Obo re se Vwo Phi Ebẹnbẹn Kparobọ

Wẹ vẹ ọrivẹ wẹn da ghwa rọvwọn nu, ovwan che rhiẹromrẹ ebẹnbẹn sansan. Ọkiọvo ebẹnbẹn nana sa vwomaphia keridie obo rẹ ovwan ni emu wan vẹ iroro rẹ ovwan fẹnẹ ohwohwo. Ebẹnbẹn ji se nẹ asan ọfa rhe yẹrẹ obo ra vwẹro roro-o sa vwomaphia.

Wo se roro nẹ wọ sa djẹ kẹ ebẹnbẹn wẹn, jẹ Baibol na tare nẹ, e jẹ avwanre hirhopharo ku ebẹnbẹn avwanre. (Matiu 5:​23, 24) Wo se phi ebẹnbẹn wẹn kparobọ, siẹrẹ wọ da vwẹ iji ri Baibol na vwo ruiruo.

1 OVWAN TOTA KPAHEN EBẸNBẸN NA

OBO RI BAIBOL NA TARE: “O vwo . . . ọke ra vwọ ta ota.” (Aghwoghwo 3:​1, 7) Ofori nẹ ovwan ghwọrọ ọke vwọ tota kpahen ebẹnbẹn na. Ta evun wẹn vwọ kẹ ọrivẹ wẹn, wọ me vuẹ obo wo roro kpahen ota na. “Ta uyota” kẹ ọrivẹ wẹn ọkeneje. (Ẹfesọs 4:​25) Ọ da tobọ dianẹ aphro ọgangan guọnọ vwomaphia, sun oma wẹn o vwo jẹ ohọnre efio. Ota re bọrọbọrọ nẹrhẹ a sa kẹnoma kẹ ohọnre.​—⁠Isẹ 15:4; 26:⁠20.

Iroroẹjẹ rẹ ọrivẹ wẹn rhe je we dede-e, je tota esiri kẹ, wo ji dje ẹguọnọ vẹ ọghọ vwọ kẹ. (Kọlose 4:⁠6) Davwẹngba ovwan vwọ rhuẹrẹ ota na phiyọ kpakpata, ovwan kẹnoma kẹ uruemu revwo jẹ ota ẹkpahọn kẹ ohwohwo.​—⁠Ẹfesọs 4:​26.

OBO WO SE RU:

• Guọnọ ọke ro fori vwọ tota kpahen ebẹnbẹn na

• Ọrivẹ wẹn da tota, nabọ kerhọ, wo gbota phiyẹ unu rọye-en. Wọ je cha ta ẹkẹn unu wẹn obọ

2 KERHỌ, WO VWO VWO ẸRUỌ RẸ OBO RẸ ỌRIVẸ WẸN TA

OBO RI BAIBOL NA TARE: “Wa guọnọ ohwohwo vẹ omamọ rẹ ẹguọnọ; we sivwin oseghe rẹ ọghọemuo-o.” (Rom 12:10) Obo wọ kerhọ wan ghanre mamọ. Womarẹ ‘erorokẹ . . . vẹ omaevwokpotọ,’ davwẹngba wo vwo vwo ẹruọ rẹ obo rẹ ọrivẹ wẹn ta. (1 Pita 3:8; Jems 1:​19) Wo me ruẹ kerẹ ohwo rọ kerhọ-ọ. Ọ da dia obo wo se ru, siobọ nẹ obo wo ruẹ eje wọ nabọ kerhọ rẹ ọrivẹ wẹn, yẹrẹ wọ sa vuẹ nẹ ọ diẹ ọkiọfa. Wọ da reyẹ ubiẹro rẹ omamọ ugbeyan vwo ni ọrivẹ wẹn, wọ cha “fobọ mu ophu-u.”​—⁠Aghwoghwo 7:⁠9.

OBO WO SE RU:

• Nabọ kerhọ rẹ ọrivẹ wẹn ọ da tobọ dianẹ obo rọ ta na nẹrhẹ ophu mu we

• Roro kpahen oboresorọ ọrivẹ wẹn vwọ ta obo rọ ta na. Vwo oniso rẹ obo oma ruo wan vẹ upho rọ vwọ tota na

3 RU NENE OBO RẸ OVWAN TARE NA

OBO RI BAIBOL NA TARE: “Vwẹ evun rẹ owian ejobi erere herọ, ẹkẹvuọvo ota ofefe diodi ghwa ọbẹvwẹ cha.” (Isẹ 14:23) Ofori nẹ a rhọnvwe phiyẹ obo ra cha rhuẹrẹ ebẹnbẹn na wan, ẹkẹvuọvo ọyena ọvo teri-i. Ofori nẹ wo ru nene obo ovwan rhọnvwe phiyọ na. Dedena, ọ guọnọ ẹgbaẹdavwọn vẹ owian ọgangan; jẹ erere herọ siẹrẹ e de ru ọtiọyen. (Isẹ 10:⁠4) Siẹrẹ ovwan da wian kuẹgbe, ovwan che ‘vwo erere oyoyovwin’ fikirẹ owian ọgangan rẹ ovwan.​—⁠Aghwoghwo 4:⁠9.

OBO WO SE RU:

• Ovwan jiroro rẹ obo rẹ ovwan ohwo ọvuọvo che ru, rere ovwan se vwo phi obẹnbẹn na kparobọ

• Ovwan fuẹrẹn ẹyan-obaro ovwan, nọke ra ruọke