Ovangelo va Sapula Oku Citiwa Kua Yesu

Ombiali yo ko Roma, Kaisare Augustu, ya handeleka okuti va Yudea vosi va tiukila kovaimbo avo oco va lisonehise. Kuenje Yosefe la Maria va linga ungende woku enda ko Beteleme, kuna epata lia Yosefe lia tunda. Otembo ya Maria yoku cita oñaña ya kala ocipepi.

Eci va pĩtila ko Beteleme, ocitumãlo va ponduile oku sanga oco va kalemo, ocimanga covinyama. Vocitumãlo caco, omo Maria a citila omõlaye Yesu. Eye wo muñila polonanga kuenje wo pekelisa lutate vocimanga.

Ocipepi lo Beteleme, angombo vamue va kala oku pita uteke posamua, oku lava oviunda viavo. Vocipikipiki, kua molẽha ungelo umue kovaso avo kuenje ovo va ñualiwa locinyi culamba wa Yehova. Angombo va kala lusumba walua, pole, ungelo wa va sapuila hati: ‘Ko ka kuati usumba. Ame ndi kuete esapulo liwa. Mesiya wa citiwa etaili ko Beteleme.’ Vepuluvi liaco, kilu kua molẽha ovangelo valua, va popia vati: ‘Ulamba ku Suku kilu kuenda ombembua posi.’ Noke ovangelo va enda. Nye angombo va linga?

Angombo va fetika oku livanguisa omunu lukuavo vati: ‘Cilo muẽle tuendi ko Beteleme.’ Ovo va enda lonjanga kuenje va sanga Yosefe la Maria vocimanga loñaña ya citiwa.

Omanu vosi vana okuti va yeva ovina ungelo a sapuila angombo, va komõha. Maria wa sokolola calua kolondaka viungelo kuenda lalimue eteke a ivalele ovina viaco. Angombo va tiukila koviunda viavo, loku pandula Yehova omo liovina viosi ovo va mola levi va yeva.