EKUATISO KEPATA | OLONAJALI
Omãla Kuenda Ovipama Vimue vio Internet—Onepa 1: Omõlange o Sukila hẽ Oku Talavaya Lovipama Vimue Vio Internet?
Ekonomuiso limue lia lingiwa, ci soka 97 kolopulucendu viomãla va talalavaya lovipama vimue vio Internet. Omõlove hẽ o kuete ale onjongole yoku talavaya lovipama vimue vio Internet? Nda oco, kuli ovina vimue ove o sukila oku konomuisa.
Vocipama eci
Ndomo omõlove a talavaya lotembo yaye
Onumbi yo internet HelpGuide ya lombolola okuti, “ovipama vio mídia social via pangiwa locimãho coku ku taluisa, oku pita otembo yalua vo internet, loku ku vetiya oku iñilamo lonjanga yalua oco o tale nda muli ovina viokaliye.”
“Ku pita akukutu kuenda olowola osimbu ndi tala ovina viokaliye via sandekiwa vo internet. Ka ci leluka oku eca otelefone oco ndi linge ovina vikuavo vi kuete esilivilo.”—Lynne, ukuanyamo 20.
Lipula ndoco: Nda tumbika hẽ otembo omõlange a pondola oku pesila vo Internet? Omõlange o tẽla hẽ oku litumbikila olongave loku vi pokola?
Onumbi Yembimbiliya: ‘Lavululi oco vu endaendi ndomanu va kuete olondunge . . . loku talavaya ciwa lotembo yene.’—Va Efeso 5:15, 16.
Oku ecelela okuti omãla vove va talavaya lovipama vimue vio internet okuti ka ku kala onumbi yimue, ca lisoka loku va londisa kokavalu okuti, ka va tambuile epindiso li sukiliwa.
Ceci omõlove a sima catiamẽla koku linga ukamba
Ondaka “ovipama vio internet,” yi lomboloka okuti vana va kuete akamba vo internet. Pole, olonjanja vialua okuti ka va li kũlĩhĩle ciwa.
“Amalẽhe valua va sima okuti, nda omanu valua va sole ovina va sandeka, ci lekisa okuti o soliwe lomanu valua, ndaño okuti omanu vaco ka va kũlĩhĩle.”—Patricia ukuanyamo 17.
Lipula ndoco: Anga hẽ omõlange o kuete elomboloko liokuti etendelo liomanu va sole ovina a sandeka acina ci kuete esilivilo? Anga hẽ o tẽla oku linga akamba vocili?
Onumbi Yembimbiliya: “Ekamba liocili li lekisa ocisola otembo yosi kuenda olio li linga manjove kotembo yohali.”—Olosapo 17:17.
Uhayele wovisimilo
Vakuakukonomuisa va limbuka okuti, eci omanu va talavaya calua lo internet, ovo va liyeva ulika, va kuata asakalalo lesumuo lialua.
“Oku tala alitalatu vakamba oku linga ovina vimue kumosi okuti ovo ka va vi kuete ka ci kuatisa.”—Serena ukuanyamo 19.
Lipula ndoco: Anga hẽ omõlange o kuete olondunge vioku yuvula oku lisokisa lomanu vakuavo, ale wa siata oku sumua calua omo liovina omanu vakuavo va siata oku sandeka vo internet?
Onumbi Yembimbiliya: “Ka tu ka kali vakuakulipanda, ka tu ka vetiyi ocituwa coku li sokisa omunu lukuavo kuenda ka tu ka li kuateli onya omunu lukuavo.”—Va Galatia 5:26.
Ovituwa a lekisa vo internet
O internet yi pondola oku vetiya omõlove oku sanumula, oku tala omanu va kasi epolõla, loku linga ukahonga kuenda ovina via vĩha. Ndaño omõlove ka yongola oku linga ovina viaco, eye pamue o ka kisikiwa oku tala ovina viaco.
“Nda limbuka okuti eci o kasi vo internet ci leluka oku yapuisiwa lonjanga. Muli upopi walua ka wa sungulukile kuenda ovisungo vi vangula ovina ka via sungulukile.”—Linda, ukuanyamo 23.
Lipula ndoco: Anga h omõlange o kuete olondunge vioku talavaya ciwa lovimalẽho viaco? Anga hẽ o kuete ekolelo lia pama lioku yuvula oku tala ovina ka via sungulukile?
Onumbi Yembimbiliya: “Evĩho liukahonga lovina viosi via vĩha, ale ocipululu ka vi ka tukuiwe pokati kene, . . . ndaño ovilinga vi kutisa osõi, ndaño olombangulo viuveke.”—Va Efeso 5:3, 4.
Anga hẽ ndi sukila muẽle oku kuata ovipama vimue vio internet?
Oco tu kale komuenyo loku kuata esanju, ka tu sukila oku kuata ovipama vimue vio internet. Amalẽhe vamue ka va kuete ovipama vimue vio internet kuenda vana va kuatele, pole, va vi yika, ka va siatele oku vi kuatela ongeva.
“Ovipama vimue vio internet via nenela ovitangi vialua manjange. Omo liaco, ame nda nõlapo oku liwepo oku talavaya lavio. Tunde eci nda ci linga nuete esanju lialua kuenda ñasi oku talavaya ciwa lomuenyo wange.”—Nathan ukuanyamo 17.
Oku malusula: Osimbu kua ecelele okuti omõlove o kuata ocipama cimue co internet, kũlĩhĩsa utunga waye, oco o tumbike otembo a kalamo, oku kuata akamba vawa loku yuvula ovina ka via sungulukile.
Onumbi Yembimbiliya: “Ukualondunge o kũlĩhĩsa onjila yosi.”—Olosapo 14:15.