Oku Pitila Vowola ya Sokiyiwa ci Kuete Esilivilo Lie?

Ocili okuti ka ca lelukile oku pitila vowola ya sokiyiwa. Oku linga ungende unene, oku lisinda kuakãlu, loku talavaya olowola vialua, vimue pokati kovitangi tua siata oku liyaka lavio. Pole, oku pitila selo, ci kuete esilivilo. Kovopange, omanu vosi va pitila selo, va tendiwa ndomanu vakuakuambili haivo vakualondunge. Puãi, vana va cilua ño-o otembo yosi, va kokela vakuavo owesi kuenje upange ka u lingiwa ciwa. Ondonge yi kuete ocituwa coku cilua, yi pumba ovipama vimue kosikola, kuenda ka yi kuata onima yiwa. Ombeyi yi cilua oku sanda ondotolo vowola ya sokiyiwa, ka yi kuata esaku lia suapo.

Ocili okuti, kovitumãlo vimue omanu ka va kapeleko esilivilo lioku pitila selo. Elinga liaco, li kokisa omanu oku kuata ocituwa coku cilua. Nda oco ocituwa tu kuete, tu likolisiliko oku pitaila selo. Nda tua limbuka esilivilo lioku pitila selo, tu ka likolisilako oku pitila vowola ya sokiyiwa. Oco hẽ, esunga lipi tu kuete lioku pitila selo? Ndamupi tu yula ovitangi vi tu tateka oku pitila selo? Kuenda, asumũlũho api tu lavoka oku tambula nda tua kuata ocituwa coku pitila vowola ya sokiyiwa?

Yehova Suku wa Kapako Otembo

Esunga lieci tu sukilila oku kuata ocituwa coku pitila selo, oku setukula ongangu ya Suku yetu. (Va Efe. 5:1) Yehova o tu ĩha ongangu ya velapo yoku kapako otembo. Eye ka cilua. Eye o tẽlisa ocipango caye votembo a sokiya. Konomuisa eci Yehova a sapuila Noha, eci a sokiya oku nyola oluali lua kala kotembo yaye: “Litungila ocimbaluku lovinendele.” Eci otembo ya pitilapo, Yehova wa tuma Noha oku iñila vocimbaluku loku u sapuila hati: “Pa kamba oloneke epanduvali oco ndokisa ombela kilu lieve akui akuãla kovotanya lakui akuãla kovoteke si nyõli kilu lieve oviluvo viosi nda lulika.” Kuenje, “eci oloneke epanduvali via pita etande lieya kilu lieve.” (Efet. 6:14; 7:4, 10) Sokolola eci nda ca pita la Noha lepata liaye nda ka va iñilile vocimbaluku velivala lia sokiyiwa. Ovo va kuama ongangu ya Suku yoku kapako otembo.

Eci pa pita 450 kanyamo noke Lietande, Yehova wa sapuila Avirahama okuti ombuto ya likuminyilue ya laikele oku iyilila vocikoti comõlaye. (Efet. 17:15-17) Suku wo sapuila okuti Isake wa laikele oku citiwa ‘votembo ya tukuiwa.’ Ondaka yaco yeya hẽ oku tẽlisiwa? Ovisonehua vi tu sapuila hati: “Sara yu we mina, wa citila Avirahama omõla ulume kukongo waye, kotembo yina Suku a tukuilile.”—Efet. 17:21; 21:2.

Vembimbiliya mu sangiwa ovolandu alua a lekisa okuti Suku o linga ovina votembo a sokiya. (Yer. 25:11-13; Dan. 4:20-25; 9:25) Embimbiliya li tu vetiya oku lavoka eteke lia Yehova liesombiso. Ndaño omanu va tenda okuti eteke liaco li kasi oku “cilua,” tu kuete ekolelo liokuti eteke liaco ‘liya muẽle, ka li cilua.’—Hav. 2:3.

Oku Kapako Otembo ci Kuete Esivilo Kefendelo Lietu

Vofeka ya va Isareli alume vosi va handelekiwile oku enda ‘kofesta ya Yehova’ votembo ya tukuiwa. (Ovis. 23:2, 4) Suku wa handelekelevo epuluvi lioku eca ovilumba. (Etu. 29:38, 39; Ovis. 23:37, 38) Eci ka ci lekisa hẽ okuti Suku o yongola okuti afendeli vaye va pitila selo kefendelo liaye?

Kocita catete, eci upostolo Paulu a kala oku longisa Akristão vo ko Korindo ndomo olohongele vi lingiwa, eye wa va lungula ndoco: “Ovina viosi puãi vi sokiyiwe ciwa loku lingiwa lesumbilo.” (1 Va Kor. 14:40) Eci ci lekisa okuti, olohongele Viakristão te vi fetika kelivala lia sokiyiwila. Ocituwa ca Yehova coku kapako otembo ka ca pongolokele. (Mal. 3:6) Oco hẽ, nye tu sukila oku linga oco tu pitile kolohongele Viakristão kelivala via sokiyiwila?

Ndomo tu Yula Ovitangi vi tu Kokela Oku Cilua

Vamanji vamue, va limbuka okuti oku lipongiya selo ci kuete esilivilo lialua. (Olosap. 21:5) Nda wa lipongiya eci ku kamba lika akukutu añami ñami o ka tẽla hẽ oku pitila selo? Ka tu sukila hẽ oku lipongiya selo oco okuti ndaño ‘kuiya ocitangi cimue’ tu tẽla oku pitila votembo ya sokiyiwa? (Uku. 9:11) Manji José, o kuete ocituwa coku pitila votembo ya sokiyiwa, wa popia hati: “Ocina cimue ci kuatisa omunu oku pitila selo, oku kũlĩhisa otembo yi sukiliwa koku linga ungende waco.”a

Omanu vamue, va sukila oku linga esokiyo lioku tunda selo kupange oco va tẽle oku pitila kolohongele Viakristão vowola ya sokiyiwa. Eci oco ca linga Manji umue ko Etiopia eci a limbuka okuti wa lavokaile oku pitila 45 kakukutu noke liefetikilo liohongele omo liocitangi cimue kupange. Manji u-u, wa laleka omunu a talavaya laye kupange oku iya iya selo oco a tẽle oku endaenda kolohongele. Omo liaco, manji wa likuminya oku tavayelako omunu waco olowola epandu.

Nda tu kuete omãla vatito, oku pitila kolohongele vowola ya sokiyiwa ka ca lelukile. Ndaño okuti ina eye o kuete ocikele coku pongiya omãla, omanu vosi vepata va kuete ocikundi coku eca ekuatiso liavo. Ina umue o tukuiwa hati Esperanza kofeka yo Mexico, wa siata oku pongiya omãla ecelãla likaliaye. Ovo va kuete oku upisa 5 toke 23 kanyamo. Manji Esperanza poku lombolola eci vakuepata liaye va lingainga oco va pitile kowola ya sokiyiwa, wa popia hati: Omõlange uveli wukãi, o ñuatisa oku pongiya manjaye utitopo vali. Eci ci ngecelela oku malusula upange wange wo konjo kuenda oku lipongiya selo oco tu pitile kohongele kowola ya sokiyiwa.” Epata eli lia linga esokiyo lioku tunda selo konjo, kuenda vosi yavo va likuatisa pokati oco va tẽlise esokiyo liaco.

Kuatisiwa Poku Pitila Selo Kolohongele

Oku sokolola kasumũlũho tu tambula kolohongele Viakristão, ci vokiya onjongole yetu yoku likolisilako oku pitila kowola ya sokiyiwa. Umalẽhe umue ukãi o tukuiwa hati Sandra, o kuete ocituwa coku pitila selo kolohongele, wa lombolola hati: “Oku pitila selo kolohongele, ci nyiha epuluvi lioku lama vamanji, loku sapela lavo kuenda oku va kũlĩha ciwa.” Eci tu pitila selo Konjango Yusoma, tu pondola oku kuatisiwa lovolandu a vamanji va kasi oku vumba lepandi kuenda ekolelo. Poku vangula ovina vi pamisa, tu kuatisa vamanji vosi kuenda tu “livetiya pokati . . . locisola lovilinga viwa.”—Va Hev. 10:24, 25.

Ocisungo lohutililo vioku fetika kolohongele Viakristão vi linga onepa kefendelo lietu. (Osa. 149:1) Ovisungo vietu viesivayo ku Yehova, vi tu ivaluisa ovituwa tu sukila oku kuata, kuenda vi tu vetiya oku sanjukila upange wetu woku kunda. Nye ci popiwa kohutililo yoku fetika? Kosimbu, Yehova wa tukula onembele okuti ‘onjo yaye yoku likutilila.’ (Isa. 56:7) Koloneke vilo, tu liongoluila oku likutililila Suku kolohongele vietu. Vohutililo yoku fetika, ka tu pingi lika ku Yehova espiritu sandu oco li tu songuile, tu pingavo oco ovitima vietu vi tambule loku kapako olonumbi vi ka konomuisiwa. Omo liaco, tu kuati ocimãho coku pitila selo kolohongele oco tu imbe ocisungo catete loku yeva ohutililo yoku fetika.

Manji umue ukãi o tukuiwa hati Helen, o kuete 23 kanyamo, poku lombolola esunga lieci a solele oku pitila selo kolohongele wa popia hati: “Ndi ci lingila ocisola ñuetele Yehova, momo eye wa siata oku eca olonumbi tu tambola kolohongele, oku kongelamo ovisungo kuenda ohutililo yoku fetika.” Ka tu vetiyiwa hẽ oku kuatavo ocisimĩlo caco? Eci oco tu sukila oku linga. Omo liaco, tu likolisiliko oku kuata ocituwa coku linga ovina viosi votembo ya sokiyiwa, ca piãla enene kefendelo lia Suku yocili.

[Atosi pombuelo yamẽla]

[Elitalatu kemẽla 26]

Lipongiya selo

[Elitalatu kemẽla 26]

Sokiya otembo ‘yovitangi viya ño’

[Elitalatu kemẽla 26]

Kuata asumũlũho eyilila koku pitila selo kolohongele