Ove Hẽ O Kasi Oku Kuama Ciwa Kristu?
‘Ndomo ca sunguluka oku endaenda amamiko loku ci linga.’—1 VA TES. 4:1.
1, 2. (a) Ovina vipi vi komõhisa omanu vo koloneke via Yesu va mola? (b) Momo lie tu popela tuti tu kasivo koloneke vi kuete esilivilo?
ETEKE limue wa sokoluile ale esumũlũho nda wa kuata nda wa kaile komuenyo eci Yesu a kala palo posi? Nda wa sakuiwa la Yesu okuti ku yevi olungembia laumue ketimba liove. Esunga likuavo nda wa sanjukilila oku mola loku yeva Yesu lieli okuti, nda wa lilongisila kokuaye loku tala ndomo a linga ovikomo vimue. (Mar. 4:1, 2; Luka 5:3-9; 9:11) Hesanjukuolio nda wa yeva poku mola Yesu oku linga ovikomo viaco! (Luka 19:37) Tunde opo, lomue vali wa mola ovikomo viaco lovina Yesu a linga eci a kala palo posi “poku lilumba eye muele,” kuenda lalimue eteke ci ka lingiwa vali.—Va Hev. 9:26; Yoa. 14:19.
2 Etu tu kasivo koloneke vi kuete esilivilo lialua. Momo lie? Momo Ovisonehua vi lekisa okuti tu kasi “kotembo yesulilo” kuenda “koloneke via sulako.” (Dan. 12:1-4, 9; 2 Tim. 3:1) Satana wa tundisiwa kilu vokuenda kuotembo yaco. Eye o ka kutiwa loku imbiwa “vonjembo.” (Esit. 12:7-9, 12; 20:1-3) Handi vokuenda kuotembo yaco, tu kuete esanju lioku kundila omanu ‘olondaka viwa’ koluali luosi, loku va sapuila elavoko Lioluali luokaliye, kuenda upange waco ka u ka lingiwa vali.—Mat. 24:14.
3. Osimbu Yesu ka londele kilu, wa tuma olondonge viaye oku linga nye, kuenda nye ca kongelele vocikele caco?
3 Yesu osimbu ka londele kilu wa sapuila olondonge viaye hati: “Vu linga olombangi viange vo Yerusalãi, lo vo Yudea yosi, lo vo Samária, kuenda toke kasulilo okilu lieve.” (Ovil. 1:8) Vupange waco mua kongela oku longisa omanu koluali luosi. Locimãho cipi? Oco va linge olondonge via Kristu osimbu esulilo ka lieyile. (Mat. 28:19, 20) Nye tu sukila oku linga oco tu tẽlise ciwa ocikele tua tambula ku Kristu?
4. (a) Ovina vipi Petulu a tukula okuti ovio tu kuete oku linga vi sangiwa kelivulu lia 2 Petulu 3:11, 12? (b) Kovina vipi tu sukila oku lavulula?
4 Kũlĩhisa olondaka viupostolo Petulu eci a popia hati: “Co sesameli okuti, kovimuenyo viene vu kola kuenje vu sumbila Suku. Vu kala ndomo osimbu vu lavoka loku yayuisa etukuluko lieteke lia Suku.” (2 Pet. 3:11, 12) Olondaka via Petulu vi tu vetiya oku lavulula vokuenda kuoloneke vilo via sulako, kuenda oku kũlĩhisa nda ovina tu linga vi sanjuisa Suku. Vovina viaco, mua kongela oku kunda olondaka viwa. Tu kuete esanju lialua poku mola ombili vamanji voluali luosi va siata oku lekisa oco va tẽlise ocikundi va tambula ku Kristu coku kunda olondaka viwa! Handi vali, tu sukilavo oku likolisilako oco asakalalo oluali lua Satana lolonjongole vietimba ka vi ka tepulule ombili tu kuete kupange wa Suku. Tu konomuisi ndomo tu limbuka nda tu kasi oku kuama Kristu ale sio.
Sanjukila Ovikele wa Tambula ku Suku
5, 6. (a) Nye ca vetiya Paulu oku pandiya vamanji ko Yerusalãi, kuenda elungulo lipi a va ĩha? (b) Momo lie tu sukila oku yuvula oku tata leselula ovikele vietu?
5 Vukanda upostolo Paulu a sonehela Akristão vo ko Yerusalãi, wa pandiya vamanji omo liekolelo va lekisa ndaño lalambalalo. Eye wa popia hati: “Ivaluki oloneke viokonyima, ndomo wa pandikisi pokati kohali eci ocinyi co tuili.” Ocili okuti, Yehova ivaluka ekolelo liafendeli vaye. (Va Hev. 6:10; 10:32-34) Olondaka via Paulu via vetiya calua Akristão va vangula elimi lio Heveru. Vukanda waco, Paulu wa tukulavo ocina cimue ci pondola oku tepulula ombili kupange wa Suku. Eye wa sapuila Akristão oco va yuvule oku “pukula” oku kuama olonumbi via Suku.—Va Hev. 12:25.
6 Elungulo liaco lioku yuvula oku “pukula” oku sanjukila ovikele tua tambula ku Suku, li tiamisiwilavo Kakristão vo koloneke vilo. Etu Tuakristão tu sukila oku yuvula oku tata leselula ovikele vietu kuenda ka tu ka eceleli okuti ombili yetu kupange wa Suku yi tepuluka. (Va Hev. 10:39) Momo voku linga upange u kola, mua kongela omuenyo kuenda olofa.—1 Tim. 4:16.
7, 8. (a) Nye ci tu kuatisa oku amamako lombili kupange wa Suku? (b) Nye tu sukila oku ivaluka catiamẽla ku Yehova kumue la Yesu nda tua limbuka okuti ombili yetu ya tepuluka?
7 Nye ci tu kuatisa oku yuvula oku tata leselula ovikele tua tambula ku Suku? Ocina cimue ci tu kuatisa oku yula ocituwa caco, oku sokolola olonjanja viosi kesilivilo liohuminyo yelitumbiko tua linga. Tua likuminya ku Yehova okuti tu ka pitisa kovaso oku linga ocipango caye komuenyo wetu, kuenda tu yongola oku tẽlisa ohuminyo yaco. (Tanga Mateo 16:24.) Omo liaco, lipula ndoco: ‘Handi ñuete hẽ onjongole yoku tẽlisa elitumbiko liange ku Suku, lina nda linga eci nda papatisiwa? Ale ombili nda kuatele kanyamo a pita ya tepuluka?’
8 Nda tua limbuka okuti ombili tua kuatele tete yi kasi oku tepuluka, tu sukila oku ivaluka olondaka viuprofeto Sofoniya. Eye wa popia hati: “Ovaka ove ka a kaleñele. Yehova Suku yene o kasi vokati kove; eye okuonene woku ku muisa eyulo. O ku sanjukila lonjolela.” (Sof. 3:16, 17) Olondaka evi via tiamisiwile tete ku va Isareli kosimbu, vana va tiukila ko Yerusalãi eci va yovuiwa kumandekua ko Bavulono. Olondaka viaco, vi kuetevo esilivilo kafendeli va Suku vo koloneke vilo. Omo upange tu kasi oku linga wa Yehova, tu sukila oku ivaluka okuti Yehova Lomõlaye va tu kuatisa kuenda va tu pamisa oco tu tẽlise ovikele tua tambula. (Mat. 28:20; Va Fil. 4:13) Nda tua likolisilako oku lekisa ombili kupange wa Suku, eye o ka tu sumũlũisa loku tu kuatisa oco tu kule kespiritu.
‘Sandiliya Tete Usoma’ Lombili
9, 10. Etosi lipi Yesu a tukula volusapo luofesta yinene, kuenda nye tu lilongisilako?
9 Yesu osimbu a kala oku lia onanya konjo yu Fariseo, wa ta olusapo luofesta yinene. Volusapo luaco, wa lombolola apuluvi a litepa a eciwa komanu vo kocita catete coku iñila Vusoma wo kilu. Eye wa tukulavo elomboloko liondaka oku “pukula.” (Tanga Luka 14:16-21.) Volusapo lua Yesu, omanu va lalekiwa va pukula oku enda kofesta. Umue pokati kavo wa yonguile oku ka tala epia a landa. Ukuavo omo a landa olongombe, wa yonguile oku vi kũlĩhisa. Handi ukuavo wa popia hati: ‘Nda kuela, si tẽla oku iya.’ Atatẽlo aco a kala wuhembi. Osimbu omunu ka landele epia limue ale olongombe, o vi kũlĩhisa tete, kuenje, ka kua kaile esunga lioku vi kũlĩhisa noke lioku vi landa. Momo lie omunu wa kuela ndopo ka tavelele kelaleko lina lia kuatele esilivilo lia velapo? Ocili okuti, muẽleanjo wa tukuiwa volusapo, wa temele calua!
10 Afendeli vosi va Suku va pondola oku upa esilivilo kolusapo lua Yesu. Eci ci lomboloka nye? Ka tu ka eceleli oku pitisa kovaso ovitangi vietu muẽle ndevi via tukuiwa volusapo lua Yesu, kuenje upange tu lingila Suku u kala konyima. Nda Ukristão o sakalala vali lovitangi viaye muẽle, ombili yaye kupange woku kunda yi tepuluka. (Tanga Luka 8:14.) Oco ka tu ka pite lovitangi viaco, tu kapiko elungulo lia Yesu liokuti: “Tete vanjiliyi usoma waye kuenda esunga liaye, kuenje ovina evi viosi viu vokiyiwi.” (Mat. 6:33) Ci tu ĩha esanju lialua oku mola afendeli va Suku, ci kale amalẽhe lakulu ndomo va pokola kelungulo eli! Vamue pokati kavo va nõlapo oku leluisa omuenyo wavo oco va vokiye upange wavo woku kunda. Ovo va limbuka okuti oku sandiliya tete usoma lombili, ci nena esanju liocili kuenda asumũlũho.
11. Ulandu upi Wembimbiliya u lekisa esilivilo lioku linga upange wa Suku lombili kuenda lutima wosi?
11 Oco tu limbuke esilivilo lioku lekisa ombili kupange wa Suku, tu konomuisi ulandu wa pita la Soma Yehoasi wo ko Isareli. Omo okuti va Suria va yonguile oku yula va Isareli, Yehoasi wa lisĩosũila Elisia. Uprofeto Elisia wo tuma oku imba usongo oku upisa konjanela oco wende kofeka ya va Suria, ci lekisa okuti Yehova eye wa laikele oku yula ofeka yaco. Olondaka evi via pamisa soma. Elisia noke wa tuma Yehoasi oku veta posi lovisongo. Pole, Yehoasi wa veta lika posi olonjanja vitatu. Elisia wa tema laye, momo nda wa vetele posi olonjanja vitãlo ale epandu “nda wa yulavo va Suria toke o va malusulapo.” Kuenje Yehoasi wa laikele lika oku yula olonjanja vitatu. Omo liekambo liombili, Yehoasi ka kuatele onima otembo yalua. (2 Olos. 13:14-19) Nye tu lilongisila kulandu owu? Yehova o tu sumũlũisa lika nda tua linga upange waye lutima wosi kuenda lombili.
12. (a) Nye ci ka tu kuatisa oku amamako lombili kupange wa Suku ndaño lovitangi tu liyaka lavio? (b) Lombolola onima iyilila koku amamako kupange woku kunda.
12 Ovitangi viomuenyo vi kapa voseteko ekolelo lietu kuenda ombili tu kuete kupange wa Suku. Vamanji valua va siata oku pita locitangi cekambo liolombongo. Vakuavo va sumua omo lioku vela, momo ka ci va ecelela oku talavaya calua kupange wa Yehova. Omunu lomunu pokati ketu, o sukila oku li kũlĩhisa nda o kasi oku amamako lombili kuenda oku kuama ciwa Kristu. Konomuisa olonumbi vimue kuenda ovisonehua vi sangiwa vokakasia losapi hati: “Nye ci ku Kuatisa Oku Kuama Kristu?” Kũlĩhisa ndomo o pondola oku kuatisiwa lolonumbi viaco. Nda wa ci linga, o ka tambula asumũlũho alua. Oku amamako kupange woku kunda ci pamisa omuenyo wetu kuenda ci nena ombembua lesanju. (1 Va Kor. 15:58) Oku linga upange wa Suku lutima wosi, ci tu kuatisa oku “lavoka loku yayuisa etukuluko lieteke lia [Yehova].”—2 Pet. 3:12.
Kũlĩhĩsa Ciwa Ekalo Liove
13. Tu limbuka ndati eci ci lomboloka kokuetu oku linga upange wa Suku lutima wosi?
13 Tu ivaluki okuti voku linga upange lutima wosi, ka mua kongelele lika otembo tu pesela koku kunda. Omunu lomunu o kuete ekalo lia litepa. Nda ukundi umue o pesela lika owola yimosi ale vivali kupange woku kunda omo lioku vela, Yehova o sanjuka calua. (Ci sokisa la Marko 12:41-44.) Oco tu limbuke eci ci lomboloka kokuetu oku lingila Suku upange wutima wosi, tu sukila oku kũlĩhisa ekalo lietu loku loñoloha kuetu. Omo okuti tulondonge via Kristu, tu yongola oku kuata ovisimĩlo ndevi viaye. (Tanga Va Roma 15:5; 1 Va Kor. 2:16) Ocina cipi Yesu a velisilepo vali vomuenyo waye? Eye wa sapuila owiñi wo Kafarnau hati: “Ñuete ocikundi coku kundila ondaka yiwa yusoma wa Suku vovaimbo akuavo, momo eci oco nda tumilua.” (Luka 4:43; Yoa. 18:37) Noke lioku sokolola ombili Yesu a lekisa koku kunda, kũlĩhisa ekalo liove nda o pondola oku vokiya upange wove woku kunda.—1 Va Kor. 11:1.
14. Tu vokiya ndati upange wetu woku kunda?
14 Oku konomuisa ekalo lietu ci tu kuatisa oku limbuka nda tu pondola oku vokiya otembo yetu kupange woku kunda. (Mat. 9:37, 38) Olohuluwa viamalẽhe va mala oku tanga kosikola, omo liombili, va siata oku pesela otembo yalua koku kunda loku litumbika kupange wakundi votembo yosi, kuenje eci ci va nenela esanju lialua. Ove hẽ o yongola oku kuatavo esanju liaco? Vamanji vamue alume lakãi, va konomuisa ekalo liavo kuenje va ilukila kovaimbo amue vofeka yavo, ale kolofeka vikuavo, kuna kuli ekambo liakundi Vusoma. Vakuavo va lilongisa alimi o kolofeka vikuavo oco va kuatise ovingendeleyi. Ndaño okuti voku vokiya upange woku kunda mua kongela ovitangi, pole ci nena asumũlũho alua kuenda tu kuatisa omanu ‘oku iya kukũlĩhiso wocili.’—1 Tim. 2:3, 4; 2 Va Kor. 9:6.
Ongangu tu Sukila Oku Kuama
15, 16. Ongangu ya velie tu pondola oku kuama poku lekisa ombili ndolondonge via Kristu?
15 Omanu vamue veya oku linga ovapostolo va tambulula ndati kelaleko lia Kristu lioku kala olondonge viaye? Ulandu wa Mateo u tu sapuila ndoco: “Oku votoka wa sia cosi, wo kuama.” (Luka 5:27, 28) Catiamẽla ku Petulu la Andeleu, okuti va kala anyanga volõsi, tu tangako hati: “Haico va sia awanda avo kuenje vo kuama.” Noke Yesu wa mola Tiago la Yoano va kala kumue la isiavo oku pamela awanda avo. Va tambulula ndati kelaleko lia Yesu? “Va sia owato kuenda isiavo kuenje vo kuama.”—Mat. 4:18-22.
16 Ongangu yikuavo, ya Saulu una weya oku kala upostolo Paulu. Eye ndaño wa enda oku lambalala olondonge via Kristu, wa pongolola ekalo liaye kuenje wa “linga ocikuata” coku kundila onduko ya Kristu. “Haico muẽle a kundila Yesu volosunangonga okuti eye Mõla a Suku.” (Ovil. 9:3-22) Paulu wa amamako oku lekisa ombili ndaño lalambalalo.—2 Va Kor. 11:23-29; 12:15.
17. (a) Ocimãho cipi ove o kuete catiamẽla koku kuama Kristu? (b) Asumũlũho api tu kuete omo lioku linga ocipango ca Yehova lutima wosi longusu yetu yosi?
17 Etu tu yongola oku kuama ongangu yolondonge via Kristu yoku tava lonjanga kelaleko lioku linga oloñame viaye. (Va Hev. 6:11, 12) Asumũlũho api tu tambula osimbu tu likolisilako oku lekisa ombili poku kuama Kristu? Ci tu sanjuisa calua oku linga ocipango ca Suku loku tẽlisa ovikele vikuavo vekongelo. (Osa. 40:8; tanga 1 Va Tesalonike 4:1.) Nda tua likolisilako oku kuama Kristu, tu ka kuata ombembua yo vutima, esanju, oku taviwa la Suku, kuenda elavoko liomuenyo ko pui.—1 Tim. 4:10.
Ivaluka Eci Tua Lilongisa?
• Upange upi tua tambula, kuenda tu tenda ndati ocikundi caco?
• Ocituwa cipi tu sukila oku nyehula kuenda momo lie?
• Nye tu sukila oku linga oco tu kũlĩhise ekalo lietu?
• Nye ci ka tu kuatisa oku kuama Kristu?
[Okakasia kemẽla 27]
Nye ci ku Kuatisa Oku Kuama Kristu?
[Okakasia vielitalatu kemẽla 27]
▪ Tanga Ondaka ya Suku eteke leteke, kuenda sokolola ovina wa tanga.—Osa. 1:1-3; 1 Tim. 4:15.
▪ Poku likutilila, pinga ekuatiso liespiritu lia Suku oco li ku songuile.—Sak. 4:6; Luka 11:9, 13.
▪ Kuata ukamba lomanu va lekisa ombili kupange woku kunda.—Olosap. 13:20; Va Hev. 10:24, 25.
▪ Limbuka lonjanga otembo tu kasi.—Va Efe. 5:15, 16.
▪ Kũlĩhisa ovitangi vi iyilila koku “pukula.”—Luka 9:59-62.
▪ Olonjanja viosi sokolola kohuminyo yelitumbiko wa linga kuenda kasumũlũho eyilila koku vumba Yehova kuenda oku kuama Kristu lutima wosi.—Osa. 116:12-14; 133:3; Olosap. 10:22.