“Ocili wa Siata he Oku ci Kapako Komuenyo Wove Wosi?”

“Kuati ovitima viokaliye okuti ovimuenyo vipongoluiwa kuenje u limbuka ndeci ci kasi Ocipango ca Suku, okuti ciwa, casunguluka [kuenda] ca pua eko.”​−VA ROMA 12:10

1, 2. Momo lie ka ca lelukilile oku kala Ukristão wocili koloneke vilo?

KOLONEKE vilo via suluko ‘viohali’ ka ca lelukile oku kala Ukristão wocili. (2 Timoteo 3:1) Esunga liaco lieli okuti, omunu o kuete oku yula oluali oco a kuame ongangu ya Kristu. (1 Yoano 5:4) Kueci catiamẽla koku kuama onjila yoku kala Ukristão, ivaluka eci Yesu a popia hat: “Iñilili vombundi ya sukatela, momo ombundi yoku iñila koku nyõleha ya tanda, kuenda onjila yendako ya sanjavala, kuenje va lua va iñililamo. Puãi ombundi yoku iñila komuenyo ya sukatela, lonjila yaco ya tila, kuenje vañamiñami va yi sanga.” Eye handi wa popia vali hati: “Omunu nda o yongola oku ñuama, ka ka litende vali eye muele, a tikule uti waye eteke leteke, a ñuame.” “Omunu nda o yongola oku ñuama, ka ka litende vali eye muẽle, a tikule [uti waye, NW] eteke leteke, a ñuame.”−Mateo 7:13–14; Luka 9:23

²  Noke yoko sanga onjila ya sukatela yi tuala komuenyo, ocikele cikuavo ca tila Cukristão oku pantikisa oco amameko loku endela vonjila yaco. Momo lie ca tilila? Momo okuti, oku litumbika kuetu kuenda oku papatisiwa kuetu, ku tulingisa okuti tu kala ndocina cimue satana asole vali enene oku seteka oku yapuisa latutu aye. (Va Efeso 6:11) Eye o kulihisa lutate ahonguo etu noke o likolisilako oku tuvetiyila ka ohonguo aco oco a tu konyuise kespiritu. Omo okuti satana wa setekelevo oku yapula Yesu, etu hẽ katu kevelelavo okuti eye o kamamako loku setuka oku tu yonja?−Mateo 4:1–11

Atutu a Satana

3. Ndamupi Satana a kapa atatahãi vutue wa Heva?

³  Yimue onjanjo Satana a siata oku petula, oku kapa atatahãi kovisimilo vietu. Eye o lavulula ehonguo liosi etu tu kuete kovimaleho vietu kespiritu. Kosimbo, eye wa petuilile ale Eva onjanjo ya soka ndeyi, poku u pula hati: “Ocili Suku wa popia hati, Kokali koviti viosi viocumbo ale?” (Efetikilo 3:) Oku ci tiamisila volondaka vikuavo, Satana wakala loku popia hati: ‘Ocili hẽ okuti, Suku okuete omoko yoku handeleka oco ku ka lie kepako liuti owu? Anga hẽ eye wa kulimbika ocina cimue ciwa oco ove kuka ci kulihe? Momo Suku wa kulila okuti, eteke liosi vulia kepako liuti owu ovaso ene aco a apatuluka kuenje okala nda Suku oku kuliha eci ciwa leci civi!’ Satana wa kapa atatahãi vutue wa Eva, kuenje wa kevelela toke atatahãi aco a ima epako.−Efetikilo 3:5.

4 Atatahãi api vamue pamue va kuata?

⁴  Ndamupi Satana a kasi oku talavaya latutu aco koloneke vilo? Nda tua kuata owesi wuku tanga Embimbiliya, woku elilongiso lietu lio pokolika, woku likutilila woku kulinga upange wetu Tuakristão, kuenda woku endaenda kolohongele, tuka yapuiwa lonjanga yalua latatahãi avotuiwa la vakuetu. Ndeci: “Tua kuliha ndati okuti, eci oco muele ocili Yesu cina a longisa?” “Tu kasi muele ocili koloneke viasulako?” Ocili okuti, tu kasi ale kocita 21” “Anga hẽ tu kasi ale muẽle ocipepi lo Harmagedo, ale yi kasi andi ocipãla?” Nda tua sangiwa latatahãi aco, nye tu sukila oku linga oco ka tu ka kale vali vatatahãi aco?

5, 6. Nye tu sukila oku linga nda tu kasi oku sakalaisua latatahãi?

⁵  Tiago wa eca elungulo limue lia sunguluka eci a soneha ndoco: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye. Puãi a pinge lekolelo, oku tatãla hakoko, momo u o tatãla wa soka ndapuku okalunga a pungua lofela, hao a pekuiwa. Omunu waco ka ka kolele okuti, omunu ukuavitima vivali haeye ukuakutatayala volonjila viaye viosi, o tambula cimue ku Ñala [Yehova, NW].”− Tiago 1:5–8.

⁶ Nye hẽ tu kuete oku linga? Etu tu sukila oku lipilika oku ‘pinga ku Suku’ vohutililo oco a tu ihe ekolelo okuti tu kuata elomboloko, kuenda tu likolisilako meu~le koku linga elilongiso lietu lio pokolika, oco tu konomuise apulilo atiamẽla katatahãi. Tu pondolavo oku pinga ekuatiso ku vana okuti va pama kekolelo, kuenda lalimue eteke ka tu ka tatãli okuti, Yehova o tu iha eci tu sukila. Tiago wa popiavo hati: “Pokoli ku Suku. Tamalali leliapu kuenje liu tili. Ameli ku Suku kuenje eye amela [vo] kokuene,” Ocili okuti, nda tuamẽla ku Suku poku lilongisa kuenda vohutililo, ka tu ka kuata vali atatahãi. −Tiago 4:7,8

7, 8. Ovina vipi vi tu kuatisa oku limbuka efendelo Yesu a longisa, kuenda velie va kasi loku suisapo ovina viaco?

⁷  Ndongangu, konomuisa epulilo lio: Tu pomdola ndati oku kiliha okuti tu kuãi muẽle efendelo lina Yesu a longisa? Oco tu sange etambululo kepuliloeli, nye tu sukila oku konomueisa? Embimbiliya li lekisa okuti, Akristão vocili va sikila oku li kuatela ocisola pokati (Yoano 13:34,35) Ovo va sukila oku sumbila onduko ya Suku, Yehova. (Isaya 12:4,5; Mateo 6:9) Kuenda va sukilavo oku sapula onduko yaco ku vakuavo. −Etundilo 3:15; Yuano 17:26

⁸  Efendelo liocili li limbukiwilavo koku sumbila Ondaka ya Suku, Embimbiliya. Embimbiliya, olio lika elivulu li situlula ekalo lia Suku kuenda ocipango caye (Yoano 17:17; Timoteo 3:16,17) Handi vali, Akristão vocili va sandeka Usoma wa Suku, okuti owo lika onjila yeca elavoko lioku kuata omuenyo ko pui vofeka yelau palo posi. (Marko 13:10; Esituluilo 21:1–4) Ovo va likala oku tiamẽla kolouali lulo luopulitika, kuendavo ka litenga vovombondo aluo. (Yoano 15:19; Tiago 1:27;4:4) Koloneke vilo, helie hẽ o kasi loku suisapo ovina evi? Ovovangi a lekisa okuti, kuli lika etambululo limosi, liokuti, Olombangi via Yehova.

Nye tu Pondola Oku Linga Nda Atatahãi Akasi Loku Amamako?

9, 10. Nye tu sukila oku linga nda atatahãi akasi loku amamako?

⁹ Tu linga hẽ ndati nda tua sangiwa vatatahãi akahandangala? Nye tu sukila oku linga oco atatahãi aco a yuliwe? Kelivulu Liolosapo kocipama 2 ukualondunge Soma Salomone eca etambululo loku popia hati: “Amõlange, nda o tava kolondaka viange, loku seleka vutima ovihandeleko viange, okuti o vonguila etui liove kolondunge, loku tiamisa utima wove kuloño, ocili, nda o sandiliya ukulihiso, loku lipilikila uloño, nda o vi sanda sanda ndeci va sanda sanda opalata kolomina, kuenda o vi vanjiliya ndeci va vanjiliya ukuasi wa selekiwa, oco o kuliha oku sumbila Yehova, kuenje o sanga ukulihiso wa Suku”−Olosapo 2:1–5

¹⁰ Ocisimilo eci hẽ ka ci komohisa? Nda tua likapelako oku konomueisa lutate olondunge via Suku, tu ka kuata “ukulihiso wa Suku.” Ocili ukulihiso waYuna wa Velapo voluasi u kala muele ocipepi letu, nda tua lekisa onjongole yoku tavakolondaka viaye loku vi seleka vutima wetu. Eci ci lomboloka okuti tu tiamẽla ku Yehova poku likutilila kuenda poku linga elilongiso lietu lio pokolika. Ovokuasi a sangiwa Vondaka ya Suku, a pondola oku malako atatahãi osi tu kuete lekuatiso liocinyi cocili.

11. Ndamupi ukuenje wa Elisia eya oku kala latatahãi

¹¹ Ongangu yimue yiwa yi lekisa ndomo ohutililo ya kuatisa omunu umue wa Suku wa kala lusumba kumue latatahãi, yisangiwa kelivulu lio 2 Liolosoma 6:11–18. Ukuenje wa Elísia ovina viespiritu ka violombolokele ciwa eye ka tẽlele oku limbuka okuti, olohoka viokilu via kala pokati kavo oku kuatisa uprofeto wa Suku, eci a ñualiwile ocingonja lasualali vo ko Suria. Lusumba wa lua, ukuenje wa kaluka hati: “A cime cange we! Tu ci linga ndati?” Elisi wa tambulula hẽ ndati? “Ku ka saluke! Momo ava va kasi letu ovo valua, ava va kasi lavo va sule.” Pole ndamupi hẽ u kuenje eya oku tava okuti oco muele? Eye ka muile olohoka viovangelo vaeco kilu.

12 (a) Ndamupi atatahãi vukuenje a tetuluiwa? (b) Nndamupi tu pondola oku tetulula atatahãi amue pamue a tu kuata?

¹² “Elisia wa likutilila hati, Hu pinga aYehova patulula ovaso aye, oco amole. Yehova yu wa patulula ovaso umalehe kuenje wa mola, tala omunda ye yuka to lotuvalu lakãlu ondalu añuala Elisia.” Catiamẽla ko kuaye Yehova wa ecelela okuti u kuenje omola olohoka viokilu via kala loku teyuila Elisia. Otembo yilo, ka ci tava okuti tu kevelela ekuatiso limue lia soka ndeli. Ivaluka okuti, ukuenje uprofeto ka kuatele olonepa viosi Viembimbiliya oco alilongise noke oco a pamise ekolelo liaye. Etu tu kuete Embimbiliya. Nda olonjanja viosi tua kuama eci ci kasi Vembimbiliya, ekolelo lietu citava okuti li pamisiwa. Ndeci, citava okuti tu kuliha ovolandu añiñi alombolola ndomo Yehova a kasi kelombe liaye oko kilu. Ka kuli atatahãi okuti, Yehova okuete ocisoko cimue oko kilu okuti oloneke vilo oco cikasi oku kuatisa omanu vaye palo posi oco vamameko lupange woku longisa kolonepa viosi vio luali −Isaya 6:1–4; Esekiele 1:4–28; Daniel 7:9,10; Esituluilo 4:1–11; 14:6,7

Kuliha Ciwa Olonjanjo Via Satana!

13. Olonjila vipi Satana a seteka oku kuama oco a honguise oku kakatela kuetu kocili?

¹³ Vipi hẽ olonjanjo vikuavo Satana a siata oku petula oco a honguise oku kakatela kuetu kocili kuenda ekalo lietu kespiritu? Yimue pokati kolonjanjo viaye, ukahonga okuti u li molehisa muiñi muiñi. Voluali lulu okuti onepa ya lua yomanu ya tekela enene kukahonga, eci ci tukuiwa hati, uponji (okuti oyo ondaka va piñanya pondaka ukahonga) ale ceci va tukula oku pita uteke, (cilomboloka oku lalako loku linga ukahonga), ca siata ca lua komanu vo koleneke vilo va siata okuenda ño enene, okuti otembo yosi va sakalala ño loku tẽlisa olonjongole viavo vietumba. Olosinemam o Televisão, kuenda olo video, vi vetiya omanu oco vambate omuenyo waco uvi. Olono viaco evi viasapulo via siata calua oku lekisa omanu va kasi epolõla, ca piã enene ono yina o internete. Omunu wosi ukuasiata okuti otamãlala loku tala omanu vaco vakasi apõlola ndopo o kupukila vayonjo.−1 Va Tesalonike 4:3–5; Tiago 1:13–15

14. Momo lie Akristão vamue va siatela oku wila volonjanjo via satana?

¹⁴ Akristão vamue, o siata yavoyisole oku va tuala koku tala omanu va kasi epolõla lia pita ño pokati kuenda ava okuti epolõla liaco lia piãlapo vali enene, kuenje ca siata oku vihisa ovitima lovisimilo viavo. Ovo muẽle, va siata oku li kupuila volonjanjo via satana. Oku cilinga, kua siata oku tuala kenyõleho kespiritu. Omanu vaco ka va kasi oku kala “ndoloñaña” kueci ciatiamẽla keviho. Ovo ‘kolondunge ka va kasi oku linga vendamba. (1 Va Korindo 14:20) Unyamo lunyamo ovita vialua viomanu okuti vi tambula onima yi tunda koku siapo oku pokola kovihandeleko Viondaka ya Suki. Ovo va siata oku kuata owesi woku li “ maleha [l]ovimaleho viosi via Suku.” − Va Éfeso 6:10 -13; Va Kolosai 3:5–10; 1 Timoteo 1:18,19.

Ukuasi tu Kuete

15. Momo lie vamue ca va tililila oku sola ocipiñalo cavo cespiritu?

¹⁵ Yesu wa popia hati, “vu [ka] kuliha ocili, kuenda ocili cu yovola.” (Yoano 8:32) Va lua cilo va lianga Olombangi via Yehova, ca siapo omuenyo vambatele tete kuenda va litepavo katavo vatiamẽlele kosimbu. Omo liaco, ovo va tẽla okue limbuka vali lonjanga ya lua eyovo li tundilila kocili. Pole, amalẽhe vamue okuti va va tekuiwa lolonjali vi kasi vocili, pamue ci va tilila oku sola ca lua ocipiñalo cavo cespiritu. Ovo lalimue eteke vatiamẽlele ketavo liesanda, kuenda lalimue eteke va kuatele onepa koluali lulo okuti lu vetiya lika oku tẽlisa olonjongole vietimba ndeci, oku sipa eliamba kuenea oku litama lukahonga. Omo liaco ovo ka va siatele oku limbuka oku litepa kualua kukasi pokati kofeka yetu yelau kespiritu kuenda oluali luvi lua Satana. Vamue va siata muẽle oku wila veyonjo lioku maha kovinenu violuali lulo oco ñova tele nda va kasi oku pumba cimue! − 1 Yoan 2:15–17; Esituluilo 18:1–5.

16 (a) Apulilo api tu sukila oku li pulisa etu muele? (b) Nye tua siata oku longisiwa kuenda nye tua vetiyiwa oku linga?

¹⁶ Ocili hẽ okuti tu sukila oku li yoka kovimuine vietu oco tu kulihe ovalo kuenda ohali yiyililako? Ka tu pondola hẽ oku lilongisila kovolandu ãvi a siata oku pita la vakuetu? Tu sukila hẽ oku li tama “[ lonata, NW]” yoluali lulu oco tu tale nda kuli cimue ca tu kambela? (2 Petulu 2:20–22) Petulu wa ivaluisa Akristão voko cita catete, okuti vatiamẽlele koluali lua Satana, loku popia hati: “Otembo ya pita yi vu tẽla oku linga ndeci va kualofeka va sole oku linga, okuti oku sanjukila upuepue kuenda umbuahuku, loku kolua ovinyu, layele, loku pilula, loku fendela oviteka.” Ocili okuti, etu ka tu sukila oku litenga ‘vayele lo kovombondo’ oluali lulo oco tu tale ndomo omuenyo uvi u kasi. (1 Petulu 4:3, 4) Ca litepa leci, etu tua siata oku longisiwa o vihandeleko via velapo via Yehova Volonjango vietu Viusoma. Olonjango viaco, ovio ono yelilongiso Liembimbiliya kuenda tua siata oku vetiyiwa oku kala lolondunge vioku limbuka okuti etu tu kuete ocili, kuenje tu ci kapako komuenyo wetu wosi.− Yehosua 1:8; Va Roma 12:1, 2; 2 Timoteo 3:14–17.

Onduko Yetu ka Yikasi ño Ndocina Cimue Okuti Oco tu Limbukiwa Laco

17. Tu pondola oku kala ndati Olombangi via Yehova vina okuti vakuambili?

¹⁷ Nda ocili tua ci kapako muẽle komuenyo wetu wosi, olonjanja viosi tuka sandiliya onjila yoku sapula ku vakuetu. Eci ka ci lomboloka okuti tu seteka oku ci kisika ku vana ka va lekisa onjongole layimue. (Mateo 7:6) Handi vali, ka tu kuete osõi yoku lekesa komanu okuti, Tulombangi via Yehova. Nda okuti omunu umue wa lekisa onjongole loku linga epulilo limue lia sunguluka, ale pamue wa tava oku tambula elivulu lumue lilombolola eci ci kasi Vembimbiliya, etu tu ka kapelako oku u sapuilako elavoko tu kuete. Omo liaco, ciwa okuti, tuenda cikale okuti tu kasi konjo, kupange, kosikola, konjo yolomilu, ale povitumalo vimue viovitalukilo tu ambata alivulu amue a lombolola eci ci kasi Vembimbiliya.−1 Petulu 3:15

18. Oku li lekisa okuti Tuakristão ku pondola ndati oku tu kuatisa komuenyo wetu?

¹⁸ Eci tu lilekisa muẽle okuti Tuakristão, oku li teyuila kuetu kolonjajo cia satana ku pamisiwa. Nda ku lingiwa ocipito cimue coku citiwa, ceteke Linatale, ale kocipito cimue catiamẽla koku imba ombatota, ci tava okuti va kuetu tulavayela pamosi kupange wa popia hati: “Ku ka sakalale laye. Eye Ombangi ya Jehova.” Kuendavo nda tua li situlula okuti Tulombangi via Yehova omanu ci ka va tilila oku vanguila penele yetu ovina viumbondo. Omo liaco, oku sapuilako vakuetu oviandeleko vietu Tuakristão, ci kuatisa cocili komuenyo wetu, ndomo upostolo Petulu a popia hati: “Nda vu kuete ombili yoku linga esunga [h] elie u lingi civi?” Ndaño vu tala ohali mekonda liesunga, haimo wa sumuluhi.”−1 Petulu 3:13,14.

19. Tuakuliha ndati okuti tu kasi muẽle koloneke via sulako?

¹⁹ Ekuatiso likuavo litunda koku kapako ocili komuenyo wetu, lieli liokuti, tu tava muẽle okuti tu kasi koloneke via sulako violuali lulo. Tua kuliha okuti, onepa yasulako yovitumasuku vimue yi kasi loku telisiwa koloneke vietu vilo. a Elungulo liupostolo Paulu liokuti, “koloneke via sulako kuiya otembo yohali,” lia muiwila muele kungangala wa lingiwa kocita canyamo a pita. (2 Timoteo 3:1–5; Marko 13:3–37) Ukanda umue wasapulo wa sandekiwa ndopo catiamẽla kocita cakui avali anyamo wa kala losapi hati: “Uka ivalukiwa okuti, unyamo umue wungangala.” Ocipama caco ca popia hati: ‘Akui atãlo a kanyamo a sulako a kala wumondi wa lua, polé kunyamo wo 1999, umondi waco wa piãlele vali calua.’

20. Yilo oyo otembo yoku linga nye?

²⁰ Yilo hayoko otembo yoku kuata atatahãi. Kuli ovovangi a lekisa muẽle okuti, Yehova o kasi oku sumuluisa upange wa lua woku longisa embimbiliya wukasi loku lingiwila kolonepa viosi violuali oco kueciwe uvangi komanu vakualofeka (Mateo 24:14) Kapako ocili komuenyo wove wosi kuenda ci sapuilavo ku vakuene. Omuenyo wove wenda ño hu, watiamẽla kueci ove o kasi oku linga cilo muẽle. Oku puyuisa ovoko ka ku ka tu kokele oku sesamẽla oku tambula asumuluhõ a Yehova. (Luka 9:62) Omo liaco, yilo oyo otembo yoku linga vakuepandi, haivo va tuamẽla. Kuenda olonjanja viosi tulingi vakuambili yu pange wa Ñala momo tua kuliha okuti tukasi vu Ñala kuenje upange wetu ka ulingi wolivova. − 1 Va Korindo 15:58.

[Etosi pombuelo yemela]

Ove hẽ Handi ocivaluka?

• Ndamupi tu pondola oku mãlako atatahãi?

• Nye tu pondola oku lilongisila kulandu wa pita lukuenje wa Elisia

• Ayonjo api atiamẽla kekalo tu kuete oku lunguka lao olonjanja viosi

• Momo lie tu sukilila oku li lekisa muẽle okuti Tulombangi via Yehova?

[Alitalatu kemela 19]

Oku lilongisa Embimbiliya olonjanja viosi, kuenda oku likutilila ku kuatisa oku mãlako atatahãi.

[Alitalatu kemela 20]

Atatahãi vukuenje wa Elisia, eya oku tetuluiwa eci a mõla cimue ocinjonde.

[Alitalatu kemela 21]

Tua siata oku longisiwila ovihandeleko via velapo via Yehova volonjango Viusoma, via soka ndeyi ya tungiwila ndeti kofeka yo Benin.