Omanu ka va Kolelele Vali Kuvakuapulitika—Nye Embimbiliya li Popia?

Vokuenda kunyamo 2024 ku ka lingiwa etendelo lialua liocela voluali luosi. Pole, omanu valua ka va kolelele vali vakuapulitika.

• Omanu valua vo ko Amerika eci va pulisiwa va tambula okuti, “olopulitiku vialua vi vetiyiwa locipululu,” ka vi vetiyiwa lonjongole yoku potolola ovitangi viomanu.a—Pew Research Center, 19 Yenyenye Linene, 2023.

Omanu valua amalẽhe ka va kolelele vali kuvakuapulitika.

• “Amalẽhe koloneke vilo va sakalala loku sanga omunu o potolola ovitangi viavo, pole, ovo va popia okuti vakuapulitika ka va tẽla oku vi potolola.”—The New York Times, 29 ya Susu, 2024.

• “Akonomuiso a lekisa okuti, amalẽhe va kolela vali calua kolonumbi vi sangiwa vo Internet okuti kuvakuapulitika ci sule.”—The Korea Times, 22 ya Susu, 2024.

Anga hẽ tu pondola oku kolela okuti vakuapulitika va ka nena ekalo liwa liokovaso yoloneke? Kulie tu pondola oku kolela?

Lunguka lomunu o kolela

Ciwa okuti omanu va lekisa utate komunu ovo va kolela. Embimbiliya li popia okuti, “omunu wa kamba olondunge o kolela kolondaka viosi, pole, ukualondunge o kũlĩhĩsa onjila yosi.”—Olosapo 14:15.

• Oco o kuatisiwe ndomo o sanga olonumbi viocili kuenda olonumbi viesanda, tanga ocipama losapi, “Liteyuila Kasapulo Esanda.”

Ndaño omanu vana vakuapulitika okuti vakuacili kuenda va kuete ovisimĩlo viwa, ka va kuete unene woku linga cosi va yongola. Eli olio esunga lieci Embimbiliya li lunguila hati:

• “Ko ka kapi ekolelo liene kolombuale, Ndaño komõla omunu, una ka tẽla oku nena epopelo.”—Osamo 146:3.

Usongui ove o pondola oku kolela

Embimbiliya li lekisa okuti Suku wa nõla usongui umue wa loñoloha kuenda wa koleliwa okuti, Yesu Kristu. (Luka 1:32, 33) Yesu eye o Soma, Yusoma wa Suku, o kasi oku viala kilu.—Mateo 6:10.

• Lilongisa esunga lieci o sukilila oku kolela ku Yesu kuenda eci eye a ka linga oco a maleko ovitangi tu liyaka lavio. Tanga ovipama losapi “Helie Soma Yusoma wa Suku?” kuenda “Usoma wa Suku u ka Linga Nye?”