Pi Yesu A Citiwila Kuenda Otembo Yipi?

Ombiali yo ko Roma Kaisare Augustu, o handeleka okuti, omanu vosi va sukila oku lisonehisa. Kuenje Yosefe la Maria va sukila oku enda ko Beteleme kimbo va citiwila okuti, li kasi kombuelo yo Yerusalãi.

Omo liaco, vo Beteleme mueyuka omanu valua veya oku lisonehisa. Kua kala lika ocitumãlo cimosi Yosefe la Maria va sanga okuti, vocimanga covimbulu kuenda covinyama vikuavo. Yesu omo a citiwila. Maria o muña Yesu polonanga kuenda u pekelisa pocililo okuti, ocitumãlo va siata oku kapa okulia kuovinyama.

Citava okuti, Suku eye wa vetiya Kaisare Augustu oku eca ocihandeleko coku lisonehisa. Momo lie? Momo ca ecelela okuti Yesu o citiwa vo Beteleme, vimbo lia kukululu yaye Soma Daviti. Ovisonehua via popele ale okuti, vimbo liaco omo mua laikele oku citiwa Osoma ya likuminyiwa.—Mika 5:2.

Owu uteke umue u kuete esilivilo lia velapo! Ocinyi cimue ci tuila kocimunga covangombo va kala vusenge. Ocinyi caco, ulamba wa Yehova! Umue pokati kovangelo va Suku o sapuila ovangombo hati: “Ko ka kuati usumba, momo ndu sapuili ondaka yiwa yesanju omanu vosi va ka kuata. Momo etaili volupale lua Daviti muo citiwili onjovoli okuti Kristu Ñala. Ondimbukiso vu mola yeyi: Vu ka sanga oñaña ya muñiwa polonanga kuenda ya langekiwa vocimanga.” Vocipikipiki ku mõleha ovangelo valua kuenje va popia vati: “Ulamba kilu ku Suku kuenda kilu lieve ombembua pokati komanu va taviwa laye.”—Luka 2:10-14.

Kuenje eci ovangelo va tiukila, angombo va fetika oku sapela omunu lukuavo vati: “Tuendi ko Beteleme oku tala eci ci kasi oku pitako okuti oco Yehova a tu situluila.” (Luka 2:15) Ovo va enda lonjanga oku sandiliya oñaña ya citiwa ndopo, kuenje va sanga Yesu, pocitumãlo ungelo a popia okuti, opo va laikele oku u sanga. Eci angombo va lombolola ovina ungelo a va sapuila omanu vosi va yeva kondaka yaco, va komõha. Maria o patekela asapulo aco osi, kuenje o fetika oku a sokolola.

Koloneke vilo, omanu valua va tava okuti, Yesu wa citiwa keteke 25 ya Cembanima. Pole, kosãi yaco ko Beteleme ombela yi loka calua, ku linga ombambi yalua kuenda pamue ku linga ocikokoto. Kotembo yaco angombo ka va endaile oku kala loviunda viavo vusenge kuteke. Handi vali, omo okuti omanu ka va sanjukilile uviali wo ko Roma kuenda otembo yaco ku loka ocikokoto, nguluvulu yaco nda ka kisikile omanu oku linga ungende umue unene oco va ka lisonehise. Ovolandu a lekisa okuti, Yesu pamue wa citiwa kosãi ya Mbalavipembe.