka ca sungulukile oku u yovola kuenda eye o ku siapo, momo anyamo epandu a ku talavayela, a velapo upange u lingiwa lonalavãyi yi fetiwa kuenda Yehova Suku yove wa ku sumũlũisa kovina viosi via lingiwa.

19 “O sukila oku kolisa olonuñulu viosi vialume viovinyama viove kuenda violomeme viove ku Yehova Suku yove.+ Ka citava oku linga upange laumue lonuñulu yocunda cove,* ndaño oku pemula onuñulu yolomeme viove. 20 Ove kumue la vakuanjo yove citava okuti vu yi lila kovaso a Yehova Suku yove unyamo lunyamo kocitumãlo cina Yehova a nõla.+ 21 Pole, nda ocinyama caco ca lemãla okuti, ci teñela, haico omeke, pamue ci kuete ocitangi cikuavo, ka citava oku ci lumbila ku Yehova Suku yove.+ 22 O sukila oku ci lila vokati kalupale* ove, ci kaile omunu wa vĩha lomunu wa yela, ndeci ci liwa ombambi yimue ale osonge.+ 23 Pole, ka citava oku lia osonde yaco;+ o sukila oku yi pesila posi ndovava.+

16 “Ivaluka osãi ya Aviva* loku sambiliya o Paskoa ya Yehova Suku yove,+ momo kosãi ya Aviva oco Yehova Suku yove a kupa Kegito luteke.+ 2 O sukila oku lumba ocilumba co Paskoa ku Yehova Suku yove,+ copiwa kolomeme viove kuenda koviunda viove+ vocitumãlo cina Yehova a nõla oco mu kale onduko yaye.+ 3 Ka citava oku lia cimue ci kuete etumbisa kumue locilumba;+ vokuenda kuoloneke epanduvali, o sukila oku lia ombolo ka yi kuete etumbisa okuti, ombolo yohali, momo ove wa tunda kofeka Yegito lonjanga.+ Ci linga oco o ivaluke eteke wa tunda kofeka Yegito oloneke viosi viomuenyo wove.+ 4 Vocikanjo cove cosi ka mu ka sangiwe lacimue ci kuete etumbisa vokuenda kuoloneke epanduvali,+ ndaño ositu o ka lumba koñolosi yeteke liatete, ka citava okuti yi supapo toke komẽle yikuavo.+ 5 Ka citava okuti o lumbila ocilumba co Paskoa kalupale osi Yehova Suku yove a kasi oku eca kokuove. 6 Pole, ci lingiwa lika kocitumãlo Yehova Suku yove a nõla oco ku kale onduko yaye. O sukila oku eca ocilumba co Paskoa koñolosi poku iñila kuekumbi,+ kotembo ya sokiyiwa eci wa tunda Kegito. 7 O teleka ocilumba caco loku ci lila+ kocitumãlo Yehova Suku yove a ka nõla+ kuenda komẽle o tiukila volombalaka viove. 8 Oloneke epandu o lia ombolo ka yi kuete etumbisa kuenda keteke liepanduvali olio eteke liohongele yilikasi ku Yehova Suku yove. Ka citava oku linga upange laumue.+

9 “O tenda olosemana epanduvali. O fetika oku tenda olosemana epanduvali eci o fetika oku kapa omĩla poku ungula otiliku.+ 10 Eci o lingila Yehova Suku yove Ocipito Colosemana+ kumue locilumba ceciwa lutima wosi okuti, ca tunda peka liove, o ceca ndomo Yehova Suku yove a ku sumũlũisa.+ 11 O sanjukila kovaso a Yehova Suku yove, ove kumue lomõlove ulume, lomõlove ukãi, lupika wove wulume lupika wove wukãi, lu Lewi una wa tunga valupale* ove, locingendeleyi, lomõla ka kuete isia* kuenda locimbumba ci kasi pokati kove, vocitumãlo cina Yehova Suku yove a nõla oco mu kale onduko yaye.+ 12 Ivaluka okuti ove wa kala upika Kegito+ kuenje pokola loku kapako olonumbi evi.

13 “O linga Ocipito Colosinge*+ oloneke epanduvali poku ungula apako ove a suliwa pocimbandi, ale ovinyu ya pangiwa pocikoselo cayuva pamue pocikoselo culela. 14 Sanjuka vokuenda kuocipito cove,+ ove kumue lomõlove ulume, lomõlove ukãi, lupika wove wulume, lupika wove wukãi, lu Lewi, locingendeleyi, lomõla ka kuete isia kuenda locimbumba ci kasi pokati kalupale ove. 15 Oloneke epanduvali, o lingila Yehova Suku yove ocipito+ kocitumãlo Yehova a nõla, momo Yehova Suku yove o ka sumũlũisa ovaima ove osi lovina viosi o linga+ kuenje o ka kuata esanju.+

16 “Olonjanja vitatu vunyamo, alume vosi va ka molẽha kovaso a Yehova Suku yove kocitumãlo eye a nõla okuti: Kocipito Colombolo ka vi Kuete Etumbisa,+ Kocipito Colosemana+ kuenda Kocipito Colosinge,*+ lomue pokati kavo ka keye ovoko kovaso a Yehova. 17 Ocilumba omunu lomunu a ka nena ceciwe ndeci ci likuata lesumũlũho Yehova Suku yove a ka eca kokuove.+

18 “Ove o sukila oku nõla olonganji+ kuenda asongui vocikoti locikoti valupale* osi Yehova Suku yove a eca kokuove kuenda ovo va sukila oku tetuluila omanu lesunga. 19 Ku ka pengise esunga,+ ndaño oku lekisa ocame,+ ale oku tava ovitukiko, momo ovitukiko vi tateka omunu oku lekisa olondunge+ kuenda vi pengisa olondaka viomunu ukuesunga. 20 Esunga, esunga olio o sukila oku sanda+ oco wamameko oku kala komuenyo kuenda oku piñala ofeka Yehova Suku yove a eca kokuene.

21 “Ku ka kũle uti umue oco o u fendele+ ocipepi lutala ove o pangela Yehova Suku yove.

22 “Ndaño muẽle oku li songela ove muẽle ongunji yimue+ okuti ocina cimue Yehova Suku yove a nyãle.

17 “Ku ka lumbile Yehova Suku yove ongombe, ale omeme yimue ya lemãla pamue yi kuete etondelo, momo ocina cimue cumbondo ku Yehova Suku yove.+

2 “Sokolola okuti pokati kove pa sangiwa ulume umue ale ukãi umue okuti, o kasi volupale lumue pokati kalupale ana Yehova Suku yove a eca kokuove kuenda omunu waco o kasi oku linga ocina cimue ka ca sungulukile kovaso a Yehova Suku yove kuenda o lueya ocisila caye,+ 3 kuenje eye o yapuisiwa loku fendela olosuku vikuavo kuenda oku vi kekamẽla, ale o kekamẽla ekumbi pamue osãi, ale olohoka viosi vio kovailu+ okuti, ocina cimue sia handelekele.+ 4 Eci va ku ci sapuila, ale o yeva ondaka yaco, o sukila oku kũlĩhĩsa lutate ocitangi caco. Nda wa limbuka+ okuti ocina caco cĩvi ca lingiwa muẽle ko Isareli, 5 o sukila oku nena ulume ale ukãi wa linga ocina caco ka ca sungulukile kosamua yolombundi violupale kuenje ulume waco ale ukãi o sosũiwa lovawe toke eci a fa.+ 6 Luvangi* wolombangi vivali ale vitatu,+ omunu una o sesamẽla oku fa, a pondiwe muẽle. Pole, nda uvangi weciwa lika lombangi yimosi, ka citava okuti omunu waco o pondiwa.+ 7 Ovaka olombangi o-o a lianga oku u olõhẽla oco a fe, noke ovaka omanu vosi. Ove o sukila oku tundisa eci cĩvi pokati kove.+

8 “Nda pokati kalupale ove pa molẽha ocitangi cimue cinene okuti, ka ca lelukile oku ci tetulula, ci kaile ocitangi cimue mua kongela oku pesiwa kuosonde,+ ale ocitangi cimue cesombiso ca votuiwa, pamue elinga limue mua kongela ungangala, ale ocitangi coku lihoya, ove o sukila oku ambata ocitangi caco kocitumãlo cina Yehova Suku yove a nõla.+ 9 Kuende kovitunda va Lewi kuenda konganji+ yi kasi oku linga upange koloneke viaco, loku va lomboluila ocitangi cove kuenje ovo va ku sapuila onjila o sukila oku kuama.+ 10 Ove o sukila oku kuama onjila ovo va ku sapuila vocitumãlo Yehova a nõla. Kuata utate oco o linge ovina viosi ovo va ku sapuila. 11 Kapako ocihandeleko va lekisa kokuove kuenda kuama onjila ovo va ku sapuila.+ Ku ka yapuke konjila va ka ku sapuila ci kaile kondio ale kepĩli.+ 12 Omunu wosi o lekisa esino poku yuvula oku yevelela ocitunda ci kasi oku vumba Yehova Suku yove ale onganji, eye o sesamẽla oku fa.+ O sukila oku tundisa eci cĩvi pokati ka va Isareli.+ 13 Kuenje omanu vosi va ka ci yeva, va ka kuata usumba kuenda lalimue eteke va ka lekisa vali esino.+

14 “Eci iñila vofeka Yehova Suku yove a kasi oku eca kokuove kuenda o piñala ofeka yaco loku tungamo kuenje o popia hati: ‘Linga ndi li nõlele osoma ndeci olofeka viosi via ndi ñuala vi linga,’+ 15 ove o sukila oku nõla lika osoma yina Yehova Suku yove a nõla.+ O sukila oku nõla osoma yimue pokati ka vamanjove. Ka citava okuti o nõla ocingendeleyi okuti hamanjoveko. 16 Pole, omunu o nõliwa ka ka kuate olokavalu vialua,+ ale oku lingisa okuti omanu va enda Kegito oku kopa olokavalu vialua,+ momo Yehova wa ku sapuili hati: ‘Lalimue eteke ko ka tiukili vali konjila yaco.’ 17 Ka citava okuti eye o kuata akãi valua, oco utima waye ka u ka yapuisiwe;+ kuenje ka citava okuti o kuata opalata yalua kuenda ulu.+ 18 Eci a tumãla kocalo cusoma waye, eye o lisonehela velivulu* limue okopia yimue Yocihandeleko eci, cina copiwa kocihandeleko ca selekiwile lovitunda va Lewi.+

19 “Eye o kala lelivulu liaco kuenje o sukila oku li tanga oloneke viosi viomuenyo waye,+ oco a lilongise oku sumbila Yehova Suku yaye, loku pokola kolondaka viosi Viocihandeleko caco kuenda oku kapako olonumbi viaco.+ 20 Nda eye o ci linga, utima waye ka u ko vetiya oku li velisapo pokati ka vamanjaye kuenda ka ka yanduluka ocihandeleko ci kaile kondio, ale kepĩli oco amameko oku kala otembo yalua kuviali waye, eye kumue lomãla vaye pokati ka va Isareli.

18 “Ovitunda va Lewi locikoti cosi ca va Lewi, ka va ka tambula onepa ale ocipiñalo kumue la va Isareli. Ovo va ka lia ovilumba viondalu vi lingiwila Yehova okuti, oco ocipiñalo cavo.+ 2 Ovo ka va ka kuate ocipiñalo pokati ka vamanjavo. Yehova eye ocipiñalo cavo ndeci a va sapuilile.

3 “Omoko ovitunda va ka kuata pokati komanu yeyi: Wosi eca ocilumba ci kaile congombe, ale comeme, o sukila oku eca kocitunda epepe, olombanjo kuenda imo. 4 Ovaima atete olomema viove, lovinyu yove yokaliye, lulela wove kuenda ovonya atete opiwa kocunda cove, o sukila oku vi eca kokuaye.+ 5 Yehova Suku yove wo nõla kumue lomãla vaye vosi pokati kovikoti viove oco a linge upange vonduko ya Yehova otembo yosi.+

6 “Pole, nda u Lewi o tunda volupale lumue ko Isareli kuna eye a kala+ kuenda o yongola oku enda kocitumãlo Yehova a nõla,*+ 7 eye o sukila oku talavayako vonduko ya Yehova Suku yaye ndeci vamanjaye vosi va Lewi va lingainga, vana va kasi oku vumbila kovaso a Yehova.+ 8 Eye o tambula onepa yimuamue yokulia ndeyi yavo,+ oku kongelamo eci eye a tambula omo lioku landisa ovokuasi a vakukululu yaye.

9 “Eci iñila vofeka Yehova Suku yove a ku ĩha, ku ka setukule oku linga ovina viumbondo violofeka viaco.+ 10 Pokati kove ka pa ka sangiwe laumue o yoka omõlaye ulume ale omõlaye ukãi vondalu ndocilumba,*+ omunu o sandiliya oku tãha,+ ukuombanda,+ ukuakusandiliya owanji wovina vĩvi,+ onganga,+ 11 umue o loha vakuavo, umue o sandiliya vakuakuvangula lolondele,+ ukuakutãha,+ ale omunu o kũlĩhĩsa vana va fa.+ 12 Omunu wosi o linga ovina viaco, o suvukiwa la Yehova kuenda omo liovilinga viaco viumbondo, Yehova Suku yove o kasi oku tundisa omanu vaco kovaso ove. 13 O sukila oku li lekisa okuti, wa pua etondelo kovaso a Yehova Suku yove.+

14 “Momo omanu o kasi oku tundisa va siata oku yevelela vakuombanda,+ loku tãha,+ pole, Yehova Suku yove ka ecelela okuti o linga ovina ndevi. 15 Yehova Suku yove pokati ka vamanjove o ka ku katuila uprofeto umue ndame. Ene vu sukila oku u yevelela.+ 16 Eci ci lingiwa omo lieci wa pinga ku Yehova Suku yove ko Horeve keteke wa liongololi*+ loku popia hati: ‘Ku ka ecelele okuti ndi yevelela ondaka ya Yehova Suku yange, ale oku mola ondalu eyi yinene, sanga ndi fa.’+ 17 Kuenje Yehova wa ndi sapuila hati: ‘Eci ovo va popia ca sunguluka. 18 Ndi va katuila uprofeto umue ndove pokati ka vamanjavo+ kuenje ñapa olondaka viange vomẽla waye+ kuenda eye o ka va sapuila ovina viosi ndo handeleka.+ 19 Ndi kangisa omunu wosi ka yevi olondaka viange vina eye a ka vangula vonduko yange.+

20 “‘Nda uprofeto umue o lekisa esino poku vangula ondaka yimue vonduko yange okuti, sio yi tumile oku yi vangula, ale o vanguila vonduko yolosuku vikuavo, uprofeto waco a pondiwe muẽle.+ 21 Pamue vu popia vutima wene ndoco: “Tu kũlĩha ndati okuti Yehova ka vanguile ondaka yaco?” 22 Eci uprofeto a vanguila vonduko ya Yehova kuenje ondaka yaco ka yi tẽlisiwa ale hayociliko, ci lekisa okuti Yehova haeyeko wa popia ondaka yaco. Uprofeto waco wa lekisa esino poku vangula. Ku ko kuatele usumba.’

19 “Eci Yehova Suku yove a ka kundula omanu vana va kasi vofeka yina Yehova Suku yove a laika oku ku ĩha kuenje ove o va tundisamo kuenda o tunga valupale avo lo volonjo viavo,+ 2 o sukila oku nõla alupale atatu pokati kofeka yove yina Yehova Suku yove a eca kokuove oco o yi piñale.+ 3 Ove o sukila oku tepisa volonepa vitatu ocikanjo cofeka yina Yehova Suku yove a eca kokuove oco o yi piñale kuenda oku pongiya atapalo oco omondi yosi yi tilile kimbo limue pokati kalupale aco.

4 “Eci ci sukiliwa oku lingiwa komondi yi tilila kalupale aco, oco yi kale lomuenyo ceci: Nda eye wa ponda ukuavo okuti ka ci lingile ocipango kuenda ko pondele omo lionya;+ 5 ndeci, osimbu eye a enda lukuavo vusenge oku tiaña olohũi kuenda o tikula ondiaviti oco a tete uti, pole, ondiaviti yi tunda kocikundo kuenda yi veta ukuavo kuenje o fa, omondi yi sukila oku tilila kimbo limue pokati kalupale aco oco yi popeliwe.+ 6 Handi vali, nda olupale lu kasi calua ocipãla, ukuakufetuluinya osonde+ o pondola oku landula omondi lonyeño yalua,* loku yi kuata kuenda o yi ponda. Pole, omondi yaco ka yi sesamẽla oku fa momo ka ya suvukile ukuavo.+ 7 Eli olio esunga lieci ndi ku handelekela okuti: ‘Tepi ofeka valupale atatu.’

8 “Nda Yehova Suku yove o sanjavalisa ocikanjo cove ndeci a likuminya ku vakukululu yove+ kuenje eye eca kokuove ofeka yosi eye a likuminya oku eca ku vakukululu yove,+ 9 kala omunu umue wa koleliwa poku pokola kocihandeleko cosi ñasi oku ku ĩha etaili okuti, o sola Yehova Suku yove loku endela volonjila viaye+ kuenje o vokiya alupale atatu kalupale ana akuavo atatu.+ 10 Lonjila eyi ka ku ka pesiwa osonde yomanu va pua eko,+ vofeka Yehova Suku yove a ku ĩha ndocipiñalo kuenda ku ka kuata eko liosonde layimue.+

11 “Nda omunu umue wa suvuka ukuavo+ kuenda wo lavekela oco o lemẽhe kuenje u ponda, noke omondi ya tilila kimbo limue pokati kalupale aco, 12 akulu vo volupale luaye, vo upamo kuenje vo weca peka liukuakufetuluinya osonde kuenda eye u ponda.+ 13 Ku ko kuatele ohenda kuenda o sukila oku upa eko liosonde yomunu ka kuete eko pokati ka va Isareli,+ oco ovina viosi vi ende ciwa love.

14 “Eci o tambula ocipiñalo cove vofeka Yehova Suku yove a kasi oku eca kokuove oco o ci piñale, ku ka nyõle olondimbukiso viongave viomanu o lisungue lavo,+ kocitumãlo vakukululu yove va kapa ongave.

15 “Ombangi yimosi ka citava okuti yi pisa omunu umue omo liokulueya kuaye ale ekandu a linga.+ Luvangi* wolombangi vivali ale wolombangi vitatu ocitangi ci sukila oku tetuluiwa.+ 16 Nda ombangi yimue yuhembi ya imbila uvangi omunu umue kuenje eye o lundila ukuavo okuti wa linga ovina vĩvi,+ 17 omanu vaco vavali va li kuetele ondaka va talame kovaso a Yehova okuti, kovaso yovitunda kuenda yolonganji vi linga esombiso koloneke viaco.+ 18 Olonganji vi ka kũlĩhĩsa ocitangi caco+ kuenda nda ombangi yaco ya imba uvangi wesanda poku lundila manjaye ovina vĩvi, 19 ene vu sukila oku linga laye ndeci eye a yonguile oku linga ku manjaye+ kuenda o sukila oku imũla eci cĩvi ci kasi pokati kove.+ 20 Omanu vana va supapo eci va ka ci yeva va ka kuata usumba kuenje ovo lalimue eteke va ka linga cimue cĩvi ndeci pokati kove.+ 21 Ku ko kuatele ohenda:+ Eye o sukila oku feta omuenyo lomuenyo, iso liso, eyo leyo, eka leka, omãhi lomãhi.+

20 “Nda wendi oku ka liyaka lovanyãli vene kuenje vu limbuka okuti, olokavalu viavo, lakãlu avo kuenda asualali vavo valua okuti ene vu sule, ko ka va kuateli usumba, momo Yehova Suku yene una wa kupi kofeka Yegito o kasi lene.+ 2 Osimbu ka wa endeli kuyaki, ocitunda ci sukila oku amela ocipepi loku vangula lomanu.+ 3 Eye o va sapuila hati: ‘A Isareli yeveleli, vu laika oku liyaka lovanyãli vene. Ko ka sumui. Ko ka kuati usumba, ale oku yokoka pamue oku luluma mekonda liavo, 4 momo Yehova Suku yene eye o vu pitili kovaso oco a vu yakeliko kovanyãli vene kuenje eye o ku yovoli.’+

5 “Asongui va sukilavo oku sapuila omanu vati: ‘Kuli hẽ omunu umue okuti wa tunga onjo yokaliye kuenje ka la kalamo? Omunu waco a tiukile konjo yaye. Sanga eye o ka fila kuyaki kuenje omunu ukuavo o ka kala vonjo yaye. 6 Helie wa kũla ocumbo cayuva kuenje konguile ayuva aco? Omunu waco a tiukile konjo yaye. Sanga eye o ka fila kuyaki kuenje omunu ukuavo o kongula ayuva aco. 7 Helie wa ka yonguile ukãi kuenje handi ko kuelele? Omunu waco a tiukile konjo yaye.+ Sanga eye o ka fila kuyaki kuenje ulume ukuavo o ka kuela ukãi waco.’ 8 Asongui va sukilavo oku pula omanu vati: ‘Helie o kuete usumba kuenda wa sumua?+ A tiukile konjo yaye, oco ka ka kokele vamanjaye oku kuata usumba ndeye.’*+ 9 Eci asongui va mala oku vangula lomanu, ovo va sukila oku nõla asongui volohoka oco va songuile omanu.

10 “Eci wendi oku ka liyaka lolupale lumue, tete vu sukila oku eca esapulo liombembua.+ 11 Nda va ku ĩhi etambululo liombembua kuenje va ecelela okuti wiñili volupale luaco, omanu vosi vu ka sangamo va ka linga vene oco va ku lingiliko upange wa tĩla kuenda va ka ku vumbi.+ 12 Pole, nda va likala oku linga ombembua lene kuenje va liyaka lene, ene vu sukila oku ñuala ocingonja olupale luaco, 13 noke Yehova Suku yene o ka eca olupale luaco povaka ene kuenje vu sukila oku ponda alume vosi losipata. 14 Pole akãi, lomãla, lovinyama kuenda ovina viosi vi kasi volupale, lovina viosi wa pundi vi linga viene+ kuenda vu lia ovina wa pundi kovanyãli vene, vana Yehova Suku yene a eca kokuene.+

15 “Eci oco vu ka linga lalupale osi a kasi ocipãla lene okuti, alupale ana ka a kasi ocipepi lomanu vaco. 16 Pole, valupale vomanu vana Yehova Suku yene a kasi oku eca kokuene ndocipiñalo, ka vu ka eceleli okuti mu siala ocina cimue lomuenyo.+ 17 O sukila oku va kundula okuti, va Hiti, va Amori, va Kanana, va Perisi, va Hivi kuenda va Yevusi+ ndomo Yehova Suku yene a vu handeleki; 18 oco ka va ka ku longisi oku kuama ovina viosi viumbondo ovo va lingila olosuku viavo, sanga vu vetiyiwa oku lingila ekandu Yehova Suku yene.+

19 “Nda wa ñuali ocingonja olupale lumue noke yoku liyaka lolupale luaco vokuenda kuoloneke vialua, loku lu tambula, ko ka nyõli oviti viaco londiaviti. Citava oku lia apako alio, pole, ko ka teti oviti viaco.+ Anga hẽ vu ñuala ocingonja uti umue wovusenge ndeci vu linga lomunu umue? 20 Vu nyõla lika uti una wa kũlĩhi okuti ka u liwa. Vu teta uti waco kuenje vu ñuala ocingonja olupale lu kasi oku liyaka lene toke eci olupale luaco lu kunduiwa.

21 “Nda omunu umue wa sangiwa okuti wa pondiwa vusenge wofeka Yehova Suku yene a eca kokuene oco vu yi piñali kuenda omunu waco wo ponda ka kũlĩhĩwile, 2 akulu vene kumue lolonganji viene+ va sukila oku endako kuenje vopa oseteko yocinãla ku sangiwa ocivimbi toke kalupale a kasi ocipepi. 3 Noke akulu vo volupale lu kasi ocipepi locivimbi va sukila oku upa onãle yimue yomange vocunda okuti, lalimue eteke ya lingile upange woku nãla okanga, 4 kuenje akulu vo volupale luaco, va sukila oku ambata onãle yaco yomange vocimbota* muli ono yovava okuti ka mua putuiwile ale oku kũlamo ombuto kuenje ovo va sukila oku teya osingo yonãle yaco yomange vocimbota caco.+

5 “Noke ovitunda va Lewi va ka amelako, momo Yehova Suku yove wa va nõla oco vo vumbe,+ loku tukula asumũlũho vonduko ya Yehova.+ Ovo va ka tukula ndomo ku tetuluiwa ovitangi viosi mua kongela ungangala.+ 6 Noke akulu vosi vo volupale lu kasi ocipepi locivimbi, va sukila oku sukuila ovaka avo+ kilu lionãle yomange yina ya teyiwa osingo vocimbota, 7 noke ovo va popie vati: ‘Ovaka etu ka a pesile osonde eyi, ndaño ovaso etu ka a muile oku pesiwa kuaco. 8 A Yehova, ku ka pise omanu vove va Isareli vana ove wa yovola+ kuenda ku ka ecelele okuti eko liosonde liomunu wa pua eko li amamako oku kala pokati komanu vove va Isareli.’+ Kuenje eko liosonde yaco ka li va wila. 9 Nda wa ci linga, upa eko liosonde liomunu wa pua eko pokati kove, poku linga eci ca sunguluka kovaso a Yehova.

10 “Nda ove enda oku ka liyaka lovanyãli vove kuenje Yehova Suku yove wa va kunduila kovaso ove kuenje ove o vambata kumandekua,+ 11 kuenje nda wa limbuka okuti pokati kolomandekua viaco pali ukãi umue wa posoka kuenje ove wa sola ukãi waco kuenda o yongola okuti o linga ukãi wove, 12 ove o sukila oku u wambata konjo yove. Ukãi waco a pemũle esinga liaye loku teta olonjala, 13 eye a lule uwalo waye wumandekua kuenda a kale vonjo yove. Ukãi waco o ka lila isiaye la inaye vokuenda kuosãi+ noke citava oku litokeka laye; kuenje ove o linga ulume waye kuenda eye o linga ukãi wove. 14 Pole, nda kua solele vali ukãi waco, u weca okuti enda+ kuosi a yongola. Puãi, ku ko landise lolombongo, ale oku u tata lãvi, momo wo kutisa osõi.

15 “Nda ulume umue o kuete akãi vavali kuenda eye o solepo vali umue okuti, ukuavo ci sule* kuenje kavali kavo vo citila omãla, pole, omõla uveli wa tiamẽla kukãi una ka soliwe,+ 16 keteke eye a eca ocipiñalo caye komãla vaye, ka citava okuti eca unuñulu komõla wukãi o soliwe oco a sepule omõla uveli wukãi ka soliwe, momo eye uveli waco. 17 Eye o sukila oku tenda omõla wukãi ka soliwe ndonuñulu yaye poku u wĩha olonepa vivali viovina viosi eye a kuete, momo eye epako liatete liongusu yaye yoku cita. Omoko yunuñulu yi tiamẽla kokuaye.+

18 “Nda omunu umue o kuete omõla umue okuti ukualonamalãla haeye wa sina kuenda ka pokola ku isiaye,+ ale ku inaye kuenje ovo va seteka oku u longa, pole, omõla ka yevelela kokuavo,+ 19 isiaye la inaye vo kuata loku u wambata kakulu puvelo wolupale luaye, 20 kuenje ovo va sapuila kakulu vo volupale luaco vati: ‘Omõletu u-u ukualonamalãla haeye wa sina kuenda ka tava oku pokola kokuetu. Eye ocisapanu+ haeye oholua.’+ 21 Alume vosi vo volupale luaye vo sosõle lovawe toke eci a fa. Momo ove o sukila oku imũla eci cĩvi pokati kove kuenje va Isareli vosi eci va ka ci yeva, va ka kuata usumba.+

22 “Nda omunu umue o linga ekandu limue okuti, o sesamẽla oku fa+ kuenda eye o pondiwa kuenje ove u tulika kuti,+ 23 ocivimbi caye ka ci ka kale kuti uteke wosi.+ Ove o sukila oku ci kenda keteke liaco, momo omunu o tulikiwa kuti wa siñaliwa la Suku+ kuenda ku ka vĩhise ofeka yove yina Yehova Suku yove a eca kokuove ndocipiñalo.+

22 “Nda o mola ongombe ale omeme yukuene okuti ya nyelela, ku ka linge ndu okuti kua yi muĩle.+ O sukila oku yi tiula ku muẽleaco. 2 Pole, nda muẽleaco ka tungile ocipepi love, ale ove kuo kũlĩhĩle, o sukila oku ambata ocinyama caco konjo yove kuenje ci kala love toke eci muẽleaco eya oku cupa. Kuenje o tiuwiya ocinyama caco kokuaye.+ 3 Eci oco o linga locimbulu caye, luwalo waye kuenda ovikuata viosi vina ukuẽle a nyelisa okuti, ove wa vi sanga. Ku ka linge ndu okuti kua vi muile.

4 “Nda wa mola okuti ocimbulu cukuene ale ongombe yaye ya kupukila vonjila, ku ka linge ndu okuti kua ci muile. O sukila oku kuatisa muẽleaco oku votola ocinyama.+

5 “Ukãi ka ka wale uwalo wulume, ndaño ulume ka ka wale uwalo wukãi. Momo wosi o linga ovina evi, ocina cimue cumbondo ku Yehova Suku yove.

6 “Nda ove wa sanga ocanju conjila yimue vonjila okuti muli omãla pamue asaila, ci kaile vuti ale posi kuenje ina yaco wa vutamẽla komãla ale kasaila, ku ka ambate ina yaco kumue lomãla vaco.+ 7 Ecelela okuti inaco enda, ove ambata lika omãla vaco. Nda wa ci linga cosi cenda ciwa love kuenda o kala otembo yalua.

8 “Nda wa tunga onjo yokaliye, o sukila oku ñualisako evindikiyo volusoka luaco,+ oco ku ka nene eko liosonde vonjo yove, nda umue wa kupukako.

9 “Ka citava okuti o kũla olombuto vivali vocumbo cove cayuva.+ Sanga ovina viosi vima kombuto wa kũla lovaima a tunda vocumbo cayuva, vi tambuiwa oco vieciwe kocitumãlo ci kola.

10 “Ku ka kutile ongombe locimbulu kokanga yimuamue poku lima.+

11 “Ku ka wale uwalo wa tongiwa kumosi lonanga yi vumbula kuenda yovalatanya.+

12 “O sukila oku tonga asusu kolongenge vikuãla viuwalo wove.+

13 “Nda ulume umue o kuela ukãi kuenje o litokeka laye, pole, noke u suvuka,* 14 kuenda eye u lundila omo liocituwa cĩvi loku vĩhisa onduko yaye poku popia hati: ‘Nda kuela ukãi u, pole, eci nda litokeka laye, sia sangele ondimbukiso yokuti eye ufeko wosombo,’ 15 kuenje isia la ina yufeko va sukila oku lekisa ondimbukiso yusombo waye kakulu va kasi pombundi yolupale. 16 Isia yufeko o sukila oku sapuila kakulu hati: ‘Nda ecele omõlange ufeko kulume u oco a linge ukãi waye, pole, eye wo suvuka,* 17 kuenda eye wo lundila omo liocituwa cĩvi poku popia hati: “Sia sangele komõlove ondimbukiso layimue yokuti eye ufeko wosombo.” Ondimbukiso yokuti omõlange ufeko wosombo, yeyi.’ Kuenje ovo va nyanyumuĩla onanga kovaso yakulu vo volupale. 18 Akulu vo volupale+ va ka kuata ulume waco loku u kangisa.+ 19 Ovo vo ko kisika oku feta 100 kolosiekele* viopalata loku vi eca ku isia yufeko waco, momo ulume wa lundila ufeko wosombo u Isareli+ kuenje ufeko waco amamako oku kala ukãi waye. Eye ka kuata vali omoko yoku u nyãla osimbu a kasi lomuenyo.

20 “Pole, nda elundi liaco liocili kuenda ka kuli ondimbukiso yokuti ufeko waco wosombo, 21 ovo va sukila oku nena ufeko waco puvelo wonjo ya isiaye kuenje alume vo volupale vufeko waco, vo sosõla lovawe toke eci a fa, momo ufeko wa linga ekandu limue li kutisa osõi+ vo Isareli poku linga evĩho liukahonga* konjo ya isiaye.+ Vu sukila oku imũla eci cĩvi pokati kene.+

22 “Nda ulume umue wa sangiwa okuti wa lipekela lukãi wulume ukuavo, kavali kavo va sesãmela oku pondiwa, ci kaile ulume wa lipekela lukãi kuenda ukãi waco.+ O sukila oku imũla eci cĩvi ko Isareli.

23 “Nda ufeko umue wosombo wa yonguiwa ale lulume umue kuenje ulume ukuavo o lisanga laye volupale, yu o lipekela laye, 24 vu sukila oku va nena kavali pombundi yolupale loku va sosõla lovawe toke eci va fa, momo ufeko waco ka kalukile volupale kuenda ulume waco wa sepula ukãi wukuavo.+ Vu sukila oku imũla eci cĩvi pokati kene.

25 “Pole, nda ulume wa sanga vusenge ufeko umue wa yonguiwa ale kuenda ulume waco wo kuata kongusu kuenje wa lipekela laye, ulume wa lipekela lufeko o pondiwa, 26 kuenda ko ka lingi cimue kufeko. Ufeko ka lingile ekandu li sesamẽla oku fa. Ocitangi eci ca lisoka lulume o kuata ukuavo kuenje u ponda.+ 27 Momo eye wa sanga ufeko vusenge kuenda ufeko waco wa yonguiwa ale, wa kaluka, pole, lomue wo popela.

28 “Nda ulume o sanga ufeko umue wosombo okuti ka yonguiwile handi kuenje eye o kuata ufeko waco yu o lipekela laye kuenda va kuatiwa,+ 29 ulume wa lipekela lufeko waco, o sukila oku eca ku isia yufeko waco 50 kolosiekele viopalata kuenje ufeko waco o linga ukãi waye.+ Omo okuti ulume waco wo sepula, eye ka kuata vali omoko yoku u nyãla osimbu a kasi lomuenyo.

30 “Ka citava okuti ulume umue o lipekela lukãi wa isiaye, sanga o kutisa osõi isiaye.*+

23 “Nda ulume umue wa kapaliwa omo liapuãla a nyõleha ale wa tetiwa ocimatamata caye cuyali, ka ka iñile vekongelo lia Yehova.+

2 “Omõla wosi okuti wa lumbuiwa, ka citava okuti iñila vekongelo lia Yehova.+ Ndaño muẽle toke kocitumbulukila cekũi, ombuto yaye ka citava okuti yi iñila vekongelo lia Yehova.

3 “Va Amoni ale va Moavi, ka citava okuti va iñila vekongelo lia Yehova.+ Ndaño muẽle toke kocitumbulukila cekũi, ombuto yavo ka citava okuti yi iñila vekongelo lia Yehova, 4 momo ovo ka va ku kuatisile lokulia ale ovava eci wa kali vonjila oku tunda Kegito+ kuenda va vilikiya Baliame omõla a Beore wo ko Petore ko Mesopotamia oco a ku siñali.+ 5 Pole, Yehova Suku yene, ka yevele Baliame.+ Yehova Suku yene wa pongolola esiñalo liaco okuti, lia linga esumũlũho kokuene,+ momo Yehova Suku yene o vu sole.+ 6 Lalimue eteke ko ka sandiliyi ekalo liavo liwa ale ovokuasi avo vokuenda kuomuenyo wene wosi.+

7 “Ko ka suvuki umue u Edome, momo eye manjene.+

“Ko ka suvuki umue u Egito, momo wa kaili ovingendeleyi vofeka yaye.+ 8 Ocitumbulukila catatu comãla ovo va cita, citava okuti ci iñila vekongelo lia Yehova.

9 “Eci vu tunga ovilombo oco vu liyaki lovanyãli vene, vu sukila oku yuvula evĩho.*+ 10 Nda omunu umue o li vĩhisa omo wa tunda ombuto luteke,+ eye o sukila oku enda kosamua yocilombo okuti ka iñilamo vali. 11 Koñolosi eye o sukila oku lisukula lovava, noke citava oku tiuka vocilombo eci ekumbi li iñila.+ 12 Ku tungiwe usuafeka* kosamua yocilombo oco endemo. 13 Pokati kovikuata viene pa kale ocikuata cimue coku fẽla. Eci wendi kosamua yocilombo vu fẽla laco ocitunu cimue kuenje omo vu lembika aniña ene. 14 Momo Yehova Suku yene o kasi oku endela pokati kocilombo cene+ oco a ku yovoli loku eca ovanyãli vene peka liene kuenje ocilombo cene ci kole+ oco eye ka ka mole ocina cimue ca vĩha kokuene kuenje o liwekapo oku enda lene.

15 “Nda upika umue wa tila cime caye kuenje weya kokuove ka citava oku u tiula ku cime caye. 16 Eye a kale love vocitumãlo cosi eye a nõla valupale ove, kuosi eye a sola. Ku ko tate lãvi.+

17 “Pokati komãla vakãi va Isareli, lomue ka ka linge ocipuepue co vonembele+ ndaño omãla valume va Isareli lomue ka ka linge ocipuepue co vonembele.+ 18 Olombongo via fetiwa kocipuepue cukãi ale olombongo via fetiwa* kocipuepue* culume, ko ka vi neni konjo ya Yehova Suku yene oco vi tẽlise ohuminyo yimue, momo kavali kavio ocina cimue cumbondo ku Yehova Suku yene.

19 “Ku ka kisike manjove oku feta losindike,+ ci kaile losindike yolombongo, yokulia, ale ocina cosi ci pingiwa losindike. 20 Citava oku fetisa losindike ocingendeleyi,+ pole, ku ka fetise losindike+ manjove oco Yehova Suku yove a ku sumũlũise kovopange osi o linga kofeka vu ka pinãla.+

21 “Nda wa linga ohuminyo yimue ku Yehova Suku,+ ku ka cilue oku yi feta.+ Momo Yehova Suku yove o ka ku ci pinga muẽle; sanga ci ku lingila ekandu.+ 22 Pole, nda wa yuvula oku linga ohuminyo yimue, ove ku ka kuata eko liekandu.+ 23 O sukila oku tẽlisa cosi ci tunda vomẽla wove+ kuenda oku tẽlisa ohuminyo wa linga ndocilumba ceciwa lutima wosi ku Yehova Suku yove.+

24 “Nda wa iñila vocumbo cayuva cukuene, citava oku lia ayuva a tẽla oco o kute, pole, ka citava oku ambata amue vocikuata cove.+

25 “Nda wa enda kepia liukuene liolomema, citava oku tukũla apunga leka liove, pole, ka citava oku pitisa omĩla kolomema viukuẽle.+

24 “Nda ulume umue wa kuela ukãi, pole, ko yongola vali omo kokuaye wa sangako cimue ka ca sungulukile, eye o sukila oku soneha ukanda woku linyãla laye,+ loku u weca kokuaye noke u tundisa konjo yaye.+ 2 Eci ukãi a sia onjo yulume waco, eye enda kuenje o linga ukãi wulume ukuavo.+ 3 Nda ulume wavali u suvuka* kuenje o soneha ukanda woku linyãla laye, loku u weca kokuaye noke u tundisa konjo yaye ale nda ulume wavali una a likuela laye o fa, 4 ulume watete una wo tundisa ka citava okuti u kuela vali noke yoku vĩhisua, momo ocina cimue cumbondo ku Yehova. Ku ka nene ekandu vofeka yina Yehova Suku yove a eca kokuove ndocipiñalo.

5 “Nda ulume umue wa kuela ndopo, ka citava okuti enda kuyaki ale o tambula ovikele vikuavo. Eye o sukila oku kala ndoto vokuenda kunyamo kuenda o kala lika konjo loku sanjuisa ukãi waye.+

6 “Lomue ka ka tikule ocine coku sula ale ewe liombambo ndonjeke yeci ca levaliwa,*+ momo poku ci linga, o kasi oku tikula eteku* liomunu umue ndonjeke.

7 “Nda umue wa sangiwa okuti o kasi oku ambata utiku umue pokati ka vamanjaye u Isareli kuenje eye u tata lãvi kuenda u landisa,+ omunu wambata utiku a pondiwe.+ Vu sukila oku imũla eci cĩvi pokati kene.+

8 “Nda kuli efengi liovilundu,* kuati utate walua oco vu lingi ndomo ci likuata lovina viosi ovitunda va Lewi vi ka ku tumi.+ Kuati utate oco vu lingi muẽle ndomo nda va handeleka. 9 Ivaluki eci Yehova Suku yene a linga ku Miriama vonjila eci wa kaili oku tunda Kegito.+

10 “Nda wa levalisa cimue kukuene,+ ku ka iñile vonjo yaye oco upemo ocina eye a eca ndonjeke.* 11 Ove o sukila oku talama posamua kuenda omunu wa levala o sukila oku nena kokuove eci eye a likuminya ndonjeke. 12 Nda omunu waco ohukũi, ka citava okuti uwalo eye a eca ndonjeke u pita uteke vonjo yove.+ 13 O sukila oku tiuwiya uwalo eye a ku ĩha ndonjeke osimbu ekumbi ka lia iñilile kuenda eye o pekela luwalo waye+ kuenje o ku sumũlũisa; kuenda eci ci tendiwa ndesunga kokuove kovaso a Yehova Suku yove.

14 “Ku ka kembe ondingupange yi sukila ekuatiso haeye ohukũi, ndaño umue pokati ka vamanjove ale ocingendeleyi ci kasi vofeka yove okuti, valupale* ove.+ 15 O sukila oku eca ofeto yaye keteke liaco,+ osimbu ekumbi ka lia iñilile, momo eye o sukila ekuatiso kuenda omuenyo waye wa tiamẽla kofeto yaye. Sanga eye o ku lisiõsuĩla ku Yehova kuenje ove o ka kuata eko liekandu.+

16 “Olonjali ka citava okuti vi fa omo lieci omãla vavo va linga kuenda omãla ka citava okuti va fa omo lieci olonjali viavo via linga.+ Omunu lomunu a pondiwe omo liekandu liaye muẽle.+

17 “Ku ka pengise esombiso liocingendeleyi, ale liomõla ka kuete isia*+ kuenda ku ka tambule uwalo wocimbumba ndonjeke omo lieci a levala.*+ 18 Ivaluka okuti ove wa kala upika Kegito kuenda Yehova Suku yove wa ku yovola.+ Eli olio esunga lieci ñasilili oku ku handeleka oku ci linga.

19 “Eci wungula ovaima o vepia liove, nda wa ivalako ocitungu cimue ku ka tiukile vepia oku ka cupa. Oco, ci linga cocingendeleyi, comõla ka kuete isia kuenda cocimbumba+ oco Yehova Suku yove a ku sumũlũise kovina viosi o linga.+

20 “Eci o yunga apako wuti wove woliveira, ku ka pitulule kovianja viaco. Eci ci supapo ci linga cocingendeleyi, comõla ka kuete isia kuenda cocimbumba.+

21 “Eci wungula ayuva vocumbo cove, ku ka tiukile oku kopa eci ca supapo. Oco, ci linga cocingendeleyi, comõla ka kuete isia kuenda cocimbumba. 22 Ivaluka okuti ove wa kala upika kofeka Yegito. Eli olio esunga lieci ñasilili oku ku handeleka oku ci linga.

25 “Nda pokati komanu pa molẽha ocitangi cimue, ovo va sukila oku ambata ocitangi caco kovaso yolonganji+ kuenje ovio vi ka va sombisa kuenda omunu ukuesunga o ka tendiwa okuti ka kuete eko kuenje ondingaĩvi yi kuata eko.+ 2 Nda omunu ondingaĩvi o sesamẽla oku tipuiwa,+ onganji yu tuma oco a pekele posi kuenje omunu waco o tipuiwa kovaso aye. Etendelo liolombueti a tipuiwa li likuate levĩho lielinga liaye. 3 Eye u tipula eci ci soka 40 kolombueti,+ pole, ka ci ka pitahãle etendelo liolombueti viaco. Nda eye wamamako oku u tipula olombueti vialua, manjove o kutisiwa osõi kovaso yove.

4 “Ku ka munĩhe omẽla wongombe osimbu yi kasi oku sasa olomema.+

5 “Nda vamanji va tunga pamosi kuenje umue pokati kavo o fa okuti, ka sile omõla ulume, ukãi wulume waco wa fa ka citava okuti o kuela umue wa tiamẽla kepata likuavo. Nãwa yaye enda kokuaye kuenda o tokekisa laye olohuela kuenje o linga laye uvala wunawa.+ 6 Omõla uveli wukãi waco o ka lukiwa onduko yulume waye watete wa fa,+ oco onduko yaco yamameko ko Isareli.+

7 “Nda ulume waco ka yongola oku kuela ukãi wa manjaye okuti ocimbumba, ocimbumba caco cenda toke kakulu va kasi pombundi yolupale kuenje o va sapuila hati: ‘Manji yulume wange ka yongola oku tumbulula onduko yamanjaye vo Isareli. Eye ka yongola oku linga lame olohuela viunãwa.’ 8 Akulu vo volupale luaye va sukila oku u vilikiya loku sapela laye. Nda eye wamamako oku popia hati: ‘Si yongola oku likuela laye,’ 9 ukãi wa manjaye okuti ocimbumba amela kokuaye kovaso yakulu loku u lulisa oluhaku komãhi yaye,+ u siyila kocipala caye kuenje o popia hati: ‘Eci oco ci lingiwa lulume ka yongola okuti epata lia manjaye li tumbuluiwa.’ 10 Noke onduko yepata* liaye yi ka kũlĩhĩwa vo Isareli okuti: ‘Onjo yomunu wa lulisiwa oluhaku.’

11 “Nda alume vavali va fetika oku litĩla kuenda ukãi wa umue pokati kavo o litenga vema liaco oco a teyuile ulume waye ku una o kasi oku tipula veyaye kuenje ukãi o kuata kocimatamata cuyali culume waco, 12 ove o sukila oku teta eka liukãi waco. Ku ko kuatele ohenda.

13 “Vonjeke yove ka mu ka kaile ovilemo viovawe avali a litepa+ okuti, limue linene likuavo litito. 14 Ka citava okuti vonjo yove mu kala ovikuata vivali via litepa vioku yonga*+ okuti, cimue cinene cikuavo citito. 15 Ove o sukila oku kuata ocilemo ca suapo haico ca sunguluka kuenda onjongo ya suapo haiyo ya sunguluka, oco wamameko oku kala otembo yalua vofeka Yehova Suku yove a kasi oku eca kokuove.+ 16 Momo omunu wosi hukuesungako okuti o linga ovina viaco, eye ocimbondo ku Yehova Suku yene.+

17 “Ivaluka ovina Amaleke a ku lingila eci wa kala oku tunda Kegito,+ 18 ndomo eye a ku sanga vonjila kuenje wa liyaka la vosi va kala konyima yove eci wa kavele. Eye ka sumbilile Suku. 19 Eci Yehova Suku yove a ka eca ovanyãli vove vosi va ku ñuala vofeka Yehova Suku yove a kasi oku eca kokuove oco o yi piñale,+ o sukila oku imũla onduko ya Amaleke vemẽhi liovailu.+ Ku ka ivaleko.

26 “Eci iñila vofeka yina Yehova Suku yove a eca kokuove ndocipiñalo kuenda o tambula ofeka yaco loku tungamo, 2 eca amue pokati kapako atete ovaima a velapo o kongula vofeka yina Yehova Suku yove a laika oku eca kokuove, loku a kapa vekualu limue kuenje enda kocitumãlo cina Yehova Suku yove a nõla oco ku kale onduko yaye.+ 3 O sukila oku enda kocitunda ci kasi oku linga upange koloneke viaco loku u sapuila hati: ‘Etaili, ñasi oku lomboluila ku Yehova Suku yove okuti ndeya vofeka yina Yehova a likuminyile ku vakukululu yetu oco a yece kokuetu.’+

4 “Noke ocitunda ci tambula ekualu liaco peka liove loku ci kapa kutala kovaso a Yehova Suku yove. 5 Noke ove o lomboluila kovaso a Yehova Suku yove hati: ‘Isiange u Arama+ wa kala ukuakutungayala* kuenda eye wa lokila Kegito+ kuenje oko a kala ndocingendeleyi, la vamue pokati ka vakuanjo yaye.+ Pole, weya oku linga ofeka yinene, haiyo ya pama kuenda ya livokiya.+ 6 Va Egito va tu tata lãvi loku tu talisa ohali kuenda va tu kisika oku linga upange wupika.+ 7 Noke tua fetika oku vilikiya Yehova, Suku ya vakukululu yetu kuenje Yehova wa yeva ondaka yetu kuenda wa mola ohali loku litetela kuetu.+ 8 Noke Yehova wa tu upa Kegito leka liaye lia pama, lokuokuo kuolõha,+ lovilinga vi komõhisa kuenda olondimbukiso lovikomo.+ 9 Eye wa tu nena vocitumãlo eci loku tu ĩha ofeka eyi okuti, ofeka yimue yi tumõha asenjele lowiki.+ 10 Cilo nda nena apako atete ovaima a velapo a tunda vofeka Yehova a eca kokuange.’+

“Noke o a kapa kovaso a Yehova Suku yove, loku petamẽla kovaso a Yehova Suku yove. 11 O sanjukila ovina viosi Yehova Suku yove a ka eca kokuove, ku vakuanjo yove, ku va Lewi kuenda kocingendeleyi ci kasi pokati kene.+

12 “Eci vu mala oku eca+ onepa yosi yekũi yovaima ene kunyamo watatu okuti, unyamo wonepa yekũi, vu yeca ku va Lewi, kocingendeleyi, komõla ka kuete isia,* kocimbumba kuenje ovo va yi lila valupale* ene loku kuta.+ 13 Ove o ka sapuila kovaso a Yehova Suku yove hati: ‘Ndopa vonjo yange onepa yi kola kuenje nda yeca ku Lewi, lo kocingendeleyi, lo komõla ka kuete isia kuenda kocimbumba,+ ndeci wa ndi handeleka. Sia lueyele ovihandeleko viove. 14 Sia lile lacimue ci kola osimbu nda kala lesumuo, ndaño oku lamba kovina viaco osimbu nda vĩhisiwa ale oku eca cimue komunu wa fa. Nda pokola kondaka ya Yehova Suku yange kuenje nda linga ovina wa ndi handeleka. 15 Kaliye vanja posi oku upisa kocitumãlo cove ci kola kovailu kuenda sumũlũisa omanu vove va Isareli lofeka wa tu ĩha,+ ndomo wa likuminya ku vakukululu yetu+ okuti, ofeka yi tumõha asenjele lowiki.’+

16 “Eteke lietaili, Yehova Suku yove o kasi oku vu handeleki oku tẽlisa ovisila lovihandeleko viaye. Vu sukila oku vi pokola kuenda oku vi tẽlisa lutima wene wosi,+ lomuenyo wene wosi. 17 Etaili wa tambuli ondaka ya Yehova yokuti, eye o ka linga Suku yene osimbu wendeli volonjila viaye loku pokola kovisila+ lovihandeleko+ kuenda oviholo viaye,+ poku yevelela ondaka yaye. 18 Etaili Yehova wa tambula ondaka yene yokuti, vu linga omanu vaye okuti, ocipiñalo caye ca velapo,+ ndomo eye a ku likuminyi kuenda ene vu ka pokola kovihandeleko viaye viosi, 19 kuenje eye o ka ku velisipo pokati kolofeka viosi vikuavo a lulika,+ poku eca kokuene esumbilo lekemãlo, osimbu vu lekisa okuti, vumanu vamue va kola ku Yehova Suku yene+ ndeci eye a likuminya.”

27 Mose kumue lakulu vo ko Isareli va handeleka omanu vati: “Pokoli kovihandeleko viosi ñasi oku eca kokuene etaili. 2 Eteke vu ka yoka o Yordão loku iñila vofeka yina Yehova Suku yene a kasi oku eca kokuene, tumbiki ovawe anene loku a laña lohala.+ 3 Eci o yoka o Yordão o soneha vovawe aco olondaka viosi Viocihandeleko, oco iñile vofeka Yehova Suku yove a kasi oku eca kokuove okuti, ofeka yi tumõha asenjele lowiki ndomo Yehova Suku ya vakukululu yove a likuminyile kokuove.+ 4 Noke yoku yoka o Yordão, vu sukila oku tumbika ovawe aco Komunda Evale+ kuenda vu a laña lohala, ndeci nãsi oku vu handeleki etaili. 5 Ove o tungilako utala wa Yehova Suku yove okuti, utala wovawe. Ku ka songe ovawe aco lovimalẽho viutale.+ 6 Ove o sukila oku tunga utala wa Yehova Suku yove lovawe ka a pasiwile kuenda oko o lumbila ocilumba coku pia elisi ku Yehova Suku yove. 7 Ove eca ovilumba viombembua+ kuenda oko o vi lila+ kuenda o ka sanjukila kovaso a Yehova Suku yove.+ 8 Kovawe aco sonehako ciwa olondaka viosi Viocihandeleko eci.”+

9 Noke Mose la va Lewi ovitunda va sapuila va Isareli vosi poku popia hati: “A Isareli, ũhiko kuenda yeveleli. Oku upisa etaili, vu linga omanu va Yehova Suku yene.+ 10 Ove o sukila oku yevelela ondaka ya Yehova Suku yove loku tẽlisa ovihandeleko+ kuenda olonumbi viaye, vina ñasi oku ku handeleka etaili.”

11 Keteke liaco, Mose wa handeleka omanu poku popia hati: 12 “Ovikoti vi kuãimo, vi ka talama kovaso Yomunda Gerisimi+ oco vi sumũlũise omanu eci va ka yoka o Yordão vievi: Simeone, Lewi, Yuda, Isakare, Yosefe kuenda Benjamini. 13 Ovikoti vi kuãimo vi ka talama Komunda Evale+ oco vi tukule esiñalo vievi: Ruvene, Gadi, Asiyere, Sevulono, Dani kuenda Nafitali. 14 Kuenje va Lewi va ka tambulula lolukandi alume vosi va va Isareli vati:+

15 “‘Wa siñaliwa omunu wosi o lisongela ociñumañuma cimue,+ ale ociñumañuma cutale+ okuti, ocina cimue cumbondo ku Yehova,+ upange wovaka omesele* haeye o seleka ovina viaco.’ (Kuenje omanu vosi va ka tambulula vati: ‘Amene!’*)

16 “‘Wa siñaliwa omunu wosi o tata lãvi isiaye ale inaye.’+ (Kuenje omanu vosi va ka tambulula vati: ‘Amene!’)

17 “‘Wa siñaliwa omunu wosi o pitahãla ondimbukiso yongave yomunu a lisungue laye.’+ (Kuenje omanu vosi va ka tambulula vati: ‘Amene!’)

18 “‘Wa siñaliwa omunu wosi o yapuisa omeke vonjila yaye.’+ (Kuenje omanu vosi va ka tambulula vati: ‘Amene!’)

19 “‘Wa siñaliwa omunu wosi ka tetulula ciwa ocitangi+ cocingendeleyi, comõla ka kuete isia,* ale cocimbumba.’+ (Kuenje omanu vosi va ka tambulula vati: ‘Amene!’)

20 “‘Wa siñaliwa omunu wosi o lipekela lukãi wa isiaye, momo o kutisa osõi isiaye.’*+ (Kuenje omanu vosi va ka tambulula vati: ‘Amene!’)

21 “‘Wa siñaliwa omunu wosi o lipekela locinyama cimue.’+ (Kuenje omanu vosi va ka tambulula vati: ‘Amene!’)

22 “‘Wa siñaliwa omunu wosi o lipekela la manjaye ukãi okuti, omõla ufeko wa isiaye ale omõla ufeko wa inaye.’+ (Kuenje omanu vosi va ka tambulula vati: ‘Amene!’)

23 “‘Wa siñaliwa omunu wosi o lipekela la ndatembo yaye yukãi.’+ (Kuenje omanu vosi va ka tambulula vati: ‘Amene!’)

24 “‘Wa siñaliwa omunu wosi o lavekela ukuavo kuenje u ponda.’+ (Kuenje omanu vosi va ka tambulula vati: ‘Amene!’)

25 “‘Wa siñaliwa omunu wosi o tava ovitukiko, oco a ponde* omunu umue ka kuete eko.’+ (Kuenje omanu vosi va ka tambulula vati: ‘Amene!’)

26 “‘Wa siñaliwa omunu wosi ka pokola kolondaka Viocihandeleko eci loku vi tẽlisa.’+ (Kuenje omanu vosi va ka tambulula vati: ‘Amene!’)

28 “Nda wa yevelela lutate ondaka ya Yehova Suku yove poku kapako ovihandeleko viaye viosi ñasi oku ku handeleka etaili, Yehova Suku yove o ka ku kemãlisa pokati kolofeka viosi vio kilu lieve.+ 2 Asumũlũho osi a-a a ka ku wila kuenda a ka ku sanga,+ momo wa yevelela ondaka ya Yehova Suku yove yokuti:

3 “O ka sumũlũha volupale kuenda o ka sumũlũha kosamua yolupale.+

4 “Omãla vove* va ka sumũlũisiwa,+ kumue lovaima o vepia liove, lombuto yoviunda viove, longombe yove kuenda omeme.+

5 “Ekualu liove li ka sumũlũisiwa+ kumue lolombia viove vioku pangela olombolo.+

6 “Eci iñila o sumũlũisiwa, leci o tunda o sumũlũisiwa.

7 “Ovanyãli vove vana va ku katukila, Yehova o ka ecelela okuti, va yuliwa kovaso ove.+ Ovo va ku katukila konele yimue, pole, va ka ku tila kolonele epanduvali via litepa.+ 8 Yehova o ka sumũlũisa olosila viove,+ ovopange ove osi kuenda o ka ku sumũlũisa vofeka Yehova Suku yove a kasi oku eca kokuove. 9 Yehova o ka ku nõla ndofeka yi kola kokuaye+ ndomo eye a lisila love,+ momo ove wamamako oku pokola kovihandeleko via Yehova Suku yove loku endela volonjila viaye. 10 Omanu vosi kilu lieve va ka limbuka okuti, ove o tukuiwa londuko ya Yehova+ kuenje va ka ku kuatela usumba.+

11 “Yehova o ka luisa omãla vove, oviunda viove kuenda ovaima ove vofeka+ yina Yehova a likuminyile ku vakukululu yove oku yeca kokuove.+ 12 Yehova o ka yuluila kokuove olosila viaye viwa poku lokisa ombela yo kovailu vofeka yove votembo ya sokiyiwa+ kuenda o ka sumũlũisa ovina viosi o linga. Ove o ka levalisa olofeka vialua, pole, ku ka sukila oku levala.+ 13 Yehova o ka ku lingisa utue okuti, ucĩla hawoko; kuenda o ka kala kilu+ okuti kombuelo hakoko, nda wamamako oku pokola kovihandeleko via Yehova Suku yove, vina ñasi oku ku handeleka etaili oco o vi kapeko loku vi tẽlisa. 14 Ku ka liwekepo oku pokola kolondaka ñasi oku vu handeleki etaili, poku tiamẽla kondio ale kepĩli+ loku endela volonjila violosuku vikuavo kuenda oku vi fendela.+

15 “Pole, nda kua yevelile ondaka ya Yehova Suku yove, poku pokola kovihandeleko viaye viosi kuenda koviholo viaye viosi ñasi oku ku handeleka etaili, asiñalo osi a ku sanga+ okuti:

16 “O ka siñaliwa volupale kuenda o ka siñaliwa vepia.+

17 “Ekualu liove li ka siñaliwa+ kumue lolombia viove vioku pangela olombolo.+

18 “Omãla vove* va ka siñaliwa,+ lovaima o vepia liove, lombuto yoviunda viove, ongombe yove kuenda omeme.+

19 “Eci iñila o siñaliwa, leci o tunda o siñaliwa.

20 “Yehova o ka tuma asiñalo aco kokuove, ombuanja kuenda ekangiso kovina viosi o ka linga, toke eci o yambuiwa loku kunduiwa lonjanga, omo liovilinga viove vĩvi loku u* yanduluka.+ 21 Yehova o ka ku nenela uvei u kakatela kokuove toke eci eye a ku kundula vofeka wenda oco o yi piñale.+ 22 Yehova o ku yambula lotumbe, lombambi yalua,+ loku lenda, lombambi yovutima, losipata,+ lofela ya tokota, lombutukuma;+ kuenje ovina viaco vi ka ku wila toke eci o kunduiwa. 23 Ilu li kasi kilu liutue wove li linga liosipi kuenda ongongo yi kasi vemẽhi liove yi linga yutale.+ 24 Yehova o ka pongolola ombela yofeka yove oco yi linge onukuvila kuenda oneketela okuti, yi loka kokuove oku upisa kovailu toke eci o kunduiwa. 25 Yehova o ka ecelela okuti ove o yuliwa lovanyãli vove.+ Ove o ka va katukila konele yimue, pole, ove o ka tilila kolonele epanduvali via litepa; kuenje ove o kuatela usumba ovosoma osi o kilu lieve.+ 26 Ocivimbi cove ci ka linga okulia kuolonjila viosi vio kilu kuenda kuovinyama viosi vio kilu lieve kuenje lomue o vi saluisa.+

27 “Yehova o ka ku nenela olombumbu vio Kegito, luvei wolongandu, locimumusu kuenda olohãla okuti, ka vi tava oku sakuiwa. 28 Yehova o ka ku kokela oku kala eyui, omeke+ kuenda oku seluka. 29 Kutanya eci enda o papata ndeci omeke yi papata poku endela vowelema+ kuenje ku ka sanjukila ovina viosi o linga; oloneke viosi va ka ku kemba loku ku nyana, pole, lomue o ka ku popela.+ 30 Ove o ka yongola ukãi umue kuenje ulume ukuavo o ko putula. Ove o ka tunga onjo, pole, ku ka kalamo.+ Ove o ka kũla ocumbo cayuva, pole, ku kongula ayuva aco.+ 31 Ongombe yove yi ka pondiwila kovaso ove, pole, ove ku ka lia ositu yaco. Ocimbulu cove ci ka nyaniwa kovaso ove, pole, ove ku ka ci yovola. Omeme yove yi ka eciwa kovanyãli vove, pole, ove ku ka yi popela. 32 Omãla vove valume lomãla vove vakãi va ka eciwa komanu vakuavo+ kovaso ove kuenje ove o ka va kuatela ongeva otembo yosi, pole, ovaka ove ka a ka linga cimue. 33 Ovaima ovapia ove kuenda ovina viosi wongula, vi ka liwa lomanu kua kũlĩhĩle+ kuenje o ka kembiwa loku kangisiwa. 34 Ove o ka kala eyui omo liovina ovaso ove a ka mola.

35 “Yehova o ka ku nenela olombumbu kolongolo viove, lo kovolu okuti ka vi sakuiwa, oku upisa kolomãhi toke kutue. 36 Yehova o ka ku lupuisa kumue losoma yina wa linõlela ove muẽle vofeka yimue okuti, ove kumue la vakukululu yove ka wa kũlĩhĩli+ kuenje oko o ka vumbila olosuku viavaya levi viovawe.+ 37 O ka kuata usumba kuenda o linga ocina cimue ci sepuiwa* pokati komanu vosi vana Yehova a ka ku kapa.+

38 “Ove o ka kũla ombuto yalua vepia liove, pole, o kongula citito,+ momo ci ka liwa lolohuma. 39 O ka kũla ocumbo cayuva, pole, ku ka nyua kovinyu yaco ndaño oku ungula cimue,+ momo ci ka liwa lepuka. 40 O ka kuata oviti violiveira vovaimbo ove osi, pole, ku ka li sieketa ulela waco, momo apako oliveira a ka lolukamo. 41 O ka cita omãla valume lomãla vakãi, pole, ku ka kala lavo momo va kambatiwa kumandekua.+ 42 Endo liovipuka,* li ka lia oviti viove viosi kuenda apako ove osi. 43 Ocingendeleyi ca tunga pokati kove ci ka velapo kuenda ci ka kuata vali unene, osimbu unene wove u tepuluka. 44 Eye o ku levalisa cimue, pole, ove lacimue o ko levalisa.+ Eye o ka kala utue osimbu ove o ka kala ucĩla.+

45 “Asiñalo osi a tukuiwa ndeti+ a keya muẽle kokuove kuenda a ku kuama toke eci o nyõliwa,+ momo kua yevele kondaka ya Yehova Suku yove poku kapako ovihandeleko viaye loviholo viaye a ku handeleka.+ 46 Asiñalo aco amamako oku kala kocitumbulukila cove ndondimbukiso ka yi pui kuenda ndelungulo,+ 47 momo kua vumbile Yehova Suku yove lutima wesanju, eci wa kuata ovina vialua.+ 48 Yehova o ka tuma ovanyãli vove kovaso yove kuenje ove o ka va vumba+ eci o kala lonjala,+ lenyona, lepẽle kuenda o ka sukila ovina vialua. Eye o ka kapa okanga yutale kosingo yove, toke eci eye a ka ku kundula.

49 “Yehova o ka ku katuila ofeka yimue yi kasi ocipãla+ okuti, kesulilo liongongo; ofeka yaco yi ka ku katukila ndongonga+ okuti, ku ka kuata elomboloko lielimi liofeka yaco,+ 50 momo omanu vo vofeka yaco, va tema calua kuenda ka va ka kuatela ohenda ukulu ale omõla.+ 51 Ovo va ka lia omãla vovinyama viove kuenda ovaima ofeka yove, toke eci o kunduiwa. Ka va ka siako olumema laumue, ovinyu yokaliye ale ulela, okangombe ale okameme toke eci va ku kundula.+ 52 Ovo va ka ku ñuala ocingonja, va ka ku yikila valupale* ove osi okuti, vofeka yove yosi toke eci ovimbaka viove via lepa haivio via pama vina wa kolela, vi kupuka. Ocili, ovo va ka ku ñuala ocingonja valupale ove osi okuti, vofeka yove yosi yina Yehova Suku yove a eca kokuove.+ 53 Omo lioku ñualiwa ocingonja kuenda oku talisiwa ohali lovanyãli vove, ove o ka lia omãla vove* okuti, ositu yomãla vove valume kuenda yomãla vove vakãi+ vana Yehova Suku yove a eca kokuove.

54 “Ci kaile ulume wa sunguluka haeye wa kapako vakuavo, lomue pokati kove o ka kuatela ohenda manjaye, ukãi waye, ale omãla vaye va supapo, 55 eye ka ka eca lacimue kokuavo ndaño muẽle ositu yomãla vaye yina eye a ka lia, momo ka ka kuata vali cimue omo lioku ñualiwa ocingonja loku kangisiwa kuenda oku talisiwa ohali lovanyãli vove valupale ove.+ 56 Ukãi wa sunguluka haeye wa kapako vakuavo pokati kove una ka la sima okuti, ka ka liata omãhi yaye posi omo lioku sunguluka,+ ka ka lekisa ohenda kulume waye, ale komõlaye ulume pamue komõlaye ukãi, 57 ka ka eca ocipako lacimue conuñulu yaye ya tunda vimo liaye kuenda komãla eye a cita, momo eye o ka va lila vuyombeki, omo lioku ñualiwa ocingonja loku kangisiwa lovanyãli vove valupale ove.

58 “Nda ku pokola lutate kolondaka viosi Viocihandeleko ca sonehiwa velivulu eli+ kuenda ku sumbila onduko eyi yi kola+ ya Yehova+ Suku yove, 59 Yehova o ka ku kangisa poku ku nenela afengi alua kokuove lo kocitumbulukila cove kuenda afengi a nene okuti ka a piti lonjanga,+ lovovei ka a sakuiwa. 60 Eye o ka ku nenela vali ovovei osi o Kegito ana wa kuatela usumba kuenda a kamamako oku kala love. 61 Handi vali, Yehova o ka ku nenela ovovei osi ale afengi ana okuti, ka a sonehiwile velivulu Liovihandeleko evi toke eci o kunduiwa. 62 Ndaño okuti wa livokiyi calua ndolombungululu vio kovailu,+ pokati kene pa ka supa lika omanu vatito,+ momo ka wa pokuili kondaka ya Yehova Suku yene.

63 “Kuenje ndomo Yehova a sanjukilile oku vu kuatisi oco vu kale ciwa kuenda oku livokiya, Yehova o ka vu kunduli loku vu nyõli vosi; kuenje ene vu ka tundisiwa vofeka vu laika oku piñala.

64 “Yehova o ka ku sanduila pokati kolofeka viosi oku upisa kesulilo limue liongongo toke kesulilo likuavo liongongo+ kuenje ove o ka vumba olosuku viavaya kuenda viovawe, vina ove kumue la vakukululu yove ka wa kũlĩhĩli.+ 65 Ku ka kuata ombembua pokati kolofeka viaco+ ndaño oku kuata ocitumãlo cepuyuko oco o liatemo. Yehova o ka eca kokuove utima wesakalalo+ kuenje ku ka tẽla oku vanja ciwa ndaño oku kuata ovisimĩlo via sunguluka.+ 66 Omuenyo wove u ka kala kohele kuenda o ka kuata usumba kutanya kuenda koñolosi; kuenje ku ka kũlĩha nda o ka popeliwa ale sio. 67 Komẽle o ka popia hoti: ‘Nda ca kale ño oñolosi nda hĩse!’ kuenda koñolosi o ka popia hati: ‘Nda ca kale ño omẽle nda hĩse!’ omo liusumba o ka kuata kuenda omo liovina o ka mola lovaso ove. 68 Yehova o ka ku tuala Kegito lonaviyu, poku pita vonjila nda ku sapuila okuti: ‘Ove lalimue eteke o ka mola vali ovina viaco,’ kuenje kocitumãlo caco, ene vu ka li landisa kovanyãli vene oco vu lingi apika valume ale vakãi, pole, lomue o ka vu landi.”

29 Evi ovio olondaka viocisila Yehova a handeleka Mose oku linga lomanu va Isareli vofeka yo Moavi, oku kongelamo ocisila a lingile lavo ko Horeve.+

2 Kuenje Mose wa kovonga va Isareli vosi loku va sapuila hati: “Wa moli ovina viosi Yehova a lingila kovaso ene kofeka Yegito ku Fareo kuenda kapika vaye vosi lo kofeka yaye yosi,+ 3 wa moli lovaso ene muẽle asombiso anene,* lolondimbukiso vinene kuenda ovikomo.+ 4 Pole, toke etaili Yehova ko wĩhili utima woku kuata elomboloko ndaño ovaso oku mola, pamue ovatũi oku yevelela.+ 5 ‘Osimbu nda kala oku vu songuili vekalasoko vokuenda kueci ci soka 40 kanyamo,+ uwalo wene ka wa puile ndaño olohaku viene ka via puile kolomãhi.+ 6 Ka wa lili ombolo ndaño oku nyua ovinyu pamue ovina vikuavo vi koluisa, momo wa kũlĩhi okuti ame ndi Yehova Suku yene.’ 7 Eci wa pitĩli kocitumãlo cilo, Sihoni soma yo Hesibone+ la Oge soma yo Basiane+ veya oku liyaka letu, pole, tua va yula.+ 8 Noke tua tambula ofeka yavo kuenje tua yeca ndocipiñalo ku va Ruvene, ku va Gadi kuenda konepa yimue yocikoti ca Manase.+ 9 Omo liaco, kapiko olondaka viocisila eci kuenda pokoli kokuavio oco okuti, ovina viosi vu linga vi enda ciwa.+

10 “Vosi yene etaili vu kasi kovaso a Yehova Suku yene okuti, olosekulu viovikoti viene, akulu vene, asongui vene, alume vosi vo ko Isareli, 11 omãla vene, akãi vene,+ ocingendeleyi cove+ cina ca tunga pokati kocilombo cove, oku upisa komunu o ku tiañelako olohũi toke komunu o ku tapelako ovava. 12 Vu kasi kulo oco vu iñili vocisila ca Yehova Suku yene lohuminyo yaye yina Yehova Suku yene a linga lene etaili,+ 13 oco eye a ku nõli etaili ndomanu vaye+ kuenda o linga Suku yene+ ndeci a likuminya lene, leci a lisila la vakukululu yene okuti, Avirahama,+ Isake+ kuenda Yakoba.+

14 “Si lingi lika lene ocisila eci lohuminyo eyi, 15 pole, ndi ci lingavo lomanu va kasi kulo letu etaili kovaso a Yehova Suku yetu kuenda la vana ka va kasi kulo letu etaili. 16 (Momo ene wa kũlĩhi ciwa ndomo tua kala vofeka Yegito kuenda ndomo tua pita pokati kolofeka vialua osimbu tua linga ungende.+ 17 Ene wa moli ovina viavo viumbondo kuenda oviteka viavo via vĩha*+ viuti, viewe, viopalata kuenda viulu okuti via kala pokati kavo.) 18 Lunguki okuti, pokati kene ka pa kala ulume ale ukãi, epata, ale ocikoti ci kasi kulo etaili okuti, utima waye u yapuka ku Yehova Suku yetu loku vumba olosuku violofeka evi,+ oco pokati kene ka pa ka kale olumbombo lu eca epako li kuete owule kuenda ocikũla cilula.*+

19 “Pole, nda umue wa yeva olondaka viocisila eci kuenje o litunula vutima waye poku popia hati: ‘Ndi ka kuata ombembua, ndaño ndi amamako oku endela volonjila viutima wange,’ eye o nyõla ovina viosi* vi kasi vutima waye, 20 kuenje Yehova ka ko wecela.+ Puãi onyeño yinene ya Yehova yi ka wila omunu waco kuenda asiñalo osi a sonehiwa velivulu eli, eya muẽle kokuaye+ kuenje Yehova o ka nyõla onduko yaye vemẽhi liovailu. 21 Yehova o ka tepa omunu waco pokati kovikoti viosi via va Isareli oco a talisiwe ohali lasiñalo osi ocisila ca sonehiwa velivulu eli Liovihandeleko.

22 “Eci ocitumbulukila comãla vene kuenda ocingendeleyi ca tunda kofeka yo kupãla ci mola afengi ofeka, lovovei Yehova a nena kokuayo, 23 lofuofuo, lomongua kuenda ulienge okuti, ofeka yaco yosi ka yi ka limiwa ale oku ima, ndaño ovikũla ka vi tundi vali ndeci oku nyõliwa kuo Sodoma lo Gomora,+ lo Adima kuenda Sevomi,+ olofeka vina Yehova a kundula lonyeño yaye loku tema kuaye, 24 ovo kumue lolofeka viosi, va ka popia vati: ‘Momo lie Yehova a lingila eci lofeka eyi?+ Nye ca koka onyeño yaco yalua?’ 25 Kuenje va ka popia vati: ‘Ovina viaco via pita omo ka va kapeleko ocisila ca Yehova+ Suku ya vakukululu yavo, cina eye a linga lavo eci a vopa vofeka Yegito.+ 26 Pole, ovo va fendela olosuku vikuavo loku vi kekamẽla okuti, olosuku vina ovo ka va kũlĩhĩle haivio eye ka va ecelele oku vi fendela.*+ 27 Onyeño ya Yehova ya wengukila ofeka yaco loku nena asiñalo osi a sonehiwa velivulu eli.+ 28 Kuenje Yehova lonyeño yaye yalua+ lekaka loku tema kualua, wa va tundisa vofeka yaco loku va tuma vofeka yikuavo omu va kasi etaili.’+

29 “Ovina via salamisiwa, via tiamẽla ku Yehova Suku yetu,+ pole, ovina via situluiwa via tiamẽla kokuetu kuenda kovitumbulukila vietu otembo ka yi pui, oco tu amameko oku tẽlisa olondaka viosi Viocihandeleko eci.+

30 “Eci o yeva olondaka evi, lasumũlũho lasiñalo nda kapa kovaso ove+ kuenda o vi ivaluka*+ kolofeka viosi Yehova Suku yove a ku sanduila,+ 2 kuenje o tiuka ku Yehova Suku yove+ loku yevelela ondaka yaye ndomo ñasi oku ku handeleka etaili, ove kumue lomãla vove, lutima wove wosi, lomuenyo wove wosi,+ 3 Yehova Suku yove, o ka kupa kumandekua+ loku lekisa ohenda kokuove+ kuenda o ka ku ongolola kolofeka viosi kuna Yehova Suku a ku sanduila.+ 4 Ndaño omanu vove va sanduiwa kolonepa viosi vio kilu lieve, oko Yehova Suku yove a ka ku ongoluila loku ku nena vali.+ 5 Yehova Suku yove o ka ku nena vofeka yina vakukululu yove va piñalele kuenje ove o ka yi piñalavo; eye o ka ku kuatisa oku kolapo, loku livokiya okuti, vakukululu yove ci sule.+ 6 Yehova Suku yove o ka yelisa* utima wove kuenda utima wocitumbulukila cove,+ oco o sole Yehova Suku yove lutima wove wosi, lomuenyo wove wosi kuenje o kala lomuenyo.+ 7 Noke Yehova Suku yove, o ka nena asiñalo osi kovanyãli vove vana va ku suvuka haivo va ku lambalala.+

8 “Ove o ka tiuka loku yevelela ondaka ya Yehova loku kapako ovihandeleko viaye viosi ñasi oku ku handeleka etaili. 9 Yehova Suku yove o ka ku kuatisa oku kolapo kovopange osi ovaka ove,+ loku luisa omãla vove, oviunda viove, ovaima o vepia liove, momo Yehova o ka sanjukila oku ku kuatisa oco o kolepo ndeci a sanjukilile vakukululu yove.+ 10 Kuenje ove o ka yevelela ondaka ya Yehova Suku yove loku amamako oku tẽlisa ovihandeleko viaye kuenda oviholo via sonehiwa velivulu eli Liovihandeleko kuenje o ka tiuka ku Yehova Suku yove lutima wove wosi kuenda lomuenyo wove wosi.+

11 “Ocihandeleko eci ñasi oku ku handeleka etaili, ka ca tĩlile kokuove kuenda ca leluka oku ci tẽlisa.*+ 12 Oco, ka ci kasi kovailu, oco o popie hoti: ‘Helie o ka londa kovailu okuti o tu ci nenela, oco tu ci yeve loku ci pokola?’+ 13 Ka ci kasi konele yikuavo yokalunga, oco o popie hoti: ‘Helie o ka yoka konele yikuavo yokalunga okuti o tu ci nenela, oco tu ci yeve loku ci pokola?’ 14 Momo ondaka yi kasi ocipepi love okuti, vomẽla wove muẽle kuenda vutima wove muẽle+ kuenje o tẽla oku yi pokola.+

15 “Tala, etaili ndi kapa kovaso yove omuenyo luwa, oku fa kuenda ũvi.+ 16 Nda wa yevelela kovihandeleko via Yehova Suku yove vina ñasi oku ku handeleka etaili, poku sola Yehova Suku yove,+ poku endela volonjila viaye, loku amamako oku kapako ovihandeleko, loviholo viaye kuenda ovisila viaye, o ka kala lomuenyo+ kuenda o ka livokiya kuenje Yehova Suku yove o ka ku sumũlũisa vofeka enda oku ka piñala.+

17 “Pole, nda utima wove wa yapuisiwa+ kuenda ku yevi kuenje o yonjiwa oku kekamẽla olosuku vikuavo loku vi fendela,+ 18 ndu sapuili etaili okuti, vu ka kunduiwa muẽle.+ Ka vu ka kala otembo yalua vofeka o laika oku piñala poku yoka o Yordão. 19 Ovailu losi vi linga olombangi viange kokuene okuti, nda kapa omuenyo loku fa kovaso yove, esumũlũho lesiñalo;+ kuenje o sukila oku nõla omuenyo oco o kale lomuenyo,+ ove kumue lovitumbulukila viove,+ 20 poku sola Yehova Suku yove,+ loku yevelela ondaka yaye kuenda oku kakatela kokuaye,+ momo eye omuenyo wove kuenda mekonda liaye o kala otembo yalua vofeka Yehova a lisila oku eca ku vakukululu yove, Avirahama, Isake kuenda Yakoba.”+

31 Mose wa talama kovaso a va Isareli vosi loku va sapuila olondaka evi. 2 Eye wa popia hati: “Etaili nda tẽlisa 120 kanyamo.+ Si kuete otembo yalua yoku vu songuili,* momo Yehova wa ndi sapuila hati: ‘Ove ku ka yoka o Yordão.’+ 3 Yehova Suku yene eye o ka vu pitili kovaso kuenda eye o ka kundula olofeka evi kovaso yene kuenje ene vu ka va tundisa.+ Yehosua eye o ka vu songuili,+ ndomo Yehova a ci popia. 4 Yehova o ka linga lavo ndeci a linga la Sihoni+ kuenda Oge+ okuti, olosoma via va Amori kumue lofeka yavo eci eye a va kundula.+ 5 Yehova eye o ka eca kokuene eyulo kuenda ene vu ka linga lavo ndomo ñasi oku vu handeleki.+ 6 Kuata utõi kuenda pama.+ Ku ka kuate usumba ale oku va yokokela,+ momo Yehova Suku yove eye o ku pitila kovaso. Eye ka ka ku siapo, ale oku ku yanduluka.”+

7 Kuenje Mose wa kovonga Yehosua loku u sapuila kovaso ya va Isareli vosi hati: “Kuata utõi loku pama,+ momo ove o ka iñisa omanu ava vofeka Yehova a lisila oku eca ku vakukululu yene kuenje ove o ka yeca kokuavo ndocipiñalo.+ 8 Yehova eye o ka ku pitila kovaso loku amamako oku kala love.+ Eye ka ka ku siapo ale oku ku yanduluka. Ku ka kuate usumba pamue oku yokoka.”+

9 Mose wa soneha Ocihandeleko eci+ loku ceca kovitunda, ku va Lewi vana vambata ocikasia covisila via Yehova kuenda kakulu vosi va va Isareli. 10 Mose wa va handeleka hati: “Kesulilo lianyamo epanduvali, kotembo ya sokiyiwa kunyamo weyovo,+ vokuenda Kuocipito Colosinge,*+ 11 eci va Isareli vosi va molẽhela kovaso a Yehova+ Suku yene vocitumãlo eye a nõla, vu sukila oku tanga Ocihandeleko eci, oco va Isareli vosi va ci yeve.+ 12 Ongoluila pamosi omanu+ okuti, alume, lakãi, lomãla kuenda ocingendeleyi ca tunga valupale* ene, oco ovo va yeve loku lilongisa kuenda oku sumbila Yehova Suku yene loku kapako olondaka viosi Viocihandeleko eci. 13 Kuenje omãla vavo okuti, ka va kũlĩhĩle Ocihandeleko eci, va ka yeva+ loku lilongisa oku sumbila Yehova Suku yene oloneke viosi vu kala vofeka yina vu ka piñala poku yoka o Yordão.”+

14 Yehova wa sapuila Mose hati: “Tala! Otembo yove yoku fa yi kasi ocipepi.+ Vilikiya Yehosua kuenda kuendi* vombalaka yohongele oco ndu wĩhe ocikele.”+ Omo liaco, Mose kuenda Yehosua va enda vombalaka yohongele. 15 Noke Yehova wa molẽhela vombalaka vongunji yelende kuenje ongunji yelende ya talama puvelo wombalaka.+

16 Yehova wa sapuila Mose hati: “Tala! Kaliye o panda kolofa* kuenda omanu ava va ka fetika oku fendela olosuku viñi ndu okuti va kasi oku lingila ukahonga vofeka va kasi oku enda.+ Ovo va ka ndi yanduluka+ loku lueya ocisila nda linga lavo.+ 17 Kotembo yaco, onyeño yange yi ka va wengukila+ kuenje ndi ka va yanduluka,+ si ka va kuatisa+ toke eci va kunduiwa. Noke yoku pita lovitangi vialua kuenda oku talisiwa ohali,+ ovo va ka popia vati: ‘Anga hẽ omo Suku ka kasi letu oco ovitangi evi vieyilila kokuetu?’+ 18 Pole, ame si ka va kuatisa keteke liaco, omo liovina viosi vĩvi va ndi lingila poku fendela olosuku vikuavo.+

19 “Kaliye sonehi ocisungo eci+ loku ci longisa va Isareli.+ Va ci lilongise* oco ocisungo caco ci kale ndombangi yange yoku pisa va Isareli.+ 20 Eci ndi va nena vofeka nda lisila ku vakukululu yavo+ okuti, ofeka yi tumõha asenjele lowiki+ kuenje va lia toke eci vekuta, loku sanjuka,*+ ovo va ka tiukila kolosuku vikuavo loku vi fendela kuenda ka va ka lekisa esumbilo kokuange kuenje va ka lueya ocisila cange.+ 21 Eci va kuata ovitangi vialua loku tala ohali,+ ocisungo eci ci ka kala nduvangi kokuavo (oco ocitumbulukila cavo ka ci ka ivaleko) momo nda limbuka ale ovisimĩlo va kuete+ osimbu sia va iñisile vofeka nda lisila lavo.”

22 Keteke liaco, Mose wa soneha ocisungo caco kuenje wa ci longisa va Isareli.

23 Eye* wa eca ocikele ku Yehosua+ omõla a Nune loku u sapuila hati: “Kuata utõi kuenda pama,+ momo ove o ka iñisa va Isareli vofeka nda lisila lavo+ kuenje ndi kamamako oku kala love.”

24 Eci Mose a mala oku soneha olondaka viosi Viocihandeleko eci velivulu limue,+ 25 Mose wa handeleka va Lewi vana va enda oku ambata ocikasia covisila via Yehova, poku va sapuila hati: 26 “Tambuli elivulu eli Liovihandeleko,+ li kapi ponele yocikasia+ covisila via Yehova Suku yene oco li linge nduvangi woku vu pisi. 27 Momo nda kũlĩha ciwa esino+ kuenda evĩho liene.*+ Nda wa sinĩli Yehova osimbu ñasi lomuenyo, eci ndi fa ci piãla enene! 28 Ongoluili kokuange akulu vosi vovikoti viene lasongui vene oco ndi vanguile olondaka evi vatuĩ avo kuenda ovailu losi vi linga olombangi viange kokuavo.+ 29 Momo nda kũlĩha ciwa okuti, noke liolofa viange ene vu ka linga eci cĩvi+ kuenda vu ka yapuka vonjila nda ku handeleki. Kuenje ovitangi viya kokuene+ kesulilo lioloneke, momo vu ka linga eci cĩvi kovaso a Yehova kuenda vu ko sumuisa lovilinga viovaka ene.”

30 Kovaso yekongelo liosi lia va Isareli, Mose wa tanga olondaka viocisungo eci oku upisa kefetikilo toke kesulilo viokuti:+

 3 Ndi ka sapula onduko ya Yehova.+

Sapuli eci catiamẽla kunene wa Suku yetu!+

 5 Ovilinga viavo ka via sungulukile.+

Ovo hamãlavayeko, omo liakandu avo muẽle.+

Ovo ocitumbulukila cimue cumbinde haico ca sina!+

Ndomo ci likuata letendelo liomãla va Isareli.+

15 Eci Yesurumi* a neta, wa fetika oku lekisa esino.

Ove wa neta, wa pama kuenda wekuta.+

27 Pole, si yongola okuti, ovanyãli va lipanda,+

Momo ovanyãli nda ka va kuatele elomboloko liaco.+

29 Nda va kuatele ño olondunge nda hĩse!+ Nda va ivaluka ovina viaco.+

Nda va sokolola ovina via laikele oku pita lavo.+

Ovo veye oco va ku kuatisi.

Va linge ocitumãlo cene ceteyuilo.

Ame ndi ponda kuenda ngeca omuenyo.+

44 Mose weya, yu wa tukula olondaka viosi viocisungo eci kovaso yomanu+ okuti, eye kumue la Hosea*+ omõla a Nune. 45 Eci Mose a mala oku sapuila olondaka viosi evi ku va Isareli, 46 eye wa va sapuila hati: “Olondaka viosi ndu sapuili etaili vi kapi vutima wene,+ oco vu tẽli oku handeleka omãla vene okuti, va pokola kolondaka viosi Viocihandeleko eci.+ 47 Momo olondaka evi haviesandako, pole, vi lomboloka omuenyo wene+ kuenda nda wa kapiko olondaka viaco, vu ka kala otembo yalua vofeka vu piñala poku yoka o Yordão.”

48 Yehova wa sapuila Mose keteke liaco hati: 49 “Lamanela komunda yo Avarime,+ Komunda Nevo,+ yi kasi vofeka yo Moavi, kovaso yo Yeriko kuenda tala ofeka yo Kanana, yina ñasi oku eca ku va Isareli oco va yi piñale.+ 50 Noke ove o ka fila komunda yina o laika oku lamanela kuenda o ka kongeliwa komanu vove,* ndeci Arone huvove a fila Komunda Horo+ kuenje wa kongeliwa komanu vaye, 51 momo kavali kene ka wa kaili vakuacili kokuange eci wa kali pokati ka va Isareli kovava o ko Meriva+ ko Kadesi, vekalasoko lio ko Sini kuenda ka wa ndi sivayeli kovaso a va Isareli.+ 52 Ofeka yaco o ka yi muila ocipãla, pole, ove ku ka iñila vofeka ñasi oku eca ku va Isareli.”+

33 Eli olio esumũlũho Mose ukuenje wa Suku yocili a eca ku va Isareli osimbu eye ka file.+ 2 Eye wa popia hati:

 7 Ku Yuda wa eca esumũlũho eli liokuti:+

 8 Ku Lewi eye wa popia hati:+

12 Ku Benjamini eye wa popia hati:+

13 Ku Yosefe eye wa popia hati:+

18 Ku Sevulono eye wa popia hati:+

19 Ovo va ka kovonga omanu komunda.

Oko va ka lumbila ovilumba viavo viesunga.

20 Ku Gadi eye wa popia hati:+

“Wa sumũlũha omunu o vokiya olongave via Gadi.+

Asongui vomanu va ka likongela pamosi.

22 Ku Dani eye wa popia hati:+

“Dani omõla ohosi.+

Eye o ka tẽha ko Basiane.”+

23 Ku Nafitali eye wa popia hati:+

Tambula onepa yutakelo kuenda onepa yombuelo.”

24 Catiamẽla ku Asiyere wa popia hati:+

“Asiyere wa sumũlũisiwa lomãla.

29 A Isareli wa sumũlũha!+

34 Mose wa tunda vanyãla o vekalasoko lio Moavi kuenje wa lamana Komunda Nevo,+ kilu lio Pisiga,+ yina yi kasi kovaso yo Yeriko.+ Kuenje Yehova wo lekisa ofeka yosi oku upisa ko Gileada toke ko Dani,+ 2 limbo lia Nafitali, lofeka ya Efarimi kuenda ya Manase, lofeka yosi ya Yuda toke kutakelo wokalunga,*+ 3 kuenda o Negeve+ Locivanja,+ locimbota co vetapi co Yeriko kuenda olupale luoviti vieva toke ko Cohara.+

4 Noke Yehova wo sapuila hati: “Eyi oyo ofeka nda likuminya oku eca ku Avirahama, ku Isake kuenda ku Yakoba poku popia hati: ‘Ngeca ofeka eyi kocitumbulukila* cove.’+ Ñasi oku ku yi lekisa oco o yi mole lovaso ove muẽle, pole ove ku iñilamo.”+

5 Noke Mose ukuenje wa Yehova oko a fila kofeka yo Moavi, ndeci Yehova a ci popele.+ 6 Suku wo kenda vocimbota vofeka yo Moavi, konele yo Bete-Peore kuenda lomue wa kũlĩha apa pa kasi eyambo liaye toke etaili.+ 7 Mose eci a fa wa kuata 120 kanyamo.+ Eye ka kuatele ocitangi covaso kuenda wa kuatele ongusu yalua. 8 Omanu vo ko Isareli va lilila Mose, vanyãla o vekalasoko lio Moavi ci soka 30 koloneke.+ Noke oloneke vioku sumua kuenda vioku lila Mose via sulila.

9 Yehosua omõla a Nune wa yukisua lolondunge,* momo Mose wo kapele ovaka;+ kuenje va Isareli va fetika oku u yevelela kuenda va linga ndomo Yehova a handelekele Mose.+ 10 Pole, ka kua la kala uprofeto umue wa lisokele la Mose+ vo Isareli, una Yehova a kũlĩhĩle polo la polo.+ 11 Eye wa linga olondimbukiso lovikomo viosi Yehova o tuma oku linga vofeka Yegito ku Fareo, kapika vaye vosi kuenda kofeka yaye yosi,+ 12 Mose wa ci linga leka lia pama kuenda lunene wa velapo kovaso a va Isareli vosi.+