Olohuluwa Epandu Viomanu va fa Omo Lio COVID—Nye Embimbiliya li Popia?

Ocisoko Cuhayele Voluali Luosi, toke keteke 23 ya Kupemba 2022, ca lekisa okuti ci soka 6.27 kolohuluwa viomanu, ovo va fa voluali luosi omo lio COVID-19. Pole, esapulo limue lia eciwa Locisoko Cuhayele Voluali Luosi keteke 5 ya Kupemba 2022 lia lekisa okuti, etendelo liomanu va fa lialua calua. Omo liaco, kua limbukiwavo okuti vokuenda kuanyamo 2020 kuenda 2021 “etendelo liomanu va fa lo Koronavirus li panda 14.9 kolohuluwa.” Anga hẽ Embimbiliya lia tukuile ale ovitangi vi nena esumuo lialua?

Embimbiliya lia popele ale catiamẽla kafengi a laikele oku ponda omanu valua

•  Yesu wa popia hati kua laikele oku kala afengi ale ovovei vokuenda kuotembo yi tukuiwa hati “oloneke via sulako.”—Luka 21:11; 2 Timoteo 3:1.

Ocitumasuku ca Yesu ci kasi oku tẽlisiwa koloneke vilo. Oco o lilongise ovina vikuavo, tanga ocipama losapi hati: “Nye Ceca Uvangi Wokuti tu Kasi ‘Koloneke Via Sulako,’ Ale ‘Kotembo ya Sulako’?”

Embimbiliya lieca elembeleko

•  “Suku yelembeleko liosi. . . una o tu lembeleka kohali yetu yosi.”— 2 Va Korindo 1:3, 4.

Omanu vana va fisa vangandiavo va sole calua, va sanga elembeleko kesapulo Liembimbiliya. Kũlĩha vali ovina vikuavo kocipama losapi hati: “Ndomo tu Liyaka Levalo—Ceci o Sukila Oku Linga” kuenda “Ekuatiso Lia Velapo Komunu Una wa Fisa Ngandiaye.”

Embimbiliya li situlula okuti ovina vi ka kala ciwa otembo ka yi pui

•  “Usoma wove wiye. Ocipango cove ci lingiwe palo posi.”—Mateo 6:10.

Ndopo “Usoma wa Suku” u ka koka okuti, “layimue onungi yi ka popia yiti: ‘Ndi vela.’” (Marko 1:14, 15; Isaya 33:24) Tala ovideo losapi hati, Usoma wa Suku u Lomboloka Nye? oco o kũlĩhe ovina viatiamẽla kuviali wokilu kuenda oku kũlĩha ovina usoma waco u ka linga.

Tu ku laleka oco o lilongise ovina vikuavo Embimbiliya, li popia oco ove lepata liove vu kuatisiwe lalungulo alio awa kuenda olohuminyo via koleliwa.