Nye ci Kasi Oku Pita Lovisoko Vioku Kuatisa

Omanu?

NOKE yocitangi ca pita Kolupale luo Nova York kuenda luo Washington, D.C., keteke 11 liosãi Yenyenye Linene wo 2001, kueya akuatiso añi añi a tundilila komanu oco a tepulule ohali yomanu vana va kuata ovitangi. Ovisoko viupange woku kuatisa omanu via tambula olombongo vieci ci soka 2,7 kolohũlũkãi violohuluwa violondolare oco vi kuatise apata ana a puluka kocitangi caco. Omanu vo kolonepa viosi violuali va kuata ohenda yalua lomanu vaco va pita locitangi kuenje, ca va vetiya oku kuatisa omanu vaco.

Omanu vamue veya oku sumua calua eci va limbuka okuti ovisoko vimue viupange woku kuatisa omanu via nyana olombongo viaco. Handi vali, ca sumuisa calua omanu oku yeva vasapulo okuti ocisoko cimue ca siata oku linga upange woku kuatisa omanu, ca kongola olombongo vieci ci soka 546 kolohuluwa violondolare kuenje olombongo viaco va vi pesila koku tẽlisa olonjongole viavo muẽle. Ndaño okuti ocisoko caco noke ca li tiukamo oku linga eci va yonguile kuenje ca pinga ongecelo, pole, ukãi umue ukuasapulo wa lombolola hati: “Omanu vamue va limbuka okuti ocisoko caco ca cilua koku lekisa esunga oco ci koleliwe vali,” ndeci ca kala eci handi ka kueyile ocitangi co ko Nova York. Oco hẽ nye ci popiwa kueci catiamẽla kokuove? Anga hẽ wa kolelele ocisoko cimue cupange woku kuatisa omanu okuti noke ceya oku kuata ovitangi?

Anga hẽ Oku Eca Ekuatiso ci Kuete Esilivilo Ale Epese?

Oku eca ekuatiso kocisoko cimue cupange woku kuatisa omanu ci lekisa ocali omunu a kuete. Pole, omanu vamue ka va tava kocisimĩlo caco. Vokuenda kueci ci pitahãla ovita vivali vianyamo umue usonehi wa livulu o tukuiwa hati Samuel Johnson wa soneha ndoco: “Ove o pondola vali oku kuata esanju nda weca olombongo komanu vana va linga upange umue, pole oku eca olombongo kocisoko cimue cupange woku kuatisa omanu hacoko.” Cilo omanu va kuete ocisimĩlo cimuamue kuenda asapulo atiamẽla kovisoko viupange woku kuatisa omanu a siata oku lekisa okuti ovisoko viaco ka via siatele oku talavaya ciwa lolombongo vina omanu va eca. Omo liaco, eli olio esunga lieci omanu ka va kuetele vali ekolelo kovisoko viaco. Konomuisa ovolandu amue avali a pita ndopo.

Kolupale luo San Francisco kofeka yo Estados Unidos umue kesongo kocisoko cupange woku kuatisa omanu wa tundisiwa vocisoko caco eci a kuatiwa poku tumisa olopapelo viokupa olombongo vioku sakuiwa oco a finise vali etimba liaye kuenda olombongo vieci ci soka 500 kolondolare vioku feta vosemana okulia kuaye vonjo yoku landisila ovikulia vokuenda kuanyamo avali. Kofeka yo Grã-Bretanya, ocisoko cimue ca velapo cupange woku kuatisa omanu catiamẽla kocipito cimue colonalavayi vio Televisão, va kuata esumuo lialua eci va limbuka okuti kueci ci soka 10 kolohuluwa violondolare vina via tumiwile kofeka yo Romênia oco vi kuatise oku tunga olonjo viomãla volosiwe, ovo va tungisa lavio lika eci ci soka 12 kolonjo vina ka vi silivila, kuenda ka va lomboluile oku kua enda ovita violohũlũkãi violondolare vikuavo. Asapulo vaco ava a siata oku sumuisa calua omanu vana vakuambili haivo vakuacali koku kuatisa omanu. Cilo, ovo va kuete atatahãi kuenda va siata oku lipula ovo muẽle kueci catiamẽla ketendelo liolombongo ovo va pondola oku eca kuenda kulie ovo va pondola oku vieca.

Ci Tava hẽ Oku Eca Ale Sio?

Oku ecelela ovilinga viomanu vamue vatito ale ovisoko vimue okuti vi nyõla ovituwa vietu viatiamẽla koku kuatisa omanu kuenda oku kuatela ohenda vakuetu ocina cimue ci sumuisa calua. Embimbiliya li lombolola okuti: “Etavo liocili, hailio lia pua evĩho kovaso a Suku haeye Isia, lieli okuti, oku pasula ovimbumba lolosiwe kolohali viavo.” (Tiago 1:27) Ocili okuti oku kala locituwa coku kuatisa olohukũi kuenda omanu vana ka va kuete epondolo lioku sanga eci va sukila, ocituwa cimue Akristão va sukila oku linga otembo yosi.

Pole, ci tava okuti ove o li pula ndoco: ‘Anga hẽ ndi sukila oku amamako oku eca olombongo kovisoko vioku kuatisa omanu ale ndi sukila oku eca lika ekuatiso liange komunu lomunu?’ Ekuatiso lipi Suku a kevelela komunu? Ocipama cikuãimo cika eca vali alomboluilo akuavo atiamẽla kondaka yaco.