Koku Vumba Suku ka ku Kuete Utunga
Kolupale luo Malaga kombuelo yofeka yo Espanya, ukãi umue lomõlaye okuti kavali kavo va kuete onduko ya Ana, va papatisiwa keteke 19, ya Cembanina kunyamo wo 2009. Ovo va kala pokati keci ci soka 2.352 komanu va papatisiwa kunyamo wo 2009, kofeka yo Espanya. Eci ca litepa lika pokati konjali lomõlaye, alima avo. Inaco wa kuata 107 kanyamo kuenda omõla wa kuata 83 kanyamo!
Nye ca va vetiya oku papatisiwa ndocindekaise celitumbiko liavo ku Yehova? Vokuenda kunyamo wo 1970, omunu umue wa lisunguile lavo, wa laleka Ana omõlaco, Kelilongiso Lielivulu Vekongelo lia lingawaila konjo ya umue Ombangi ya Yehova. Olonjanja vimue, Ana wa endaele kelilongiso liaco. Pole, omo liupange waye, ka lingile apongoloko lonjanga.
Vokuenda kuanyamo ekũi, omãla va Ana okuti olonekulu via Ana onjali, va fetika oku lilongisa Embimbiliya kuenje va linga afendeli va Yehova. Umue pokati kolonekulu viaco, o tukuiwa hati Mari Carmen, wa fetika oku vetiya inaye oku sola ocili ca Suku kuenda wo kuatisa oku lilongisa Embimbiliya. Noke inakulu ya Mari Carmen, Ana inaco wa fetikavo oku lilongisa Embimbiliya. Vokuenda kuotembo, ci soka ekũi komanu vakuepata liaye va papatisiwa.
Eteke Ana la inaye va papatisiwa va yeva esanju liocili. Ana una o kuete 107 kanyamo, wa popia hati: “Yehova wa ndingila eci ciwa omo wa ecelela okuti ndu u kũlĩha.” Ana omõla, wa popiavo hati: “Ndi yongola oku vumba Yehova osimbu Oluali Luokaliye ka lueyile, kuenda ndi likolisilako oku linga ocipango caye, poku litumbika kupange woku kunda esapulo liwa.”
Ovimbumba evi, kavali kavio va siata oku kuata esanju liocili poku enda kolohongele. Ukulu umue wekongelo, wa popia hati: “Ovo ka va siatele oku kambela kolohongele. Kuenda va likolisilako oku eca atambululo kelilongiso Liutala Wondavululi.”
Ekolelo liavo li tu ivaluisa ukãi umue ocimbumba o tukuiwavo hati Ana, ‘wa fendela ño-o uteke lutanya loku likandangiya okulia loku likutilaila.’ Kuenje wa kuata esumũlũho lioku mola Yesu eci a citiwa. (Luka 2:36-38) Ndaño okuti Ana wa tẽlisile ale 84 kanyamo, ka litendele ndu wa kuka okuti, ka tẽla vali oku vumba Yehova, kuendavo va sando yaye vo koloneke vilo, ka va litendivo okuti omo va kuka calua ka va tẽla vali oku fendela Suku.
Anga hẽ o kuete vangandiove va sukila oku yeva esapulo Liembimbiliya? Eci enda kupange woku kunda, wa siata hẽ oku sanga omunu wa kuka konjo yaye okuti o kuete onjongole yoku yeva olondaka viwa? Omunu waco o pondola oku kuata esanju ndeli lia vamanji Ana va tukuiwa vulandu ulo, okuti ndaño akulu, ka va litendele ndu va kuka calua okuti, ka va tẽla vali oku vumba Suku yocili, Yehova.
[Elitalatu kemẽla 25]
“Yehova wa ndingila eci ciwa”
[Elitalatu kemẽla 25]
“Ndi yongola oku vumba Yehova osimbu Oluali luokaliye ka lueyile”