Oku Sanda Esanju

VOKUENDA kuanyamo a pita, omanu vo kofeka yo França, yo Alemanya yo Grã-Bretanya kuenda yo Estados Unidos, va pulisiwa hati: “Nye ci nena esanju komunu?” Vosi yavo va lekisa ovisimĩlo via litepa. Vamue va tambulula hati, omunu o sanjuka lika nda o kuete uhayele. Vakuavo hati, olohuela ovio vi nena esanju. Kuli ava va tambulula hati, oku kuata omãla oko ku nena esanju. Vakuavo hati, omunu o sanjuka lika nda o kuete upange umue weca olombongo vialua. Handi vali, omanu vamue va limbuka okuti, olombongo ka vi nena esanju. Pole, vakuavo ka va tava kondaka yaco. Nye ovovangi a lekisa catiamẽla kondaka eyi?

Catete, tu konomuisi eci catiamẽla kolombongo kuenda kesanju. Kofeka yo Estudos Unidos kuli omanu valua olohuasi. Pole, ovolandu a lekisa okuti, omanu vaco ka va kuete esanju lia velapo. Olondotolo via lombolola okuti, omanu valua kofeka yaco ukuasi wavo wa li vokiya calua vokuenda kuanyamo a sulako ndeti. Pole, ka va kuete ombembua yo vutima. Ulandu ukuavo wa lekisavo okuti: ‘Vokuenda kuanyamo aco, etendelo liomanu va sumua lia livokiya calua. Etendelo liamalẽhe va li ponda lia livokiyavo calua. Kuenda oku litepa kuolohuela kua livokiyavo calua.’ Olonoño viakũi atãlo kolofeka, via lombolola okuti, olombongo ka vi nena esanju komuenyo.

Anga hẽ uhayele, olohuela viwa kuenda upange wolombongo vialua, oco ci nena esanju komuenyo? Nda oco, nye ci popiwa catiamẽla komanu vana ka va kuete uhayele lolohuela viwa? Nye ci popiwa catiamẽla kolohueli vina ka vi kuete omãla, kuenda vana ka va kuete upange wolombongo vialua? Anga hẽ omanu vaco ka va pondola oku sanga esanju komuenyo wavo? Omanu vana va kuete uhayele okuti olohuela viavo vi kasi oku enda ciwa, ci tava okuti ekalo liavo li pongoloka. Anga hẽ nda ekalo liavo lia pongoloka ka va kuata vali esanju?

Tu Kasi hẽ Oku Sanda Esanju Kono Yocili?

Omanu vosi va yongola oku kuata esanju. Embimbiliya li lekisa okuti, Ululiki wetu eye ‘Suku yesanju.’ Kuenda omanu va lulikiwa lesetahãlo Liaye. (1 Timoteo 1:11; Efetikilo 1:​26, 27) Omo liaco, ca sunguluka omunu oku sanda esanju komuenyo. Pole, valua va siata oku popia hati, oku kuata esanju ku kasi ndoku kuata eseke peka. Momo ka li tumãla.

Anga hẽ kuli omanu va kasi oku sanda esanju kono yimue ka ya sungulukile? Onoño yimue o tukuiwa hati, Eric Hoffer wa popia hati: ‘Oku sanda esanju oyo ono yesumuo.’ Olondaka evi vi pondola oku kala viocili nda tua sanda esanju kono yimue ka ya sungulukile. Oku sanda esanju kono yaco, ci nena ovitangi lesumuo. Ukuasi, lekemãlo, loku litenga vopulitika, kuenda oku seteka oku tetulula ovitangi viomanu, ka ci nena esanju. Vamue va kuete ovisimĩlo ka via sungulukile ndevi vionoño yimue wa popia hati: ‘Tu kuata lika esanju, nda tua liwekapo oku sanda esanju liaco.’

Kefetikilo liocipama cilo, tua mõla ulandu womanu va pulisiwa eci catiamẽla kesanju. Vamue pokati kavo va lombolola okuti, omunu o pondola lika oku kuata esanju nda o linga eci ciwa coku kuatisa vakuavo. Pole, vakuavo va popia hati, omunu o sanjuka lika nda wa kolela kovina a longisiwa vetavo. Omo liaco, tu konomuisi eci tu sukila oku linga oco tu kuate esanju komuenyo. Ocipama ci kuãimo cika lombolola ndomo tu pondola oku kuata esanju.

[Elitalatu kemẽla 3]

Valua va sima hati, olombongo, loku kuata epata lia sanjuka kuenda upange weca olombongo vialua, oco ci nena esanju. Ove hẽ o tava kovisimĩlo viavo?