Oku Kundila Pocitanda
UPOSTOLO Paulu eci a kala volupale luo Atenai, oloneke viosi wa enda oku kundila pocitanda olondaka viwa viatiamẽla ku Yesu. (Ovil. 17:17) Paulu wa nõla oku kundila pocitanda, momo opo omanu voko Atenai va enda oku lingila olomĩlu.
Tunde eci afendeli va Yehova va fetika oku kundila olondaka viwa Viusoma povitanda, papita ale ci pitahãla 2.000 kanyamo. Momo lie? Momo omanu valua, va siata oku sangiwa povitumãlo viaco. Koloneke vilo, omanu valua va siata oku landa volovenda ovina va sukila. Olombangi vimue Via Yehova, via siata oku pinga kasongui volovenda oco va kapemo utala walivulu a lombolola ovina vi sangiwa Vembimbiliya.
Vovenda yimue yinene kolupale luo Nova Jersey, kofeka yo Estados Unidos, mua kapiwa utala walivulu u kuete osapi ya linga hati: “Apata a Pondola Ndati Oku Amamako Lovituwa Viwa?” Onima yipi vamanji va siata oku tambula? Veteke limosi va eca 153 kalivulu a pongoluiwa kalimi epandu.
Eci manji umue a kala oku eca elomboluilo komunu wa lekisa onjongole, ukãi umue wa kala ocipepi lutala walivulu, wa yevelela lutate. Noke ukãi waco wa popia hati, tu sukila oku kapako ocipango ca Suku komuenyo wetu kuenda wepata lietu. Omo liaco, wa tambula alivulu ndeci: Aprenda do Grande Instrutor, Uloño Wepata Liasanjuka, kuenda Os Jovens Perguntam—Respostas Práticas.
Eteke limue kekumbi, eci ulume umue a pita ocipepi lutala walivulu oco a iñile vovenda, wa mõla elivulu losapi, Os Jovens Perguntam. Noke, manji wa limbuka okuti ulume waco wa lekisa onjongole kelivulu. Kuenje, manji wo pula hati: “Pokati kalivulu ava wa solapo limue?” Eye wa ñolapo elivulu, Os Jovens Perguntam. Noke manji wo wĩha elivulu liaco. Ulume waco wa popia hati, o kuete omãla vatatu. Osimbu vamamako lombangulo yavo, ulume wa popia hati, wa siata oku sapela ovina vimue lomãla vaye onjanja yimosi vosemana. Omãla vaye vavali vatete amalẽhe. Noke wa popia hati, o yongola oku kuatisa epata liaye lelivulu liaco. Manji wo lekisavo elivulu losapi hati, Uloño Wepata Liasanjuka. Kuenje wo sapuila hati, elivulu eli li pondola oku kuatisa epata liove poku nõla eci wu yongola oku linga. Ulume waco wa sanjukila ocisimĩlo ca manji, kuenje wa eca ombanjaile. Omo liaco, wa tava okuti manji umue u pasuisa konjo yaye.
Nye vamanji va yeva vovitima viavo, noke lioku eca uvangi vovenda? Manji umue wa popia hati: “Nda sanjukila eliangiliyo lioku kundila vovenda, momo nda kuata ovolandu alua awa!” Manji ukuavo wa popiavo hati: “Yehova o yongola okuti, olondaka viwa vi kundiwila kolonepa viosi violuali. Koloneke vilo, olondaka viwa via siata oku kuatisa omanu vakualimi a litepa, vovenda volupale luo Nova Jersey. Nda sanjuka calua omo lioku kundila vovenda yaco. Vamanji vosi va panga onepa kupange waco, va siata oku kuata esanju lialua. Kesulilo lieteke, lomue pokati ketu wa yonguile oku tunda vovenda.”
Ove hẽ, o pondola oku vokiya upange wove woku kunda olondaka viwa volonepa via litepa? Ocimãho cetu catete, oku kundila konjo lanjo. (Ovil. 20:20) Anga hẽ, o pondola oku linga eliangiliyo lioku kundila povitanda ale volovenda?