Apulilo Valingiwa La Vakuakutanga

Nye Yesu a yonguile oku popia lolondaka viokuti: “Ko ka simi hoti, ndeya oku nena ombembua”?

Yesu wa longisa omanu oco va li kuatele ombembua pokati. Vepuluvi limue poku longisa olondonge viaye wa va sapuila hati: “Ko ka simi hoti, ndeya oku nena ombembua palo posi; sia nenele ombembua, puãi nda nena osipata. Ndeya oku nena ukuse pokati kulume la isiaye, omõla ukãi la inaye kuenda ndatembo yukãi, lukãi womõlaye ulume.” (Mat. 10:34, 35) Nye Yesu a yonguile oku popia?

Yesu wa kũlĩhĩle okuti alongiso aye a laikele oku tepa apata, pole, eye ka yonguile oku ci linga. Omo liaco, vana va yonguile oku kala olondonge via Kristu kuenda oku papatisiwa, va sukilile oku kũlĩha ovina va laikele oku pita lavio omo yonjila va nõla. Nda ovo va lambalaliwa lohueli yavo, ale lomunu ukuavo vepata, ca laikele oku tĩla kokuavo oku amamako lekolelo kalongiso a Kristu.

Embimbiliya li vetiya Akristão oku ‘kala vakuambembua lomanu vosi.’ (Va Rom. 12:18) Pole, alongiso a Yesu, a sokisiwa “losipata” yi tepa apata. Momo lie? Momo ci tava okuti, nda umue vepata o tava alongiso a Yesu, vakuavo ka va tava, ale volambalala. Eci ku pita ocitangi caco, apata va kala “anyãli” vomunu una o lilongisa ocili.—Mat. 10:36.

Olondonge via Kristu vi kasi vapata ana okuti Halombangiko Via Yehova, olonjanja vimue vi li yaka locitangi ci kapa koseteko ocisola va kuetele Yehova la Yesu. Ndeci, apata ana okuti Halombangiko Via Yehova, pamue vi va kisika oku linga ocipito ceteke liohusa. Eci va pita voseteko yaco, helie va sukila oku sanjuisa? Yesu wa popia hati: “Wosi o sole calua isiaye ale inaye okuti ame ci sule, ka sesamẽla oku kala ondonge yange.” (Mat. 10:37) Olondaka Yesu a popia ka vi lekisa okuti, vana va yongola oku kala olondonge viaye vi liwekapo oku sola olonjali viavo. Pole, eye wa va longisa oku limbuka ocina ci kuete esilivilo komuenyo wavo. Epata lina li tu lambalala omo okuti tu kasi oku fendela Yehova, tu sukila oku amamako oku va sola, pole, tu sukila oku limbuka okuti ocisola tu kuetele Suku oco ca velapo.

Ocili okuti, oku lambalaliwa lepata ka ca lelukile. Pole, olondonge via Yesu via kapako olondaka viaye viokuti: “Wosi ka tava oku ambata uti waye wekangiso oco a ñuame, ka sesamẽla oku kala ondonge yange.” (Mat. 10:38) Pole, Ukristão oku pandikisa kelambalalo, onjila yimue yi lekisa okuti tua tava oku kala olondonge via Kristu. Handi vali, tu lavoka okuti, omo lioku amamako oku lekisa ovituwa viwa, epata lietu li linga apongoloko loku tava kesapulo Liembimbiliya.—1 Pet. 3:1, 2..