Part 2
Ndamupi Ove o Pondola Oku Lilongisa Ocili Catiamẽla ku Suku?
1, 2. Ocindekaise cipi ci lekisa esukila lionumbi yoku nõla atavo?
NDAMUPI tu pondola oku kũlĩha Suku? Anga hẽ ci sukila okuti te oku kũlĩhĩsa alongiso osi atavo a kasiko? Eci pamue ka ci tẽliwa. Ndaño okuti tu kuete epondolo lioku ci linga, ndamupi tu pondola oku kũlĩha elongiso liocili?
2 Ocili, omo okuti kuli ovisimĩlo vialua via litepa viatiamẽla ku Suku, tu sukila onjila yimue yoku kũlĩha ocili, vonumbi yimue ya leluka yi taviwa lomanu. Ndocindekaise oku ci setahãisa: Pamue ci tava okuti ku kala oku lipatãla kuatiamẽla kutunga wonanga kocitanda. U o landisa o popia hati onanga yi kuete olometulu vitatu, pole u o landa o sima okuti onanga ka yi kuete olometulu evi. Ndamupi ocitangi caco ci potoluiwa? Poku seteka onanga yaco luvia wumesele.
3. Momo lie Embimbiliya lia sonehĩwila?
3 Kuli hẽ yimue onumbi yoku nõla eci catiamẽla katavo? Ocili okuti onumbi yaco ku kuete, Embimbiliya. Suku wa tava okuti Embimbiliya lisonehiwa oco omanu kolonepa viosi violuali va lilongise ocili catiamẽla kokuaye. Olohuluwa violohuluwa Viambimbiliya via siata oku pangiwa. Olio liasiata oku pongoluiwa ale kueci ci soka 2. 100 kalimi. Omo liaco, onepa yalua yomanu ci tava okuti va lilongisa ocili catiamẽla ku Suku velimi liavo muẽle.
4. Embimbiliya li lombolola nye?
4 Embimbiliya ongavelo yimue ya eciwa la Suku. Olio li tu lomboluila ovina vimue okuti etu nda lalimue eteke tua tẽla oku vi kũlĩha. Embimbiliya li lombolola eci catiamẽla kuava va kasi vocitumãlo cespiritu. Li situlula ovisimĩlo via Suku, ekalo liaye kuenda ocipango caye. Lilombolola ndomo eye a siata oku tata omanu vokuenda kuohũlũkãi anyamo. Lilombolola ovina vi keya kovaso, kuenda vi lekisavo ndomo tu pondola oku sanga onjila yi tuala komuenyo ko pui.
Esunga Lieci tu Tavela Kembimbiliya
5. Ongangu yipi yi lekisa okuti Embimbiliya li litava luloño?
5 Kuli asunga alua oku tava okuti Embimbiliya olio Ondaka ya Suku. Esunga limue lieli okuti Embimbiliya li litava luloño. Kosimbu omanu va simaile okuti Ongongo ya li kundikile kocina cimue. Ndeci, vo Afrika yo kutakelo omanu va tavaile okuti Ongongo ya li kunamẽle kilu lionyoha ya likuta kilu Liongongo cisoka 3.500 kolonjanja kuenda eci cisoka 3.500 kolonjanja vemẽhi liongongo yaco. Pole, ndomo uloño u ci lekisa, umue usonehi Wembimbiliya okuti tunde eci acisoneha toke cilo pa pita ale eci ci soka 3.500 kanyamo wa popia hati Suku “loko ka kuli cimue oko a nyoñamisila oluali.”—Yovi 26:7.
6. Uvangi upi u lekisa okuti Embimbiliya li tunda ocili ku Suku?
6 Uvangi umue u lekisa muẽle ocili okuti Embimbiliya lia tunda ku Suku, woku lombolola eci ci keya kovaso. Ca litepa lawanji omanu, ceci okuti Suku wa kũlĩha ciwa eci catiamẽla kovaso, momo cosi eye a popia ci tẽlisiwa.
7. Ovitumasuku vipi Viembimbiliya via tẽlisiwa kotembo yokonyima?
7 Ovitumasuku vialua Viembimbiliya via tẽlisiwa ale kotembo yokonyima. Ndeci, osimbu handi Yesu ka citiwile kolupale luo Mbeteleme Embimbiliya lia ci popela ale eci handi okuti kua kambele 700 kanyamo, kuenje eci ceya oku tẽlisiwa. (Mika 5:2; Mateo 2:3-9) Handi vali, ku li ovitumasuku vikuavo viatiamẽla ku Yesu. Embimbiliya lia popelevo okuti eye oka citiwa lufeko, kuenda oka pakuiwa londando yi soka 30 kolopalata. Ovitumasuku evi laviovo via tẽlisiwa. Ocili okuti layumue omunu nda wa tẽla oku popia ovitumasuku viaco evi!—Isaya 7:14; Sakariya11:12, 13; Mateo 1:22, 23; 27:3-5.
8. Ovitumasuku vipi Viembimbiliya vi kasi loku tẽlisiwa kotembo yilo, kuenda ovio vi lekisa nye?
8 Ovitumasuku vialua vi kasi loku tẽlisiwa kotembo yetu yilo. Vimue pokati kavio vievi:
● “Ofeka lofeka vi likatukila, kuenda usoma lusoma. Ku kala ovilemawe vinene. Kolonele vimue ku kala onjala lefengi.”—Luka 21:10, 11.
● Ku kala ‘evokiyo lioku sinila ocihandeleko omo lievĩho lialua.’—Mateo 24:12.
● “Koloneke via sulako. . . Omanu va linga vakuakulisola, vakuakusola olombongo, vakuakusiñila olonjali viavo. . . ka va tẽla oku likandangiya, va linga olongangala,. . .ka va sole eci ciwa, vakuakusola ca lua esanju, Suku ci sule.”—2 Timoteo 3:1-5.
Ove hẽ, ku tava okuti ovina evi vi kasi oku pita muẽle etaili lilo? Okusokapo kuenda ocili covitumasuku ku lekisa okuti Embimbiliya helivulu limueko liaño. Olio, Ondaka ya tumĩwa la Suku!—2 Timoteo 3:16.
Embimbiliya hẽ Lia Pongoloka?
9, 10. Nye ci lekisa okuti Suku ka ecelele okuti omanu va pongolola Embimbiliya?
9 Ongangu yimue yeyi: Ove, ove muẽlianjo yumesele kuenda olonalavayi viove wa vi kapela ulala wolonumbi vokuadru yimue yalungulo. Nda okuti unyali umue wa pongolola eci ove wa sonehele, nye hẽ nda wa linga? Nda kua penguluile hẽ ciwa eci ca pongoluiwa? Cimuamue haico, Suku ka ecelela okuti omanu va pongolola ocili Condaka yaye Embimbiliya lonjila yimue ka ya sungulukile.
10 Ava va siata oku seteka oku pongolola alilongiso Ondaka ya Suku lonjila yimue ka ya sungulukele ka va siatele oku litunda ciwa. Eci tu sokisa Embimbiliya tu kuete etaili lovisonehua Viembimbiliya liosimbu, tu pondola oku mõla okuti cimuamue la pamue ca litepa. Kuenje eci ci lekisa okuti Embimbiliya ka lia pongolokele vokuenda kuanyamo.
[Elitalatu kemẽla 7]
Anga hẽ Cikuete Esilivilo Oku Kolela Kesapulo Lioviholo Viokosiahũlu?
Etavo lioviholo vo Afrika, ka li kuete alivulu o kosimbu a kola. Oviholo, ovihilahila, kuenda ovisimĩlo viatiamẽla ku Suku, vi pitiyiwila pokati kocitumbulukila locitumbulukila. Elivulu limue lilombolola eci catiamẽla koviholo viatavo vo Afrika lia popia hati: “omanu ka va siatele oku lombolola esapulo liocili. Olonjanja vimue onepa yalua yesapulo li pitiyiwa lomẽla, lia siata oku vokiyiwa ale oku tepuluiwa, oku pongoluiwa kuenda oku pengisiwa okuti olonjanja vialua ci tĩla oku tepisa ocili lesanda.”
[Elitalatu kemẽla 7]
Okakasia: Nye elivulu limue lipopia catiamẽla koviholo viatavo?
[Elitalatu kemẽla 6]
Vakuahali omo liocitenya: FOTO DA ONU 164671/ JOHN ISAAC, Esualali: Nações Unidas/ foto de Yutaka Nagata