Anga hẽ Ovitangi Viomanu Ndopo Vika Puako?
ESAPULO limue lia tundilila kofeka yo Irlanda lia lombolola ekalo lioluali okuti: “Onepa yimue yomanu voluali yi kuete ovitangi viusuke okuti, ci soka 1.3 kolohuluwa viomanu va litekula ño leci ka ci tẽla ondolale yimosi (1 USD) vokuenda kueteke. Handi vali, ci soka ohuluwa yomanu ka va tẽla oku tanga ndaño oku soneha, kuenje ci soka 1.3 kolohuluwa viomanu ka va kuete ovava a yela oku nyua kuenda ci soka ohuluwa yomanu va pita onjala eteke leteke.”
Ci sumuisa calua oku limbuka okuti, omanu ka va tẽla oku potolola ovitangi viosi vi sangiwa voluali! Handi vali, ovitangi viaco vi sumuisa vali calua poku limbuka okuti onepa yalua yomanu va tukuiwa vesapulo eli ndeci akãi kuenda omãla, ka va kuete eteyuilo lalimue. Eci hẽ ka ci sumuisa omo okuti ndaño muẽle kocita cilo 21 handi omoko yomanu valua “yi kasi oku sepuiwa eteke leteke?”—The Stateof the World’s Children 2000.
“Oluali Luokaliye Locisoko Cimuamue Comanu”
Ocisoko Cimue ci Teyuila Omãla Catiamẽla kolo Nações Unidas, ca lekisa ekolelo poku lombolola okuti: “Ovitangi vi kasi oku pita lomãla kolonepa viosi violuali, . . . eteke limue ka vika kalako vali.” Ocisoko caco ca lombolola okuti olohuluwa viomanu vi kasi loku pita lovitangi vina okuti “ka vi pongoluiwa.” Omo liaco, eci ca siata oku kuatisa “omanu vosi oku limbuka esukila lioku kala voluali luokaliye lu kuete ocisoko cimuamue comanu.” Kuli elavoko liokuti, eteke limue kuka kala oluali lumue okuti omanu vosi vaka “yovoka kovitangi ndeci, usuke, olonepele, ungangala, kuenda ovoveyi.”
Omanu va vangula olondaka evi va vetiyiwila omo okuti ndaño muẽle cilo, oku tata omanu upange umue u kuete esilivilo liocili omo okuti u tepulula esumuo liyilila kovitangi vina “vi molẽha ndu okuti ka ca lelukile oku vi tetulula.” Ndeci, vokuenda kueci ci pitahãla 15 kanyamo, kua lingiwa upange woku kuatisa omãla va sangiwa kocitumãlo ci tukuiwa hati Chernobyl kofefa yo Ukrania. Kuenje eci “ca kuatisa oku tepulula ohali yovita viomãla va kuatiwa luveyi wo câncer una wa kokiwa lofela yi tundilila kolomakina viñi viñi vio usina nuclear via totãla.” (The Irish Examiner, April 4, 2000) Ovisoko vimue vitito kuenda vinene vi kuete ocikele coku kuatisa omanu, via linga upange walua woku kuatisa omanu vana va kala vovitangi viuyaki kuenda ovisalu vina via siata oku kokiwa lomanu.
Pole, vosi va kuata onepa kupange woku kuatisa omanu, ekuatiso liaco va lieca muẽle lutima wavo wosi. Ovo va kũlĩha okuti ovitangi viaco evi vi kasi oku li vokiya vali calua okuti evi via kala kanyamo a pita konyima ci sule.” David Begg kesongo liocisoko coku kuatisa omanu wa popia hati: “Olonalavayi viange, ndeci oloñuatisi viomanu va kasi lovitangi kuenda olongavi vieca ekuatiso komanu, va tava oku linga upange waco lutõi walua” eci kofeka yoko Mosambiki kua pita ocitangi cetande liovava. Noke wamisako loku popia hati: “Etu lika lietu ka tu tẽla oku eca ekuatiso liaco ndeli.” Handi vali, kueci catiamẽla kalikolisilo a tundilila ko Afrika eye wa popia hati: “Kuli elavoko limue litito calua okuti li sokisiwa ndondiyelo yi kasi lokuima.” Omanu valua nda va limbuka okuti, ocisimĩlo caye cimue okuti catiamẽla komanu vosi va sangiwa voluali.
Anga hẽ tu pondola oku lavoka muẽle ocili “oluali luokaliye lu kuete ocisoko cimuamue comanu”? Ndaño okuti kuli alikolisilo alua oku kuatisa omanu va sangiwa lovitangi, pole tu sukila oku konomuisa elavoko likuavo lia sunguluka kuenda liombembua voluali luokaliye. Embimbiliya lieca elavoko liatiamẽla kondaka yaco ndomo tuka ci konomuisa vocipama cikuãimo.
[Elitalatu kemẽla 1]
Kemẽla 3, Omãla: UN/DPI Elitalatu lia pangiwa la James Bu