Kuama Ongangu Yekolelo Lia Itai

“A YEHOVA Suku Tõlo, ovilinga viove vinene, kuenda vi komohisa cimue. A Soma yolofeka, olonjila viove via suñama kuenda viocili. A Yehova, u ka tava oku ku sumbila loku tumbangiya onduko yove, helie?” Ocisungo eci okuti ca imbiwa kilu la vana “va yula ocinyama lociñumañuma caco,” ca situlula ocituwa ca Suku coku kala ukuacili. (Esit. 15:​2-4) Yehova o yongola okuti, afendeli vaye va kuama ongangu yaye yoku lekisa ocituwa caco.​—⁠Va Efe. 4:⁠24.

Satana Eliapu, o likolisilako lunene waye oku tepa afendeli va Suku palo posi kocisola ca Suku va kasi oku fendela. Pole, valua va siata oku kuama ongangu ya Suku yoku kala ukuacili ndaño lovitangi. Tu eca olopandu omo lioku kũlĩha okuti, Yehova o sanjukila calua ekolelo liaco! Ovisonehua vi tu kolisa hati: “Yehova o sole esunga, ka yanduluka olosandu viaye.” (Osa. 37:​28) Oco a tu kuatise oku amamako lekolelo, Vondaka yaye wa kongelamo ovolandu alua atiamẽla kovilinga viomanu vaye vakuekolelo kosimbu. Umue pokati kovolandu aco, watiamẽla ku Itai wa kala kofeka yo Giti.

‘Ocingendeleyi Haeye Omandekua’

Itai wa citiwila volupale lumue lua kemãlele calua lua va Filisiti lu tukuiwa hati, Gati, mua kala Goliata kuenda ovanyãli vakuavo a va Isareli. Ulandu wa Itai wa lomboluiwa onjanja yatete Vembimbiliya eci Avisalome a lingila usuanji Soma Daviti. Itai kuenda eci ci soka 600 kalume va Filisiti, va tilile vofeka yavo kuenje va kala ocipepi lo Yerusalãi.

Ocitangi ca Itai kuenda alume vaye, ca ivaluisa Daviti otembo a kala oku tumboka kumue lalume vaye va Isareli va soka 600 vakuavita kuenje va enda vocikanjo ca va Filisiti. Noke, va iñila vimbo lia Akisi soma yo Gati. (1 Sam. 27:​2, 3) Nye Itai lalume vaye va sukilile oku linga eci Daviti a kala oku liyaka lusuanji womõlaye Avisalome? Anga hẽ, va sukilile oku tiamẽla konele ya Avisalome, oku yuvula oku litenga vovitangi viaco, ale va sukilila oku kuatisa Daviti lalume vaye?

Kũlĩhĩsa okuti Daviti wa tila vo Yerusalãi kuenje wa pitila kocitumãlo cimue ci tukuiwa hati, Bete-Meraque, ci lomboloka okuti, ‘Onjo ya Sulako.’ Citava okuti, ocitumãlo caco oco ca sulako ko Yerusalãi oku enda Komunda yo Oliveira osimbu ka va pitile Ocimbota co Kedrone. (2 Sam. 15:​17) Daviti osimbu alume vaye va kala oku yoka, wa va kũlĩhĩsa lutate. Eye ka kale lika la va Isareli va kuekolelo, pole, wa kalavo la va Kereti, kuenda va Peleti. Handi vali, vosi va Giti kuenda Itai lasualali vaye va soka 600, va kalavo la Daviti.​—⁠2 Sam. 15:⁠18.

Daviti lesumuo lialua wa sapuila Itai hati: “Ove wendela nye letu? Tiukila. Kala la Soma [okuti Avisalome]. Momo ove ukuafeka yiñi haive wa sia onjo yove. Ove hela eli weya. Oco etali yapa ku kisika ale oku tuñayala letu osimbu ame sia kũlĩhile oko ngenda? Tiukila. Lavakuẽle vosi va ende love. Kuenje Suku a ku linge ohenda, a ku muise ocisola caye ka ci pongoloka.”​—⁠2 Sam. 15:​19, 20.

Itai wa lombolola olondaka vimue via situlula ekolelo liaye. Eye wa tambulula hati: “Ndeci Yehova a kasi lomuenyo lomo cime cange Soma, ci kale kokufa, ci kale komuenyo, haiko ñalavo ame, ame ndukuenje wove.” (2 Sam. 15:​21) Olondaka evi via ivaluisa Daviti olondaka inakulu yaye Ruti a popele. (Ruti 1:​16, 17) Daviti omo lioku vetiyiwa lolondaka via Itai wo sapuila hati: “Nda oco, pita, kuende ño” Kocimbota co Kedrone. Noke “Itai u Giti wa pita kumue lomanu vosi lomãla vosi va kala laye.”​—⁠2 Sam. 15:⁠22.

“Oku tu Longisa”

Elivulu lia va Roma 15:​4, li popia hati: “Cosi ca sonehiwa kosiahũlu ca sonehiwa oku tu longisa.” Omo liaco, tu sukila oku lipula ndoco: Ongangu ya Itai yi tu longisa nye? Konomuisa eci ca vetiya Itai oku lekisa ekolelo ku Daviti. Itai ndaño okuti wa kala ocingendeleyi haeye wa tila vofeka ya va Filisiti, pole, wa limbuka okuti Yehova eye Suku yomuenyo. Wa limbukavo okuti Daviti wa kala ombuavekua ya Yehova. Itai ka tiamisilile lika utima waye kovitangi via kala pokati ka va Isareli la va Filisiti. Eye ka tendele lika Daviti ndomunu una wa ponda ocindululu ca va Filisiti o tukuiwa hati, Goliata kuenda omanu vakuavo vo vofeka yaye. (1 Sam. 18:​6, 7) Pole, wa limbuka okuti Daviti omunu umue o sole Yehova kuenda wa limbukavo ovituwa viaye viwa. Omo liaco, Daviti wa solelevo calua Itai. Eli olio esunga lieci Daviti a ‘kapela ocitundo catatu peka lia Itai’ eci va liyaka lolohoka via Avisalome!​—⁠2 Sam. 18:⁠2.

Tu sukilavo oku likolisilako oku yuvula oku tiamisila lika utima wetu kovituwa viomanu, kepata, ale kolofeka viavo, momo ci nena olonepele. Pole, tu likolisilako oku kapako ovituwa viwa via vakuetu. Ukamba wa kala pokati ka Daviti la Itai, u lekisa okuti ukũlĩhĩso wetu kuenda ocisola tu kuetele Yehova, ci tu kuatisa oku yuvula olonepele viaco.

Osimbu tu sokolola ulandu wa Itai, tu sukila oku lipula ndoco: ‘Anga hẽ, nda siatavo oku lekisa ekolelo lia pama ku Yesu Kristu Daviti wa Velapo? Nda siata hẽ oku lekisa ekolelo poku kuata ombili kupange woku kunda Usoma kuenda oku longisa omanu oco va linge olondonge?’ (Mat. 24:14; 28:​19, 20) ‘Anga hẽ nda nõlapo oku amamako lekolelo?’

Asongui vepata va sukilavo oku sokolola ongangu yekolelo lia Itai. Ekolelo liaye ku Daviti kuenda onjongole yaye yoku kuama osoma ya wavekiwa la Suku, ya vetiya alume vaye. Onjila asongui vepata va nõla yoku kuatisa efendelo liocili, citava okuti yi nena ekalo liwa ale ovitangi viokatembo kamue. Pole, ovisonehua vi tu sapuila hati: “Ku wa pua eko [Yehova] o lilekisa okuti wa pua eko.”​—⁠Osa. 18:⁠25.

Embimbiliya ka li lombolola ovina vikuavo viatiamẽla ku Itai eci Daviti a liyaka la Avisalome. Pole, ulandu waye ndomo wa lomboluiwa Vondaka ya Suku, u tu kuatisa oku limbuka ovituwa a lekisa vokuenda kuotembo yohali ya Daviti. Yehova poku ecelela okuti ulandu wa Itai u sonehiwa Vembimbiliya, wa lekisa okuti wa kapako ekolelo liaye, kuenda oka sumũlũisa elinga liaye.​—⁠Va Hev. 6:10.