AMALẼHE VA PULA
Nye Ndi Linga Nda Ekamba Liange Lia Ndi Sumuisa?
Ceci ove o sukila oku kũlĩha
Ka kuli ukamba umue okuti ka muli ovitangi. Osimbu tu kasi vekalo ka lialipuile, ekamba liove, ndaño muẽle ekamba lina wa tenda okuti olio lia velapo, li pondola oku popia ale oku linga ovina vi ku sumuisa. Pole, kũlĩha okuti, ove kua lipuilevo. Ange hẽ, kua la sumuisavo omunu umue?—Tiago 3:2.
Ovina o tala vo Internet vi pondola oku ku sumuisa. Ndeci, umalẽhe umue o tukuiwa okuti Daviti wa popia hati: “Ove o kasi oku tala vo Internet noke o mola alitalatu ekamba liove o kasi kocipito cimue, noke o fetika oku lipula esunga lieci ka ku lalekelele kocipito caco. Kuenje o sumua.”
O pondola oku lilongisa oku yula ocitangi caco.
Ceci ove o sukila oku linga
Likonomuisa ove muẽle. Embimbiliya li popia ndoco: “Ku ka teme lonjanga, momo oku tema kua tunga volonũlo viaveke.”—Ukundi 7:9, etosi.
“Ove pamue o limbuka okuti ocina ca ku temisa, ka ci kuete esilivilo.”—Alyssa.
Apulilo oku sokolola: Ange hẽ ukuakutema lonjanga? Nye o sima catiamẽla koku likolisilako oku kala ukuepandi la vakuene?—Ukundi 7:21, 22.
Sokolola konima yi yilila koku ecela. Embimbiliya li popia ndoco: “Ca posoka . . . oku yuvula oku kapako ekandu.”—Olosapo 19:11.
“Ndaño okuti ove o kuete esunga, ciwa oku ecela. Nda wa ci linga, o yuvula oku sokolola kovina via pita kuenda ku koki okuti ukuene o livetela evelo otembo yosi. Ekandu liosi lia eceliwa, lia eceliwa muẽle.”—Mallory.
Apulilo oku sokolola: Anga hẽ ocitangi caco ci nene calua? Anga ca tĩla calua oku ecela oco tu amameko lombembua?—Va Kolosai 3:13.
Ukamba u kasi ndohondo yimue muli owuya keteke liombambi. Nda olonjanja viosi o vangula catiamẽla kocitangi cimue o kuete, ci kasi ndu okuti o kasi oku yulula epito oco mu iñile ofela yatalala.
Sokolola ndu okuti ove walueya. Embimbiliya li popia ndoco: “Ko ka sokololi lika ovina viene muẽle, pole, sokololivo ovina via vakuene.”—Va Filipoi 2:4.
“Nda vukamba wene vu lekisa ocisola kuenda esumbilo, ovitangi vi potoluiwa lonjanga. Momo o yongola oku likolisilako oku pamisa ukamba waco oco ka u ka nyõlehe.”—Nicole.
Epulilo lioku sokolola: Anga hẽ ku yongola oku sanda onjila yoku ecela ukuene?—Va Filipoi 2:3.
Olondaka vioku malusula: Oku lekisa ocituwa ca sungulula eci va ku sumuisa, ci ka ku kuatisa calua kovaso yoloneke. Nye o sima catiamẽla koku lilongisa oku lekisa ocituwa caco cilo?