Apulilo Valingiwa Lavakuakutanga
Ca sunguluka hẽ okuti Akristão vocili va kala pomisa yomunu wa fa ale pocipito colohuela vi lingiwila vonembele?
Oku kuata kuetu onepa yimuene ketavo liesanda ocina cimue ci sumuisa Yehova kuenje tu sukila oku yuvula elinga liaco. (2 Va Korindo 6:14-17; Esituluilo 18:4) Vomisa yomunu wa fa yi lingiwila vonembele mua kongela olondotilina vina okuti ka vi sangiwa Vembimbiliya ndeci, ocilelembia ka cifi kuenda oku tambula esumũlũho liomanu vosi vana vawa kilu. Ci tava okuti olonjanja vimue mu kongelavo oku linga ondimbukiso yekulusu kuenda oku lingila kumosi ohutililo la patele ale usongui womisa yaco. Olohutililo kuenda olondotilina vimue viatavo okuti ka vi litava leci Embimbiliya lilongisa pamue vi kongeliwavo vomisa yaco yocipito colohuela vi lingiwila vonembele. Omo lioku kala vowiñi womanu okuti vosi va kasi loku kuata onepa kolondotilina viatavo vesanda, ci tava okuti ku kuata epandi lioku likolisilako oku yuvula oku kuata onepa kolondotilina viaco viesanda. Omo liaco, ci lekisa uveke walua nda omunu umue o litengamo loku sima okuti hacitangiko omo kaka kuata onepa kolondotilina viaco.
Ci lingiwa hẽ ndati nda Ukristão wa kisikiwa oku kala pomisa yomunu wa fa ale pocipito cimue colohuela? Ndeci, nda ulume ka lilongisa Embimbiliya, ci tava okuti o kisika ukãi waye oco o kuame komisa ale kocipito caco. Anga hẽ ci tava okuti eye wenda pole ka kuata onepa ndaño o sangiwa vocipito caco? Omo lioku sumbila onjongole yulume waye ci tava okuti ukãi o tava oku enda lulume waye, kuenda oku kapelako okuti ka kuata onepa kolondotilina viosi vika lingiwa viatiamẽla ketavo liesanda. Handi vali, ci tava okuti eye o nõlapo oku siala loku sima okuti pamue omo liesanju lialua ale esumuo eye oka lueya olonumbi via Suku. Onjila a sesamẽla oku kuama eye muẽle o yi nõla. Ci tava okuti eye o nõlapo oku kala lutima wa yela okuti ka kuata ovitangi lavimue vi pondola oku u sumuisa kovaso a Suku.—1 Timoteo 1:19.
Handi vali, ci kuete esilivilo kokuaye nda okuti eye o lomboluila ulume waye okuti utima waye ka u wecela oku ka kuata onepa kolondotilina viatavo okuti ka vi taviwa la Suku, ndeci oku imba ovisungo ale oku nyoñamisa ovitue eci ku lingiwa ohutililo. Omo lielomboluilo liaye ci tava okuti ulume waye o limbuka okuti ka ci tava ukãi waye oku enda kocipito ale komisa yaco momo eci omanu vako vanja okuti ka kasi loku kuata onepa osimbu okuti vosi va kasi loku kuata onepa ci pondola oku u sumuisa. Omo liocisola cukãi waye ale omo liesumbilo lietavo liukãi waye kuenda oco ka vaka kutisiwe osõyi, eye pamue o nõlapo oku enda lika liaye. Pole, nda ulume o kisika ukãi okuti te wa enda laye, eye o pondola oku enda pole ka kuata onepa kovina viosi vika lingiwa.
Nda tu enda komisa yomunu umue wa fa, ale kocipito colohuela vi lingiwila vonembele tu sukila oku sokolola ndomo vamanjetu Akristão vaka tenda elinga liaco. Anga hẽ ci kapela vamanjetu ocilondokua okuti ka ci litava leci ci sangiwa vondaka ya Suku? Ci pondola hẽ oku honguisa ekolelo lia vamanji koku amamako loku yuvula efendelo lioviteka? Upostolo Paulu wa eca elungulo hati: “Ndi likutililavo okuti, poku kala lukũlĩhĩso luloño, oco vu kuata olondunge vioku limbuka ovina via velapo, kuenje keteke lia Kristu, vu sunguluka loku pua atondelo.”—Va Filipoi 1:10.
Ekisika lioku enda kocipito ale komisa yaco, li livokiya vali calua nda okuti ocipito caco comunu umue ukuepata. Ndaño okuti oco, Ukristão o sukila oku kũlĩhĩsa lutate walua ovina viosi via kongelamo. Olonjanja vimue ulume ale ukãi pamue o limbuka okuti ka kuli ovitangi nda eye wa enda komisa ale kocipito caco comunu wa fa nda okuti ka lingi lacimue, pole o tala lika eci ci lingiwa. Olonjanja vimue, pamue omunu o limbuka okuti nda wa endako cika nena esumuo kokuaye momo elinga liaco ka lia sungulukile kovaso a Suku. Handi vali, pamue o limbuka okuti nda wa enda, ndaño okuti ka kuata onepa kolondotilina viaco, cika tendiwa ndelinga limue lia sunguluka kovaso omanu. Omo liaco, kovina viosi vi lingiwa, Akristão va sukila oku kũlĩhĩsa lutate walua okuti eci va nõlapo oku linga ka cika nyõla ekalo liavo liwa liutima kovaso a Suku kuenda omanu.