Obo ra Ghwọrọ Igho Wan

Avwanre eje guọnọ igho a ke sa dẹ erọnvwọn rẹ orua avwanre guọnọre. (Isẹ 30:⁠8) Kidie, igho ọyen “ekpọfia.” (Aghwoghwo 7:​12) Ọkiọvo, ọ sa dia bẹnbẹn rẹ aye gbẹ ọshare vwọ tota kpahen igho, ẹkẹvuọvo wo jẹ igho sua ebẹnbẹn vwẹ orọnvwe wẹ-ẹn. (Ẹfesọs 4:​32) Ofori nẹ aye gbẹ ọshare vwẹroso ohwohwo, je wian kugbe vwo brorhiẹn rẹ obo rẹ ayen cha ghwọrọ igho wan.

1 OVWAN NABỌ JIRORO

OBO RI BAIBOL NA TARE: “Ono vwẹ usun rẹ ovwan, rọ guọnọ bọn ohẹrhẹ, ro de je tidia te otọ roro unu ro muru, so se vwo obo ro te vwo ruo gba?” (Luk 14:28) Ofori nẹ ovwan jiroro kugbe kpahen obo rẹ ovwan cha ghwọrọ igho wan. (Emọs 3:⁠3) Riẹn obo wọ guọnọ dẹ vẹ uche igho wo vwori. (Isẹ 31:16) Ọ diẹ igho de rhe we, ku wọ ghwa dẹ obo ri je we eje-e. Kẹnoma kẹ ravwọ dẹ emu riosa. Dẹ obo rẹ igho wẹn muru.​—⁠Isẹ 21:5; 22:⁠7.

OBO WO SE RU:

• Siẹrẹ igho de chekọ vwẹ obọ ovwan vwẹ oba emeranvwe na, ovwan brorhiẹn rẹ obo rẹ ovwan che vwo ru

• Ọ da rha dianẹ igho na te ghwọrọ-ọ, ovwan gbe si obọ rẹ eghwaghwọrọ rẹ ovwan kpotọ. Kerẹ udje, ovwan se chere emu rẹ ovwan ukperẹ ovwan vwọ sa emu re

2 OVWAN RHIEVUN KẸ OHWOHWO JE VWẸ ẸRO ABAVO VWO NI IGHO ẸGHWỌRỌ

OBO RI BAIBOL NA TARE: “Wa ta uyota ke ohwohwo.” (Zekaraya 8:​16) Fuevun vuẹ ọrivẹ wẹn kpahen uche igho wọ mrẹ vẹ obo wọ ghwọrọ.

Wọ da guọnọ dẹ okporọnvwọn, ofori nẹ wẹ vẹ ọrivẹ wẹn jiroro kpahọn tavwen. (Isẹ 13:10) Ufuoma cha dia evunrẹ orọvwen ovwan siẹrẹ ovwan da jiroro tavwen ovwan ke ghwọrọ igho. E jẹ igho ru wọ mrẹ, dia ọ rẹ orua na eje, ukperẹ rọ vwọ dia ọ romobọ wẹn.​—⁠1 Timoti 5:⁠8.

OBO WO SE RU:

• Ovwan rhọnvwe phiyọ uche igho rẹ ohwo vuọvo sa ghwọrọ komobọ

• Ovwan hẹrhẹ nẹ obẹnbẹn vwomaphia tavwen ovwan ke tota kpahen igho-o