Yehova Eye ‘Oñuatisi Yetu Kotembo Yohali’
“Epopelo liolondingesunga li tunda ku Yehova. Eye ocikolo cavo kotembo yohali.”—OSAMO 37:39.
1, 2. Nye Yesu a likutilila oco a kuatise olondonge viaye? (b) Nye Yehova a yonguila omanu vaye?
YEHOVA eye ukuonenewosi. Eye o kuete unene woku teyuila omanu vaye volonepa viñi viñi eci va liyaka lovitangi. Citava okuti eye o va tepa muẽle koluali lulo lua vĩha. Kuenda o va kapa pocitumãlo cimue combembua. Yesu wa likutilila ku Isiya catiamẽla kolondonge viaye hati: “Si pingi okuti o vopa voluali, te okuti o va teyuila kevĩho.”—Yoano 17:15.
2 Yehova ka nõlelepo ‘oku tupa voluali.’ Eye, o yongola okuti tu kala voluali oco tu kundile omanu esapulo lioku va lembeleka. (Va Roma 10:13-15) Pole, ndomo Yesu a ci lombolola vohutililo yaye, etu tu kasi voluali lua Satana ‘ukuevĩho.’ Kuenje ovituwa vĩvi viomanu, via siata oku nena ovitangi vialua lesumuo. Omo liaco, Akristão va pondola oku liyaka lovitangi viaco.—1 Petulu 5:9.
3. Olonjanja vimue, nye ci pita lomanu va Yehova? Pole, elembeleko lie tu sanga Vondaka ya Suku?
3 Omo liovitangi viaco, ci tava okuti olonjanja vimue tu sumua calua. (Olosapo 24:10) Vembimbiliya mu sangiwa ovolandu alua omanu va Suku va liyaka lovitangi. Ukualosamo wa popia hati: “Ohali yukuesunga ya lua, puãi Yehova u popela kohali yosi.” (Osamo 34:19) Ocili okuti, ‘vakuesunga’ va pondolavo oku liyaka lovitangi. Ci tava okuti olonjanja vimue tu ‘hongua lesumuo lialua,’ ndeci ca pita la Daviti. (Osamo 38:8) Pole, tu pondola oku sanga elembeleko poku kũlĩha okuti, ‘Yehova yu ocipepi la vakuavitima via teka. Kuenda o popela ava va kasi lovitima via samba.’—Osamo 34:18; 94:19.
4, 5. (a) Ndomo ca lomboluiwa kelivulu Liolosapo 18:10, nye tu sukila oku linga oco Suku a tu teyuile? (b) Olonjila vipi tu sukila oku kuama oco tu tambule ekuatiso lia Yehova?
4 Ndomo Yesu a ci lombolola vohutililo yaye, Yehova o kasi oku tu lava. Eye ‘oñuatisi yetu kotembo yohali.’ (Osamo 37:39) Elivulu Liolosapo li lombololavo olondaka vimuamue. Olio li popia hati: “Onduko ya Yehova ocikolo ca pama, ukuesunga o tililamo ha koki.” (Olosapo 18:10) Olondaka evi, vi lekisa ciwa ohenda Yehova a kuetele omanu vaye. Eye eca ekuatiso lioku teyuila olondingesunga vina viu sandiliya.
5 Eci tu liyaka lovitangi, ndamupi tu lupukila ku Yehova oco a tu teyuile? Kuli olonjila vitatu tu sukila oku kuama vioku tambula ekuatiso lia Yehova. Catete, tu sukila oku likutilila Kokuaye. Cavali, tu sukila oku pokola kolonumbi via Yehova vieciwa lekuatiso liespiritu liaye. Catatu, tu sukila oku pokola keliangiliyo liaye lioku endaenda kolohongele. Momo vamanjetu Akristão va pondolavo oku tepulula ovitangi vietu.
Ekuatiso Liohutililo
6. Ndamupi Akristão vocili va tenda ohutililo?
6 Omanu vana vakuoloño woku sakula, va lombolola okuti, ohutililo yi lembeleka omunu wa sumua. Ocili okuti, ohutililo yi kuete muẽle esilivilo. Pole, oku yeva olondaka via vakuetu ci kuetevo esilivilo lialua. Akristão vocili ka va tendi ohutililo ndovihemba vioku sakula utima. Etu tua kũlĩha okuti ohutililo, yi lomboloka oku vangula la Yehova Ululiki wetu. Vohutililo mua kongelavo upange tu lingila Yehova kuenda ekolelo tu u kuetele. Omo liaco, ohutililo yatiamẽla kefendelo lietu.
7. Oku likutilila lekolelo ci lomboloka nye? Ndamupi olohutililo viaco vi tu kuatisa eci tu liyaka lovitangi?
7 Eci tu likutilila ku Yehova tu sukila oku lekisa ekolelo kokuaye. Upostolo Yoano wa popia hati: “Ekolelo tu u kuetele lieli, nda tu pinga cimue ca sungulukila ocipango caye eye o tu yeva.” (1 Yoano 5:14) Ndaño okuti Yehova Ukuonenewosi, eye wa kapako olohutililo viomanu vaye. Oku kũlĩha okuti Yehova o yevelela olohutililo vietu, ci tu ĩha elembeleko liocili. Yehova wa kũlĩha ovina tu sukila kuenda ovitangi viosi tu liyaka lavio.—Va Filipoi 4:6.
8. Momo lie Akristão ka va sukilila oku kuata ohele eci va likutilila ku Yehova?
8 Etu Tuakristão ka tu sukila oku kuata ohele yoku likutilila ku Yehova. Eci tu yeva esumuo ale ceci tu liyaka lovitangi, tu sukila oku pinga ekuatiso Kokuaye vohutililo. Tu sukilavo oku ivaluka okuti, Yehova o kuatela ‘ohenda omanu vaye va tala ohali. Kuenda “o lembeleka ava va sumua.” (Isaya 49:13; 2 Va Korindo 7:6) Kotembo yohali lesumuo, tu sukila oku kolela ku Yehova momo eye oñuatisi yetu.
9. Ekolelo li kuete esilivilo lie eci tu likutilila ku Yehova?
9 Oco tu kuatisiwe lohutililo, tu sukila oku kuata ekolelo. Embimbiliya li popia hati: “Wosi o yongola oku kokela ku Suku, co sesamela oku kolela okuti kuli Suku, kuenda okuti Suku eca onima kuava vo sanda.” (Va Heveru 11:6) Oku kolela ku Suku ka ci lomboloka lika oku kũlĩha okuti ‘eye o kasi kilu.’ Vekolelo liocili, mua kongela oku kolela kolondunge Viaye. Kuenda oku kolela okuti eye eca onima kokuetu nda tua pokola kovihandeleko viaye. Embimbiliya liamisako loku popia hati: “Ovaso a Ñala [Yehova] a lete vakuesunga, lovatui aye a yevelela olohutililo viavo.” (1 Petulu 3:12) Oku kũlĩha okuti Yehova o tu kuetele ocisola, ci tu vetiya oku likutilila kokuaye olonjanja viosi.
10. Ndamupi tu pondola oku likutilila oco tu tambule ekuatiso lia Yehova?
10 Yehova o yevelela lika olohutililo vina tu linga lutima wetu wosi. Ukualosamo wa popia hati: “Mbilikiya lutima wange wosi. Nambulule, a Yehova.” (Osamo 119:145) Olohutililo vietu via litepa levi viatavo esanda. Kuenda ka vi lingiwa ndovihemba vioku sakula utima. Eci tu likutilila ku Yehova ‘lutima wetu wosi,’ olondaka vietu vi kuata elomboloko. Noke yoku likutilila, tu mõla ekavuluko li tunda koku tuika Yehova ocitele cetu. Embimbiliya li lombolola okuti, ‘Eye o tu kuatisa.’—Osamo 55:22; 1 Petulu 5:6, 7.
Espiritu Lia Suku li tu Kuatisa
11. Onjila yipi Yehova a siata oku kuama poku tu tambulula eci tu ‘pinga’ ekuatiso kokuaye?
11 Yehova ka Yevelela lika olohutililo, pole o pondolavo oku vi Tambulula. (Osamo 65:2) Soma Daviti wa popia hati: ‘Keteke liohali yange hu vilikiya momo o nambulula.’ (Osamo 86:7) Yesu wa vetiyavo olondonge viaye oco vi ‘pinge ekuatiso ku Yehova. Momo Yehova wa siata oku eca espiritu sandu kuava vo pinga.’ (Luka 11:9-13) Ocili okuti, espiritu sandu lia Suku, li kasi ndoñuatisi yi lembeleka omanu vaye.—Yoano 14:16.
12. Ndamupi espiritu lia Suku li pondola oku tu kuatisa eci tu liyaka lovitangi?
12 Eci tu liyaka lovitangi, espiritu sandu lia Suku li tu ĩha ‘unene wa piãla.’ (2 Va Korindo 4:7) Upostolo Paulu una wa pandikisa kovitangi, wa popia hati: “Nela ovina viosi vu Kristu u o ñolaisa.” (Va Filipoi 4:13) Akristão valua koloneke vilo va siatavo oku sanga ekavuluko kespiritu. Kuenda oku sanga ekavuluko vovitima eci va tambula ekuatiso lia Yehova vohutililo. Olonjanja vimue eci tu tambula espiritu lia Suku, tu yeva ekavuluko kovitangi vietu. Yehova eca ongusu kokuetu yoku pandikisa kovitangi. Upostolo Paulu wa popia hati: “Tu sipataiwa kuosi haimo ka tu vandi; tu sakalaisua ño-o haimo ka tu konyoha; tu kangaisua ño-o haimo ka tu yandulukiwa; tu pupowaiwa ca lua haimo ka tu fi.”—2 Va Korindo 4:8, 9.
13, 14. (a) Ndamupi Yehova a siata oku kala ocitililo cetu lekuatiso Liondaka yaye? (b) Ndamupi ove wa siata oku kuatisiwa lolonumbi Viembimbiliya?
13 Espiritu sandu lia kuatisa koku teyuila Embimbiliya oco tu kuatisiwe. Ndamupi Yehova a siata oku tu kuatisa Londaka yaye eci tu liyaka lovitangi? Eye wa siata oku ci linga poku tu ĩha olondunge viavelapo kuenda uloño woku sokolola. (Olosapo 3:21-24) Embimbiliya li pondola oku pindisa olondunge vietu loku tu ĩha uloño woku sokolola. (Va Roma 12:1) Eci tu lilongisa Embimbiliya, tu sukila oku kapako olonumbi viondaka ya Suku. Poku ci linga, tuka tẽla ‘oku tepisa pokati keci ciwa leci cĩvi, momo olondunge vietu via pindisua.’ (Va Heveru 5:14) Citava okuti, ove wa limbuka ale ndomo olonumbi Viembimbiliya via ku kuatisa eci wa liyaka lovitangi. Embimbiliya li tu ĩha olondunge vioku tetulula ovitangi vietu.—Olosapo 1:4.
14 Ondaka ya Suku yi pondolavo oku tu pamisa momo yeca elavoko kokuetu. (Va Roma 15:4) Embimbiliya li lombolola okuti, ovina vĩvi ka vika amamako otembo ka yi pui. Ovitangi viosi tu kasi oku liyaka lavio cilo, vi pita ombamba. (2 Va Korindo 4:16-18) Etu tu kuete ‘elavoko liomuenyo ko pui. Momo Suku, u lalimue eteke a kemba, eye wa likuminya omuenyo waco tunde osimbu.’ (Tito 1:2) Nda tua sanjukila elavoko liaco loku kũlĩha olohuminyo via Yehova, tu ka tẽla oku pandikisa kovitangi.—Va Roma 12:12; 1 Va Tesalonike 1:3.
Ekongelo Olio Ocindekaise Cocisola ca Suku
15. Ndamupi Akristão va pondola oku likuatisa pokati?
15 Kuli vali onjila yikuavo Yehova a sokiya yoku tu kuatisa kotembo yohali. Onjila yaco, ukamba wetu la vamanji vekongelo. Embimbiliya li popia hati: “Ekamba li sola olonjanja viosi, kuenje li linga manjove koloneke viohali.” (Olosapo 17:17) Embimbiliya li vetiya omanu vosi vekongelo oco va li sole pokati kuenda oku li sumbila. (Va Roma 12:10) Upostolo Paulu wa popia hati: “Lomue ka ka sande eci caye, te eci cukuavo.” (1 Va Korindo 10:24) Oku kũlĩha olonumbi viaco ci tu vetiya oku kuatisa vakuetu. Eci tu lieca etu muẽle koku kuatisa vakuetu, tu kuata esanju kuenda tu kavuluka vovitima.—Ovilinga 20:35.
16. Ndamupi Akristão va pondola oku li kolisa pokati?
16 Kulivo vamanji alume lakãi va loñoloha kespiritu. Ovo, va pondola oku pamisa vakuavo. Pole, oco va kuatise vakuavo, ovo va sukila oku lianja lomanu vosi. (2 Va Korindo 6:11-13) Ekongelo li pondola oku kala esumũlũho liocili. Omo liaco, vosi va kasi vekongelo va sukila oku sanda otembo yoku pandiya amalẽhe. Va sukilavo oku kuatisa vana va fetika ndopo oku vumba Yehova kuenda oku lembeleka ava va sumua. (Va Roma 15:7) Ocisola ci pondola oku tu kuatisa oku yuvula ocituwa coku li kuatela ohele pokati. Eci tu liyaka lovitangi, ka tu sukila oku kuata ovisimĩlo viokuti tua hongua kespiritu. Upostolo Paulu wa vetiya Akristão oco va ‘kolise ava va sumua.’ (1 Va Tesalonike 5:14) Embimbiliya li lekisa okuti, Akristão vana va loñoloha kespiritu, va siatavo oku liyaka lovitangi.—Ovilinga 14:15.
17. Apuluvi api tu kuete voku lekisa ocisola ku vamanji?
17 Olohongele Viakristão vi ecavo epuluvi liwa kokuetu lioku livetiya pokati locisola. (Va Heveru 10:24, 25) Pole, ocisola caco ka ci tava okuti ci lekisiwa lika kolohongele. Omanu va Suku va kuete apuluvi alua voku lekisa ocisola ku vamanji lutima wavo wosi. Eci kuiya ovitangi, tu sukila oku likuatisa pokati. Upostolo Paulu wa popia hati: “Ketimba ka ku keye olonepele; puai ovimatamata vi likuatele pamosi ohenda. Kuenje nda ocimatamata cimosi ci tala ohali, ovimatamata viosi vi talela kumuamue laco ohali. Nda ocimatamata ci pandiyiwa, ovimatamata viosi vi yolela pamuamue laco.”—1 Va Korindo 12:25, 26.
18. Eci tu yeva esumuo ocituwa cipi tu sukila oku yuvula?
18 Olonjanja vimue eci tu sumua ka tu kuata onjongole yoku kala la vakuetu. Omo liaco, tu sukila oku yuvula ocituwa caco oco tu kuatisiwe la vamanji. Kuenje eci cika ecelela okuti tu kuatisavo vakuetu. Embimbiliya li tu lungula hati: “U wa liamuha lavakuavo o lisandaila ovina viaye muẽle, ha funguila cosi ca sunguluka.” (Olosapo 18:1) Vamanjetu Akristão, ovo ocindekaise cekuatiso Yehova a siata oku tu ĩha. Nda tua limbuka eliangiliyo liaco liocisola ca Yehova, tuka sanga ekavuluko kotembo yohali.
Tu Amamiko Oku Kuata Ovisimĩlo Viwa
19, 20. Ndamupi Ondaka ya Suku yi tu kuatisa oku yuvula ovisimĩlo ka via sungulukile?
19 Eci omunu a kala lesumuo, ca leluka oku kuata ovisimĩlo ka via sungulukile. Vamue eci va liyaka lovitangi, va siata oku sima okuti ka va pamẽle kespiritu. Kuenje va sima hati, Suku eye o kasi loku va yambula. Tu sukila oku ivaluka okuti, Yehova ka seteka omunu ‘lovina vĩvi.’ (Tiago 1:13) Embimbiliya li popia hati: ‘Yehova ka talisa omunu ohali, pamue oku u suvalisa.’ (Asiõsuĩlo 3:33) Yehova o sumua calua eci omanu vaye va liyaka lovitangi.—Isaya 63:8, 9; Sakariya 2:8.
20 Yehova eye “Isia yohenda, haeye Suku ukuakulembeleka.” (2 Va Korindo 1:3) Eye wa siata oku tu tata, kuenje oka tu ĩha esumũlũho kotembo eye a sokiya. (1 Petulu 5:6, 7) Oku kũlĩha ocikembe Yehova a tu kuetele, ci tu vetiya oku kuata utima wa sunguluka. Elivulu lia Tiago li popia hati: “A vamanji, eci vu nyikiwa lolohali viñi viñi, ci sanjukili.” (Tiago 1:2) Momo lie? Eye wa tambulula hati: “Momo eci a yula, o tambula ekolowa liomuenyo lina Suku a likuminya oku eca kuava vo sole.”—Tiago 1:12.
21. Nye Yehova a likuminya komanu vana vo kolela?
21 Yesu wa lombolola okuti voluali tu tala ohali. (Yoano 16:33) Pole, Embimbiliya li tu likuminya okuti: ‘Ohali longongo, kuenda eyambulo, lonjala, pamue epẽle, kuenda ohele,’ ka vi pondola oku tu tepa kocisola tu kuetele Yehova Lomõlaye. (Va Roma 8:35, 39) Oku kũlĩha okuti ohali yilo ndopo yi pua, ci tu ĩha elembeleko liocili. Osimbu tu lavoka otembo yaco yekavuluko, Isietu Yehova oka amamako oku tu lava. Nda tua sandiliya ekuatiso liaye, eye oka linga ‘ocikolo cava va fukĩlisua. Kuenda oka linga oñuatisi yetu kotembo yohali.’—Osamo 9:9.
Nye Tua Lilongisa?
• Nye Akristão va lavoka osimbu va kasi voluali lulo lũvi?
• Poku liyaka lovitangi ndamupi tu pondola oku kuatisiwa lolohutililo?
• Ndamupi tu kuatisiwa lespiritu lia Suku?
• Nye tu sukila oku linga oco tu li kuatise pokati?
[Elitalatu kemẽla 15]
Tu sukila oku sanda Yehova ndeci tu lupukila vociwundilo
[Elitalatu kemẽla 16]
Vamanji va loñoloha kespiritu va sandiliya otembo yoku pandiya vakuavo loku va kolisa