Amamako Lekolelo Kuenda Kuata Utima Wa Sunguluka
“Ngendaenda locili cove. Pandeka utima wange kesumbilo lionduko yove.”—OSA. 86:11.
1, 2. Ndomo Osamo 86:2, 11 yi lombolola, nye ci tu kuatisa oku amamako lekolelo ku Yehova eci tu liyaka layonjo? (b) Vepuluvi lipi tu sukila oku lekisa ekolelo?
MOMO lie Akristão vamue ndaño lelambalalo kuenda oku kapiwa vokayike va pandikisa lekolelo vokuenda kuanyamo alua, pole noke va konyoha omo liocipululu covokuasi? Etambululo liatiamẽla kekalo liutima wetu. Osamo 86 yi sokisa ekolelo lutima wa sunguluka okuti, ka u kuata ovisimĩlo via litepa. Ukualosamo Daviti wa likutilila hati: “Lava omuenyo wange momo ndukuesunga lia Suku. Popela ukuenje wove [a Suku yange nda ku] kolela.” Noke, Daviti wamisako hati: “Ndongise onjila yove, a Yehova, okuti ngendaenda locili cove. Pandeka utima wange kesumbilo lionduko yove.”—Osa. 86:2, 11.
2 Nda ka tua lekisile ekolelo ku Yehova Suku, asakalalo omuenyo a pondola oku tepulula ukamba wetu laye. Olonjongole vĩvi vi sokisiwa lonjila tu pita okuti, mua petuiwa olomina. Ndaño tua pandikisa lekolelo ku Yehova poku liyaka lovitangi, tu sukila oku lavulula oco ka tuka yapuisiwe layonjo a Satana. Omo liaco, tu sukila oku lekisa ekolelo ku Yehova osimbu ka tua yapuisiwile layonjo aco! Embimbiliya li popia hati: “Lava utima wove lepandi.” (Olosap. 4:23) Tu pondola oku lilongisa ovina vialua kulandu wuprofeto wa tunda ko Yuda una wa tumiwa la Yehova ku Yerevoama Soma ya va Isareli.
“Ndu ku Ĩha Onima”
3. Yerevoama wa tenda ndati esapulo lieyambulo lia eciwa luprofeto wa Suku?
3 Tu sokololi ulandu ulo. Uprofeto wa Suku, wa eca ku Soma Yerevoama esapulo lioku u yambula, omo lioku tungila ociñumañuma congombe konano yofeka kua kala apata ekũi a va Isareli. Pole, eci soma a yeva esapulo liaco, wa temẽla uprofeto waco. Omo liaco, wa tuma ukuenje waye oku u kuata. Pole, Yehova wa kuatisa uprofeto waye. Noke, eka soma olũila uprofeto lia kukuta, kuenje ka tẽlele oku li ketika vali. Vepuluvi liaco, utala wa toka pokati, kuenje etiko liokutala lia peseka. Omo liaco, Yerevoama wa pongolola ovisimĩlo viaye, kuenje wa pinga kuprofeto wa Suku hati: “Pinga ohenda ya Yehova Suku yove, ndombeleko, oco eka liange li ñuaime vali.” Noke uprofeto wa likutilila, kuenje eka liaco lia kaya.—1 Olos. 13:1-6.
4. (a) Momo lie ombanjaile ya soma ya kapela voseteko ekolelo liuprofeto? (b) Uprofeto wa tambulula ndati?
4 Yerevoama wa sapuila uprofeto wa Suku hati: “Tuende konjo, o ka liupe ongonde kuenje ndu ku iha onima.” (1 Olos. 13:7) Nye uprofeto a linga? Anga hẽ, wa tava oku yekisiwa la soma noke lioku u wĩha esapulo lieyambulo? (Osa. 119:113) Ale wa likala elaleko liaco ndaño soma wa molẽha ndu a likekembela? Yerevoama wa kuata ovina vialua viwa vioku eca kakamba vaye. Nda uprofeto wa Suku wa tiamisilile utima waye kovokuasi, nda wa yapuisiwa lombanjaile ya soma. Yehova wa sapuila uprofeto waye hati: “Ku ka lie ombolo, ndaño ovava ku ka nyue pamue oku tiuka lonjila weya layo.” Noke uprofeto wa tambulula ku soma hati: “Ndaño o nyiha onepa yonjo yove, ame si iñila love, kulo si liko ombolo, ndaño ovava si nyuiko.” Omo liaco, uprofeto poku tunda ko Betele wa pita onjila yikuavo. (1 Olos. 13:8-10) Onjila uprofeto a nõla yi tu longisa nye catiamẽla koku lekisa ekolelo lutima wetu wosi?—Va Rom. 15:4.
‘Tu Sanjukili Ovina tu Kuete’
5. Ovokuasi a kapa ndati kohele ekolelo lietu?
5 Ndaño pamue tu sima okuti ovokuasi ka a kapi kohele ekolelo lietu, pole, citava okuti a tu yapula. Anga hẽ, tua kolela kolohuminyo via Yehova vioku tu ĩha ovina tu sukila? (Mat. 6:33; Va Hev. 13:5) Citava hẽ okuti tu kuata ekalo liwa komuenyo ndaño ka tu pondola oku kuata ovina ‘viwa’ tu yongola? (Tanga Va Filipoi 4:11-13.) Anga hẽ, tu kasi oku tepulula ombili yetu kovina viespiritu oco tu litumbike koku sanda ovokuasi? Tua pitisa hẽ kovaso upange wa Yehova komuenyo wetu? Atambululo etu atiamẽla kupange wa Suku tu linga lutima wosi. Upostolo Paulu wa soneha hati: “Ocili, ku wa sanjukila oku vumba Suku kuli onganyu ya piãla. Momo ka tua nenele cimue voluali, kuenje, oku ambata cimue eci tu tunda, ka tu ci tẽla. Nda tu kuete okulia leci tu lisikilĩla ci tu tẽla, kuenje tu sanjuka laco.”—1 Tim. 6:6-8.
6. ‘Olohuminyo’ vipi viupange tu pondola oku tambula, kuenda nye ci tu kuatisa oku nõla nda tu vi tava ale sio?
6 Citava okuti cime cetu o likuminya oku tu ĩha upange umue tu fetiwa olombongo vialua, kuenda ovina vikuavo. Pamue tu sima okuti, nda tua ilukila kolupale lumue ale kofeka yikuavo, tu sanga upange una tu fetiwa olombongo vialua. Upange waco pamue tu u tenda ndesumũlũho li tunda ku Yehova. Osimbu ka tua nõlele onjila yaco, momo lie ka tu konomuisila ovina via kongelamo? Omo liaco, tu sukila oku li pula ndoco: “Anga hẽ, oku tava upange waco ka ci tepulula ukamba wange la Yehova?”
7. Momo lie tu sukilila oku yuvula ovisimĩlo vioku pitisa kovaso ovokuasi?
7 Oluali lulo lua Satana lu vetiya oku sandiliya ovokuasi. (Tanga 1 Yoano 2:15, 16.) Eliapu li yongola oku yapula utima wetu. Omo liaco, tu sukila oku lavulula oco ka tuka yapuisiwe lovisimĩlo vioku pitisa kovaso ovokuasi. (Esit. 3:15-17) Yesu ka tavele ombanjaile ya Satana yoku u wĩha ovosoma osi oluali. (Mat. 4:8-10) Eye wa lungula hati: “Lunguki kuenda liuviki kocipululu cosi, momo omunu, ndaño ohuasi enene, haimo omuenyo waye ko fukile.” (Luka 12:15) Esunguluko li tu kuatisa oku kolela Yehova okuti, tu yuvula oku li kolela etu muẽle.
Uprofeto Umue wa Kuka “wo Kemba”
8. Ekolelo liuprofeto wa Suku lia kapiwa ndati voseteko?
8 Uprofeto wa Suku nda wa pokuile konumbi yoku tiukila konjo, nda ka kuatele ovitangi. Omo liaco, wa pita locitangi cikuavo. Embimbiliya li popia hati, “ko Betele kua [tungile] uprofeto umue wa kuka. Umue pomãla vaye weya, yu wo sapuila” ovina viosi via pita keteke liaco. Eye ka yevelile kulandu waco, pole, wa va pinga oku pongiya ocimbulu oco a landule uprofeto wa Suku. Eye ka endele ocinãla calua, kuenje wa sanga uprofeto o kasi oku puyuka vemẽhi liuti umue unene, noke wo sapuila hati: “Tuende konjo, o ka lie [ombolo]!” Eci uprofeto wa Suku a tava kelaleko liaco, ulume wo laleka wo sapuila hati: “Ame lamevo nduprofeto ndove. Ungelo umue wa popia lame londaka ya Yehova hati, ‘U tiula konjo yove, a lie ombolo loku nyua ovava.’” Pole, Ovisonehua vi popia hati: “Wo kemba ño.”—1 Olos. 13:11-18.
9. Nye Ovisonehua vi popia catiamẽla kolohembi, kuenda ekalo lielie va siata oku nyõla?
9 Ka tua kũlĩhĩle esunga lieci uprofeto wa kuka a kembela. Citava okuti otembo yimue wa kala uprofeto wa Yehova ukuekolelo. Pole, wa kemba. Ovisonehua via situlula uhembi waye. (Tanga Olosapo 3:32.) Omo liaco, olohembi via siata oku nyõla ekalo liavo kespiritu kuenda lia vakuavo.
“Wa Tiukila” Lulume wa Kuka
10. Uprofeto wa Suku wa tambulula ndati elaleko liulume wa kuka, kuenda nye ceyililako?
10 Uprofeto wa tundile ko Yuda wa sukilile oku lavulula oco kaka kembiwe lulume wa kuka. Eye wa sukilile oku lipula ndoco: ‘Momo lie Yehova a tumila ungelo komunu ukuavo lolonumbi viokaliye viatiamẽla kokuange?’ Eye wa sukilile oku pula Yehova oco o situluile olonumbi viaco, pole, Ovisonehua ka vi lekisa okuti wa linga epingilo liaco. Kuenje “wa tiukila [lulume wa kuka, noke] wa lia ombolo vonjo yaye loku nyua ovava.” Yehova ka sanjukilile elinga liaco. Eci uprofeto wa kembiwa a kala oku tiukila ko Yuda, wa ñualehela lohosi vonjila kuenje yo ponda. Eye ka kuatele esulilo liwa kupange waye!—1 Olos. 13:19-25.a
11. Ongangu yipi yiwa Ahiya a tu sila?
11 Uprofeto Ahiya una wa tumiwile oku waveka Yerevoama oco a kale o soma, wamamako lekolelo toke eci a kuka. Eci Ahiya a kuka okuti wa linga omeke, Yerevoama wa tuma ukãi waye oco a kũlĩhĩse nda omõlavo o kasi oku vela o kaya. Pole, Ahiya wa popia hati, omõla wa Yerevoama o fa. (1 Olos. 14:1-18) Ahiya wa kuatavo epuluvi lioku panga onepa koku soneha Ondaka ya Suku. Wa ci linga ndati? Ulandu a soneha wa kuatisa ocitunda Esera kupange waye.—2 Asa. 9:29.
12-14. (a) Ulandu wuprofeto wa Suku u tu longisa nye? (b) Lombolola esilivilo lioku kapako ohutililo kuenda elungulo liakulu vekongelo liatiamẽla Kembimbiliya.
12 Embimbiliya ka li lombolola esunga lieci uprofeto ka pingilile ekuatiso ku Yehova osimbu ka tavele okulia loku nyua konjo yulume wa kuka. Eci hẽ ci lekisa okuti ulume waco wa sapuila uprofeto ulandu umue a sukilile oku yeva? Ulandu waco u tu longisa nye? Tu sukila oku lekisa esunguluko ku Yehova kuenda oku pokola kolonumbi viaye ndaño lovitangi.
13 Omanu vamue va siata oku tava kelungulo va tambula. Citava okuti manji umue vo likuminya upange u tateka oku kala lepata kuenda oku tẽlisa ovikele viaye vekongelo. Eye o pondola oku pinga ekuatiso kukulu wekongelo. Citava okuti ukulu waco u sapuila hati, ka kuete onumbi o wĩha yi lekisa ndomo a pondola oku kuatisa epata liaye. Noke ukulu wekongelo o sapela laye catiamẽla kovitangi a pondola oku kuata konepa yespiritu nda wa tava upange waco. Anga hẽ, ivaluka lika ovina manji o sapuila, ale o kapako elungulo liaco? Eye o sukila oku nõla onjila ya sunguluka poku kapako ovina viespiritu.
14 Tu kũlĩhĩsi ulandu ukuavo. Manji umue ukãi o pondola oku pula ukulu umue wekongelo nda citava oku siapo ulume waye okuti, Hambangiko ya Yehova. Ukulu waco u lomboluila hati, eye okuete omoko yoku nõla nda o litepa laye ale sio. Noke o konomuisa laye elungulo Liembimbiliya liatiamẽla kondaka yaco. (1 Va Kor. 7:10-16) Anga hẽ, manji yaco o tava kovina ukulu wekongelo o sapuila? Ale o nõlapo oku litepa lulume waye? Eye o sukila oku likutilila kuenda oku konomuisa elungulo Liembimbiliya osimbu ka nõlele onjila a yongola oku kuama.
Lekisa Umbombe
15. Oku lueya kuprofeto wa Suku ku tu longisa nye?
15 Oku lueya kuprofeto una wa tundile ko Yuda ku tu longisa nye? Elivulu Liolosapo 3:5 li popia hati: “Kolela Yehova lutima wove wosi. Ku ka tiamẽle kolondunge viove muẽle.” Uprofeto wa tundile ko Yuda kameleko oku pokola ku Yehova ndeci a lingile kosimbu. Pole, wa kolela kolondunge viaye muẽle. Oku lueya kuaye, kuo tuala kolofa kuenda wa vĩhisa onduko ya Suku. Ulandu waco u tu longisa esilivilo lioku lekisa umbombe kuenda ekolelo kupange wa Yehova!
16, 17. Nye ci tu kuatisa oku amamako oku kolela Yehova?
16 Ovisimĩlo viutima wetu vi pondola oku tu yapula. Ovisonehua vi lekisa okuti, “utima wa piãla kelimbi haiwo wa hongua enene.” (Yer. 17:9) Oco tu amameko loku kolela ku Yehova, tu sukila oku likolisilako oku siapo ovituwa tua kuatele kosimbu vioku litumila etu muẽle. Pole, tu sukila oku wala omunu wokaliye “una wa tungiwa lesetahãlo lia Suku lesunga kuenda oku kola.”—Tanga Va Efeso 4:22-24.
17 Elivulu Liolosapo 11:2 li popia hati: “Ambombe . . . ovo va kuete olondunge.” Oku kolela Yehova, ci tu kuatisa oku yuvula ovitangi vi nyõla ovisimĩlo vietu. (Olosap. 24:10) Pamue tu yeva ekavo kupange wa Suku, kuenje tu popia okuti tua u tẽlisa ale vokuenda kuanyamo alua, kuenda tu sima okuti, vakuetu vamisakovo lupange waco. Ale pamue tu yongola oku kuata ekalo “liwa” komuenyo. Pole, tu sukila oku ‘likolisilako’ oku ‘linga vakuambili kupange wa Ñala’ oco tu lave utima wetu.—Luka 13:24; 1 Va Kor. 15:58.
18. Nye tu sukila oku linga nda ka tu tẽla oku nõla onjila tu yongola oku kuama?
18 Olonjanja vimue, ka ca lelukile oku nõla onjila ya sunguluka tu yongola oku kuama. Anga hẽ, tua siata oku vetiyiwa lovisimĩlo viokuti, ka tu sukila ekuatiso lioku tetulula ovitangi vietu? Nda tu kuete ovisimĩlo viaco, tu sukila oku pinga ekuatiso ku Yehova. Elivulu lia Tiago 1:5, li popia hati: “Nda umue pokati kene wa kamba olondunge a pinge ku Suku, u ecaeca komanu vosi ocali.” Isietu wokilu, o pondola oku tu ĩha espiritu sandu tu sukila oco tu nõle onjila ya sunguluka.—Tanga Luka 11:9, 13.
Amamako Lekolelo
19, 20. Nye tua nõlapo oku linga?
19 Vokuenda kuotembo Salomone a pita lovitangi omo lioku yapuka vefendelo liocili, wa kapa voseteko ekolelo liafendeli va Suku. Omanu va Suku va siata oku siapo efendelo liocili omo liakulueya a litepa. Pole, va siata oku amamako lekolelo ku Yehova.
20 Oloneke viosi tua siata oku liyaka locitangi coku nõla onjila tu sukila oku kuama okuti ci kapa ekolelo lietu voseteko. Pole, tu pondola oku lekisa ekolelo lietu. Omo liaco, tu koleli Yehova lutima wa sunguluka, osimbu amamako oku sumũlũisa vana vo kolela.—2 Sam. 22:26.
[Etosi pombuelo yemẽla]
a Embimbiliya ka li lekisa nda Yehova wa yambula lolofa uprofeto wa kuka ale sio.
O Tambulula Ndati?
• Momo lie tu sukilila oku yuvula ovisimĩlo vioku sanda ovokuasi?
• Nye ci tu kuatisa oku kolela Yehova?
• Umbombe u tu kuatisa ndati oku kolela Suku?
[Elitalatu kemẽla 9]
Anga hẽ, ku tẽla oku tamalãla kayonjo?
[Elitalatu kemẽla 10]
Ove hẽ, o tava oku pokola kalungulo Embimbiliya?