Ekuatiso Lie o Pondola Okupa Kovina Yesu a Longisa?

OCIPAMA catete, ca lekisa okuti, ovina Yesu a longisa via vetiya omanu valua. Omo liaco, vosi yetu tu sukila oku lipulisa ndoco: ‘Ekuatiso lie nda siata okupa kelongiso lia Yesu?’

Yesu wa longisa ovina vialua okuti vi pondola oku ku kuatisa komuenyo wove. Omo liaco, tu konomuisi ovina viaco ndeci: Oku pitisa kovaso ovina via velapo, oku kuata ukamba la Yehova, kuenda la vakuetu. Wa longisavo ndomo tu pondola oku tetulula ovitangi, kuenda oku yuvula ungangala.

Pitisa Kovaso Ovina Via Velapo

Koloneke vilo, omanu ka va kuete vali otembo yoku kapako ovina viespiritu omo liasakalalo omuenyo. Tu konomuisi ulandu wukuenje umue o tukuiwa hati, Jerry o kuete 20 kanyamo. Eye o sole oku vangula calua ovina viespiritu kuenda wa kapako olonumbi Viembimbiliya. Pole, wa liyeya hati: ‘Si kuete otembo yalua yoku li tumbika kovina viespiritu. Vosemana ndi kuete oloneke epandu vioku talavaya kupange woku sanda eteku. Calumingu olio lika eteke liange lioku puyuka. Pole, noke yoku linga ovopange akuavo, ndi yeva ekavo lialua.’ Nda ove o kasivo oku liyaka locitangi caco, o pondola oku kuatisiwa lovina Yesu a longisa Komunda.

Eci Yesu a kala oku longisa, wa sapuila omanu va kala oku u yevelela hati: ‘Ko ka yokoki lomuenyo wene, hoti: Tu lia nye? Tu nyua nye? Kuenda tu wala nye? Omuenyo hẽ, ka wa velelepo okuti okulia ku sule? Etimba hẽ, ka lia velelepo okuti uwalo u sule? Sokololi olonjila okuti ka vi limi, ka vi lombola, ka vi unguila volosila. Pole, Isiene wokilu o vi tekola. Ene hẽ, ka wa velelipo ca lua okuti ovio vi sule? Ko ka sakalali hoti: Tu lia nye, tu nyua nye, kuenda tu wala nye? Momo ovina viaco ovio vakualofeka va sakalala ño lavio oku vi sanda. Ene puãi, Isiene o kasi kilu wa kũlĩha ale okuti vu sesamẽla ovina viaco viosi. Puãi tete sandiliyi Usoma wa Suku kuenda esunga liaye kuenje ovina evi viosi viu vokiyiwi.’ (Mateo 6:​25-​33) Nye tu lilongisa vovinimbu evi Viembimbiliya?

Yesu ka kaile loku popia hati, ka tu sukila vali oku sanda ovina tu sukila loku tata epata lietu. Momo Embimbiliya li lungula hati: “Umue nda ka kuatisa vangandiaye, ca piãla vakuanjo yaye, ci lomboloka okuti wa likala etavo liaye, u ka tavele wo velapo.” (1 Timoteo 5:⁠8) Yesu wa kala loku popia hati, nda tua pitisa kovaso ovina viespiritu, Yehova o tu ĩha ovina vikuavo tu sukila. Oku kuama olonumbi evi, ci nena esanju lialua ndomo Yesu a ci popia hati: “Vakuosuke wovutima [okuti omanu vana va pitisa kovaso ovina viespiritu,] va sumũlũha.”​—⁠Mateo 5:⁠3.

Kuata Ukamba la Yehova

Omanu vana va pitisa kovaso ovina viespiritu, va kũlĩha esilivilo lioku kuata ukamba la Yehova. Oco hẽ, nye tu sukila oku linga nda tu yongola oku kuata ukamba lomunu umue? Ocili okuti, tu sukila oku kũlĩha ciwa omunu waco. Pole, oku kũlĩha ciwa ovisimĩlo viaye, lovituwa viaye, kuenda ovina a sole levi ka sole, cambata otembo. Cimuamue haico tu sukila oku linga, nda tu yongola oku kuata ukamba la Yehova. Eci Yesu a likutililako olondonge viaye ku Yehova wa popia hati: “Omuenyo ko pui wowu, oku ku kũlĩha ove lika vu Suku yocili, loku kũlĩhavo Yesu Kristu, u wa tuma.” (Yoano 17:⁠3) Oco tu kuate ukamba la Yehova, tu sukila oku kuata ukũlĩhĩso watiamẽla kokuaye. Ukũlĩhĩso waco u sangiwa Vembimbiliya. (2 Timoteo 3:​16) Omo liaco, tu sukila oku sokiya otembo yoku lilongisa Embimbiliya.

Etu ka tu sukila lika oku kuata ukũlĩhĩso wa Suku. Momo vohutililo yaco, Yesu wa popiavo hati: “[Ovo] va pokola kondaka yove.” (Yoano 17:⁠6) Omo liaco, tu sukilavo oku pokola kovina viosi tu lilongisa vondaka ya Suku. Oco hẽ tu pondola ndati oku linga ekamba lia Yehova? Oco tu kuate ukamba lomunu umue, tu sukilavo oku linga ovina viosi vi usanjuisa. Cimuamue haico catiamẽla ku Yehova. Olonumbi viaye ovio lika vi pondola oku tu songuila kovina viosi tu linga. Tu konomuisi ndomo olonumbi Viaye vi ecelela oku kuata ukamba la vakuetu.

Kuata Ukamba la Vakuene

Otembo yimue, Yesu wa lomboluile olusapo lumue lu lekisa esilivilo lioku lisunguluisa la vakuetu. Eye wa lombolola ulandu wa soma umue wa yonguile oku sokiya ocitangi lolonalavayi viaye vio levalele. Umue pokati kavo wo levalele olombongo vialua. Pole, ka kuatele epondolo lioku vi feta. Omo liaco, cime caye soma wa tuma oku u landisa kumue lukãi waye, lomãla vaye oco a fete ofuka yaco. Noke, ukuenje waco wa popia laye hati: “A Ñala, ngamisilepo handi kuenje hu feta cosi.” Noke, cime caye wo kuatela ohenda kuenje wo wecela ofuka yaco. Eci ukuenje waco a tunda, waka sandiliyile ukuavo wo levalele olombongo vimue vitito. Kuenje wokisika oku feta ofuka yaco. Ukuavo wo pingavo lohenda hati, ngamisilepo kamue oco ndi fete noke ofuka yove. Pole, eye ka tavele, kuenje wo leka ekõle. Noke wo kapa vokayike toke eci a feta ofuka yaco. Eci soma a yeva ondaka yaco, wa tema calua kuenje wo pulisa hati: “Ka ca ku sesamelẽle hẽ oku linga ukuene ohenda ndeci nda ku linga ohenda?” Omo liaco, soma wo kapa vokayike toke eci a feta ofuka yaco. Poku malusula ulandu waco, Yesu wa popia hati: ‘Haico Tate okasi kilu a lingavo lene nda ka weceli vakuene lutima wosi.’​—⁠Mateo 18:​23-35.

Ocili okuti, etu ka tua lipuile kuenda tua siata oku lueya lovina vialua. Lalimue eteke tuka tẽla oku feta ofuka tu kuetele Yehova omo liakandu tua siata oku u lingila. Omo liaco, tu sukila lika oku pinga ongecelo Kokuaye. Eye wa likuminya oku tu ecela kuenje wa tu sila ongangu tu sukila oku kuama. Yesu wa longisa olondonge viaye oku likutilila ku Suku hati: “Tu ecele okulueya kuetu ndeci tu ecaila ava va tu lueyela.”​—⁠Mateo 6:⁠12.

Tetulula Ovitangi

Yesu wa kũlĩhĩle ciwa ekalo liomanu. Eye wa eca olonumbi viwa vioku tetulula ovitangi. Tu konomuisi ovolandu avali akuãimo.

Yesu wa popia hati: “Wa yevi okuti ca popiwa ku vakukululu, citi: Ku ka ponde, wosi o ponda o tualiwa vekanga. Puãi ame mopia lene siti: Wosi o tema lokuavo o tualiwa vekanga.” (Mateo 5:​21, 22) Yesu wa kala oku lekisa okuti, ovisimĩlo vĩvi ovio vi tuala omunu koku linga ungangala. Momo elinga liaco liungangala li tunda vutima. Nda omanu va yuvuile oku li selekela olonyeño, voluali nda ka muli ungangala. Handi vali, nda omanu va pokuile konumbi eyi ya Yesu, voluali nda ka muli oku li ponda.

Tu konomuisa ndomo Yesu a lombolola oku kua siata oku tunda ocitangi cikuavo ci nena esumuo. Eye wa popia hati: “Wa yevi okuti ca popiwa citi: Ku ka pekelise, puãi ame mopia lene siti: U wa vanja ukãi ho liveli, vutima waye wo pekelisa ale. Nda iso liove liondio li ku lingisa ekandu li upamo, li inasi.” (Mateo 5:​27-​29) Yesu wa lekisa okuti, elinga liukahonga li tunda kovisimĩlo vĩvi vi kasi vutima. Nda omunu o yuvula oku kuata ovisimĩlo viaco vĩvi, ka wila vocitangi caco.

“Someha Osipata Yove Vocilalo Cayo”

Kuteke una Yesu a kuatiwa loku talisiwa ohali, umue pokati kolondonge viaye wopa osipata yaye oco o teyuile. Pole, Yesu wo sapuila hati: “Someha osipata yove vocilalo cayo, momo vosi va kuata osipata va nyõleha losipata.” (Mateo 26:​52) Eci kuaca omẽle, Yesu wa sapuilavo Pondio Pilatu hati: “Usoma wange hawoluali luloko. Usoma wange nda wa kaile woluali lulo, akuenje vange nda va yaka okuti si pakuiwa ku va Yudea. Usoma wange puãi hawokilulieveko.” (Yoano 18:​36) Anga elongiso lia Yesu lia kuata muẽle esilivilo?

Akristão va tete va pokuile kolonumbi via Yesu vioku yuvula oku litenga vuyaki. Elivulu limue lia lombolola hati: ‘Yesu wa longisa oku yuvula ungangala kuenda oku yuvula oku lingila vakuetu eci cĩvi. Olonumbi viaco evi vi lomboloka oku yuvula oku litenga vovoyaki. Akristão vatete va kapeleko elongiso liaco. Ovo va kũlĩhĩle okuti, elongiso liaco li lomboloka oku kala ciwa lavakuetu kuenda oku yuvula ungangala. Vetavo liavo, va kapeleko calua olonumbi viaco. Momo va kala ciwa lavakuavo. Kuenda va enda loku pisa omanu vana va litumbika kuyaki woku pesela osonde.’ Nda omanu vosi va litukula hati Akristão va pokuile kolonumbi via Yesu, voluali nda mu kasi lika ombembua.

O Pondola Oku Kuatisiwa Lelongiso Lia Yesu

Elongiso lia Yesu tua konomuisa ndeti vocipama cilo, lia sunguluka calua. Omanu va pondola lika oku kuatisiwa nda va kũlĩha ciwa elongiso liaco kuenda oku pokola kokualio.a

Olombangi via Yehova vimbo liove, vi pondola oku ku longisa ndomo o tẽla oku kuatisiwa lovina Yesu a longisa. Omo liaco, tu ku laleka oco o sandiliye Olombangi via Yehova ale o sonehela konumbi ya ku sungulukila yi kasi kemẽla 2 liokalivulu kalo.

[Etosi pombuelo yemẽla]

[Elitalatu kemẽla 5]

‘Yehova wa siata oku vi tekula’

[Elitalatu kemẽla 7]

Ovina Yesu a longisa, vi pondola oku ku kuatisa