EKUATISO KEPATA | OLONJALI
Omãla Kuenda o Internet—Onepa 2: Longisa Omõlove Oku Talavaya Ciwa lo Internet
Poku kũlĩhĩsa olohele via kongelamo, olonjali vialua ka vi ecelela okuti omãla vavo va talavaya lo internet. Nda wa ecelela okuti omõlove o talavaya lo internet, o pondola oku yuvula ndati ovitangi vi yililako kuenda oku lilongisa ndomo a talavaya lo internet lonjila yimue ya sunguluka?
Vocipama cilo
Ovina vi kuete esilivilo komõlove
Ovina o sukila oku kũlĩha: Omo okuti onjongele yoku tala ovina vi kasi vo internet yi pondola oku livokiya, omõlove o sukila ekuatiso liove oco a tẽle oku talavaya ciwa lotembo a pesila poku tala ovina vo internet.
Onumbi Yembimbiliya: “Vu kũlĩha ovina via velapo vali.”—Va Filipoi 1:10.
Ovina vioku sokolola: Anga hẽ oku talavaya lo internet ci tateka omõlove oku pekela, oku linga ovopange o kosikola, ale oku kala lepata? Vakuakukonomuisa va popia okuti, omãla va sukila oku pekela ci soka olowola ecea, pole, vana va pesila olowola vialua poku tala ovina vo internet olowola va pekela ka vi tẽla epanduvali.
Ceci o sukila oku linga: Sapela lomõlove ovina vi kuete esilivilo kuenda sapeli esunga lieci ci kuetele esilivilo oku yuvula oku pesila otembo yalua poku tala vo internet. Tumbika olonumbi vioku yuvula oku kala lotelefone veliva lioku pekela. Ocimãho cove ci kale coku kuatisa omõlove oku kuata ocituwa coku likandangiya.—1 Va Korindo 9:25.
Ovisimĩlo viomõlove
Ceci o sukila oku kũlĩha: Eci umalẽhe umue a tala alitalatu avakuavo, ale ovina akamba vaye va linga, o pondola oku liyeva okuti o kasi ulika.
Onumbi Yembimbiliya: “Imbipo evĩho liosi, . . . onya.”—1 Petulu 2:1.
Oku sokolola: Anga hẽ o Internet yi vetiya omõlove umalẽhe oku liyeva okuti ka kuete emolẽho liwa? Anga hẽ eye o sima okuti vakuavo va kuete ekalo liwa komuenyo osimbu okuti eye sio?
Ceci o sukila oku linga: Sapela lomõlove olohele vi tunda koku li sokisa lavakuavo. Komãla vakãi ci pondola oku va sumuisa calua okuti omãla valume ci sule, momo ovo va sokolola calua catiamẽla koku kuata etimba liwa. O pondola oku sapuila omõlove okuti o sukila oku kuata utate poku talavaya lo Internet. Umalẽhe umue o tukuiwa Jacob wa popia hati: “Olonjanja vimue ndi nyõla asapulo amue vo Internet. Eci ca ndi kuatisa oku linga apongoloko kovina ndi yongola oku linga kuenda ndomo ndi vi tenda loku tenda vakuetu lonjila ya sunguluka.”
Ovituwa omõlove a lekisa eci a talavaya lo internet
Ceci o sukila oku kũlĩha: Oku pesila otembo yalua poku tala o internet ci sokisiwa loku kala kovaso yomanu valua. Ovina ka via sungulukile kuenda ovaima omo vi sangiwa.
Onumbi Yembimbiliya: “Imbipo ocikumbiti cosi, onyeño, oku tema, onjuela, olondaka vioku pembula kuenda ovina viosi ka via sungulukile. Pole, likuateli ocisola pokati.”—Va Efeso 4:31, 32.
Oku sokolola: Anga hẽ o internet ya siata oku vetiya omãla vove oku popia olombonde, ombuanja loku popia ovina vivĩ?
Ceci o sukila oku linga: Kuatisa omõlove ndomo a lekisa olondunge loku kuata ovituwa viwa poku talavaya lo internet. Elivulu limue li lombolola catiamẽla Komãla liti: “Eci ci linga onepa kupange wetu ndolonjali oku sapuila komãla vetu okuti, oku linga ungangala ka ku taviwa ndaño vo Internet ale polo la polo.”
Ivaluka okuti o internet hacinacimueko ci sukiliwa calua kuenda halonjali viosiko viecelela okuti omãla vavo va talavaya layo. Nda ove ecelela okuti omõlove o talavaya lo Internet, kũlĩhĩsa nda eye o tẽla oku kapa ongave kotembo a pesila kocina caco, oku kuata akamba vawa loku yuvula asapulo ka a sungulukile.