Kuama Ongangu Yulongisi Wavelapo
‘Oco kuendi, ka tavisi omanu vo kolofeka viosi . . . va longisi oku linga ovina viosi ndo kundiki.’—MATEO 28:19, 20.
1, 2. (a) Ndamupi etu vosi tu sokisiwa ndalongisi? (b) Kueci catiamẽla koku longisa, ocikele cipi Akristão vocili va kuete?
ANGA hẽ ove ulongisi? Ci tava okuti vosi yetu tualongisi. Olonjanja viosi ove wa siata oku eca onumbi komunu umue wa nyelẽla, kuenda wa siata oku lekisa ku vakuene o talavaya lavo kumuamue ndomo va pondola oku linga upange umue. Handi vali, ove wa siatavo oku longisa omõla ndomo ovikolo violosapato vi kutiwa. Anga hẽ oku longisa vakuene ovina evi, ka ci nena esanju liocili?
2 Ocili okuti, kueci catiamẽla kondaka eyi, Akristão vocili va kuete ocikele cimue ca velapo. Tua tambula ocikele coku ‘tavisa omanu kuenda . . . oku va longisa.’ (Mateo 28:19, 20) Olonjanja vimue, tua siatavo oku tambula ocikele coku longisa vekongelo. Alume vamue va loñoloha va siata oku nõliwa oco va kale ‘ovangombo kuenda alongisi’ okuti ekongelo liamamako kespiritu. (Va Efeso 4:11-13) Kupange Wakristão weteke leteke, akãi vana va loñoloha va siatavo oku kala “alongisi vovina viwa” kakãi amalẽhe. (Tito 2:3-5) Vosi yetu tu vetiyiwa oku kuatisa vakuetu, pole tu pondola oku ci linga poku kuama olonumbi Viembimbiliya oco va pame kespiritu. (1 Va Tesalonike 5:11) Ocili okuti tu kuete esumũlũho lioku kala alongisi Vondaka ya Suku kuenda oku lekisa ku vakuetu ovituwa viwa viespiritu okuti vi pondola oku va ĩha asumũlũho otembo yosi.
3. Ndamupi tu pondola oku mioñolola uloño wetu woku longisa?
3 Ndamupi tu pondola oku loñoloha kupange wetu woku longisa? Tu pondola oku ci linga poku kuama ongangu ya Yesu Kristu okuti eye Ulongisi Wavelapo. Omanu vamue va siata oku li pulisa ovo muẽle ndoco: ‘Ndamupi tu pondola oku kuama ongangu ya Yesu?’ ‘Eye wa kala omunu walipua.’ Ocili okuti, etu ka tu pondola oku kala alongisi valipua. Pole, ndaño ka tualipuile, ci tava okuti tu likolisilako oku linga eci tu tẽla oco tu kuame ongangu ya Yesu yoku longisa. Omo liaco, tu konomuisi ndomo tu pondola oku kuama olonepa vikuãla Yesu a kuama poku longisa ndeci: Oku kuama onjila ya leluka poku longisa, oku linga apulilo a sunguluka, oku sokolola lutate wocili, kuenda oku linga ovindekaise vina via sunguluka.
Kuama Onjila ya Leluka Poku Longisa
4, 5. (a) Momo lie ci kuetele esilivilo oku kuama onjila ya leluka poku longisa ocili Cembimbiliya? (b) Momo lie ci kuetele esilivilo oku popia olondaka via leluka poku longisa?
4 Ocili Condaka ya Suku ka ca tĩlile. Yesu vohutililo yaye wa popia hati: “A Tate a Cime . . . wa sitikila ovina evi kolonoño la vakualondunge kuenje wa vi situluila komãla.” (Mateo 11:25) Yehova wa siata oku ecelela oco ocipango caye ci situluiwe komanu vana vakuavitima via sunguluka haivo vakuacili. (1 Va Korindo 1:26-28) Ocili okuti, oku kuama onjila ya leluka ci kuatisa calua koku longisa ocili Cembimbiliya.
5 Eci ove o linga elilongiso Liembimbiliya ale eci o linga epasu komanu vana va lekisa onjongole, ndamupi o pondola oku longisa loku kuama onjila ya leluka? Nye tua lilongisa Kulongisi Wavelapo? Omo okuti pokati kolonjeveleli via Yesu pa ‘kala akãi vaño okuti ka va lilongisile,’ Yesu wa kuama upopi una okuti eci eye a longisa vosi yavo ci va lomboloka ciwa. (Ovilinga 4:13) Oco tu longise loku kuama onjila ya leluka, tu sukila oku popia olondaka vina via leluka. Ka ca sungulukile okuti tu popia olondaka vina via tatama poku longisa Ondaka ya Suku oco tu vetiye vakuetu. ‘Olondaka viaco via longa,’ vi pondola oku saluisa omanu, ca piãla vali enene ku vana okuti ka va lilongisile calua kosikola. (1 Va Korindo 2:1, 2) Ongangu ya Yesu yi lekisa okuti, oku popia olondaka via leluka, ci pondola oku kuatisa calua koku longisa ocili.
6. Ndamupi tu pondola oku yuvula oku longisa kondonge olonumbi vialua Viembimbiliya vonjanja yimosi?
6 Oco tu kuame onjila ya leluka poku longisa, tu sukilavo oku yuvula oku longisa kondonge olonumbi vialua Viembimbiliya vonjanja yimosi. Yesu wa kuamẽle onjila yaco poku longisa olondonge viaye. (Yoano 16:12) Etu tu sukilavo oku kuama onjila yimuamue poku longisa olondonge vietu. Ndeci, nda tu kasi oku longisa velivulu Ukũlĩhĩso Utuala Komuenyo Ko Pui, ka tu sukila oku situlula ovina viosi vi sangiwa vocipama caco.a Handi vali, ka tu sukilavo oku sakalala calua leci tu longisa loku sima okuti ca velapo oku longisa kondonge olonumbi vialua Viembimbiliya vonjanja yimosi. Pole, ciwa oku kapako lutate wocili cosi ondonge yi sukila kuenda epondolo liavo lioku kuata elomboloko. Onjongole yetu yoku kuatisa omunu tu lilongisa laye Embimbiliya oco a linge ondonge ya Kristu kuenda oku kala ufendeli wa Yehova. Tu sukila oku sokiya otembo yoku kuatisa ondonge yetu oco yi kuate elomboloko lieci yi kasi oku lilongisa. Omo liaco, ocili ci pondola oku veta kutima waye kuenda oku amamako kespiritu.—Va Roma 12:2.
7. Olonumbi vipi vi pondola oku tu kuatisa koku longisa lulelu eci tu linga ohundo vekongelo?
7 Eci tu linga ohundo yowiñi vekongelo, nda muli omanu vana okuti ndopo va fetika oku lilongisa Embimbiliya, ndamupi tu pondola oku kuama ‘upopi umue wa leluka’? (1 Va Korindo 14:9) Kũlĩhĩsa olonumbi vitatu okuti vi pondola oku kuatisa. Catete, lombolola olondaka viosi via tatama vi sangiwa vohundo yove. Ukũlĩhĩso wetu watiamẽla Kondaka ya Suku wa siata oku tu ĩha olondaka vimue okuti ka via kũlĩhĩwile lomanu. Nda tu kasi oku tukula olondaka vimue ndeci, “ukuenje wa kolelua haeye wa lunguka,” “olomeme vikuavo,” kuenda ‘Ombavulono Yinene,’ olondaka viaco evi, tu sukila oku vi lombolola lulelu wocili oco omanu vosi vi va lomboloke ciwa. Cavali, tu sukila oku yuvula oku popia olondaka vialua poku situlula etosi limue. Nda tua kuama olondaka vialua poku situlula etosi limue vohundo yetu, omanu ka vaka kuata vali onjongole yoku yevelela. Oco ohundo yetu yi kuate elomboloko liocili, tu sukila oku tepululako olondaka vina okuti ka vi sukiliwa. Catatu, kuka seteke oku kuama atosi alua ovimapa. Valivulu etu tu pondola oku sangamo atosi osi tu yongola. Pole, ci kuete esilivilo oku sokiya olondaka vimue vitito vina tu sukila vocipama tuka linga okuti ci tava oku vi lombolola votembo yimue yitito.
Oku Linga Apulilo a Sunguluka
8, 9. Ndamupi tu pondola oku linga apulilo a vetiya muẽlianjo? Ci lombolola.
8 Ivaluka okuti, Yesu wa loñolohele calua koku linga apulilo oco olondonge viaye vi sokolole eci via lilongisa loku vi vetiya kuenda oku pindisa ovisimĩlo viavo. Poku linga apulilo aco lutate wocili, Yesu wa enda oku veta kovitima violondonge viaye. (Mateo 16:13, 15; Yoano 11:26) Ndamupi tu linga apulilo poku longisa ndeci Yesu a linga?
9 Eci tu linga upange woku kunda konjo lanjo, tu pondola oku linga apulilo a vetiya ovitima viomanu okuti a yulula onjila yoku vangula eci catiamẽla Kusoma wa Suku. Ndamupi tu pondola oku linga apulilo a vetiya omunu tu sanga? Kũlĩhĩsa ciwa lutate. Osimbu opanda konjo yimue, kũlĩhĩsa lutate ovina viosi vi sangiwa konele yonjo yaco. Anga hẽ kocitali caco kuli hẽ olombuneka ci lekisa okuti konjo yaco kuli omãla? Nda kuli, tu sukila oku pula ndoco: ‘Ove hẽ wa kũlĩha ndomo oluali lulo luka kala eci omãla vove vaka kula?’ (Osamo 37:10, 11) Anga hẽ epito li kuete akumba alua ale pamue li kuete omakina yoku lavulula omunu wosi o kasi okuiya? Tu pondola vali oku pulisa ndoco: ‘Ove hẽ osima okuti ku keya otembo yimue okuti omanu va kasi ndove kuenda ndame vaka kolapo volonjo viavo kuenda volokololo?’ (Mika 4:3, 4) Vonjo yaco mu sangiwa hẽ omangu yomanu vana va lemãla? Handi vali, tu pondolavo oku pula ndoco: ‘Ku keya hẽ otembo yimue okuti omanu vosi vaka kuata uhayele wocili?’ (Isaya 33:24) Olonumbi viosi via eciwa ndeti vi sangiwa velivulu Raciocínios à Base das Escrituras.b
10. Ndamupi tu pondola oku linga apulilo oco tu limbuke eci ci kasi vutima womunu tu lilongisa laye Embimbiliya? Pole, nye tu pondola oku ivaluka?
10 Ndamupi tu pondola oku linga apulilo a sunguluka poku longisa omanu Embimbiliya? Ca litepa la Yesu, etu ka tu pondola oku tala eci ci kasi vovitima viomanu. Pole, poku linga apulilo lutate wocili, tu pondola oku kuatisa omunu tu lilongisa laye oco a vangule eci ci kasi vutima waye kuenda eci a kasi oku sima. (Olosapo 20:5) Ivaluka okuti pamue tu kasi oku linga elilongiso velivulu Ukũlĩhĩso kocipama ci kuete osapi ya linga hati: “Oku Kala Ndomo Mukasi Onjongole Ya Suku Cinena Esanju.” Ocipama eci, ci lombolola ndomo Suku a tenda uhembi, ukahonga kuenda ovituwa vikuavo vĩvi. Omunu tu lilongisa laye ci tava okuti eca etambululo ndomo lia sonehiwa. Pole, anga hẽ eye o tava muẽle kueci a kasi oku lilongisa? Tu pondola oku pula ndoco: ‘Ocisimĩlo ca Yehova kueci catiamẽla kondaka eyi kokuove hẽ ca sunguluka?’ ‘Ndamupi ove o pondola oku kapako ovituwa evi komuenyo wove?’ Pole, poku vangula londonge yove, lekisa esumbilo liocili kokuaye. Ka ca sungulukile oku linga apulilo ana okuti a pondola oku sumuisa omunu tu lilongisa laye Embimbiliya.—Olosapo 12:18.
11. Ndamupi vamanji va linga ohundo va pondola oku sokiya ciwa apulilo?
11 Vamanji va siata oku linga ohundo yowiñi, va pondolavo oku linga apulilo. Apulilo ana okuti ka tu kevelela etambululo liaco, a pondola oku kuatisa olonjeveleli oku sokolola lutate wocili. Olonjanja vialua okuti Yesu wa enda oku lingavo apulilo aco. (Mateo 11:7-9) Handi vali, noke yoku fetika ohundo, hundi o sukila oku linga apulilo a kuete atosi a velapo eye aka lombolola. Eye o pondola oku popia ndoco: Vohundo yetu yetaili, tuka tambulula apulilo ndeci . . . Noke, poku malusula eye o pondola oku lombolola eci catiamẽla kapulilo osi oco a pitulule atosi a velapo.
12. Lombolola ndomo akulu vekongelo va pondola oku linga apulilo oku kuatisa omanu vana va sumua oco va tambule ekuatiso Liondaka ya Suku.
12 Akulu vekongelo kupange wavo woku pasuisa vamanji, va pondola oku linga apulilo oku ‘kolisa’ omanu vana va sumua oco va tambule ekuatiso Liondaka yi tunda ku Yehova. (1 Va Tesalonike 5:14) Ndeci, poku kuatisa omunu umue wa sumua, ukulu wekongelo o pondola oku kuama Osamo 34:18, yi popia ndoco: “Yehova yu ocipepi la vakuavitima via teka. O popela ava va kasi lovitima via samba.” Oco omunu wa sumua a limbuke ndomo olondaka evi vitiamisiwila kokuaye, ukulu wekongelo o pondola oku pula ndoco: ‘Yehova o kasi ocipepi lelie? Olonjanja vimue ‘utima wove hẽ wa siata oku teka kuenda oku kuata esumuo lialua?’ ‘Ndomo Embimbiliya li popia okuti Yehova o kasi ocipepi lomanu vaco, eci hẽ ka ci lomboloka okuti eye o kasi ocipepi love?’ Olondaka evi vi pondola oku kuatisa omunu una wa sumua calua.—Isaya 57:15.
Oku Sokolola Ciwa Lutate
13, 14. (a) Ndamupi tu pondola oku vangula lomunu una ka tava ku Suku ka muiwa lovaso? (b) Momo lie tu kevelila okuti havosiko vaka tava kueci tu va lomboluila?
13 Kupange wetu woku kunda, tu sukila oku veta kovitima viomanu lolondaka vina vi vetiya. (Ovilinga 19:8; 28:23, 24) Eci hẽ ci lomboloka okuti tu sukila oku lilongisa ovina via tatama oco vi vetiye vakuetu kueci catiamẽla kocili Condaka ya Suku? Sio, hacoko. Poku vangula la vakuetu, ka tu sukila oku kuama olondaka via tatama. Elomboluilo lilingiwa, olio lia siata oku kuatisa cocili. Tu konomuisi ulandu umue.
14 Ndamupi tu pondola oku tambulula nda omunu umue wa popia hati, ka pondola oku tava ku Suku una eye ka lete? Tu pondola oku sokolola ocihandeleko cimue catiamẽla kekalo liocina cimue kuenda esulilo liaco. Eci tu konomuisa ekalo liocina cimue, tu tava okuti kuli eci ca koka elinga liaco. Tu pondola oku popia ndoco: ‘Nda o kasi kocitumãlo cimue cocipãla, noke wa sanga onjo yimue ya tungiwa ciwa okuti yeyuka okulia kualua, ove o tava lonjanga okuti, kuli omunu umue wa tunga onjo yaco loku yukisamo ovikulia. Handi vali, eci tu tala ovina via pangiwa, kuenda okulia kualua ku sangiwa ‘vovitumãlo’ via palo posi, eci hẽ ka ci lekisa okuti kuli Omunu Umue wa kapa ovikulia viaco?’ Embimbiliya li situlula ciwa ondaka eyi poku popia ndoco: “Onjo yosi yi tungiwa lomunu, puãi, u wa tunga ovina viosi, Suku.” (Va Heveru 3:4) Omo liaco, tu pondola oku sokolola lomanu ndoco, pole havosiko vaka tava kondaka eyi. Embimbiliya li tu ivaluisa okuti, omanu vana “va noliwila omuenyo ko pui,” ovo lika va pondola oku tava kondaka yaco.—Ovilinga 13:48; 2 Va Tesalonike 3:2.
15. Onjila yipi tu pondola oku kuama poku lombolola ovituwa via velapo via Yehova kuenda olonjila viaye? Pole, ovolandu api avali a lekisiwa tu pondola oku kuama poku vangula la vakuetu?
15 Poku longisa, cikale kupange wetu woku kunda ale vekongelo, tu pondola oku situlula ovituwa via velapo via Yehova kuenda olonjila viaye. Handi vali, tu sukilavo oku ‘kũlĩha’ ndomo Yesu a enda oku vetiya omanu olonjanja vialua. (Luka 11:13; 12:24) Nda tua kuama onjila eyi poku longisa vakuetu, ovo vaka kuatisiwa calua. Oco tu lombolole ondotilina yuhembi yatiamẽla kifelu, tu pondola oku popia ndoco: ‘Ka kuli onjali layimue yi kuete ocisola okuti yi kangisa omõla waye poku tukika ovaka vomõlaye vulienge wondalu. Ocisimĩlo caco cifelu viondalu ka yimi, ci sumuisa calua Isietu wokilu ukuacisola.’ (Yeremiya 7:31) Poku longisa ulandu wokuti Yehova o tata ciwa omanu vaye vosi vo fendela, tu pondola oku popia ndoco: ‘Nda Yehova wa kũlĩha onduko londuko violohuluwa violombungululu, eye o pondola oku tata ciwa omanu vana vo sole haivo va landiwa losonde Yomõla waye.’ (Isaya 40:26; Ovilinga 20:28) Nda tua kuama onjila eyi, tu pondola oku veta kovitima via vakuetu londaka ya Suku.
Ovindekaise Via Sunguluka
16. Momo lie ovindekaise vi kuetele esilivilo liocili koku longisa?
16 Ovindekaise via sunguluka vi pondola oku kuatisa vakuetu oku va longisa ocili. Momo lie ovindekaise vi kuetele esilivilo koku longisa? Ulongisi umue wa popia hati: “Uloño woku sokolola ovina okuti ka vi muiwa lovaso, via tatama calua komunu oku kuata elomboloko liaco.” Ovindekaise vi tu kuatisa oku ivaluka ovina vialua kuenda vi pondolavo oku tu kuatisa oku kuata elomboloko liovisimĩlo viokaliye. Yesu wa kuatele uloño walua poku lingainga ovindekaise. (Marko 4:33, 34) Tu konomuisi ndomo tu pondola oku kuama onjila yaco eyi koku longisa.
17. Atosi api akuãla tu pondola oku kuama oco ovindekaise vietu viece ekuatiso liocili?
17 Onjila yipi tu pondola oku kuama oco ovindekaise viece ekuatiso liocili? Catate, tu sukila oku kuama ovindekaise vina viatiamẽla komuenyo wavo weteke leteke okuti vi pondola oku kuatisa olonjeveleli. Ivaluka okuti, Yesu wa situlula ovindekaise vialua eye a linga viatiamẽla komuenyo wolonjeveleli viaye. Cavali ceci okuti, ocindekaise tu linga te citiamisiwila ketosi tu yongola oku lombolola. Nda ocindekaise caco ka catiamisiwile ketosi tu yongola oku lombolola, olonjeveleli ka vi kopako esilivilo lalimue. Catatu ceci okuti, vocindekaise tu linga ka ci sukila okuti tu kongelamo atosi alua okuti ka a sukiliwa. Ivaluka okuti, eci Yesu a linga ovindekaise viaye, wa lombolola lika etosi lieci a yongola oku situlula kuenda ka vokiyilemo atosi ana ka a kuete esilivilo. Cakuãla ceci okuti, eci tu linga ovindekaise, tu sukila oku kũlĩhĩsa okuti, ocindekaise caco ci kuata elomboloko limue lia sunguluka. Omo liaco, nda ka tua kuamele onjila eyi, olonjeveleli vimue ka vika kuata elomboloko liocindekaise tua linga.
18. Ndamupi tu pondola oku sima ovindekaise via sunguluka?
18 Ndamupi tu pondola oku sima ocindekaise ca sunguluka? Ka tu sukila oku pita otembo yalua loku sokolola alusapo alua. Ovindekaise vi teta onimbu, vi pondola oku kuatisa calua. Seteka oku sima ovolandu ana o yongola oku lombolola. Ndeci, nda tu kasi oku lombolola etosi limue liatiamẽla kongecelo ya Suku, ci tava okuti tu kuama ocindekaise caco lekuatiso lietosi li sangiwa kelivulu Liovilinga 3:19, li popia hati, Yehova wa siata oku ‘ecela’ akandu etu. Ocindekaise eci, ci pondola oku kuatisa cocili. Anga hẽ tu pondola oku linga ocindekaise catiamẽla kocina cimue ci letiwe ndeci, ekenya lioku nyõla ololetala via sonehiwa? Tu pondola oku popia ndoco: ‘Eci Yehova a ecela akandu etu, eye o ci linga ndomunu o nyõla lekenya ololetala via sonehiwa okuti ka vi sokolola vali.’ Nda tua kuama ocindekaise eci ca leluka, omunu tua longisa kaka ivalako etosi tuo longisa.
19, 20. (a) Onjila yipi tu sukila oku kuama oco tu sange ovindekaise via sunguluka? Pole, pi hẽ tu pondola oku sanga ovindekaise viaco? (b) Ovolandu api a lekisa ovindekaise via sunguluka vina via sandekiwa valivulu etu? (Tanga pokakasia.)
19 Pi hẽ tu pondola oku sanga ovindekaise vi lekisa ovolandu ana a pita lomanu komuenyo wavo? Sokolola ovolandu atiamẽla komuenyo wove muẽle ale ana a pita posongo yene kuenda ovolandu ana a pita la vamanji. Ovolandu, ci tava okuti a nõliwa vovina viñi viñi oku kongelamo evi vi kuete omuenyo kuenda evi ka vi kuete omuenyo. Handi vali, tu pondolavo oku nõla ovindekaise viatiamẽla kovikuata viovonjo, ale ovolandu a pita ndopo okuti a kũlĩhĩwa ciwa lomanu vo posongo yetu. Oco tu sange ovindekaise via sunguluka, tu sukila oku ‘lavulula’ lutate wocili ovina vi pita oloneke viosi posongo yetu. (Ovilinga 17:22, 23) Elivulu limue li situlula eci catiamẽla komanu li lombolola ndoco: “Ohundi yi lavulula lutate eci ci pita komuenyo womanu kuenda ovina viosi ovo va linga, yi pondola oku vangula lomanu vosi poku konomuisa ovina viosi. Handi vali, eye o linga apulilo toke eci eye a kuata elomboloko liaco, kuenje ovina viaco evi vi ko kuatisa calua eci aka sukila ulandu waco.”
20 Vutala Wondavululi lo vo Despertai!, kuenda valivulu akuavo a sandekiwa Lolombangi via Yehova, mu sangiwavo ovindekaise vialua vi kuatisa cocili. O pondola oku lilongisa calua poku konomuisa ndomo alivulu aco a linga ovindekaise.c Konomuisa ocindekaise ci sangiwa velivulu Ukũlĩhĩso, kocinimbu 11 kocipama 17. Ocindekaise caco ci sokisa ovituwa via litepa via vamanji va sangiwa vekongelo, ndakãlu va kasi oku endela vetapalo limuamue. Esilivilo lipi li sangiwa vocindekaise eci? Kũlĩhĩsa okuti, ocindekaise eci ci lombolola ovina vi pita lomanu oloneke viosi kuenda ci kuete elitokeko letosi lia tukuiwa haico ci kuete elomboloko limue lia leluka. Omo liaco, kupange wetu woku longisa, tu sukila oku kuama ovindekaise vi sangiwa valivulu. Pole, ciwa okuti tu nõla ocindekaise cina ci pondola oku kuatisa omunu tu lilongisa laye Embimbiliya, ale pamue ci tu kuatisa koku linga ohundo.
21. Asumũlũho api eyilila koku longisa ciwa Ondaka ya Suku?
21 Oku linga ulongisi umue uwa, ci nena asumũlũho ocili. Eci tu longisa, tu vetiya vakuetu poku va kuatisa leci tu kuete. Ekuatiso liaco li nena asumũlũho alua ndomo Embimbiliya li lombolola okuti: “Esumũlũho li tunda koku eca olio lia lua, eli li tunda koku tambula li sule.” (Ovilinga 20:35) Alongisi Vondaka ya Suku, va pondola oku kuata esanju liocili poku kũlĩha okuti, tu kasi oku longisa ocili catiamẽla ku Yehova okuti, ci kuete esilivilo ka li pui. Tu pondolavo oku kuata esanju liocili omo lioku kũlĩha okuti, tu kasi loku kuama ongangu ya Yesu Kristu okuti eye Ulongisi Wavelapo.
[Atosi pombuelo yamẽla]
a Lia sandekiwa Lolombangi via Yehova.
b Tala velivulu Raciocínios losapi ya linga hati: Introduções para uso no ministério de campo, okupisa kemẽla 9 toke 15.—lia sandekiwa Lolombangi via Yehova.
c Oco o sange ovolandu a lekisa ovindekaise, tala vo Índice das Publicações da Torre de Vigia, ya sandekiwa okupisa kunyamo wo 1986 toke wo 2000, kosapi ya linga hati: “Ilustrações.”—O Índice yaco, ya sandekiwa Lolombangi via Yehova valimi alua.
Anga hẽ Ocivaluka?
• Ndamupi tu pondola oku kuama onjila ya leluka poku longisa ocili Cembimbiliya? Handi vali, ndamupi tu pondola oku kuama onjila ya leluka poku linga ohundo vekongelo?
• Ndamupi tu pondola oku linga apulilo a sunguluka eci tu kunda konjo lanjo?
• Ndamupi tu pondola oku velisapo ovituwa via velapo via Yehova kuenda olonjila viaye?
• Pi hẽ tu pondola oku sanga ovindekaise vina via sunguluka?
[Okakasia kemẽla 31]
Anga hẽ Ovindekaise Evi Ove o vivaluka?
Sanda uwa woku kuama ovindekaise vilo. Momo lie ku vanjela kolonumbi evi oco o limbuke ndomo ovindekaise vi pondola oku vetiya etosi lia velapo vombangulo?
• Ndeci omanu vavali va kuete uloño woku nyeñisa etimba, te va liyeva ciwa pokati kavo, ale ulume lukãi waye va endela posi pasielena va sukila oku endela pamosi oco ka vaka kupuke, haico ci sukiliwa komanu vosi vana va yongola ekalo liwa volohuela viavo. Eci ci lekisa okuti oco ovina viosi viende ciwa pokati kulume lukãi waye va sukila oku liyeva ciwa voliavo. —Utala Wondavululi, 1 Evambi wo 2001 kemẽla 12.
• Oku pitiya ocisimĩlo cove kulume, ci kasi ndoku wimbila ombunje. Ove o pondola oku yimba luloño kokuaye oco ka yiko lemẽhe ale o pondola oku yimba longusu.—Ukũlĩhĩso Utuala Komuenyo Ko Pui kemẽla 144.
• Oku lilongisa eci catiamẽla kocisola, ci kasi ndoku lilongisa elimi liokaliye.—Utala Wondavululi, 1 Elombo wo 1999 kemẽla 11.
• Ekandu lia lamelẽla muẽle kombuto yolonjali vietu viatete, kuenda li kasi ndocisonehua cimue ca sonehiwa vohanda.—Ukũlĩhĩso Utuala Komuenyo Ko Pui kemẽla 58.
• Umbanda u sokisiwa lenyanga li kapa onũlo yoku kokela ovinyama kociliva.—Ukũlĩhĩso Utuala Komuenyo Ko Pui kemẽla 111.
• Ndeci ocinyi ka ci setahãla ovikuata vi milihiliwa, haicovo ongusu yomuenyo ka yi kuete ocisetahãi cocilulikilo.—Ukũlĩhĩso Utuala Komuenyo Ko Pui kemẽla 82.
[Elitalatu kemẽla 28]
Akristão vocili alongisi Vondaka ya Suku
[Elitalatu kemẽla 29]
Akulu vekongelo va pondola oku kuama apulilo oco vakuavo va tambule ekuatiso li tunda Kondaka ya Suku