Kolela Yehova Lutima Wove Wosi Eci o Sangiwa Lovitangi

“Suku eye ocikolo cetu haeye ongusu yetu. Eye oñuatisi, kohali o moleha lombili.”​—⁠OSAMO 46.1.

1, 2. (a) Ulandu upi u lekisa okuti, ka tu sukila lika oku popia tuti tua kolela ku Suku? (b) Momo lie ka tu sukilila oku popia lika tuti tua kolela ku Yehova?

OLONJANJA vimue tua siata oku popia hati, tua kolela Suku. Pole, ondaka yaco oku yi lekisila kovilinga ka ca lelukile. Ondaka yokuti, “Tua Kolela ku Suku,” tunde osimbu ya siata oku sonehiwa volombongo vio kofeka yo Estados Unidos.a Kunyamo wo 1956, kofeka yo Estados Unidos eci kua lingiwila ohongele yimue, kua lomboluiwa okuti ondaka yoku popia hati, “Tua Kolela ku Suku,” oyo yi linga ndocihandeleko cofeka. Ocili okuti, kofeka yo Estados Unidos ndaño okuti oko kua kapiwa ocihandeleko caco, pole omanu valua voluali luosi va kolela calua kolombongo kuenda kovokuasi okuti ku Suku ci sule.​—⁠Luka 12:​16-21.

² Etu Tuakristão vocili, ka tu popi lika okuti tua kolela ku Yehova, momo vondaka yaco mua kongela ovina via lua. Omo okuti “ekolelo ka li kuete ovilinga lia fa,” cimuamue haico loku popia hati tua kolela ku Suku, momo ondaka yaco ka yi kuata esilivilo nda ka tu ci lekisila kovilinga vietu. (Tiago 2:26) Vocipama catete tua lilongisa okuti, oku kolela kuetu ku Yehova ku lekisiwa poku likutilila kokuaye, leci tu sandiliya oku endisiwa Londaka yaye kuenda oku songuiwa locisoko caye. Omo liaco, tu konomuisi ndomo tu pondola oku pokola kolonumbi evi vitatu eci tu liyaka lovitangi.

Ceci Omunu a Tundisiwa Kupange Waye Ale Oku Tambula Ofeto Yimue Yitito

3. Ovitangi vipi viekambo lieteku omanu va Yehova va kasi oku liyaka lavio ‘koloneke vilo via sulako’? Kuenda ndamupi tua kũlĩha okuti Suku o kuete onjongole yoku tu kuatisa?

³ ‘Koloneke vilo via sulako,’ etu Tuakristão tu liyakavo lovitangi viekambo lieteku ndeci omanu vakuavo va kasivo oku liyaka lovitangi viaco. (2 Timoteo 3:⁠1) Ci tava okuti pamue tu tundisiwa kupange wetu kuna tua kala oku talavaya. Handi vali, pamue tu sanga upange umue okuti tu talavaya olowola vialua pole ka tu fetiwa olombongo vina vi tu kuatisa oku landa eci tu sukila. Omo liovitangi viaco, pamue ka ci tu lelukila ‘oku sanga eteku lioku eca ku vangandietu.’ (1 Timoteo 5:⁠8) Anga hẽ Suku Tõlo o kuete muẽle onjongole yoku tu kuatisa eci tu liyaka lovitangi viaco? Eye o kuete onjongole yoku tu kuatisa! Ocili okuti, Yehova ka tu teyuila kovitangi viosi tu liyaka lavio komuenyo wetu voluali lulo. Pole, nda tua kolela kokuaye, tuka limbuka okuti olondaka Viosamo 46:1 viocili muẽle vina vi popia hati: “Suku eye ocikolo cetu haeye ongusu yetu. Eye oñuatisi, kohali o moleha lombili.” Oco hẽ ndamupi tu pondola oku lekisa okuti tua kolela muẽle ku Yehova eci tu liyaka lovitangi viekambo liolombongo?

4. Eci tu liyaka locitangi cekambo liolombongo ovina vipi tu sukila oku likutilila? Kuenda ndamupi Yehova a tambulula olohutililo viaco?

⁴ Onjila yimue yoku lekisa okuti tua kolela muẽle ku Yehova poku likutilila kokuaye. Oco hẽ ovina vipi tu sukila oku likutilila? Ci tava okuti eci tu liyaka locitangi cekambo liolombongo, pamue tu sukila oku kuata olondunge via velapo. Omo liaco, tu sukila oku likutilila eci catiamẽla kovina viaco. Yehova o tu vetiya Londaka yaye hati: “Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.” (Tiago 1:⁠5) Ocili okuti, oku pinga olondunge ku Yehova okuti ovio uloño woku kapako ukũlĩhĩso wasuapo, loku kuata elomboloko kuenda oku tepisa pokati keci ciwa leci cĩvi, ci pondola oku tu kuatisa oku nõla lolondunge onjila ya sunguluka. Isietu wokilu ukuacisola o tu likuminya okuti oka yevelela olohutililo vietu. Eye o kuete onjongole yoku pengulula onjila yomanu vana vo kolela lutima wavo wosi.​—⁠Osamo 65:2; Olosapo 3:​5, 6.

5, 6. (a) Momo lie tu sukilila oku kuatisiwa Londaka ya Suku oco tu yule ovitangi viekambo lieteku? (b) Nye tu sukila oku linga oco asakalalo etu a tepuluke eci tu liyaka locitangi coku tundisiwa kupange?

⁵ Oku sandiliya oku endisiwa Londaka ya Suku, oyo onjila yikuavo yoku lekisa okuti tua kolela ku Yehova. Alungulo aye a sunguluka ana a sangiwa Vembimbiliya ‘ocili muẽle.’ (Osamo 93:⁠5) Ndaño okuti tunde eci Embimbiliya lia sonehiwa papita ale eci ci soka 1900 kanyamo, pole olio li kuete alungulo ocili kuenda uloño una u pondola oku tu kuatisa oku yula ovitangi vioku sanga eteku. Tu konomuisi ovolandu amue atiamẽla kuloño u sangiwa Vembimbiliya.

⁶ Ukualondunge Soma Salomone kosimbu wa popele hati: “Otulo tuondingupange tu sõsa, ndaño wa lia citito ndaño wa lia ca lua; puãi ekuto liohuasi liu pumbisa otulo.” (Ukundi 5:12) Ocili okuti oku semulũla ovikuata vietu via nyolẽha, loku vi yelisa kuenda oku vi tata ciwa, ci sukila oku kuata otembo kuenda olombongo. Eci tu liyaka locitangi coku tundisiwa kupange wetu, tu sukilavo oku konomuisa ekalo liomuenyo wetu kuenda oku seteka oku tepisa pokati kovina tu sukila levi tu yongola okuti ka tu vi sukila. Oku linga apongoloko amue komuenyo wetu, ci kuatisa calua momo ci tepulula asakalalo. Citava hẽ okuti tu leluisa omuenyo wetu poku ilukila vonjo yimue yitito ale oku tepulula vonjo ovikuata vina okuti ka tu vi sukila vali?​—⁠Mateo 6:⁠22.

7, 8. (a) Ndamupi Yesu a kũlĩhĩle okuti omanu kavalipuile va kuete onjongole yoku sakalala calua lovokuasi? (Tanga etosi li sangiwa pombuelo yemẽla.) (b) Elungulo lipi Yesu a eca liatiamẽla koku yuvula oku sakalala calua?

⁷ Eci Yesu a linga Ohundo yaye ya Velapo Komunda, wa eca elungulo hati: ‘Ko ka sakalali lomuenyo wene hoti, tu lia nye? Tu nyua nye pamue letimba liene hoti, tu wala nye?’b (Mateo 6:25) Yesu wa kũlĩhĩle okuti omanu ka valipuile va siata oku sakalala calua lovina va sukila komuenyo wavo. Ndamupi tu pondola oku yuvula oku ‘sakalala’ lovina viaco? Yesu wa popia hati: “Tete vanjiliyi Usoma.” Ndaño tu liyaka lovitangi vialua, tu sukila oku amamako oku pitisa kovaso efendelo lia Yehova komuenyo wetu. Nda tua ci linga, Isietu wokilu oka tu ‘ĩha’ ovina viosi tu sukila komuenyo wetu weteke leteke kuenda oka tu kuatisa kovina viosi.​—⁠Mateo 6:⁠33.

⁸ Yesu wa ecavo elungulo likuavo hati: ‘Ko ka sakalali leteke lia hẽla, eteke lia hẽla li kuete asakalalo alio.’ (Mateo 6:34) Ka ca sungulukile oku sakalala calua lovina via hẽla. Umue ukuakukonomuisa eci ci sangiwa Vembimbiliya wa popia hati: “Halonjanja viosiko okuti eci tua sakalala laco ci kala muẽle ocili kotembo yo kovaso ndomo tua cisimĩle.” Oku pokola kelungulo Liembimbiliya kueci catiamẽla koku pitisa kovaso ovina vi kuete esilivilo kuenda oku sanjukila eci tu kuete eteke liaco, ci pondola oku tu kuatisa oku yuvula asakalalo.​—⁠1 Petulu 5:​6, 7.

9. Eci tu liyaka locitangi cekambo liolombongo ekuatiso lipi tu pondola oku sanga valivulu ana a sandekiwa ‘lukuenje wa kolelua haeye wa lunguka’?

⁹ Eci tu liyaka lovitangi viekambo liolombongo, tu sukilavo oku kolela ku Yehova poku kuama olonumbi vi sangiwa valivulu ana a sandekiwa ‘lukuenje wa kolelua haeye wa lunguka.’ (Mateo 24:45) Olonjanja vimue, vorevista o Despertai! mua siata oku sandekiwa ovipama vina vi vieca alungulo kuenda olonumbi vi kuamiwa eci tu liyaka lovitangi viekambo lieteku. Vo Despertai! 8 yosãi Yenyenye yunyamo wo 1991, mu sangiwa ocipama losapi ya linga hati: “Perder o emprego​—⁠quais são as soluções? [Onjila Yipi yi Kuamiwa Eci Omunu a Tundisiwa Kupange?]” mu sangiwa atosi ecelãla okuti a siata oku kuatisa omanu valua oku kuata ocituwa ca sunguluka eci va liyaka lovitangi viekambo liolombongo kuenda oku yula asakalalo eci va tundisiwa kupange wavo.c Handi vali, olonumbi viaco vi pondola oku songuila omanu oku kuata ocituwa ca sunguluka kueci catiamẽla koku velisapo calua olombongo. Ondaka yaco eyi ya lomboluiwa vocipama losapi ya linga hati: “Existe Algo Mais Vital do Que o Dinheiro [Anga hẽ Kuli Ocina Cimue ca Velapo Okuti Olombongo vi Sule?]” ci sangiwa vo Despertai! ya tukuiwa ndeti.​—⁠Ukundi 7:⁠12.

Ceci tu Liyaka Lekambo Liuhayele

10. Ndamupi ongangu ya Soma Daviti yi lekisa okuti ci kuete esilivilo oku kolela ku Yehova eci omunu a sangiwa loku vela?

¹⁰ Anga hẽ eci tu liyaka luveyi umue tu sukilavo oku kolela ku Yehova? Tu sukila oku kolela kokuaye! Yehova wa siata oku kuatela ohenda vana vavela va sangiwa pokati komanu vaye. Eye o kuete onjongole yoku va kuatisa. Tu konomuisi ulandu wa pita la Soma Daviti. Eci a soneha ulandu u lekisa ndomo Suku a tata omanu vana va vela, citava okuti otembo yaco eye wa kala lovitangi viekambo liuhayele. Eye wa popia hati: “Yehova u kolisa eci a kasi pula loku vela. Eci a vela o sakula ovovei aye osi.” (Osamo 41:​1, 3, 7, 8) Ekolelo soma Daviti a kuatelele Suku lieya oku pamisiwa cocili, kuenje noke weya oku kaya. Ndamupi tu pondola oku kolela ku Suku eci tu liyaka lekambo liuhayele?

11. Eci tu kuatiwa loku vela, nye tu sukila oku pinga ku Isietu wokilu?

¹¹ Eci tu kuatiwa loku vela tu sukila oku likutilila ku Yehova oco a tu ĩhe utõi woku pandikisa. Etu tu pondola oku likutilila kokuaye oco tu kuate “olondunge” vioku sandiliya uhayele ndomo epondolo lietu liecelela. (Olosapo 3:21) Tu pondolavo oku pinga ekuatiso kokuaye oco tu kuate epandi poku liyaka loku vela. Handi vali, tu sukilavo oku pinga ku Yehova oco a tu ĩhe ongusu yoku amamako oku kolela kokuaye okuti ka tu konyoha ndanõ tu liyaka lovitangi. (Va Filipoi 4:13) Oku amamako lepandi lietu ku Suku, oyo onjila ya velapo okuti ka yi sokisiwa lomuenyo wetu wotembo yilo. Nda tua lekisa epandi liocili, Yehova una Ukuakueca onima oka tu sumũlũisa otembo ka yi pui lomuenyo uwa kuenda uhayele wa lipua.​—⁠Va Heveru 11:⁠6.

12. Olonumbi vipi Viembimbiliya vi pondola oku tu kuatisa oku nõla onjila tu kuama oco tu sakuiwe uveyi umue?

¹² Oku kolela kuetu ku Yehova ku tu vetiyavo oku pokola Kembimbiliya oco li tu songuile. Olonumbi vi sangiwa Vembimbiliya vi pondola oku tu kuatisa oku nõla onjila ya sunguluka yoku sakula uveyi umue tu kasi oku liyaka lawo. Omo lioku kulĩha okuti Embimbiliya li pisa “owanga,” tu sukila oku yuvula oku sakuiwa lonjila yina okuti mu kongela olondele. (Va Galatia 5:​19-21; Esinumuĩlo 18:​10-12) Kuli vali handi ocindekaise cikuavo catiamẽla kolondunge vi sangiwa Vembimbiliya hati: “[Omunu wosi] wa kamba olondunge o tava ño [kovina] viosi, [pole] u wa lunguka o kũlĩhisa oku a enda.” (Olosapo 14:15) Eci tu liyaka locitangi coku sakula uveyi umue, tu sukila oku kuama olonumbi via sunguluka kuenda oku yuvula oku tava ‘kolondaka viosi vi popiwa.’ Oku kala ‘lesuluviko’ ku pondola oku tu kuatisa oku konomuisa lutate ovisimĩlo vietu kuenda oku kuama olonumbi via sunguluka.​—⁠Tito 2:⁠12.

13, 14. (a) Ovipama vipi vi lombolola eci catiamẽla kovitangi viuhayele via viata oku sandekiwa Vutala Wondavululi lo vo Despertai!? (b) Elungulo lipi liatiamẽla koku liyaka lovoveyi ana okuti ka ci tava oku a sakula lia sandekiwa Vutala Wondavululi lo vo Despertai! 22 yosãi ya Susu yunyamo wo 2001?

¹³ Etu tu pondolavo oku lekisa ekolelo ku Yehova poku sandiliya ekuatiso li sangiwa valivulu ana a sandekiwa lukuenje wa kolelua haeye wa lunguka. Vutala Wondavululi lo vo Despertai!, mua siata oku sandekiwa ovipama vialua vi lombolola eci catiamẽla kovitangi viuhayele kuenda ovoveyi.d Olonjanja vimue, volorevista via tukuiwa ndeti mua siata oku sandekiwa ovipama vina vi lombolola ndomo via kuatisa omanu vana va kala oku liyaka lovitangi viuhayele. Handi vali, ovipama vikuavo via siata oku lombolola olonumbi Viembimbiliya kuenda alungulo ana a kuatisa oku liyaka lovoveyi ana okuti ka a kuete ovihemba.

¹⁴ O Despertai! 22 yosãi ya Susu yunyamo wo 2001, yi kuete ocipama cimue losapi ya linga hati: “Consolo para os doentes [Elembeleko Kuava va Vela].” Vocipama caco mu sangiwa olonumbi vialua Viembimbiliya kuenda olondaka viomanu vana va loñoloha haivo va liyaka lovoveyi amue vokuenda kuanyamo alua. Ocipama losapi ya linga hati, “Como conviver com a doença? [Ndamupi tu Pondola Oku Pandikisa Luveyi?]” mu sangiwa elungulo lia popia hati: Kuata ovisimĩlo via sunguluka luveyi wove. (Olosapo 24:⁠5) Tumbika ovimãho via sunguluka oku kongelamo vina vioku kuatisa vakuene. Pole, kũlĩhĩsa okuti, pamue ove ku pondola oku tẽlisa ovimãho vina vakuene va pondola oku tẽlisa. (Ovilinga 20:35; Va Galatia 6:⁠4) Yuvula ocituwa coku kala likaliove. (Olosapo 18:⁠1) Lianja lomanu vana vaku pasuisa oco va kuate esanju. (Olosapo 17:22) Handi vali, kuata ukamba wocili la Yehova kuenda la vamanji va sangiwa vekongelo. (Nahumi 1:7; Va Roma 1:​11, 12) Anga hẽ ka tu lekisa olopandu omo liolonumbi viocili tua siata oku tambula ku Yehova lekuatiso liocisoko caye?

Ceci Ovitangi Vioku Vela Viamamako

15. Ndamupi upostolo Paulu a tẽla oku yuvula oloñeyi vietimba liaye ka lialipuile? Kuenda kohuminyo ye etu tua kolela?

¹⁵ Upostolo Paulu wa soneha ndoco: “Vokati kange, okuti vetimba liange, ka muli cimue ciwa.” (Va Roma 7:18) Eye wa kũlĩhĩle okuti ka ca lelukile oku liyaka loloñeyi kuenda ahonguo omo liekandu. Pole, eye wa kuatele ekolelo liokuti, o pondola oku likandangiya koloñeyi viaco. (1 Va Korindo 9:​26, 27) Ndamupi? Poku lekisa ekolelo liocili ku Yehova. Eli olio esunga lieci upostolo Paulu a popela hati: “Ndukuelamba we! Helie o mopela ketimba liokufa oku? Mitakati Yesu Kristu, haeye Ñala yetu.” (Va Roma 7:​24, 25) Nye ci popiwa catiamẽla kokuetu? Etu tu kasivo oku liyaka loloñeyi vietimba omo liekandu. Osimbu tu amamako oku liyaka lovitangi viaco, ca leluka oku pua epandi kuenje tu pondola oku sima okuti, lalimue eteke tuka yula ovitangi viaco. Pole, nda tua kuama ongangu yupostolo Paulu una wa lekisile ekolelo liaye ku Yehova tuka yuvula oku kolela kongusu yetu muẽle momo Yehova oka tu kuatisa.

16. Nda ayonjo a kasi oku amamako oku tu sakalaisa nye tu sukila oku tukula volohutililo vietu? Kuenda nye tu sukila oku linga nda tua wila vekandu?

¹⁶ Nda tua limbuka okuti oloñeyi vietu vietimba vi kasi oku tu sakalaisa calua, tu sukila oku lekisa ekolelo lietu ku Yehova poku likutilila kokuaye. Tu sukila oku pinga ku Yehova oco tu kuatisiwe lespiritu sandu liaye. (Luka 11:​9-13) Tu pondola oku pinga esuluviko lina liatiamẽla kapako espiritu sandu a Suku. (Va Galatia 5:​22, 23) Nda tua wila vekandu omo liekambo lietu lioku lipua, nye tu sukila oku linga? Tu sukila oku yuvula oku pua ekolelo ku Suku. Omo liaco, lalimue eteke ka tuka pui epandi lioku likutilila lumbombe ku Suku ukuahenda kuenda oku pinga ongecelo lekuatiso. Yehova lalimue eteke aka yanduluka omunu una ‘ukuotima wa teka,’ omo lioku li vetela evelo. (Osamo 51:17) Nda tua likutilila ku Yehova lumbombe wocili, eye oka tu kuatisa oco tu tẽle oku tamalãla kayonjo.​—⁠Va Filipoi 4:​6, 7.

17. (a) Momo lie ci kuetele esilivilo oku sokolola ndomo Yehova a tenda ayonjo tu liyaka lavo? (b) Ovinimbu vipi Viembimbiliya tu sukila oku patekela nda tu kasi locitangi conyeño? Nda tu kasi locitangi catiamẽla koku lava ciwa elimi lietu? Nda utima wetu wa tekela lika kovitalukilo vina vĩvi?

¹⁷ Etu tu pondolavo oku lekisa okuti tua kolela ku Yehova poku sandiliya ekuatiso Liondaka yaye. Lekuatiso Liovipama Visangiwa Vutala Wondavululi, tu pondola oku sandiliya atambulula atiamẽla kapulilo amue ndeci: ‘Ndamupi Yehova a tenda ehonguo ndi kasi oku liyaka lalio?’ Poku sokolola ndomo Yehova a tenda ovitangi, ci pondola oku pamisa onjongole yetu yoku u sanjuisa. Tu pondolavo oku kuata ovisimĩlo ndevi via Yehova viatiamẽla koku suvuka ovina viosi eye a nyale. (Osamo 97:10) Omanu vamue va siata oku kuatisiwa calua poku Ivaluka ovinimbu Viembimbiliya viatiamẽla kayonjo va kasi oku liyaka lavo. Tua siata hẽ oku liyaka locitangi conyeño? Tu sukila oku patekela ovinimbu Viembimbiliya vi lombolola eci catiamẽla kondaka eyi ndeci, elivulu Liolosapo 14:17 kuenda Va Efeso 4:31. Anga hẽ tu kuete ocitangi catiamẽla koku lava ciwa elimi lietu? Tu sukila oku patekela ovinimbu Viembimbiliya vi lombolola eci catiamẽla kondaka eyi ndeci, elivulu Liolosapo 12:18 kuenda Va Efeso 4:29. Anga hẽ utima wetu wa tekela lika kovitalukilo vina via vĩha? Tu sukila oku likolisilako oku patekela ovinimbu Viembimbiliya vi lombolola eci catiamẽla kondaka eyi ndeci, elivulu lia Va Efeso 5:3; Va Efeso 4:29 kuenda Va Kolosai 3:⁠5.

18. Momo lie ka tu sukilila oku kuata ohele poku pinga ekuatiso kakulu vekongelo oco va tu kuatise kovitangi tu liyaka lavio?

¹⁸ Oku pokola kalungulo akulu vekongelo vana va nõliwa lespiritu sandu, oyo onjila ya sunguluka yoku lekisa ekolelo lietu ku Yehova. (Ovilinga 20:28) Handi vali, ‘olombanjaile viaco evi vialume, eliangiliyo limue lia Yehova lia eciwa lekuatiso lia Kristu lioku teyuila kuenda oku lava ocunda caye. (Va Efeso 4:​7, 8, 11-14) Ka ca lelukile oku pinga ekuatiso oco tu yule ayonjo tu kasi oku liyaka lavo. Citava okuti pamue tu kuata ohele lusumba wokuti, akulu vekongelo vaka sima hati, etu ka tu yongola oku tambula ekuatiso liavo. Ocili okuti, akulu ava vekongelo haivo va loñoloha, vaka lekisa esumbilo kokuetu omo liepandi lietu lioku pinga ekuatiso. Omo liaco, akulu vekongelo va likolisilako oku kuama ovituwa via Yehova poku tata ciwa ocunda. Ovo va pondola oku tu ĩha alungulo elembeleko ana a sunguluka a tunda Vembimbiliya okuti a pondola oku tu kuatisa oku yula ayonjo ana tu kasi oku liyaka lavo.​—⁠Tiago 5:​14-16.

19. (a) Ndamupi Satana a yongola okuti tu ambata omuenyo umue wuveke woluali lulo? (b) Voku kolela mua kongela nye kuenda onyila yipi tu sukila oku nõlapo?

¹⁹ Lalimue eteke kuka ivaleko okuti, Satana wa kũlĩha okuti kuo kambela lika otembo yimue yitito. (Esituluilo 12:12) Eye o yongola okuti tu ambata omuenyo umue wuveke woluali lulo lua vĩha oco tu kuate owesi woku amamako oku pandikisa. Pole, tu koleli kolondaka vi sangiwa kelivulu lia Va Roma 8:​35-39 li popia hati: “Helie o tẽla oku tu tepa kocisola ca Kristu? Ohali hẽ pamue ongongo, pamue eyambulo, pamue onjala, pamue epẽle, pamue ohele, pamue osipata, yi ci tẽla? . . . Ka ci tẽliwa. Omo tu kasi lu o tu sole, oco, vovina viaco viosi, tu piãla vali kokuyula. Momo nda kolela okuti ndaño okufa, ndaño omuenyo, ndaño ovangelo, ndaño olombiali, ndaño ovina via cilo, ndaño ovina vi laika oku iya, ndaño ovonene, ndaño ovina viokilu, ndaño ovina viokalunga, ndaño ociluvo cikuavo, lacimue ci tẽla oku tu tepa kocisola ca Suku ci kasi vu Kristu Yesu, Ñala yetu.” Ocili okuti olondaka evi, vi vetiya ekolelo lietu ku Yehova! Ekolelo liaco ka li kasi ndocina cimue coku sima ño. Pole, mua kongela oku sokolola lutate poku nõla onjila tu yongola oku kuama komuenyo wetu weteke leteke. Omo liaco, tu nõlipo oku kolela Yehova lutima wetu wosi eci tu liyaka lovitangi.

[Footnotes]

Handi Ocivaluka?

• Ndamupi tu pondola oku lekisa okuti tua kolela Yehova eci tu liyaka lovitangi viekambo lieteku?

• Ndamupi tu pondola oku lekisa ekolelo lietu ku Suku eci tu liyaka locitangi cekambo liuhayele?

• Eci tu liyaka layonjo, ndamupi tu pondola oku lekisa okuti tua kolela lika ku Yehova?

[Okakasia kemẽla 31]

Eci tu liyaka lovitangi viatiemẽla kuhayele, ci kuete esilivilo oku tanga ovalandu atiamẽla ku vakuetu vana va siata oku litunda ciwa poku liyaka lovoveyi vamue ka a kayi ale ulema. Konomuisa ovipama vimue via saiata oku sandekiwa Vutala Wondavululi kuenda vo Despertai!

Utala Wondavululi 1 ya Kupemba wo 1990 kocipama ci kuete osapi ya linga hati: “Enfrentando minhas fraquezas,” ci lombolola ndomo tu pondola oku liyaka lovisimĩlo ka via sungulukile kuenda enyumãlo.

Vo Despertai! 22 ya Susu yunyamo wo 1993 mu sangiwa ocipama losapi ya linga hati: “Nem um pulmão de aco a impediu de pregar.”

Vo Despertai! 22 ya Mbalavipembe yunyamo wo 1995 mu sangiwa ocipama losapi ya linga hati: “Uma bala mudou a minha vida”

Utala Wondavululi 1 ya Cembanima wo 2000 kocipama ci kuete osapi ya linga hati: “Nem sabeis qual sera a vossa vida amanhã,” u lombolola eci catiamẽla kovitangi vimue viuhayele.

O Despertai! 8 ya Kupemba yunyamo wo 2000 kocipama losapi ya popia hati: “Loida vivia num mundo de silêncio,” yi lombolola eci catiamẽla kuveyi woku fa kuovimatamata viosi vietimba.

Vo Despertai! 22 Yevambi Linene yunyamo wo 2000 mu sangiwa ocipama losapi ya linga hati: “Minha luta contra a esclerodermia.”

Vo Despertai! Yevambi Linene yunyamo wo 2002 mu sangiwa ocipama losapi ya linga hati: “Venci a luta contra a Depressão pos—parto.”

[Elitalatu kemẽla 29]

Nda tua tundisiwa kupange tu sukila oku konomuisa ekalo liomuenyo wetu

[Elitalatu kemẽla 30]

Ulandu wa Loida u lekisa ndomo tu pondola oku kolela kekuatiso litunda ku Yehova oco tu tele oku pandikisa. (Tala vokakasia kemẽla 31)

[Elitalatu kemẽla 32]

Ka tu sukila oku kuata ohele yoku pinga ekuatiso poku liyaka layonjo