Oku Kundila Olondaka Viwa Kolomunda Vioko Andes

TUA kala eci ci soka 18 komanu kuenda tua pekelele posi ya sĩla vocipundo cimue. Omo liombambi yoku pekela polonjeke, tua luluma calua kuenda tua yeva ombela yosi ya kala oku loka luteke kilu liolonjingu. Eci tua kũlĩhĩsa ohali tua tala vocipundo caco, tua lipula nda etu tua kala omanu vatete va fetika oku lalamo.

Momo lie ci soka 18 komanu va nyulila ocikanjo caco? Etambululo, liatiamẽla konjongole yoku tẽlisa ocikundi ca Yesu coku kunda olondaka viwa “toke kasulilo okilu lieve.” (Ovil. 1:8; Mat. 24:​14) Tua linga ungende woku ka kundila kocikanjo cimue ku tukuiwa hati, Andes, kofeka yo Bolívia okuti, lomue ukundi wolondaka viwa wa endeleko oku kunda.

Poku Enda Kocikanjo Caco

Ocitangi catete tua liyaka laco, ca kala coku pitila pocitumãlo caco. Va tu sapuila hati, oviendelo vienda kolupale luaco, ka vi pitila kocikanjo tu yongola oku enda. Eci okalela ketu ka pitila, tua limbuka okuti, katito kuenje vamue pokati ketu ka va kuatele olomangu vioku tumãla. Pole, vosi yetu tua nõlapo oku enda.

Onjongole yetu ya kala yoku pitila toke kovambo o kolomunda ko Andes kofeka yo Bolívia. Eci okalela ketu ka pitila vosi yetu tua tikula okulia kuetu loku likuama usokosoko oku lamana vonjila yi loña kolomunda.

Ovaimbo aco ndaño a molehele ndu okuti, atito, pole, olonjo viaco via lisila ocinala calua okuti oco o pitile kimbo likuavo o sukila oku enda olowola vialua. Ndaño tua linga ungende wa lua, pole, osimbu tua kala oku enda, kovaso yetu kua molẽha olonjo vikuavo. Olonjanja vimue tua enda oku nyelela volonjila viaco.

“Nye ka Weyilili Kulo Osimbu?”

Ukãi umue wa komõha calua eci a limbuka ungende tua linga kuenje wa ecelela okuti tu teleka okulia kuetu vokusinya kuaye. Ulume umue noke yoku yevelela eci Embimbiliya li popia catiamẽla kekalo liava va fa, wa popia hati: “Nye ka weyilili kulo osimbu?” Eye wa sola calua esapulo lietu kuenje eci tua tunda vimbo, wa tu sindikila loku tu linga apulilo amue. Ulume umue ukuavo okuti, lalimue eteke a yevele Olombangi Via Yehova, wa lekisa onjongole yoku tambula alivulu etu. Eye wa sanjukilile calua oku iya kuetu vimbo kuenje wa tu ĩha osapi yo vosinge tua pekela.

Eteke limue kuteke omo liowelema, tua tunga osinge pokati kovisonde. Noke via tu lumana calua. Eteke liaco tua kavele calua omo lioku tumboka vokati kuteke, pole, tu eca olopandu omo okuti, noke via liwekapo oku tu lumana.

Kefetikilo onyima yetu kuenda olomati, via kala oku tu vala calua omo lioku pekela posi. Pole, vokuenda kuteke evalo lia fetika oku ika. Eci tua pasuka komẽle evalo tua yeva luteke lia tu limba poku mola alende va enda levando vakungu kuenda poku mola olomunda ndomo via sitikiwa lombundu. Handi vali, ovisungo violonjila kovitumãlo viaco via tu sanjuisa calua.

Noke lioku yua volui, tua konomuisa ocisonehua Cembimbiliya lokulia ongau, kuenje tua enda kovambo akuavo. Ungende waco wa kala woku lamana komunda yimue ya lepa. Vonjila tua sanga ukãi umue wa kuka. Eci tuo lekisa Vembimbiliya okuti onduko ya Suku, Yehova, wa lila. Kuenda wa komõha calua. Okupisa keteke liaco, wa fetika oku tukula onduko ya Suku volohutililo viaye!

Ulume ukuavo ukulu wendamba wa lombolola okuti, Suku o sukila oku wivaluka, kuenje wa imba ocisungo ci lekisa okuti, ovangelo ovo va tu tuma kokuavo. Ulume ukuavo okuti ka pondola oku tunda konjo yaye omo lioku vela, wa tu sapuila hati, omanu vimbo liaye, lalimue eteke vo nyulile. Eye wa komõha calua eci a tu mõla oku tunda ko La Paz oku iya konjo yaye. Ulume ukuavo wa komõhavo calua eci a limbuka okuti, Olombangi Via Yehova vi nyula omanu kolonjo viavo osimbu okuti atavo akuavo a laleka ño omanu poku sika ongunga oco veye konembele.

Omo okuti vimbo liaco ka muli olusu, omanu va pekela selo kuenda va pasuka omẽle yalua. Omo liaco, tua enda oku fetika upange woku kunda kowola yepandu komẽle oco tu sange omanu kolonjo viavo. Momo valua va talavaya kovapia. Omanu vana va talavaya vovapia, va enda oku yevelela esapulo lietu li tunda Vondaka ya Suku eci tu va kundila ndaño va ci lingila oku puyukapo kamue. Vana va kasi kolonjo va enda oku tu yalela ovipa violomeme posi oco tu tumãlepo kuenje va vilikiya epata liavo oco va tu yevelele. Omanu valua poku lekisa olopandu omo lialivulu tua va sila, va tu ĩha olonjeke viepungu.

“Koka Njivali”

Oco omanu vamameko oku kuata ukũlĩhĩso Wembimbiliya, va sukila oku va nyula olonjanja vialua. Valua va tu pinga lohenda oco tu tiukileko oku va longisa vali ovina vikuavo. Omo liaco, tua linga esokiyo lioku enda olonjanja vialua kocikanjo caco catiamẽla kofeka yo Bolívia.

Onjanja yikuavo, ukãi umue ukulu wendamba, wa sanjukile calua eci a tu mola okuti, tua tiuka. Eye wa popia hati: “Ene u kasi ndomãla vange. Ka wa njivaleli.” Ulume umue omo liolopandu wa tu sapuila hati, eci tu tiuka onjanja yikuavo, tu sikĩla konjo yaye. Onima ya velapo yelikolisilo lietu, ya kala yoku yeva okuti, ukãi umue tua kundilile onjanja yatete, wa tunda vimbo liaco, kuenje o kasi oku kunda olondaka viwa.

Keteke lia sulako liungende, o petololiu yetu yoku siakãla ya pua, kuenda tua kuatele okulia kutito. Tuongolola olohui vioku siakãla kuenje tua teleka okulia kua sialelepo, noke tua wila vonjila. Okupisa pocitumãlo caco toke volupale luokulondela vekãlu, pa kala ocinãla cinene. Omo liaco, tua pitilamo tupu kua tekãva.

Poku Tiukila Kimbo

Poku tiukila kimbo lietu, tua liyaka lovitangi vialua momo ekãlu lietu lia nyõleha. Eci papita okatembo kamue, pa molẽha ekãlu limue kuenje tua londa vokalosa kaco lowiñi ukuavo.

Tua kuata epuluvi lioku kundila omanu tua endela kumosi lavo, kuenje va komoha calua omo tua kala pokati kavo. Omanu vaco va kuete ocituwa coku yekisa akombe haivo va sanjuka.

Noke yoku enda ci soka olowola ecea vokalosa kekãlu, tua pitila konjo kuenda kua kala ombambi yalua. Pole, ungende ka wa kale wolivova. Momo, vungende wetu, tua fetika elilongiso Liembimbiliya lukãi umue wa kala volupale.

Ca kala esumũlũho linene oku kundila olondaka viwa komanu va kasi kovikanjo viaco violomunda. Tua kundila kovambo akuãla kuenda kovikanjo vialua. Ka tua yonguile vali oku va kuatisa, pole tua sokolola olondaka vi popia hati: “Olomãi viu iya kolomunda londaka yiwa via posoka nye! Eye o sapula ombembua kuenje iya londaka yiwa yesanju. Haeye o sapula eyovo.”​—⁠Isa. 52:7; Va Rom. 10:⁠15.

[Elitalatu kemẽla 17]

Va nõlapo oku kunda olondaka viwa