Oku Soneha Ovikanda
OVIKANDA via siata oku kuatisa omuenyo lekalo liomanu valua. Kotete, onepa yalua yalivulu Ovisonehua via Kristão velimi lio Helasi, ya kala ovikanda. Etaili, ci tava okuti tu soneha ovikanda oco tu vetiye vamanjetu kespiritu vana va fetika ndopo oku endela vocili. Ci tavavo okuti tu soneha ovikanda oco tu pasuise akamba vetu, loku vetiya vamanjetu akãi lalume va tambula ovikele vinene. Tu sonehavo ovikanda oco tu lembeleke ava va kasi loku liyaka lovitangi kuenda oco tu ece olonumbi vi sukiliwa vioku tata ovopange ekongelo.—1 Va Tes. 1:1-7; 5:27; 2 Pet. 3:1, 2.
Oku soneha ukanda, onepa yimuevo yiwa yoku eca uvangi. Kolonepa vimue, kuli omanu valua va kasi kolonjo vimue okuti ka ku iñiliwa lulelu kuenda ka va tu ecelela oku kundilako lelisanjo. Omanu vamue, ka va siatele oku kala konjo otembo yalua, omo liaco, eci tu kundila konjo lanjo ka tu va sangi. Vakuavo va kasi kotuvaimbo tumue tu likasilili okuti kupãla calua.
Oku vela, ombela, ale ceci ku yevala oluiya luoku sapuila omanu vosi oco lomue ka ka ende vali, ci tava okuti, olonjanja vimue, ka viu ku ecelela oku tunda konjo. Anga hẽ, ci tava okuti o soneha ukanda oco wece uvangi ku umue ukuepata liove ale umue wa vanguile laye poku eca uvangi ka wa sokiyiwile? Anga hẽ umue pokati kolondonge viove Viembimbiliya wa iluka? Ukanda umue wove, pamue owo lika ocina eye a sukila oco amameko loku pamisa onjongole yaye kespiritu. Ale ci tava okuti o soneha ulandu umue wa sunguluka wupiwa Vembimbiliya kuenje o wu tuma ku vana wa kũlĩha okuti ndopo va kuela, la vana va linga olonjali, ale ku vana va fisa va ngandiavo.
Oku Ecela Uvangi Vukanda
Poku sonehela omunu umue kua kũlĩhĩle oco u wĩhe uvangi, tete lisitulula ove muẽle. Ove ci tava oku u lomboluila okuti, o kasi loku panga onepa kupange umue u kasi loku lingiwila voluali luosi. Nda ca sunguluka oku ci linga, u sapuila okuti ove Umbangi ya Yehova. Sapuilavo omunu waco esunga lieci o kasi loku u sonehelela ukanda okuti ku kasi loku u pasuisa oco o vangule laye mẽla la mẽla. U sonehela muẽle ndu okuti o kasi loku vangula laye mẽla la mẽla. Pole, omo lielungulo lia linga hati: “lunguki ndolonyoha, unjuki ndolopomba,” kũlĩhĩsa ciwa eci o kuete oku sapula catiamẽla kokuove muẽle.—Mat. 10:16.
Vukanda o soneha, kongelamo eci nda wo sapuila nda ca tavele oku vangula laye mẽla la mẽla. Ci tava okuti olondaka vioku fetika o viupa velivulu Raciocínios ale o fetika lolondaka viocindekaise cimue Cembimbiliya ci sangiwa Vupange Wetu Wusoma wa ndopo. Ove ci tava okuti o linga epulilo limue kuenje o vetiya omunu oku sokolola eci catiamẽla kepulilo liaco. Akundi vamue, va siata oku lombolola ño okuti tu kuete esokiyo lioku tambulula apulilo atiamẽla Kembimbiliya, pole, upange waco u lingiwa ocali, omunu ka feti lacimue. Noke va tukula osapi yocipama cimue valivulu etu elilongiso. Ukanda wa sonehiwila oku eca uvangi, u sangiwa kemẽla 73. Owo, wa sonehiwila oku pako ongangu. Ukanda waco, ci tava okuti u ku ĩha cimue ocisimĩlo ndomo o kuete oku soneha. Pole, ciwa okuti o pongololapo kamue upopi waco. Nda hacoko, omanu olonjanja viosi, vaka tambula ukanda u lombolola upopi umuamue.
Omanu vamue va li simãela oku tanga ukanda umue unene u tundilila komunu umue ka va kũlĩhĩle. Omo liaco, ciwa okuti ukanda wove u teta onimbu. Nda okuti ukanda wove wunene calua, u ka kavisa omunu oka u tanga. Ciwa okuti vukanda waco, o kongelamo okokanda koku laleka omunu waco oco a ende kolohongele Vonjango Yusoma. Handi vali ci tava okuti vukanda waco, o kongelamovo o tratadu yimue, ombrochura, orevista Utala Wondavululi ale o Despertai! kuenje u sapuila okuti, eye o ka tambula alivulu aco olonjanja viosi, nda o yongola. Ale u pula nda ci tava okuti u pasuisa konjo yaye oco u sapuileko vali vimue viatiamẽla kondaka wa vangula laye.
Ndomo Ukanda u Sonehiwa
Kaliye konomuisa ukanda wa sonehiwila okupako ongangu. Kũlĩhĩsa okuti: (1) Ukanda waco wa yela, ka u kasi ño okuti wa li tama tama. (2) Ndaño okuti ukanda waco weya oku enda kuna okuti hakoko wa tumĩwa, omo okuti kilu liaco kuli onduko kuenda onumbi yoku wa tumĩwa, u oka u tambula oka u tuma oku wa loña. (3) Esunga lieci ukanda waco wa sonehiwila lia lomboluiwa loku teta onimbu kocinimbu catete. (4) Ocisimĩlo cosi ca litepa ca sonehiwa vocinimbu cikuavo. (5) Loku kapako esunga lieci ukanda waco wa sonehiwila, ka wa sonehiwile ño okuti ovisimĩlo viaco ka via simiwile ciwa. Kuendavo, ka wa kõlele ño ngõ okuti olondaka viaco via tĩla oku kuata elomboloko liavio.
Ukanda una wu sukila oku u sokiya vali ciwa ndowu ukulu wekongelo usonehi a tuma kocisoko Colombangi via Yehova, onduko yekongelo te ya kongeliwamo, kumosi londuko yukulu wekongelo usonehi, lonumbi yaye yoku tambuila ovikanda, kuenda eteke ukanda waco wa sonehiwa. Onduko yomunu ale yocisoko oku ukanda u kasi loku tumĩwa, kumue letendelo lionumbi yaye yoku tambuila ovikanda, te ya kapiwamovo. Ca sungulukavo oku vandekako ovilamo. Poku sulako lukanda, ndomo ca siata kalimi amue, olondaka ndeci hati “Lutate walua” ale “Locisola calua,” via siata calua oku sonehiwa osimbu handi ukanda waco ka wa kapiwile onduko. Onduko te ya sonehiwa peka.
Vukanda wosi o soneha, kũlĩhĩsa ciwa eci catiamẽla koku soneha ciwa olondaka, koku vi sokiya ciwa, koku kapa atosi apa a sesamẽla kuenda oku soneha eci ci molẽha ciwa. Nda wa ci linga, cika eca esumbilo kukanda wove lo kolondaka via sonehiwamo.
Kilu lio velope, olonjanja viosi sonehako onumbi yina okuti omunu wa tumisa ukanda, nda o yongola, vonumbi yaco omo a tumĩla ukanda woku ku tambulula. Pole, ciwa okuti onumbi yaco eca, yove muẽle. Nda o sima okuti ka ca sungulukile oku eca onumbi yove komunu kua kũlĩhĩle poku ecela uvangi vukanda, pinga kakulu vekongelo nda ci tava okuti o tumĩla vonumbi ya umue ukulu wekongelo wa siata oku tambula ovikanda viekongelo. Vonumbi yocisoko Colombangi via Yehova, ka ci tava oku tumĩlamo ovikanda via soka ndevi. Momo nda wa ci linga, cika lekisa okuti Ocisoko oco ca tuma ukanda waco kuenje cika nena atatamiso. Kuendavo, nda layimue onumbi ya eciwa okuti omunu nda o yongola omo a tumĩla etambululo, pole vukanda waco mua kongeliwa alivulu, eci cika eca ocisimĩlo ka ca sungulukile cokuti Ocisoko oco ca tuma ukanda waco.
Kũlĩhĩsa ciwa okuti kilu lio velope wa kapako olo selu vi tẽla, ca piãla enene nda vukanda waco wa kongelamo alivulu. Nda olo selu wa kapako ka via sokele, omunu oka tambula ukanda waco, eye oka kisikiwa oku feta olombongo via kambako, kuenje eci ka ceci uvangi uwa wa tiamẽla kondaka o kasi loku kunda. Ivaluka okuti kolofeka vimue, eci vo velope mu kongeliwa yimue ombrochura ale elivulu, ofeto yi kisikiwa yiluapo vali okuti ofeto yi kisikiwa koku tuma ukanda lika liawo, yi sule.
Elaka liwa
Pana okuti wa mãla oku soneha ukanda wove, u tanga, oco o konomuise eci wa sonehamo. Wu yevala hẽ ndati? U lekisa hẽ ukamba kuenda utate? Ocisola kuenda unu, vikasi pokati kovituwa tu kuete oku likolisilako oku lekisa poku lika la vakuetu. (Va Gal. 5:22, 23) Nda wa limbuka okuti olondaka via sonehiwamo vi yevala lelaka limue ka lia sungulukile ale vi koka ohele, upopi waco u pongolola.
Ukanda, u pondola oku enda kovitumãlo kuna okuti ove muẽle ku pondola oku endako. Eci oco ci lingisa okuti, ukanda u kala onepa yimue yi silivila cocili koku eca uvangi. Omo okuti ukanda wove uka vanguila vonduko yove, kũlĩhĩsa ciwa eci owo u popia, kũlĩhĩsavo ndomo u kasi, kuenda ndomo elaka liawo li yevala. Owo u pondola oku eca eci ci sukiliwa koku songuila, koku pamisa, kuenda koku vetiyila omunu umue ukuotima wa sunguluka vonjila yomuenyo.