Ondaka Yimue ka ya Lelukile Oku Kuata Elomboloko Liaco

OMANU va kuete ovisimĩlo via litepa viatiamẽla komuenyo kuenda kolofa. Vamue va sima okuti noke yolofa vamamako lomuenyo kocitumãlo cikuavo. Vakuavo va sima okuti va ka citiwa evali oco va kuate omuenyo umue ukuavo. Handi vali, omanu vakuavo va sima okuti olofa esulilo liovina viosi.

Citava okuti ove o kuete ocisimĩlo cikuavo catiamẽla kondaka yaco, omo liovituwa viofeka wa citiwila ale vepata wa kulila. Tu pondola oku limbuka okuti eyi ondaka yimue ka ya lelukile oku kuata elomboloko kuenda omanu va kuete ovisimĩlo via litepa viatiamẽla kolofa. Anga hẽ kuli etambululo liocili halio lia koleliwa catiamẽla kondaka yaco?

Vokuenda kuanyamo alua, asongui vatavo va siata oku longisa okuti omunu o kuete ocilelembia ka ci fi. Omanu va kasi vatavo ndeci: Akristão, va Hindu, va Yudea, va Musulumanu kuenda vatavo akuavo, va tava okuti omunu o kuete ocilelembia ka ci fi kuenda eci tu fa, oco ca amamako lomuenyo kilu. Vakuetavo lio Budismu va tava okuti noke lioku fa omunu o citiwa olonjanja vialua toke eci a kuata ombembua kuenda ekalo liwa li tukuiwa hati, Nirvana.

Omo lialongiso aco, omanu valua voluali luosi va sima okuti olofa vi ecelala okuti omunu o kuata omuenyo kocitumãlo cikuavo. Omanu valua va sima okuti olofa ocina cimue ci kuete esilivilo komuenyo womanu kuenda Suku o yongola okuti, omanu va fa. Pole, nye Embimbiliya li popia catiamẽla kondaka yaco? Tanga ocipama cikuãimo. O pondola oku komõha poku kũlĩha etambululo liaco.