Eliangiliyo Lioku Lisanga Lomunu Umue

NDI kuete ocikele cinene. Ndi njali yimue yumalẽhe kofeka yo Espanya. Cilo, ndi lombolola eci ca ndi vetiya oku linga eliangiliyo liaco.

Vepata lietu ka mua kale ombembua lelitokeko. Ovitangi viaco via fetika eci huvange ulume a fa lanyamo akuãla. Ocituwa cĩvi ca isia yange ca tateka ina yetu oku kuata esanju volohuela. Pole, ovitangi viaco ka vio tatekele oku longisa ovituwa viwa kokuange kuenda ku huvange ukuavo ulume.

Vokuenda kuotembo, huvange wa kuela, noke ame nda kuelavo. Eci papita okatembo kamue, ina yetu wa endele kosipitali kuenje olondotolo vio sapuila hati, o kuete uvei wo kanser una weya oku nena olofa viaye. Pole, osimbu handi ka file, wa tu ĩha ukuasi umue wa velapo.

Umue ngandietu ukãi, wa sapuilile ina yetu elavoko Liovisonehua liatiamẽla kepinduko liava va fa, kuenje wa tava oku lilongisa Embimbiliya. Vokuenda kuoloneke via sulako viomuenyo waye, esapulo Liembimbiliya lio kuatisa calua kuenje wa kuata esanju komuenyo.

Eci tua mola ndomo esapulo Liembimbiliya lia kuatisa ina yetu, ame la huvange, tua fetika oku lilongisavo Ondaka ya Suku. Noke nda papatisiwa kuenje nda linga Ombangi ya Yehova osimbu pa kambele osãi yoku cita omõlange wavali una nda luka hati, Lucía.

Eteke liange liepapatiso lia kuata esilivilo lialua. Esunga liatete lieli okuti, cilo nda tiamẽla ku Yehova kuenda nda litumbika kokuaye oco nda amameko oku u vumba otembo yosi. Likuavo lieli okuti, ndi pondola oku sapuilako omãla vange catiamẽla kekolelo liange.

Pole, esanju liange lieya oku tatekiwa. Eci Lucía a kuata anyamo akuãla, efẽ liaye lia fetika oku u vala calua. Noke lioku enda kosipitali olonjanja vimue oco va kũlĩhĩse evalo liaco, ndotolo wa popia hati, Lucía o kuete ocipumbu cimue ca lisoka lelalanja. Eye wa lombolola okuti, ocipumbu caco ci kasi vowoño waye. Okupisa keteke liaco, tua fetika oku liyaka luvei wa Lucía una wa pita anyamo epanduvali loku endaenda kosipitali.

Ocituwa Coku Likolisilako

Vokuenda kuanyamo aco ovitangi, Lucía wa ndi lembeleka calua kuenda wa ndi vetiya. Ocituwa a lekisa ndaño luvei waye, ca komohĩsavo olonalavayi vio kosipitali. Eye wa enda oku kuatisa olondotolo poku ava okulia ndeci, o sumu, kuenda ovilia vikuavo vieciwa komãla va kasi kosipitali. Olondotolo via eca ku Lucía ocikutu cimue ci yela kuenda va sonehamo hati, “ukuakukuatisa olondotolo.”

Ukãi umue o talavaya kosipitali, wa popia hati, “Ocituwa ca Lucía ca vetiya utima wange. Eye wa kala omõla umue ukuambili, ukualomapalo vialua, haeye wa solele oku linga oviluvialuvia via posoka. Wa sanjukile calua, haeye ukualondunge.”

Lucía wa tambula ongusu kuenda elembeleko li tunda Vondaka ya Suku. (Va Hev. 4:​12) Eye wa kuatele ekolelo liokuti, voluali luokaliye, “okufa ka ku kalako vali, ndaño oku lila loku liyula lupongo laviovo ka vi kalako vali” ndomo ca lekisiwa volohuminyo Viondaka ya Suku. (Esit. 21:⁠4) Omo lioku sola vakuavo, wa enda oku va sapuilako esapulo Liembimbiliya. Lucía omo lioku kolela kelavoko liepinduko, wamamako oku kuata utima wa sunguluka ndaño luvei waye. (Isa. 25:⁠8) Eye wamamako locituwa caco toke keteke lioku fa kuaye.

Keteke liaco oco nda linga eliangiliyo lia velapo. Lucía ka tẽlele vali oku vanja. Isiaye lame, tuo kuata vovoko. Noke ndo loñuila vetũi loku u sapuila hati: “Kuka saluke, si ku yanduluka. Fuima levando. Eci o patuluka, ku yevi vali evalo. Lalimue eteke oka tala vali ohali, kuenda ndi kala love.”

Cilo ndi sukila oku pandikisa locikele caco. Nda kũlĩha okuti, ka ca lelukile oku talamẽla. Pole, nda nda pandikisa loku kolela ku Yehova kuenda oku pokola kokuaye, tuka kala kumosi eci aka pinduiwa.

Ongangu ya Lucía

Utõi wa Lucía, lekuatiso lia vamanji vekongelo, lia vetiya utima wulume wange una ka kale Ombangi ya Yehova. Keteke lioku fa kua Lucía, wa ndi sapuila hati, o sukila oku kũlĩhĩsa ciwa ovisimĩlo viaye. Eci papita olosemana vimue, wa pinga elilongiso Liembimbiliya kukulu umue wekongelo. Noke wa fetika oku endaenda kolohongele viosi. Lekuatiso lia Yehova wa liwekapo oku sipa, ndaño okuti ka ca lelukile oku ci linga kefetikilo.

Esumuo nda yeva omo lioku fa kua Lucía toke cilo li kasi kutima, pole, ndeca olopandu ku Yehova omo liongangu yiwa Lucía a tu sila. Ame lulume wange tua siata oku lilembeleka pokati lelavoko liepinduko loku seteka oku sokolola otembo tuka kala vali kumuamue la Lucía, oku mola ocisola caye, lovaso aye a posoka, kuenda ocinjola pupolo waye.

Olofa viomõlange ukãi, via sumuisavo omanu vo posongo yetu. Eteke limue Casapalo eci ombela ya kala oku loka, ukãi umue okuti omõlaye wa tangela kosikola yimuamue la Lucía, weya konjo yetu. Eye wa fisilevo omõlaye ukuanyamo 11 luvei umuamue. Eci a yeva ovina via pita la Lucía, wa tu sandiliya toke a tu sanga. Eye wa yonguile oku kũlĩha eci ca ndi kuatisa oku pandikisa lolofa via Lucía kuenje wa ndi sapuila okuti, tu sukila oku sokiya ocimunga cimue comanu va lembeleka olonjali vi liyaka lovitangi ndevi.

Ndo lomboluila okuti, olohuminyo Viembimbiliya ovio via ndi kuatisa oku liyaka lovitangi viaco, kuenda ka vi sokisiwa lelembeleko li tunda komanu. Eci ndo tangela olondaka via Yesu vi sangiwa kelivulu lia Yoano 5:​28, 29, wa kuata esanju lialua omo lielavoko liaco. Noke wa tava oku lilongisa Embimbiliya kuenje wa sanga “ombembua ya Suku, yina ya piãla olondunge viosi.” (Va Fil. 4:⁠7) Olonjanja vimue eci tu lilongisa Embimbiliya kumuamue, tua siata oku talamapo kamue loku sokolola ndomo tuka kala voluali luokaliye loku yolela vangandietu va fa.

Ndaño Lucía ka kale otembo yalua komuenyo, wa sia ongangu yiwa. Ekolelo liaye lia kuatisa epata lietu oku likuata omunga koku vumba Suku, kuenda lia siata oku ndi kuatisa oku amamako oku pamisa ekolelo liange. Omo liaco, vosi va pesela vangandiavo kolofa okuti vaka pinduiwa, va kuete ocikele cinene.

[Elitalatu kemẽla 20]

Oluali Luokaliye Lucía a kala oku lavoka