“Elivulu Eli Lia Ndi Veta Calua Kutima”
UKÃI umue Ombangi ya Yehova eci a tambula elivulu liokaliye li kuete ci soka 320 kamẽla lia sandekiwa Kohongele Yofeka losapi ya linga hati: “Vakuambili Koku Kunda Usoma,” vokuenda kunyamo wo 2002/03, wa popia hati: “Ndeca olopandu lutima wange wosi omo liombanjaile Eyi yiwa yelivulu losapi ya linga hati: ‘Achegue-se a Jeová.’ Elivulu eli lia ndi kuatisa oku kuata onjongole yoku soliwa calua la Yehova kuenda oku kuata ukamba wocili laye. Cilo, ndi kuete ukamba wocili la Yehova kumue Lomõlaye o soliwe calua. Ndi yongola oku sapuilako omanu vosi eci catiamẽla kelivulu eli kuenda oku lieca ku vangandiange vosi.” Omo liaco, tu konomuisi eci ci sangiwa velivulu eli liokaliye kuenda tu kũlĩhĩsi esunga lieci lia sandekiwila.
Ovina Vimue vi Sangiwa Velivulu Liokaliye
Nye ci sangiwa velivulu eli liokaliye? Ovolandu aco a lomboluiwa vovipama vilo vivali vielilongiso, kuenda olonumbi vikuavo! Elivulu liaco, li kuete eci ci soka 31 kovipama. Ovipama viaco, via li soka la vina vi sangiwa vocipama celilongiso Liutala Wondavululi. Noke yolondaka vioku fetika, oku kongelamo ovipama vitatu viatete, tu limbuka okuti, elivulu liaco lia tepiwa volonepa vikuãla kuenda onepa lonepa yi lekisa ovituwa via velapo via Yehova. Ocipama locipama ci fetika loku lekisa eci ca kongeliwa vocituwa caco. Ovipama vikuavo vi kuãimo, vi lombolola ndomo Yehova a siata oku lekisa ovituwa viaco. Noke, volonepa viosi vielivulu, mu sangiwa ocipama cimue ci lombolola eci catiamẽla ku Yesu. Momo lie? Yesu wa popia hati: “U wa mola ame haeye wa mola Isia.” (Yoano 14:9) Omo okuti, Yesu eye esetahãlo lia Yehova, eye o tu lekisa ongangu yiwa ndomo ovituwa via Suku vi kapiwako komuenyo weteke leteke. Onepa lonepa yelivulu lilo, yi malusula locipama ci tu longisa ndomo tu pondola oku kuama ongangu ya Yehova yoku lekisa ocituwa caco. Poku lombolola ovituwa via Yehova, elivulu lilo li tukula alivulu osi a sangiwa Vembimbiliya.
Elivulu, Achegue-se a Jeová, li kuetevo ovina vimue vilikasi. Oku fetikila kocipama 2 toke kesulilo, vovipama viaco viosi mu sangiwa okakasia kamue losapi ya linga hati, “Perguntas para Meditação.” Ovipama Viembimbiliya kuenda apulilo a sangiwa vokakasia kaco, ka atiamẽlele koku pitulula eci ci sangiwa vocipama caco. Ovipama viaco, vi kuete esilivilo lioku ku kuatisa oku sokolola lundongosi eci wa lilongisa Vembimbiliya. Ci kuete esilivilo nda okuti ovinimbu viaco Viembimbiliya o vi tanga ciwa lutate. Noke, konomuisa ciwa epulilo kuenda sokolola esilivilo o pondola okupa kelilongiso liaco. Oku sokolola kuaco, ku pondola oku vetiya utima wove kuenda oku ku kuatisa oku kuata ukamba wocili la Yehova.—Osamo 19:14.
Alitalatu osi a sangiwa velivulu Achegue-se a Jeová, a konomuisiwa ciwa kuenda a kapiwilamo oco a ku kuatise oku lilongisa lutate kuenda oku ku vetiya. Vocipama 17, mu sangiwa ovolandu Embimbiliya ana a lekisiwila valitalatu kemẽla lemẽla liocipama.
Momo Lie Lia sandekiwila?
Momo lie elivulu Achegue-se a Jeová lia sandekiwila? Elivulu liaco liokaliye lia sandekiwila oku tu kuatisa oku kũlĩha ciwa Yehova kuenda oku kuata ukamba wocili Laye.
Anga hẽ ove o tẽla oku sokolola omunu umue o pondola oku kuatisiwa lelivulu Achegue-se a Jeová, ndeci umue o lilongisa laye Embimbiliya ale manji umue ulume ale ukãi okuti, wa liwekapo kupange woku kunda? Anga hẽ ove wa fetika ale oku tanga elivulu eli liokaliye? Nda kua fetikile handi momo lie ku sokiyila otembo yoku fetika oku tanga elivulu liaco? Sokiya otembo yoku sokolola ovina viosi wa tanga. Elivulu eli liokaliye, li pondola oku ku kuatisa oku kuata ukamba wocili la Yehova Suku, oco amameko oku kunda olondaka viwa Viusoma lesanju kuenda lombili yocili!