Anga hẽ Eteke Limue Tuka kolapo Voluali Lulo?
HELIE ka sanjuka poku tala omãla va papala lolonjali viavo? Omãla va yeva lika oku kolapo nda va tatiwa ciwa lolonjali viavo. Pole, omãla valua ka va siatele oku kuata apuluvi aco esanju. Vakuavo va siata oku sakalala calua eci va sokolola apa vaka sanga ocitumãlo coku pekela. Anga hẽ kuli elavoko liokuti omãla vaco kuenda omanu vakuavo, eteke limue vaka kolapo?
Omanu valua koloneke vilo ka va kuete vali elavoko lioku kuata omuenyo uwa. Pole, Ondaka ya Suku yeca ohuminyo yimue yocili. Uprofeto Isaya wa lomboluile okuti ku keya otembo yombembua komanu. Eye wa popia hati: ‘Omanu vaka tunga olonjo viavo kuenje va kalamo; vaka kũla oviumbo viayuva kuenje va lia epako liavo. Ka va tungi okuti umue wiñi o kalamo. Ka va kũli okuti umue wiñi o liako.’—Isaya 65:21, 22.
Anga hẽ elavoko liaco liocili muẽle? Olonjanja vimue ondaka “elavoko,” ka yi lekisa ekolelo. Kofeka yo Brazil, omanu va siata oku popia hati: “Pokati kovina viosi, elavoko olio li sulako okufa.” Olondaka evi vi lekisa okuti, omanu va siata oku amamako oku lavoka ocina cimue ndaño okuti ka va kũlĩhĩle oku kuatiamẽla elavoko liaco. Pole, etu Tuakristão elavoko lietu, lia litepa calua. Upostolo Paulu wa popia hati: ‘Lomue o kolela ku Suku okuti o kutisiwa osõi.’ (Va Roma 10:11) Kuli olohuminyo vialua Viembimbiliya okuti via tẽlisiwa ale. Olohuminyo viaco vi tu ĩha ekolelo liokuti, ovina viosi Yehova a likuminya vika tẽlisiwa muẽle. Eci olohuminyo viaco vika tẽlisiwa, ka kuka kala vali ovitangi vi kisika omãla oku lala volokololo.
Koloneke vilo elungulo Liembimbiliya li pondola oku kuatisa omanu vosi oco va pongolole omuenyo wavo. Kuenda likuatisavo oku sanga ombembua yocili. Ndamupi? Olombangi via Yehova vi kasi vimbo liove, vika ku kuatisa oku sanga etambululo kepulilo eli.
[Okakasia kemẽla 32]
OYONGOLA OKUPASUISIWA?
Ndaño muẽle voluali lulo luohali, citava okuti osanga esanju litunda kokukuata ukũlĩhĩso wasuapo watiamẽla ku Suku, Kusoma waye, kuenda kocipango caye cikomõhisa catiamẽla komanu. Nda oyongola vali amue alomboluilo ale oyongola okuti omunu umue okupasuisa oco alilongise love Embimbiliya, ocali konjo yove, sonehela ko Associação das Testemunhas de Jeová, Caixa Postal 6877, Luanda, Angola, ale konumbi yakusungulukila yisangiwa kemẽla 2.