Apulilo Valingiwa Lavakuakutanga

Ndamupi Akristão va Tenda Ocituwa Coku Sapa?

Ondaka ya Suku yi pisa uholua kuenda oku sapa. Omunu wosi oyongola oku vumba Yehova o sukila oku yuvula ocituwa caco. Momo ocituwa caco ca lisoka luholua. Omo liaco, vekongelo lia Yehova ka ci tava okuti mu kala omunu umue ukuacituwa eci.

Elivulu Liolosapo 23:​20, 21, li lungula hati: “Ku ka kale pokati koloholua, ndaño pokati kovisapanu viositu, momo oholua locilianu vi mõla uputu.” Elivulu Liesinumuĩlo 21:​20, li lombolola okuti, kotembo ya va Isareli omunu wosi ‘wa sina haeye ocisuanji,’ wa sesamẽlele oku pondiwa. Handi vali, ndomo ca lekisiwa vovinimbu evi, kua kala ovituwa vivali vi lekisa esino liomunu. Ovituwa viaco ‘okusapa kuenda uholua.’ Omo liaco, omunu wosi o vumba Suku, wa sukilile oku yuvula ocituwa coku sapa.

Oku sapa ku lomboloka nye? Ndamupi Embimbiliya li lombolola ocituwa caco? Oku sapa ku lomboloka ‘oku kuata ocipululu cokulia kuenda okunyua okuti omunu ka tẽla vali oku likandangiya.’ Oku sapa kuatiamẽlavo kocipululu. Kuenda Ondaka ya Suku yi lombolola okuti, “vakuacipululu,” ka vaka piñala Usoma wa Suku. (1 Va  Korindo 6:​9, 10; Va Filipoi 3:​18, 19; 1 Petulu 4:⁠3) Eci upostolo Paulu a lungula Akristão oco va yuvule ‘ovilinga vietimba,’ wa kongelamo ‘ovoholua, ayele, kuenda ovina vikuavo via lisoka lavio.’ (Va Galatia 5:​19-​21) Olonjanja vimue voku sapa mua siata oku kuama ovoholua layele. Omo liaco, oku sapa kua lisoka lovilinga vina vietimba upostolo Paulu a tukula. Ukristão wosi wa kũlĩhĩwa locituwa coku sapa okuti ka yongola oku ci siapo, o sesamẽla oku tundisiwa vekongelo.​—⁠1 Va  Korindo 5:​11, 13.a

Ndaño okuti Ondaka ya Suku yi lekisa okuti, oholua ya lisoka lomunu wa sapa pole, ka ca lelukile oku limbuka omunu umue wa sapa. Momo, omunu waco ka limbukiwila ketimba liaye. Ca leluka lika oku limbuka oholua. Momo oholua yi mõlehisa olondimbukiso vialua. Omo liaco, akulu vekongelo poku konomuisa ocitangi catiamẽla koku sapa, va sukila oku ci linga lutate.

Olonjanja vimue omunu wa sapa olimbukiwila koku lẽla calua. Pole, ka ci lomboloka okuti, omunu wosi wa lẽla ci lekisa okuti wa sapa. Momo kuli omanu vamue va lẽla calua omo lioku vela. Vakuavo oku lẽla kuavo kuo vepata. Handi vali, tu sukila oku ivaluka okuti, okulẽla calua kuatiamẽla ketimba liomunu. Oku sapa ocituwa cimue covutima osimbu okuti okulẽla calua cilomboloka ‘oku kuata ulela walua vetimba.’ Oku sapa ci lomboloka ‘oku kuata ocipululu lokulia.’ Omo liaco, omunu wa sapa ka limbukiwila ketimba liaye. Pole, o limbukiwila kocituwa caye cokulia. Momo kuli omanu vamue okuti va kopa pole, va kuete ocituwa coku sapa. Handi vali, ocisimĩlo coku tenda omunu umue okuti wa lẽla ale wa kopa, catiamẽla ño kocitumãlo locitumãlo. Momo omunu una tu tenda okuti wa lẽla calua, pamue kocitumãlo cikuavo ka tendiwa okuti wa lẽla.

Oco hẽ ndamupi omunu wa sapa a limbukiwa? Omunu wa sapa, o limbukiwila koku lia cosi a mõla toke eci a lala ofĩ. Eye ka tẽla oku likandangiya. Kuenda ka kũlĩhĩle okuti ocituwa caye ci pondola oku nena etombo ku Yehova kuenda komanu Vaye. (1 Va  Korindo 10:​31) Handi vali, kuli omanu vamue okuti olonjanja vimue va siata okulia calua. Omanu vaco, ka citava oku vatukula hati, ‘vakuacipululu.’ (Va Efeso 5:⁠5) Pole, ndomo ca lomboluiwa kelivulu lia va Galatia 6:​1, Akristão vaco va sukila ekuatiso. Upostolo Paulu wa popia hati: “A vamanji, nda umue wa kuatiwa lokulueya kumue, ene wakuespiritu u tiuli lutima womboka.”

Momo lie koloneke vilo elungulo Liembimbiliya liatiamẽla koku yuvula oku sapa li kuetele esilivilo? Momo okuti, catiamẽla koloneke vilo Yesu wa lunguile hati: “Lilavi sanga ovitima viene vi vulua lelelele luholua kuenda ovikele viokomuenyo wokilu lieve, kuenje eteke liaco liu wili ocipikipiki ndulivi. Momo liya komanu vosi va tunga kuosi kilu lieve.” (Luka 21:​34, 35) Omo liaco, oku yuvula ocituwa coku sapa, ci kuete esilivilo liocili. Momo ci tu teyuila konepa yespiritu.

Ukristão o sukia oku likandangiya kovina viosi. (1 Timoteo 3:​2, 11) Yehova okamamako oku kuatisa omanu vosi va likolisilako oku pokola kolonumbi viaye. Volonumbi viaco mua kongela ocituwa coku likandangiya kokulia calua kuenda koholua.​—⁠Va Heveru 4:⁠16.

[Atosi pombuelo yamẽla]