Oku Endela Vonjila Yocinyi
“Onjila yondingesunga ya soka ndocinyi congula, camamako okutua toke ci linga utanya.”—OLOSAPO 4:18.
1, 2. Omanu va Yehova va siata oku linga nye lekuatiso liocinyi cespiritu ci tunda ku Yehova?
HELIE o tẽla oku lombolola eci ci pita lowelema poku tua kuolosongo viekumbi? Yehova Ono yocinyi, eye lika o tẽla oku lombolola uloño waco. (Osamo 36:9) Suku wa popia hati: ‘Eci ocinyi congula ci tua, oluali lu pongoloka ndotuma, kuenje lu kuata avala ndonanga.’ (Yovi 38:12-14) Osimbu ocinyi camamako oku tua, ovina vi kasi voluali vi fetika oku molẽha. Kuenje vi pongoloka ndotuma yi kasi peka liutungi.
2 Yehova eye Ono yocinyi cespiritu. (Osamo 43:3) Osimbu oluali lu kasi vowelema, Yehova wa siata oku eca ocinyi cespiritu komanu vaye. Oco hẽ, onima yipi va siata oku tambula? Embimbiliya li popia hati: “Onjila yondingesunga ya soka ndocinyi congula, camamako okutua toke ci linga utanya.” (Olosapo 4:18) Ocinyi cespiritu ci tunda ku Yehova, ca siata oku kuatisa omanu vaye oku linga apongoloko kolonumbi, kalongiso, kuenda kovituwa viavo.
Ocinyi Cespiritu ca Kuatisa Oku Linga Apongoloko Vocisoko ca Yehova
3. Nye ca lomboluiwa kelivulu lia Isaya 60:17?
3 Vonduko yuprofeto Isaya, Yehova wa popia hati: “Posipi miñainyapo ulu, putale miñainyapo opalata, puti miñainyapo osipi, povawe miñainyapo utale.” (Isaya 60:17) Olondaka evi vi lekisa oku piñainya ovikuata viapama pomangu yevi via leñela. Cimuamue haico Olombangi via Yehova via siata oku linga ‘koloneke vilo via sulako.’ Ovo va siata oku tambula olonumbi viokaliye viatiamẽla kapongoloko vocisoko ca Yehova.—Mateo 24:3; 2 Timoteo 3:1.
4. Esokiyo lipi lia lingiwa kunyamo wo 1919, kuenda nye ceyililako?
4 Kanyamo apita vakongelo Olombangi via Yehova, akulu vekongelo kuenda oloñuatisi viavo, va enda oku nõliwa lekongelo. Pole, akulu vamue vekongelo, ka va kuatele ocituwa coku enda kupange woku kunda. Vakuavo va enda loku tutuiya vamanji oco ka vaka ende kupange woku kunda. Noke kunyamo wo 1919, vakongelo osi Olombangi via Yehova, mua nõliwa umue mitavaso yupange. Manji yaco ka nõliwile lekongelo. Pole, wa nõliwa loseketa Yolombangi via Yehova yi kasi vofeka, loku kuama olonumbi Viondaka ya Suku. Vocikele cupange waye, mua kongelele oku endisa upange woku kunda, loku sokiya ovikanjo, kuenda oku vetiya vamanji oco va kuate ombili kupange woku kunda. Omo liaco, vokuenda kuanyamo upange woku kunda wa fetika oku kuata esilivilo lialua komanu va Yehova.
5. Epongoloko lipi lia lingiwa okupisa kunyamo wo 1922?
5 Kunyamo wo 1922, Olombangi via Yehova via linga ohongele yimue yofeka volupale luo Cedar Point, ko Estados Unidos. Kohongele yaco, vamanji va vetiyiwa lolondaka viokuti: ‘Sapuli, sapuli, sapuli eci catiamẽla Kosoma kuenda uviali waye.’ Kunyamo wo 1927 upange woku kunda wa sokiyiwa ciwa. Kuenje va nola eteke lia Calumingu okuti, li linga lioku kunda konjo lanjo. Momo lie? Momo eteke lia Calumingu olio omanu va puyuka kovopange avo. Koloneke vilo Olombangi via Yehova, via siata oku likolisilako oku kundila omanu kapuluvi osi va sangiwa kolonjo viavo. Ovo va siata oku ci linga kesulilo liosemana kuenda koñolosi.
6. Kunyamo wo 1931, omanu va Suku va nõlelepo oku linga nye? Ondaka yaco ya vetiya ndati upange woku kunda?
6 Kunyamo wo 1931 keteke 26 kosãi Yevambi Linene Calumingu kekumbi, kolupale luo Kolombia, kua lingiwa ohongele yimue yofeka. Kohongele yaco kua eciwa evetiyo lialua liatiamẽla kupange woku kunda. Omanu vosi va kala pohongele va linga ohuminyo yokuti: ‘Etu tumanu va Yehova tua tambula ocikundi coku linga upange umue vonduko yaye. Tu pokola kocikundi caye coku eca uvangi wa Yesu loku sapuila omanu okuti, Yehova eye Suku yocili haeye Ukuonenewosi. Kuenje lesanju lialua tua tava konduko ya tunda vomẽla waye. Kuenda tu yongola oku kũlĩhĩwa londuko yaco okuti, Olombangi via Yehova.’ (Isaya 43:10) Onduko yaco ya lombolola ocikele cupange wa eciwa komanu vosi va tukuiwa layo. Yehova wa ecele upange umue komanu vaye. Kuenje valua va sanjukilile upange waco.
7. Epongoloko lipi lia lingiwa kunyamo wo 1932, kuenda momo lie?
7 Akulu vamue vekongelo, va lieca kupange waco. Pole, vana va noliwile lekongelo ka va tavele kondaka yokuti, omanu vosi vekongelo va sukila oku litumbika kupange woku kunda. Noke vokuenda kuotembo kua eciwa onumbi yikuavo. Kunyamo wo 1932, akongelo va tambula onumbi yimue Vutala Wondavululi. Onumbi yaco ya lekisa okuti, akulu vekongelo loloñuatisi viavo ka citava okuti va noliwa vali lekongelo. Pole, va nõliwa locisoko cakulu vekongelo olomitavaso viupange okuti, va loñoloha kespiritu. Kuenje ocikele coku endisa upange woku kunda ca eciwa komanu va kuete ombili lupange waco. Noke upange woku kunda wa fetika oku enda kovaso.
Ocinyi Camamako Loku Tua
8. Epongoloko lipi lia lingiwa kunyamo wo 1938?
8 ‘Ocinyi cespiritu camamako oku linga apongoloko.’ Kunyamo wo 1938, Olombangi via Yehova via liwekapo oku linga ocela coku nõla akulu vekongelo loloñuatisi viavo. Akulu vekongelo loloñuatisi viavo va fetika oku nõliwa lekuatiso Liondaka ya Suku kuenda lolonumbi ‘viukuenje wa lunguka.’ (Mateo 24:45-47) Epongoloko liaco lia taviwa lakongelo osi Olombangi via Yehova. Kuenje upange woku kunda wa fetika oku amamako.
9. Epongoloko lipi lia lingiwa kunyamo wo 1972? Momo lie kua lingiwila epongoloko liaco?
9 Okupisa kosãi ya Mbalavipembe yunyamo wo 1972, kua lingiwa apongoloko akuavo atiamẽla koku songuila akongelo. Apongoloko aco, a lekisa okuti, vekongelo ka citava okuti mu kala lika ukulu umosi wekongelo ndeci ca kala kosimbu. Pole, ci sukila okuti, mu kala ocisoko cimue cakulu. Eliangiliyo liaco lia kuatisa akulu vekongelo oku loñoloha koku endisa upange woku kunda. (1 Timoteo 3:1-7) Omo liaco, koloneke vilo vamanji valua va siata oku tambula olonumbi viatimẽla koku tata ovikele viekongelo. Handi vali, eliangiliyo liaco lia siata oku ecelela okuti, omanu vana va fetika ndopo oku lilongisa Embimbiliya va tambula ekuatiso konepa yespiritu.
10. Epongoloko lipi lia lingiwa kunyamo wo 1976?
10 Okupisa kunyamo wo 1976 kosãi ya Susu, Ocisoko cakulu Volombangi via Yehova ko Nova Yorke, ca fetika oku tepiwa vovisoko epandu. Ovina viosi viatiamẽla kolonumbi kuenda kakongelo osi voluali, via fetika oku songuiwa lovisoko viaco. Eliangiliyo eli, lia siata oku nena asumũlũho alua. Momo upange Wusoma wa fetika oku endisiwa ‘lolondunguli vialua.’—Olosapo 15:22; 24:6.
11. Epongoloko lipi lia lingiwa kunyamo wo 1992, kuenda momo lie?
11 Kunyamo wo 1992, kua lingiwa epongoloko likuavo. Epongoloko liaco, lia lisoka leci ca pita la va Isareli kuenda omanu vakuavo eci va tunda kumandekua ko Bavulono. Kotembo yaco ka kua kaile omanu valua va Lewi oco va vumbe vonembele. Omo liaco, va nõla omanu vamue va Nitineu vana ka va kale va Isareli oco va kuatise va Lewi. Cimuamue haico ukuenje wa lunguka a linga. Omo lioku livokiya kupange woku kunda voluali, ovikele viavo via fetika oku livokiya calua. Kuenje kunyamo wo 1992, ‘olomeme vikuavo’ via tambulavo ovikele vikuavo. Momo va noliwa oco va linge oloñuatisi Viocisoko cakulu Volombangi via Yehova.—Yoano 10:16.
12. Yehova wa siata oku kapa ndati ‘ombembua ndasongui’?
12 Nye ca siata oku iyilila kapongoloko aco? Yehova wa popia hati: “Ñapa ombembua ha yi lingi ovasongui vove, lesunga ha li lingi vakapatasi vove.” (Isaya 60:17) Cilo pokati komanu va Yehova, pali ombembua locisola kuenda esunga. Ovituwa viaco ovio via siata oku va vetiya oku lieca kupange wa Suku. Ovo va loñoloha ciwa kupange woku kunda Usoma kuenda koku longisa omanu Ondaka ya Suku.—Mateo 24:14; 28:19, 20.
Yehova wa Situlula Ciwa Alongiso Ondaka Yaye
13. Okupisa kunyamo wo 1920, Yehova wa kuatisa ndati omanu vaye oku linga apongoloko kalongiso?
13 Yehova wa siata oku eca komanu vaye olonumbi viokaliye viatiamẽla kelongiso liondaka yaye. Kelivulu Liesituluilo 12:1-9, kuli ocindekaise cimue. Ulandu waco wa tukula ovina vitatu viocindekaise okuti: ‘ukãi umue omisi, ocinyõha cinene, kuenda omõla ulume.’ Ove hẽ wa kũlĩha elomboloko liovina evi? Ovio via situluiwa vocipama cimue Cutala Wondavululi wosãi Yelombo yunyamo wo 1925. Ocipama caco ca kuata osapi ya linga hati: ‘Oku citiwa Kuofeka.’ Oco ca eca komanu va Yehova elomboloko liwa liovitumasuku viatiamẽla koku tumbikiwa Kusoma. Kuenda ca lombolola okuti, voluali muli ovisoko vivali. Cimue ca Yehova, cikuavo ca Satana. Noke kunyamo wo 1927 kuenda wo 1928, omanu va Yehova va limbuka okuti, ocipito Conatale lovipito vioku citiwa, ka vi sangiwa Vembimbiliya. Omo liaco, va liwekapo oku linga ovipito viaco.
14. Elongiso lipi liokaliye lia eciwa okupisa kunyamo wo 1930?
14 Okupisa kunyamo wo 1930, kua lingiwa vali apongoloko akuavo atiamẽla kalongiso. Vokuenda kuanyamo alua, Olombangi via Yehova via kũlĩhĩle okuti, “owiñi wakahandangala” wa tukuiwa kelivulu Liesituluilo 7:9-17, wa litepa letendelo liolombuavekua vi soka 144.000 komanu vana vaka viala la Yesu kilu ndolosoma kuenda ndovitunda. (Esituluilo 5:9, 10; 14:1-5) Pole, Olombangi via Yehova, ka via kuatele elomboloko liwa liowiñi waco. Vokuenda kuotembo ocinyi ca fetika oku tuila vowelema. Okupisa kunyamo wo 1935, via kuata elomboloko liokuti, ‘owiñi wakahandangala,’ uka puluka ‘kohali ya piãla.’ Kuenje uka kuata omuenyo ko pui palo posi. Kunyamo waco va kuatavo elomboloko liocitangi comãla vavo va tangela kolosikola. Osimbu uyaki wa kala oku amamako voluali, ovo va limbuka okuti, voku sumbila epandela mua kongela ovina vialua ka vi litava lolonumbi Viembimbiliya. Noke kunyamo wa kuamamo, kua lomboluiwavo okuti, Yesu ka filile kekulusu. Pole, wa fila kuti.—Ovilinga 10:39.
15. Otembo yipi kua eciwa elomboluilo lioku sumbila osonde? Kuenda lia lomboluiwa ndati?
15 Vokuenda Kuyaki Wavali wa pita Voluali, kua kala asualali valua va lemehĩwa. Kuenje kolosipitali va fetika oku sakula omanu losonde. Noke omanu va Yehova va tambula onumbi yatiamẽla koku sumbila osonde. Kunyamo wo 1945, Utala Wondavululi wosãi Yevambi Linene, wa lombolola hati: ‘Afendeli va Yehova vana va yongola oku kuata omuenyo ko pui voluali luokaliye, va sukila oku sumbila osonde. Kuenda va sukililevo oku pokola kolonumbi via Yehova viatiamẽla kondaka yaco.’
16. Otembo yipi kua sandekiwa o Tradução do Novo Mundo das Escrituras Sagradas? Embimbiliya liaco lia litepa ndati Lambimbiliya akuavo?
16 Kunyamo wo 1946, Olombangi via Yehova via limbuka esilivilo lioku kuata Embimbiliya limue okuti, ka mu sangiwa alongiso atavo esanda. Upange woku pongolola Embimbiliya liaco, wa fetika kosãi ya Cembanima kunyamo wo 1947. Kunyamo wo 1950, kua sandekiwa o Tradução do Novo Mundo Yovisonehua vio Helasi, kelimi Liongelesi. O Tradução do Novo Mundo yovisonehua vio Heveru kelimi Liongelesi okuti ya tepiwa valivulu atãlo, ya fetika oku sandekiwa okupisa kunyamo wo 1953. Elivulu lia sulako, lia sandekiwa kunyamo wo 1960. Otembo yaco pa pitile ale ci soka 12 kanyamo tunde eci va fetika upange waco. Embimbiliya liosi lio Tradução do Novo Mundo das Escrituras Sagradas, lia sandekiwa kunyamo wo 1961. Cilo oTradução do Novo Mundo das Escrituras Sagradas, ya pongoluiwa valimi alua. Kuenda li kuete ovina vialua via litepa Lambimbiliya akuavo. Olio lia tumbulula onduko ya Yehova. Kuenje lia siata oku kuatisa omanu oku kuata elomboloko liwa Liondaka ya Suku.
17. Kunyamo wo 1962, Olombangi via Yehova via kuata elomboloko lie?
17 Vokuenda kuotembo, Olombangi via Yehova via kuata elomboloko likuavo liatiamẽla kolombiali via tukuiwa kelivulu lia Va Roma 13:1. Kunyamo wo 1962, va kuata elomboloko lioku pokola kolombiali viaco. Momo eci va kũlĩhĩsa olondaka vielivulu lia Va Roma kocipama 13, kuenda lia Tito 3:1, 2, leli lia 1 Petulu 2:13, 17, va limbuka okuti, olombiali viaco ka vi lomboloka Yehova la Yesu Kristu. Pole, vi lomboloka olombiali violuali lulo.
18. Elomboloko lipi lia eciwa okupisa kunyamo wo 1985?
18 Vokuenda kuotembo onjila yondingesunga yamamako oku tua ndocinyi. Omo liaco, kunyamo wo 1985 Olombangi via Yehova via limbuka eci ci lomboloka oku tendiwa ndukuesunga loku kala ekamba lia Suku. (Va Roma 5:18; Tiago 2:23) Kunyamo wo 1987 kua eciwavo elomboluilo lieci ci lomboloka eyovo Liakristão.
19. Vokuenda kuanyamo a sulako, Yehova wa eca ndati alomboluilo okaliye komanu vaye?
19 Kunyamo wo 1995, Olombangi via Yehova via kuata elomboloko lioku tepiwa ‘kuolomeme lolohombo.’ Kunyamo wo 1998, kua eciwa elomboluilo lionembele Esekiele a mola vocinjonde. Elomboluilo liaco lia lekisa okuti ocitumasuku caco, ci kasi oku tẽlisiwa. Kunyamo wo 1999 kua eciwa elomboluilo liatiamẽla kotembo ‘ocinyuañi cevĩho ci talama pocitumãlo ci kola,’ kuenda ndomo ci talama pocitumãlo caco. (Mateo 24:15, 16; 25:32) Kunyamo wo 2002, kua eciwa elomboluilo likuavo lieci ci lomboloka oku fendela Suku ‘lespiritu kuenda locili.’—Yoano 4:24.
20. Kovina vipi vikuavo omanu va Yehova va siata oku linga apongoloko?
20 Yehova wa ecavo olonumbi viokaliye viatiamẽla kovituwa viomanu vaye. Kunyamo wo 1973 kua lomboluiwa okuti, oku sipa akaya ku vĩhisa etimba kuenda ka ku litava lolonumbi Viembimbiliya. (2 Va Korindo 7:1) Noke lianyamo amue, Utala Wondavululi wa 15 Yevambi Linene wo 1983, wa lombolola ciwa ekalo lietu liatiamẽla kocitangi coku kuata ovota. Ovina tua tukula ndeti, ovio apongoloko amue a lingiwa vocisoko ca Yehova koloneke vilo.
Amamako Oku Endela Vonjila Yocinyi
21. Ocituwa cipi ci tu kuatisa oku amamako oku endela vonjila yocinyi?
21 Ukulu umue wekongelo wa popia hati: ‘Ka ca lelukile oku tava kapongoloko loku pokola kolonumbi viaco.’ Oco hẽ, nye ca siata oku u kuatisa oku tava kapongoloko a siata oku mõla vokuenda kueci ci soka 48 kanyamo tunde eci a litumbika ku Yehova? Eye wa popia hati: ‘Oku kuata utima wa sunguluka oyo onjila ya velapo. Oku likala oku tava kapongoloko, ci lomboloka oku siala konyima osimbu ocisoko ca Yehova camamako. Olonjanja vimue nda siata oku kuata ocitangi coku pokola kapongoloko amue. Noke ndivaluka olondaka Petulu a sapuilile Yesu hati: “A Ñala, kulie tu enda? Ove, ove o kasi lolondaka viomuenyo ko pui.” Kuenje ndi lipula ndoco: Anga hẽ ndi yongola oku enda vowelema woluali lulo? Ocituwa eci ca siata oku ndi kuatisa oku amamako vocisoko ca Yehova.’—Yoano 6:68.
22. Oku endela vonjila yocinyi ku tu kuatisa ndati?
22 Ocili okuti, oluali lu kasi vowelema. Osimbu Yehova amamako oku eca ocinyi cespiritu komanu vaye, oku litepa kuavo loluali ku limbukiwa ciwa. Ocinyi caco ca siata oku tu kuatisa ndati? Ndeci ocinyi ka ci maliko ovitunyu vonjila yowelema, haico cipita locinyi Condaka ya Suku. Oco ka ci maliko atatãhai osi. Pole, ci tu kuatisa oku yuvula ovitangi okuti, tu amamako oku endela vonjila ya Yehova. Omo liaco, tu amamiko oku pokola Kondaka ya Yehova yi kasi ‘ndocinyi ci tuila vowelema.’—2 Petulu 1:19.
Ivaluka Eci Tua Lilongisa?
• Apongoloko api Yehova a siata oku linga vocisoko caye?
• Apongoloko api a siata oku lingiwa atiamẽla kelongiso?
• Apongoloko api ove wa siata oku mola vocisoko ca Yehova? Ekuatiso lipi wa siata oku tambula poku tava kolonumbi viaco?
• Momo lie o yonguila oku amamako oku endela vonjila yocinyi?
[Ono Yelitalatu]
© 2003 BiblePlaces.com
[Elitalatu kemẽla 19]
Ohongele yofeka ya lingiwa volupale luo Point, kunyamo wo 1922, ya vetiya Olombangi via Yehova oku linga upange woku kunda
[Elitalatu kemẽla 21]
Kunyamo wo 1950, manji N. H. Knorr, wa sandeka o Tradução do Novo Mundo Yovisonehua vio Helasi