Oku Eca Okokanda Kelaleko

1. Upange woku laleka omanu oku enda kohongele yofeka u ka fetika otembo yipi?

¹ Nda wa linga esokiyo lioku eca ondalelo yimue kepata ale kakamba vove, o sukila oku likolisilako oku lipongiya ciwa oco o tambule omanu wa laleka. Cimuamue haico okuti, kua siata oku lingiwa upange walua oco ku pongiyiwe okulia kuespiritu u ka eciwa kohongele yofeka yi laika oku lingiwa. Eci ku kamba olosemana vitatu oco ohongele yi lingiwe, Yehova wa tu ĩha esumũluho lioku laleka omanu oco tu kale pamosi kohongele yaco. Nye ci ka tu kuatisa oku eca otuikanda tuoku laleka omanu?

2. Nye ci ka tu vetiya oku panga onepa kupange woku laleka omanu oku enda kohongele yofeka?

² Vosi yetu tu ka vetiyiwa oku panga onepa kupange waco, nda tua sokolola lutate ndomo tu kuatisiwa lolonumbi Yehova a siata oku tu ĩha kolohongele viofeka. (Isa. 65:13, 14) Tu pondolavo oku limbuka okuti upange tu linga anyamo osi wa siata oku eca onima yiwa. (Tanga vokakasia losapi hati: “Eci Ceca Onima.”) Ocili okuti omanu vamue tu ka laleka va ka enda kohongele yofeka, pole vakuavo ka va ka kala letu. Ndaño okuti omanu tu laleka ka va endi vosi kohongele yaco, pole, alikolisilo tu linga vokuenda kupange waco a eca esivayo ku Yehova kuenda ci tu kuatisa oku limbuka ohenda yaye.—Osa. 145:3, 7; Esit. 22:17.

3. Tu pondola ndati oku eca otuikanda tuelaleko?

³ Akulu vekongelo va ka linga esokiyo ndomo ovikanda vielaleko vi ka eciwa, oku kongelamo olonjo vina okuti ka ku sangiwa omanu ale oku eca otuikanda tuaco poku kundila kovitumãlo ku sangiwa omanu valua kocikanjo cavo. Kasulilo osemana tu ka eca olorevista kumue lokokanda kelaleko nda citava. Noke yoku malusula upange woku laleka omanu, tu ka kuata esanju lioku limbuka okuti tua panga onepa kupange waco kuenda omanu valua va ka kala letu kondalelo yespiritu Yehova a pongiya!

Oku ci Linga Ceca Onima

Kanyamo a pita eci manji umue ukãi a kala kupange woku eca otuikanda tuelaleko, wa komõha calua omo lialikolisilo osi a lingiwa kupange waco. Eye wa pula ndoco: ‘Omanu hẽ va ka tava oku tambula okokanda kelaleko loku enda kumue letu kohongele yofeka?’ Vocasapalo komẽle osimbu a kala kohongele yofeka, wa limbuka okuti usongui umue ukuetavo lio Hindu wa tumãla ocipepi laye kuenje wo lama. Eye wa endele kohongele yofeka momo wa tambula okokanda ketu kelaleko. Eye wa kuata apulilo alua okuti manji ukãi wo kuatisa oku sanga atambululo. Ulume waco wa lombolola esanju a kuete omo lioku kala kohongele yaco kuenda ndomo a komõha poku mola ovituwa via vamanji. Noke keteke liaco, manji wa fetikavo ombangulo lohueli yimue ya tumãlele ponele yaye. Ovo va tambuilevo okokanda kaco kelaleko kuenje va enda kohongele yofeka lokalela. Ovo va kuata esanju omo lioku kala kohongele yofeka kuenda va linga esokiyo lioku endavo Vocasapalo. Manji ukãi wa limbuka okuti upange woku eca otuikanda tuoku laleka omanu wa siata oku lingiwa unyamo lunyamo, u kuete esilivilo.
Kohongele yimue yofeka ya lingiwa, manji umue lukãi waye okuti akundi votembo yosi va lama ohueli yimue ya kuka. Ohueli yaco ya lombolola okuti onjanja yatete va enda kohongele yofeka. Ohueli okuti akundi votembo yosi va pula vati: “Helie wa ku laleki?” Ovo va tambulula hati: “Eteke limue eci tua pitĩla konjo, tua sanga okokanda kelaleko pepito lietu.” Ovo va tanga okokanda kaco kelaleko kuenda va soneha onumbi yi sangiwa kemẽla liasulako liokokanda kaco. Vamanji vakuavo kohongele yofeka va lia kumosi lohueli yaco. Ovo va sola calua ulandu weteke liaco okuti noke va linga esokiyo lioku enda vali keteke likuavo. Noke kua lingiwa esokiyo lioku va nyula omo lionjongole va lekisa.