Esapulo 85
Yesu wa Citiwila Vocimanga
OÑAÑA eyi wa yi kũlĩha? Onduko yaye, Yesu. Eye ndopo a citiwila vocimanga. Ocimanga ocitumãlo cimue mua siata oku kapiwa ovinyama. Maria o kasi oku pekelisa Yesu pocililo covinyama. Momo lie Maria la Yosefe va kasilili kumosi lovinyama? Eci hẽ ocitumãloko cimue ca sunguluka coku citila oñaña?
Ocili okuti hacoko. Tu kũlĩhisi esunga lieci ovo va kasilili pocitumãlo eci. Soma yoko Roma, Augusto, wa ecele ocihandeleko cokuti omanu vosi va tiukila kofeka va citiwila oco vaka lisonehise. Vimbo lio Beteleme omo Yosefe a citiwila. Eci Yosefe la Maria va pitĩla ko Beteleme, ka kua kaile vali ohondo va sikĩla. Omo liaco, ovo va iñila vocimanga eci covinyama. Kuenje veteke liaco, haico Maria a cita Yesu. Pole, ndomo o cilete, Yesu okasi ciwa.
O lete ovangombo va kasi okuiya oku tala Yesu? Ovo va kala vusenge luteke oku lisa olomeme eci ocinyi cimue ca va tuila. Ocinyi caco ca kala ungelo! Ovangombo va yokokele calua. Pole, ungelo wa popia lavo hati: ‘Koka yokoki, momo ndu sapuili ondaka yiwa yesanju. Etaili, vimbo lio Beteleme muo citiwili Kristu Ñala. Eye oka yovola omanu! Vu ka sanga oñaña ya muñiwa ponanga okuti ya pekela pocililo colongombe.’ Noke kueya ovangelo valua va sivaya Suku. Ovangombo va lupukila oku ka sandiliya Yesu, kuenje vo sanga.
Ove wa kũlĩha esunga lieci Yesu a kalela oñaña yimue yilikasi? Wa kũlĩha oku eye a tundile? Ivaluluka okuti kefetikilo lielivulu lilo tua vangula eci catiamẽla Komõla uveli wa Suku. Omõlaco wa talavaya la Yehova oku lulika ilu losi kuenda ovina viosi vikuavo. Omõlaco, Yesu.
Yehova wa sondoluila omuenyo Womõlaye vimo lia Maria. Noke oñaña ya fetika oku kula ndeci oloñaña vikuavo via siata oku kulila vimo liolonjali viavo. Pole, oñaña yaco eyi Omõla a Suku. Noke Yesu wa citiwila vocimanga eci, vimbo lio Beteleme. O lete esunga lieci ovangelo va sanjukilile poku sapula komanu oku citiwa kua Yesu?